Nɔ Ni Wɔ-hiɛnyiɛlɔ Lɛ Tsuɔ Ŋmɛnɛ
Nɔ Ni Wɔ-hiɛnyiɛlɔ Lɛ Tsuɔ Ŋmɛnɛ
“Eje kpo eeye kunim, koni esaa eye kunim.”—KPOJ. 6:2.
1, 2. (a) Te Biblia lɛ fee nitsumɔ ni Kristo tsuɔ akɛ maŋtsɛ kɛjɛ afi 1914 lɛ he mfoniri eha tɛŋŋ? (b) Kɛjɛ beni awó Kristo maŋtsɛ lɛ, mɛni efee?
AWÓ Kristo akɛ Yehowa Mesia Maŋtsɛyeli lɛ nɔ Maŋtsɛ yɛ afi 1914. Te ofeɔ ehe mfoniri yɛ ojwɛŋmɔ mli ohaa tɛŋŋ? Ani osusuɔ ehe akɛ maŋtsɛ ko ni ta emaŋtsɛ sɛi nɔ yɛ ŋwɛi eejwɛŋ, ni maa eyi shi ekwɛɔ nɔ ni yaa nɔ yɛ esafo ni yɔɔ shikpɔŋ lɛ nɔ lɛ mli yɛ be kɛ beaŋ? Kɛ́ nakai ji osusumɔ lɛ, belɛ esa akɛ otsake ojwɛŋmɔ. Lalai Awolo lɛ kɛ Kpojiemɔ wolo lɛ feɔ ehe mfoniri akɛ maŋtsɛ ni yɔɔ ekãa ni ta okpɔŋɔ nɔ, ni eje kpo “eeye kunim, koni esaa eye kunim,” ni eeeya nɔ efee nakai kɛyashi ‘eeeye kunim’ kɛyawula shi.—Kpoj. 6:2; Lala 45:1-4, Ga Biblia hee; Lala 2:6-9.
2 Nɔ̃ klɛŋklɛŋ ni Kristo fee beni awó lɛ maŋtsɛ lɛ ji ‘drako lɛ kɛ ebɔfoi’ lɛ anɔ kunim ni eye. Ákɛ bɔfonukpa Mikael ni nyiɛ ebɔfoi lɛ ahiɛ lɛ, Kristo shɛrɛ Satan kɛ edaimonioi lɛ eshwie kɛjɛ ŋwɛi ni yɔɔ krɔŋkrɔŋ lɛ, ni esa amɛnaa koni amɛkanyɛ amɛtee ŋwɛi dɔŋŋ. (Kpoj. 12:7-9) No sɛɛ lɛ, beni Yesu tsuɔ enitsumɔ akɛ Yehowa “kpaŋmɔ bɔfo” lɛ, ekɛ e-Tsɛ lɛ bakwɛ nɔ ni yaa nɔ yɛ mfonirifeemɔŋ sɔlemɔtsu lɛ mli. (Mal. 3:1) Ekojo Kristendom, ni ji “Babilon kpeteŋkpele” lɛ fã ni sa shwamɔ fe fɛɛ lɛ, ni ebu lɛ fɔ yɛ lá shi ni eshwie kɛ mumɔŋ ajwamaŋ ni ekɛ je nɛŋ nɔyelɔi lɛ ebɔ lɛ hewɔ.—Kpoj. 18:2, 3, 24.
Kristo Tsuu E-shikpɔŋ lɛ nɔ Tsulɔ lɛ He
3, 4. (a) Mɛɛ nitsumɔ Kristo tsu akɛ Yehowa “bɔfo”? (b) Beni abakwɛ nɔ ni yaa nɔ yɛ mfonirifeemɔŋ sɔlemɔtsu lɛ mli lɛ mɛni ana? (d) Ákɛ asafo lɛ Yitso lɛ, namɔ Yesu kɛ nitsumɔ wo edɛŋ, ni mɛɛ nitsumɔ eha lɛ?
