Hiɛmɔ “Tsui Mlitsemɔ” Mli Yɛ Jaramɔ Bei Nɛɛ Amli

ADAFITSWALƆ ko ni ji Katoliknyo ni atsɛɔ lɛ Vittorio Messori lɛ wie bɔlɛnamɔ jeŋba sha ni yaa nɔ nyɛsɛɛ nɛɛ yɛ Katolik Sɔlemɔ lɛ mli yɛ Italy lɛ he akɛ: “Ŋmɛnɛ lɛ, mɔ ko mɔ ko nyɛŋ akɛɛ akɛ jeŋba sha eyaaa nɔ yɛ Sɔlemɔ lɛ mli. . . . Ni kɛ́ aŋmɛ osɔfoi lɛ agbɛ ni amɛbote gbalashihilɛ mli po lɛ, no nyɛŋ atsu naagba lɛ he nii, ejaakɛ jeŋba sha ni yaa nɔ lɛ 100 mlijaa 80 kɔɔ hii ni kɛ hii feɔ yakayaka nii lɛ he—osɔfoi ni kɛ hii kɛ gbekɛbii hii feɔ yakayaka nii.”—La Stampa.

Ŋwanejee ko bɛ he akɛ efɔŋfeemɔ ni efa babaoo lɛ ji okadi ni tsɔɔ akɛ wɔyɛ nibii agbɛjianɔtoo nɛɛ “naagbee gbii” lɛ amli. (2 Tim. 3:1-5) Adafitswai ni wɔnuɔ lɛ tsɔɔ akɛ efɔŋfeemɔ ni efa babaoo lɛ náa adesai babaoo kɛ mɛi ni kɛɔ akɛ Nyɔŋmɔ gbɔmɛi ji amɛ lɛ hu anɔ hewalɛ gbonyo. Akɛni amɛtsui mli tseee hewɔ lɛ, amɛfeɔ nibii ni yɔɔ nyaŋemɔ. (Efe. 2:2) Belɛ Yesu kɔkɔbɔɔ akɛ “tsui mli ni susumɔi fɔji, gbɔmɔgbee, gbalafitemɔi, ajwamaŋbɔɔi, juui, amale odaseyelii kɛ musubɔɔi jɛɔ” lɛ sa jogbaŋŋ. (Mat. 15:19) Shi Yehowa Nyɔŋmɔ miisumɔ ni etsuji asumɔ “tsui mlitsemɔ.” (Abɛi 22:11) Belɛ, te Kristofonyo ko aaafee tɛŋŋ ehiɛ tsui mlitsemɔ mli yɛ jaramɔ bei nɛɛ amli?

Mɛni Ji “Tsui Mlitsemɔ”?

Bei pii lɛ, akɛ wiemɔ ni ji “tsui” lɛ tsuɔ nii yɛ okadifeemɔŋ yɛ Biblia lɛ mli. Niiamlitaomɔ wolo ko wie akɛ kɛ́ Biblia lɛ tsĩ tsui lɛ tã lɛ, etsɔɔ “bɔ ni mɔ ko ji diɛŋtsɛ” ni “no ji nɔ̃ titri ni Nyɔŋmɔ kwɛɔ, ni no tsɔɔ bɔ ni mɔ ko baajá Nyɔŋmɔ ní eba ejeŋ eha.” Tsui lɛ damɔ shi kɛha nɔ̃ gbɔmɛi ni wɔji diɛŋtsɛ. Taakɛ niiamlitaomɔ wolo ni atsĩ tã kɛtsɔ hiɛ lɛ wie lɛ, no ji nɔ ni Yehowa kwɛɔ yɛ etsuji lɛ ahe, ni no ji nɔ ni jara wa yɛ ehiɛ.—1 Pet. 3:4.

Kɛ́ akɛ wiemɔi ni ji “krɔŋŋfeemɔ” kɛ “hetsemɔ” tsu nii yɛ Biblia lɛ mli lɛ, ebaanyɛ ekɔ falefalefeemɔ he. Shi akɛ wiemɔi nɛɛ tsuɔ nii kɛkɔɔ nɔ ko ni abuleko loo efiteko yɛ jeŋba kɛ Nyɔŋmɔjamɔ gbɛfaŋ lɛ hu he. Yesu wie yɛ Gɔŋ nɔ Shiɛmɔ lɛ mli akɛ: “Ajɔɔ mɛi ni tsuii amli tse lɛ.” Nɔ ni ewie lɛ kɔɔ mɛi ni jeŋba he tse lɛ ahe. (Mat. 5:8) Nibii ni amɛsumɔɔ, nibii ni amɛshweɔ, kɛ nibii ni amɛsusuɔ he lɛ yɛ krɔŋŋ. Suɔmɔ kɛ hiɛsɔɔ ni amɛyɔɔ kɛha Yehowa lɛ tsirɛɔ amɛ ni amɛkɛ amɛtsui fɛɛ sɔmɔɔ lɛ, ni amɛfeee osato. (Luka 10:27) Oosumɔ akɛ otsuiŋ atse yɛ nakai gbɛ nɔ, aloo jeee nakai?

