Sanebimɔi ni Jɛ Kanelɔi Adɛŋ

Mɛni hewɔ Yesu nyɛ ekɛɛ yoo ko ni ale lɛ akɛ eji eshafeelɔ lɛ ákɛ akɛ ehe eshai lɛ efa lɛ lɛ?—Luka 7:37, 48.

Beni Yesu yeɔ nii yɛ Farisifonyo ko ni atsɛɔ lɛ Simon lɛ we lɛ, yoo ko ‘badamɔ enaji ashi yɛ esɛɛgbɛ.’ Efo ni ekɛ yaafonui lɛ fɔ Yesu naji ahe, ni ekɛ eyitsɔi tsumɔ. Kɛkɛ ni eshɔ enaji ahe blɛoo, ni ekɛ tsofa-kɛ-ŋma kpá he. Sanekpakpa lɛ bɔ amaniɛ akɛ ale yoo lɛ yɛ ‘maŋ lɛŋ akɛ eji eshafeelɔ.’ Eji anɔkwale akɛ adesa fɛɛ adesa ni yeee emuu lɛ ji eshafeelɔ, shi bei pii lɛ Ŋmalɛi lɛ kɛ wiemɔ nɛɛ tsuɔ nii kɛkɔɔ mɛi ni ale eshai ni amɛfeɔ lɛ waa loo mɛi ni ená gbɛ́i gbonyo akɛ eshafeelɔi lɛ ahe. Eeenyɛ efee akɛ, yoo lɛ ji ajwamaŋbɔlɔ. Mɔ ko ni tamɔ nɛkɛ ni Yesu kɛɛ lɛ akɛ: “Aŋɔ ohe eshai lɛ afao!” lɛ. (Luka 7:36-38, 48) Mɛni Yesu wiemɔi nɛɛ tsɔɔ? Akɛni no mli lɛ ashãko kpɔ̃mɔ afɔle lɛ hewɔ lɛ, mɛɛ gbɛ nɔ aaanyɛ akɛ yoo lɛ he eshai afa lɛ?

Beni yoo lɛ fɔ́ Yesu naji ahe ni ekɛ tsofa-kɛ-ŋma kpá he lɛ sɛɛ lɛ, Yesu bu abɛ ko kɛgbála sane oti ko mli eha Simon, mɔ ni ŋmɛ lɛ okpɔlɔ lɛ, dani ekɛ yoo lɛ he eshai lɛ fa lɛ. Yesu kɛ esha to nyɔmɔ wulu ko ni anyɛŋ awo he, ni ekɛɛ Simon akɛ: “Niflilɔ ko yɛ ni yɔɔ nyɔji atsɛmɛi enyɔ; mɔ kome hiɛ lɛ denario ohai enumɔ, ni mɔ kome hu nyɔŋmai enumɔ. Shi akɛni amɛbɛ nɔ ko ni amɛkɛaawo lɛ, eŋɔke amɛyi enyɔ lɛ fɛɛ. No hewɔ lɛ tsɔɔmɔ amɛteŋ mɔ ni aaasumɔ lɛ titri?” Ni Simon to he ekɛɛ: “Misusuɔ akɛ, mɔ ni eŋɔ pii eke lɛ.” Yesu to he akɛ: “Obu atɛŋ jogbaŋŋ!” (Luka 7:41-43) Wɔ fɛɛ wɔhiɛ Nyɔŋmɔ toiboo he nyɔmɔ, no hewɔ lɛ kɛ́ wɔgbo enɔ toi ni wɔfee esha lɛ, no tsɔɔ akɛ wɔwoko nyɔmɔ ni wɔhiɛ Nyɔŋmɔ lɛ. No hewɔ lɛ wɔnyɔmɔ lɛ tĩaa. Shi Yehowa tamɔ niflilɔ ko ni miisumɔ ni ekɛ nyɔji ni ahiɛ lɛ lɛ ake. No hewɔ ni Yesu wo esɛɛnyiɛlɔi lɛ hewalɛ ni amɛsɔle amɛha Nyɔŋmɔ ní amɛbi akɛ: “Okɛ wɔnyɔji lɛ ake wɔ, tamɔ bɔ ni wɔ hu wɔkɛkeɔ mɛi ni hiɛ wɔ nyɔji lɛ.” (Mat. 6:12) Luka 11:4 lɛ tsɔɔ akɛ nyɔji nɛɛ ji eshai.

Mɛni nɔ Nyɔŋmɔ damɔ ni ekɛ eshai fa yɛ blema? Nyɔŋmɔ jalɛ sane ni kpa ko kwraa bɛ he lɛ tsɔɔ akɛ esha dɛŋ nyɔmɔwoo ji gbele. No hewɔ lɛ, Adam kɛ ewala wo esha ni efee lɛ he nyɔmɔ. Shi yɛ Mla ni Nyɔŋmɔ kɛha Israel maŋ lɛ mli lɛ, eshafeelɔ ko baanyɛ aná eshaifaa kɛ́ ekɛ kooloo ko shã afɔle eha Yehowa. Bɔfo Paulo ŋma akɛ: “Shwɛ fioo ni lá aŋɔ tsuuɔ nii fɛɛ he yɛ mla lɛ naa; ni kɛ́ ashwieee lá shi lɛ, aŋɔfaaa.” (Heb. 9:22) Nakai gbɛ pɛ Yudafoi lɛ le akɛ amɛbaanyɛ amɛtsɔ nɔ koni Nyɔŋmɔ kɛ amɛhe eshai afa amɛ. Belɛ ebɛ naakpɛɛ mɔ akɛ mɛi ni yɔɔ okpɔlɔŋmɛɛ lɛ shishi lɛ nyaaa nɔ ni Yesu kɛɛ yoo lɛ he. Mɛi ni kɛ lɛ tra niyenii ashi lɛ bɔi kɛɛmɔ yɛ amɛmli akɛ: “Namɔ po ji mɔ ni ŋɔɔ eshai faa nɛɛ?” (Luka 7:49) No hewɔ lɛ, mɛni nɔ adamɔ akɛ yoo ni feɔ esha waa nɛɛ he eshai lɛ fa lɛ?

