Yehowa Feɔ Toi Ehaa Mɔ ni Tswiaa Shi kɛ Dɔlɛ lɛ Bolɔmɔi Lɛ

TAAKƐ nilelɔ Maŋtsɛ Salomo ni hi shi yɛ blema Israel lɛ wie lɛ, “be kɛ nibii ni aleee ni baa trukaa ninaa [wɔ] fɛɛ.” (Jaj. 9:11, NW) Oshara ko loo shihilɛ ko ni jaraa baanyɛ aha wɔfee shwɛm. Ákɛ nɔkwɛmɔnɔ lɛ, oweku kɔkrɔɔ lɛ mlinyo ko gbele baanyɛ aha ohao waa. Yɛ otsii kɛ nyɔji ni baanyiɛ sɛɛ lɛ amli lɛ, ekolɛ obaaye awerɛho waa ni obaafee shwɛm. Mɔ ko baanyɛ afee basaa aahu akɛ ebaanu he akɛ esaaa mɔ ni tsiɔ ebɛŋkɛɔ Yehowa yɛ sɔlemɔ mli.

Kɛ́ mɔ ko yaje shihilɛ ni tamɔ nɛkɛ mli lɛ, ehe baahia ni awo lɛ hewalɛ, ana mli aha lɛ, ní ajie suɔmɔ kpo atsɔɔ lɛ. Lalatsɛ David lá kɛshɛje wɔmii akɛ: “Yehowa sɔoɔ mɛi fɛɛ ni gbeɔ shi lɛ, ni eholeɔ mɛi fɛɛ ni edɔrɔ kɔmɔɔ lɛ anɔ.” (Lala 145:14) Biblia lɛ kɛɔ wɔ akɛ, ‘Yehowa hiŋmɛii kpaa shikpɔŋ muu lɛ fɛɛ nɔ, ni ejieɔ ehewalɛ kpo ehaa mɛi ni amɛtsui ehi kɛwula shi yɛ egbɛfaŋ lɛ.’ (2 Kron. 16:9) Ekɛ ‘mɔ ni tswiaa shi kɛ dɔlɛ ní ebaa ehe shi yɛ emumɔ mli lɛ hiɔ shi, koni eha heshibalɔi amumɔ aná wala hee, ní mɛi ni tswiaa shi kɛ dɔlɛ lɛ atsui aná wala hee!’ (Yes. 57:15) Mɛɛ gbɛ nɔ Yehowa fiɔ mɔ ni tswiaa shi kɛ dɔlɛ ni tsui ekumɔ lɛ sɛɛ, ni eshɛjeɔ emii?

“Wiemɔ ni Awie yɛ Be ni Sa Mli”

Gbɛ kome ni Yehowa tsɔɔ nɔ ekɛ yelikɛbuamɔ haa yɛ be ni sa mli ji kɛtsɔ nyɛmimɛi Kristofoi lɛ anɔ. Awoɔ Kristofoi hewalɛ ni ‘amɛshɛje mɛi ni tsui fãa lɛ amii.’ (1 Tes. 5:14) Kɛ́ wɔmiiye awerɛho ni wɔnanemɛi héyelilɔi ni yɔɔ musuŋtsɔlɛ lɛ wie wiemɔi ni tsɔɔ akɛ amɛsusuɔ wɔhe ni amɛsumɔɔ wɔ lɛ, eshɛjeɔ wɔmii waa. Miishɛjemɔ wiemɔ kuku po baanyɛ atsĩɛ mɔ ni edɔ kɔmɔɔ lɛ mumɔ hiɛ. Ekolɛ mɔ ko ni etsɔ shihilɛ ni tamɔ nɛkɛ mli pɛŋ lɛ baawie miishɛjemɔ wiemɔi nɛɛ. Aloo naanyo ko ni yɔɔ niiashikpamɔ yɛ shihilɛ mli baanyɛ awie nilee wiemɔi nɛɛ. Yehowa baanyɛ atsɔ wɔnyɛmimɛi hii kɛ yei lɛ anifeemɔi ni tamɔ nɛkɛ lɛ nɔ etsĩɛ mɔ ni tswiaa shi kɛ dɔlɛ lɛ mumɔ hiɛ.

