Satan Nɔyeli Lɛ Yeŋ Omanye Kɔkɔɔkɔ
Satan Nɔyeli Lɛ Yeŋ Omanye Kɔkɔɔkɔ
“Ehiŋ haŋ mɔ fɔŋ.”—JAJ. 8:13.
1. Mɛni hewɔ kojomɔ ni abaakojo efɔŋfeelɔi lɛ shɛjeɔ mɔ mii lɛ?
ETSƐŊ kwraa abaakojo mɛi fɔji lɛ. Abaakpãta amɛhiɛ yɛ efɔŋ ni amɛfee lɛ hewɔ. (Abɛi 5:22; Jaj. 8:12, 13) Enɛ shɛjeɔ mɛi amii waa, titri lɛ mɛi ni feɔ nɔ ni ja ní efɔŋfeelɔi eye amɛ sane ni ejaaa ní amɛha amɛna nɔ̃ lɛ. Mɔ ni ji otu yɛ efɔŋfeelɔi ni abaakojo amɛ lɛ ateŋ ji Satan Abonsam, mɔ ni kɛ efɔŋfeemɔ ba lɛ.—Yoh. 8:44.
2. Mɛni hewɔ ehe bahia koni aha be ashwie mli ni akɛtsu sane ni ba yɛ Eden lɛ he nii lɛ?
2 Satan ni na ehe tsɔ̃ lɛ ha adesai kpoo Yehowa nɔyeli yɛ Eden abɔɔ lɛ mli tɔ̃ɔ. Enɛ ha wɔ klɛŋklɛŋ fɔlɔi lɛ yafata Satan he kɛte shi amɛwo hegbɛ ni Yehowa yɔɔ akɛ eyeɔ adesai anɔ lɛ, ni amɛbatsɔmɔ eshafeelɔi yɛ Yehowa hiɛ. (Rom. 5:12-14) Ŋwanejee ko bɛ he akɛ, Yehowa le nɔ ni baajɛ bulɛ ni amɛyajieee lɛ kpo amɛtsɔɔɔ lɛ kɛ ehiɛ atua ni amɛtse lɛ mli kɛba. Shi kɛlɛ, ebaabi ni aha adesai kɛ ŋwɛi bɔfoi fɛɛ ana yibii gbohii ni bɔ fɛɛ bɔ ni fee lɛ, ebaajɛ atuatsemɔ nɛɛ mli kɛba lɛ faŋŋ. No hewɔ lɛ, ehe bahia ni aha be ashwie mli ni akɛtsu sane nɛɛ he nii koni akɛma nɔ mi jogbaŋŋ akɛ atuatselɔi lɛ asane ejaaa kwraa.
3. Te esa akɛ wɔbu adesai anɔyelii wɔha tɛŋŋ?
3 Akɛni adesai kpoo Yehowa nɔyeli lɛ hewɔ lɛ, ehe bahia ni amɛto amɛ diɛŋtsɛ amɛnɔyelii srɔtoi. Bɔfo Paulo ŋma wolo eyaha Kristofoi ni yɔɔ Roma lɛ, ni etsɛ adesai anɔyelii nɛɛ akɛ “hegbɛi ni yeɔ nɔ lɛ.” Hegbɛ titri ni ye nɔ yɛ Paulo beaŋ lɛ ji Roma nɔyeli lɛ, ní no mli lɛ enɔ maŋtsɛ ji Maŋtsɛ Nero ní ye nɔ kɛjɛ afi 54-68 Ŋ.B. lɛ. Paulo wie akɛ “Nyɔŋmɔ to” hegbɛi ni yeɔ nɔ nɛɛ. (Nyɛkanea Romabii 13:1, 2.) Ani Paulo miitsɔɔ akɛ adesai anɔyeli nɔ kwɔ fe Nyɔŋmɔ nɔyeli lɛ? Dabi kwraa. Nɔ̃ moŋ ni etsɔɔ ji akɛ akɛni Yehowa eŋmɛ gbɛ ni adesai anɔyelii lɛ miiye nɔ hewɔ lɛ, esa akɛ Kristofoi abu “Nyɔŋmɔ gbɛjianɔtoo lɛ” ní amɛba amɛhe shi amɛha amɛ.
