Yaa Nɔ Onyiɛ Wala Gbɛ Ni Hi Fe Fɛɛ Lɛ Nɔ!
Yaa Nɔ Onyiɛ Wala Gbɛ Ni Hi Fe Fɛɛ Lɛ Nɔ!
“Wɔhiɛ kã jio, wɔgboi jio, Nuŋtsɔ [Yehowa] nii ji wɔ.”—ROM. 14:8.
1. Mɛni Yesu tsɔɔ akɛ no ji wala gbɛ ni hi fe fɛɛ lɛ?
YEHOWA miisumɔ ni wɔnyiɛ wala gbɛ ni hi fe fɛɛ lɛ nɔ. Wɔbaanyɛ wɔhi shi yɛ gbɛi srɔtoi anɔ, shi gbɛi nɛɛ ateŋ ekome pɛ ji nɔ ni hi fe fɛɛ. Nyɔŋmɔ Wiemɔ lɛ naa ní wɔɔhi shi yɛ, kɛ e-Bi Yesu Kristo ni wɔɔkase lɛ ji gbɛ ni hi fe fɛɛ. Yesu tsɔɔ esɛɛnyiɛlɔi lɛ koni amɛjá Nyɔŋmɔ yɛ mumɔŋ kɛ anɔkwale mli, ni efã amɛ ni amɛfee mɛi kaselɔi. (Mat. 28:19, 20; Yoh. 4:24) Kɛ́ wɔhi shi yɛ Yesu gbɛtsɔɔmɔi lɛ anaa lɛ, Yehowa baakpɛlɛ wɔnɔ, ni E-baajɔɔ wɔ.
2. Te mɛi pii here Maŋtsɛyeli shɛɛ sane lɛ nɔ amɛha tɛŋŋ yɛ klɛŋklɛŋ afii 100 lɛ mli, ni mɛni “Gbɛ Lɛ” nɔ ni amɛhi lɛ tsɔɔ?
2 Kɛ́ mɛi ni hiɛ tsui kpakpa lɛ batsɔmɔ Kristofoi, ni abaptisi amɛ lɛ, wɔnáa yiŋtoi kpakpai ni wɔɔdamɔ nɔ wɔkɛɛ amɛ akɛ, “Nyɛyaa nɔ nyɛnyiɛa wala gbɛ ni hi fe fɛɛ lɛ nɔ!” (Bɔf. 13:48, NW) Yɛ klɛŋklɛŋ afii 100 Ŋ.B. lɛ, mɛi akpekpei abɔ ni jɛ maji srɔtoi anɔ kpɛlɛ anɔkwale lɛ nɔ, ni amɛha abaptisi amɛ yɛ mɛi ahiɛ kɛtsɔɔ akɛ amɛtu amɛhe amɛha Nyɔŋmɔ. (Bɔf. 2:41) Nakai mra be mli kaselɔi lɛ hi “Gbɛ Lɛ” nɔ. (Bɔf. 9:2; 19:23, NW) Wiemɔ nɛɛ sa jogbaŋŋ ejaakɛ mɛi ni batsɔmɔ Kristo sɛɛnyiɛlɔi lɛ hi shi yɛ gbɛ ni tsɔɔ akɛ amɛyɛ hemɔkɛyeli yɛ Yesu Kristo mli lɛ nɔ, ni amɛnyiɛ enɔkwɛmɔnɔ lɛ sɛɛ.—1 Pet. 2:21.