Susumɔ asafoŋ onukpa ko ni atsɛɔ lɛ Alex ni beni ebote gbalashihilɛ mli etsɛɛɛ nɔŋŋ lɛ eŋa gbo trukaa yɛ hela ko ni anyɛɛɛ atsa ní mɔ lɛ hewɔ lɛ niiashikpamɔ lɛ he okwɛ. Nɔkwɛlɔ gbɛfalɔ musuŋtsɔlɔ ko bɔ mɔdɛŋ akɛ ebaashɛje Alex mii. Lɛ hu eŋa gbo, shi sɛɛ mli lɛ esaa ebote gbalashihilɛ mli ekoŋŋ. Nɔkwɛlɔ gbɛfalɔ lɛ tsɔɔ bɔ ni ewerɛ ni ho ehe lɛ ha efee shwɛm. Be fɛɛ be ni ekɛ nyɛmimɛi lɛ baashara yɛ shiɛmɔ mli, kɛ yɛ asafoŋ kpeei ashishi lɛ, emii shɛɔ ehe. Shi kɛ́ ebote etsu lɛ mli ni eŋa shinaa lɛ nɔŋŋ lɛ, ehe feɔ shoo  waa. Alex kɛɛ akɛ: “Beni miná mile akɛ nakai ji bɔ ni ebaa lɛ, ni mɛi krokomɛi etsɔ mishihilɛ lɛ mli dã lɛ, mitsui nyɔ mimli waa.” Hɛɛ, “wiemɔ ni awie yɛ be ni sa mli lɛ” baanyɛ ashɛje mɔ mii yɛ fimɔ beaŋ.—Abɛi 15:23.

Asafoŋ onukpa ko ni kɛ mɛi srɔtoi ni gbele eŋɔ amɛhefatalɔi eshara pɛŋ lɛ hu bɔ mɔdɛŋ akɛ ebaashɛje Alex mii. Enu he eha Alex, ni ejɛ suɔmɔ mli eha ele akɛ Yehowa le bɔ ni wɔnuɔ he wɔhaa kɛ nɔ ni he hiaa wɔ. Nyɛmi nuu lɛ kɛɛ Alex akɛ: “Kɛ́ yɛ nyɔji kɛ afii ni baaba lɛ amli lɛ, onu he akɛ ehe miihia ni oná hefatalɔ lɛ, no lɛ gbalashihilɛ mli ni ooobote ekoŋŋ lɛ baafee nikeenii ni Yehowa ejɛ suɔmɔ mli ekɛha bo.” Eji anɔkwale akɛ, jeee mɛi fɛɛ ni gbele eŋɔ amɛhefatalɔi ní miisumɔ ni amɛbote gbalashihilɛ mli ekoŋŋ lɛ baanyɛ afee nakai. Beni Alex susu nyɛmi nuu lɛ wiemɔi lɛ ahe lɛ, ekɛɛ akɛ, “Kɛ́ aha ole akɛ gbalashihilɛ mlibotemɔ ekoŋŋ lɛ ji Yehowa nikeenii lɛ, ehaaa onu he dɔŋŋ akɛ kɛ́ ofee nakai wɔsɛɛ lɛ etsɔɔ akɛ oyeee ohefatalɔ lɛ anɔkwa, loo oote shi owo gbalashihilɛ gbɛjianɔtoo ni Yehowa eto lɛ.”—1 Kor. 7:8, 9, 39.

Lalatsɛ David ni tsɔ shihilɛi ni jaraa kɛ nɔnai babaoo mli lɛ kɛ nɔmimaa wie akɛ: “Yehowa hiŋmɛi kã jalɔi ahe, ni efeɔ toi ehaa amɛbolɔmɔi lɛ.” (Lala 34:16) Hɛɛ, Yehowa baanyɛ atsɔ wɔnanemɛi Kristofoi ni edara yɛ mumɔŋ ni yɔɔ musuŋtsɔlɛ lɛ anilee wiemɔi ni tsɔɔ akɛ amɛyɛ sɛɛyomɔ lɛ nɔ eha mɔ ni tswiaa shi kɛ dɔlɛ lɛ bolɔmɔi lɛ ahetoo yɛ be ni sa mli. Yehowa nikeenii nɛɛ nɔ bɛ, ni eyeɔ ebuaa hu.

Yelikɛbuamɔ Kɛtsɔ Kristofoi Akpeei Anɔ

Ewaaa akɛ mɔ ko ni tsui ekumɔ lɛ baaná susumɔi ni esaaa ni baaha etse ehe kɛjɛ mɛi ahe. Shi Abɛi 18:1 lɛ bɔɔ kɔkɔ akɛ: “Mɔ ni etse ehe lɛ, akɔnɔ nii etaoɔ, ni etseɔ nɔ ni hi ha lɛ fɛɛ hiɛ atũa.” Alex kpɛlɛ nɔ akɛ: “Kɛ́ ohefatalɔ gbo lɛ, susumɔi ni esaaa bayiɔ ojwɛŋmɔ mli.” Ekaiɔ akɛ be ko lɛ ebi ehe akɛ: “‘Ani kulɛ nɔ ko yɛ ni manyɛ mafee ni mifeee? Ani kulɛ esa akɛ manu lɛ shishi ni manu he maha lɛ fe bɔ ni mifee lɛ?’ Misumɔɔɔ akɛ mikome mahi shi. Misumɔɔɔ ni mihiɔ shi akɛ  oshija. Ewa waa akɛ ooojie susumɔi ni tamɔ nɛkɛ lɛ kɛjɛ ojwɛŋmɔ mli ejaakɛ daa gbi lɛ nibii babaoo haa onuɔ he akɛ eshwɛ okome.”