Gbɛ ni Kɛ Mɔ Yaa Hiɛkpatamɔ Mli
4. Tsɔɔmɔ nɔ hewɔ ni adesai anɔyeli yeŋ omanye kɔkɔɔkɔ lɛ.
4 Shi kɛlɛ, adesai anɔyeli ni Satan hɔ sɛɛ lɛ yeŋ omanye kɔkɔɔkɔ. Mɛni hewɔ? Yiŋtoo kome hewɔ ji akɛ nɔyelɔi ni ji adesai lɛ bɛ Nyɔŋmɔ nilee. Yehowa pɛ yɔɔ nilee ni ja kɛmɔ shi. No hewɔ lɛ, lɛ pɛ ebaanyɛ ekɛ gbɛtsɔɔmɔ ni ja ni baaha nɔyeli ko aye omanye aha. (Yer. 8:9; Rom. 16:27) Yehowa le gbɛ ni ja fe fɛɛ yɛ shihilɛ fɛɛ shihilɛ mli, ni etamɔɔɔ adesai ni bei pii lɛ, amɛkaa nɔ ko amɛkwɛɔ aahu dani amɛleɔ gbɛ ni esa akɛ amɛkɔ lɛ. Nɔyeli fɛɛ nɔyeli ni kɛ egbɛtsɔɔmɔ tsuuu nii lɛ yeŋ omanye kɔkɔɔkɔ. Enɛ po kɛkɛ—kɛ agbɛnɛ hu yiŋtoo fɔŋ ni Satan hiɛ lɛ—ha efee faŋŋ kɛjɛ beni Satan bɔi nɔyeli kɛtsɔ adesai anɔ lɛ tɔ̃ɔ akɛ enɔyeli lɛ yeŋ omanye kɔkɔɔkɔ.
5, 6. Mɛni ekã shi faŋŋ akɛ no ha Satan te shi ewo Yehowa lɛ?
5 Kɛ́ hiɛshikalɔ ko baafee nɔ ko ni ele akɛ eyeŋ omanye kɔkɔɔkɔ lɛ, ekã shi faŋŋ akɛ efeŋ. Kɛ́ etee nɔ efee lɛ, bɔ fɛɛ bɔ ni fee lɛ, ebaana akɛ eyafeee jogbaŋŋ. Nibii ni etee nɔ yɛ yinɔsane mli fɛɛ lɛ eha ana faŋŋ akɛ mɛi ni teɔ shi amɛwoɔ Bɔlɔ ofe lɛ yeee omanye. (Nyɛkanea Abɛi 21:30.) Shi akɛni Satan naa ehe tsɔ̃ ni ewoɔ ehe nɔ hewɔ lɛ, no ha ete shi ewo Yehowa. No hewɔ lɛ, Abonsam je gbɛ ekɔ gbɛ ni kɛ lɛ baaya hiɛkpatamɔ mli.
6 Sɛɛ mli lɛ, Babilon maŋtsɛ ko jie henɔwomɔ su ni tamɔ Satan nɔ̃ lɛ nɔŋŋ kpo. Eshwã ekɛɛ akɛ: “Makwɔ kɛya ŋwɛi, ni mawó mimaŋtsɛsɛi lɛ nɔ kɛaateke Nyɔŋmɔ ŋulamii lɛ, ni maho mata kpee gɔŋ lɛ nɔ yɛ kooyigbɛ naagbeehei lɛ tɔ̃ɔ; makwɔ kɛaateke atatuiaŋ hei grɔŋŋi lɛ, ni matamɔ mɔ ní yɔɔ ŋwɛi shɔŋŋ lɛ!” (Yes. 14:13-15) Gbɛ ni nilee bɛ mli ni nakai nɔyelɔ lɛ kɔ lɛ eyayeee omanye, ni akpata Babilon maŋtsɛyeli lɛ hiɛ yɛ gbɛ ni yɔɔ hiɛgbele nɔ. Abaakpata Satan kɛ eje lɛ hiɛ kwraa yɛ gbɛ ni tamɔ nakai nɔŋŋ nɔ.
Mɛni Hewɔ Nyɔŋmɔ Ŋmɛ Gbɛ?
7, 8. Mɛɛ sɛɛnamɔi komɛi ejɛ efɔŋfeemɔ gbɛ ni Yehowa ŋmɛ dã lɛ mli kɛba?
