Ani Okaiɔ?

Ani oná Buu-Mɔɔ srɔtoi ni ba nyɛsɛɛ nɛɛ akanemɔ he miishɛɛ? Kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Mɛni hewɔ esa akɛ Mesia lɛ agbo?

Yesu gbele lɛ ma nɔ mi akɛ adesa ni eye emuu baanyɛ ahiɛ Nyɔŋmɔjamɔ mli kɛ́ aka lɛ yɛ gbɛ ni naa wa fe fɛɛ po nɔ. Agbɛnɛ hu, Yesu wo esha ni Adam kɛshi eseshibii lɛ he nyɔmɔ, ni no baaha mɛi aná naanɔ wala.—12/15, baafa 22.

• Mɛni baanyɛ aye abua mɔ ko koni ekanu dãa fe nine?

Sɔlemɔ kɛ Biblia lɛ kasemɔ baanyɛ aye abua. Ehe miihia ni mɔ lɛ aye ehe nɔ, ehi shi yɛ efaishitswaa lɛ naa, ni ehala nanemɛi kpakpai. Kɛ́ mɔ ko hala akɛ eeenu dãa lɛ, no lɛ esa akɛ eŋmɔ eyiŋ kpɔ yɛ abɔ ni ebaanu ni etekeŋ nɔ lɛ he, ni eye eyiŋkpɛɛ lɛ nɔ.—1/1-E, baafa 7-9.

• Mɛni kɛ́ ofee lɛ no tsɔɔ akɛ ooha sɛɛnamɔ miiba okɛ obii lɛ ateŋ sanegbaa he?

Jeee wiemɔ pɛ kɛkɛ esa akɛ okɛ amɛ awie, shi moŋ esa akɛ obi amɛ saji, ni okɛ tsuishitoo abo amɛhetoi lɛ atoi. Mɛi babaoo eyɔse akɛ be ni amɛnyɛɔ amɛgbaa sane ni sɛɛnamɔ baa he ji beni amɛfee ekome kɛmiiye nii.—1/15, baafa 18-19.

• Yehowa eye emuu, belɛ mɛni hewɔ sane dɔɔ lɛ lɛ?

Bei komɛi lɛ, Nyɔŋmɔ tsakeɔ bɔ ni ekɛ gbɔmɛi yeɔ ehaa lɛ mli. Ákɛ nɔkwɛmɔnɔ lɛ, blema Israelbii lɛ shi Yehowa shii abɔ, ni amɛyanyiɛ nyɔŋmɔi krokomɛi asɛɛ. Kɛ́ amɛfee nakai lɛ, Yehowa kpaa amɛhe buu. Shi kɛ́ maŋbii lɛ shwa amɛhe yɛ efɔŋ ni amɛfee lɛ hewɔ, ni amɛbi Nyɔŋmɔ koni eye ebua amɛ lɛ, ‘edɔɔ’ lɛ ni etsakeɔ yiŋ ni eto yɛ amɛhe lɛ. (Koj. 2:18)—2/1-E, baafa 21.

• Mɛɛ nibii baanyɛ aha abaptisi mɔ ko ekoŋŋ?

Ebaanyɛ eba lɛ nakai kɛ́ beni mɔ lɛ kɛ ehe ha ni abaptisi lɛ lɛ, no mli lɛ ekɛ ehe miiwo shihilɛ ko mli yɛ teemɔŋ ni eji abaptisi lɛ momo kulɛ, abaanyɛ ashwie lɛ kɛjɛ asafo lɛ mli.—2/15, baafa 22.

• Mɛɛ naajiemɔi gbohii etɛ mɛi komɛi kɛhaa akɛ nomɛi ahewɔ amɛyeee anɔkwa lɛ?

Mɛi komɛi nuɔ he akɛ ohia ni amɛyeɔ lɛ ŋmɛɔ amɛ gbɛ koni amɛju. Mɛi komɛi hu kɛɔ akɛ, “Mɔ fɛɛ mɔ feɔ.” Ni mɛi krokomɛi hu ni amɛto nibii ni jara wa ahũ ní amɛkɛhaaa nɔtsɛmɛi lɛ kɛɔ akɛ, “kɛ́ oto ahũ lɛ onɔ̃ ni.” Biblia lɛ ekpɛlɛɛɛ naajiemɔi nɛɛ ateŋ eko kwraa nɔ.—3/1-E, baafa 12-14.

• Mɛni dũmɔ nii kpakpai lɛ adũmɔ lɛ damɔ shi kɛha yɛ Yesu abɛbua ni kɔɔ ŋmãa kɛ jwɛi lɛ he lɛ mli?

Yesu ni ji gbɔmɔ Bi lɛ saa abɔɔ lɛ eto yɛ be ni ekɛtsu esɔɔmɔ nitsumɔ lɛ yɛ shikpɔŋ lɛ nɔ lɛ mli. Kɛjɛ afi 33 Ŋ.B. Pentekoste gbi lɛ nɔ lɛ, ebɔi dũmɔ nii kpakpai lɛ dũmɔ beni efɔ Kristofoi lɛ mu ní amɛbatsɔmɔ Nyɔŋmɔ bii ni ji Maŋtsɛyeli lɛŋ bii lɛ.—3/15, baafa 19-20.

• Mɛɛ gbɛ nɔ atsɔɔ abuaa okadifeemɔŋ ŋmãa ni Yesu tsĩ tã yɛ abɛbua lɛ mli lɛ naa awoɔ Yehowa aboŋo lɛ mli? (Mat. 13:30)

Abɛbua lɛ miiba mli yɛ nibii agbɛjianɔtoo nɛɛ naagbee be lɛ mli. Aabua Maŋtsɛyeli lɛŋ bii ni afɔ amɛ mu ni ji okadifeemɔŋ ŋmãa lɛ anaa aawo Yehowa aboŋo lɛ mli kɛtsɔ ŋɔ ni aŋɔɔ amɛ awoɔ Kristofoi asafo ni ato shishi ekoŋŋ lɛ mli lɛ nɔ, loo kɛtsɔ amɛnyɔmɔwoo lɛ nɔ ni amɛnine shɛɔ yɛ ŋwɛi lɛ nɔ.—3/15, baafa 22.

• Namɛi tsɔɔ woji ni esa akɛ abu ashi Kristofoi a-Hela Ŋmalɛi lɛ anɔ?

Jeee sɔlemɔ ko mli ajinafoi akuu ko loo jamɔŋ hiɛnyiɛlɔ ko. Yɛ no najiaŋ lɛ, Nyɔŋmɔ mumɔ krɔŋkrɔŋ lɛ ye ebua anɔkwa Kristofoi ni amɛyɔse woji ni ajɛ mumɔŋ aŋmala lɛɛlɛŋ lɛ. Enɛ ji anɔkwale ejaakɛ mumɔ lɛ naakpɛɛ nikeenii ni aŋɔha klɛŋklɛŋ afii 100 lɛ mli Kristofoi asafo lɛ ateŋ ekome ji “mumɔi ashikpamɔ ni akɛnaa mumɔi amligbalamɔi.” (1 Kor. 12:4, 10, Ga Biblia hee lɛ)—4/1-E, baafa 28.