Wɔhiɛ Ahi Wɔhe Nɔ Koni Wɔwo Yibii Kpakpai

ANI ohaa ohiɛ hiɛɔ ohe nɔ yɛ hegbɛi ni obaanyɛ oná trukaa kɛye odase yɛ osafo lɛ shikpɔŋkuku lɛ mli lɛ he? Wɔnyɛmimɛi Kristofoi ni yɔɔ blema maŋ ní meelei kpelekeɔ waa yɛ jɛmɛ ni ji Turku, ni yɔɔ Finland lɛ ha amɛhiɛ hi amɛhe nɔ nakai, ni ewo yibii kpakpai.

Be ko lɛ, nyɛmimɛi ni yɔɔ Turku lɛ yɔse akɛ hii komɛi ni ji Asiabii eba maŋ lɛ mli koni amɛbagbe meele wulu ko ni aama yɛ jɛmɛ lɛ naa. Sɛɛ mli lɛ, nyɛmi nuu ko yana gbɔiatoohei ni nitsulɔi ni jɛ maŋsɛɛ lɛ eyato lɛ. Ená ele hu akɛ, daa leebi maŋkpa lɛ, akɛ bɔɔsui holeɔ nitsulɔi lɛ yɛ gbɔiatoohei lɛ kɛyaa lɛjiadaamɔhe ni amaa meele lɛ yɛ lɛ. Oya nɔŋŋ kɛkɛ ni ewó nyɛmimɛi ni yɔɔ Blɔfo asafo ni yɔɔ Turku lɛ mli lɛ atoi nɔ.

Asafoŋ onukpai ni yɔɔ nakai asafo lɛ mli lɛ yɔse akɛ gbɔi babaoo ni eba maŋ lɛ mli lɛ eha hegbɛ ko ni akpaaa gbɛ egbele ní amɛbaanyɛ amɛkɛshiɛ Maŋtsɛyeli shɛɛ sane lɛ amɛha gbɔi lɛ, ni amɛto gbɛjianɔ krɛdɛɛ kɛha nakai feemɔ oya nɔŋŋ. Nakai otsi lɛ Hɔgbaa beni atswaa leebi ŋmɛlɛ kpawo lɛ, shiɛlɔi nyɔŋma eyabua amɛhe naa yɛ heni bɔɔsui lɛ baholeɔ gbɔi lɛ yɛ lɛ momo. Shi kranaa, nitsulɔi lɛ eko kwraa ejieee ehiɛ kpo. Nyɛmimɛi lɛ bibii amɛhe akɛ, ‘Ani wɔkpe sɛɛ tsɔ? Ani amɛshi Turku?’ Shi nɔŋŋ kɛkɛ ni nitsulɔi lɛ ateŋ mɔ kome ni ewo enitsumɔ atade pue. Nitsulɔ kroko nyiɛ esɛɛ, kɛkɛ ni mɛi krokomɛi hu tsara nɔ kɛba. Oona kɛ onaaa nɛɛ, nitsulɔi babaoo ebua amɛhe naa yɛ bɔɔsudaamɔhe lɛ. Nɔŋŋ kɛkɛ ni shiɛlɔi lɛ kɛwo mli, ni amɛkɛ woji ni yɔɔ Blɔfo wiemɔ mli lɛ bɔi nitsulɔi lɛ hamɔ. Heniianaa lɛ, ehé aaafee ŋmɛlɛtswaa kome dani nitsulɔi lɛ fɛɛ ná he ko amɛtara yɛ bɔɔsui lɛ amli, ni enɛ ha nyɛmimɛi lɛ ná be ni fá kɛshiɛ amɛha nitsulɔi lɛ ateŋ mɛi babaoo. Amɛha nitsulɔi lɛ woji bibii 126, kɛ woji tɛtrɛbii 329 sɔŋŋ dani bɔɔsui lɛ shi kɛtee!

Yibiiwoo kpakpa nɛɛ wo nyɛmimɛi lɛ hewalɛ ni otsi ni nyiɛ sɛɛ beni kpokpaa nɔkwɛlɔ lɛ basara amɛsafo lɛ, amɛku sɛɛ amɛyashiɛ yɛ jɛmɛ ekoŋŋ. Gbi ni amɛto akɛ amɛbaaya lɛ, nugbɔ nɛ, shi kpokpaa nɔkwɛlɔ lɛ kwɛ kpee kɛha shiɛmɔyaa lɛ nɔ beni atswa leebi ŋmɛji ekpaa kɛ fã, ni no sɛɛ lɛ shiɛlɔi 24 wó bɔɔsudaamɔhe lɛ gbɛ amɛtere. Shiɛlɔi nɛɛ kɛ woji ni yɔɔ Tagalog wiemɔ mli hu tee, ejaakɛ amɛyɔse akɛ gbɔi lɛ ateŋ mɛi babaoo jɛ Philippines. Nakai gbi lɛ leebi lɛ, amɛkɛ woji 7, woji bibii 69, kɛ woji tɛtrɛbii 479 ha nitsulɔi lɛ dani bɔɔsui lɛ shi kɛtee lɛjiadaamɔhe lɛ. Kwɛ miishɛɛ ni nyɛmimɛi hii kɛ yei ni kɛ amɛhe wo tafãa nɛɛ mli lɛ baaná!

Nyɛmimɛi lɛ nyɛ amɛku amɛsɛɛ kɛyasara nitsulɔi lɛ ateŋ mɛi babaoo yɛ gbɔiatoohei lɛ ni amɛgbála Maŋtsɛyeli shɛɛ sane lɛ mli fitsofitso dani nitsulɔi lɛ shi kɛtee hei ni amɛjɛ kɛba lɛ. Nitsulɔi lɛ ekomɛi kɛɛ akɛ Odasefoi eshiɛ kɛha amɛ dã yɛ maji krokomɛi anɔ. Nitsulɔi lɛ da nyɛmimɛi lɛ ashi akɛ amɛŋɔ hegbɛ lɛ kɛshiɛ amɛha amɛ beni amɛyɔɔ Finland lɛ.

Ani ohaa ohiɛ hiɛɔ ohe nɔ yɛ hegbɛi ni obaanyɛ oná trukaa kɛye odase yɛ osafo lɛ shikpɔŋkuku lɛ mli lɛ he? Ani oŋɔɔ hegbɛ kɛshiɛɔ ohaa mɛi ni jɛ hei srɔtoi lɛ? Kɛ́ ofeɔ nakai lɛ, ekolɛ bo hu oná niiashikpamɔi ni tamɔ nɔ ni nyɛmimɛi ni yɔɔ Turku lɛ ná lɛ eko.

[Shikpɔŋ he mfoniri/​Mfoniri ni yɔɔ baafa 32]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

FINLAND

HELSINKI

Turku

[He ni Sane lɛ Jɛ]

STX Europe