Sanebimɔi ni Jɛ Kanelɔi Adɛŋ

Mɛni hewɔ Mose mli wo la ewo Aaron bihii Eleazar kɛ Itamar beni amɛnyɛmimɛi Nadab kɛ Abihu gboi lɛ sɛɛ lɛ, ni mɛɛ gbɛ nɔ atsɔ ajɔɔ etsui he?—3 Mose 10:16-20.

Beni ato osɔfoyeli yɛ kpee buu lɛ mli lɛ shishi sɛɛ etsɛɛɛ nɔŋŋ lɛ, Yehowa gbe Aaron bihii Nadab kɛ Abihu ejaakɛ amɛkɛ la kroko tee Yehowa hiɛ. (3 Mose 10:1, 2) Mose fã Aaron bihii ni eshwɛ lɛ ni amɛkafó amɛnyɛmimɛi ni egboi lɛ. No sɛɛ etsɛɛɛ lɛ, Mose mli wo la ewo Eleazar kɛ Itamar akɛni amɛyeee too kpakpo ni akɛshã esha afɔle lɛ hewɔ. (3 Mose 9:3) Mɛni hewɔ Mose mli wo la nakai lɛ?

Mlai ni Yehowa kɛha Mose lɛ tsɔɔ akɛ esa akɛ osɔfo ni shãa esha afɔle lɛ aye eko yɛ kpee buu lɛ kpo lɛ nɔ. Nakai ni amɛbaafee lɛ tsɔɔ akɛ amɛmiitere mɛi ni bashã afɔle lɛ nɔtɔmɔi lɛ. Shi kɛ́ akɛ afɔleshãa lɛ lá lɛ eko tee He Krɔŋkrɔŋ lɛ, ni ji kpee buu lɛ mli klɛŋklɛŋ tsu lɛ mli lɛ, esaaa akɛ ayeɔ afɔle lɛ eko. Yɛ no najiaŋ lɛ esa akɛ ashã.—3 Mose 6:24-26, 30.

Etamɔ nɔ ni Aaron bihii ni gboi yɛ nakai gbi lɛ nɔ lɛ ha Mose na akɛ esa akɛ ekwɛ ni aye Yehowa fãmɔi lɛ fɛɛ nɔ. Beni eyɔse akɛ ashã too kpakpo ni ji esha afɔle lɛ, ekɛ mlifu bi Eleazar kɛ Itamar nɔ hewɔ ni amɛyeee eko taakɛ atsɔɔ akɛ afee lɛ, ejaakɛ akɛ too lɛ lá lɛ eyako Yehowa hiɛ yɛ He Krɔŋkrɔŋ lɛ.—3 Mose 10:17, 18.

Aaron ha Mose sanebimɔ lɛ hetoo akɛni eeenyɛ efee akɛ ekpɛlɛ nɔ ni ebii osɔfoi ni eshwɛ lɛ fee lɛ nɔ lɛ hewɔ. Ekolɛ Aaron shwie eyiŋ akɛ, akɛni ebii enyɔ egboi hewɔ lɛ, osɔfoi krokomɛi ni eshwɛ lɛ nyɛŋ amɛkɛ henilee kpakpa aye esha afɔle lɛ yɛ nakai gbi lɛ nɔ. Eyɛ mli akɛ jeee amɛ amɛha Nadab kɛ Abihu tɔ̃ tɔ̃mɔ ni amɛtɔ̃ lɛ moŋ, shi eeenyɛ efee akɛ enu he akɛ kɛ́ amɛye lɛ esaŋ Yehowa hiɛ.—3 Mose 10:19.

Eeenyɛ efee akɛ nɔ titri ni Aaron susu ji akɛ, kulɛ esa akɛ ebii lɛ abɔ mɔdɛŋ akɛ amɛbaasa Nyɔŋmɔ hiɛ yɛ nibii bibii po amli beni amɛtsuɔ amɛsɔfoyeli nitsumɔ lɛ klɛŋklɛŋ kwraa lɛ. Shi Nadab kɛ Abihu gbe Yehowa gbɛ́i lɛ he guɔ, ni Nyɔŋmɔ mli fu amɛ. No hewɔ lɛ, ekolɛ Aaron susu akɛ esaaa akɛ osɔfoi aweku ni amɛmlibii lɛ ekomɛi efee esha ni tamɔ nɛkɛ lɛ yeɔ afɔle krɔŋkrɔŋ lɛ eko.

Etamɔ nɔ ni Mose kpɛlɛ enyɛmi nuu lɛ hetoo lɛ nɔ ejaakɛ amu amaniɛbɔɔ lɛ naa akɛ: “Ni Mose nu, ni ehi yɛ ehiɛ.” (3 Mose 10:20) Ŋwanejee ko bɛ he akɛ, Yehowa hu kpɛlɛ Aaron hetoo lɛ nɔ.