Bɔ ni Wɔɔfee Wɔnyiɛ Kristo, Hiɛnyiɛlɔ ni Eye Emuu lɛ Sɛɛ

BEI pii lɛ, mɛi ni nyiɛɔ nɔyelɔi ni ji adesai asɛɛ lɛ nine nyɛɔ shi. Shi mɛi ni kpɛlɛɔ ni Kristo anyiɛ amɛhiɛ lɛ náa niiashikpamɔ ni yɔɔ srɔto kwraa. Yesu kɛɛ akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipã lɛ nyɛfɔ̃a nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaaná hejɔɔmɔ nyɛaaha nyɛsusumai lɛ.” (Mat. 11:28, 29) Yesu hiɛnyiɛmɔ lɛ haa mɔ náa miishɛɛ ni mɔ he jɔɔ lɛ. Esusuɔ mɛi ni baa shi kɛ mɛi ni naa nɔ̃ lɛ ahe waa, efɔ̃ɔ amɛnine ni amɛba epã ni waaa lɛ shishi. Shi mɛni Yesu hiɛnyiɛmɔ lɛ sɛɛ ni aaanyiɛ lɛ biɔ?

Bɔfo Petro ŋma akɛ: “Kristo hu na amanehulu eha nyɛ ni ekɛto okadi efɔ̃ shi eha nyɛ, koni nyɛnyiɛ enanemaahei lɛ asɛɛ” kpaakpa. (1 Pet. 2:21) Te Yesu nanemaahei lɛ asɛɛ ni wɔɔnyiɛ lɛ he hiaa ha tɛŋŋ? Ŋɔɔ lɛ akɛ ofata kuu ko ni ehe ebahia ni amɛtsɔ he ko ni akɛ okpɛlɛmii ehɔlɔ shikpɔŋ lɛ he, ni nyɛteŋ mɔ kome pɛ ni le bɔ ni nyɛaafee nyɛtsɔ jɛmɛ shweshweeshwe. Ani onyiɛŋ mɔ nɛɛ nanemaahei lɛ asɛɛ kpaakpa aahu po akɛ okɛ onaji baamamɔ he ni ekɛ enaji mamɔɔ lɛ pɛpɛɛpɛ? Nakai nɔŋŋ, kɛ́ wɔnyiɛ Yesu nɔkwɛmɔnɔ lɛ sɛɛ kpaakpa lɛ, wɔbaahi shi shweshweeshwe wɔsɛɛ. Enɛ baabi ni wɔbo nɔ ni ekɛɔ wɔ lɛ toi ni wɔye nɔ, ni wɔkɛ enajiaŋdamɔlɔi lɛ afee ekome.

Bo Toi ni Oye Nɔ

Beni Yesu miihe agbe e-Gɔŋ nɔ Shiɛmɔ lɛ naa lɛ, ekɛɛ akɛ: “Mɔ fɛɛ mɔ ni nuɔ miwiemɔi nɛɛ ni eyeɔ nɔ lɛ, maŋɔ lɛ mato ŋaalelɔ [loo nilelɔ] ni ma etsu yɛ tɛsaa nɔ lɛ he. Ni nugbɔ tue, ni faai ba, ni kɔɔyɔɔ tswa, ni amɛshimɔ tsũ lɛ, shi ewuleee; ejaakɛ ato shishi yɛ tɛsaa nɔ.”—Mat. 7:24, 25.

No hewɔ lɛ, Yesu kɛ nuu ni boɔ ewiemɔi toi ni eyeɔ nɔ lɛ to “nilelɔ” he. Ani wɔjɛɔ wɔtsuiŋ wɔyeɔ Yesu famɔi lɛ anɔ ni wɔkɛtsɔɔ akɛ wɔbuɔ Kristo nɔkwɛmɔnɔ lɛ ni wɔhiɛ sɔɔ enɔkwɛmɔnɔ lɛ, loo wɔyeɔ Yesu famɔi lɛ ateŋ nɔ ni waaa loo nɔ ni yɔɔ mlɛo akɛ wɔɔye nɔ lɛ pɛ nɔ? Yesu kɛɛ akɛ: “Mi lɛ, nɔ ni sa [Nyɔŋmɔ] hiɛ mifeɔ daa.” (Yoh. 8:29) Nyɛhaa wɔbɔa mɔdɛŋ ni wɔfea nakai nɔŋŋ.