3. Mɛni hewɔ Yehowa webii haa abaptisiɔ amɛ, ni mɛi enyiɛ abaptisi amɛ yɛ afii nyɔŋma ni eho lɛ mli?
3 Kaselɔfeemɔ nitsumɔ lɛ miiya hiɛ waa yɛ naagbee gbii nɛɛ amli, ni amrɔ nɛɛ aatsu yɛ maji ni fa fe 230 nɔ. Yɛ afii nyɔŋma ni eho lɛ mli lɛ, mɛi ni fa fe 2,700,000 ekpɛ amɛyiŋ akɛ amɛbaasɔmɔ Yehowa, ni amɛha abaptisi amɛ kɛfee amɛhe nɔ ni amɛjɔɔ amɛha lɛ lɛ he okadi. Enɛ tsɔɔ akɛ kɛ́ hooo lɛ, abaptisi mɛi ni fa fe 5,000 daa otsi! Suɔmɔ ni amɛyɔɔ kɛha Nyɔŋmɔ, Ŋmalɛi lɛ amli nilee ni amɛná, kɛ hemɔkɛyeli ni amɛyɔɔ yɛ emli tsɔɔmɔi lɛ amli lɛ hewɔ amɛkpɛ amɛyiŋ akɛ abaptisi amɛ lɛ. Baptisimɔ ji nifeemɔ ko ni he hiaa waa yɛ wɔshihilɛ mli, ejaakɛ nakai beaŋ wɔjeɔ shishi wɔnáa wɔ kɛ Yehowa teŋ wekukpaa ni bɛŋkɛ kpaakpa. Wɔkɛ no hu tsɔɔ akɛ wɔyɛ nɔmimaa akɛ ebaaye ebua wɔ ni wɔsɔmɔ lɛ kɛyawula shi, tamɔ bɔ ni eye ebua etsuji ni hi shi yɛ blema koni amɛnyiɛ egbɛ lɛ nɔ lɛ.—Yes. 30:21.
Mɛni Hewɔ Esa akɛ Oha Abaptisi Bo?
4, 5. Kɛ́ mɔ ko ha abaptisi lɛ lɛ, mɛɛ jɔɔmɔi kɛ sɛɛnamɔi komɛi jɛɔ mli kɛbaa?
4 Ekolɛ oná Nyɔŋmɔ he nilee, ofee tsakemɔi yɛ oshihilɛ mli, ni amrɔ nɛɛ oji shiɛlɔ ni abaptisiko bo. Osa yijiemɔ yɛ enɛ hewɔ. Shi, ani otsɔ sɔlemɔ nɔ ojɔɔ ohe nɔ oha Nyɔŋmɔ, ni oosumɔ ni abaptisi bo? Eka shi faŋŋ akɛ nɔ ni okase yɛ Biblia lɛ mli lɛ eha ona akɛ esa akɛ yijiemɔ ni okɛaaha Yehowa lɛ akã otsui nɔ fe nɔ fɛɛ nɔ, ni akɛ esaaa akɛ ofeɔ nibii ni baasa bo diɛŋtsɛ ohiɛ, loo otiuɔ heloonaa nibii asɛɛ. (Nyɛkanea Lala 148:11-13; Luka 12:15) No hewɔ lɛ, kɛ́ mɔ ko ha abaptisi lɛ lɛ, mɛɛ jɔɔmɔi kɛ sɛɛnamɔi komɛi jɛɔ mli kɛbaa?
5 Akɛni oji Kristofonyo ni ojɔɔ ohe nɔ hewɔ lɛ, onyiɛ gbɛ ni hi fe fɛɛ lɛ nɔ. Obaaná miishɛɛ ejaakɛ oofee Nyɔŋmɔ suɔmɔnaa nii. (Rom. 12:1, 2) Yehowa mumɔ krɔŋkrɔŋ lɛ baaha oná Nyɔŋmɔ gbeyeishemɔ sui, tamɔ toiŋjɔlɛ kɛ hemɔkɛyeli. (Gal. 5:22, 23) Nyɔŋmɔ baaha osɔlemɔi ahetoo, ni ebaajɔɔ mɔdɛŋ ni obɔɔ akɛ ohi shi yɛ e-Wiemɔ lɛ naa lɛ nɔ. Obaaná miishɛɛ yɛ shiɛmɔ nitsumɔ lɛ mli, ni akɛni oohi shi yɛ gbɛ ni Nyɔŋmɔ kpɛlɛɔ nɔ lɛ nɔ hewɔ lɛ, hiɛnɔkamɔ ni oyɔɔ akɛ obaaná naanɔ wala lɛ mli baawa. Kɛfata he lɛ, kɛ́ ojɔɔ ohe nɔ ni oha abaptisi bo lɛ, no tsɔɔ akɛ oosumɔ ni otsɔ Yehowa Odasefonyo lɛɛlɛŋ.—Yes. 43:10-12.