7 Ekolɛ, mɛi komɛi baasumɔ ni amɛle nɔ̃ hewɔ ni Yehowa etsĩii adesai agbɛ koni amɛkafi Satan sɛɛ ni amɛkato nɔyeli kroko ni yeŋ omanye kɔkɔɔkɔ shishi lɛ. Akɛ Nyɔŋmɔ Ofe lɛ, kulɛ ebaanyɛ efee nakai aahu. (2 Mose 6:3) Shi emɛ dã. Akɛni eyɛ nilee hewɔ lɛ, ele akɛ kɛ́ eŋmɛ gbɛ ni be shwie adesai atuatsemɔ lɛ mli dã lɛ, ebaatsu yiŋtoo kpakpa he nii. Beni yi aaawula shi lɛ, ebaafee faŋŋ akɛ Yehowa ji Nɔyelɔ ni ja ni yɔɔ suɔmɔ, ni adesai anɔkwafoi baaná Nyɔŋmɔ yiŋkpɛɛ lɛ he sɛɛ.
8 Eji adesai kpoo Satan lakamɔi lɛ ni amɛtsiii amɛhe kɛjɛɛɛ Nyɔŋmɔ nɔyeli lɛ he kulɛ, adesai enaŋ nɔ̃ babaoo nɛkɛ! Ni kɛlɛ, gbɛ ni Yehowa ŋmɛ adesai koni amɛye amɛ diɛŋtsɛ amɛhe nɔ dã lɛ he eba sɛɛnamɔ. Eha adesai ni hiɛ tsui kpakpa lɛ ena faŋŋ akɛ nilee yɛ mli akɛ amɛaabo Nyɔŋmɔ toi ní amɛkɛ amɛhe afɔ̃ enɔ. Yɛ afii ohai abɔ ni eho lɛ amli lɛ, adesai eka nɔyelii srɔtoi babaoo amɛkwɛ, shi eko kwraa bɛ ni hi. Enɛ eha Nyɔŋmɔ jálɔi ená nɔmimaa ni mli wa akɛ Yehowa nɔyeli lɛ nɔ bɛ. Eji anɔkwale akɛ gbɛ ni Yehowa eŋmɛ ni Satan nɔyeli fɔŋ lɛ ahi shi lɛ eha adesai ní Nyɔŋmɔ jálɔi anɔkwafoi fata he lɛ epiŋ waa. Shi efɔŋfeemɔ gbɛ ni Nyɔŋmɔ eŋmɛ be fioo lɛ hu he eba sɛɛnamɔ kɛha ejálɔi anɔkwafoi nɛɛ.
Atuatsemɔ ni Eha Yehowa Hiɛ Eba Nyam
9, 10. Tsɔɔmɔ bɔ ni Satan nɔyeli lɛ eha Yehowa hiɛ eba nyam.
9 Gbɛ ni Yehowa eŋmɛ koni Satan aná adesai anɔ hewalɛ ni amɛ diɛŋtsɛ amɛye amɛhe nɔ lɛ etsɔɔɔ akɛ Yehowa nɔyeli lɛ ejaaa. No moŋ eha ana akɛ enɔyeli lɛ ja! Nibii ni etee nɔ yɛ yinɔsane mli lɛ maa nɔ mi akɛ sane ní akɛ mumɔ tsirɛ Yeremia ní ewie akɛ adesai nyɛŋ ni amɛye amɛ diɛŋtsɛ amɛhe nɔ lɛ ji anɔkwale. (Nyɛkanea Yeremia 10:23.) Kɛfata he lɛ, Satan atuatsemɔ lɛ eha Yehowa ená hegbɛ koni ekɛjie E-sui kpakpai lɛ akpo yɛ gbɛ ni sa kadimɔ waa nɔ. Yɛ mɛɛ gbɛ nɔ?
10 Akɛni wɔnaa nibii gbohii ni ejɛ Satan nɔyeli lɛ mli kɛba lɛ hewɔ lɛ, Yehowa sui ni hi kɛwula shi lɛ efee faŋŋ kɛha wɔ yɛ gbɛ̀i ni kulɛ wɔnaŋ lɛ anɔ. Enɛ eha Yehowa hiɛ eba nyam babaoo yɛ mɛi ni sumɔɔ lɛ lɛ ahiɛ. Hɛɛ, eyɛ mli akɛ Satan nɔyeli lɛ egbe Nyɔŋmɔ he guɔ moŋ, shi yɛ gbɛ ko nɔ lɛ, eha Nyɔŋmɔ hiɛ eba nyam diɛŋtsɛ. Eha ana akɛ gbɛ ni Yehowa tsɔ nɔ etsu enɔyeli lɛ hiɛ atua ni atse nɛɛ he nii lɛ nɔ bɛ kwraa. Bɔni afee ni wɔnu anɔkwa sane nɛɛ shishi lɛ, nyɛhaa wɔsusua Yehowa sui lɛ ekomɛi ahe kuku wɔkwɛa, ni wɔkwɛ bɔ ni Satan nɔyeli fɔŋ lɛ eha Yehowa ejie sui nɛɛ akpo yɛ gbɛ̀i krokomɛi anɔ lɛ.
