Kristofoi Awekui—“Nyɛsaa Nyɛhe Nyɛtoa”
Kristofoi Awekui—“Nyɛsaa Nyɛhe Nyɛtoa”
“Nyɛsaa nyɛhe nyɛtoa, ejaakɛ ŋmɛlɛtswaa ni nyɛhiɛ kãaa nɔ lɛ nɔ gbɔmɔ bi lɛ baaba.”—LUKA 12:40.
1, 2. Mɛni hewɔ esa akɛ wɔbo Yesu kɔkɔbɔɔ akɛ ‘wɔsaa wɔhe wɔto’ lɛ toi lɛ?
‘BENI gbɔmɔ bi lɛ aaaba yɛ enunyam lɛ mli, ní eeegbala gbɔmɛi amli’ lɛ, nɛgbɛ ekɛ bo kɛ oweku lɛ baayadamɔ? (Mat. 25:31, 32) Akɛni nifeemɔ nɛɛ baaya nɔ yɛ ŋmɛlɛtswaa ni wɔhiɛ kãaa nɔ mli hewɔ lɛ, kwɛ bɔ ni ehe hiaa waa ni wɔbo Ŋmalɛ naa kɔkɔbɔɔ akɛ ‘wɔsaa wɔhe wɔto’ lɛ toi!—Luka 12:40.
2 Yɛ nikasemɔ ni tsɔ hiɛ lɛ mli lɛ, wɔsusu bɔ ni kɛ́ weku mlibii lɛ ateŋ mɔ fɛɛ mɔ kɛ hiɛdɔɔ tsu sɔ̃ ni kã enɔ lɛ he nii lɛ, no baanyɛ aye abua weku muu lɛ fɛɛ koni amɛya nɔ amɛshi kpe yɛ mumɔŋ lɛ he. Nyɛhaa wɔsusua nibii krokomɛi ni wɔbaanyɛ wɔfee kɛtswa wɔweku lɛ wɔma shi yɛ mumɔŋ lɛ he wɔkwɛa.
Nyɛhaa Nyɛhiŋmɛii ‘Anɔ Atsea’
3, 4. (a) Mɛni esa akɛ Kristofoi awekui ahiɛ ahi amɛhe nɔ yɛ he? (b) Mɛni kɛ́ wɔfee lɛ etsɔɔ akɛ wɔhiŋmɛi ‘nɔ tse’?
3 Bɔni afee ni wekui asaa amɛhe amɛto Kristo baa lɛ, esa akɛ amɛkwɛ amɛhe nɔ jogbaŋŋ koni amɛkakpalaŋ kɛjɛ anɔkwa jamɔ saji ahe. Esa akɛ amɛhiɛ ahi amɛhe nɔ koni nibii komɛi akagbala amɛjwɛŋmɔ. Akɛni heloonaa nibii asɛɛtiumɔ ji tsɔne ni edu wekui babaoo hewɔ lɛ, nyɛhaa wɔsusua nɔ ni Yesu wie yɛ wɔhiŋmɛii ni wɔɔha ‘enɔ atse’ lɛ he lɛ he wɔkwɛa. (Nyɛkanea Luka 11:34.) Tamɔ bɔ ni kane baanyɛ aha gbɛ ko ni wɔnyiɛ nɔ lɛ nɔ atse koni wɔkagbee shi lɛ, nibii ni wɔkɛ wɔfonirifeemɔŋ ‘tsui hiŋmɛii’ lɛ kwɛɔ lɛ baanyɛ aha gbɛ ni wɔkɔ lɛ nɔ atse koni wɔkatɛ yɛ mumɔŋ.—Efe. 1:18.
