“Esa akɛ Aŋmɛ Gbekɛ Fɛɛ Gbekɛ Gbɛ ni Ejá Nɔ̃ Ko”

YƐ December 9, 2008 lɛ, kuu ko ni fãa gbekɛbii ahe ni yɔɔ Sweden lɛ fee kpee krɛdɛɛ ko ni yitso ji “Esa akɛ Aŋmɛ Gbekɛ Fɛɛ Gbekɛ Gbɛ ni Ejá Nɔ̃ Ko.” Wielɔi srɔtoi ni damɔ Sweden Sɔlemɔ lɛ, Kristendom sɔlemɔi krokomɛi, Islam Jamɔ, kɛ kuu ni heɔ amɛyeɔ akɛ Nyɔŋmɔjamɔ he ehiaaa lɛ anajiaŋ lɛ tsɔɔ amɛjwɛŋmɔ yɛ sane nɛɛ he.

Osɔfo ko ni fata wielɔi lɛ ahe lɛ kɛɛ akɛ: “Biblia mli saji lɛ baanyɛ aye abua gbekɛbii waa koni amɛná Nyɔŋmɔjamɔ sui.” Mɛɛ gbɛ nɔ Ŋmalɛi lɛ amli saji yeɔ ebuaa gbekɛbii koni amɛná Nyɔŋmɔjamɔ sui?

Osɔfo lɛ kɛɛ akɛ: “Gbekɛbii baanyɛ akase ŋmalɛi kɛ Biblia mli saji lɛ ní amɛjwɛŋ nɔ.” Etsĩ “Adam kɛ Hawa, Kain kɛ Habel, David kɛ Goliat, Yesu fɔmɔ, toohelɔ Zakeo, bi nyenyeŋtswi lɛ he abɛbua lɛ, kɛ Samarianyo ni jie mlihilɛ kpo lɛ he saji lɛ” tã. Atsɔɔ akɛ enɛɛmɛi ji “amaniɛbɔi ni baanyɛ aye abua [gbekɛ ko] koni esusu nii ahe jogbaŋŋ yɛ shihilɛ mli nibii ni he hiaa waa ni kɔɔ kutumpɔo, eshaifaa, kpɔ̃mɔ, nyɛ̃ɛ, jeŋba sha, faikpamɔ, suɔmɔ krɔŋŋ ahe lɛ ekomɛi.” Ekɛshi sɛɛ akɛ: “Ŋmalɛ mli amaniɛbɔi nɛɛ ji nɔkwɛmɔnii ni baanyɛ aná mɔ shihilɛ nɔ hewalɛ koni ekɛba ejeŋ jogbaŋŋ ní no atsɔɔ lɛ nii yɛ eshihilɛ mli.”

Eji anɔkwale akɛ, esa jogbaŋŋ akɛ aaawo mɛi ahewalɛ koni amɛkane Biblia lɛ. Shi ani gbekɛbii baanyɛ “akase” ŋmalɛi kɛ Biblia mli saji lɛ “ní amɛjwɛŋ” nibii ní amɛkane lɛ ‘anɔ’ ni amɛmu sane naa yɛ gbɛ kpakpa nɔ?

Ehe miihia ni agbála Ŋmalɛi lɛ amli saji amli aha mɛi ni edara lɛ po. Ákɛ nɔkwɛmɔnɔ lɛ, Biblia lɛ wie nuu ko ni ‘kase’ Ŋmalɛ mli saji ni ‘ejwɛŋ nɔ,’ shi enyɛɛɛ ena Nyɔŋmɔjamɔ gbɛ ni ja lɛ he. Nakai nuu lɛ ji Etiopia piafonyo lɛ. No mli lɛ, eekane Yesaia gbalɛ lɛ shi enuuu shishi. Akɛni eesumɔ ni enu nɔ ni gbalɔ lɛ wie lɛ shishi hewɔ lɛ, eŋmɛ gbɛ ni kaselɔ Filipo ye ebua lɛ. (Bɔf. 8:26-40) Mɛi babaoo yɛ ni tamɔ Etiopianyo lɛ. Ehe miihia ni agbála Ŋmalɛi lɛ amli saji amli aha wɔ fɛɛ—titri lɛ gbekɛbii.

Biblia lɛ haa wɔleɔ akɛ: “Buulufeemɔ kpɛtɛ gbekɛ tsui he.” (Abɛi 22:15) Ehe miihia ni akudɔ gbekɛbii ní atsɔɔ amɛ gbɛ, ni eji fɔlɔi asɔ̃ akɛ amɛkɛ Biblia lɛ kɛ nɔ ni atsɔɔ yɛ Kristofoi akpeei ashishi lɛ atsɔse amɛbii lɛ yɛ jeŋba kɛ Nyɔŋmɔjamɔ saji ahe. Esa akɛ atsɔse gbekɛbii yɛ nɛkɛ gbɛ nɔ. Esa akɛ aye abua amɛ kɛjɛ amɛgbekɛbiiashi tɔ̃ɔ koni amɛná Biblia mli nilee ni baaye abua amɛ ni amɛná sui kpakpai bɔni afee ni amɛtsɔmɔ “mɛi ni edara . . . mɛi ni fɔ ni amɛfɔɔ feemɔ lɛ eha amɛhenumɔ nii lɛ ele ekpakpa kɛ efɔŋ mlikpamɔ.”—Heb. 5:14.