6. Mɛni wɔbaptisimɔ lɛ haa anaa?
6 Kɛ́ wɔjɔɔ wɔhe nɔ wɔha Nyɔŋmɔ ni abaptisi wɔ lɛ, wɔhaa anaa akɛ Yehowa nii ji wɔ. Bɔfo Paulo ŋma akɛ: “Ejaakɛ wɔteŋ mɔ ko hiɛ kãaa haaa lɛ diɛŋtsɛ ehe, ni mɔ ko gbooo hu ehaaa lɛ diɛŋtsɛ ehe. Shi kɛji wɔhiɛ kã lɛ, Nuŋtsɔ [Yehowa] wɔhiɛ kã wɔhã; ni kɛji wɔgboi hu, Nuŋtsɔ [Yehowa] wɔgboiɔ wɔhãa. No hewɔ lɛ wɔhiɛ kã jio, wɔgboi jio, Nuŋtsɔ [Yehowa] nii ji wɔ.” (Rom. 14:7, 8) Nyɔŋmɔ ewo wɔhiɛ nyam ejaakɛ eŋmɛɔ wɔ gbɛ koni wɔ diɛŋtsɛ wɔkpɛ yiŋ wɔha wɔhe. Kɛ́ wɔkɛ shiŋŋfeemɔ kpɛ wɔyiŋ akɛ wɔbaanyiɛ wala gbɛ nɛɛ nɔ akɛni wɔsumɔɔ Nyɔŋmɔ hewɔ lɛ, wɔhaa etsui nyɔɔ emli. (Abɛi 27:11) Wɔkɛ wɔbaptisimɔ lɛ feɔ wɔhenɔjɔɔmɔ lɛ he okadi, ni wɔkɛjajeɔ yɛ mɛi ahiɛ hu akɛ Yehowa ji wɔ-Nɔyelɔ. Etsɔɔ akɛ wɔkpɛlɛɔ nɔ akɛ Yehowa ji jeŋ muu fɛɛ Nɔyelɔ. (Bɔf. 5:29, 32) Enɛ haa Yehowa hu hiɔ wɔsɛɛ. (Nyɛkanea Lala 118:6.) Kɛfata he lɛ, baptisimɔ haa wɔnine shɛɔ mumɔŋ jɔɔmɔi krokomɛi babaoo anɔ amrɔ nɛɛ kɛ agbɛnɛ hu wɔsɛɛ.
Ajɔɔ Wɔ Kɛ Nyɛmimɛi ni Yɔɔ Suɔmɔ
7-9. (a) Mɛɛ nɔmimaa Yesu kɛha mɛi fɛɛ ni amɛshi nibii fɛɛ ni amɛbanyiɛ esɛɛ lɛ? (b) Mɛɛ gbɛ nɔ Yesu shiwoo ni yɔɔ Marko 10:29, 30 lɛ baa mli?
7 Bɔfo Petro kɛɛ Yesu akɛ: “Naa, wɔ lɛ wɔshĩ nii fɛɛ, ni wɔbanyiɛ osɛɛ; belɛ mɛni wɔbaaná?” (Mat. 19:27) Petro miitao ale nɔ ni lɛ kɛ Yesu kaselɔi krokomɛi lɛ baaná wɔsɛɛ. Amɛkɛ nibii ni he hiaa eshã afɔle bɔni afee ni amɛtu amɛhe kwraa kɛtsu Maŋtsɛyeli shiɛmɔ nitsumɔ lɛ. (Mat. 4:18-22) Mɛɛ nɔmimaa Yesu ha amɛná?