Ewa akɛ Aaahiɛ “Tsui Mlitsemɔ” Mli

Esa akɛ Yehowa tsulɔ afee mɔ ni ‘niji ahe bɛ muji ko’ ní ‘etsui hu mli atse.’ (Lala 24:3, 4) Shi ŋmɛnɛ lɛ, ebɛ mlɛo kwraa kɛha Nyɔŋmɔ tsuji akɛ amɛaaha ‘amɛtsui mli atse’ daa. Satan kɛ jeŋ ni eyeɔ nɔ lɛ, kɛ agbɛnɛ hu wɔheloo ni egbede lɛ nyɛɔ wɔnɔ waa koni wɔtsi wɔhe kɛjɛ Yehowa he. Bɔni afee ni wɔye nɔnyɛi nɛɛ anɔ lɛ, ehe miihia waa ni wɔsumɔ “tsui mlitsemɔ” ní wɔtswa wɔfai shi akɛ wɔbaahiɛ mli daa. Enɛ baabu wɔhe, ni ebaaha wɔya nɔ wɔfee Nyɔŋmɔ nanemɛi. Te wɔɔfee tɛŋŋ wɔhiɛ tsui mlitsemɔ mli?

Hebribii 3:12 lɛ bɔɔ wɔ kɔkɔ akɛ: “Nyɛkwɛa ni ahia, anyɛmimɛi, koni nyɛteŋ mɔ ko akahi tsui fɔŋ ni heee yeee ni ekpale kɛjɛ Nyɔŋmɔ, hiɛkalɔ lɛ, he.” Kɛ́ wɔná tsui ni “heee yeee” lɛ, wɔnyɛŋ wɔhiɛ ‘tsui ni mli  tse’ mli. Mɛɛ susumɔi Satan Abonsam haa mɛi náa bɔni afee ni amɛkaná Nyɔŋmɔ mli hemɔkɛyeli? Sutsakemɔ tsɔɔmɔ lɛ, susumɔ ni ahiɛ akɛ mɔ fɛɛ mɔ baanyɛ aba ejeŋ bɔ ni esumɔɔ, kɛ mɛi ayiŋ ni etɛɛɛ amɛ akɛ ajɛ mumɔŋ aŋma Ŋmalɛ Krɔŋkrɔŋ lɛ ji susumɔi nɛɛ ateŋ ekomɛi. Esaaa akɛ wɔhaa susumɔi gbohii ni fiteɔ nii nɛɛ náa wɔnɔ hewalɛ. (Kol. 2:8) Nibii titrii ni baaha wɔwu wɔshi susumɔi gbohii nɛɛ ji Biblia lɛ ni wɔɔkane daa, kɛ be ni wɔɔŋɔ kɛjwɛŋ saji anɔ jogbaŋŋ. Nyɔŋmɔ Wiemɔ lɛ he anɔkwa nilee ni wɔɔná lɛ baaha suɔmɔ ni wɔyɔɔ kɛha Yehowa lɛ mli awa ní wɔhiɛ asɔ nibii ni efeɔ ehaa wɔ lɛ jogbaŋŋ. Ja wɔná suɔmɔ kɛ hiɛsɔɔ ni tamɔ nɛkɛ dani wɔbaanyɛ wɔkpoo susumɔi gbohii, ní wɔha hemɔkɛyeli ni wɔyɔɔ yɛ Yehowa mli lɛ mli awa bɔni afee ni wɔhiɛ tsui ni mli tse mli.—1 Tim. 1:3-5.

Kɛ́ akɛ Heloo lɛ Sɛɛdii Nii Miika Wɔ

Nɔ̃ kroko ni baanyɛ aha ewa kɛha wɔ akɛ wɔɔhiɛ ‘tsui ni mli tse’ mli ji heloo lɛ sɛɛdii nii lɛ. (1 Yoh. 2:15, 16) Shika suɔmɔ loo shwelɛ ni anáa akɛ aná heloonaa nibii babaoo lɛ baanyɛ afite Kristofonyo ko tsui koni efee nibii ni kɛ Nyɔŋmɔ suɔmɔnaa nii kpãaa gbee. Kristofoi ateŋ mɛi fioo komɛi emale yɛ nitsumɔhe, amɛtswa ojo, loo amɛju shika kɛ nibii krokomɛi po.—1 Tim. 6:9, 10.

