Shiɛmɔyaa He Tafãa Krɛdɛɛ Yɛ Bulgaria Wo Yibii

“Nikpamɔ lɛ fá moŋ, shi nitsulɔi lɛ faaa. No hewɔ lɛ nyɛkpaa nikpamɔ nuŋtsɔ lɛ fai, koni ewo nitsulɔi agbɛ kɛba enikpamɔ lɛ mli!”—MAT. 9:37, 38.

KWƐ bɔ ni Yesu wiemɔi nɛɛ kɔɔ shihilɛ ni yɔɔ Bulgaria, ni ji maŋ fɛfɛo ko ni yɔɔ Yuropa wuoyi-bokagbɛ lɛ he jogbaŋŋ! Ehe miihia waa ni aná shiɛlɔi babaoo ni kɛ sanekpakpa lɛ baayaha mɛi ni fa fe akpekpei kpawo ni yɔɔ jɛmɛ lɛ. Shiɛlɔi aaafee 1,700 yɛ Bulgaria, shi amɛnitsumɔ lɛ nyɛɛɛ akpele shikpɔŋkuku muu lɛ fɛɛ. No hewɔ lɛ, Nɔyeli Kuu lɛ kpɛlɛ ni afɔ̃ nine atsɛ Odasefoi ni yɔɔ Yuropa maji srɔtoi lɛ amli ni wieɔ Bulgariabii awiemɔ lɛ koni amɛbafata he ni afã shiɛmɔyaa he ta krɛdɛɛ yɛ afi 2009. Ato ákɛ akɛ otsii kpawo ni baatsɔ “Nyɛyaa nɔ Nyɛsaraa!” Kpokpaa Wulu nɔ Kpee ni afee yɛ Sofia, yɛ August 14-16, 2009 lɛ hiɛ lɛ baafã ta nɛɛ.

Mɛi Babaoo Kɛ Amɛhe Hã

Nyɛmimɛi ni yɔɔ nitsumɔhe nine ni yɔɔ Sofia lɛ ayiŋ fee amɛ kɔshikɔshi yɛ mɛi abɔ ni baajɛ France, Germany, Greece, Italy, Poland, kɛ Spain aba lɛ he. Enɛ baabi ni mɛi lɛ diɛŋtsɛ awo gbɛ ni amɛbaafa kɛya Bulgaria lɛ he nyɔmɔ, ni amɛkɛ amɛhejɔɔmɔ be hu aya shiɛmɔ. Kwɛ miishɛɛ sane ni eji akɛ beni otsii lɛ hoɔ lɛ, mɛi abɔ ni tsɔɔ akɛ amɛkɛ amɛhe baahã lɛ tee hiɛ aahu akɛ aná mɛi ni naa shɛɔ 292 sɔŋŋ! Akɛni mɛi babaoo jɛ amɛsuɔmɔ mli amɛkɛ amɛhe hã hewɔ lɛ, abaanyɛ ajara amɛmli awo Bulgaria maji srɔtoi etɛ mli: Kazanlak, Sandanski, kɛ Silistra. Kpokpaa nɔkwɛlɔi ni yɔɔ Bulgaria lɛ fɔ̃ gbɛgbalɔi kɛ shiɛlɔi ni yɔɔ maŋ lɛ mli lɛ hu nine koni amɛbafata tafãa lɛ he. Beni ahɛleɔ shi lɛ, mɛi 382 ni kɛ amɛhe ehã lɛ kɛ ekãa miishiɛ yɛ shikpɔŋkukuji ni afɔɔ sanekpakpa lɛ shiɛmɔ yɛ mli lɛ mli.