11. Mɛɛ gbɛ̀i anɔ Yehowa tsɔ ejie suɔmɔ kpo?
11 Suɔmɔ. Ŋmalɛ lɛ kɛɔ wɔ akɛ, “Nyɔŋmɔ lɛ, suɔmɔ ji lɛ.” (1 Yoh. 4:8) Suɔmɔ mli Nyɔŋmɔ jɛ ebɔ adesai. Agbɛnɛ hu, bɔ ni etsɔ efee wɔ yɛ gbɛ ni yɔɔ gbeyei kɛ naakpɛɛ nɔ lɛ tsɔɔ akɛ eyɛ suɔmɔ. Kɛfata he lɛ, Yehowa jɛ suɔmɔ mli ebɔ shikpɔŋ lɛ fɛfɛo ni nɔ fɛɛ nɔ ni baaha adesai aná miishɛɛ lɛ yɛ nɔ. (1 Mose 1:29-31; 2:8, 9; Lala 139:14-16) Shi beni adesai fee esha lɛ, Yehowa jie esuɔmɔ lɛ kpo yɛ gbɛ̀i krokomɛi anɔ. Yɛ mɛɛ gbɛ nɔ? Bɔfo Yohane tsɛ Yesu wiemɔi ayisɛɛ akɛ: “Nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.” (Yoh. 3:16) Gbɛ ni hi fe fɛɛ ni Nyɔŋmɔ aaatsɔ nɔ ejie suɔmɔ ni eyɔɔ kɛha adesai lɛ kpo ji ni etsu e-Bi koome lɛ kɛba shikpɔŋ lɛ nɔ bɔni afee ni ebakpɔ̃ eshafeelɔi, aloo jeee nakai? (Yoh. 15:13) Nyɔŋmɔ kɛ suɔmɔ kpele ni ejie lɛ kpo nɛɛ to okadi eha adesai, ni enɛ haa amɛnáa hegbɛ kɛjieɔ suɔmɔ ni tamɔ nɔ ni Nyɔŋmɔ jie lɛ kpo lɛ kpo yɛ amɛshihilɛ mli daa gbi, taakɛ Yesu hu fee lɛ.—Yoh. 17:25, 26.
12. Mɛɛ gbɛ nɔ Yehowa ejie ehewalɛ lɛ kpo yɛ?
12 Hewalɛ. “Nyɔŋmɔ Ofe lɛ” pɛ nyɛɔ ehaa wala. (Kpoj. 11:17; Lala 36:10) Kɛ́ afɔ́ mɔ ko lɛ, eshihilɛ tamɔ wolo ko ní aŋmako nɔ nii. Kɛyashi ebaagbo lɛ, eyiŋkpɛi, enifeemɔi, kɛ eniiashikpamɔi ni haa anaa nɔ̃ gbɔmɔ ni eji lɛ yiɔ nakai mfonirifeemɔŋ wolo lɛ nɔ obɔ. Yehowa baanyɛ ekɛ mɔ nɛɛ he saji nɛɛ ato eyiŋ. Kɛ́ mɔ nɛɛ gbo lɛ, yɛ be ni sa mli lɛ, Yehowa baanyɛ ekɛ mɔ lɛ aba wala mli ekoŋŋ taakɛ mɔ lɛ ji lɛ pɛpɛɛpɛ. (Yoh. 5:28, 29) No hewɔ lɛ, eyɛ mli akɛ Nyɔŋmɔ etooo eyiŋ akɛ adesai agboi moŋ, shi no eha Yehowa ená hegbɛ ní ekɛtsɔɔ akɛ eyɛ hewalɛ bɔ ni ebaanyɛ ekɛ gbohii aba wala mli ekoŋŋ. Eji anɔkwale akɛ, Yehowa ji “Nyɔŋmɔ Ofe lɛ.”