4 Kɛ́ wɔhiŋmɛi baana nii jogbaŋŋ lɛ, esa akɛ efee nɔ ni tsuɔ nii jogbaŋŋ, ni baanyɛ ama nɔ ko pɔtɛɛ ko nɔ. Nakai nɔŋŋ eji yɛ wɔtsui hiŋmɛi lɛ he. Kɛ́ wɔnyɛɔ wɔkɛ wɔjwɛŋmɔ maa yiŋtoo kome pɛ nɔ lɛ, belɛ wɔfonirifeemɔŋ hiŋmɛi lɛ nɔ tse. Yɛ nɔ najiaŋ ni wɔkɛ wɔjwɛŋmɔ aaama heloonaa nibii anɔ, ni wɔɔfee yeyeeye fe nine hu yɛ wɔweku lɛ heloonaa hiamɔ nii ahe lɛ, wɔkɛ wɔhiŋmɛi maa mumɔŋ nibii anɔ moŋ. (Mat. 6:33) Nɔ ni etsɔɔ ji akɛ wɔmii baashɛ heloonaa hiamɔ nii ni Nyɔŋmɔ kɛhaa wɔ lɛ ahe, ni wɔkɛ esɔɔmɔ lɛ baaye klɛŋklɛŋ gbɛhe yɛ wɔshihilɛ mli.—Heb. 13:5.
5. Mɛɛ gbɛ nɔ oblayoo fioo ko ha ana akɛ ‘ehiŋmɛi’ yɛ Nyɔŋmɔ sɔɔmɔ nɔ?
5 Mɛɛ yibiiwoo kpakpai po jɛɔ mli kɛbaa nɛkɛ kɛji akɛ atsɔse gbekɛbii ni amɛha amɛhiŋmɛi nɔ tse! Susumɔ oblayoo fioo ko ni jɛ Ethiopia lɛ nɔkwɛmɔnɔ lɛ he okwɛ. Ebɔ mɔdɛŋ yɛ eskul kai lɛ amli aahu akɛ beni egbe sɛkɛndre skul naa lɛ, aha lɛ hegbɛ ni etsa eskul lɛ nɔ koni awo skulyaa lɛ he nyɔmɔ aha lɛ. Shi akɛni ekɛ ehiŋmɛi ema Yehowa sɔɔmɔ nɔ hewɔ lɛ, eŋɔɔɔ hegbɛ nɛɛ. No sɛɛ etsɛɛɛ lɛ, ená nitsumɔ ko ni abaawo lɛ nyɔmɔ dɔlai 4,200 daa nyɔɔŋ nɔ—nyɔmɔwoo ni fa kwraa fe nɔ ni kɛ́ hooo lɛ awoɔ nitsulɔi ni yɔɔ emaŋ lɛ nɔ lɛ. Shi gbekɛ yoo lɛ ‘hiŋmɛi’ yɛ gbɛgbamɔ nitsumɔ lɛ nɔ. Enyɛ ekpoo nitsumɔ nɛɛ ní efɔlɔi ayelikɛbuamɔ bɛ mli. Te efɔlɔi nu he amɛha tɛŋŋ beni amɛná amɛle nɔ ni amɛbiyoo lɛ efee lɛ? Hɛɛ, amɛ kɛ lɛ fɛɛ ná miishɛɛ, ni amɛkɛɛ lɛ akɛ eha amɛtsui enyɔ amɛmli waa!
6, 7. Mɛɛ oshara esa akɛ ‘wɔhiɛ ahi wɔhe nɔ’ yɛ he?
6 Amimyeli he kɔkɔbɔɔ yɛ Yesu wiemɔi ni aŋma yɛ Luka 11:34 lɛ mli. Yesu kɛ wiemɔ ni ji “nɔ tse” lɛ etooo wiemɔ ni ji “nɔ tseee” lɛ he, shi moŋ ekɛto wiemɔ ni ji “ehiii” lɛ he. ‘Hiŋmɛi ni ehiii’ lɛ hiɛ kɔ̃ɔ nii anɔ, loo eyeɔ amim. (Luka 11:34) Te Yehowa naa hiɛkɔ̃ɔ loo amimyeli ehaa tɛŋŋ? Biblia lɛ kɛɔ akɛ: “Ajwamaŋbɔɔ kɛ nyaŋemɔ nitsumɔ fɛɛ aloo hiɛjoomɔ [loo hiɛkɔ̃ɔ] lɛ akatsĩ tã tete yɛ nyɛteŋ.”—Efe. 5:3.