Beni Adam kɛ Hawa tse atua lɛ sɛɛ lɛ, klɛŋklɛŋ gbalɛ ni agba yɛ Biblia lɛ mli lɛ wie Yehowa yiŋtoo akɛ ebaatee ‘seshi’ ko shi, ni Satan kɛ “eseshi” lɛ baatswa nakai ‘seshi’ lɛ nanetsitsi nɔ̃ lɛ he. (1 Mose 3:15) Gbalɛ nɛɛ ba mli beni Nyɔŋmɔ henyɛlɔi lɛ gbe Yesu lɛ. (Gal. 3:13, 16) Kristo lá ni afɔse lɛ ji nyɔmɔ ni awo kɛkpɔ̃ adesai kɛjɛ esha kɛ gbele mli. Akɛni nɔ ko nyɛŋ atsi Yehowa naa koni ekanyɛ etsu eyiŋtoo he nii hewɔ lɛ, beni awie wiemɔi ni yɔɔ 1 Mose 3:15 lɛ nɔŋŋ lɛ, Nyɔŋmɔ bu kpɔ̃mɔnɔ lɛ oookɛɛ awo momo. No hewɔ lɛ, ebaanyɛ ekɛ mɛi ni náa hemɔkɛyeli yɛ eshiwoi lɛ amli lɛ ahe eshai afa amɛ.

 Yɛ be ni tsɔ Kristo baa lɛ hiɛ lɛ mli lɛ, Yehowa bu aŋkroaŋkroi komɛi akɛ jalɔi. Amɛteŋ mɛi komɛi ji Henok, Noa, Abraham, Rahab, kɛ Hiob. Amɛná hemɔkɛyeli akɛ Nyɔŋmɔ shiwoi lɛ baaba mli. Kaselɔ Yakobo ŋma akɛ: “Abraham he Nyɔŋmɔ eye, ni abu enɛ jalɛ aha lɛ.” Yakobo wie yɛ Rahab he akɛ: “Nakai nɔŋŋ Rahab, ajwamaŋ lɛ hu, ani jeee nitsumɔi amli ajɛ abu lɛ bem?”—Yak. 2:21-25.

Maŋtsɛ David ni hi shi yɛ blema Israel lɛ fee eshai srɔtoi ni hiɛdɔɔ yɔɔ he, shi ená hemɔkɛyeli ni mli wa yɛ anɔkwa Nyɔŋmɔ lɛ mli, ni ejɛ etsuiŋ eshwa ehe yɛ eko fɛɛ eko he. Kɛfata he lɛ, Ŋmalɛi lɛ kɛɔ akɛ: “Nyɔŋmɔ jie [Yesu eto] akɛ kpatamɔ nɔ̃ kɛtsɔ elá lɛ nɔ hemɔkɛyeli nɔ, koni ejie ejalɛ lɛ kpo, yɛ ehiɛ ní eku efɔ̃ eshai ní afee sá lɛ anɔ yɛ Nyɔŋmɔ tsuishiŋmɛɛ mli lɛ hewɔ; koni ejie ejalɛ lɛ etsɔɔ yɛ benɛbe nɛɛ mli, ní eye bem ní ebu mɔ ni heɔ Yesu nɔ yeɔ lɛ hu bem.” (Rom. 3:25, 26) Yehowa baanyɛ adamɔ Yesu kpɔ̃mɔ afɔle ni no mli lɛ anako ashã lɛ nɔ ekɛ David he eshai lɛ afa lɛ ní eteee shi ewooo etaomɔ nii kɛha jalɛsaneyeli lɛ.

Eka shi faŋŋ akɛ, yoo ni kɛ tsofa-kɛ-ŋma kpá Yesu naji ahe lɛ sane lɛ tamɔ nakai nɔŋŋ. No mli lɛ eji eshafeelɔ, shi agbɛnɛ lɛ etsake etsui. Ena akɛ esa akɛ akpɔ̃ lɛ kɛjɛ ehe eshai lɛ amli, ni ekɛ enifeemɔi tsɔɔ akɛ ehiɛ sɔɔ mɔ ni Yehowa baatsɔ enɔ ekɛ nakai kpɔ̃mɔ lɛ aba lɛ lɛɛlɛŋ. Eyɛ mli akɛ no mli lɛ akɛ kpɔ̃mɔnɔ lɛ hako moŋ, shi akɛni bɔ fɛɛ bɔ ni fee lɛ abaashã afɔle nɛɛ hewɔ lɛ, abaanyɛ adamɔ nɔ akɛ aŋkroaŋkroi tamɔ yoo nɛɛ he eshai afa amɛ. No hewɔ lɛ, Yesu kɛɛ yoo lɛ akɛ: “Aŋɔ ohe eshai lɛ afao!”

Amaniɛbɔɔ nɛɛ feɔ lɛ faŋŋ akɛ Yesu nyaŋeee eshafeelɔi. Ekɛ amɛ ye jogbaŋŋ. Kɛfata he lɛ, Yehowa miisumɔ ni ekɛ eshafeelɔi ni etsake amɛtsui lɛ ahe afa amɛ. Kwɛ bɔ ni sane nɛɛ haa wɔ, ni wɔji adesai ni yeee emuu lɛ náa miishɛɛ ni ewoɔ wɔ hewalɛ hu!

[Mfoniri ni yɔɔ baafa 7]

Abu amɛ jalɔi