Nyɛmiaa Nyɛhiɛ, Ebaawo Yibii!

KƐ́ AAATSƆSE gbekɛbii “yɛ Nuŋtsɔ [Yehowa] tsɔsemɔ kɛ ŋaawoo lɛ mli” lɛ, ehe miihia ni afee Weku Jamɔ kɛ Biblia mli nikasemɔ. (Efe. 6:4) Shi kɛ́ oji fɔlɔ lɛ, ole akɛ kɛ́ nyɛmiikase nii lɛ, etsɛɛɛ ni nikasemɔ lɛ jeɔ gbekɛbii lɛ atsine. Te obaafee tɛŋŋ oha gbekɛbii lɛ ajwɛŋmɔ ahi nikasemɔ lɛ nɔ? Susumɔ nɔ ni fɔlɔi komɛi feɔ lɛ he okwɛ.

George ni yɔɔ California yɛ U.S.A. lɛ kɛɛ akɛ: “Beni gbekɛbii lɛ darako tsɔ lɛ, mi kɛ miŋa bɔɔ mɔdɛŋ akɛ wɔbaaha weku Biblia mli nikasemɔ lɛ afee nɔ ni miishɛɛ yɔɔ mli. Bei komɛi lɛ, wɔ fɛɛ wɔsaa wɔhe tamɔ Biblia mli gbɔmɛi, ni wɔfeɔ nɔ ni wɔkaneɔ yɛ Mi-Wolo ni Gbaa Biblia Mli Saji lɛ mli lɛ he drama. Wɔfeɔ nibii ni akɛfeɔ drama po—klantei, maŋtsɛ tsei, kɛntɛŋi, kɛ nibii krokomɛi. Kɛfata he lɛ, wɔshwɛɔ Biblia shwɛmɔ ni ji ‘tsɔɔmɔ mi mɔ ni mi ji,’ kɛ agbɛnɛ kaadi nɔ shwɛmɔi ni haa wɔbiɔ wɔhe Biblia mli saji ni waaa kɛ nɔ ni wa. Wɔkɛ wɔhe woɔ nifeemɔi tamɔ Noa adeka lɛ henɔ bibioo ko ni wɔɔkpɛ loo Biblia mli amaniɛbɔɔ ni wɔɔto amɛnaa yɛ be ni amɛtee nɔ lɛ naa lɛ amli. Bei komɛi lɛ wɔtɛŋɔ Biblia mli gbɔmɛi loo Biblia mli amaniɛbɔi ahe mfonirii. Amrɔ nɛɛ wɔmiito gbɛjianɔ koni wɔtɛŋ mumɔŋ tawuu nii ni awie he yɛ Efesobii 6:11-17 lɛ, ni wɔteŋ mɔ fɛɛ mɔ baatsɔɔ nɔ ni tawuu nii lɛ eko damɔ shi kɛha lɛ mli. Enɛɛmɛi ni wɔfeɔ lɛ haa wɔnyaa wɔweku nikasemɔ lɛ he waa.”

Nyɛ ko ni atsɛɔ lɛ Debi ni jɛ Michigan, yɛ U.S.A. lɛ bɔ amaniɛ akɛ: “Beni wɔbiyoo lɛ ye aaafee afii etɛ lɛ, mi kɛ miwu náaa lɛ mlɛo akɛ wɔɔha enya nii ni wɔkɛ lɛ kaseɔ lɛ he. Kɛkɛ ni gbi ko beni mikaneɔ Isak kɛ Rebeka he sane lɛ yɛ Mi-Wolo ni Gbaa Biblia Mli Saji lɛ mli mihaa lɛ lɛ, mijie tsobii enyɔ, ni mibɔi wiemɔ oookɛɛ tsobii lɛ ni wieɔ lɛ. Amrɔ nɔŋŋ lɛ ebo toi jogbaŋŋ! Yɛ nyɔji ni nyiɛ sɛɛ lɛ amli lɛ, wɔkɛ tsobii enyɔ lɛ damɔ shi kɛha Biblia mli gbɔmɛi srɔtoi babaoo. Kɛ́ wɔkane amaniɛbɔɔ ko wɔgbe naa lɛ, wɔbiyoo lɛ kpaa shĩa lɛ mli etaoɔ tsobii loo nibii krokomɛi ni abaanyɛ akɛfee nɔ ni wɔkane lɛ he drama. Ebafeɔ tamɔ nɔ ni eetao jwetri ko! Wɔkɛ aspaatere adeka ko kɛ kpãa tsuru ko fee Rahab shĩa ni taŋkpee tsuru tsotsoro he lɛ. Wɔkɛ onufu tsobi ni akɛ mama fee ni kɛlɛ ji mitai 1.5 bala blɔ tso ko he ni wɔkɛfee akɔɔble onufu ni atsĩ tã yɛ 4 Mose 21:4-9 lɛ. Wɔkɛ nibii ni wɔkɛfeɔ drama nɛɛ woɔ baagi agbo ko mli. Bei pii lɛ wɔnaa wɔbiyoo lɛ ni eta asa lɛ nɔ ni eegbɛlɛ ‘Biblia mli saji baagi’ lɛ mli, ni enɛ haa wɔnáa miishɛɛ waa. Kwɛ bɔ ni wɔnáa miishɛɛ kɛ́ wɔna ni lɛ diɛŋtsɛ eefee saji nɛɛ ahe drama!”

Bii atsɔsemɔ bɛ mlɛo, ni jeee daa otsi nikasemɔ pɛ ni baaha amɛná shwelɛ akɛ amɛaasɔmɔ Yehowa. Shi weku jamɔ kɛ Biblia mli nikasemɔ baanyɛ aye abua waa koni amɛnine ashɛ mumɔŋ tsɔsemɔi krokomɛi anɔ. Hɛɛ, kɛ́ nyɛmia nyɛhiɛ lɛ, ebaawo yibii!