13. Mɛɛ gbɛ nɔ Yesu afɔleshaa lɛ tsɔɔ akɛ Yehowa yeɔ jalɛ sane kɛwulaa shi?
13 Jalɛsaneyeli. Yehowa maleee; ni asaŋ eyeee sane fɔŋ. (5 Mose 32:4; Tito 1:2) Ewieɔ anɔkwale ni eyeɔ jalɛsane kɛwulaa shi be fɛɛ be kɛ́ etamɔ nɔ ni nakai feemɔ baaha nɔ ko po aŋmɛɛ lɛ. (Rom. 8:32) Eka shi faŋŋ akɛ edɔ Yehowa waa beni ena ni agbe e-Bi ni esumɔɔ lɛ lɛ yɛ sɛŋmɔtso nɔ oookɛɛ eji atuatselɔ ni ebɔ musu lɛ! Shi akɛni Yehowa sumɔɔ adesai eshafeelɔi lɛ hewɔ lɛ, eŋmɛ gbɛ ni agbe e-Bi lɛ bɔni afee ni eye jalɛ sane yɛ gbɛ ni kɛ eshishitoo mlai ni hi kɛwula shi lɛ kpaa gbee nɔ. (Nyɛkanea Romabii 5:18-21.) Akɛni ayeee jalɛ sane yɛ je lɛŋ hewɔ lɛ, enɛ ha Yehowa ná hegbɛ kɛtsɔɔ akɛ mɔ ko bɛ ni yeɔ jalɛ sane fe lɛ.
14, 15. Mɛɛ gbɛ̀i komɛi anɔ Yehowa nilee ni nɔ bɛ kɛ etsuishitoo lɛ efee faŋŋ?
14 Nilee. Beni Adam kɛ Hawa fee esha lɛ sɛɛ etsɛɛɛ nɔŋŋ lɛ, Yehowa ha ana gbɛ nɔ ni ebaatsɔ ejie nibii gbohii fɛɛ ni ejɛ amɛtuatsemɔ lɛ mli kɛba lɛ. (1 Mose 3:15) Bɔ ni Yehowa tsu saji ahe nii oya nɔŋŋ, kɛ agbɛnɛ hu bɔ ni ejie gbɛ nɔ ni ebaatsɔ etsu eyiŋtoo nɛɛ he nii lɛ kpo fiofio etsɔɔ etsuji lɛ ha ana faŋŋ akɛ eji nilelɔ. (Rom. 11:33) Nɔ ko nɔ ko nyɛŋ atsĩ Nyɔŋmɔ naa koni ekanyɛ etsu saji ahe nii jogbaŋŋ kɛmɔ shi. Eyɛ mli akɛ je lɛŋ eyi obɔ kɛ jeŋba sha, tawuu, buulufeemɔ, toigbele, awuiyeli, hiɛaŋkwɛmɔ, kɛ osatofeemɔ moŋ, shi Yehowa ená hegbɛ babaoo ní ekɛtsɔɔ ebɔɔ nii lɛ nɔ ni nilee diɛŋtsɛ ji. Kaselɔ Yakobo kɛɛ akɛ: “Nilee ni jɛ ŋwɛi lɛ, tsutsu lɛ ehe tse, no sɛɛ lɛ ehe jɔ, ehiɛ ka shi, eboɔ toi, eyi obɔ kɛ mɔbɔnalɛ kɛ yibii kpakpai, ejeee ŋwane, efeee osato.”—Yak. 3:17.
15 Tsuishitoo. Eji adesai efeee esha, ni amɛtɔ̃ɔɔ Yehowa nɔ kulɛ, anaŋ esu ni ji tsuishitoo lɛ jogbaŋŋ. Afii akpei abɔ ni Yehowa kɛto etsui shi lɛ haa anaa akɛ etoɔ etsui shi kɛyawulaa shi, ni esa akɛ wɔhiɛ asɔ enɛ waa. Bɔfo Petro wie yɛ gbɛ ni ja nɔ akɛ, esa akɛ ‘wɔbu wɔ-Nuŋtsɔ lɛ tsuishitoo lɛ akɛ yiwalaheremɔ ni.’—2 Pet. 3:9, 15.
