Ani Onaa Yehowa akɛ O-Tsɛ?

“NUŊTSƆ, tsɔɔmɔ wɔ sɔlemɔ.” Beni Yesu kaselɔi lɛ ateŋ mɔ kome kɛ nakai nibimɔ lɛ fɔ̃ ehiɛ lɛ, Yesu to he akɛ: “Kɛ́ nyɛmiisɔle lɛ, nyɛkɛɛa akɛ: Wɔtsɛ ni yɔɔ ŋwɛi, ogbɛi lɛ afee krɔŋkrɔŋ.” (Luka 11:1, 2) Kulɛ Yesu baanyɛ ekɛ gbɛ́i ni akɛpaiɔ Yehowa tamɔ “Ofe,” ‘Tsɔɔlɔ Kpeteŋkpele,’ ‘Bɔlɔ,’ ‘Mɔ ni Eye Gbii Pii,’ kɛ ‘Naanɔi Amaŋtsɛ’ atsɛ lɛ. (1 Mose 49:25; Yes. 30:20; 40:28; Dan. 7:9; 1 Tim. 1:17) Shi Yesu tsɛ́ lɛ moŋ akɛ ‘Tsɛ.’ Mɛni hewɔ? Eeenyɛ efee akɛ akɛni eesumɔ ni wɔtsi wɔbɛŋkɛ Mɔ ni nɔ kwɔ fe fɛɛ yɛ jeŋ muu lɛ fɛɛ mli lɛ tamɔ bɔ ni bi ni yɔɔ heshibaa bɛŋkɛɔ etsɛ ni yɔɔ suɔmɔ lɛ hewɔ.

Ni kɛlɛ, ebɛ mlɛo kɛha mɛi komɛi akɛ amɛaana Nyɔŋmɔ akɛ amɛ-Tsɛ. Nyɛmi yoo ko ni atsɛɔ lɛ Atsuko * wie akɛ, “Ebafee nɔ ni wa kɛha mi akɛ matsi mabɛŋkɛ Yehowa ni masɔle maha lɛ akɛ Tsɛ yɛ mibaptisimɔ lɛ sɛɛ afii babaoo.” Etsɔɔ nɔ̃ hewɔ ni enɛ feemɔ bafee nɔ ni wa kɛha lɛ lɛ mli akɛ, “Mikaiii be ni mitsɛ ni fɔ́ mi lɛ jie hedɔɔ kpo etsɔɔ mi.”

Yɛ naagbee gbii ni jaraa nɛɛ amli lɛ, tsɛmɛi pii ‘edɔɔɔ amɛbii ahe.’ (2 Tim. 3:1, 3) Belɛ ebɛ naakpɛɛ akɛ mɛi náa henumɔ ni tamɔ Atsuko nɔ̃ lɛ. Shi wɔbaanyɛ wɔtsɛ́ wɔtsui wɔŋmɛ wɔmli ejaakɛ wɔyɛ yiŋtoi kpakpai ahewɔ ni esa akɛ wɔna Yehowa akɛ wɔ-Tsɛ ni yɔɔ suɔmɔ.

Yehowa—Nɔhalɔ ni Yɔɔ Suɔmɔ

Ja wɔle Yehowa jogbaŋŋ dani wɔbaana lɛ akɛ wɔ-Tsɛ. Yesu kɛɛ akɛ, “Mɔ ko mɔ ko leee bi lɛ, akɛ ja tsɛ lɛ kɛkɛ; asaŋ tsɛ lɛ hu, mɔ ko mɔ ko leee lɛ, akɛ ja bi lɛ, kɛ mɔ ni bi lɛ sumɔɔ akɛ ejieɔ lɛ etsɔɔ lɛ.” (Mat. 11:27) Gbɛ ni hi fe fɛɛ ni wɔbaanyɛ wɔtsɔ nɔ wɔle bɔ ni Yehowa feɔ enii akɛ Tsɛ lɛ ji, ni wɔjwɛŋ nɔ ni Yesu ha ale yɛ anɔkwa Nyɔŋmɔ lɛ he lɛ nɔ. No hewɔ lɛ, mɛni Yesu ha ale yɛ Tsɛ lɛ he?

Yesu kɛɛ akɛ: “Tsɛ lɛ hewɔ mihiɛ kã,” ni ekɛtsɔɔ akɛ Yehowa ji mɔ ni ha eba wala mli. (Yoh. 6:57) Wɔ hu Tsɛ lɛ ji mɔ ni ha wɔba wala mli. (Lala 36:10; Bɔf. 17:28) Mɛni tsirɛ Yehowa ni eha mɛi ba wala mli? Aso jeee suɔmɔ ni eyɔɔ lɛ hewɔ? Eka shi faŋŋ akɛ esa akɛ wɔ hu wɔsumɔ wɔŋwɛi Tsɛ lɛ yɛ wala ni ekɛduro wɔ nɛɛ hewɔ.

