Aafɔ̃ Bo Nine!

NINEFƆ̃Ɔ kɛha mɛni? Koni oyasara Yehowa Odasefoi anitsumɔhe niji ni afɔɔ amɛ tsɛmɔ akɛ Betel lɛ ateŋ ekome. Ayɛ nitsumɔhei nɛɛ 118 yɛ maji srɔtoi anɔ. Bei pii kɛ́ mɛi yasara Betel lɛ, amɛjɛɔ amɛtsuiŋ amɛtsɔɔ bɔ ni amɛhiɛ esɔ nibii ni yaa nɔ yɛ jɛmɛ lɛ.

Beni oblanyo ko ni akɛ lɛ miikase Biblia lɛ yasara nitsumɔhe nine ni yɔɔ Mexico lɛ, ena bɔ ni nitsulɔi lɛ kɛ miishɛɛ tsuɔ nii waa kɛsɔmɔɔ Yehowa lɛ, ni enɛ ná enɔ hewalɛ aahu akɛ ebi akɛ: “Mɛni esa akɛ mafee koni mi hu manyɛ matsu nii yɛ biɛ?” Akɛɛ lɛ akɛ: “Klɛŋklɛŋ lɛ, esa akɛ abaptisi bo. No sɛɛ lɛ, ebaahi akɛ osɔmɔ akɛ daa gbɛgbalɔ—loo be fɛɛ Maŋtsɛyeli jajelɔ.” Oblanyo lɛ kɛ ŋaawoo nɛɛ tsu nii, ni yɛ afii enyɔ sɛɛ lɛ afɔ̃ lɛ nine ni eyasɔmɔ yɛ Betel ni yɔɔ Mexico lɛ, ni ekɛ afii 20 esɔmɔ yɛ jɛmɛ.

Nɛgbɛ ji Betel?

Yɛ Hebri wiemɔ mli lɛ “Betel” shishi ji “Nyɔŋmɔ we.” (1 Mose 28:17, 19) Akalaa Biblia kɛ Biblia kasemɔ woji yɛ nitsumɔhe niji srɔtoi lɛ ahaa Yehowa Odasefoi asafoi ni fa fe 100,000 ni yɔɔ jeŋ fɛɛ lɛ, ni ajɛɔ jɛmɛ akɛ mumɔŋ yelikɛbuamɔ haa asafoi nɛɛ. Betel nitsulɔi—hii kɛ yei ni jɛ shihilɛi kɛ maji srɔtoi anɔ—ni miihe ashɛ 20,000 lɛ jɛɔ amɛsuɔmɔ mli amɛkɛ amɛbe fɛɛ sɔmɔɔ Yehowa kɛ amɛmumɔŋ nyɛmimɛi hii kɛ yei lɛ hu. Mɛi ni kɛ afii babaoo etsu Kristofoi anitsumɔ nɛɛ kɛ oblahii kɛ oblayei ni hiɛ la ŋmɔŋ lɛ feɔ ekome kɛtsuɔ nii. Betel wekui srɔtoi lɛ mlibii lɛ kɛ Yehowa Odasefoi asafoi ni bɛŋkɛ amɛ lɛ yaa kpeei, ni amɛkɛ amɛ feɔ ekome hu kɛtsuɔ nii yɛ Kristofoi ashiɛmɔ nitsumɔ lɛ mli yɛ otsii lɛ anaagbee. Agbɛnɛ hu, amɛkɛ dekã fioo ni amɛnáa lɛ kaseɔ Biblia lɛ, amɛkɛjieɔ amɛhiɛtserɛ, ni amɛkɛtsuɔ amɛ-aŋkro saji komɛi ahe nii.