Atsu nyɛmimɛi ni yɔɔ asafoi ni bɛŋkɛ lɛ amli lɛ koni amɛyatao wɔɔhei amɛto gbɔi lɛ. Amɛyahai tsũi kɛ gbɔiatoohei ni nyɔmɔwoo lɛ jara waaa. Nyɛmimɛi ni yɔɔ maŋ lɛ mli lɛ bɔ mɔdɛŋ amɛyakpee mɛi ni jɛ maŋsɛɛ kɛbaa lɛ, ni amɛtsu amɛhiamɔ nibii ahe nii amɛha amɛ. Yɛ Bulgaria maji etɛ lɛ fɛɛ mli lɛ, ayahai he ko ni abaakpe kɛfee asafoŋ kpeei lɛ. Ato gbɛjianɔ koni nyɛmimɛi ni jɛ maŋsɛɛ lɛ akwɛ asafoŋ kpeei ni abaafee lɛ nɔ. Kɛ́ okwɛ bɔ ni maji ni kulɛ Odasefonyo kome po bɛ mli, ni shiɛlɔi 50 kpe yɛ jɛmɛ kɛjie Yehowa yi lɛ, eyɛ miishɛɛ pam.

Ekãa ni mɛi ni jɛ maji krokomɛi anɔ kɛba lɛ kɛtsu nii lɛ sa kadimɔ waa. Kɛ́ eshɛ hulutsoo be yɛ Bulgaria lɛ, jeŋ dɔɔ waa diɛŋtsɛ (kɛyashɛɔ degrees celsius 40). Shi nɔ ko kwraa bɛ ni baatsĩ nyɛmimɛi ni yɔɔ ekãa nɛɛ anaa. Yɛ klɛŋklɛŋ otsii etɛ lɛ mli pɛ lɛ, aje gbɛ aye odase jogbaŋŋ kɛmɔ shi yɛ Silistra, ni ji maŋ ko kɛ emli mɛi ni fa fe 50,000 ní yɔɔ Danube Faa lɛ he lɛ mli. Enɛ ha nyɛmimɛi lɛ kpã shiɛmɔ lɛ mli kɛtee akrowai ni bɛŋkɛ lɛ, aahu kɛyashɛ Tutrakan, ni yɔɔ Silistra anaigbɛ aaafee kilomitai 55 lɛ. Bei pii lɛ, beni abaatswa leebi 9:30 pɛ lɛ, amɛje shiɛmɔ shishi. Kɛ́ amɛjɔɔ amɛhe ni amɛye nɔ ko fioo shwane lɛ, amɛtsaa nɔ aahu kɛyashiɔ gbɛkɛ 7:00, loo nɔ ni fe nakai. Akɛni nyɛmimɛi ni shiɛɔ yɛ Kazanlak kɛ Sandanski lɛ kɛ ekãa ni tamɔ nakai nɔŋŋ tsu nii hewɔ lɛ, amɛ hu  amɛkpã tafãa lɛ mli kɛtee akrowai kɛ maji ni bɔle amɛ lɛ.

Mɛni Anyɛ Atsu?

Odase ni aye yɛ otsii kpawo nɛɛ mli lɛ, jeee shwɛmɔ kwraa. Mɛi ni yɔɔ maji nɛɛ amli lɛ baanyɛ akɛɛ taakɛ mɛi ni hi shi yɛ bɔfoi lɛ abeaŋ lɛ kɛɛ lɛ akɛ, ‘Nyɛha wɔmaŋ lɛ mli eyi obɔ kɛ nyɛtsɔɔmɔ lɛ.’ (Bɔf. 5:28) Odasefoi ni kɛ amɛhe wo tafãa lɛ mli lɛ ha woji tɛtrɛbii aaafee 50,000, ni amɛje Biblia mli nikasemɔi 482 sɔŋŋ shishi. Miishɛɛ sane ji akɛ, beni shɛɔ September 1, 2009 lɛ, atse asafo yɛ Silistra, ni aná kui yɛ Kazanlak kɛ Sandanski fɛɛ. Kɛ́ okwɛ bɔ ni mɛi ni nu sanekpakpa lɛ klɛŋklɛŋ kwraa yɛ tafãa be nɛɛ mli lɛ yaa amɛhiɛ yɛ mumɔŋ lɛ, eyɛ miishɛɛ waa.