8 Sane nɛɛ he amaniɛ ni Marko bɔ lɛ tsɔɔ akɛ, Yesu ha ekaselɔi lɛ le akɛ amɛbaaná mumɔŋ nyɛmimɛi. Ekɛɛ akɛ: “Mɔ ko bɛ ni eshi shia loo nyɛmimɛi hii loo nyɛmimɛi yei loo tsɛ loo nyɛ loo ŋa loo bii loo abɔɔi yɛ mi kɛ sanekpakpa lɛ hewɔ, ní enaŋ shiai kɛ nyɛmimɛi hii kɛ nyɛmimɛi yei kɛ nyɛmɛi kɛ bii kɛ abɔɔi toi oha yɛ benɛ be nɛɛ mli beebe, kɛ yiwalɛ hu, ni jeŋ ni baaba lɛŋ hu eeená naanɔ wala.” (Mar. 10:29, 30) Klɛŋklɛŋ afii 100 lɛ mli Kristofoi ni kɛ ‘amɛshĩai’ ha amɛnanemɛi Kristofoi ní amɛbatsɔmɔ “nyɛmimɛi hii kɛ nyɛmimɛi yei kɛ nyɛmɛi” amɛha amɛ taakɛ Yesu wo shi lɛ ateŋ mɛi komɛi ji Lidia, Akwila, Priskila, kɛ Gaio.—Bɔf. 16:14, 15; 18:2-4; 3 Yoh. 1, 5-8.
9 Ŋmɛnɛ lɛ, nɔ ni Yesu wie lɛ miiba mli yɛ gbɛ ni da nɔ. “Abɔɔi” ni esɛɛnyiɛlɔi lɛ shiɔ lɛ ji nitsumɔi ni mɛi babaoo—ní maŋsɛɛ shiɛlɔi, Betelbii, majimaji ateŋ sɔɔlɔi, kɛ mɛi krokomɛi ni fata he lɛ—jɛɔ amɛsuɔmɔ mli amɛshiɔ bɔni afee ni amɛye amɛbua ni Maŋtsɛyeli lɛ he nibii lɛ ashwere yɛ maji srɔtoi anɔ lɛ. Nyɛmimɛi hii kɛ yei babaoo eshi amɛshĩai bɔni afee ni amɛha amɛshihilɛ afee mlɛo, ni kɛ́ wɔnu bɔ ni Yehowa kwɛɔ amɛ, kɛ bɔ ni amɛsɔɔmɔ nitsumɔ lɛ haa amɛnáa miishɛɛ lɛ, wɔ hu wɔnáa miishɛɛ babaoo. (Bɔf. 20:35) Kɛfata he lɛ, ákɛ jeŋ muu fɛɛ Kristofoi anyɛmifeemɔ lɛ mlibii lɛ, Yehowa tsuji fɛɛ ni abaptisi amɛ lɛ baanyɛ ‘amɛtao Nyɔŋmɔ maŋtsɛyeli lɛ kɛ Nyɔŋmɔ jalɛ lɛ tsutsu’ koni amɛná jɔɔmɔi.—Mat. 6:33.
Amɛhiɔ “Teemɔhe lɛ” Shweshweeshwe
10, 11. Mɛni ji “Ŋwɛinyo lɛ teemɔhe lɛ,” ni te wɔɔfee tɛŋŋ wɔná jɛmɛ yaa gbɛ?
10 Mɛi ni jɔɔ amɛhe nɔ ni abaptisiɔ amɛ lɛ náa jɔɔmɔ kpele kroko—amɛhiɔ “Ŋwɛinyo lɛ teemɔhe lɛ.” (Nyɛkanea Lala 91:1.) Enɛ feɔ shihilɛ ni yɔɔ shweshweeshwe ní mɛi ni haa Yehowa tsɔɔ amɛ gbɛ lɛ yɔɔ mli lɛ he mfoniri, ni Yehowa buɔ mɛi nɛɛ ahe koni wekukpãa ni kã amɛ kɛ lɛ teŋ lɛ akafite. Eji “teemɔhe” ejaakɛ mɛi ni efeee Nyɔŋmɔ suɔmɔnaa nii ní amɛkɛ amɛhiɛ efɔ̃ɔɔ enɔ lɛ leee shihilɛ nɛɛ. Kɛ́ wɔhi shi yɛ wɔhenɔjɔɔmɔ lɛ naa, ni wɔkɛ wɔhe fɔ̃ Yehowa nɔ kwraa lɛ, belɛ wɔmiikɛɛ lɛ akɛ: “Mibobaahe kɛ mimɔɔ jio, mi-Nyɔŋmɔ hu ní mihiɛ kã enɔ!” (Lala 91:2) Yehowa Nyɔŋmɔ batsɔɔ wɔshihilɛhe ni yɔɔ shweshweeshwe. (Lala 91:9) Nɔ ko bɛ ni hi fe enɛ, aloo jeee nakai?