3 Beni Yehowa kɛ ‘ebɔfo’ lɛ bakwɛ nɔ ni yaa nɔ yɛ mfonirifeemɔŋ sɔlemɔtsu lɛ mli lɛ, amɛna anɔkwa Kristofoi akuu ni amɛjeee Kristendom sɔlemɔi lɛ fã lɛ yɛ mfonirifeemɔŋ sɔlemɔtsu lɛ kpo lɛ nɔ yɛ shikpɔŋ lɛ nɔ. Shi esa akɛ atsuu Kristofoi ni afɔ amɛ mu, loo “Levibii” nɛɛ po ahe. Ebalɛ tamɔ bɔ ni gbalɔ Maleaki gba lɛ akɛ: ‘Yehowa aaata shi tamɔ jwiɛtɛi hetsuulɔ kɛ krɔŋŋfeelɔ, ni eeefee Levibii lɛ krɔŋŋ, ni eeetsuu amɛhe tamɔ shika loo jwiɛtɛi, ni amɛkɛ nikeenii aaabaha Yehowa yɛ jalɛ mli.’ (Mal. 3:3) Yehowa tsɔ Kristo Yesu, ni ji ‘ekpaŋmɔ bɔfo’ lɛ nɔ etsuu mumɔŋ Israelbii lɛ ahe.
4 Shi fɛɛ sɛɛ lɛ, Kristo na akɛ Kristofoi ni afɔ amɛ mu ni yeɔ anɔkwa nɛɛ miifee bɔ fɛɛ bɔ ni amɛbaanyɛ koni amɛha ewebii ni yeɔ anɔkwa lɛ niyenii yɛ be ni sa mli. Kɛjɛ afi 1879 kɛbaa nɛɛ lɛ, amɛtee nɔ amɛŋmala Biblia mli anɔkwalei ni kɔɔ Nyɔŋmɔ Maŋtsɛyeli lɛ he yɛ Buu-Mɔɔ srɔtoi lɛ amli, ekɔɔɔ he eko shihilɛ ni amɛkɛkpe. Yesu gba akɛ, kɛ́ ‘eba’ ni ebakwɛ nɔ ni yaa nɔ yɛ ewebii lɛ ateŋ yɛ “je nɛŋ naagbee” be lɛ mli lɛ, ebaana tsulɔ ko ni miiha amɛ “amɛŋmaa yɛ be ni sa nɔ.” Ebaajɔɔ nakai tsulɔ lɛ, ni “eeeŋɔ lɛ eto enii fɛɛ” ni yɔɔ shikpɔŋ lɛ nɔ lɛ “nɔ.” (Mat. 24:3, 45-47) Ákɛ Kristofoi asafo lɛ Yitso lɛ, Kristo etee nɔ ekɛ “tsulɔ anɔkwafo kɛ nilelɔ” lɛ etsu nii kɛkwɛ e-Maŋtsɛyeli lɛ he nibii ni yɔɔ shikpɔŋ lɛ nɔ lɛ anɔ. Etee nɔ ekɛ gbɛtsɔɔmɔ eha “ewebii” ni afɔ amɛ mu lɛ kɛ amɛnanemɛi “tooi krokomɛi” lɛ kɛtsɔ Nɔyeli Kuu lɛ nɔ.—Yoh. 10:16.
Shikpɔŋ lɛ nɔ Nikpamɔ
5. Mɛni bɔfo Yohane na akɛ Mesia Maŋtsɛ lɛ miifee yɛ ninaa mli?
5 Ajie nɔ kroko ni Mesia Maŋtsɛ lɛ baatsu yɛ “Nuŋtsɔ lɛ gbi lɛ nɔ” kɛ́ awo lɛ maŋtsɛ yɛ afi 1914 lɛ sɛɛ lɛ kpo atsɔɔ bɔfo Yohane yɛ ninaa mli. Yohane ŋma akɛ: “Mikwɛ, ni naa, atatu yɛŋ, ni mɔ ko ta atatu lɛ nɔ tamɔ gbɔmɔ bi lɛ, ni shika akekere fi eyitso, ni ehiɛ nikpamɔ kakla ni naa ba yɛ edɛŋ.” (Kpoj. 1:10; 14:14) Yohane nu ni Yehowa bɔfo ko miikɛɛ Nikpalɔ nɛɛ ni ekɛ enikpamɔ kakla lɛ awo mli ni ekpá nii ejaakɛ “shikpɔŋ lɛ nɔ nikpamɔ nii lɛ egbi.”—Kpoj. 14:15, 16.