7 Ebaanyɛ efee nɔ ni waaa akɛ wɔɔna mɛi krokomɛi akɛ amimyelɔi, shi ebɛ mlɛo akɛ wɔɔna akɛ wɔji amimyelɔi. Belɛ, nilee yɛ mli akɛ wɔɔbo Yesu ŋaawoo nɛɛ toi akɛ: “Nyɛkwɛa jogbaŋŋ ni nyɛhiɛ ahia nyɛhe nɔ yɛ hiɛjoomɔi srɔtoi fɛɛ he.” (Luka 12:15, Ga Biblia hee) Enɛ baabi ni wɔpɛi wɔmli kɛtao nɔ ni wɔkɛ wɔtsui ema nɔ. Esa akɛ Kristofoi awekui kɛ hiɛdɔɔ asusu be kɛ shika ni amɛfiteɔ yɛ hiɛtserɛjiemɔ, hejɔɔmɔ, kɛ heloonaa nibii anaabuamɔ he lɛ he.
8. Te wɔɔfee tɛŋŋ wɔha ‘wɔhiɛ ahi wɔhe nɔ’ yɛ nihemɔ he?
8 Jeee shika abɔ ni ohiɛ lɛ pɛ he esa akɛ osusu dani okpɛ oyiŋ kɛji akɛ obaahé nɔ ko loo ohéŋ. Bi ohe saji tamɔ nɔ ni nyiɛ sɛɛ nɛɛ akɛ: ‘Ani maná be ni mikɛfɔ nitsumɔ ni makwɛ nɔ jogbaŋŋ? Be enyiɛ ebaahe dani male nii lɛ kɛnitsumɔ jogbaŋŋ?’ Oblahii kɛ oblayei bibii, nyɛkahaa adafitswaa ni yaa nɔ yɛ je lɛ mli akɛ nibii komɛi ahe baaba sɛɛnamɔ kɛha nyɛ lɛ lakaa nyɛ, ni no ha nyɛnu he akɛ nyɛná atadei pɔtɛɛ komɛi ni jara wala loo nibii krokomɛi shi amɛhe ehiaaa nyɛ lɛ kɛkɛ ni nyɛsusuuu he. Nyɛyea nyɛhe nɔ. Kɛfata he lɛ, esa akɛ mɔ fɛɛ mɔ asusu bɔ ni nɔ ni etaoɔ ni ehé lɛ baaha weku lɛ asaa ehe eto gbɔmɔ Bi lɛ baa lɛ he. Nyɛnáa hemɔkɛyeli yɛ Yehowa shiwoo akɛ: “Mishiŋo ni misaa mikwaŋo gbi ko gbi ko” lɛ mli.—Heb. 13:5.
Nyɛtiua Mumɔŋ Otii Asɛɛ
9. Kɛ́ wekui tiu mumɔŋ otii asɛɛ lɛ, mɛni baanyɛ aja mli kɛba?
9 Gbɛ kroko ni weku mlibii lɛ baanyɛ awaje amɛhemɔkɛyeli ni amɛha amɛweku muu lɛ fɛɛ he awa yɛ mumɔŋ ji mumɔŋ otii ni amɛkɛaamamɔ amɛhiɛ ni amɛtiu otii nɛɛ asɛɛ lɛ. Nakai ni wekui lɛ aaafee lɛ baanyɛ aye abua amɛ ni amɛna kɛji amɛmiiya amɛhiɛ yɛ oti ni amɛkɛma amɛhiɛ akɛ amɛbaasa Yehowa hiɛ lɛ mli lo, ni no baaye abua amɛ ni amɛna nibii ni esa akɛ amɛkɛye klɛŋklɛŋ gbɛhe yɛ amɛshihilɛ mli.—Nyɛkanea Filipibii 1:10.