16. Mɛni hewɔ kɛ́ Yehowa kɛ wɔhe eshai fa wɔ lɛ wɔnáa miishɛɛ pam lɛ?
16 Ekɛ Eshai Faa Aahu. Eshafeelɔi ji wɔ fɛɛ, ni wɔ fɛɛ wɔtɔ̃ɔ babaoo. (Yak. 3:2; 1 Yoh. 1:8, 9) Esa akɛ wɔhiɛ asɔ Yehowa waa ejaakɛ ‘ekɛfaa aahu’! (Yes. 55:7) Susumɔ anɔkwa sane nɛɛ hu he okwɛ: Akɛni afɔ́ wɔ akɛ mɛi ni yeee emuu ni wɔfeɔ esha hewɔ lɛ, kɛ́ Nyɔŋmɔ kɛ wɔhe eshai lɛ fa wɔ lɛ, wɔnáa miishɛɛ pam. (Lala 51:7, 11, 19) Kɛ́ Yehowa kɛ wɔhe eshai fa wɔ yɛ gbɛ ni tamɔ nɛkɛ nɔ lɛ, ehaa suɔmɔ ni wɔyɔɔ kɛha lɛ lɛ mli waa, ni ewoɔ wɔ hewalɛ koni wɔkɛ mɛi krokomɛi hu ahe eshai afa amɛ.—Nyɛkanea Kolosebii 3:13.
Nɔ̃ Hewɔ ni Je lɛ He Miiye
17, 18. Mɛɛ gbɛ̀i anɔ efee faŋŋ akɛ Satan nɔyeli lɛ ejaaa?
17 Yɛ afii ohai abɔ ni eho lɛ fɛɛ mli lɛ, efee faŋŋ akɛ adesai anɔyelii srɔtoi—nɔ ni ejɛ Satan nɔyeli lɛ mli kɛba—lɛ eko kwraa bɛ ni hi. Yɛ afi 1991 lɛ, adafitswaa wolo ko (The European) wie akɛ: “Ani je lɛ he miiye? Hɛɛ, eji anɔkwale, shi . . . jeee Nyɔŋmɔ ejɛ—mɛi ni yɔɔ je lɛ mli lɛ ji mɛi ni eha je lɛ he yeɔ lɛ.” Sane nɛɛ ji anɔkwale shiishi! Satan laka Adam kɛ Hawa ni amɛkpoo Yehowa nɔyeli lɛ ni amɛhala akɛ amɛ diɛŋtsɛ amɛbaato amɛnɔyeli shishi. Amɛtsɔ nakai feemɔ nɔ amɛto nɔyeli ni yeŋ omanye kɔkɔɔkɔ lɛ shishi. Nɔnaa kɛ piŋmɔ ni adesai kɛkpeɔ yɛ jeŋ fɛɛ lɛ tsɔɔ akɛ adesai anɔyeli miiye hela fɔŋ ko.
18 Satan nɔyeli lɛ haa mɛi fóɔ amɛ pɛ amɛnɔ̃ mli. Shi akɛni Yehowa jɛɔ suɔmɔ mli eyeɔ nɔ hewɔ lɛ, su ni haa mɛi fóɔ amɛ pɛ amɛnɔ̃ mli lɛ nyɛŋ aha suɔmɔ sɛɛ afo kɔkɔɔkɔ. Satan nɔyeli hako aná toiŋjɔlɛ, miishɛɛ, loo shweshweeshwe shihilɛ. Wɔna faŋŋ akɛ Yehowa nɔyeli lɛ ja! Ani odaseyelii yɛ ŋmɛnɛ ni tsɔɔ nakai? Hɛɛ, ni wɔbaana enɛɛmɛi yɛ nikasemɔ ni nyiɛ sɛɛ lɛ mli.
Mɛni Wɔkase yɛ Nɔyeli He yɛ . . .
• Abɛi 21:30?
[Nikasemɔ lɛ he Sanebimɔi]
[Mfonirii ni yɔɔ baafa 25]
Adesai náko Satan nɔyeli lɛ he sɛɛ kwraa
[He ni Sane lɛ Jɛ]
U.S. Army photo
WHO photo by P. Almasy
[Mfoniri ni yɔɔ baafa 26]
Yehowa yɛ hewalɛ bɔ ni ebaanyɛ ekɛ gbohii aba wala mli ekoŋŋ
[Mfoniri ni yɔɔ baafa 27]
Yehowa Bi lɛ afɔleshaa lɛ haa anaa Yehowa suɔmɔ kɛ ejalɛsaneyeli lɛ faŋŋ