Nɔ ni tamɔɔɔ nakai lɛ, kɛ́ wɔná Yehowa gbeyeishemɔ ni sa, wɔsumɔ jalɛ nifeemɔ, ni wɔtswa wɔfai shi akɛ wɔbaahiɛ henilee kpakpa mli lɛ, no baatsɔɔ akɛ wɔsumɔɔ ‘tsui ni mli tse.’ Nakai suɔmɔ lɛ tsirɛɔ wɔ koni wɔya nɔ “wɔba wɔjeŋ fɛfɛo yɛ nii fɛɛ mli.” (Heb. 13:18) Kɛ́ wɔfee nɔ ni ja ni wɔye anɔkwa lɛ, ebaanyɛ ená mɛi anɔ hewalɛ kpakpa. Odasefonyo ko ni yɔɔ Italy ni atsɛɔ lɛ Emilio ní ekudɔɔ tsɔne ni maŋbii taraa mli lɛ na walɛti ko, ni Yuropa shika ni naa shɛɔ 470 (Amerika dɔlai 680) yɛ mli. Ekɛ walɛti lɛ ha enɔkwɛlɔ  lɛ, ni nɔkwɛlɔ lɛ hu kɛ walɛti lɛ ha nɔ̃tsɛ lɛ, ni enɛ ha mɛi ni ekɛtsuɔ nii lɛ anaa kpɛ amɛhe. Enɛ ta mɛi ni Emilio kɛtsuɔ nii lɛ ateŋ mɛi komɛi atsuiŋ aahu akɛ amɛná Biblia lɛ he miishɛɛ, ni amɛha akɛ amɛ bɔi nikasemɔ. Beni yi wulaa shi lɛ, mɛi kpawo ni jɛ wekui srɔtoi enyɔ amli lɛ kpɛlɛ anɔkwale lɛ nɔ. Hɛɛ, kɛ́ wɔjɛ tsui ni mli tse lɛɛlɛŋ mli wɔba wɔjeŋ yɛ anɔkwayeli mli lɛ, ebaanyɛ eha mɛi krokomɛi ajie Nyɔŋmɔ yi.—Tito 2:10.

Nɔ kroko hu ni baanyɛ afite Kristofonyo ko tsui ji bɔlɛnamɔ he susumɔ gbonyo. Susumɔ ni mɛi babaoo hiɛ akɛ ajwamaŋbɔɔ, gbalafitemɔ, kɛ hii ni kɛ hii loo yei ni kɛ yei feɔ yakayaka nii lɛ jeee tɔmɔ lɛ baanyɛ afite Kristofonyo ko tsui. Kɛ́ mɔ ko kɛ ehe wo bɔlɛnamɔ jeŋba sha mli lɛ, ekolɛ ekɛ esha nɛɛ baatee ni ekɛ osatofeemɔ baahiɛ jeŋbai enyɔ. Kɛ́ mɔ ko fee nakai lɛ, ekã shi faŋŋ akɛ ‘etsui mli tseee.’

Abaptisi Gabriele beni eye afii 15, ni ekɛ ehe wo gbɛgbamɔ nitsumɔ lɛ mli amrɔ nɔŋŋ. Shi sɛɛ mli lɛ, ekɛ nanemɛi gbohii bɔi bɔɔ yɛ hiɛtserɛjiemɔ kɛ daanumɔ hei gbɛkɛgbɛkɛ. (Lala 26:4) Enɛ ha ekɛ ehe bɔi jeŋba sha nifeemɔi amli woo ni eba ejeŋ yɛ osatofeemɔ mli, ni ehe bahia ni ashwie lɛ kɛjɛ Kristofoi asafo lɛ mli. Etoi ni Yehowa gbala nɛɛ ha ejwɛŋ kɛtee shɔŋŋ. Gabriele kɛɛ akɛ: “Mikɛ hiɛdɔɔ bɔi nibii ni tsutsu ko lɛ mifeee amɛ jogbaŋŋ lɛ fɛɛ afeemɔ. Mikaneɔ Biblia lɛ daa gbi, ni mibɔɔ mɔdɛŋ koni manu nɔ ni Yehowa kɛɔ lɛ shishi, ni mikaseɔ woji ni asafo lɛ ekala lɛ jogbaŋŋ. Mina akɛ aŋkro nikasemɔ ŋɔɔ ni ehe yɛ sɛɛnamɔ waa, ni Biblia lɛ kanemɔ kɛ sɔlemɔ ni misɔleɔ kɛ hiɛdɔɔ lɛ waje mi waa.” Enɛ ye ebua Gabriele ni ekwa etsutsu jeŋba gbonyo lɛ, ni esaa ekɛ Yehowa teŋ wekukpaa lɛ.