Yɛ klɛŋklɛŋ afii 100 lɛ mli lɛ, bɔfoi lɛ kpɛlɛ Kristo hiɛnyiɛmɔ lɛ nɔ, ni amɛkɛfee nɔkwɛmɔnɔ kpakpa amɛha wɔ. Be ko lɛ, Petro kɛɛ Yesu akɛ: “Naa, wɔ lɛ wɔshi nii fiaa ni wɔbanyiɛ osɛɛ.” (Mar. 10:28) Hɛɛ, bɔfoi lɛ bu Yesu hiɛnyiɛmɔ lɛ akɛ ehe miihia waa aahu akɛ amɛ diɛŋtsɛ amɛshi nibii krokomɛi koni amɛnyɛ amɛnyiɛ esɛɛ.—Mat. 4:18-22.

Okɛ Kristo Najiaŋdamɔlɔi lɛ Afee Ekome

Beni eshwɛ fioo ni Yesu baagbo lɛ, etsĩ gbɛ kroko ni wɔbaanyɛ wɔtsɔ nɔ wɔnyiɛ ehiɛnyiɛmɔ lɛ sɛɛ lɛ tã. Ekɛɛ akɛ: “Mɔ ni hereɔ mɔ ni mitsuɔ lɛ, mi nɔŋŋ ehereɔ lɛ.” (Yoh. 13:20) Anɔkwa sane ji akɛ, Yesu tsɛ́ enajiaŋdamɔlɔi ni afɔ amɛ mu lɛ akɛ ‘enyɛmimɛi.’ (Mat. 25:40) Beni atee Yesu shi ni etee ŋwɛi lɛ sɛɛ lɛ, ahala ‘enyɛmimɛi’ lɛ ni amɛye esɛɛ, amɛsɔmɔ “yɛ Kristo najiaŋ” akɛ bɔfoi ni fɔ̃ɔ mɛi krokomɛi nine koni amɛha akpata amɛ kɛ Yehowa Nyɔŋmɔ teŋ. (2 Kor. 5:18-20) Kɛ́ wɔbo Kristo ‘nyɛmimɛi’ lɛ atoi lɛ, no tsɔɔ akɛ wɔkpɛlɛɔ ehiɛnyiɛmɔ lɛ nɔ.

 Esa akɛ wɔpɛi bɔ ni wɔfeɔ wɔnii yɛ Ŋmalɛ naa ŋaawoo ni akɛhaa yɛ be naa yɛ wɔwoji ni adamɔɔ Biblia lɛ nɔ aŋmalaa lɛ mli lɛ ahe lɛ mli. Atsɔɔ Ŋmalɛi lɛ ni wɔkaseɔ kɛ asafoŋ kpeei ni wɔyaa lɛ nɔ akaiɔ wɔ Kristo wiemɔi lɛ. (2 Pet. 3:1, 2) Kɛ́ wɔye mumɔŋ niyenii nɛɛ daa lɛ, wɔkɛtsɔɔ akɛ wɔhiɛ sɔɔ mumɔŋ niyenii nɛɛ waa. Belɛ, te esa akɛ wɔfee wɔnii yɛ ŋaawoi komɛi ni akɛhaa yɛ be kɛ beaŋ lɛ he wɔha tɛŋŋ? Ákɛ nɔkwɛmɔnɔ lɛ, Nyɔŋmɔ Wiemɔ lɛ woɔ Kristofoi ŋaa ni amɛbote gbalashihilɛ mli “yɛ Nuŋtsɔ lɛ mli” pɛ. (1 Kor. 7:39) Yɛ nɔ ni fa fe afii oha ni eho lɛ amli lɛ, asusu sane nɛɛ he yɛ Buu-Mɔɔ lɛ mli yɛ be kɛ beaŋ. Saji ni kɔɔ ŋaawoo nɛɛ kɛ ŋaawoi krokomɛi ni ajɛ mumɔŋ akɛha lɛ he ni Kristo nyɛmimɛi lɛ ŋmalaa lɛ tsɔɔ faŋŋ akɛ amɛsumɔɔ wɔ ni amɛsusuɔ wɔmumɔŋ hilɛkɛhamɔ he. Kaimɔi nɛɛ atoi ni wɔɔbo lɛ ji gbɛ kome ni wɔɔtsɔ nɔ wɔtsɔɔ akɛ wɔnyiɛɔ wɔ-Hiɛnyiɛlɔ ni eye emuu ni ji Yesu Kristo lɛ sɛɛ.