6. Mɛni Yesu wie akɛ ebaaya nɔ kɛ́ be shwie mli?
6 “Shikpɔŋ lɛ nɔ nikpamɔ” nɛɛ haa wɔkaiɔ Yesu abɛbua ni kɔɔ ŋmãa kɛ jwɛi lɛ he lɛ. Yesu kɛ ehe to nuu ko ni dũ ŋmãa yɛ ebɔɔ mli kɛ gbɛkpamɔ akɛ ebaakpá ŋmãa kpakpai babaoo lɛ he, ni ŋmãa lɛ damɔ shi kɛha “maŋtsɛyeli lɛŋ bii,” ni ji anɔkwa Kristofoi ni afɔ amɛ mu ni baafata Yesu he kɛye nɔ yɛ e-Maŋtsɛyeli lɛ mli lɛ. Shi beni je na lɛ, henyɛlɔ ko, ni ji “abonsam” yadu jwɛi, ni damɔ shi kɛha “mɔ fɔŋ lɛ bii lɛ” kɛfutu mli. Nidulɔ lɛ fã enitsulɔi lɛ koni amɛha ŋmãa lɛ kɛ jwɛi lɛ fɛɛ akwɛ̃ kɛyashi ŋmãakpamɔ be, ni ji “je nɛŋ naagbee lɛ.” Ebaatsu ebɔfoi lɛ koni amɛbua ŋmãa lɛ naa amɛwo afã, ni amɛbua jwɛi lɛ hu naa amɛwo afã yɛ nakai beaŋ.—Mat. 13:24-30, 36-41.
7. Te Kristo tsuɔ “shikpɔŋ lɛ nɔ nikpamɔ” lɛ he nii ehaa tɛŋŋ?
7 Yesu miitsu nikpamɔ nitsumɔ ko yɛ jeŋ fɛɛ, ni enɛ haa ninaa ni ajie lɛ kpo atsɔɔ Yohane lɛ baa mli. Beni “shikpɔŋ lɛ nɔ nikpamɔ” lɛ je shishi lɛ, abɔi mɛi 144,000 ni feɔ “maŋtsɛyeli lɛŋ bii” ni ji “ŋmãa” ni awie he yɛ Yesu abɛbua lɛ mli lɛ ateŋ mɛi ni eshwɛ lɛ anaa buamɔ klɛŋklɛŋ. Srɔtofeemɔ ni yɔɔ anɔkwa Kristofoi kɛ amale Kristofoi ateŋ lɛ bafee faŋŋ yɛ Jeŋ Ta I lɛ sɛɛ, aahu akɛ no ha atsu “shikpɔŋ lɛ nɔ nikpamɔ” fã ni ji enyɔ—ni ji tooi krokomɛi lɛ anaabuamɔ lɛ he nii. Mɛnɛɛmɛi jeee “maŋtsɛyeli lɛŋ bii,” shi moŋ lɛ, amɛji “asafo babaoo” ni miisumɔ ni amɛhi Maŋtsɛyeli lɛ nɔyeli shishi. Aabua amɛnaa kɛmiijɛ “majimaji kɛ asafoi kɛ wiemɔi” fɛɛ ateŋ. Amɛkpɛlɛɔ Mesia Maŋtsɛyeli, ni Kristo Yesu kɛ “mɛi krɔŋkrɔŋi” ni ji mɛi 144,000 ní baafata Kristo he kɛye nɔ yɛ ŋwɛi lɛ feɔ emlibii lɛ nɔ.—Kpoj. 7:9, 10; Dan. 7:13, 14, 18.
Bɔ ni Kristo Kwɛɔ Asafoi lɛ Anɔ
8, 9. (a) Mɛni tsɔɔ akɛ jeee nɔ ni yaa nɔ yɛ asafo muu lɛ fɛɛ mli lɛ kɛkɛ Kristo naa, shi enaa mɔ fɛɛ mɔ ni yɔɔ asafo lɛ mli lɛ jeŋba hu? (b) Taakɛ wɔnaa yɛ mfoniri ni yɔɔ baafa 26 lɛ, mɛɛ “Satan teemɔŋ nibii ni mli kwɔlɔ” esa akɛ wɔkwa?