Ahaa Betel weku lɛ mlibii lɛ shika fioo daa nyɔɔŋ. Amɛyeɔ niyenii ni ŋɔɔ ni hewalɛ yɔɔ mli, ni amɛhiɔ shi yɛ tsũi ni mli yɔɔ falefale ni haa amɛhe jɔɔ amɛ mli. Betel shĩai lɛ bɛ haŋtsii. Shi amɛsa kɛha nitsumɔ ni atsuɔ yɛ jɛmɛ lɛ. Jeee bɔ ni tsũi lɛ kɛ shĩa lɛ mli fɛɛ yɔɔ falefale ha, kɛ bɔ ni nibii yaa nɔ jogbaŋŋ yɛ jɛmɛ lɛ pɛ gbɔi ni yasaraa jɛmɛ lɛ nyaa he, shi moŋ amɛnyaa bɔ ni Betel nitsulɔi lɛ kɛ amɛhe yeɔ yɛ mlihilɛ mli ni amɛkɛ ekomefeemɔ tsuɔ nii hu lɛ he. Nitsulɔi lɛ kɛ ekãa tsuɔ nii, shi no etsiii amɛnaa ni amɛkajie naanyobɔɔ su kpo. Ajieee niiaŋ yɛ Betel, no hewɔ lɛ abuuu nitsumɔ ko akɛ enɔ kwɔ fe ekroko. Kɛ́ eji shĩa lɛ mli saamɔ jio, nidumɔ jio, nihoomɔ jio, woji akalamɔ jio loo ɔfis nitsumɔ jio lɛ, fɛɛ he yɛ  sɛɛnamɔ. Betelbii, taakɛ atsɛɔ mɛi ni tsuɔ nii yɛ Betel lɛ, feɔ ekome kɛtsuɔ nii kɛfiɔ Yehowa Odasefoi asɔɔmɔ nitsumɔ lɛ sɛɛ.—Kol. 3:23.

Naa Betelbii Komɛi Ahe Saji

Ha wɔsusu shihilɛ mli ni Betelbii ni yɔɔ maji srɔtoi anɔ ni feɔ weku kome lɛ jɛ lɛ he wɔkwɛ. Mɛni tsirɛ amɛ koni amɛyasɔmɔ yɛ Betel? Susumɔ Mario nɔkwɛmɔnɔ ni nyiɛ sɛɛ nɛɛ he. Dani Mario batsɔ Yehowa Odasefonyo lɛ, ekɛ Germany nitsumɔhe ko ni feɔ lɔle ni abuɔ mɛi ni tsuɔ nii yɛ jɛmɛ lɛ waa lɛ tsuɔ nii, awoɔ lɛ nyɔmɔ jogbaŋŋ, ni kulɛ ebaanyɛ eya ehiɛ yɛ nitsumɔ lɛ mli. Yɛ ebaptisimɔ sɛɛ nɔŋŋ lɛ, ekɛ otsi kome yatsu nii yɛ Betel ni yɔɔ maŋ nɔ ni eyɔɔ lɛ. Aha eyatsu nii yɛ woji akalamɔhe lɛ. Mario yɔse akɛ esoro mɛi ni ekɛtsu nii yɛ Betel lɛ kwraa yɛ mɛi ni ekɛtsuɔ nii yɛ enitsumɔhe lɛ ahe. No hewɔ lɛ eŋmala gbɛbimɔ wolo nɔ nii koni aha ekɛ ebe fɛɛ atsu nii yɛ Betel. Eyɛ mli akɛ ewekumɛi kɛ enanemɛi nitsulɔi babaoo nuuu eyiŋkpɛɛ nɛɛ shishi moŋ, shi amrɔ nɛɛ Mario kɛ miishɛɛ miisɔmɔ yɛ Germany Betel lɛ.

Mɛi babaoo yaa Betel ni amɛnako skul tsɔsemɔ krɛdɛɛ ko loo amɛbɛ nitsumɔ mli hesaa ko kwraa. Nakai eji yɛ Abel ni kɛ afii 15 esɔmɔ yɛ Mexico Betel lɛ gbɛfaŋ. Ekɛɛ akɛ: “Mikase nibii babaoo yɛ Betel. Mikase bɔ ni akɛ tsɔji wuji ni akɛkalaa woji lɛ tsuɔ nii ahaa. Mile akɛ kɛ́ mikɛ nilee nɛɛ yatsu nii yɛ he kroko lɛ, kulɛ maná shika babaoo, shi mishihilɛ efeŋ tamɔ bɔ ni eyɔɔ yɛ Betel—ni ji he ko ni toiŋjɔlɛ yɔɔ, ni haa mɔ tsui nyɔɔ emli, ni akaŋshii mumɔ kɛ yeyeeyefeemɔ ni yaa nɔ yɛ nitsumɔhei babaoo mli lɛ eko kwraa bɛ jɛmɛ lɛ. Minuɔ he akɛ minine eshɛ tsɔsemɔ ni fe fɛɛ ni mɔ ko baanyɛ aná lɛ nɔ, ni no ji nɔ ni eha mida yɛ mumɔŋ ni mijwɛŋmɔ mli egbele lɛ. Kulɛ minyɛŋ maná sɛɛnamɔi nɛɛ yɛ yunivɛsiti ni fe fɛɛ lɛ po.”

