Te Osɔlemɔi Haa Anaa Bo Tɛŋŋ?
Te Osɔlemɔi Haa Anaa Bo Tɛŋŋ?
“Bo ni oboɔ sɔlemɔ toi, bo oŋɔɔ heloo fɛɛ baa.”—LALA 65:3.
1, 2. Mɛni hewɔ Yehowa tsuji baanyɛ amɛkɛ nɔmimaa asɔle lɛ?
YEHOWA boɔ etsuji anɔkwafoi lɛ atoi be fɛɛ be. Wɔbaanyɛ wɔná nɔmimaa akɛ kɛ́ wɔsɔle lɛ, eboɔ wɔ toi. Kɛ́ Yehowa Odasefoi akpekpei abɔ ni yɔɔ lɛ sɔle amɛha Nyɔŋmɔ akɛ aŋkroaŋkroi yɛ be kome too lɛ nɔŋŋ mli po lɛ, ebaanyɛ ebo amɛteŋ mɔ fɛɛ mɔ toi.
2 Akɛni lalatsɛ David yɛ nɔmimaa akɛ Nyɔŋmɔ boɔ efaikpamɔi atoi hewɔ lɛ, ela akɛ: “Bo ni oboɔ sɔlemɔ toi, bo oŋɔɔ heloo fɛɛ baa.” (Lala 65:3) Akɛni David ji Yehowa jálɔ anɔkwafo hewɔ lɛ, Yehowa ha esɔlemɔi ahetoo. Belɛ, esa akɛ wɔbi wɔhe akɛ: ‘Ani misɔlemɔi haa anaa akɛ mikɛ mihiɛ fɔ̃ɔ Yehowa nɔ, ni ákɛ anɔkwa jamɔ ji nɔ̃ titri ni kã mitsui nɔ? Te misɔlemɔi haa anaa mi tɛŋŋ?’
Okɛ Heshibaa Abɛŋkɛ Yehowa
3, 4. (a) Mɛɛ su esa akɛ wɔkɛsɔle? (b) Mɛni esa akɛ wɔfee kɛ́ esha ko ni yɔɔ hiɛdɔɔ ni wɔfee lɛ miihao ‘wɔjwɛŋmɔ’?
3 Kɛ́ Nyɔŋmɔ baabo wɔsɔlemɔi atoi lɛ, no lɛ esa akɛ wɔkɛ heshibaa asɔle. (Lala 138:6) Esa akɛ wɔbi Yehowa ni eka wɔ ekwɛ taakɛ David fee lɛ. Ekɛɛ Yehowa akɛ: “Mawu, taomɔ mimli, ni ole mitsuiŋ; kaa mi okwɛ, ni oyoo mijwɛŋmɔi! Ni okwɛ akɛ minyiɛ gbɛ fɔŋ ko nɔ lo, ni okpla mi kɛya naanɔ gbɛ lɛ nɔ!” (Lala 139:23, 24) Esa akɛ wɔsɔle ni wɔŋmɛ Nyɔŋmɔ gbɛ hu ni epɛi wɔmli ní wɔkɛ e-Wiemɔ lɛ mli ŋaawoo lɛ atsu nii. Yehowa baanyɛ akpla wɔ kɛya “naanɔ gbɛ lɛ nɔ,” ni tsɔɔ akɛ ebaanyɛ eye ebua wɔ ni wɔfee nibii ni baaha wɔná naanɔ wala.
4 Ni kɛ́ esha ko ni yɔɔ hiɛdɔɔ ni wɔfee lɛ miihao ‘wɔjwɛŋmɔ’ hu? (Nyɛkanea Lala 32:1-5.) Kɛ́ wɔhenilee miihao wɔ ni wɔku wɔhiɛ wɔshwie nɔ lɛ, ebaanyɛ eha wɔmli nu aŋa tamɔ bɔ ni tso mli nu ŋaa yɛ latsaa beaŋ lɛ. Esha ni David fee lɛ haaa ená miishɛɛ, ni ekolɛ ewo lɛ hela. Shi beni ejaje etsɔɔ Nyɔŋmɔ lɛ, ehe jɔ lɛ naakpa! Ekã shi faŋŋ akɛ David ná miishɛɛ waa beni enu he akɛ Yehowa ‘eŋɔ enɔtɔmɔ lɛ efa’ lɛ lɛ. Kɛ́ mɔ ko jaje ehe esha etsɔɔ Nyɔŋmɔ lɛ, ehe baanyɛ ajɔ lɛ, ni asafoŋ onukpai lɛ ní eeekɛɛ koni amɛye amɛbua lɛ lɛ hu baaha ená ekɛ Nyɔŋmɔ teŋ wekukpaa kpakpa ekoŋŋ.—Abɛi 28:13; Yak. 5:13-16.