Abɛi 4:18 lɛ kɛɔ akɛ: “Jalɔi atempɔŋ lɛ tamɔ la ni kpɛɔ ni eyaa nɔ ekpɛɔ aahu kɛyashiɔ shwane fintiŋŋ.” Hɛɛ, Yesu hiɛnyiɛmɔ lɛ haaa wɔta he kome pɛ, shi moŋ lɛ ehaa wɔyaa wɔhiɛ. Gbɛ kroko ni wɔɔtsɔ nɔ wɔkɛ Kristo ‘nyɛmimɛi’ lɛ afee ekome ji, su kpakpa ni wɔɔjie lɛ kpo yɛ Ŋmalɛ mli anɔkwalei ahe shishinumɔ hei ni “tsulɔ anɔkwafo kɛ nilelɔ” lɛ ŋmalaa lɛ he.—Mat. 24:45.

Agbɛnɛ hu, wɔtsɔɔ akɛ wɔboɔ Kristo ‘nyɛmimɛi’ lɛ atoi kɛtsɔ nɔkwɛlɔi ni aholeɔ yɛ Kristofoi asafo lɛ mli lɛ ni wɔkɛ amɛaafee ekome lɛ nɔ. Bɔfo Paulo kɛɛ akɛ: “Nyɛboa nyɛtsɔɔlɔi lɛ atoi ni nyɛbaa nyɛhe shi nyɛhaa amɛ; ejaakɛ amɛ amɛbuɔ nyɛsusumai lɛ ahe.” (Heb. 13:17) Ákɛ nɔkwɛmɔnɔ lɛ, ekolɛ asafoŋ onukpa ko baawo wɔ ŋaa yɛ bɔ ni ehe hiaa ni wɔfee gbɛkɛ Weku Jamɔ daa lɛ he loo ebaawo wɔ ŋaa yɛ wɔshiɛmɔ nitsumɔ lɛ fãi komɛi ahe. Ekolɛ nɔkwɛlɔ gbɛfalɔ ko baajɛ Ŋmalɛ lɛ mli ewo wɔ ŋaa yɛ Kristofoi ashihilɛ gbɛ pɔtɛɛ ko he. Kɛ́ wɔjɛ wɔsuɔmɔ mli wɔkɛ ŋaawoi ni tamɔ nakai tsu nii lɛ, no tsɔɔ akɛ wɔnyiɛ Yesu sɛɛ akɛ wɔ-Hiɛnyiɛlɔ.

Dɔlɛ sane ji akɛ, hiɛnyiɛlɔi kpakpai bɛ je lɛ mli. Shi kwɛ bɔ ni Kristo hiɛnyiɛmɔ ni suɔmɔ yɔɔ mli ni wɔnyiɛɔ sɛɛ lɛ haa wɔhe jɔɔ wɔ! Belɛ nyɛhaa wɔfea bɔ fɛɛ bɔ ni wɔɔnyɛ ni wɔfee toi wɔha wɔ-Hiɛnyiɛlɔ lɛ ni wɔkɛ mɛi ni ekɛtsuɔ nii ŋmɛnɛ lɛ afee ekome.

[Mfonirii ni yɔɔ baafa 27]

Ani okɛ Ŋmalɛ mli ŋaawoo akɛ wɔkɛ mɛi ni heee yeee lɛ akagbala kɔŋtso kome lɛ tsuɔ nii?