8 Wɔna yɛ nikasemɔ ni tsɔ hiɛ lɛ mli akɛ Kristo hiŋmɛi hi klɛŋklɛŋ afii 100 Ŋ. B. asafo fɛɛ asafo mumɔŋ shidaamɔ nɔ jogbaŋŋ. Ŋmɛnɛ hu lɛ, ákɛ Maŋtsɛ ni aŋɔ ‘hegbɛ fɛɛ aha lɛ yɛ ŋwɛi kɛ shikpɔŋ nɔ’ lɛ, Kristo ni ji wɔ-Hiɛnyiɛlɔ lɛ kwɛɔ asafoi ni yɔɔ jeŋ fɛɛ lɛ kɛ amɛnɔkwɛlɔi lɛ anɔ. (Mat. 28:18; Kol. 1:18) Yehowa “eŋɔ lɛ efee nibii fɛɛ yitso eha” mɛi ni afɔ amɛ mu lɛ “asafo lɛ.” (Efe. 1:22) No hewɔ lɛ, nɔ ko kwraa bɛ ni yaa nɔ yɛ Yehowa Odasefoi asafoi ni fa fe 100,000 lɛ eko fɛɛ eko mli ni enaaa.
9 Yesu kɛ shɛɛ sane nɛɛ maje blema Tiatira asafo lɛ akɛ: “Nii ni Nyɔŋmɔ bi lɛ ni ehiŋmɛii tamɔ lalilɛi . . . lɛ kɛɛ nɛ: Mile onitsumɔi.” (Kpoj. 2:18, 19) Ekã nakai asafo lɛ mlibii lɛ yɛ amɛjeŋba gbonyo, kɛ amɛwalayeli shihilɛ lɛ he, ni ekɛɛ amɛ akɛ: “Miji mɔ ni taoɔ sabai kɛ tsuii amli, ni maha nyɛteŋ mɔ fɛɛ mɔ bɔ ni nyɛnitsumɔi lɛ yɔɔ lɛ.” (Kpoj. 2:23) Nakai wiemɔ lɛ tsɔɔ akɛ, jeee akɛ Kristo naa nɔ ni yaa nɔ yɛ asafo fɛɛ asafo mli lɛ pɛ kɛkɛ, shi moŋ lɛ, enaa mɔ fɛɛ mɔ ni yɔɔ asafo fɛɛ asafo mli lɛ jeŋba. Yesu jie Tiatira asafo lɛ mlibii ni leee “Satan teemɔŋ nibii ni mli kwɔlɔ” lɛ ayi. (Kpoj. 2:24, Ga Biblia hee) Ŋmɛnɛ lɛ, anaa “Satan teemɔŋ nibii ni mli kwɔlɔ” lɛ yɛ Intanɛt lɛ nɔ hei komɛi loo vidio game srɔtoi ni awuiyeli nifeemɔi yɔɔ mli lɛ amli, kɛ agbɛnɛ hu yɛ susumɔ ni mɛi hiɛ akɛ mɔ fɛɛ mɔ baanyɛ afee nɔ ni esumɔɔ lɛ mli. Kristo kpɛlɛɔ gbekɛbii kɛ onukpai ni kpoɔ nibii nɛɛ anɔ. Kwɛ bɔ ni enáa miishɛɛ waa akɛ Kristofoi babaoo ni yɔɔ ŋmɛnɛ lɛ miifee bɔ fɛɛ bɔ ni amɛaanyɛ ni amɛkɛ egbɛtsɔɔmɔi atsu nii yɛ amɛshihilɛ mli fɛɛ!
10. Te afee bɔ ni Kristo tsɔɔ asafoŋ onukpai agbɛ lɛ he mfoniri aha tɛŋŋ, shi mɛɛ gbɛjianɔtoo esa akɛ akpɛlɛ nɔ?
10 Kristo tsɔɔ asafoŋ onukpai anɔ ekɛ suɔmɔ kwɛɔ esafoi ni yɔɔ shikpɔŋ lɛ nɔ lɛ anɔ. (Efe. 4:8, 11, 12) Nɔkwɛlɔi fɛɛ ni hi shi yɛ klɛŋklɛŋ afii 100 lɛ mli lɛ ji mɛi ni akɛ mumɔ efɔ amɛ mu. Afee amɛhe mfoniri yɛ Kpojiemɔ wolo lɛ mli akɛ ŋulamii ni Kristo hiɛ yɛ eninejurɔ nɔ. (Kpoj. 1:16, 20) Ŋmɛnɛ lɛ, asafoŋ onukpai lɛ ateŋ tsiimɔ ji tooi krokomɛi lɛ mlibii. Atsɔɔ sɔlemɔ kɛ mumɔ krɔŋkrɔŋ lɛ kudɔmɔ nɔ aholeɔ amɛ, no hewɔ lɛ abaanyɛ awie yɛ amɛ hu amɛhe akɛ Kristo tsɔɔ amɛ gbɛ, loo ehiɛ amɛ yɛ eninejurɔ nɔ. (Bɔf. 20:28) Shi amɛkpɛlɛɔ nɔ akɛ Kristo kɛ Kristofoi ni afɔ amɛ mu lɛ ateŋ hii fioo ko pɛ miitsu nii akɛ Nɔyeli Kuu, ni ekɛmiikudɔ ewebii ni yɔɔ shikpɔŋ lɛ nɔ lɛ, ni ekɛmiitsɔɔ amɛ gbɛ.—Nyɛkanea Bɔfoi lɛ Asaji 15:6, 28-30.
