Jwɛŋmɔ Nɔ ni Yehowa Efee Eha Bo lɛ Nɔ

BENI atee Yesu shi etsɛɛɛ nɔŋŋ lɛ, ekaselɔi lɛ enyɔ nyiɛ kɛjɛ Yerusalem kɛmiiya Emao. Luka Sanekpakpa lɛ bɔ amaniɛ akɛ: “Beni amɛgbagbaa saji lɛ ni amɛtaoɔ mli lɛ, Yesu diɛŋtsɛ babɛŋkɛ amɛ, ni ekɛ amɛ nyiɛ; shi aŋamɔ amɛhiŋmɛii ni amɛkayoo lɛ.” Kɛkɛ ni Yesu kɛɛ amɛ akɛ: “Mɛɛ saji nyɛgbaa yɛ gbɛ lɛ nɔ lɛ? Ni amɛwa amɛdamɔ shi kɛ amɛhiɛ mɔbɔmɔbɔ.” Mɛni hewɔ amɛnii efee mɔbɔ lɛ? Kaselɔi lɛ susu akɛ Yesu baakpɔ̃ Israel kɛjɛ Jeŋmajiaŋbii lɛ anɔyeli shishi yɛ nakai beaŋ, shi nakai kpɔ̃mɔ lɛ baaa mli. Nɔ̃ moŋ ni ba ji akɛ, agbe Yesu. Ni enɛ hewɔ amɛnii efee mɔbɔ lɛ.—Luka 24:15-21, Ga Biblia hee; Bɔf. 1:6.

Yesu kɛ kaselɔi lɛ bɔi nii ahe susumɔ. “Ebɔi kɛjɛ Mose kɛ gbalɔi lɛ fɛɛ nɔ, ni etsɔɔ amɛ nibii ni yɔɔ ŋmalɛi lɛ fɛɛ mli yɛ ehewɔ lɛ ashishi.” Anɔkwale sane ji akɛ, nibii babaoo ni sa kadimɔ ni tswaa mɔ hemɔkɛyeli emaa shi tee nɔ yɛ Yesu sɔɔmɔ nitsumɔ lɛ mli! Beni kaselɔi lɛ boɔ saji ni Yesu wieɔ lɛ toi lɛ, amɛnii ni efee mɔbɔ lɛ tsake ni amɛná miishɛɛ. Sɛɛ mli yɛ nakai gbi lɛ gbɛkɛ lɛ, amɛkɛɛ akɛ: “Ani wɔtsui he edɔɔɔ la yɛ wɔmli beni ekɛ wɔ wieɔ yɛ gbɛ lɛ nɔ ni etsɔɔ wɔ ŋmalɛi lɛ anaa lɛ?” (Luka 24:27, 32) Mɛni wɔbaanyɛ wɔkase kɛjɛ bɔ ni Yesu kaselɔi lɛ fee amɛnii amɛha lɛ mli?

Te Gbɛkpamɔi ni Baaa Mli lɛ Náa Wɔ nɔ Hewalɛ Ehaa Tɛŋŋ?

Kaselɔi enyɔ ni nyiɛ gbɛ kɛyaa Emao lɛ anii fee mɔbɔ ejaakɛ nɔ ni amɛkpá gbɛ lɛ náaa aba mli. Amɛnu he taakɛ atsɔɔ yɛ Abɛi 13:12 lɛ akɛ: “Hiɛnɔkamɔ ni baaa mli mra lɛ, ewoɔ mɔ tsui hela.” Nakai nɔŋŋ ŋmɛnɛ lɛ, ekolɛ wɔteŋ mɛi komɛi ni kɛ afii nyɔŋmai abɔ esɔmɔ Yehowa yɛ anɔkwayeli mli lɛ baasusu akɛ kulɛ kɛbashi bianɛ lɛ, esa akɛ “amanehulu kpeteŋkpele” lɛ ebaho etee momo. (Mat. 24:21; Kpoj. 7:14) Shishinumɔ yɛ he akɛ amrɔ nɛɛ gbɛkpamɔ ni tamɔ nɛkɛ ni bako mli lɛ baanyɛ aha mɛi anii afee mɔbɔ.

Shi kaimɔ akɛ nakai kaselɔi enyɔ lɛ ná miishɛɛ ekoŋŋ, beni Yesu ye bua amɛ koni amɛjwɛŋ gbalɛi ni eba mli momo—ni nɔ ni eba mli yɛ amɛwala beaŋ po lɛ fata he lɛ anɔ. Kɛ́ wɔgbɛkpamɔi bako mli lɛ, wɔ hu wɔbaanyɛ wɔjwɛŋ gbalɛi ni eba mli momo lɛ anɔ koni  wɔmiishɛɛ akatã ni wɔnijiaŋ je wui. Taakɛ asafoŋ onukpa ko ni yɔɔ niiashikpamɔ ni atsɛɔ lɛ Michael lɛ kɛɛ lɛ: “Kaajwɛŋ nɔ ni Yehowa baafee kpaako lɛ nɔ tuutu. Moŋ lɛ, jwɛŋmɔ nɔ ni efee momo lɛ nɔ.” Eji ŋaawoo ni sa jogbaŋŋ!