Kpa Nyɔŋmɔ Fai ni Oda Lɛ Shi
5. Kɛ́ nɔ ko ha wɔhao lɛ, mɛni esa akɛ wɔfee?
5 Kɛ́ nɔ ko ha wɔhao lɛ, esa akɛ wɔkɛ Paulo ŋaawoo lɛ atsu nii. Ekɛɛ akɛ: “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsia nyɛtutɔmɔi lɛ atã yɛ Nyɔŋmɔ hiɛ.” (Fili. 4:6) Esa akɛ wɔkpa Yehowa fai ni eye ebua wɔ ni etsɔɔ wɔ gbɛ, titri lɛ kɛ́ oshara ko banina wɔ loo aawa wɔyi.
6, 7. Mɛɛ yiŋtoi ahewɔ esa akɛ wɔda Nyɔŋmɔ shi kɛ́ wɔmiisɔle lɛ?
6 Shi kɛ́ ja nɔ ko he miihia wɔ dani wɔsɔleɔ lɛ, mɛɛ su no tsɔɔ akɛ wɔyɔɔ? Paulo kɛɛ akɛ esa akɛ ‘wɔkɛ shidaa’ atsĩ wɔtutɔmɔi lɛ atã yɛ Nyɔŋmɔ hiɛ. Ekã shi faŋŋ akɛ esa akɛ wɔda Nyɔŋmɔ shi taakɛ David fee lɛ. Ekɛɛ akɛ: “Bo, Yehowa, onɔ̃ ji dalɛ kɛ hewalɛ kɛ anunyam kɛ kunimyeli kɛ agbojee; ejaakɛ nɔ fɛɛ nɔ ni yɔɔ ŋwɛi kɛ shikpɔŋ lɛ nɔ lɛ onɔ̃ ni. Bo, Yehowa, onɔ̃ ji maŋtsɛyeli lɛ, ni bo ji mɔ ni ta nii fɛɛ nɔ akɛ yitso! . . . Wɔ-Nyɔŋmɔ, wɔmiidao shi ni wɔmiijie ohiɛnyam gbɛi lɛ yi!”—1 Kron. 29:11-13.
7 Yesu da Nyɔŋmɔ shi beni abaaye nii, ni eda Nyɔŋmɔ shi hu dani aye aboloo lɛ ni anu wein lɛ yɛ Nuŋtsɔ lɛ Gbɛkɛnaashi Niyenii lɛ shishi. (Mat. 15:36; Mar. 14:22, 23) Esa akɛ wɔ hu wɔjie hiɛsɔɔ ni tamɔ nakai nɔŋŋ kpo, ni ‘wɔda Yehowa shi’ yɛ “enaakpɛɛnii ni etsuɔ ehaa gbɔmɛi abii lɛ,” ‘ejalɛ kojomɔi lɛ,’ kɛ ewiemɔ loo eshɛɛ sane ni yɔɔ Biblia lɛ mli lɛ hewɔ.—Lala 107:15; 119:62, 105.
Sɔlemɔ Oha Mɛi Krokomɛi
8, 9. Mɛni hewɔ esa akɛ wɔsɔle wɔha wɔnyɛmimɛi Kristofoi lɛ?
8 Ekã shi faŋŋ akɛ wɔsɔleɔ wɔhaa wɔ diɛŋtsɛ wɔ he, shi esa akɛ wɔsɔle wɔha mɛi krokomɛi ní Kristofoi ni wɔleee amɛ lɛ po fata he. Eyɛ mli akɛ ekolɛ bɔfo Paulo leee Kristofoi fɛɛ ni yɔɔ Kolose lɛ moŋ, shi eŋma akɛ: “Wɔdaa Nyɔŋmɔ kɛ wɔ-Nuŋtsɔ Yesu Kristo tsɛ lɛ shi yɛ nyɛhewɔ daa nɛɛ yɛ wɔsɔlemɔi amli, akɛni wɔnu nyɛ Kristo Yesu nɔ hemɔkɛyeli kɛ nyɛsuɔmɔ ni nyɛkɛsumɔɔ hetselɔi lɛ fɛɛ lɛ he lɛ.” (Kol. 1:3, 4) Paulo sɔle eha Kristofoi ni yɔɔ Tesalonika lɛ hu. (2 Tes. 1:11, 12) Sɔlemɔ ni tamɔ nɛkɛ lɛ haa anaa mɛi ní wɔ ji kɛ bɔ ni wɔbuɔ wɔnyɛmimɛi Kristofoi lɛ wɔhaa.
