Mɛni Obaanyɛ Ofee Kɛ́ Ohefatalɔ Ha Onine Nyɛ Shi?

MARGARITA kɛ ewu Raúl fee ekome ni amɛkɛ afii babaoo sɔmɔ Yehowa akɛ be fɛɛ sɔɔlɔi. * Shi beni amɛfɔ́ amɛkromɔ bi lɛ sɛɛ etsɛɛɛ nɔŋŋ lɛ, Raúl bɔi Yehowa masɛi jee. Yɛ naagbee lɛ, Raúl kɛ ehe yawo jeŋba sha mli ni ashwie lɛ kɛjɛ Kristofoi asafo lɛ mli. Margarita kɛɛ akɛ: “Beni enɛ fɛɛ ba lɛ, minu he akɛ migbo etã. Mitsui kumɔ, ni mileee nɔ ni mafee.”

Yɛ shihilɛ kroko mli lɛ, beni nyɛmi yoo ko ni atsɛɔ lɛ Jane lɛ bote gbalashihilɛ mli etsɛɛɛ nɔŋŋ lɛ, su ko ni ewu jie lɛ kpo lɛ dɔ lɛ waa. Ewu bɔi lɛ yii. Jane kɛɛ akɛ, “Gbi klɛŋklɛŋ ni ema mi atswɛrɛ lɛ, minaa kpɛ mihe, egba minaa waa, ni minu he akɛ egbe mihe guɔ. Ekpa mi fai koni mikɛke lɛ, shi kɛjɛ no sɛɛ kɛyaa lɛ, eyiɔ mi, kɛkɛ lɛ ekpa fai. Misusu akɛ, ákɛ Kristofonyo lɛ, esa akɛ be fɛɛ be lɛ, mikɛke lɛ faa. Kɛfata he lɛ, misusu akɛ kɛ́ miha mɛi krokomɛi, ní asafoŋ onukpai lɛ po fata he lɛ le wɔnaagba lɛ, no tsɔɔ akɛ miyeee miwu anɔkwa. Enɛ tee nɔ afii abɔ. Be nɛɛ fɛɛ mli lɛ, misusu akɛ nɔ ko yɛ ni esa akɛ mafee koni miwu asumɔ mi. Shi agbɛnɛ beni eshi mi kɛ wɔbiyoo lɛ, minu he akɛ minine enyɛ shi, ni ákɛ kulɛ nɔ ko yɛ ni esa akɛ mafee loo mawie koni wɔgbãla lɛ mli akatse.”

 Taakɛ eji yɛ Margarita kɛ Jane gbɛfaŋ lɛ, ekolɛ bo hu oopiŋ, ooye ohia, ni ohemɔkɛyeli lɛ naa miiba shi akɛni owu eye bo sane fɔŋ lɛ hewɔ. Aloo ekolɛ otsui ekumɔ ni oopiŋ akɛni oŋa eje osɛɛ lɛ hewɔ. Ŋwanejee ko bɛ he akɛ, wɔyɛ “jaramɔ bei” amli taakɛ Biblia lɛ gba fɔ̃ shi lɛ. Gbalɛ nɛɛ tsɔɔ akɛ yɛ “naagbee gbii lɛ” amli lɛ, ekomefeemɔ ni yɔɔ wekui amli lɛ baafite, ni weku mlibii ejieŋ suɔmɔ kpo amɛtsɔŋ amɛhe kwraa. Mɛi komɛi kɛ osatofeemɔ baasɔmɔ Nyɔŋmɔ. (2 Tim. 3:1-5) Nibii ni tamɔ nɛkɛ baanyɛ aya nɔ yɛ Anɔkwa Kristofoi ateŋ; no hewɔ lɛ, kɛ́ ohefatalɔ eha onine enyɛ shi lɛ, te ooofee tɛŋŋ okpee naa?

Naa Ohe Taakɛ Yehowa Naa Bo Lɛ

Shishijee lɛ, ekolɛ ebaawa kɛha bo akɛ ooohe oye akɛ mɔ ko ni osumɔɔ lɛ lɛ baaye bo awui nɛkɛ. Ekolɛ, obaasusu po akɛ onifeemɔ hewɔ ni ekɔ gbɛ fɔŋ nɛɛ.