Kɛ́ Oyasara Betel lɛ, Ebaanyɛ Ewo Bo Hewalɛ

Betel kɛkɛ ni obaayasara lɛ baanyɛ aná okɛ Nyɔŋmɔ teŋ wekukpãa lɛ nɔ hewalɛ kpakpa. Nakai ji bɔ ni eba lɛ yɛ Omar ni yɔɔ Mexico lɛ gbɛfaŋ. Enyɛ tsɔɔ lɛ Biblia lɛ mli anɔkwalei lɛ. Shi beni Omar ye afii 17 lɛ, ekpa Kristofoi  akpeei kɛ shiɛmɔ yaa. Beni be shwie mli lɛ, ekɛ ehe wo jeŋba gbohii amli ni etiu heloonaa nibii asɛɛ. Sɛɛ mli lɛ eyatsu nii yɛ nitsumɔhe ko, ni nitsumɔhe lɛ tsu lɛ kɛ nitsulɔi krokomɛi koni amɛkɛ amɛnitsumɔ lɛ mli nibii lɛ ekomɛi aya Mexico Betel lɛ ni amɛyatsɔɔ amɛ bɔ ni nibii nɛɛ tsuɔ nii haa. Omar kɛɛ akɛ: “Beni wɔtsɔɔ amɛ bɔ ni nibii lɛ tsuɔ nii haa lɛ wɔta lɛ, Betel nitsulɔi ni wɔkɛshãra lɛ kɛ wɔ shara shi yɛ Betel shĩa lɛ mli. Nɔ ni mina lɛ kɛ bɔ ni amɛkɛ mi ye yɛ mlihilɛ mli lɛ ha misusu bɔ ni mitse mihe kɛjɛ Yehowa he lɛ he. Nɔŋŋ kɛkɛ ni mibɔi kpeeiyaa ekoŋŋ ni mibɔi Biblia lɛ kasemɔ. Beni miyasara Betel lɛ sɛɛ nyɔji ekpaa lɛ, abaptisi mi. Miida Yehowa shi akɛ nakai saramɔ ni miyasara Betel lɛ wo mi hewalɛ.”

Atsɔse Masahiko ni yɔɔ Japan lɛ hu yɛ Odasefoi aweku mli. Shi ebaná susumɔ akɛ Kristofoi ashihilɛ yɛ kpɛŋŋ tsɔ. Ekɛ ehe wo skul nifeemɔi amli vii ni ekpa kpeei kɛ shiɛmɔ yaa. Masahiko kaiɔ akɛ: “Gbi ko lɛ wɔweku lɛ kɛ wɔnanemɛi Kristofoi fioo komɛi kpɛ amɛyiŋ akɛ amɛbaayasara Betel. Miweku lɛ ma nɔ mi doo akɛ mikɛ amɛ aya, ni mifee nakai. Beni wɔyasara Betel lɛ, mitsui nyɔ mimli fe bei fɛɛ ni eho. Kristofoi krokomɛi ni mikɛbɔ yɛ gbɛfaa nɛɛ mli lɛ ha mitsui nyɔ mimli waa, ni minuuu he nakai kɛ́ mikɛ minanemɛi ni jeee Odasefoi lɛ bɔ. Mibasumɔ akɛ makɔ Kristofoi agbɛ lɛ, ni mikpɛ miyiŋ akɛ maha akɛ mi akase Biblia lɛ.” Amrɔ nɛɛ, Masahiko miisɔmɔ akɛ be fɛɛ sɔɔlɔ yɛ esafo lɛ mli.

Yoo ko ni eji Odasefonyo ni yɔɔ France lɛ fã kɛtee Moscow koni eyatsu nii. Beni eyɔɔ jɛmɛ lɛ ekɛ Yehowa webii lɛ kpa bɔɔ ni egbɔjɔ yɛ mumɔŋ. Ekɛ ehe wo jeŋba gbonyo mli, ni yɛ naagbee lɛ ekɛ mɔ ko ni jeee Odasefonyo bote gbalashihilɛ mli. Kɛkɛ ni nyɛmi yoo ko ni jɛ France lɛ yasara lɛ, ni amɛyi enyɔ lɛ fã gbɛ kɛtee St. Petersburg yɛ Russia koni amɛyasara Betel shĩa ni yɔɔ jɛmɛ lɛ. Nyɛmi yoo lɛ ŋma akɛ: “Ahere wɔ kɛ hiɛmɛɛ yɛ Betel ni enɛ ta mitsuiŋ waa. Toiŋjɔlɛ yɛ jɛmɛ waa. Minu he akɛ Yehowa mumɔ lɛ yɛ jɛmɛ. Mɛni kwraa ha mikplaŋ kɛjɛ Yehowa asafo lɛ he? Beni miyasara Betel lɛ sɛɛ lɛ, misɔle koni Yehowa aye abua mi, ni mikɛ Biblia lɛ bɔi mibii lɛ tsɔsemɔ kɛ ekãa.” Kɛfata mumɔŋ yelikɛbuamɔ srɔtoi ni akɛha Odasefonyo ni no mli lɛ egbɔjɔ yɛ mumɔŋ nɛɛ he lɛ, Betel ni eyasara lɛ wo lɛ hewalɛ waa ni no sɛɛ lɛ efee tsakemɔi ni sa.

