‘Eyeɔ Ebuaa Mi ni Mishɛɔ Mɛi Atsui He’

BE KO ni eho lɛ, afee majimaji ateŋ henaabuamɔ ko kɛsusu adesa shihilɛ mli nibii komɛi ahe yɛ Porto Alegre, ni ji maŋ ko ni yɔɔ Brazil wuoyigbɛ lɛ mli. Mɛi akpei nyɔŋmai abɔ ni jɛ maji 135 nɔ tee henaabuamɔ nɛɛ shishi. Kɛ́ mɛi lɛ tee hejɔɔmɔ lɛ, Odasefoi komɛi ni jɛ asafo ko ni yɔɔ Porto Alegre lɛ mli lɛ yaninaa mɛi ni tee henaabuamɔ lɛ shishi lɛ ateŋ mɛi babaoo ni amɛkɛ amɛ gbaa Maŋtsɛyeli shɛɛ sane ni yɔɔ Biblia lɛ mli lɛ he sane. Te amɛfeɔ tɛŋŋ amɛkɛ mɛi nɛɛ gbaa sane lɛ?

Daa gbɛgbalɔ ko ni atsɛɔ lɛ Elizabete lɛ tsɔɔ mli akɛ, “Wɔkɛ Good News for People of All Nations wolo lɛ tsuɔ nii.” Ekɛfata he akɛ: “Mɛi nɛɛ ateŋ mɛi babaoo nuko Maŋtsɛyeli lɛ he sanekpakpa lɛ dã, shi amɛkɛ miishɛɛ boɔ wɔshɛɛ sane lɛ toi. Wɔkɛ mɛi ni jɛ Bolivia, China, France, India, Israel, kɛ Nigeria lɛ gba sane. Yɛ amɛteaŋ mɛi komɛi agbɛfaŋ lɛ, wɔyɛ Biblia kasemɔ woji lɛ yɛ amɛ diɛŋtsɛ amɛwiemɔi amli, ni amɛkɛ miishɛɛ ŋɔ.”

Yɛ Mexico lɛ, gbɛgbalɔ ko ni atsɛɔ lɛ Raúl lɛ kɛ wolo nɛɛ tsuɔ nii, ni eyeɔ omanye waa. Be ko lɛ, etsi ebɛŋkɛ Arabia nuu ko ni eye afii 80 ni ŋa gbo etsɛko. Beni nuu lɛ kane Maŋtsɛyeli shɛɛ sane lɛ yɛ Arabic wiemɔ mli yɛ wolo lɛ mli lɛ sɛɛ lɛ, miishɛɛ ni ená lɛ sɔŋŋ ha ehiŋmɛiiaŋ kpala nu. Mɛni hewɔ? Beni ekane shiwoo ni Nyɔŋmɔ kɛha akɛ gbele ehiŋ shi dɔŋŋ, taakɛ ejeɔ kpo yɛ Kpojiemɔ 21:3, 4 lɛ yɛ lɛ diɛŋtsɛ emaŋ wiemɔ mli lɛ, eta etsuiŋ waa. Be kroko beni Raúl yeɔ odase beni enyiɛɛɛ shiɛmɔ nɔ lɛ, ekɛ nuu ko ní wieɔ Portugalbii awiemɔ kpe. Nakai nuu lɛ hu binuu ni esumɔɔ esane waa lɛ egbo. Raúl ha ekane wolo lɛ baafa ni yɔɔ Portugalbii awiemɔ mli lɛ. Beni nuu lɛ kane egbe naa lɛ, ekɛɛ eesumɔ ni ele nibii babaoo kɛjɛ Biblia lɛ mli, ni ekpɛlɛ ni akɛlɛ bɔi Biblia lɛ kasemɔ.

Raúl kɛ Good News for People of All Nations wolo lɛ etsu nii kɛye mɛi ni wieɔ Armenian, Chinese, Blɔfo, French, German, Hindi, Korean, Mixe, Persian, Russian, kɛ Zapotec lɛ odase. Ekɛɛ akɛ: “Mina sɛɛnamɔ ni yɔɔ wolo nɛɛ kɛnitsumɔ yɛ shiɛmɔ nitsumɔ lɛ mli lɛ he. Eyeɔ ebuaa mi ni mishɛɔ mɛi ni minyɛɛɛ mawie amɛmaŋ wiemɔ lɛ po atsui he.”

Akɛni mɛi babaoo miifã kɛmiiya maŋsɛɛ koni amɛyahi jɛmɛ hewɔ lɛ, ewaaa kwraa akɛ wɔkɛ mɛi ni wieɔ wiemɔ kroko baakpe. Kɛ́ wɔkɛ Good News for People of All Nations wolo lɛ tsu nii lɛ, wɔbaanyɛ wɔkɛ Maŋtsɛyeli shɛɛ sane lɛ aha amɛ. Ani ehiɔ ohe be fɛɛ be?

[Mfonirii ni yɔɔ baafa 32]

Raúl kɛ wolo ni yeɔ buaa lɛ koni eshɛ mɛi atsui he lɛ