Yesu kpɔmɔ afɔleshãa lɛ ji suɔmɔ ni fe fɛɛ ni Nyɔŋmɔ ejie lɛ kpo etsɔɔ adesai. Nifeemɔ ni tsɔɔ suɔmɔ nɛɛ haa adesai eshafeelɔi nyɛɔ amɛtsiɔ amɛbɛŋkɛɔ Yehowa kpaakpa kɛtsɔ esuɔmɔ Bi lɛ nɔ. (Rom. 5:12; 1 Yoh. 4:9, 10) Ni akɛni wɔŋwɛi Tsɛ lɛ yeɔ eshiwoi anɔ hewɔ lɛ, wɔbaanyɛ wɔná nɔmimaa akɛ beni yi aaawula shi lɛ, mɛi fɛɛ ni sumɔɔ lɛ ní amɛboɔ lɛ toi lɛ baaná “Nyɔŋmɔ bii lɛ anunyam heyeli lɛ.”—Rom. 8:21.

Wɔŋwɛi Tsɛ lɛ ‘haa ehulu teɔ shi’ hu yɛ wɔnɔ daa gbi. (Mat. 5:45) Eka shi faŋŋ akɛ wɔbuuu akɛ ehe miihia ni wɔsɔle ni hulu lɛ ate shi. Ni kɛlɛ hulu la lɛ he miihia wɔ ni wɔnáa he sɛɛ naakpa! Kɛfata he lɛ, wɔ-Tsɛ lɛ ji Nɔhalɔ ni nɔ bɛ ní le nibii ni he hiaa wɔ po dani wɔbiɔ lɛ. No hewɔ lɛ, aso esaaa akɛ wɔŋɔɔ be kɛkwɛɔ bɔ ni wɔŋwɛi Tsɛ lɛ haa ebɔɔ nii lɛ amɛhiamɔ nii ní wɔkɛ hiɛsɔɔ jwɛŋɔ nɔ?—Mat. 6:8, 26.

Wɔ-Tsɛ Lɛ—‘Musuŋtsɔlɔ’ ni Buɔ Wɔhe

Yesaia gbalɛ lɛ ha Nyɔŋmɔ webii ni hi shi yɛ blema lɛ ná nɔmimaa akɛ: “Gɔji lɛ aaatsi  aya, ni gɔŋkpɔi lɛ hu aaagbeegbee shi, shi mimlihilɛ lɛ tsiŋ kɛjɛŋ onɔ, ni mihejɔlɛ kpaŋmɔ lɛ hu egbeeŋ shi, Yehowa, mɔ ni musuŋ tsɔɔ lɛ yɛ ohe lɛ, kɛɛ.” (Yes. 54:10) Beni Yesu sɔleɔ yɛ gbi gbɛkɛ dani enɔ jetsɛremɔ lɛ agbe lɛ lɛ nɔ lɛ, ema nɔ mi akɛ Yehowa ji ‘musuŋtsɔlɔ’ ni buɔ mɔ he lɛɛlɛŋ. Yesu sɔle eha ekaselɔi lɛ akɛ: “Mɛnɛɛmɛi yɛ je lɛ mli, ni mi lɛ miiba oŋɔɔ. Ataa krɔŋkrɔŋ, mɛi ní oŋɔha mi nɛɛ, too amɛ yɛ ogbɛ́i lɛ amli.” (Yoh. 17:11, 14) Yehowa kwɛɔ Yesu sɛɛnyiɛlɔi lɛ anɔ ni ebuɔ amɛhe.

Ŋmɛnɛ lɛ, mumɔŋ niyenii ni Nyɔŋmɔ tsɔɔ “tsulɔ anɔkwafo kɛ nilelɔ” lɛ nɔ ekɛhaa wɔ yɛ be ni sa nɔ lɛ ji gbɛ kome ni etsɔɔ nɔ ebuɔ wɔhe kɛjɛɔ Satan ŋaatsɔi lɛ ahe. (Mat. 24:45) Kɛ́ ‘wɔɔwo Nyɔŋmɔ tawuu nii lɛ fɛɛ’ lɛ, no lɛ ehe miihia ni wɔye mumɔŋ niyenii ni wajeɔ mɔ nɛɛ. Akɛ nɔkwɛmɔnɔ lɛ, susumɔ “hemɔkɛyeli tsɛ̃ŋ lɛ” ni ‘wɔkɛaanyɛ mɔ fɔŋ lɛ gãimlibii ní tsoɔ lɛ fɛɛ wɔgbe’ lɛ he okwɛ. (Efe. 6:11, 16) Hemɔkɛyeli ni wɔjieɔ lɛ kpo lɛ buɔ wɔhe koni wɔkafite wekukpãa ni kã wɔ kɛ Nyɔŋmɔ teŋ lɛ, ni no tsɔɔ akɛ wɔheɔ wɔyeɔ akɛ wɔ-Tsɛ lɛ baanyɛ abu wɔhe.