9 Kɛ́ wɔsɔleɔ wɔhaa Kristofoi ni afɔ amɛ mu lɛ kɛ amɛnanemɛi “tooi krokomɛi” lɛ, etsɔɔ akɛ Nyɔŋmɔ asafo lɛ kã wɔtsui nɔ. (Yoh. 10:16) Paulo kɛɛ enyɛmimɛi Kristofoi lɛ koni amɛsɔle amɛha lɛ bɔni afee ni ‘aŋɔ wiemɔ awo enaa, ní ekɛ ekãa ajaje sanekpakpa lɛŋ teemɔŋ sane lɛ.’ (Efe. 6:17-20) Ani wɔ hu wɔsɔleɔ wɔhaa wɔnyɛmimɛi Kristofoi krokomɛi yɛ gbɛ ni tamɔ nakai nɔŋŋ nɔ?
10. Kɛ́ wɔsɔleɔ wɔhaa mɛi krokomɛi lɛ, mɛɛ hewalɛ ebaanyɛ ená yɛ wɔ nɔ?
10 Kɛ́ wɔsɔleɔ wɔhaa mɛi krokomɛi lɛ, ebaanyɛ eha wɔná amɛhe jwɛŋmɔ kpakpa. Kɛ́ wɔnyaaa mɔ ko he lɛ, aso kɛ́ wɔsɔle wɔha lɛ lɛ, no yeŋ ebuaŋ wɔ koni wɔjie suɔmɔ kpo wɔtsɔɔ lɛ? (1 Yoh. 4:20, 21) Sɔlemɔi ni tamɔ nɛkɛ lɛ woɔ mɔ hewalɛ ni ehaa ekomefeemɔ hiɔ wɔkɛ wɔnyɛmimɛi lɛ ateŋ. Kɛfata he lɛ, sɔlemɔi ni tamɔ nɛkɛ lɛ tsɔɔ akɛ wɔyɛ suɔmɔ ni tamɔ Kristo nɔ̃ lɛ eko. (Yoh. 13:34, 35) Nakai suɔmɔ lɛ ji Nyɔŋmɔ mumɔ lɛ yibii lɛ fã. Ákɛ aŋkroaŋkroi lɛ, ani wɔsɔleɔ wɔbiɔ Yehowa ni eha wɔ mumɔ krɔŋkrɔŋ lɛ koni eye ebua wɔ ni wɔwo mumɔ lɛ yibii ni ji suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, kɛ hiɛshikamɔ lɛ? (Luka 11:13; Gal. 5:22, 23) Kɛ́ wɔfee nakai lɛ, wɔwiemɔi kɛ wɔnifeemɔi baatsɔɔ akɛ wɔhiɛ kã, ni wɔmiinyiɛ yɛ mumɔ lɛ naa.—Nyɛkanea Galatabii 5:16, 25.
11. Mɛni hewɔ obaakɛɛ akɛ tɔmɔ bɛ he akɛ wɔɔkɛɛ mɛi ni amɛsɔle amɛha wɔ lɛ?
11 Kɛ́ wɔná wɔle akɛ eewa eeha wɔbii lɛ akɛ amɛaaye anɔkwa kɛ́ amɛmiifee kaa yɛ skul lɛ, esa akɛ wɔsɔle wɔha amɛ ní wɔkɛ Ŋmalɛ lɛ aye abua amɛ bɔni afee ni amɛye anɔkwa ní amɛkafee nɔ̃ fɔŋ ko. Paulo kɛɛ Kristofoi ni hi Korinto lɛ akɛ: “Miikpa Nyɔŋmɔ fai, koni nyɛkafee nɔ ko fɔŋ ko kwraa.” (2 Kor. 13:7) Kɛ́ wɔjɛ heshibaa mli wɔsɔle yɛ gbɛ ni tamɔ nɛkɛ nɔ lɛ, esaa Yehowa hiɛ ni enaa wɔhe miishɛɛ. (Nyɛkanea Abɛi 15:8.) Wɔbaanyɛ wɔkɛɛ mɛi ni amɛsɔle amɛha wɔ taakɛ bɔfo Paulo fee lɛ. Eŋma akɛ: “Nyɛsɔlea nyɛhaa wɔ; ejaakɛ wɔhiɛ ka nɔ akɛ wɔyɛ henilee kpakpa, ni wɔmiitao akɛ wɔba wɔjeŋ fɛfɛo yɛ nii fɛɛ mli.”—Heb. 13:18.
