Sanebimɔi ni Jɛ Kanelɔi Adɛŋ

Akɛni Yehowa guɔ amaga jamɔ hewɔ lɛ, mɛni hewɔ egbalaaa Aaron toi yɛ shika tsinabi amaga ni efee lɛ hewɔ lɛ?

Beni Aaron fee shika tsinabi amaga ni abɔ he amaniɛ yɛ Mose Wolo ni Ji Enyɔ lɛ yitso 32 lɛ, eku Nyɔŋmɔ mla ni kɔɔ amaga jamɔ he lɛ mli. (2 Mose 20:3-5) No hewɔ lɛ, ‘Yehowa mli fu Aaron naakpa, ni eehe lɛ egbe; shi Mose kpa fai eha Aaron yɛ nakai be lɛ mli.’ (5 Mose 9:19, 20) Ani sɔlemɔ ni nuu anɔkwafo Mose sɔle lɛ ‘tsu nii babaoo’ yɛ Aaron sane lɛ mli? (Yak. 5:16) Hɛɛ. Yɛ nakai sɔlemɔ lɛ hewɔ, kɛ agbɛnɛ hu kɛ hooo kwraa lɛ yɛ saji krokomɛi enyɔ hu ahewɔ lɛ, eeenyɛ efee akɛ Yehowa bo Mose sɔlemɔ lɛ toi, ni egbalaaa Aaron toi.

Eeenyɛ efee akɛ anɔkwa ni Aaron kɛ afii babaoo eye lɛ ji yiŋtoo kome hewɔ. Beni Yehowa tsu Mose koni eyapue yɛ Farao hiɛ ní eyajie Israelbii lɛ kɛjɛ Mizraim lɛ, ehala Aaron koni efata Mose he, ní edamɔ Mose najiaŋ ewie. (2 Mose 4:10-16) Eyɛ mli akɛ Mose kɛ Aaron le akɛ Farao ji mɔ ko ni tsui wa moŋ, shi amɛbo Yehowa toi ni amɛtee Mizraim maŋtsɛ lɛ hiɛ shii abɔ. No hewɔ lɛ, beni Aaron yɔɔ Mizraim lɛ, etee nɔ eye Yehowa anɔkwa ni efĩ shi kɛsɔmɔ lɛ.—2 Mose 4:21.

Agbɛnɛ hu susumɔ nɔ ni ha Aaron fee shika tsinabi amaga lɛ he okwɛ. No mli lɛ Mose eye gbii 40 yɛ Sinai Gɔŋ lɛ nɔ. Beni “maŋ lɛ na akɛ Mose eyatsɛ yɛ gɔŋ lɛ nɔ ni ekpelekeee shi” lɛ, amɛwo Aaron yiŋ koni efee amaga eha amɛ. Aaron bo amɛ toi ni efee shika tsinabi amaga lɛ eha amɛ. (2 Mose 32:1-6) Shi bɔ ni Aaron fee enii yɛ no sɛɛ lɛ tsɔɔ akɛ jeee etsuiŋ ejɛ efee shika tsinabi amaga lɛ eha amɛ lɛ. Eka shi faŋŋ akɛ, amɛnyɛ enɔ koni efee nakai. Ákɛ nɔkwɛmɔnɔ lɛ, beni Mose tsu sane ni kɔɔ wɔŋ ni maŋ lɛ já lɛ he nii lɛ, Levibii lɛ fɛɛ, ní Aaron fata he lɛ jɛ amɛtsuiŋ amɛfĩ Yehowa sɛɛ. Agbe mɛi akpei etɛ ni ji mɛi tuuntu ni ha maŋ lɛ já wɔŋ lɛ.—2 Mose 32:25-29.

No sɛɛ lɛ, Mose kɛɛ maŋ lɛ akɛ: “Nyɛfee esha kpeteŋkpele.” (2 Mose 32:30) No hewɔ lɛ, jeee Aaron kome pɛ ni fee esha lɛ. Yehowa na Aaron kɛ maŋ lɛ mɔbɔ jogbaŋŋ.

Sane nɛɛ sɛɛ lɛ, Yehowa fã koni awó Aaron osɔfonukpa. Nyɔŋmɔ kɛɛ Mose akɛ: “Oŋɔ atadei krɔŋkrɔŋi lɛ owo Aaron, ni ofɔ lɛ mu, ni ofee lɛ krɔŋkrɔŋ, koni eye osɔfo eha mi.” (2 Mose 40:12, 13) Eka shi faŋŋ akɛ, Yehowa kɛ Aaron he ke lɛ ejaakɛ ena akɛ jeee gbɛ eje efee nakai lɛ. Aaron jeee wɔŋjalɔ atuatselɔ, shi moŋ ejɛ etsuiŋ tɔ̃ɔ efĩ anɔkwa jamɔ sɛɛ.