Shi kaimɔ akɛ eyɛ mli akɛ Yesu eye emuu moŋ, shi mɔ ko ni eyɔɔ hekɛnɔfɔɔ yɛ emli, ni esumɔɔ esane hu lɛ tsɔɔ esɛɛ gbɛ. Yesu kɛ hiɛdɔɔ sɔle dani ehala ebɔfoi, ni ji enanemɛi ni bɛŋkɛ lɛ kpaakpa lɛ. No mli lɛ, amɛyi 12 lɛ fɛɛ ji Yehowa tsuji ni anyɛɔ amuɔ afɔ̃ɔ amɛnɔ. No hewɔ lɛ, ŋwanejee ko bɛ he akɛ beni Yuda “tsɔ sɛɛgbɛtsɔɔlɔ lɛ,” edɔ Yesu waa. (Luka 6:12-16) Shi Yehowa shwaaa Yesu yɛ Yuda nifeemɔi lɛ ahewɔ.

Yɛ anɔkwale mli lɛ, ŋmɛnɛ lɛ, gbalashihilɛ mli hefatalɔ ko bɛ ni yeɔ emuu. Mɛi enyɔ lɛ fɛɛ baatɔ̃ be kɛ beaŋ. Akɛ mumɔ tsirɛ lalatsɛ ko ni eŋma anɔkwa sane nɛɛ akɛ: “Kɛji bo, Yehowa, okɛɛ ooodi nishaianii asɛɛ lɛ, kulɛ, Nuŋtsɔ, namɔ po aaanyɛ shi adamɔ?” (Lala 130:3) Esa akɛ gbalashihilɛ mli hefatalɔi abɔ mɔdɛŋ ni amɛkɛ eshai afa amɛhe, ni amɛkɛkase Yehowa.—1 Pet. 4:8.

Ni kɛlɛ “wɔteŋ mɔ fɛɛ mɔ baabu lɛ diɛŋtsɛ ehe akɔntaa eha Nyɔŋmɔ.” (Rom. 14:12) Kɛ́ wu loo ŋa ko kɛfee esu akɛ ebaasopa ehefatalɔ loo ebaafee lɛ niseniianii lɛ, no lɛ, lɛ diɛŋtsɛ ebaabu ehe akɔntaa eha Yehowa. Yehowa miihi awuiyeli kɛ jɛmɔ, no hewɔ lɛ, yiŋtoo kpakpa ko bɛ ni mɔ ko aaadamɔ nɔ ekɛ ehefatalɔ aye yɛ gbɛ ni etsɔɔɔ suɔmɔ kwraa nɔ, ni egbe ehe guɔ. (Lala 11:5; Efe. 5:33; Kol. 3:6-8) Yɛ anɔkwale mli lɛ, kɛ́ Kristofonyo ko mli fɔɔ la woo ni etsakeee etsui lɛ, esa akɛ ashwie lɛ kɛjɛ Kristofoi asafo lɛ mli. (Gal. 5:19-21; 2 Yoh. 9, 10) Kɛ́ gbalashihilɛ mli hefatalɔ ko wó asafoŋ onukpai lɛ atoi nɔ yɛ su gbonyo nɛɛ he lɛ, esaaa akɛ enuɔ he akɛ efeee ni ahi. Yɛ anɔkwale mli lɛ, Yehowa musuŋ tsɔɔ lɛ yɛ mɛi ni afeɔ amɛ niseniianii lɛ ahe.

Kɛ́ mɔ ko je ewu loo eŋa sɛɛ lɛ, jeee ehefatalɔ lɛ pɛ nɔ etɔ̃, shi moŋ etɔ̃ Yehowa hu nɔ. (Mat. 19:4-9; Heb. 13:4) Kɛ́ wu loo ŋa ni aye lɛ sane fɔŋ lɛ miibɔ mɔdɛŋ koni ehi shi yɛ Biblia mli shishitoo mlai anaa lɛ, no lɛ esaaa akɛ eshwaa ehe yɛ gbɛ fɔŋ ni ehefatalɔ lɛ ekɔ lɛ hewɔ.

Kaimɔ akɛ Yehowa nuɔ he ehaa bo. Yehowa wie akɛ eji Israel maŋ lɛ okadifeemɔŋ wu, ni wiemɔi ni taa mɔ tsuiŋ babaoo yɛ e-Wiemɔ lɛ mli ni tsɔɔ bɔ ni edɔ lɛ waa eha beni Israel maŋ lɛ bɔ ajwamaŋ yɛ mumɔŋ lɛ. (Yes. 54:5, 6; Yer. 3:1, 6-10) Ná ole akɛ Yehowa le fomɔ ni ofoɔ akɛni ohefatalɔ eye bo sane fɔŋ hewɔ lɛ jogbaŋŋ. (Mal. 2:13, 14) Ele akɛ miishɛjemɔ kɛ hewalɛwoo he miihia bo.