“Ba, Nuŋtsɔ Yesu”
11. Mɛni hewɔ wɔshweɔ waa ni wɔ-Hiɛnyiɛlɔ lɛ aba oya lɛ?
11 Yesu wie shii abɔ yɛ ninai ni ajie lɛ kpo atsɔɔ bɔfo Yohane lɛ mli akɛ eeba oyá. (Kpoj. 2:16; 3:11; 22:7, 20) Ŋwanejee ko bɛ he akɛ nakai wiemɔ lɛ kɔɔ hiɛkpatamɔ ni ekɛaaba Babilon Kpeteŋkpele lɛ, kɛ Satan jeŋ fɔŋ lɛ fã ni baashwɛ lɛ anɔ lɛ he. (2 Tes. 1:7, 8) Akɛni bɔfo Yohane miishwe waa ni ena nibii ni yɔɔ naakpɛɛ ni agba he sane afɔ̃ shi lɛ fɛɛ mlibaa hewɔ lɛ, ebo waa akɛ: “Amen. Hɛɛ, ba, Nuŋtsɔ Yesu!” Wɔ, ni wɔyɔɔ nibii agbɛjianɔtoo fɔŋ nɛɛ naagbee be lɛ mli lɛ hu miishwe waa ni wɔna beni wɔ-Hiɛnyiɛlɔ kɛ Maŋtsɛ lɛ kɛ Maŋtsɛyeli hewalɛ ni akɛha lɛ lɛ baatsu nii kɛtse e-Tsɛ lɛ gbɛ́i he, ni ekɛbu e-Tsɛ lɛ nɔyeli lɛ bem.
12. Mɛɛ nitsumɔ Kristo baatsu egbe naa dani abaaŋmɛɛ hiɛkpatamɔ kɔɔyɔi lɛ he?
12 Kɛ́ mɛi 144,000 ni ji mumɔŋ Israelbii lɛ ateŋ naagbee mɔ lɛ ná enaagbee naasɔomɔ lɛ, no sɛɛ lɛ Yesu baakpata Satan gbɛjianɔtoo fɔŋ ni anaa nɛɛ hiɛ. Biblia lɛ haa efeɔ faŋŋ akɛ, aŋmɛŋ kɔɔyɔi ni baakpata Satan gbɛjianɔtoo lɛ hiɛ lɛ he kɛyashi mɛi 144,000 lɛ mlibii lɛ fɛɛ baaná amɛnaagbee naasɔomɔ.—Kpoj. 7:1-4.
13. Te Kristo aaafee tɛŋŋ eha ana ebaa lɛ yɛ “amanehulu babaoo” lɛ klɛŋklɛŋ fã lɛ mli?
13 Shikpɔŋ lɛ nɔ bii lɛ ateŋ mɛi babaoo yɔseko akɛ Kristo ‘baa be’ lɛ je shishi yɛ afi 1914. (2 Pet. 3:3, 4) Shi etsɛŋ, Kristo baakpata Satan nibii agbɛjianɔtoo lɛ mli fãi srɔtoi lɛ fɛɛ hiɛ kɛtsu Yehowa yiŋtoo he nii, koni ekɛha efee faŋŋ akɛ eba. Kɛ́ akpata Kristendom osɔfoi ni ji “esha gbɔmɔ lɛ” hiɛ lɛ, no baaha ana “ebaa lɛ puemɔ lɛ” faŋŋ. (Nyɛkanea 2 Tesalonikabii 2:3, 8.) No baafee odaseyeli ni mli kã shi faŋŋ ni tsɔɔ akɛ Kristo miitsu nii akɛ Kojolɔ ni Yehowa ehala. (Nyɛkanea 2 Timoteo 4:1.) Kristendom, ni ji Babilon Kpeteŋkpele lɛ fã ni sa shwamɔ fe fɛɛ lɛ hiɛkpatamɔ lɛ baagbele gbɛ koni akpata Babilon Kpeteŋkpele lɛ, ni ji apasa jamɔi fɛɛ ni yɔɔ je lɛ mli lɛ hiɛ kwraa. Yehowa kɛbaawo je lɛŋ nɔyelɔi lɛ atsuiiaŋ koni amɛkpata mumɔŋ ajwamaŋ nɛɛ hiɛ. (Kpoj. 17:15-18) Enɛ baafee “amanehulu babaoo” lɛ klɛŋklɛŋ fã.—Mat. 24:21.