Wɔsɔlemɔi Jieɔ Wɔsui Krokomɛi Akpo
12. Mɛɛ nibii titrii esa akɛ wɔsɔle wɔbi?
12 Ani wɔsɔlemɔi haa anaa akɛ wɔji Yehowa Odasefoi ni yɔɔ miishɛɛ ni kɛ hiɛdɔɔ tsuɔ nii? Ani wɔsɔleɔ titri kɛhaa Nyɔŋmɔ suɔmɔnaa nifeemɔ, Maŋtsɛyeli shɛɛ sane lɛ shiɛmɔ, Yehowa nɔyeli lɛ bembuu, kɛ egbɛi lɛ hetsemɔ? Esa akɛ enɛɛmɛi afee nibii titrii ni wɔsɔleɔ wɔbiɔ taakɛ Yesu sɔlemɔ he nɔkwɛmɔnɔ lɛ tsɔɔ lɛ. Eje shishi akɛ: “Wɔtsɛ ni yɔɔ ŋwɛi, ogbɛi lɛ he atse; omaŋtsɛyeli lɛ aba; afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.”—Mat. 6:9, 10.
13, 14. Mɛni wɔsɔlemɔi haa anaa yɛ wɔhe?
13 Wɔsɔlemɔi haa anaa sui ni wɔyɔɔ, nibii ni wɔsumɔɔ, kɛ nibii ni wɔshweɔ. Yehowa le mɛi tuuntu ni wɔ ji. Abɛi 17:3 lɛ kɛɔ akɛ: “Niiahetsuumɔ kukwɛi lɛ, eyɛ ha jwiɛtɛi, ni flɔnɔɔ yɛ ha shika; shi Yehowa ji mɔ ni kaa tsuii ekwɛɔ.” Nyɔŋmɔ naa nɔ ni yɔɔ wɔtsuiaŋ. (1 Sam. 16:7) Ele bɔ ni wɔnaa Kristofoi akpeei, wɔsɔɔmɔ nitsumɔ lɛ, kɛ wɔnyɛmimɛi Kristofoi lɛ wɔhaa. Yehowa le bɔ ni wɔnaa Kristo ‘nyɛmimɛi’ lɛ wɔhaa. (Mat. 25:40) Kɛji nɔ ni wɔsɔleɔ yɛ he lɛ ji nɔ̃ diɛŋtsɛ ni kã wɔtsui nɔ lɛ, ele, ni kɛ́ wiemɔi amli kɛkɛ wɔtiɔ hu ele. Yesu kɛɛ akɛ: “Kɛ́ nyɛmiisɔle lɛ, nyɛkawiea trilii tamɔ wɔŋjalɔi lɛ; shi amɛsusuɔ [yɛ gbɛ ni ejaaa nɔ] akɛ amɛwiemɔ babaoo hewɔ aaabo amɛ toi.”—Mat. 6:7.
14 Wiemɔi ni wɔkɛtsuɔ nii yɛ wɔsɔlemɔ mli lɛ hu tsɔɔ bɔ ni wɔkɛ wɔhe fɔ̃ɔ Nyɔŋmɔ nɔ. David kɛɛ akɛ: “[Yehowa] otsɔ abobaahe kɛ mɔɔ ní wa oha mi yɛ henyɛlɔ lɛ hiɛ. Mahi obuu lɛ mli kɛya naanɔ, maba abo yɛ ofiji ashishi teemɔhe lɛ!” (Lala 61:4, 5) Kɛ́ Nyɔŋmɔ ‘shi ebuu lɛ eto wɔnɔ’ yɛ mfonirifeemɔŋ lɛ, ebuɔ wɔhe ni wɔfeɔ shweshweeshwe. (Kpoj. 7:15) Kwɛ bɔ ni wɔtsui nyɔɔ wɔmli akɛ wɔɔtsi wɔbɛŋkɛ Yehowa yɛ sɔlemɔ mli ni wɔná nɔmimaa akɛ kɛ́ wɔkɛ wɔhemɔkɛyeli lɛ he kaa ko kpe lɛ, ‘eyɛ wɔsɛɛ’!—Nyɛkanea Lala 118:5-9.