Be nɛɛ ji be ni esa akɛ mɔ ni tswiaa shi kɛ dɔlɛ lɛ kɛ mɛi kpakpai abɔ. Ebaaná mɛi babaoo ni tamɔ nakai yɛ asafoŋ kpeei ashishi. Yɛ hei ni tamɔ nɛkɛ lɛ, wɔnuɔ wiemɔi kpakpai ni jɛ Nyɔŋmɔ ŋɔɔ ni tswaa mɔ emaa shi.

Kristofoi akpeei yeɔ ebuaa wɔ ni wɔnáa wɔshihilɛ lɛ he jwɛŋmɔ ni ja. Beni wɔboɔ Biblia mli wiemɔi atoi ni wɔjwɛŋɔ nɔ lɛ, ehaa wɔkɛ wɔjwɛŋmɔ maa nibii ni he hiaa titri—ni ji Yehowa nɔyeli lɛ bembuu kɛ egbɛ́i lɛ hetsemɔ—lɛ nɔ, shi jeee wɔnɔnaa lɛ nɔ. Kɛfata he lɛ, be mli ni ahaa wɔ mumɔŋ niyenii yɛ Kristofoi akpeei ashishi lɛ, ewajeɔ wɔ koni wɔna akɛ, kɛ́ mɛi enaaa akɛ wɔhao loo amɛnuuu bɔ ni wɔnuɔ he wɔhaa lɛ shishi po lɛ, Yehowa le wɔshihilɛ lɛ. Ele akɛ “tsuiŋdɔlɛ haa mɔ feɔ gblinĩi.” (Abɛi 15:13) Anɔkwa Nyɔŋmɔ lɛ miisumɔ ni eye ebua wɔ, ni no kanyaa wɔ ni ehaa wɔnáa hewalɛ kɛfĩɔ shi.—Lala 27:14.

Beni Maŋtsɛ David henyɛlɔi lɛ ha ehe jara lɛ waa lɛ, ebo etsɛ Nyɔŋmɔ ekɛɛ akɛ: “Mimumɔ etɔ biti yɛ mimli, mitsui efee shikplikpii yɛ mimli.” (Lala 143:4) Bei pii lɛ shihilɛi ni jaraa haa mɔ hewalɛ tãa ni efeɔ shwɛm aahu akɛ etsui feɔ shikplikpii yɛ emli. Kɛ́ hela mɔ wɔ loo wɔmiiye hela ko ni sɛɛ tsɛɔ waa lɛ, ebaanyɛ eha wɔhao waa. Wɔbaanyɛ wɔná nɔmimaa akɛ Yehowa baaye abua wɔ koni wɔnyɛ wɔdamɔ naa. (Lala 41:2-4) Eyɛ mli akɛ ŋmɛnɛ lɛ, Nyɔŋmɔ tsaaa mɔ ko yɛ naakpɛɛ gbɛ nɔ moŋ, shi ehaa nɔnalɔ lɛ nilee kɛ hewalɛ koni enyɛ ekɛkpee shihilɛ lɛ naa. Ha ehi ojwɛŋmɔ mli akɛ, beni David kɛ shihilɛi ni jaraa kpe lɛ, etsi ebɛŋkɛ Yehowa. Elá akɛ: “Mikaiɔ blema gbii lɛ, mijwɛŋɔ onitsumɔi lɛ fiaa he, misusuɔ oninenaa nitsumɔi lɛ ahe.”—Lala 143:5.

Saji ni jɛ mumɔŋ nɛɛ ni aŋmala yɛ Nyɔŋmɔ Wiemɔ lɛ mli lɛ tsɔɔ akɛ Yehowa le bɔ ni wɔnuɔ he wɔhaa. Wiemɔi ni tamɔ nɛkɛ lɛ maa nɔ aduatsɔ akɛ eboɔ wɔtutɔmɔi lɛ atoi. Kɛ́ wɔkpɛlɛ Yehowa yelikɛbuamɔ nɔ lɛ, ‘eeehiɛ wɔmli.’—Lala 55:23.

