Ye Obua Gbekɛbii Koni Amɛle Yehowa Asafo lɛ Jogbaŋŋ

GBEKƐBII sumɔɔ ni amɛkase nii. Bo lɛ susumɔ sanebimɔi ni ekolɛ Israel gbekɛbii lɛ baabi yɛ klɛŋklɛŋ Hehoo ni aye yɛ Mizraim lɛ he lɛ he okwɛ: ‘Mɛni hewɔ agbe toobi lɛ?’ ‘Mɛni hewɔ Ataa kɛ lá dikiɔ shinaatsei lɛ ahe lɛ?’ ‘Nɛgbɛ wɔyaa?’ Fãmɔ ni Yehowa kɛha Israel tsɛmɛi lɛ tsɔɔ akɛ enyaa sanebimɔi ni tamɔ nɛkɛ lɛ ahe. Yehowa kɛɛ amɛ yɛ Hehoo ni amɛbaaye yɛ sɛɛ mli lɛ he akɛ: “Kɛ aaaba mli akɛ nyɛbii aaabi nyɛ akɛ: Te nyɛjamɔ nɛɛ shishiŋ? lɛ, nyɛkɛɛa akɛ; Yehowa Hehoo lɛ afɔle ni, ejaakɛ beni etswia Mizraimbii anii lɛ, eho Israelbii lɛ ashĩai lɛ ahe yɛ Mizraim, ni ejie wɔshĩai lɛ.” (2 Mose 12:24-27) Sɛɛ mli lɛ, Yehowa kai Israel fɔlɔi bɔ ni ehe hiaa ni amɛha amɛbii lɛ asanebimɔi ni kɔɔ “akpɔi kɛ mlai” ní Yehowa wo lɛ he lɛ ahetoo.—5 Mose 6:20-25.

Ekã shi faŋŋ akɛ Yehowa miisumɔ ni gbekɛbii lɛ aná saji ni amɛbiɔ yɛ anɔkwa jamɔ he lɛ ahetoo ni baaha amɛtsui anyɔ  amɛmli—hetoi ni baakanya amɛ koni amɛsumɔ Yehowa ákɛ amɛ-Nyɔŋmɔ kɛ amɛ-Yiwalaherelɔ. Ŋmɛnɛ lɛ, Yehowa yɛ shwelɛ ni tamɔ nakai nɔŋŋ kɛha gbekɛbii. Yelikɛbuamɔ ni fɔlɔi kɛaaha amɛbii koni amɛle Yehowa asafo lɛ jogbaŋŋ, ni amɛle bɔ ni amɛaafee amɛná asafo lɛ gbɛjianɔtoi ahe sɛɛ lɛ ji gbɛ kome ni amɛbaanyɛ amɛtsɔ nɔ amɛdũ suɔmɔ kɛha Nyɔŋmɔ kɛ ewebii lɛ awo amɛbii lɛ atsuiiaŋ. No hewɔ lɛ ha wɔsusu gbɛi komɛi ni abaanyɛ atsɔ nɔ aye abua gbekɛbii koni amɛkase Nyɔŋmɔ asafo lɛ he nii babaoo lɛ he.

Asafo ni Nyɛyɔɔ Mli Lɛ

Esa akɛ gbekɛbii lɛ ale asafo ni nyɛweku lɛ yɔɔ mli lɛ jogbaŋŋ. Bɔni afee ni nyɛnyɛ nyɛfee enɛ lɛ, ákɛ fɔlɔi lɛ esa akɛ nyɛkɛ nyɛbii lɛ aya Kristofoi akpeei fɛɛ. Kɛ́ nyɛfee nakai lɛ, nyɛmiikase bɔ ni Yehowa fã Israelbii lɛ akɛ amɛfee lɛ, beni efã amɛ akɛ: ‘Ha ni maŋ lɛ, hii kɛ yei kɛ gbekɛbii lɛ abua amɛhe naa, koni amɛnu, ni amɛkase, ni amɛshe Yehowa, nyɛ-Nyɔŋmɔ lɛ, gbeyei, ni amɛjwɛŋ nɔ ni amɛye nɛkɛ mla nɛɛ mli wiemɔi lɛ fɛɛ nɔ, ni amɛbii ni leko lɛ hu anu ni amɛkase, koni amɛshe Yehowa, nyɛ-Nyɔŋmɔ lɛ, gbeyei.’—5 Mose 31:12, 13.