10, 11. Ákɛ weku lɛ, mɛɛ mumɔŋ otii nyɛtiuɔ sɛɛ, ni mɛɛ otii nyɛbaasumɔ ni nyɛkɛmamɔ nyɛhiɛ wɔsɛɛ?
10 Kɛ́ wekui kɛ otii bibii ni kɛ́ hooo kwraa lɛ weku lɛ mlibii fɛɛ baanyɛ ashɛ he po mamɔ amɛhiɛ lɛ, ebaanyɛ ewo yibii kpakpai babaoo. Ákɛ nɔkwɛmɔnɔ lɛ, nyɛhaa wɔsusua oti ni ji akɛ wɔbaakwɛ daa gbi ŋmalɛ lɛ mli daa lɛ he wɔkwɛa. Wiemɔi ni weku mlibii lɛ baawie lɛ baanyɛ aye abua weku yitso lɛ koni ena he ni mɔ fɛɛ mɔ eda yɛ mumɔŋ kɛyashɛ. Kɛ́ weku lɛ kɛfee oti ni ma amɛhiɛ akɛ amɛbaafee ekome kɛkane Biblia lɛ daa lɛ, no baaha amɛná hegbɛ ni nɔ bɛ ni baaha gbekɛbii lɛ anyɛ akane nii jogbaŋŋ, ni amɛbaanu Biblia mli shɛɛ sane lɛ hu shishi jogbaŋŋ. (Lala 1:1, 2) Ani esaaa akɛ wɔkɛfeɔ oti ni ma wɔhiɛ akɛ wɔbaaya wɔhiɛ yɛ gbɛ nɔ ni wɔtsɔɔ wɔsɔleɔ lɛ mli? Oti kroko ni nɔ bɛ ni wɔbaanyɛ wɔtiu sɛɛ ji mumɔ lɛ yibii lɛ fãi srɔtoi lɛ akpo ni wɔɔjie jogbaŋŋ lɛ. (Gal. 5:22, 23) Aloo mɛni hewɔ nyɛtaooo gbɛi anɔ ni nyɛbaanyɛ nyɛtsɔ nyɛjie musuŋtsɔlɛ kpo nyɛtsɔɔ mɛi ni wɔkɛkpeɔ yɛ shiɛmɔ nitsumɔ lɛ mli lɛ? Kɛ́ nyɛbɔ mɔdɛŋ nyɛfee nakai akɛ weku lɛ, no baanyɛ aye abua gbekɛbii lɛ ni amɛmusuŋ atsɔ amɛ yɛ mɛi ahe, ni enɛ baanyɛ eha amɛná shwelɛ lɛ akɛ amɛaasɔmɔ akɛ daa gbɛgbalɔi loo maŋsɛɛ sanekpakpa shiɛlɔi.
11 Mɛni hewɔ osusuuu otii komɛi ni bo kɛ oweku lɛ baanyɛ atiu sɛɛ lɛ he? Ani oweku lɛ baanyɛ amɛkɛfee oti ni ma amɛhiɛ akɛ amɛkɛ be babaoo baatsu nii yɛ shiɛmɔ nitsumɔ lɛ mli? Ani nyɛbaanyɛ nyɛkwɛ gbɛi ni nyɛbaanyɛ nyɛtsɔ nɔ nyɛye gbeyeishemɔ ni nyɛyɔɔ kɛha tɛlifoŋ nɔ odaseyeli, gbɛjegbɛ nɔ odaseyeli, loo odase ni ayeɔ yɛ nitsumɔhei lɛ nɔ? Ni sɔɔmɔ yɛ he ni Maŋtsɛyeli shiɛlɔi ahe ehia yɛ lɛ hu? Ani weku lɛ mlinyo ko baanyɛ akase wiemɔ hee ko bɔni afee ni enyɛ ekɛ sanekpakpa lɛ aha mɛi ni wieɔ maŋsɛɛ wiemɔ lɛ?