“Nyɛsɔlea ni Nyɛkafɔa”

Yakobo 4:8 lɛ kɛɔ akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.” Gbɛ kome ni wɔbaanyɛ wɔtsɔ nɔ wɔbɛŋkɛ Nyɔŋmɔ ji sɔlemɔ. Bɔfo Paulo woɔ wɔ hewalɛ koni ‘wɔsɔle ni wɔkafɔ̃ɔ.’ (1 Tes. 5:17) Kɛ́ ewa kɛha wɔ akɛ wɔbaawie bɔ ni wɔnuɔ he wɔhaa lɛ po lɛ, “Mumɔ lɛ diɛŋtsɛ kɛ ŋtsɔidɔɔmɔi ni anyɛŋ akɛɛ lɛ damɔɔ mli haa wɔ.” (Rom. 8:26, 27) Lɛɛlɛŋ, Yehowa le bɔ ni wɔnuɔ he wɔhaa.

Monika, ni naanyobɔɔ ni mli wa yɛ ekɛ Yehowa teŋ lɛ kɛɛ akɛ: “Kɛtsɔ sɔlemɔ, Biblia lɛ kanemɔ, kɛ aŋkro nikasemɔ nɔ lɛ, minuɔ he akɛ Yehowa etsɔ mi-Naanyo ni bɛŋkɛ mi kpaakpa. Efee mɔ ko ni yɔɔ lɛɛlɛŋ kɛha mi aahu akɛ minaa akɛ eyeɔ ebuaa mi be fɛɛ be. Le ni mile akɛ kɛ́ minyɛɛɛ makɛɛ lɛ bɔ ni minuɔ he mihaa po lɛ, enuɔ mi shishi lɛ shɛjeɔ mimii. Mile akɛ emlihilɛ kɛ ejɔɔmɔi lɛ asɛɛ efooo.”

Belɛ eba akɛ wɔbaakpɛlɛ suɔmɔ kɛ miishɛjemɔ wiemɔi ni nanemɛi Kristofoi kɛshɛjeɔ wɔmii lɛ anɔ, wɔkɛ ŋaawoi ni ajɛɔ mlihilɛ mli akɛhaa wɔ, kɛ kaimɔi ni wajeɔ wɔhemɔkɛyeli lɛ ni wɔnuɔ yɛ Kristofoi akpeei ashishi lɛ aaatsu nii, ni wɔfɔse wɔtsuiŋ fɛɛ wɔshwie Yehowa hiɛ yɛ sɔlemɔ mli. Enɛɛmɛi fɛɛ ji gbɛi ni Yehowa tsɔɔ nɔ etsɔɔ akɛ esusuɔ wɔhe. Alex kɛɛ akɛ, “Kɛ́ wɔkɛ wɔhe wo gbɛjianɔi fɛɛ ni Yehowa Nyɔŋmɔ eto koni wɔhe awa yɛ mumɔŋ lɛ amli lɛ, wɔbaaná ‘hewalɛ ní fá kɛteke nɔ’ ní baaha wɔnyɛ wɔdamɔ kaa fɛɛ kaa ni wɔkɛbaakpe lɛ naa,” ni enyɛ ekɛɛ nakai akɛni ekɛtsu nii ni ena akɛ eji anɔkwale lɛ hewɔ.—2 Kor. 4:7.

[Akrabatsa/Mfoniri ni yɔɔ baafa 18]

Miishɛjemɔ Kɛha Mɔ ni Tswiaa Shi kɛ Dɔlɛ Lɛ

Lalai awolo lɛ mli eyi obɔ kɛ wiemɔi ni jieɔ adesai ahenumɔi akpo, kɛ shiwoi babaoo ni tsɔɔ akɛ Yehowa feɔ toi ehaa mɔ ni tswiaa shi kɛ dɔlɛ lɛ bolɔmɔi lɛ. Bo lɛ susumɔ lalai ni nyiɛ sɛɛ nɛɛ ahe okwɛ:

“Beni efĩ mi lɛ, mitsɛ́ Yehowa, ni mibo mitsɛ́ mi-Nyɔŋmɔ lɛ. Enu migbee kɛjɛ esɔlemɔwe lɛ, ni mibolɔmɔ ni mibolɔ yɛ ehiɛ lɛ bote etoiiaŋ.”—Lala 18:7.

“Yehowa bɛŋkɛɔ mɛi ni tsuii ekumɔ lɛ, ni ehereɔ mɛi ni mumɔ tswiaa shi kɛ dɔlɛ lɛ.”—Lala 34:18.

“[Yehowa] tsáa mɛi ni amɛtsuii ekumɔ lɛ, ni efimɔɔ amɛpilamɔi lɛ anɔ.”—Lala 147:3.

[Mfoniri ni yɔɔ baafa 17]

Kwɛ bɔ ni ‘wiemɔ ni awieɔ yɛ be ni sa mli’ lɛ baanyɛ ashɛje mɔ mii waa yɛ fimɔ beaŋ!