Gbekɛbii baanyɛ akase Yehowa Wiemɔ lɛ kɛjɛ amɛgbekɛbiiashi tɔ̃ɔ. Bɔfo Paulo wie yɛ Timoteo he akɛ: “Ogbekɛbiiashi ojɛ ole ŋmalɛi krɔŋkrɔŋi lɛ.” (2 Tim. 3:15) Yɛ kpeei ni afeɔ yɛ Maŋtsɛyeli Asa lɛ nɔ lɛ ashishi lɛ, gbekɛbii bibii po baanyɛ anu nɔ ni akaseɔ lɛ shishi, ni amɛbaanyɛ amɛle bɔ ni alaa Maŋtsɛyeli lalai lɛ hu. Amɛkaseɔ bɔ ni akɛ Biblia lɛ kɛ Biblia kasemɔ woji lɛ tsuɔ nii ahaa, kɛ bɔ ni esa akɛ amɛhiɛ woji nɛɛ jogbaŋŋ  amɛha lɛ yɛ jɛmɛ. Kɛfata he lɛ, amɛbaana su ni kadiɔ Kristo anɔkwa sɛɛnyiɛlɔi lɛ—ni ji anɔkwa suɔmɔ—ni ajieɔ lɛ kpo yɛ wɔkpeei lɛ ashishi. Yesu kɛɛ akɛ: “Kitã hee miŋɔhaa nyɛ, akɛ nyɛsumɔ nyɛhe; taakɛ bɔ ni misumɔ nyɛ lɛ, nakai nyɛ hu nyɛsumɔa nyɛhe. Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yoh. 13:34, 35) Gbekɛbii lɛ baaná suɔmɔ ni mli wa ni ajieɔ lɛ kpo yɛ Maŋtsɛyeli Asa lɛ nɔ, kɛ bɔ ni jɛmɛ yɔɔ shweshweeshwe lɛ he miishɛɛ, ni no baaye abua amɛ koni amɛya Kristofoi akpeei amɛwala beaŋ fɛɛ.

Kɛ́ nyɛkɛfee nyɛsu akɛ nyɛbaashɛ Maŋtsɛyeli Asa lɛ nɔ mra, ni nyɛbaamɛ fioo kɛ́ akpa kpee lɛ, ebaaha nyɛbii lɛ aná hegbɛ amɛkɛ mɛi abɔ. Yɛ nɔ najiaŋ ni nyɛbaaha amɛkɛ gbekɛbii krokomɛi pɛ abɔ lɛ, mɛni hewɔ nyɛkɛ amɛ ŋaaa nyɛmimɛi srɔtoi fɛɛ? Kɛ́ obii bibii lɛ ná le mɛi ni edara lɛ jogbaŋŋ lɛ, amɛbaana akɛ amɛyɛ niiashikpamɔi babaoo, ni amɛyɛ nilee. Taakɛ Zakaria ni hi shi yɛ blema, ni tsɔɔ anɔkwa Nyɔŋmɔ lɛ he nii lɛ ná oblanyo fioo Uzia, ni ji Yuda maŋtsɛ lɛ nɔ hewalɛ kpakpa lɛ, nakai nɔŋŋ ŋmɛnɛ lɛ, mɛi ni kɛ afii babaoo esɔmɔ Yehowa yɛ anɔkwayeli mli lɛ náa gbekɛbii anɔ hewalɛ kpakpa. (2 Kron. 26:1, 4, 5) Beni nyɛyɔɔ Maŋtsɛyeli Asa lɛ nɔ lɛ, nyɛbaanyɛ nyɛtsɔɔ amɛ nɔ hewɔ ni ayɔɔ wojiatoohe, adafitswaa tao, kɛ nibii krokomɛi ni yɔɔ jɛmɛ lɛ.

