Sanebimɔi ni Jɛ Kanelɔi Adɛŋ

Ani Ezekiel 18:20 lɛ ni kɛɛ akɛ “bi tereŋ etsɛ nishaianii” lɛ teɔ shi ewoɔ nɔ ni 2 Mose 20:5 lɛ wie akɛ Yehowa “woɔ tsɛmɛi atɔmɔi anyɔmɔ kɛtsɔɔ bii anɔ” lɛ?

Amɛteee shi amɛwooo amɛhe. Ekome miiwie akɛ mɔ fɛɛ mɔ baabu lɛ diɛŋtsɛ ehe akɔntaa, ni ekroko lɛ hu miiwie akɛ kɛ́ mɔ ko fee efɔŋ lɛ, nibii ni baajɛ mli kɛba lɛ baanyɛ asa eshwiei ahe.

Nibii ni Ezekiel yitso 18 lɛ wie he lɛ tsɔɔ akɛ mɔ fɛɛ mɔ baabu lɛ diɛŋtsɛ ehe akɔntaa. Kuku 4 lɛ kɛɛ akɛ “susuma ni feɔ esha lɛ, lɛ nɔŋŋ eeegbo.” Shi mɔ ni ji “jalɔ, ni eyeɔ jalɛ sane ni efeɔ nɔ ni ja” lɛ hu? “Eyi aaaná wala kɛ̃.” (Ezek. 18:5, 9) No hewɔ lɛ, kɛ́ mɔ ko da kɛshɛ he ni lɛ diɛŋtsɛ ebaanyɛ ekpɛ yiŋ eha ehe lɛ, akojoɔ lɛ “yɛ egbɛi anaa.”—Ezek. 18:30.

Nɔ ni ba Levinyo ko ni atsɛɔ lɛ Kora lɛ nɔ lɛ haa shishitoo mla nɛɛ feɔ faŋŋ. Beni Israelbii lɛ nyiɛ ŋa lɛ nɔ lɛ, Kora hiɛ esɔɔɔ sɔɔmɔ hegbɛi krɛdɛi ni akɛwo edɛŋ lɛ. Akɛni Kora  miitao osɔfoyeli lɛ hewɔ lɛ, ekɛ mɛi komɛi fee ekome ni amɛtse Yehowa najiaŋdamɔlɔi ni ji Mose kɛ Aaron hiɛ atua. Yehowa gbe Kora kɛ mɛi ni fata ehe kɛtse atua lɛ, ejaakɛ amɛkɛ henɔwomɔ tao nakai hegbɛ ni jeee amɛnɔ̃ lɛ. (4 Mose 16:8-11, 31-33) Shi Kora bihii lɛ fataaa he kɛtseee atua lɛ. Nyɔŋmɔ gbalaaa amɛtoi yɛ esha ni amɛtsɛ fee lɛ hewɔ. Yehowa anɔkwa ni amɛye lɛ ha amɛyi ná wala.—4 Mose 26:10, 11.

Shi kɔkɔbɔɔ ni yɔɔ 2 Mose 20:5 lɛ ni ji Kitai Nyɔŋma lɛ ateŋ ekome lɛ hu? Susumɔ shihilɛ mli ni akɛ nakai kɔkɔbɔɔ lɛ ha yɛ lɛ he okwɛ. No mli lɛ Yehowa kɛ Israel maŋ lɛ miito Mla kpaŋmɔ lɛ he gbɛjianɔ. Beni Israelbii lɛ nu kpaŋmɔ lɛ mli wiemɔi lɛ, amɛjaje yɛ faŋŋ akɛ: “Nibii fɛɛ ni Yehowa ewie lɛ wɔɔfee.” (2 Mose 19:5-8) Enɛ ha wekukpaa krɛdɛɛ ko bakã maŋ muu lɛ fɛɛ kɛ Yehowa teŋ. No hewɔ lɛ, maŋ muu lɛ fɛɛ akɛwie wiemɔi ni yɔɔ 2 Mose 20:5 lɛ.