14. (a) Mɛni hewɔ abaafo amanehulu babaoo lɛ klɛŋklɛŋ fã lɛ nɔ kuku lɛ? (b) Kɛ́ Yehowa webii lɛ na “gbɔmɔbi lɛ okadi lɛ,” te amɛbaanu shishi amɛha tɛŋŋ?
14 Yesu wie akɛ abaafo gbii ni nakai amanehulu lɛ baaya nɔ lɛ nɔ kuku yɛ “mɛi ni ahala,” ni ji Kristofoi ni afɔ amɛ mu ni yɔɔ shikpɔŋ lɛ nɔ lolo lɛ “ahewɔ.” (Mat. 24:22) Yehowa eŋmɛŋ gbɛ ni beni akpataa apasa jamɔ hiɛ lɛ, akpata Kristofoi ni afɔ amɛ mu lɛ kɛ amɛnanemɛi tooi krokomɛi lɛ ahiɛ afata he. Yesu kɛfata he akɛ, “no gbii lɛ anɔ amanehului lɛ asɛɛ lɛ,” abaana okadii yɛ hulu, nyɔŋtsere, kɛ ŋulamii lɛ amli, kɛkɛ lɛ “gbɔmɔbi lɛ okadi lɛ aaapue yɛ ŋwɛi.” Enɛ baaha shikpɔŋ lɛ nɔ maji lɛ ‘awo yara.’ Ebaŋ lɛ nakai yɛ mɛi ni afɔ amɛ mu ni yɔɔ ŋwɛi hiɛnɔkamɔ lɛ, kɛ amɛnanemɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ agbɛfaŋ. ‘Amɛaakwɛ ŋwɛi ni amɛaahole amɛyitsei anɔ, ejaakɛ amɛkpɔ̃mɔ lɛ ebɛŋkɛ.’—Mat. 24:29, 30; Luka 21:25-28.
15. Mɛɛ nɔ kroko Kristo baatsu dani ebaagbe ekunimyeli lɛ naa?
15 Gbɔmɔ Bi lɛ baatsu nɔ kroko hu dani ebaagbe ekunimyeli lɛ naa. Egba akɛ: “Shi beni gbɔmɔ bi lɛ aaaba yɛ enunyam lɛ mli, ni bɔfoi krɔŋkrɔŋi lɛ fɛɛ aaafata ehe lɛ, no mli lɛ eeeta enunyam sɛi lɛ nɔ; ni aaabua jeŋmaji lɛ fɛɛ naa yɛ ehiɛ, ni eeegbala amɛmli, taakɛ bɔ ni tookwɛlɔ gbalaa gwaŋtɛŋi kɛ abotiai amli lɛ. Ni eeeŋɔ gwantɛŋi lɛ edamɔ eninejurɔ nɔ, shi abotiai lɛ, eeeŋɔ amɛ edamɔ ebɛku nɔ.” (Mat. 25:31-33) Enɛ kɔɔ be ni Kristo aaaba akɛ Kojolɔ ní ebagbála “jeŋmaji lɛ fɛɛ” amli ewo kui enyɔ mli lɛ he: “gwaŋtɛŋi lɛ” damɔ shi kɛha mɛi ni beni aaashɛ nakai be lɛ amɛtsɔɔ akɛ amɛfĩɔ Kristo mumɔŋ nyɛmimɛi (ni ji Kristofoi ni afɔ amɛ mu ni yɔɔ shikpɔŋ lɛ nɔ) lɛ asɛɛ lɛ, ni “abotiai lɛ” damɔ shi kɛha mɛi ni “booo wɔ-Nuŋtsɔ Yesu Kristo sanekpakpa lɛ toi lɛ.” (2 Tes. 1:7, 8) Gwaŋtɛŋi lɛ, ni ji “jalɔi lɛ” nine aaashɛ “naanɔ wala” nɔ yɛ shikpɔŋ lɛ nɔ, shi abotiai lɛ abaakpata amɛhiɛ kwraa kɛya naanɔ.—Mat. 25:34, 40, 41, 45, 46.