Mɛɛ hewalɛ Betel náa yɛ mɛi ni leee Yehowa Odasefoi lɛ ahe saji lɛ anɔ kɛ́ amɛyasara jɛmɛ? Yɛ afi 1988 lɛ, Alberto ni no mli lɛ ekɛ ehe woɔ maŋkwramɔŋ saji amli vii lɛ yasara Brazil Betel lɛ. Bɔ ni jɛmɛ yɔɔ falefale, nibii yaa nɔ jogbaŋŋ, kɛ titri lɛ bɔ ni atsuɔ nitsumɔ lɛ yɛ faŋŋ mli lɛ ná enɔ hewalɛ waa. Alberto yasara osɔfoi askul ko ni eshabi sɔmɔɔ yɛ jɛmɛ akɛ osɔfo lɛ, no sɛɛ etsɛɛɛ nɔŋŋ ni eyasara Betel lɛ. Alberto na srɔtofeemɔ ni yɔɔ hei enyɔ nɛɛ ateŋ lɛ. Alberto kɛɛ akɛ: “Afeɔ nɔ fɛɛ nɔ yɛ teemɔŋ yɛ osɔfoi askul lɛ.” Beni eyasara Betel lɛ sɛɛ etsɛɛɛ nɔŋŋ lɛ, ekpɛlɛ koni akɛ lɛ akase Biblia lɛ, ekɛ ehe wooo maŋkwramɔŋ nifeemɔi amli dɔŋŋ, ni amrɔ nɛɛ eesɔmɔ akɛ asafoŋ onukpa.

Ba ni Obasara Betel!

Mɛi babaoo feɔ bɔ fɛɛ bɔ ni amɛaanyɛ koni amɛyasara nitsumɔhe nine ni yɔɔ amɛmaŋ lɛ. Ákɛ nɔkwɛmɔnɔ lɛ, Paulo kɛ Eugenia ni yɔɔ Brazil lɛ kɛ afii ejwɛ sɔŋŋ bua shika naa koni amɛta bɔɔsu mli gbii enyɔ kɛfã gbɛ kilomitai 3000 kɛyasara Betel ni yɔɔ amɛmaŋ lɛ. Amɛkɛɛ akɛ: “Wɔmɔdɛŋbɔɔ lɛ efeee efolo. Amrɔ nɛɛ wɔnuɔ bɔ ni ato Yehowa asafo lɛ he gbɛjianɔ aha lɛ shishi jogbaŋŋ. Kɛ́ wɔgbála nitsumɔ ni atsuɔ yɛ Betel lɛ mli wɔha wɔ-Biblia kaselɔi lɛ, bei komɛi lɛ amɛbiɔ akɛ, ‘Otee jɛmɛ dã?’ Amrɔ nɛɛ wɔbaanyɛ wɔkɛɛ hɛɛ.”

Ani nitsumɔhe nine kɛ Betel shĩa yɛ maŋ ni oyɔɔ nɔ lɛ, aloo eko yɛ maŋ ko ni bɛŋkɛ bo nɔ? Wɔmiifɔ̃ bo nine ni oyasara jɛmɛ. Ŋwanejee ko bɛ he akɛ kɛ́ oyasara Betel lɛ, abaahere bo kɛ hiɛmɛɛ, ni ebaawo bo hewalɛ waa ni oya nɔ osɔmɔ Yehowa.

[Mfoniri ni yɔɔ baafa 18]

Mario

[Mfoniri ni yɔɔ baafa 18]

Abel

[Mfoniri ni yɔɔ baafa 18]

Germany

[Mfoniri ni yɔɔ baafa 18]

Japan

[Mfoniri ni yɔɔ baafa 18]

Brazil