Kɛ́ wɔjwɛŋ bɔ ni Nyɔŋmɔ Bi lɛ ba ejeŋ beni eyɔɔ shikpɔŋ lɛ nɔ lɛ nɔ jogbaŋŋ lɛ, wɔbaanyɛ wɔnu wɔŋwɛi Tsɛ lɛ musuŋtsɔlɛ lɛ shishi babaoo. Kadimɔ amaniɛbɔɔ ni yɔɔ Marko 10:13-16 lɛ. Nakai ŋmalɛ lɛ tsɔɔ akɛ Yesu kɛɛ ekaselɔi lɛ akɛ: “Nyɛhaa gbekɛbii lɛ abaa miŋɔɔ.” Beni gbekɛbii lɛ ba Yesu ŋɔɔ lɛ, ekɛ musuŋtsɔlɛ loo amɛ atuu ni ejɔɔ amɛ. Eka shi faŋŋ akɛ gbekɛbii lɛ ná miishɛɛ naakpa! Ni akɛni Yesu kɛɛ akɛ: “Mɔ ni ena mi lɛ, ena tsɛ lɛ” hewɔ lɛ, wɔle akɛ anɔkwa Nyɔŋmɔ lɛ miisumɔ ni wɔtsi wɔbɛŋkɛ lɛ.—Yoh. 14:9.

Yehowa Nyɔŋmɔ suɔmɔ lɛ sɛɛ efooo kɔkɔɔkɔ. Eji Nɔhalɔ kɛ Hebulɔ ni nɔ bɛ ni miisumɔ ni wɔtsi wɔbɛŋkɛ lɛ kpaakpa. (Yak. 4:8) Belɛ, eka shi faŋŋ akɛ Yehowa ji Tsɛ ni nɔ bɛ!

Wɔnáa He Sɛɛ Babaoo!

Kɛ́ wɔkɛ wɔhiɛ fɔ̃ Yehowa nɔ akɛ wɔŋwɛi Tsɛ ni yɔɔ musuŋtsɔlɛ kɛ suɔmɔ lɛ, wɔnáa he sɛɛ waa. (Abɛi 3:5, 6) Yesu ná ehiɛ ni ekɛfɔ̃ e-Tsɛ lɛ nɔ kwraa lɛ he sɛɛ. Kristo kɛɛ ekaselɔi lɛ akɛ: “Jeee mikome ni, shi moŋ mikɛ mitsɛ ni tsu mi lɛ ni.” (Yoh. 8:16) Yesu ná nɔmimaa daa akɛ Yehowa fiɔ esɛɛ. Akɛ nɔkwɛmɔnɔ lɛ, beni abaptisi lɛ lɛ, Tsɛ lɛ kɛɛ akɛ: “Mɔnɛ ji misuɔmɔ bi ní mináa ehe tsui lɛ,” ni ekɛma nɔ mi akɛ esumɔɔ Yesu. (Mat. 3:15-17) Ni beni eshwɛ fioo ni Yesu baagbo lɛ, ebo ekɛɛ akɛ: “Ataa, odɛŋ mituɔ mimumɔ miwoɔ nɛɛ!” (Luka 23:46) Hekɛnɔfɔɔ ni Yesu yɔɔ yɛ e-Tsɛ lɛ mli lɛ gbugbaaa kɔkɔɔkɔ.

