Sanebimɔi ni Jɛ Kanelɔi Adɛŋ

Mɛɛ nibii baanyɛ aha abaptisi mɔ ko ekoŋŋ?

Nibii komɛi baanyɛ aha mɔ ko ni abaptisi lɛ lɛ asusu akɛ ebaptisimɔ lɛ esaaa, ni ekolɛ ebaasumɔ ni abaptisi lɛ ekoŋŋ. Ákɛ nɔkwɛmɔnɔ lɛ, ekolɛ beni mɔ lɛ kɛ ehe ha ni abaptisi lɛ lɛ, no mli lɛ ekɛ ehe miiwo shihilɛ ko mli yɛ teemɔŋ ni eji abaptisi lɛ momo kulɛ, abaanyɛ ashwie lɛ kɛjɛ asafo lɛ mli. Ani ebaanyɛ ejɔɔ ehe nɔ eha Nyɔŋmɔ yɛ shihilɛ ni tamɔ nɛkɛ mli? Ja mɔ lɛ ekpa nifeemɔ ni kɛ Ŋmalɛi lɛ kpaaa gbee lɛ dani kɛ́ ejɔɔ ehe nɔ eha Yehowa lɛ, Yehowa baakpɛlɛ nɔ. No hewɔ lɛ, kɛ́ be mli ni abaptisi lɛ lɛ no mli lɛ ekɛ ehe woɔ jeŋba gbonyo ni tamɔ nɛkɛ mli lɛ, ebaanyɛ ekpɛ eyiŋ kɛji esa akɛ abaptisi lɛ ekoŋŋ loo esaaa.

Shi kɛ́ abaptisi mɔ ko ni no sɛɛ dani efee esha ni ebaabi ni saneyeli ajinafoi akuu kɛ lɛ ata shi yɛ he lɛ hu? Ŋɔɔ lɛ akɛ ekɛɛ beni abaptisiɔ lɛ lɛ, no mli lɛ enuuu ebaptisimɔ lɛ shishi jogbaŋŋ, ni ákɛ ebaptisimɔ lɛ esaaa. Kɛ́ onukpai lɛ kɛ eshafeelɔ ko ta shi lɛ, esaaa akɛ amɛbiɔ lɛ ebaptisimɔ he sane ní amɛbiɔ lɛ kɛji enuɔ he akɛ ehenɔjɔɔmɔ kɛ ebaptisimɔ lɛ sa loo esaaa. Kɛ́ hooo kwraa lɛ, beni abaabaptisi lɛ lɛ, enu Ŋmalɛ mli wiemɔ ni aha kɛgbála hiɛdɔɔ ni yɔɔ baptisimɔ he lɛ mli lɛ. Eha sanebimɔi ni kɔɔ henɔjɔɔmɔ kɛ baptisimɔ he lɛ ahetoo akɛ, hɛɛ! Kɛkɛ ni lɛ diɛŋtsɛ eyatsake etade ni amii lɛ nu. No hewɔ lɛ, nilee yɛ mli akɛ wɔɔkpɛlɛ nɔ akɛ enu hiɛdɔɔ ni yɔɔ nɔ ni efeɔ lɛ he lɛ shishi. No hewɔ lɛ, esa akɛ onukpai lɛ kɛ lɛ aye akɛ mɔ ko ni abaptisi lɛ.

Kɛ́ mɔ lɛ diɛŋtsɛ kɛɛ akɛ ebaptisimɔ lɛ esaaa lɛ, onukpai lɛ baanyɛ agbala ejwɛŋmɔ kɛya Blɔfo Buu-Mɔɔ lɛ mli saji ni yɔɔ March 1, 1960, baafa 159 kɛ 160, kɛ February 15, 1964, baafa 123 kɛyashi 126 lɛ ni wieɔ baptisimɔ ni abaptisiɔ mɔ ekoŋŋ lɛ he fitsofitso lɛ nɔ. Kɛ́ mɔ ko miisumɔ ni abaptisi lɛ ekoŋŋ yɛ nibii komɛi (tamɔ Biblia lɛ ni enuuu shishi jogbaŋŋ beni abaptisiɔ lɛ lɛ) ahewɔ lɛ, no lɛ esa akɛ mɔ lɛ diɛŋtsɛ akpɛ eyiŋ yɛ he.

Mɛɛ nibii esa akɛ Kristofoi aha ehi amɛjwɛŋmɔ mli kɛ́ amɛmiisusu akɛ esa akɛ amɛkɛ mɛi komɛi ahi shĩa kome mli loo esaaa?

Wɔɔhe he miihia mɔ fɛɛ mɔ. Shi ŋmɛnɛ lɛ, mɛi babaoo bɛ amɛ diɛŋtsɛ amɛshĩa. Ekolɛ, shika he saji, gbɔmɔtsoŋ hewalɛnamɔ he saji, loo nibii krokomɛi baaha wekumɛi pii ahi shĩa kome mli. Yɛ je lɛŋ hei komɛi lɛ, wekumɛi tiaa amɛhe naa amɛwoɔ tsu kome mli, ni mɔ fɛɛ mɔ naa nɔ ni enyɛmi feɔ.

Ejeee Yehowa asafo lɛ sɔ̃ akɛ ewo mlai tsaralaa ni kɔɔ mɛi ni esa akɛ Kristofoi asafo lɛ mlibii lɛ kɛhi shi yɛ he kome lɛ he. Esa akɛ Kristofoi kɛ Ŋmalɛ mli shishitoo mlai lɛ atsu nii kɛji amɛmiikwɛ akɛ hei ni amɛhiɔ lɛ saa Nyɔŋmɔ hiɛ loo esaaa ehiɛ. Mɛni ji shishitoo mlai nɛɛ ekomɛi?