12. Mɛni weku yitsei baanyɛ afee kɛye abua amɛwekui lɛ koni amɛya amɛhiɛ yɛ mumɔŋ?
12 Ákɛ weku yitso lɛ, kadimɔ nibii ni oweku lɛ baanyɛ aya amɛhiɛ yɛ mli lɛ. No sɛɛ lɛ, okɛ otii pɔtɛi ni baaha nyɛya nyɛhiɛ lɛ amamɔ nyɛhiɛ. Esa akɛ otii ni nyɛkɛbaamamɔ nyɛhiɛ akɛ weku lɛ afee nɔ ni nyɛshihilɛ kɛ nyɛmɔi ni nyɛyɔɔ lɛ baaŋmɛ nyɛ gbɛ koni nyɛshɛ he. (Abɛi 13:12) Ŋwanejee ko bɛ he akɛ, ebaahe be dani mɔ ko baashɛ oti ko ni sɛɛnamɔ yɔɔ he ni ekɛma ehiɛ lɛ he. No hewɔ lɛ, hemɔ be kɛjɛ be ni okɛkwɛɔ tɛlivishiŋ lɛ mli ni okɛtiu mumɔŋ nibii asɛɛ. (Efe. 5:15, 16) Bɔɔ mɔdɛŋ waa ni oha oweku lɛ ashɛ otii ni nyɛkɛmamɔɔ nyɛhiɛ lɛ he. (Gal. 6:9) ‘Mɛi fɛɛ baana’ weku ni tiuɔ mumɔŋ otii asɛɛ lɛ shweremɔ lɛ faŋŋ.—1 Tim. 4:15.
Nyɛfea Gbɛkɛ Weku Jamɔ Daa
13. Mɛɛ tsakemɔ afee yɛ daa otsi asafoŋ kpee he gbɛjianɔtoo lɛ mli, ni mɛɛ sanebimɔi esa akɛ wɔsusu he?
13 Nɔ ko ni baaye abua wekui waa koni ‘amɛsaa amɛhe amɛto’ gbɔmɔ Bi lɛ baa ji tsakemɔ ni sa kadimɔ ni afee yɛ daa otsi kpee he gbɛjianɔtoo lɛ mli kɛjɛ January 1, 2009 kɛbaa lɛ. Akɛ Asafo Woloŋ Nikasemɔ ni kulɛ afeɔ yɛ gbi kroko nɔ lɛ fata Teokrase Sɔɔmɔ Skul kɛ Sɔɔmɔ Kpee lɛ he. Afee tsakemɔ nɛɛ koni Kristofoi awekui aná hegbɛ ni amɛkɛwaje wekukpãa ni kã amɛ kɛ Nyɔŋmɔ teŋ lɛ kɛtsɔ gbɛkɛ pɔtɛɛ ko ni amɛaahala yɛ otsi lɛ mli kɛha weku jamɔ daa otsi lɛ nɔ. Kɛjɛ beni tsakemɔ nɛɛ ba nɛɛ be eshwie mli, no hewɔ lɛ wɔbaanyɛ wɔbi wɔhe akɛ: ‘Ani mikɛ be ni wɔná lɛ miifee gbɛkɛ Weku Jamɔ loo aŋkro nikasemɔ? Ani minyɛ mitsu yiŋtoo hewɔ ni ato gbɛjianɔ nɛɛ he nii?’
14. (a) Mɛni ji yiŋtoo titri hewɔ ni esa akɛ wɔfee gbɛkɛ Weku Jamɔ loo aŋkro nikasemɔ daa otsi lɛ? (b) Mɛni hewɔ ehe miihia ni wɔhala gbɛkɛ ko ni wɔkɛkase nii lɛ?