11 Kɛ́ aŋmɛ wɔ gbɛ ni wɔhi Yehowa “teemɔhe lɛ,” no tsɔɔ hu akɛ wekukpãa ni bɛŋkɛ kpaakpa ebakã wɔ kɛ Yehowa teŋ. Wɔjeɔ enɛ feemɔ shishi kɛ́ wɔjɔɔ wɔhe nɔ ni abaptisi wɔ. Kɛjɛ no sɛɛ lɛ, wɔtsɔɔ Biblia lɛ kasemɔ, wɔtsuiŋ ni wɔjɛɔ wɔsɔleɔ, kɛ Nyɔŋmɔ toi ni wɔboɔ kwraa lɛ nɔ wɔtsiɔ wɔbɛŋkɛɔ lɛ, ni no haa wɔ kɛ lɛ teŋ wekukpãa lɛ mli yaa nɔ ewaa. (Yak. 4:8) Mɔ ko bɛ ni enyɛ etsi ebɛŋkɛ Yehowa kpaakpa tamɔ Yesu, mɔ ni hekɛnɔfɔɔ ni eyɔɔ yɛ Bɔlɔ lɛ mli lɛ gbugbaaa kɔkɔɔkɔ lɛ. (Yoh. 8:29) No hewɔ lɛ, wɔyiŋ akafee wɔ kɔshikɔshi kɔkɔɔkɔ yɛ Yehowa he, ni asaŋ wɔyiŋ akafee wɔ enyɔnyɔɔnyɔ hu yɛ shwelɛ kɛ nyɛmɔ ni eyɔɔ akɛ eeeye ebua wɔ ni wɔye wɔhenɔjɔɔmɔ kitakamɔ lɛ nɔ lɛ he. (Jaj. 5:3) Nibii ni Nyɔŋmɔ eto he gbɛjianɔ koni ekɛbu ewebii lɛ ahe yɛ mumɔŋ lɛ ji odaseyeli ni kã shi faŋŋ ni tsɔɔ akɛ esumɔɔ wɔ diɛŋtsɛ, ni akɛ eesumɔ ni wɔsɔmɔ lɛ kɛyawula shi.
Nyɛhaa Wɔhiɛ Asɔa Wɔmumɔŋ Paradeiso Lɛ
12, 13. (a) Mɛni ji mumɔŋ paradeiso lɛ? (b) Mɛɛ gbɛ nɔ wɔbaanyɛ wɔtsɔ wɔye wɔbua mɛi hei lɛ?
12 Kɛ́ wɔjɔɔ wɔhe nɔ ni wɔha abaptisi wɔ lɛ, ehaa wɔnáa hegbɛ hu kɛhiɔ mumɔŋ paradeiso ni akɛduro wɔ lɛ mli. Eji mumɔŋ wekukpãa ni nɔ bɛ, ni kã wɔ kɛ wɔnanemɛi Kristofoi ni efee ekome ni toiŋjɔlɛ yɔɔ amɛ kɛ Yehowa Nyɔŋmɔ teŋ lɛ ateŋ. (Lala 29:11; Yes. 54:13) Nɔ ko bɛ jeŋ nɛɛ mli ni kɛ wɔmumɔŋ paradeiso lɛ yeɔ egbɔ. Enɛ feɔ faŋŋ titri yɛ majimaji ateŋ kpeei ashishi, be mli ni wɔnyɛmimɛi ni jɛ maji srɔtoi anɔ, ni esoro amɛmaŋ wiemɔ lɛ kɛ ekomefeemɔ ebabua amɛhe naa yɛ toiŋjɔlɛ mli ni amɛmiijiejie nyɛmimɛi asuɔmɔ kpo amɛmiitsɔɔtsɔɔ amɛhe lɛ.