Gbɛ nɔ ni Yehowa Tsɔɔ Eshɛjeɔ Wɔmii

Gbɛ kome ni Yehowa tsɔɔ nɔ eshɛjeɔ wɔmii ji, kɛtsɔ Kristofoi asafo lɛ nɔ. Jane nine shɛ yelikɛbuamɔ ni tamɔ nakai nɔ. Ekɛɛ akɛ: “Beni kpokpaa nɔkwɛlɔ lɛ basara wɔ lɛ, no mli lɛ mihao waa. Ele akɛ mibɛ miishɛɛ kwraa akɛni miwu miitao etse gbãla lɛ hewɔ. Ená deka ni ekɛmi susu ŋmalɛi komɛi ahe, ni eko ji 1 Korintobii 7:15 lɛ. Ŋmalɛi lɛ ni ekɛmi susu he lɛ, kɛ mlijɔlɛ mli ni ejɛ ekɛmi  wie lɛ ye ebua mi ni minuuu fɔyeli he dɔŋŋ, ni eha mitsui hu nyɔ mimli bɔ ni sa.” *

Margarita ni atsĩ etã kɛtsɔ hiɛ lɛ hu yɔse akɛ Yehowa tsɔɔ Kristofoi asafo lɛ nɔ ekɛ yelikɛbuamɔ ni sa haa. Ekɛɛ akɛ: “Beni ebafee faŋŋ akɛ miwu tsakeŋ etsui lɛ, mimɔmɔ mibii lɛ ni wɔshi kɛtee maŋ kroko nɔ. Beni wɔshɛ jɛmɛ lɛ, miná tsũi enyɔ mihai. Enɔ jetsɛremɔ beni awerɛho eloo mi waa ni mijieɔ wɔnibii lɛ kɛjɛɔ wɔbaagii lɛ amli lɛ, mɔ ko tswa shinaa lɛ. Misusu akɛ shianyɛ lɛ, ni tsũ tsa wɔ nɔ lɛ ni. Asomoaŋ nyɛmi yoo ni kɛ mimami kase nii ní ye ebua wɔweku lɛ ni wɔna anɔkwale lɛ ni. Ekpaaa gbɛ akɛ ebaana mi, shi eba jɛmɛ akɛni ekɛ wɔshianyɛ lɛ kaseɔ Biblia lɛ hewɔ. Mitsui nyɔ mimli jogbaŋŋ, shi nɔŋŋ kɛkɛ ni miwerɛ ho mihe. Miha ele misane lɛ, kɛkɛ ni gbo, wɔ fɛɛ wɔjwa yaafo. Oya nɔŋŋ kɛkɛ ni eto gbɛjianɔ koni wɔya asafoŋ kpee ni abaafee nakai gbi lɛ. Asafoŋbii lɛ nya wɔhe, ni onukpai lɛ to gbɛjianɔ koni amɛye amɛbua mi ni manyɛ matsu mi kɛ mibii lɛ amumɔŋ hiamɔ nii lɛ ahe nii.”

Gbɛ ni Mɛi Krokomɛi Baanyɛ Atsɔ nɔ Aye Abua

Yɛ anɔkwale mli lɛ, Kristofoi asafo lɛ mlibii lɛ baanyɛ amɛkɛ yelikɛbuamɔ ni sa aha yɛ gbɛi srɔtoi anɔ. Ákɛ nɔkwɛmɔnɔ lɛ, ehe bahia ni Margarita atao nitsumɔ. Weku ko ni yɔɔ asafo lɛ mli lɛ kɛ amɛhe ha akɛ amɛbaakwɛ gbekɛbii lɛ kɛ́ amɛjɛ skul amɛba.

Margarita kɛɛ akɛ: “Kɛ́ nyɛmimɛi hii kɛ yei lɛ fata mi kɛ mibii lɛ ahe kɛtee shiɛmɔ lɛ, no ji nɔ ni mihiɛ sɔɔ fe fɛɛ.” Kɛtsɔ yelikɛbuamɔ ni tamɔ nɛkɛ nɔ lɛ, nyɛmimɛi ni yɔɔ asafo lɛ mli lɛ ‘kpeekpeɔ amɛhe kɛtereɔ amɛjatsui lɛ,’ ni no tsɔɔ akɛ amɛmiiye “Kristo mla lɛ” nɔ.—Gal. 6:2.