15, 16. Kɛ́ wɔmiishwe sɔɔmɔ hegbɛ ko lɛ, mɛni sɔlemɔ baanyɛ aye abua wɔ ni wɔyɔse?
15 Kɛ́ wɔjɛ anɔkwayeli mli wɔsɔle wɔha Yehowa ni wɔtsĩ wɔyiŋtoi atã lɛ, no baanyɛ aye abua wɔ ni wɔyoo kɛji nakai yiŋtoi lɛ ja. Ákɛ nɔkwɛmɔnɔ lɛ, ani yiŋtoo kpakpa ni wɔyɔɔ akɛ wɔye wɔbua ní Maŋtsɛyeli lɛ he nibii lɛ aya hiɛ lɛ hewɔ wɔsumɔɔ akɛ wɔná sɔɔmɔ hegbɛ yɛ Nyɔŋmɔ webii lɛ ateŋ lɛ? Loo akɛni wɔmiitao mɛi ‘anɔ onukpa wɔye’ ní ‘wɔye amɛnɔ odehei asane’ po lɛ hewɔ? Jeee nakai esa akɛ nibii aya lɛ yɛ Yehowa webii ateŋ. (Nyɛkanea 3 Yohane 9, 10; Luka 22:24-27.) Kɛ́ jeee yiŋtoi kpakpai ahewɔ wɔtaoɔ sɔɔmɔ hegbɛ lɛ, anɔkwayeli mli ni wɔɔjɛ wɔsɔle wɔha Yehowa Nyɔŋmɔ lɛ baaha wɔna enɛ faŋŋ, ni no baaye abua ni wɔfee tsakemɔi koni amɛkahe shi yɛ wɔtsui mli.
16 Ekolɛ ŋamɛi ni ji Kristofoi lɛ baashwe waa akɛ amɛwumɛi atsɔmɔ asafoŋ sɔɔlɔi ní sɛɛ mli lɛ amɛtsɔmɔ nɔkwɛlɔi loo asafoŋ onukpai. Nyɛmimɛi yei nɛɛ baanyɛ asɔle yɛ enɛ he, shi esa akɛ amɛtsu amɛsɔlemɔ lɛ he nii kɛtsɔ amɛjeŋ ní amɛaaba jogbaŋŋ lɛ nɔ. Enɛ he miihia ejaakɛ kɛ́ nuu ko baaná sɔɔmɔ hegbɛ lɛ, akwɛɔ bɔ ni eweku mli bii lɛ wieɔ kɛ bɔ ni amɛfeɔ amɛnii amɛhaa.
Beni Wɔdamɔ Mɛi Anajiaŋ Kɛmiisɔle yɛ Henaabuamɔi Ashishi
17. Mɛni hewɔ kɛ́ wɔ pɛ wɔmiisɔle lɛ ehi akɛ wɔhi he ko ni mɛi bɛ jɛmɛ lɛ?
17 Bei pii lɛ Yesu gbalaa ehe shi ni ekometoo eyasɔleɔ ehaa e-Tsɛ lɛ. (Mat. 14:13; Luka 5:16; 6:12) Ehe miihia ni wɔ hu wɔfee nakai nɔŋŋ. Kɛ́ wɔsɔle kpoo yɛ he ko ni yɔɔ dioo lɛ, ekã shi faŋŋ akɛ wɔbaakpɛ yiŋ ní baasa Yehowa hiɛ ní baaha wɔ kɛ lɛ teŋ wekukpaa lɛ mli awa. Shi Yesu sɔle hu yɛ mɛi ahiɛ, ni ehi akɛ wɔɔsusu gbɛ nɔ ni wɔɔtsɔ wɔfee enɛ yɛ gbɛ ni ja nɔ lɛ he.