Jeŋ Muu Fɛɛ Asafo Lɛ

Esa akɛ gbekɛbii lɛ ale akɛ asafo ni nyɛyɔɔ mli lɛ fata asafoi ni fa fe 100,000 ni yɔɔ jeŋ fɛɛ lɛ ahe. Tsɔɔmɔ amɛ jeŋ muu fɛɛ asafo lɛ fãi srɔtoi lɛ mli, bɔ ni etsuɔ nii ehaa, kɛ nɔ ni gbekɛbii baanyɛ afee kɛfĩ asafo lɛ nitsumɔi lɛ asɛɛ. Ha amɛna nɔ hewɔ ni okɛ miishɛɛ kpaa kpokpaa nɔ kpeei, kpokpai wuji anɔ kpeei, kɛ kpokpaa nɔkwɛlɔ lɛ saramɔ lɛ gbɛ lɛ.—Kwɛmɔ akrabatsa ni ji “Saji Komɛi ni Nyɛbaanyɛ Nyɛsusu He Beni Nyɛfeɔ Weku Jamɔ Lɛ,” ni yɔɔ baafa 28 lɛ.

Kɛ́ nyɛná hegbɛ lɛ, nyɛfɔ̃a nɔkwɛlɔi gbɛfalɔi, maŋsɛɛ sanekpakpa shiɛlɔi, Betel weku lɛ mlibii, kɛ be fɛɛ sɔɔlɔi krokomɛi nine koni amɛkɛnyɛ abaye nii yɛ nyɛshĩa lɛ. Nyɛkasusua akɛ amɛbɛ deka kɛha gbekɛbii. Be fɛɛ sɔɔlɔi lɛ miibɔ mɔdɛŋ akɛ amɛbaakase Yesu, mɔ ni ha gbekɛbii ba eŋɔɔ, ni ekɛ amɛ gba sane lɛ. (Mar. 10:13-16) Kɛ́ nyɛbii lɛ nu Yehowa tsuji nɛɛ aniiashikpamɔi, ni amɛyɔse miishɛɛ ni amɛnáa yɛ sɔɔmɔ krɔŋŋ ni amɛkɛhaa lɛ mli lɛ, ekolɛ amɛ hu amɛkɛ be fɛɛ sɔɔmɔ nitsumɔ lɛ baafee oti yɛ amɛshihilɛ mli.

Ákɛ weku lɛ, mɛni ekoŋŋ nyɛbaanyɛ nyɛfee kɛye nyɛbua nyɛbii lɛ koni amɛle Yehowa asafo lɛ jogbaŋŋ? Naa ŋaawoi komɛi: Nyɛtoa gbɛjianɔ kɛkasea Jehovah’s Witnesses—Proclaimers of God’s Kingdom wolo lɛ. Nyɛmaa hekɛafɔleshaa, heshibaa, kɛ anɔkwayeli ni Yehowa tsuji lɛ jie lɛ kpo lɛ nɔ mi. Nyɛhaa amɛlea bɔ ni Yehowa kɛ amɛ tsu nii kɛgbɛ sanekpakpa lɛ eshwã shikpɔŋ lɛ nɔ fɛɛ lɛ. Nyɛkɛ Yehowa asafo lɛ vidioi lɛ atsua nii kɛtsɔɔ amɛ nibii ni he hiaa ni wɔbaanyɛ wɔkase kɛjɛ nibii komɛi ni ba yɛ blema, kɛ ŋmɛnɛ beaŋ lɛ amli. Kɛ́ nyɛbaanyɛ nyɛfee nakai lɛ, nyɛyasaraa nitsumɔhe nine kɛ Betel shĩa ni yɔɔ nyɛmaŋ lɛ mli lɛ, loo nɔ ni yɔɔ maji krokomɛi anɔ lɛ po. Kɛ́ nyɛyasara hei nɛɛ, ebaaha nyɛbii lɛ ale bɔ ni ato Yehowa asafo lɛ fã ni yɔɔ shikpɔŋ lɛ nɔ lɛ he gbɛjianɔ koni tsulɔ anɔkwafo kuu lɛ anyɛ aha nyɛmimɛi ni yɔɔ jeŋ fɛɛ lɛ mumɔŋ niyenii, ni amɛkɛ gbɛtsɔɔmɔ aha amɛ taakɛ afee yɛ klɛŋklɛŋ afii 100 Ŋ.B. lɛ.—Mat. 24:45-47; Bɔf. 15:22-31.