 Nɔ̃ titri ni esa akɛ wɔsusu he ji, bɔ ni mɛi ni wɔkɛyɔɔ lɛ baanyɛ asa wɔ kɛ wɔmumɔŋ shidaamɔ lɛ he. Namɛi ji mɛi nɛɛ? Ani amɛji Yehowa jálɔi? Ani amɛhiɔ shi yɛ Biblia mli shishitoo mlai anaa? Bɔfo Paulo ŋma akɛ: “Nyɛkahaa ashishiua nyɛ. Naanyobɔɔ fɔŋ fiteɔ jeŋba kpakpa.”—1 Kor. 15:33.

Ŋmalɛ lɛ tsɔɔ mli akɛ, Yehowa miihi ajwamaŋbɔɔ kɛ gbalafitemɔ. (Heb. 13:4) No hewɔ lɛ, eka shi faŋŋ akɛ shihilɛhe fɛɛ shihilɛhe ni aŋmɛɔ gbɛ koni nuu kɛ yoo ko ni boteko gbalashihilɛ mli ahi jɛmɛ ákɛ mɔ kɛ eŋa lɛ esaaa Nyɔŋmɔ hiɛ. Kristofonyo ko sumɔŋ akɛ ehi he ko ni aŋmɛɔ bɔlɛnamɔ jeŋba sha gbɛ yɛ.

Kɛfata he lɛ, Biblia lɛ woɔ mɛi fɛɛ ni sumɔɔ ni Nyɔŋmɔ akpɛlɛ amɛnɔ lɛ hewalɛ koni ‘amɛjo ajwamaŋbɔɔ naa foi.’ (1 Kor. 6:18) Enɛ hewɔ lɛ, nilee yɛ mli akɛ Kristofoi aaakpoo akɛ amɛaahi he ko ni baanyɛ eha amɛkɛ amɛhe awo ajwamaŋbɔɔ mli. Ákɛ nɔkwɛmɔnɔ lɛ, ŋɔɔ lɛ akɛ Kristofoi pii wɔɔ shĩa kome mli. Ani gbɛjianɔtoo ni tamɔ nɛkɛ lɛ baanyɛ aha mɛi kɛ amɛhe awo shihilɛi ni esaaa mli? Ni kɛ́ gbi ko lɛ eshwɛ nuu kɛ yoo ko ni boteko gbalashihilɛ mli lɛ pɛ yɛ shĩa lɛ mli akɛni mɛi krokomɛi lɛ bɛ jɛmɛ lɛ hewɔ hu? Nakai nɔŋŋ hu ebaafee oshara akɛ mɛi enyɔ ni sumɔɔ amɛhe, shi amɛboteko gbalashihilɛ mli lɛ aaahi shĩa kome mli. Nilee yɛ mli akɛ aaakpoo shihilɛi ni tamɔ enɛɛmɛi.

Nakai nɔŋŋ hu ebaafee nɔ ni esaaa akɛ mɛi ni etse gbala aaaya nɔ ahi shĩa kome mli. Akɛni lai momo tsɛ̃mɔ waaa hewɔ lɛ, ewaaa akɛ amɛkɛ amɛhe aaawo bɔlɛnamɔ jeŋba sha mli.—Abɛi 22:3.

Naagbee sane ni no hu he hiaa ni esa akɛ wɔsusu he ji bɔ ni akutsoŋbii lɛ buɔ shihilɛ ni wɔyɔɔ mli lɛ amɛhaa. Kɛ́ Kristofonyo ko buɔ shihilɛhe ko akɛ nɔ ni sa shi kɛlɛ akutsoŋbii lɛ ewieee he ekpakpa lɛ, esaaa akɛ ekuɔ ehiɛ efɔ̃ɔ nɔ. Wɔsumɔŋ kwraa akɛ wɔnifeemɔ aha agbe Yehowa gbɛi lɛ he guɔ. Paulo wie yɛ enɛ he akɛ: “Nyɛkatsɔmɔa pampii nyɛhaa Yudafoi kɛ Helabii kɛ Nyɔŋmɔ asafo lɛ fɛɛ; taakɛ bɔ nɔŋŋ ni mi hu misumɔɔ akɛ nibii fɛɛ mli lɛ masa mɛi fɛɛ hiɛ, ni mitaooo nɔ ni hi ha mi diɛŋtsɛ, shi moŋ nɔ ni hi ha mɛi pii, koni ahere amɛyiwala.”—1 Kor. 10:32, 33.

Ebaanyɛ efee nɔ ni wa waa kɛha mɛi ni sumɔɔ akɛ amɛkɛ Yehowa jalɛ shishitoo mlai lɛ atsu nii lɛ akɛ amɛaaná shihilɛhei ni sa. Shi esa akɛ Kristofoi ‘aya nɔ aka nɔ fɛɛ nɔ amɛkwɛ akɛ esa Nuŋtsɔ lɛ hiɛ lo.’ Esa akɛ amɛná nɔmimaa akɛ nɔ ko ni esaaa eyaaa nɔ yɛ amɛshĩai amli. (Efe. 5:5, 10) Enɛ baabi ni Kristofoi asɔle kɛbi ni Nyɔŋmɔ atsɔɔ amɛ gbɛ, ní amɛfee bɔ fɛɛ bɔ ni amɛaanyɛ kɛbu amɛ diɛŋtsɛ kɛ mɛi krokomɛi ahe kɛjɛ shihilɛi gbohii kɛ jeŋba sha he, ni amɛha Yehowa gbɛi lɛ he atse.