Yɛ tafãa lɛ klɛŋklɛŋ otsi lɛ mli lɛ, nyɛmi yoo gbɛgbalɔ krɛdɛɛ ko ni jɛ Spain ni wieɔ Bulgariabii awiemɔ lɛ shiɛ eha yoo ko ni yɔɔ Silistra ni hɔɔ adafitswaa woji yɛ gbɛjegbɛ lɛ he ni atsɛɔ lɛ Karina lɛ. Karina ná wiemɔ lɛ he miishɛɛ ni etee kpeei ni afee lɛ eko. Amrɔ nɔŋŋ lɛ, eha akɛ lɛ bɔi Biblia lɛ kasemɔ. Akɛni ewu heee Nyɔŋmɔ nɔ eyeee hewɔ lɛ, ebi ni akɛ lɛ akase Biblia lɛ yɛ he ko ni mɛi yasharaa shi yɛ. Ebiyei enyɔ lɛ fata ehe ni akɛ amɛ fɛɛ kase Biblia lɛ. Daniela ni ji ebiyoonukpa lɛ ná Biblia mli anɔkwalei lɛ ahe miishɛɛ waa. Ekɛ otsi kome pɛ kane Biblia lɛ Tsɔɔ wolo lɛ, ni amrɔ nɔŋŋ lɛ ekɛ nɔ ni Biblia lɛ tsɔɔ yɛ amagai ni akɛtsuɔ nii yɛ jamɔ mli lɛ he lɛ tsu nii. Kɛkɛ ni ekɛ enanemɛi bɔi anɔkwale lɛ he sanegbaa. Beni etee asafoŋ kpee klɛŋklɛŋ kwraa lɛ sɛɛ otsii etɛ lɛ, ekɛɛ nyɛmi yoo ni kɛ amɛ kaseɔ nii lɛ akɛ: “Minuɔ he akɛ mifata Odasefoi lɛ ahe. Mɛni esa akɛ mafee koni mi hu mabɔi shiɛmɔyaa?” Daniela kɛ enyɛ kɛ enyɛmi yoo bibioo lɛ miiya amɛhiɛ yɛ mumɔŋ.

Yɛ Kazanlak lɛ, be ko lɛ nyɛmi nuu Bulgarianyo ko ni atsɛɔ lɛ Orlin ní fã gbɛ kɛjɛ Italy ni ebawa ni afã ta krɛdɛɛ nɛɛ miinyiɛ kɛya ewɔɔhe lɛ beni ekpa shiɛmɔ. Beni eyaa lɛ, eye oblahii enyɔ komɛi ni ta sɛi ko ni ataa nɔ kɛjɔɔ he lɛ nɔ lɛ odase. Eha amɛ Biblia lɛ Tsɔɔ wolo lɛ eko, ni ekɛ amɛ to gbɛjianɔ koni eyasara amɛ enɔ jetsɛremɔ. Beni eyasara amɛ lɛ, Orlin kɛ Svetomir bɔi Biblia mli nikasemɔ feemɔ ni ekɛ lɛ tsa nɔ enɔ jetsɛremɔ. Yɛ gbii nɛɛhu mli lɛ, Orlin kɛ Svetomir kase nii shii kpaanyɔ. Svetomir kɛɛ akɛ: “Gbii enyɔ ni tsɔ hiɛ dani mikɛ bo baakpe lɛ, misɔle miha Nyɔŋmɔ koni eha male lɛ. Ni miwo lɛ shi akɛ kɛ́ eye ebua mi lɛ, majɔɔ miwala nɔ maha lɛ.” Beni Orlin ku esɛɛ etee Italy lɛ, nyɛmimɛi ni yɔɔ Bulgaria lɛ tee nɔ amɛkɛ Svetomir kase nii, ni Svetomir miihi shi yɛ anɔkwale lɛ naa.