Yesu Baagbe Ekunimyeli lɛ Naa
16. Te Kristo ni ji wɔ-Hiɛnyiɛlɔ lɛ baagbe ekunimyeli lɛ naa eha tɛŋŋ?
16 Kɛ́ Kristo sɔo mɛi ni baafata ehe kɛye maŋtsɛmɛi kɛ osɔfoi lɛ anaa egbe naa, ni ekɛ gwaŋtɛŋi lɛ damɔ eninejurɔ nɔ kɛha yiwalaheremɔ lɛ, ebaaya nɔ egbe ekunimyeli lɛ naa. (Kpoj. 5:9, 10; 6:2) Ebaanyiɛ bɔfoi ni yɔɔ hewalɛ waa, ni ŋwanejee ko bɛ he akɛ, enyɛmimɛi ni atée amɛ shi lɛ fata he lɛ ata lɛ hiɛ, ni ebaakpata Satan maŋkwramɔŋ, asraafoi, kɛ jarayeli gbɛjianɔtoi fɛɛ ni yɔɔ shikpɔŋ lɛ nɔ lɛ ahiɛ. (Kpoj. 2:26, 27; 19:11-21) Kristo baakpata Satan nibii agbɛjianɔtoo fɔŋ lɛ hiɛ kɛgbe ekunimyeli lɛ naa. No sɛɛ lɛ, ekɛ Satan kɛ daimonioi lɛ baawo bu kwɔŋkwɔŋ lɛ mli afii akpe.—Kpoj. 20:1-3.
17. Yɛ Afii Akpe Nɔyeli lɛ mli lɛ, nɛgbɛ Kristo baanyiɛ etooi krokomɛi lɛ ahiɛ kɛya, ni mɛni esa akɛ efee wɔfaishitswaa?
17 Beni bɔfo Yohane wieɔ “asafo babaoo” ni jɛ tooi krokomɛi lɛ ateŋ, ni abaabaa amɛyi kɛfo amanehulu kpeteŋkpele lɛ ahe lɛ, egba akɛ, “toobi lɛ ni yɔɔ maŋtsɛsɛi lɛ teŋ lɛ aaalɛ̀ amɛ, ni eeetsɔɔ amɛ gbɛ kɛaatee wala nubui ahe.” (Kpoj. 7:9, 17) Hɛɛ, yɛ Kristo Afii Akpe Nɔyeli lɛ mli fɛɛ lɛ, ebaaya nɔ enyiɛ tooi krokomɛi, ní nuɔ egbee lɛɛlɛŋ lɛ ahiɛ, ni ebaatsɔɔ amɛ gbɛ kɛya naanɔ wala mli. (Nyɛkanea Yohane 10:16, 26-28.) Eba akɛ wɔkɛ anɔkwayeli baaya nɔ anyiɛ wɔ-Hiɛnyiɛlɔ ni ji maŋtsɛ lɛ sɛɛ—amrɔ nɛɛ, aahu kɛyabote jeŋ hee ni Yehowa ewo he shi lɛ mli!
Emlitĩi
• Mɛni Kristo fee beni awó lɛ maŋtsɛ lɛ sɛɛ lɛ?
• Namɛi Kristo kɛtsuɔ nii kɛnyiɛɔ asafoi lɛ ahiɛ?
• Mɛɛ nibii krokomɛi eshwɛ ni Kristo baafee yɛ ebaa be lɛ mli?
• Mɛɛ gbɛ nɔ Kristo baaya nɔ anyiɛ wɔhiɛ yɛ jeŋ hee lɛ mli?
[Nikasemɔ lɛ he Sanebimɔi]
[Mfoniri ni yɔɔ baafa 29]
Satan nibii agbɛjianɔtoo fɔŋ lɛ hiɛkpatamɔ lɛ baaha ana Kristo baa lɛ faŋŋ