Mɛi ni miina nɔ̃ yɛ mɛi krokomɛi atɔmɔi ahewɔ lɛ ahiɛ sɔɔ yelikɛbuamɔ ni tamɔ nɛkɛ. Monique ni wu jo foi eshi lɛ, ni eshi nyɔmɔ ni naa shɛɔ dɔlai 15,000 efɔ̃ enɔ, kɛ bii ejwɛ ni ekwɛ amɛ lɛ kɛɛ akɛ: “Minyɛmimɛi Kristofoi hii kɛ yei lɛ jie suɔmɔ kpele kpo amɛtsɔɔ mi. Kɛjeee yelikɛbuamɔ ni amɛkɛ ha mi lɛ kulɛ, mileee bɔ ni mafee makpee shihilɛ lɛ naa. Minuɔ he akɛ Yehowa kɛ nyɛmimɛi hii ni yɔɔ suɔmɔ babaoo, ni ye amɛbua mibii lɛ duro mi. Kɛ́ mikwɛ bɔ ni mibii lɛ edara ni amɛtee hiɛ yɛ mumɔŋ yɛ yelikɛbuamɔ nɛɛ hewɔ lɛ, mináa miishɛɛ waa. Asafoŋ onukpai lɛ woɔ mi ŋaa be kɛ beaŋ. Kɛ́ miitao mɔ ko mikɛ gba sane lɛ, amɛboɔ mi toi.”—Mar. 10:29, 30.

 Yɛ anɔkwale mli lɛ, naanyo ni yɔɔ suɔmɔ lɛ yɔseɔ be ni esaaa akɛ ewieɔ enaanyo ko dɔlɛ sane he. (Jaj. 3:7) Margarita kɛɛ akɛ: “Bei pii lɛ, kɛ́ mikɛ nyɛmimɛi yei ni yɔɔ asafo hee ni miyɔɔ mli lɛ gba shiɛmɔ nitsumɔ lɛ, wɔ-Biblia mli nikaselɔi lɛ, kɛ wɔbii lɛ ahe sane lɛ, mináa miishɛɛ waa—wɔgbaa nɔ fiaa nɔ he sane, ja minaagbai lɛ pɛ. Minya he waa akɛ amɛha mihiɛ je mitsutsu shihilɛ lɛ nɔ, ni amɛye amɛbua mi ni mije shihilɛ hee shishi.”

Miamɔ Ohiɛ ni Okatɔ Owele

Bei komɛi lɛ, jeee akɛ obaanu he akɛ bo ohewɔ ekɔ gbɛ ni tamɔ nakai lɛ, shi ekolɛ ebaadɔ bo waa akɛ ohefatalɔ lɛ tɔ̃mɔ lɛ eha oona nɔ waa. Kɛ́ oŋmɛ gbɛ ni dɔlɛ nɛɛ ye onɔ lɛ, ehaŋ onyɛ oya nɔ oye Yehowa anɔkwa. Ákɛ nɔkwɛmɔnɔ lɛ, ekolɛ obaatao gbɛi anɔ ni oootsɔ otɔ ohefatalɔ ni yeee anɔkwa nɛɛ he owele.

Kɛ́ oyɔse akɛ henumɔ ni tamɔ nɛkɛ miihe aye onɔ lɛ, obaanyɛ osusu Yoshua kɛ Kaleb nɔkwɛmɔnɔ lɛ he. Hii anɔkwafoi nɛɛ kɛ amɛhe wo oshara mli ni amɛyasara Shiwoo Shikpɔŋ lɛ. Saralɔi krokomɛi lɛ ahemɔkɛyeli mli waaa, no hewɔ lɛ amɛha maŋbii lɛ gbo Yehowa nɔ toi. Beni Yoshua kɛ Kaleb bɔ mɔdɛŋ akɛ amɛaawo maŋ lɛ hewalɛ koni amɛya nɔ amɛye Yehowa anɔkwa lɛ, Israelbii lɛ ateŋ mɛi komɛi ka akɛ amɛaatswia amɛ tɛi. (4 Mose 13:25–14:10) Yɛ Israelbii lɛ anifeemɔi ahewɔ lɛ, Yoshua kɛ Kaleb tsomlo yɛ ŋa lɛ nɔ afii 40, jeee yɛ amɛ diɛŋtsɛ amɛtɔmɔ hewɔ, shi yɛ mɛi krokomɛi atɔmɔ hewɔ.