 Mɛi ni kɛ Amɛhe Shãa Afɔle lɛ Náa Jɔɔmɔi Babaoo

Te mɛi ni kɛ amɛ diɛŋtsɛ amɛshika fãa gbɛ kɛyaa maŋ kroko nɔ yɛ amɛhejɔɔmɔ be mli koni amɛyashiɛ sanekpakpa lɛ nuɔ he amɛhaa tɛŋŋ? Asafoŋ onukpa ko ni miisɔmɔ yɛ Spain lɛ ŋma akɛ: “Tafãa krɛdɛɛ nɛɛ ha nyɛmimɛi ni yɔɔ Spain ni shiɛɔ yɛ Bulgariabii awiemɔ mli lɛ fee ekome waa. Ená nyɛmimɛi ni kɛ amɛhe wo mli lɛ anɔ hewalɛ waa.” Nyɛmi nuu ko kɛ eŋa ni amɛjɛ Italy lɛ ŋma akɛ: “Nyɔɔŋ nɛɛ ji nyɔɔŋ ko ni wɔmii shɛ wɔhe fe fɛɛ yɛ wɔshihilɛ mli!” Amɛkɛ shi sɛɛ akɛ: “Tafãa nɛɛ ha wɔshihilɛ tsake! Amrɔ nɛɛ wɔnifeemɔ etsake.” Gbalashihilɛ mli hefatalɔi nɛɛ kɛ hiɛdɔɔ bɔi he susumɔ kɛji amɛbaanyɛ amɛfã kɛyahi Bulgaria kwraa koni amɛyasɔmɔ yɛ he ni shiɛlɔi ahe ehia waa yɛ. Nyɛmi yoo oshija ko ni jɛ Spain ni ji daa gbɛgbalɔ ni atsɛɔ lɛ Carina lɛ kɛ ehe wo tafãa nɛɛ mli yɛ Silistra. No sɛɛ lɛ, ekpa nitsumɔ ni etsuɔ yɛ Spain lɛ, ni efã kɛyahi Bulgaria koni eyawa asafo hee ni atse yɛ Silistra lɛ. Ebua shika naa bɔ ni sa ni baaha enyɛ ehi Bulgaria afi kome. Carina wie yɛ eyiŋkpɛɛ lɛ he akɛ: “Eŋɔɔ minaa waa akɛ Yehowa eha miisɔmɔ yɛ biɛ, ni ji Bulgaria, ni mishwelɛ ji akɛ manyɛ mahi shi be kplaŋŋ. Amrɔ nɛɛ mikɛ mɛi enumɔ kaseɔ Biblia lɛ, ni amɛteŋ mɛi etɛ baa kpeei.”

Nyɛmi yoo ko ni jɛ Italy lɛ sumɔ ni ekɛ ehe awo tafãa lɛ mli, shi akɛni ebɔi nitsumɔ ni etsuɔ lɛ etsɛko hewɔ lɛ, ebɛ hejɔɔmɔ gbii ko kwraa. Akɛni etswa efai shi waa akɛ ekɛ ehe baawo mli hewɔ lɛ, ebi ni aha lɛ nyɔɔŋ kome hejɔɔmɔ ni awooo lɛ nyɔmɔ, ni efee klalo po akɛ ebaakpa nitsumɔ lɛ kɛ́ aŋɔɔɔ enibimɔ lɛ nɔ ahaaa lɛ. Nyɛmi yoo lɛ naa kpɛ ehe beni enitsumɔtsɛ lɛ kɛɛ lɛ akɛ: “Ojogbaŋŋ, shi maŋmɛ bo gbɛ kɛ́ ofee nɔ kome nɛɛ oha mi: Okɛ Bulgaria he postcard amaje mi.” Ŋwanejee ko bɛ he akɛ, nyɛmi yoo lɛ nu he akɛ Yehowa eha esɔlemɔi lɛ ahetoo.

Nyɛmi yoo ko ni ji oblayoo ni atsɛɔ lɛ Stanislava ni jɛ Varna, ni ji maŋ ko ni yɔɔ Bulgaria, ni kɛ ebe fɛɛ tsuɔ nitsumɔ ko ni awoɔ lɛ nyɔmɔ babaoo lɛ bi gbɛ koni ekɛ ehe awo tafãa lɛ mli yɛ Silistra. Beni ena bɔ ni gbɛgbalɔi babaoo ni ejɛ he ko shɔŋŋ kɛba emaŋ koni amɛbashiɛ sanekpakpa lɛ ená miishɛɛ lɛ, no ha efó. Ni ebɔi eyiŋ susumɔ kɛji heloonaa nitsumɔ ni ekɛfee eshihilɛ mli nitsumɔ titri lɛ tsɔɔ akɛ ekɛ ewala miitsu nii jogbaŋŋ. Otsii enyɔ sɛɛ beni eku esɛɛ etee shĩa lɛ, ekpa enitsumɔ lɛ ni ebatsɔ daa gbɛgbalɔ. Bianɛ lɛ, enuɔ he akɛ eyɛ miishɛɛ waa, ejaakɛ eekai e-Bɔlɔ lɛ yɛ eblayeiaŋ.—Jaj. 12:1.