Nɔ ni Yehowa Efee

Susumɔ nibii ni sa kadimɔ ni Yehowa efee momo lɛ ateŋ ekomɛi ahe okwɛ. Yesu kɛɛ akɛ: “Mɔ ni heɔ minɔ yeɔ lɛ, nitsumɔi ni mitsuɔ lɛ, lɛ hu eeetsu, ni eeetsu nii ni fe nomɛi tete.” (Yoh. 14:12) Ŋmɛnɛ lɛ, Nyɔŋmɔ tsuji miitsu Kristofoi anitsumɔi yɛ gbɛ ni atsuko lɛ nakai pɛŋ yɛ yinɔsane mli lɛ nɔ. Aŋkroaŋkroi ni fa fe akpekpei kpawo yɛ hiɛnɔkamɔ akɛ amɛbaafo amanehulu kpeteŋkpele lɛ. Susumɔ he okwɛ, anako Yehowa anɔkwa tsuji ni fa babaoo tamɔ nɛkɛ yɛ shikpɔji babaoo nɔ yɛ je lɛ mli dã! Hɛɛ, taakɛ Yesu gba lɛ, Yehowa eha etsuji ‘miitsu nii ni fe’ Yesu nɔ lɛ.

Mɛni ekoŋŋ Yehowa efee eha wɔ? Yehowa eha mɛi ni yɔɔ tsui kpakpa lɛ enyɛ amɛshi jeŋ fɔŋ nɛɛ mli, yɛ okadifeemɔŋ, kɛbote mumɔŋ paradeiso ni efee lɛ mli. (2 Kor. 12:1-4) Ŋɔɔ be ko ni okɛjwɛŋ paradeiso nɛɛ mli nibii komɛi ni onine baanyɛ ashɛ nɔ lɛ anɔ. Ákɛ nɔkwɛmɔnɔ lɛ, kwɛmɔ owojiatoohe lɛ loo wojiatoohe ni yɔɔ Maŋtsɛyeli Asa lɛ nɔ. Kwɛmɔ Watch Tower Publications Index lɛ mli loo gbelemɔ Watchtower Library lɛ ni okwɛ. Tswaa Biblia drama ko ni obo toi. Feemɔ nibii ni onu kɛ nibii ni ona yɛ kpee wulu ko ni afee nyɛsɛɛ nɛɛ shishi lɛ he mfoniri yɛ ojwɛŋmɔŋ. Kɛfata he lɛ, susumɔ naanyobɔɔ ni yɔɔ miishɛɛ ni wɔkɛ wɔnyɛmimɛi Kristofoi hii kɛ yei náa mli ŋɔɔmɔ lɛ he. Kwɛ bɔ ni Yehowa feɔ wɔ ejurɔ babaoo kɛtsɔ mumɔŋ niyenii pii kɛ nyɛmimɛi ni yɔɔ suɔmɔ ni ekɛduroɔ wɔ lɛ nɔ—eji mumɔŋ paradeiso lɛɛlɛŋ!

Lalatsɛ David kɛɛ akɛ: “Yehowa, mi-Nyɔŋmɔ, onaakpɛɛ nii ni otsuɔ kɛ ojwɛŋmɔi ni ojwɛŋɔ yɛ wɔhe lɛ fa naakpa.” (Lala 40:6) Hɛɛ, kɛ́ wɔjwɛŋ naakpɛɛ nibii ni Yehowa efee eha wɔ momo lɛ nɔ, ni wɔsusu wɔhe jwɛŋmɔ kpakpa ni eyɔɔ lɛ he lɛ, wɔbaaná hewalɛ hee ni baaha wɔjɛ wɔtsui muu fɛɛ mli wɔkɛ anɔkwayeli aya nɔ asɔmɔ Yehowa, wɔŋwɛi Tsɛ lɛ.—Mat. 24:13.

[Mfoniri ni yɔɔ baafa 31]

Yesu ye bua ekaselɔi lɛ ni amɛjwɛŋ nɔ ni Yehowa efee eha amɛ momo lɛ nɔ

[Mfonirii ni yɔɔ baafa 32]

Feemɔ nibii ni onu kɛ nibii ni ona yɛ kpee wulu ko ni afee nyɛsɛɛ nɛɛ shishi lɛ he mfoniri yɛ ojwɛŋmɔŋ