Beni Israelbii lɛ ye Yehowa anɔkwa lɛ, maŋ lɛ ná he sɛɛ ni amɛná jɔɔmɔi babaoo. (3 Mose 26:3-8) Shi beni Israel maŋ lɛ kpoo Yehowa ní amɛyajá apasa nyɔŋmɔi lɛ, ejɔɔɔ amɛ, ni ebuuu amɛhe hu; maŋ lɛ na nɔ̃. (Koj. 2:11-18) Eji anɔkwale akɛ aŋkroaŋkroi komɛi tee nɔ amɛye anɔkwa ni amɛye Nyɔŋmɔ kitai lɛ anɔ yɛ wɔŋ ni maŋ lɛ ja lɛ fɛɛ sɛɛ. (1 Maŋ. 19:14, 18) Ekã shi faŋŋ akɛ anɔkwafoi nɛɛ na nɔ̃ kɛ̃ yɛ eshai ni maŋ lɛ fee lɛ hewɔ, shi Yehowa jie mlihilɛ kpo etsɔɔ amɛ.

Beni Israelbii lɛ je gbɛ amɛtɔ̃ Yehowa shishitoo mlai lɛ anɔ ní no ha agbe egbɛ́i lɛ he guɔ yɛ jeŋmaji lɛ ateŋ lɛ, Yehowa gbala ewebii lɛ atoi kɛtsɔ nom ni eha aŋɔ amɛ kɛtee Babilon lɛ nɔ. Yɛ anɔkwale mli lɛ, enɛ bafee toigbalamɔ kɛha aŋkroaŋkroi kɛ maŋ muu lɛ fɛɛ. (Yer. 52:3-11, 27) Eji anɔkwale akɛ Biblia lɛ tsɔɔ akɛ Israel maŋ lɛ he eshai lɛ fa aahu akɛ yinɔbii ni ji etɛ, ejwɛ, loo nɔ ni fa fe nakai na nɔ̃ yɛ amɛtsɛmɛi atɔmɔi lɛ ahewɔ taakɛ 2 Mose 20:5 lɛ wie lɛ.

Agbɛnɛ hu wekui komɛi ni na nɔ̃ yɛ amɛfɔlɔi atɔmɔi ahewɔ lɛ ahe saji yɛ Nyɔŋmɔ Wiemɔ lɛ mli. Osɔfonukpa Eli tɔ̃ Yehowa nɔ kɛtsɔ ha ni eha ebihii “yakagbɔmɛi” ni bɛ jeŋba lɛ tee nɔ amɛye osɔfoi lɛ nɔ. (1 Sam. 2:12-16, 22-25) Akɛni Eli wo ebihii lɛ babaoo fe Yehowa hewɔ lɛ, Nyɔŋmɔ wo akpɔ akɛ ehaŋ mɔ ko ajɛ eweku lɛ mli asɔmɔ akɛ osɔfonukpa dɔŋŋ, ni enɛ ba mli kɛjɛ enanakaŋsowa Abiatar nɔ. (1 Sam. 2:29-36; 1 Maŋ. 2:27) Nɔ ni ba Gehazi nɔ lɛ hu haa shishitoo mla ni yɔɔ 2 Mose 20:5 lɛ feɔ faŋŋ. Bɔni afee ni ená heloonaa nii kɛjɛ tsamɔ ni atsa Aram Tatsɛ Naeman lɛ mli hewɔ lɛ, eyayeee anɔkwa akɛ Elisha tsulɔ. Yehowa tsɔ Elisha nɔ ekojo lɛ akɛ: “Naeman kpiti lɛ aaakpɛtɛ ohe kɛ oseshibii ahe kɛya naanɔ.” (2 Maŋ. 5:20-27) No hewɔ lɛ, nɔ ni jɛ Gehazi tɔmɔ lɛ mli kɛba lɛ sa eseshibii lɛ ahe.

Akɛni Yehowa ji Bɔlɔ kɛ Wala Halɔ hewɔ lɛ, eyɛ hegbɛ akɛ etsɔɔ nɔ̃ toigbalamɔ ni ja, ni sa mɔ ko. Saji ni wɔsusu he kɛtsɔ hiɛ lɛ tsɔɔ akɛ tsɛmɛi atɔmɔi baanyɛ aha amɛbii loo amɛseshibii ana nɔ̃. Shi Yehowa ‘nuɔ mɛi ní efi amɛ lɛ abolɔmɔ,’ ni aŋkroaŋkroi ni kɛ hiɛdɔɔ tsiɔ amɛbɛŋkɛɔ lɛ lɛ baanyɛ aná ehiɛ duromɔ kɛ hejɔlɛ ko po.—Hiob 34:28.

[Mfoniri ni yɔɔ baafa 29]

Agbala Kora kɛ mɛi ni kɛ lɛ fee ekome kɛtse atua lɛ atoi yɛ amɛnifeemɔi lɛ ahewɔ