Eyɛ mli akɛ ekolɛ enɛ dɔ Yoshua kɛ Kaleb moŋ, shi amɛhaaa esha ni amɛnyɛmimɛi lɛ fee lɛ aha amɛmli afu. Amɛtee nɔ amɛha sɔɔmɔ ni amɛkɛhaa Yehowa lɛ fee oti yɛ amɛshihilɛ mli. No hewɔ lɛ, beni afii 40 ni amɛye yɛ ŋa lɛ nɔ lɛ ba naagbee lɛ, amɛ kɛ Levibii lɛ pɛ yi abaa yɛ yinɔbii nɛɛ ateŋ, ni aŋmɛ amɛ gbɛ koni amɛya Shiwoo Shikpɔŋ lɛ nɔ.—4 Mose 14:28-30; Yosh. 14:6-12.

Ekolɛ, ohefatalɔ ni yeee anɔkwa lɛ nifeemɔi lɛ baaha ona nɔ be kplaŋŋ. Ekolɛ nyɛgbala lɛ mli baatse, shi fɛɛ sɛɛ lɛ obaahao waa ni obaaye ohia hu. Shi yɛ nɔ najiaŋ ni oooha susumɔi ni haa mɔ haoɔ aye onɔ lɛ, kaimɔ akɛ Yehowa le gbɛ ni hi jogbaŋŋ ni eeetsɔ nɔ ekɛ mɛi ni jeɔ gbɛ amɛkpoɔ eshishitoo mlai lɛ aye, taakɛ eba lɛ yɛ Israelbii ni yeee anɔkwa yɛ ŋa lɛ nɔ lɛ agbɛfaŋ lɛ.—Heb. 10:30, 31; 13:4.

Obaanyɛ Okpee Naa!

Yɛ nɔ najiaŋ ni oooŋmɛ gbɛ ni susumɔi ni ejaaa aha omiishɛ atã lɛ, esa akɛ oha Yehowa susumɔi ayi ojwɛŋmɔŋ obɔ. Jane kɛɛ akɛ: “Mibayɔse akɛ, Buu-Mɔɔ kɛ Awake! rikɔdiŋ srɔtoi lɛ atoi ni miboɔ lɛ ye ebua mi, ni minyɛ mikpee shihilɛ lɛ naa. Asafoŋ kpeei lɛ hu waje mi jogbaŋŋ. Mihe ni mikɛwoɔ asafoŋ kpeei amli lɛ hu ha mijwɛŋmɔ je minaagbai lɛ anɔ. Shiɛmɔ nitsumɔ lɛ ye ebua mi yɛ nakai gbɛ nɔŋŋ nɔ. Kɛ́ miye mibua mɛi krokomɛi koni amɛná Yehowa mli hemɔkɛyeli lɛ, ewajeɔ mi hu mihemɔkɛyeli lɛ. Ni yelikɛbuamɔ ni mikɛhaa mi-Biblia mli nikaselɔi lɛ haa mikɛ mijwɛŋmɔ maa nibii ni he hiaa titri lɛ anɔ.”

Monique ni awie esane kɛtsɔ hiɛ lɛ kɛɛ akɛ: “Akɛni miyaa asafoŋ kpeei daa ni mibɔɔ mɔdɛŋ akɛ mikɛ mihe awo shiɛmɔ nitsumɔ lɛ mli babaoo hewɔ lɛ, minyɛ mikpee shihilɛ lɛ naa. Amrɔ nɛɛ wɔfee ekome akɛ weku, ni wɔkɛ asafo lɛ bɔɔ gbagbalii. Shi shihilɛ ni mitsɔ mli lɛ eye ebua mi ni miyɔse mifatɔi. Aka mihemɔkɛyeli lɛ akwɛ, shi Yehowa eye ebua mi ni minyɛ mikpee naa.”

Bo hu obaanyɛ okpee kai ni tamɔ nakai anaa. Kɛ́ ohefatalɔ ha onine nyɛ shi lɛ, eyɛ dɔlɛ moŋ, shi bɔɔ mɔdɛŋ ni okɛ Paulo ŋaawoo nɛɛ atsu nii. Ekɛɛ akɛ: “Nyɛkahaa ekpakpafeemɔ miitɔa wɔ, ejaakɛ kɛ́ wɔnijiaŋ ejeee wui lɛ, wɔbaakpa hu yɛ be ni sa mli.”—Gal. 6:9.

[Shishigbɛ niŋmai]

[Mfoniri ni yɔɔ baafa 31]

Mɛi ni amɛhefatalɔi eshi amɛ lɛ, hiɛ sɔɔ mɛi ni yeɔ buaa amɛ yɛ shiɛmɔ nitsumɔ lɛ mli lɛ