Mɛɛ jɔɔmɔ eji nɛkɛ akɛ wɔkɛ ekãa baatsu nii yɛ Yehowa sɔɔmɔ lɛ mli. Kɛ́ mɔ ko kɛ ebe kɛ enyɛmɔ fɛɛ tsu nitsumɔ ni he hiaa ni ji sanekpakpa lɛ shiɛmɔ kɛ ehe nitsɔɔmɔ nitsumɔ lɛ, no tsɔɔ akɛ eetsu nitsumɔ ni he hiaa fe fɛɛ lɛ. Ani gbɛi komɛi yɛ ni obaanyɛ otsɔ nɔ olɛɛ gbɛfaŋnɔ ni otsuɔ yɛ sɔɔmɔ nitsumɔ ni hereɔ wala nɛɛ mli? Ekolɛ hei komɛi yɛ omaŋ lɛ nɔ ni shiɛlɔi ahe ehia yɛ. Ani obaanyɛ ofã kɛyahi jɛmɛ? Aloo ekolɛ obaasusu kɛji obaanyɛ okase wiemɔ kroko ni okɛye obua mɛi komɛi ni yɔɔ omaŋ lɛ nɔ ni Biblia mli anɔkwalei ahe kumai miiye amɛ lɛ. Obaanyɛ oná nɔmimaa akɛ Yehowa baajɔɔ tsakemɔ fɛɛ tsakemɔ ni obaafee koni okɛlɛɛ osɔɔmɔ nitsumɔ lɛ mli lɛ nɔ lɛ babaoo.—Abɛi 10:22.

[Akrabatsa/Mfoniri ni yɔɔ baafa 32]

Gbi ko ni Hiɛ Kpaŋ Nɔ

Mɛi ni jɛ Yuropa maji krokomɛi anɔ ni amɛkɛ amɛhe bawo tafãa krɛdɛɛ lɛ mli yɛ Bulgaria lɛ ateŋ mɛi babaoo kpɛ mli amɛto akɛ amɛbaaya “Nyɛyaa nɔ Nyɛsaraa!” Kpokpaa Wulu nɔ Kpee ni abafee yɛ Sofia lɛ. Nyɛmimɛi ni jɛ maji srɔtoi anɔ ni nyɛmimɛi ni yɔɔ Bulgaria lɛ kɛshara lɛ wo amɛ hewalɛ waa. Beni Nyɛminuu Geoffrey Jackson ni ji Nɔyeli Kuu lɛ mlinyo lɛ jie New World Translation of the Holy Scriptures lɛ kpo yɛ Bulgariabii awiemɔ mli lɛ, mɛi 2,039 ni yɔɔ kpee lɛ shishi lɛ amii shɛ amɛhe oookɛɛ nɔ ko! Mɛi fɛɛ ni yɔɔ kpee lɛ shishi nakai Sohaa lɛ kɛ be kplaŋŋ tswa amɛdɛŋ waa kɛtsɔɔ akɛ amɛhiɛ esɔ enɛ waa. Amɛteŋ mɛi babaoo amii shɛ amɛhe aahu akɛ amɛhiŋmɛiiaŋ kpala nu. Biblia ni atsɔɔ shishi jogbaŋŋ ni eshishinumɔ waaa nɛɛ baaye abua Bulgariabii ni yɔɔ tsui kpakpa lɛ koni amɛle Yehowa.

[Shikpɔŋ he mfoniri ni yɔɔ baafa 30, 31]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

BULGARIA

SOFIA

Sandanski

Silistra

Kazanlak

[Mfonirii ni yɔɔ baafa 31]

Odase ni aye yɛ otsii kpawo nɛɛ mli lɛ, jeee shwɛmɔ kwraa