Amrɔ nɛɛ Gabriele kɛ eŋa miisɔmɔ akɛ gbɛgbalɔi. Nɔ ni ba enɔ lɛ maa nɔ mi akɛ kɛ́ mɔ ko kase Biblia lɛ kɛ “tsulɔ anɔkwafo kɛ nilelɔ” lɛ woji lɛ, no baanyɛ aye abua lɛ koni ená tsui ni mli tse ní ekpoo jeŋba sha.—Mat. 24:45; Lala 143:10.

“Tsui Mlitsemɔ” yɛ Kaa Shishi

Henyɛlɔi ashiteekɛwoo, ohia, kɛ hela ni naa wa eha Nyɔŋmɔ tsuji lɛ ateŋ mɛi komɛi anijiaŋ eje wui. Bei komɛi lɛ, enɛ náa amɛtsuii anɔ hewalɛ gbonyo. Maŋtsɛ David po kɛ shihilɛ ni tamɔ nɛkɛ kpe. Ekɛɛ akɛ: “Mimumɔ etɔ biti yɛ mimli, mitsui efee shikplikpii yɛ mimli.” (Lala 143:4) Mɛni ye ebua lɛ ni enyɛ eye shihilɛi ni tamɔ nɛkɛ lɛ anɔ? David jwɛŋ bɔ ni Nyɔŋmɔ kɛ E-tsuji lɛ yeɔ ehaa kɛ bɔ ni Nyɔŋmɔ ejie lɛ kɛjɛ shihilɛi srɔtoi amli lɛ nɔ. Ejwɛŋ nibii ni Yehowa efee yɛ E-gbɛ́i kpele lɛ hewɔ lɛ anɔ. David susu Nyɔŋmɔ nitsumɔi lɛ ahe. (Lala 143:5) Nakai nɔŋŋ kɛ́ wɔ hu wɔjwɛŋ wɔ-Bɔlɔ lɛ kɛ nibii fɛɛ ni efee eha wɔ kɛ nɔ ni eyaa nɔ efeɔ ehaa wɔ lɛ anɔ lɛ, no baaye abua wɔ kɛ́ wɔkɛ kaa po miikpe.

Kɛ́ mɔ ko tɔ̃ wɔnɔ loo wɔnu he akɛ atɔ̃ wɔnɔ lɛ, ekolɛ wɔmli baafu. Kɛ́ wɔtee nɔ wɔsusu nɔ ni ba lɛ he be fɛɛ be lɛ, ebaanyɛ eha wɔná wɔnyɛmimɛi lɛ ahe jwɛŋmɔ fɔŋ. Ekolɛ wɔkɛ amɛ baakpa bɔɔ, wɔbaatsi wɔhe, ni wɔnaŋ mɛi ahe miishɛɛ. Shi kɛ́ wɔfee nakai lɛ, ani no tsɔɔ akɛ wɔmiisumɔ ni ‘wɔtsui mli atse’? Eyɛ faŋŋ akɛ, bɔ ni wɔkɛ wɔnyɛmimɛi Kristofoi lɛ yeɔ wɔhaa, kɛ bɔ ni wɔfeɔ wɔnii yɛ amɛnifeemɔi ahe lɛ fata nibii ni tsɔɔ akɛ wɔtsui mli tse lɛ ahe.

Akɛni wɔji anɔkwa Kristofoi, ni wɔsumɔɔ “tsui mlitsemɔ” hewɔ lɛ, esoro wɔ kwraa yɛ jeŋ ni emli shihilɛ lɛ miiya nɔ eefite ní jeŋba sha miihe shi yɛ mli lɛ he. Akɛni wɔfeɔ Nyɔŋmɔ suɔmɔnaa nii ni wɔtsui nyɔɔ wɔmli hewɔ lɛ, no náa wɔshihilɛ nɔ hewalɛ kpakpa. Nɔ ni fe fɛɛ lɛ, wekukpaa kpakpa kã wɔ kɛ Yehowa Nyɔŋmɔ ni ji wɔ-Bɔlɔ ni sumɔɔ mɛi ni “tsuii amli tse lɛ” teŋ. (Lala 73:1) Hɛɛ, abaanyɛ abu wɔ ashi mɛi ni baaná miishɛɛ lɛ anɔ ejaakɛ Yesu wo shi akɛ mɛi nɛɛ ‘aaana Nyɔŋmɔ’ beni Nyɔŋmɔ yeɔ ebuaa mɛi ni sumɔɔ “tsui mlitsemɔ” lɛ.—Mat. 5:8.