13 Mumɔŋ paradeiso ni wɔyɔɔ mli lɛ yɛ srɔto kwraa kɛ́ akɛto shihilɛ ni ehiii kwraa ni yaa nɔ yɛ je lɛŋ ŋmɛnɛ lɛ he. (Nyɛkanea Yesaia 65:13, 14.) Wɔkɛ Maŋtsɛyeli lɛ he shɛɛ sane lɛ ni wɔshiɛɔ wɔhaa mɛi lɛ fɔ̃ɔ amɛ nine koni amɛba mumɔŋ paradeiso lɛ mli. Wɔná hegbɛ hu akɛ wɔye wɔbua mɛi ni kɛ asafo lɛ bɔi bɔɔ nyɛsɛɛ nɛɛ ní ehe baahia ni atsɔse amɛ yɛ shiɛmɔ nitsumɔ lɛ mli lɛ. Ekolɛ, asafoŋ onukpai lɛ baato gbɛjianɔ akɛ wɔye wɔbua mɛi hei komɛi tamɔ bɔ ni Akwila kɛ Priskila ye amɛbua Apolo ni “amɛtsɔɔ lɛ Nyɔŋmɔ gbɛ lɛ fitsofitso” lɛ.—Bɔf. 18:24-26.
Nyɛhaa Wɔyaa Nɔ Wɔkasea Yesu
14, 15. Mɛɛ yiŋtoi kpakpai ahewɔ esa akɛ wɔya nɔ wɔkase Yesu?
14 Wɔyɛ yiŋtoi kpakpai ahewɔ ni esa akɛ wɔya nɔ wɔkase Yesu. Yesu kɛ e-Tsɛ lɛ fee ekome kɛtsu nii afii akpei abɔ dani eba shikpɔŋ lɛ nɔ. (Abɛi 8:22, 30) Ele akɛ Nyɔŋmɔ sɔɔmɔ kɛ anɔkwale lɛ he odaseyeli ji wala gbɛ ni hi fe fɛɛ. (Yoh. 18:37) Yesu le faŋŋ akɛ kɛ́ ekɛ ewala tsu nɔ̃ kroko lɛ, no baatsɔɔ akɛ efóɔ lɛ pɛ enɔ̃ mli, ni ekwɛɛɛ nii kɛyaaa shɔŋŋ. Ele akɛ abaaka lɛ waa ni abaagbe lɛ. (Mat. 20:18, 19; Heb. 4:15) Etsɔɔ wɔ bɔ ni wɔɔfee wɔye anɔkwa, ejaakɛ lɛ ji wɔ-Nɔkwɛmɔnɔ lɛ.
15 Beni abaptisi Yesu etsɛɛɛ lɛ, Satan ka lɛ koni ekpoo wala gbɛ ni hi fe fɛɛ lɛ—shi Satan yeee omanye. (Mat. 4:1-11) Enɛ haa wɔnaa akɛ ekɔɔɔ he eko nɔ ni Satan baafee lɛ, wɔbaanyɛ wɔya nɔ wɔye anɔkwa. Eka shi faŋŋ akɛ ekɛ ehiɛ baaka mɛi ni miibɛŋkɛ baptisimɔ he lɛ, kɛ mɛi ni abaptisi amɛ etsɛko lɛ. (1 Pet. 5:8) Ekolɛ, wɔwekumɛi ni ehiɛɛɛ jwɛŋmɔ fɔŋ, shi agbe Odasefoi ahe guɔ aha amɛ lɛ baate shi amɛwo wɔ. Ni kɛlɛ, shiteekɛwoo ni tamɔ nɛkɛ lɛ haa wɔnáa hegbɛ kɛjieɔ Kristofoi asui kpakpai tamɔ bulɛ kɛ hiɛshikamɔ kpo kɛ́ wɔmiiha sanebimɔi ahetoo ní wɔmiiye odase lɛ. (1 Pet. 3:15) Shihilɛi ni tamɔ nɛkɛ lɛ baanyɛ aná mɛi ni boɔ wɔ toi lɛ anɔ hewalɛ kpakpa.—1 Tim. 4:16.