18. Mɛɛ otii komɛi esa akɛ nyɛmimɛi hii aha ehi amɛjwɛŋmɔ mli kɛ́ amɛdamɔ asafo lɛ najiaŋ kɛmiisɔle?
18 Hii anɔkwafoi damɔɔ asafo lɛ najiaŋ ni amɛsɔleɔ yɛ Kristofoi akpeei ashishi. (1 Tim. 2:8) Kɛ́ mɔ ni damɔ asafo lɛ najiaŋ esɔleɔ lɛ gbe sɔlemɔ lɛ naa lɛ, esa akɛ mɛi ni ebua amɛhe naa yɛ kpee lɛ shishi lɛ akɛɛ “amen” ní shishi ji “aba mli nakai.” Shi esa akɛ amɛkpɛlɛ nɔ ni asɔle yɛ he lɛ nɔ dani amɛkɛɛ amen. Yɛ sɔlemɔ he nɔkwɛmɔnɔ ni Yesu kɛha lɛ mli lɛ, ewieee nɔ ko ni ha mɛi ahe jɔ̃ amɛhe loo nɔ ko ni baagba amɛnaa. (Luka 11:2-4) Ni kɛlɛ, etsĩii etoibolɔi lɛ ateŋ mɔ fɛɛ mɔ hiamɔ nii loo naagbai lɛ fɛɛ atã yɛ esɔlemɔ lɛ mli. Obaanyɛ owie nibii ni gbaa onaa lɛ ahe kɛ́ okome oosɔle, shi esaaa akɛ ofeɔ nakai kɛ́ odamɔ mɛi anajiaŋ kɛmiisɔle yɛ henaabuamɔi ashishi. Ni kɛ́ wɔdamɔ mɛi anajiaŋ kɛmiisɔle yɛ henaabuamɔi ashishi lɛ, esaaa akɛ wɔŋɔɔ teemɔŋ saji wɔfataa sɔlemɔ lɛ he.
19. Te esa akɛ wɔfee wɔnii wɔha tɛŋŋ beni adamɔ wɔnajiaŋ asɔleɔ yɛ kpeei ashishi lɛ?
19 Kɛ́ mɔ ko damɔ wɔnajiaŋ kɛmiisɔle yɛ henaabuamɔ ko shishi lɛ, esa akɛ wɔjie ‘Nyɔŋmɔ gbeyeishemɔ’ kpo. (1 Pet. 2:17) Nibii komɛi yɛ ni kɛ́ afee yɛ he ko ni sa yɛ be ni sa mli lɛ tɔmɔ bɛ he, shi ebafeŋ nɔ ni sa yɛ Kristofoi akpeei ashishi. (Jaj. 3:1) Ákɛ nɔkwɛmɔnɔ lɛ, ŋɔɔ lɛ akɛ mɔ ko kɛɛ mɛi ni yɔɔ Kristofoi akpeei ko shishi lɛ ateŋ mɛi fioo ko loo mɛi babaoo akɛ amɛmɔmɔ amɛniji amli beni asɔleɔ lɛ. Enɛ baanyɛ agbala nyɛmimɛi lɛ kɛ mɛi ni afɔ̃ amɛ nine kɛba kpeei lɛ shishi ní kɛ wɔ ehiɛɛɛ hemɔkɛyeli kome lɛ ateŋ mɛi komɛi ajwɛŋmɔ loo egba amɛ naa. Ekolɛ nuu ko kɛ eŋa baanyɛ amɛkɛ hiɛshikamɔ amɔmɔ amɛniji amli kɛ́ aasɔle yɛ kpee shishi, shi kɛ́ amɛfua amɛhe lɛ, ebaanyɛ etɔ̃tɔ̃ mɛi ni hiŋmɛi baagba amɛ nɔ lɛ anane. Amɛbaasusu akɛ yɛ nɔ̃ najiaŋ ni esa akɛ nuu lɛ kɛ yoo lɛ ajie Yehowa gbeyeishemɔ kpo lɛ, amɛmiijie nuu kɛ yoo teŋ suɔmɔ kpo amɛmiitsɔɔ amɛhe. Akɛni wɔyɛ bulɛ kpele wɔha Yehowa hewɔ lɛ, nyɛhaa ‘wɔfea nɔ fɛɛ nɔ wɔkɛwoa Nyɔŋmɔ hiɛ nyam,’ ni wɔkwa nifeemɔi ni baagbala mɛi ajwɛŋmɔ, ebaaha mɛi ahiɛ afee amɛ yaa, loo ebaatɔ̃tɔ̃ mɛi anaji lɛ.—1 Kor. 10:31, 32; 2 Kor. 6:3.