Nyɛhaa Gbekɛbii lɛ Ateŋ Mɔ Fɛɛ Mɔ Aná He Sɛɛ

Kɛ́ nyɛmiitsɔɔ nyɛbii lɛ anii lɛ, nyɛhaa gbɛ nɔ ni Yesu tsɔ etsɔɔ ebɔfoi lɛ anii lɛ ahia nyɛjwɛŋmɔ mli. Be ko lɛ ekɛɛ amɛ akɛ: “Miyɛ nii pii lolo ni makɛɛ nyɛ; shi nyɛnyɛŋ mli nyɛmɔ amrɔ nɛɛ.” (Yoh. 16:12) Yesu etsɔɔɔ  ekaselɔi lɛ nibii pii yɛ be kome mli. Moŋ lɛ, etsɔɔ amɛ anɔkwalei ni he hiaa lɛ fiofio, koni amɛnyɛ amɛnu shishi jogbaŋŋ. No hewɔ lɛ, nyɛ hu nyɛkatsɔa nyɛbii lɛ nibiii pii yɛ be kome mli. Kɛ́ nyɛtee nɔ nyɛtsɔɔ amɛ nibii ni kɔɔ asafo lɛ he fiofio lɛ, amɛbaaná he miishɛɛ, ni no baaha amɛsumɔ be fɛɛ be akɛ amɛbaakase nɔ ko yɛ Kristofoi asafo lɛ he. Beni nyɛbii lɛ ashihilɛ tsakeɔ lɛ, nyɛbaanyɛ nyɛtĩ nɔ ni nyɛkase momo lɛ mli, ni nyɛkɛ nibii krokomɛi hu afata he.

Kristofoi asafo lɛ yeɔ ebuaa ni wekukpãa ni kã wɔ kɛ Nyɔŋmɔ teŋ lɛ mli waa, ni eyeɔ ebuaa gbekɛbii ni kɛ amɛhe woɔ asafo lɛ mli nifeemɔi amli jogbaŋŋ lɛ hu koni amɛnyɛ amɛwu amɛshi Satan je lɛ. (Rom. 12:2) Wɔyɛ hekɛnɔfɔɔ akɛ nyɛkɛ miishɛɛ babaoo baaye abua nyɛbii lɛ koni amɛle Yehowa asafo lɛ jogbaŋŋ. Eba akɛ Yehowa aaajɔɔ amɛ koni amɛya nɔ amɛhi asafo lɛ mli, ni amɛya nɔ amɛye Nyɔŋmɔ ni yɔɔ suɔmɔ, ni wɔsɔmɔɔ lɛ lɛ anɔkwa.

[Akrabatsa/Mfoniri ni yɔɔ baafa 28]

Saji Komɛi ni Nyɛbaanyɛ Nyɛsusu He Beni Nyɛfeɔ Weku Jamɔ Lɛ

Naa saji komɛi ni kɔɔ asafo lɛ he ni nyɛbaanyɛ nyɛsusu he beni nyɛfeɔ gbɛkɛ Weku Jamɔ lɛ.