Nyɛyaa Nɔ Nyɛhia Wala Gbɛ ni Hi Fe Fɛɛ lɛ Nɔ!
16, 17. (a) Mɛɛ nibii etɛ 5 Mose 30:19, 20 lɛ tsɔɔ akɛ esa akɛ mɔ ko afee ni ená wala? (b) Mɛɛ gbɛ nɔ Yesu, Yohane, kɛ Paulo ma nɔ ni Mose ŋma lɛ nɔ mi?
16 Aaafee afii 1,500 dani Yesu aaaba shikpɔŋ lɛ nɔ lɛ, Mose wo Israelbii lɛ ahewalɛ koni amɛkɔ wala gbɛ ni hi fe fɛɛ yɛ nakai beaŋ lɛ. Ekɛɛ akɛ: “Miitsɛ́ ŋwɛi kɛ shikpɔŋ ŋmɛnɛ ni amɛbaye nyɛhe odase akɛ mikɛ wala kɛ gbele, jɔɔmɔ kɛ loomɔ eshwie nyɛhiɛ; no hewɔ lɛ kɔ wala, koni bo kɛ oseshi fɛɛ ayi aná wala, ní osumɔ Yehowa, o-Nyɔŋmɔ lɛ, ni obo egbee toi, ni okɛ ohe akpɛtɛ ehe.” (5 Mose 30:19, 20) Israelbii lɛ eyayeee Nyɔŋmɔ anɔkwa, shi nibii etɛ ni Mose tsɔɔ akɛ esa akɛ mɔ ko afee ni ená wala lɛ tsakeko. Yesu kɛ agbɛnɛ hu mɛi krokomɛi saa amɛti enɛɛmɛi amli ekoŋŋ.
17 Klɛŋklɛŋ lɛ, ‘esa akɛ wɔsumɔ Yehowa, wɔ-Nyɔŋmɔ lɛ.’ Kɛ́ wɔhi shi yɛ Nyɔŋmɔ jalɛ gbɛi lɛ anaa lɛ, no tsɔɔ akɛ wɔsumɔɔ lɛ. (Mat. 22:37) Nɔ ni ji enyɔ lɛ, ‘esa akɛ wɔbo Yehowa gbee toi’ kɛtsɔ Nyɔŋmɔ Wiemɔ lɛ ni wɔɔkase kɛ ekitai lɛ anɔ ni wɔɔye lɛ nɔ. (1 Yoh. 5:3) Enɛ biɔ ni wɔya Kristofoi akpeei, he ni akaseɔ Biblia lɛ yɛ lɛ daa. (Heb. 10:23-25) Nɔ ni ji etɛ lɛ, ‘esa akɛ wɔkpɛtɛ Yehowa he.’ Nyɛhaa wɔyaa nɔ wɔnáa hemɔkɛyeli yɛ Nyɔŋmɔ mli daa, ni wɔnyiɛ e-Bi lɛ sɛɛ daa, ekɔɔɔ he eko nɔ̃ shihilɛ ni wɔkɛbaakpe.—2 Kor. 4:16-18.
18. (a) Te Blɔfo Buu-Mɔɔ lɛ wie anɔkwale lɛ he eha tɛŋŋ yɛ afi 1914 tɔ̃ɔ? (b) Te esa akɛ wɔnu he wɔha tɛŋŋ yɛ anɔkwale la lɛ he ŋmɛnɛ?