Mɛni Esa akɛ Wɔsɔle Wɔbi?
20. Te obaatsɔɔ Romabii 8:26, 27 lɛ mli oha tɛŋŋ?
20 Bei komɛi lɛ ebaanyɛ ebalɛ akɛ wɔleee nɔ ni wɔbaawie kɛ́ wɔ pɛ wɔmiisɔle. Paulo ŋma akɛ: “Nɔ ni wɔɔsɔle wɔbi ni ja lɛ wɔleee; shi moŋ Mumɔ [krɔŋkrɔŋ] lɛ diɛŋtsɛ kɛ ŋtsɔidɔɔmɔi ni anyɛŋ akɛɛ damɔɔ mli haa wɔ. Shi [Nyɔŋmɔ] mɔ ni taoɔ tsuii amli lɛ le nɔ ni ji Mumɔ lɛ jwɛŋmɔ lɛ.” (Rom. 8:26, 27) Yehowa ha aŋmala mɛi asɔlemɔi babaoo awo Ŋmalɛ lɛ mli. Eŋɔɔ lɛ akɛ nakai nibimɔi ni eha ajɛ mumɔŋ aŋma lɛ ji nibii ni kulɛ wɔbaasumɔ ni wɔbi, ni etsuɔ amɛhe nii ehaa wɔ. Nyɔŋmɔ le wɔ, ni enuɔ nibii ni eha emumɔ lɛ ye kɛbua Biblia ŋmalɔi lɛ ni amɛŋmala lɛ ashishi. Kɛ́ mumɔ lɛ ‘damɔ mli’ eha wɔ lɛ, Yehowa boɔ wɔfaikpamɔi lɛ atoi. Shi be mli ni wɔleɔ Nyɔŋmɔ Wiemɔ lɛ jogbaŋŋ lɛ, nɔ ni esa akɛ wɔsɔle wɔbi lɛ baaba wɔjwɛŋmɔ mli oya.
21. Mɛni he wɔbaasusu yɛ nikasemɔ ni nyiɛ sɛɛ lɛ mli?
21 Taakɛ wɔkase kɛtsɔ hiɛ lɛ, wɔsɔlemɔi haa anaa mɛi ni wɔ ji. Ákɛ nɔkwɛmɔnɔ lɛ, wɔsɔlemɔi baanyɛ aha ana bɔ ni wɔtsi wɔbɛŋkɛ Yehowa kpaakpa wɔha kɛ bɔ ni wɔkase e-Wiemɔ lɛ jogbaŋŋ wɔha. (Yak. 4:8) Yɛ nikasemɔ ni baanyiɛ sɛɛ lɛ mli lɛ, wɔbaasusu sɔlemɔi komɛi kɛ amɛmli wiemɔi ni aŋmala yɛ Biblia lɛ mli lɛ ahe. Kɛ́ wɔpɛi Ŋmalɛi nɛɛ amli lɛ, te ebaanyɛ ená gbɛ nɔ ni wɔtsɔɔ wɔbɛŋkɛɔ Nyɔŋmɔ yɛ sɔlemɔ mli lɛ nɔ hewalɛ eha tɛŋŋ?
Te Obaaha Hetoo Oha Tɛŋŋ?
• Mɛɛ su esa akɛ wɔkɛbɛŋkɛ Yehowa yɛ sɔlemɔ mli?
• Mɛni hewɔ esa akɛ wɔsɔle wɔha wɔnyɛmimɛi Kristofoi lɛ?
• Mɛni wɔsɔlemɔi lɛ baanyɛ ajie lɛ kpo yɛ wɔ kɛ wɔyiŋtoi ahe?
• Te esa akɛ wɔfee wɔnii wɔha tɛŋŋ kɛ́ aasɔle yɛ henaabuamɔi ashishi?
[Nikasemɔ lɛ he Sanebimɔi]
[Mfoniri ni yɔɔ baafa 4]
Ani ojieɔ Yehowa yi ni odaa lɛ shi daa?
[Mfoniri ni yɔɔ baafa 6]
Esa akɛ wɔkɛ bɔ ni wɔfeɔ wɔnii wɔhaa kɛ́ aasɔle lɛ awo Yehowa hiɛ nyam