▪ Nyɛsusua asafo ni nyɛyɔɔ mli lɛ yinɔsane he. Mɛɛ be ato shishi, ni yɛ mɛɛ gbɛ nɔ? Mɛɛ Maŋtsɛyeli Asai srɔtoi anɔ nyɛsafo lɛ ekpe yɛ? Mɛni hewɔ nyɛfɔ̃ɔɔ nyɛmi ko ni etsɛ yɛ nyɛsafo lɛ mli lɛ nine koni ebafata nyɛhe kɛsusu sane nɛɛ he, ni eha saji ni nyɛbii lɛ baabi lɛ ahetoo?

▪ Nyɛtsɔa amɛ yiŋtoo ni yɔɔ asafoŋ kpee srɔtoi kɛ henaabuamɔi wuji lɛ asɛɛ, kɛ bɔ ni gbekɛbii lɛ baanyɛ aná he sɛɛ.

▪ Nyɛsusua yiŋtoo hewɔ ni Yehowa asafo lɛ to skul srɔtoi lɛ ashishi lɛ he. Nyɛgbaa niiashikpamɔi ni tsɔɔ yibii kpakpai ni mɛi ni egbe skul srɔtoi nɛɛ anaa lɛ woɔ lɛ he sane.

▪ Nyɛyea nyɛbuaa gbekɛbii lɛ koni amɛna sɛɛnamɔ ni yɔɔ he akɛ amɛaashiɛ sanekpakpa lɛ daa. Nyɛhaa amɛnaa nɔ ni amɛbaafee koni akɛ amɛ akɔntaabuu lɛ afata jeŋ muu fɛɛ akɔntaabuu ni yɔɔ Yearbook of Jehovah’s Witnesses lɛ mli lɛ he.

▪ Nyɛsusua be fɛɛ sɔɔmɔ nitsumɔ lɛ fãi srɔtoi ni gbekɛbii ni yɔɔ Yehowa asafo lɛ mli lɛ baanyɛ amɛkɛ amɛhe awo mli lɛ he. Saji ni baanyɛ aye abua nyɛ waa yɛ sane nɛɛ he yɛ Ato Wɔhe Gbɛjianɔ Koni Wɔfee Yehowa Suɔmɔnaa Nii wolo lɛ yitso 10 lɛ mli.

▪ Nyɛyea nyɛbuaa gbekɛbii lɛ ni amɛnu nɔ hewɔ ni afeɔ nii yɛ gbɛi pɔtɛi komɛi anɔ yɛ asafo lɛ mli lɛ shishi. Nyɛtsɔa amɛ nɔ hewɔ ni esaaa akɛ amɛtsiɔ amɛhe kɛjɛɔ Yehowa asafo lɛ he yɛ gbɛ ko kwraa nɔ lɛ. Nyɛtsɔa amɛ nɔ ni esa akɛ amɛfee koni amɛkɛ asafoŋ onukpai lɛ agbɛtsɔɔmɔ lɛ atsu nii bɔni afee ni nɔ fɛɛ nɔ aya nɔ jogbaŋŋ yɛ asafo lɛ mli.

[Mfoniri]

Kɛ́ obii lɛ kɛ mɛi ni kɛ afii babaoo esɔmɔ Yehowa lɛ fee nanemɛi lɛ, amɛbaaná he sɛɛ

[Mfonirii ni yɔɔ baafa 26]

Taakɛ fɔlɔi ni hi blema Israel lɛ fee lɛ, fɔlɔi ni yɔɔ ŋmɛnɛ lɛ bɔɔ mɔdɛŋ akɛ kɛ́ amɛbii lɛ bi amɛ Yehowa asafo lɛ he saji lɛ, amɛbaaha amɛ hetoi ni baaha amɛtsui anyɔ amɛmli