18 Kɛ́ wɔhi shi yɛ gbɛ ni kɛ Biblia mli anɔkwalei lɛ kpãa gbee nɔ lɛ, wɔnáa jɔɔmɔi babaoo! Yɛ afi 1914 lɛ, Blɔfo Buu-Mɔɔ lɛ wie sane ko ni sa kadimɔ waa akɛ: “Wɔji mɛi ni yɔɔ miishɛɛ, ni ajɔɔ wɔ, aloo jeee nakai? Aso wɔ-Nyɔŋmɔ lɛ jeee anɔkwafo? Kɛ́ mɔ ko le shihilɛ gbɛ ni hi fe enɛ lɛ, ha ni eŋɔ. Kɛ́ nyɛteŋ mɔ ko na nɔ ko ni hi fe enɛ lɛ, wɔheɔ wɔyeɔ akɛ ebaaha wɔle. Wɔleee nɔ ko ni hi fe nibii ni wɔná yɛ Nyɔŋmɔ Wiemɔ lɛ mli lɛ, ni asaŋ nɔ ko bɛ ni shɛɔ he bibioo po. . . . Toiŋjɔlɛ, miishɛɛ, kɛ jɔɔmɔ ni anɔkwa Nyɔŋmɔ lɛ he nilee ni mli kã shi faŋŋ lɛ eha wɔná yɛ wɔtsuiiaŋ kɛ wɔshihilɛ mli lɛ fa naakpa. Nyɔŋmɔ Nilee, Jalɛsaneyeli, Hewalɛ, kɛ Suɔmɔ lɛ he sane lɛ eha wɔtsɔmɔ nilelɔi ni wɔtsui enyɔ wɔmli. Nɔ ko bɛ ni wɔbaanyɛ wɔná ni hi fe enɛ. Nɔ ni wɔshweɔ waa ji akɛ wɔná Nyɔŋmɔ he nilee babaoo.” (The Watch Tower, December 15, 1914, baafa 377-378) Hiɛsɔɔ ni wɔyɔɔ ha mumɔŋ la kɛ anɔkwale lɛ tsakeko. Yɛ anɔkwale mli lɛ, amrɔ nɛɛ wɔyɛ yiŋtoo ni fe tsutsu nɔ lɛ ní wɔɔdamɔ nɔ wɔha wɔmli afili wɔ akɛ ‘wɔnyiɛ Yehowa la lɛ mli!’—Yes. 2:5; Lala 43:3; Abɛi 4:18.
19. Mɛni hewɔ esa akɛ mɛi ni shɛɔ baptisimɔ taomɔ nii ahe lɛ aha abaptisi amɛ nɔŋŋ lɛ?
19 Kɛ́ oosumɔ ni ‘onyiɛ Yehowa la lɛ mli,’ shi ojɔko ohe nɔ, ni abaptisiko bo akɛ Kristofonyo lɛ, kaashashao shi. Feemɔ nɔ fɛɛ nɔ ni ooonyɛ koni oshɛ Biblia mli taomɔ nii kɛha baptisimɔ lɛ he—ejaakɛ no ji gbɛ pɛ ni obaanyɛ otsɔ nɔ otsɔɔ akɛ ohiɛ sɔɔ nɔ ni Nyɔŋmɔ kɛ Kristo efee amɛha wɔ lɛ. Okɛ onii ni jara wa fe fɛɛ, ni ji owala aha Yehowa. Ha ana akɛ oosumɔ ni ofee Nyɔŋmɔ suɔmɔnaa nii kɛtsɔ e-Bi lɛ sɛɛ ni ooonyiɛ lɛ nɔ. (2 Kor. 5:14, 15) Ŋwanejee ko kwraa bɛ he akɛ, no ji wala gbɛ ni hi fe fɛɛ lɛ!
Te Obaaha Hetoo Oha Tɛŋŋ?
• Mɛni he okadi wɔbaptisimɔ lɛ feɔ?
• Mɛɛ jɔɔmɔi wɔnáa kɛ́ wɔjɔɔ wɔhe nɔ wɔha Nyɔŋmɔ ni abaptisi wɔ?
• Mɛni hewɔ ehe hiaa waa ni wɔkase nii kɛjɛ Yesu ŋɔɔ lɛ?
• Mɛni baaye abua wɔ ni wɔya nɔ wɔhi wala gbɛ ni hi fe fɛɛ lɛ nɔ?
[Nikasemɔ lɛ he Sanebimɔi]
[Mfoniri ni yɔɔ baafa 25]
Kɛ́ abaptisi bo lɛ, no tsɔɔ akɛ okɔ wala gbɛ ni hi fe fɛɛ lɛ
[Mfonirii ni yɔɔ baafa 26]
Ani oyɛ “teemɔhe lɛ”?