Sanebimɔi ni Jɛ Kanelɔi Adɛŋ

Yesu kɛɛ etoibolɔi lɛ akɛ: “Nyɛhia kɛwulaa shi, tamɔ bɔ ni nyɛtsɛ ni yɔɔ ŋwɛi lɛ hi kɛwula shi lɛ.” Ŋmɛnɛ lɛ, mɛɛ gbɛ nɔ adesai baanyɛ ‘ahi kɛwula shi’?—Mat. 5:48.

Dani wɔbaaná sanebimɔ nɛɛ hetoo lɛ, esa akɛ wɔnu bɔ ni akɛ wiemɔi ni ji “hi kɛwula shi” kɛ “emuuyeli” tsuɔ nii ahaa yɛ Biblia lɛ mli lɛ shishi. Jeee be fɛɛ be ní Biblia lɛ baawie nɔ ko he akɛ ‘ehi kɛwula shi’ lɛ ni etsɔɔ akɛ kpa ko kpa ko bɛ he. Eji anɔkwale akɛ Yehowa hi kɛwula shi ni kpa ko bɛ ehe. Adesai loo nibii baanyɛ ahi kɛwula shi yɛ gbɛ ko nɔ. Bei pii lɛ Hebri kɛ Hela wiemɔi ni atsɔɔ shishi yɛ Biblia lɛ mli akɛ “hi kɛwula shi” lɛ tsɔɔ nɔ ko ni “yɛ pɛpɛɛpɛ,” “eshɛ bɔ ni sa,” loo “kpá ko bɛ he” yɛ bɔ ni mɔ ko ni yɔɔ hegbɛ lɛ baatsɔɔ lɛ naa. Yɛ wɔdaa gbi wiemɔ mli lɛ, akɛ wiemɔ nɛɛ tsuɔ nii kɛ́ nɔ ko shɛɔ yiŋtoo hewɔ ni wɔkɛtsuɔ nii lɛ he. Ákɛ nɔkwɛmɔnɔ lɛ, wɔkɛɔ akɛ “gbɛjianɔtoo ko eye emuu.”

Beni abɔ Adam kɛ Hawa lɛ, no mli lɛ amɛhi kɛwula shi yɛ jeŋba, mumɔ, kɛ gbɔmɔtso mli. Amɛye emuu yɛ yiŋtoo hewɔ ni amɛ-Bɔlɔ lɛ bɔ amɛ lɛ naa. Toigbele hewɔ lɛ, amɛnyɛɛɛ amɛshɛ nɔ ni ataoɔ yɛ amɛdɛŋ lɛ he, ni no hewɔ lɛ emuuyeli ŋmɛɛ amɛ kɛ amɛshwiei lɛ. No hewɔ lɛ, Adam nɔ tsɔ ni esha tsɛŋe adesai, ni amɛtɔ fã ni amɛgboiɔ lɛ.—Rom. 5:12.

Shi taakɛ Yesu ha efee faŋŋ yɛ Gɔŋ nɔ Shiɛmɔ lɛ mli lɛ, adesai ni yeee emuu po baanyɛ ahi kɛwula shi yɛ gbɛ ko nɔ. Yɛ nakai shiɛmɔ lɛ mli lɛ, etsɔɔ nɔ ni haa mɔ ko hiɔ kɛwulaa shi—no ji suɔmɔ. Suɔmɔ nɛɛ tamɔ suɔmɔ ni Nyɔŋmɔ jieɔ lɛ kpo etsɔɔ adesai lɛ. Yesu kɛɛ akɛ: “Nyɛsumɔa nyɛhenyɛlɔi, nyɛjɔɔa mɛi ni lomɔɔ nyɛ, nyɛfea mɛi ni nyɛɔ nyɛ lɛ ekpakpa, ni nyɛsɔlea nyɛhaa mɛi ni haoɔ nyɛ ni amɛwaa nyɛ yi lɛ; koni nyɛtsɔmɔ nyɛtsɛ ni yɔɔ ŋwɛi lɛ bii; shi ehaa ehulu teɔ shi yɛ mɛi fɔji kɛ mɛi kpakpai anɔ, ni ehaa nugbɔ nɛɔ yɛ jalɔi kɛ mɛi ni bɛ jalɛ lɛ anɔ.” (Mat. 5:44, 45) Kɛ́ Yesu kaselɔi lɛ jie suɔmɔ ni tamɔ nɛkɛ kpo lɛ, etsɔɔ akɛ amɛmiikase Nyɔŋmɔ nɔkwɛmɔnɔ ni hi kɛwula shi lɛ.

Ŋmɛnɛ lɛ, Yehowa Odasefoi ni yɔɔ jeŋ fɛɛ lɛ bɔɔ mɔdɛŋ akɛ amɛbaajie suɔmɔ ni nɔ bɛ nɛɛ kpo amɛtsɔɔ mɛi krokomɛi. Amɛmiisumɔ ni amɛye amɛbua mɛi ni jɛ shihilɛi, wekui, kɛ jamɔi srɔtoi amli lɛ koni amɛná Biblia mli anɔkwale lɛ. Amrɔ nɛɛ Odasefoi lɛ kɛ mɛi ni fa fe 7,000,000 miikase Biblia lɛ yɛ maji 236 nɔ.

Yesu bi akɛ: “Kɛji nyɛsumɔɔ mɛi ni sumɔɔ nyɛ lɛ, mɛɛ nyɔmɔwoo nyɛyɔɔ? Ani ŋtoohelɔi lɛ tete efeee nakai nɔŋŋ? Ni kɛji nyɛŋaa nyɛnyɛmimɛi kɛkɛ lɛ, enyiɛ nɔŋŋ nyɛfeɔ? Ani wɔŋjalɔi lɛ tete efeee nakai nɔŋŋ?” (Mat. 5:46, 47) Anɔkwa Kristofoi kɛ mɛi yeee yɛ bɔ ni amɛwoloŋlee ji loo weku mli ni amɛjɛ lɛ naa; asaŋ amɛjieee suɔmɔ kpo amɛtsɔɔɔ mɛi ni baanyɛ ato amɛnajiaŋ lɛ pɛ. Moŋ lɛ, amɛyeɔ amɛbuaa ohiafoi kɛ helatsɛmɛi, gbekɛbii kɛ onukpai. Nakai ni Kristofoi lɛ feɔ lɛ haa amɛkaseɔ Yehowa suɔmɔ lɛ, ni abaanyɛ akɛɛ yɛ gbɛ ko nɔ akɛ amɛhi kɛwula shi.

Ani be ko baaba ni wɔnine baashɛ emuuyeli ni ŋmɛɛ Adam lɛ nɔ ekoŋŋ? Hɛɛ, hemɔkɛyeli ni adesai ni boɔ Nyɔŋmɔ toi lɛ yɔɔ yɛ Yesu kpɔmɔ afɔleshãa lɛ mli lɛ baaha amɛye emuu yɛ Kristo Afii Akpe Nɔyeli lɛ mli, be mli ni ‘Nyɔŋmɔ Bi lɛ baafite abonsam nitsumɔi lɛ.’—1 Yoh. 3:8.