Wɔ hu wɔbaanyɛ wɔná hekɛnɔfɔɔ ni tamɔ nɛkɛ. Akɛni Yehowa yɛ wɔsɛɛ hewɔ lɛ, aso esa akɛ wɔshe nɔ ko gbeyei? (Lala 118:6) Tsutsu ko lɛ, nyɛmi yoo Atsuko ni atsĩ eta yɛ shishijee gbɛ lɛ kɛ ehe fɔ̃ɔ lɛ diɛŋtsɛ ehewalɛ nɔ kɛ́ ekɛ naagbai miikpe. Shi ekase Yesu shihilɛ kɛ esɔɔmɔ nitsumɔ lɛ he nii waa, titri lɛ nɔ ni kɔɔ wekukpãa ni yɔɔ gbagbalii ni kã Yesu kɛ eŋwɛi Tsɛ lɛ teŋ lɛ he lɛ. Mɛni jɛ mli kɛba? Atsuko kɛɛ akɛ: “Mibana nɔ ni Yehowa ni aaana lɛ akɛ Tsɛ kɛ hiɛ ní akɛaafɔ̃ enɔ lɛ tsɔɔ.” Ekɛfata he akɛ: “Miná toiŋjɔlɛ kɛ miishɛɛ diɛŋtsɛ. Yɛ anɔkwale mli lɛ, esaaa akɛ wɔyeɔ wɔtsui yɛ nɔ ko nɔ ko he.”

Kɛ́ wɔna Yehowa akɛ wɔ-Tsɛ lɛ, mɛɛ sɛɛnamɔ kroko jɛɔ mli kɛbaa? Efɔɔ kaa akɛ gbekɛbii sumɔɔ amɛfɔlɔi ni amɛsumɔɔ ni amɛsa amɛhiɛ. Suɔmɔ ni Nyɔŋmɔ Bi lɛ yɔɔ hewɔ lɛ, ‘nɔ ni sa e-Tsɛ lɛ hiɛ efeɔ daa.’ (Yoh. 8:29) Nakai nɔŋŋ hu, kɛ́ wɔsumɔɔ wɔŋwɛi Tsɛ lɛ, no baatsirɛ wɔ ní wɔfee wɔnii yɛ nilee mli ní ‘wɔjie eyi’ yɛ mɛi ahiɛ.—Mat. 11:25; Yoh. 5:19.

Wɔ-Tsɛ lɛ ‘Hiɛ Wɔninejurɔ Mli’

Wɔŋwɛi Tsɛ lɛ kɛ “hefatalɔ” ni ji emumɔ krɔŋkrɔŋ lɛ eduro wɔ, koni eye ebua wɔ. Yesu kɛɛ akɛ, mumɔ krɔŋkrɔŋ lɛ ‘aaatsɔɔ wɔ anɔkwale lɛ fɛɛ mli gbɛ.’ (Yoh. 14:15-17; 16:12,  13) Nyɔŋmɔ mumɔ krɔŋkrɔŋ lɛ baanyɛ aha wɔnu wɔ-Tsɛ lɛ shishi jogbaŋŋ. Ebaanyɛ eye ebua wɔ ni wɔkumɔ “mɔji wuji” ni ji jwɛŋmɔi fɔji kɛ susumɔi ni ejaaa, ni wɔkɛ nakai feemɔ ‘aŋɔ jwɛŋmɔ fɛɛ jwɛŋmɔ nom wɔha Kristo toiboo lɛ.’ (2 Kor. 10:4, 5) Belɛ, nyɛhaa wɔsɔlea wɔhaa Yehowa ni ekɛ “hefatalɔ” ni ewo he shi lɛ aduro wɔ, ni wɔná nɔmimaa akɛ ‘wɔ-Tsɛ ni yɔɔ ŋwɛi lɛ baaŋɔ Mumɔ krɔŋkrɔŋ eha mɛi ni biɔ lɛ lɛ.’ (Luka 11:13) Eja gbɛ hu akɛ wɔɔsɔle koni mumɔ krɔŋkrɔŋ lɛ aye abua wɔ ní wɔya nɔ wɔtsi wɔbɛŋkɛ Yehowa kpaakpa.

Kɛ́ tsɛ ko hiɛ ebi nineshi kɛnyiɛ lɛ, gbekɛ lɛ nuɔ he akɛ eyɛ shweshweeshwe ni esheee gbeyei. Kɛ́ onaa Yehowa akɛ eji o-Tsɛ lɛɛlɛŋ lɛ, ná nɔmimaa yɛ wiemɔi ni shɛjeɔ mɔ mii nɛɛ amli akɛ: “Mi, Yehowa, o-Nyɔŋmɔ lɛ, mihiɛ oninejurɔ mli, ni miikɛɛo akɛ: Kaashe gbeyei! maye mabuao!” (Yes. 41:13) Obaanyɛ oná hegbɛ ni nɔ bɛ akɛ okɛ Nyɔŋmɔ ‘aaanyiɛ’ kɛya naanɔ. (Mika 6:8) Yaa nɔ ofee Yehowa suɔmɔnaa nii, ni ona lɛ akɛ o-Tsɛ, ni ebaasumɔ bo, ebaaha oná miishɛɛ, ni obaanu he akɛ oyɛ shweshweeshwe.

[Shishigbɛ niŋmaa]