14 Yiŋtoo titri hewɔ ni esa akɛ wɔfee gbɛkɛ Weku Jamɔ loo aŋkro nikasemɔ daa otsi lɛ ji, ni wɔkɛtsi wɔbɛŋkɛ Nyɔŋmɔ kpaakpa. (Yak. 4:8) Kɛ́ wɔhé be kɛkase Biblia lɛ daa, ni wɔná Bɔlɔ lɛ he nilee babaoo lɛ, no wajeɔ wekukpãa ni yɔɔ wɔ kɛ lɛ teŋ lɛ. Babaoo ni wɔtsiɔ wɔbɛŋkɛɔ Yehowa lɛ, babaoo ni shwelɛ ni wɔyɔɔ akɛ wɔbaasumɔ lɛ ‘kɛ wɔtsui fɛɛ kɛ wɔsusuma fɛɛ kɛ wɔjwɛŋmɔ fɛɛ kɛ wɔnyɛmɔ fɛɛ’ lɛ mli waa. (Mar. 12:30) Enɛ tsɔɔ faŋŋ akɛ, wɔmiisumɔ ni wɔbo Nyɔŋmɔ toi ni wɔtsɔmɔ ekaselɔi. (Efe. 5:1) Belɛ ehe miihia ni wɔfee gbɛkɛ Weku Jamɔ lɛ daa otsi, koni wɔkɛye wɔbua weku mlibii lɛ fɛɛ ni ‘amɛsaa amɛhe amɛto’ yɛ mumɔŋ beni wɔmɛɔ “amanehulu babaoo” ni agba afɔ shi lɛ. (Mat. 24:21) No baanyɛ aha ahere wɔyiwala.
15. Te gbɛkɛ Weku Jamɔ lɛ baanyɛ asa wekukpãa ni yɔɔ weku mlibii lɛ ateŋ lɛ he eha tɛŋŋ?
15 Yiŋtoo kroko hu yɛ Weku Jamɔ gbɛjianɔtoo lɛ sɛɛ—ní eye ebua weku mlibii lɛ ni wekukpãa ni yɔɔ amɛteŋ lɛ mli awa. Kɛ́ weku ko fee ekome kɛsusu mumɔŋ nibii ahe daa otsi lɛ, enáa wekukpãa ni yɔɔ weku mlibii lɛ ateŋ lɛ nɔ hewalɛ waa. Kwɛ bɔ ni wekukpãa ni yɔɔ gbalashihilɛ mli hefatalɔi ateŋ lɛ mli waa kɛ́ amɛ fɛɛ amɛná miishɛɛ akɛni amɛfee ekome kɛmiikase Biblia lɛ hewɔ lɛ! (Nyɛkanea Jajelɔ 4:12.) Ekã shi faŋŋ akɛ, kɛ́ fɔlɔi kɛ amɛbii fee ekome kɛjá Nyɔŋmɔ lɛ, suɔmɔ ni ji “kpãa ni eye emuu ni feɔ mɛi ekome lɛ” baakpɛ amɛ.—Kol. 3:14, NW.
16. Gbaa bɔ ni nyɛmimɛi yei etɛ komɛi ená gbɛkɛ ko ni amɛhala kɛha Biblia kasemɔ lɛ he sɛɛ lɛ otsɔɔ.
16 Nyɛhaa wɔsusua bɔ ni nyɛmimɛi yei etɛ komɛi ená gbɛkɛ ko ni ahalaa kɛfeɔ aŋkro loo weku nikasemɔ lɛ he sɛɛ lɛ he wɔkwɛa. Eyɛ mli akɛ yei etɛ ni ji okulafoi ni edara nɛɛ jeee wekumɛi moŋ, shi amɛyɛ maŋ kome mli ni amɛhi shi akɛ nanemɛi kpakpai afii abɔ. Akɛni amɛmiisumɔ ni amɛkɛ amɛhe abɔ babaoo, ni yɛ nakai beaŋ nɔŋŋ lɛ amɛmiisumɔ ni amɛnaanyobɔɔ lɛ atswa amɛ ama shi yɛ mumɔŋ hu hewɔ lɛ, amɛkpɛ mli akɛ amɛbaahala gbɛkɛ ko ní amɛkpe kɛkase Biblia lɛ. Amɛkɛ ‘Ye Nyɔŋmɔ Maŋtsɛyeli lɛ He Odase Kɛmɔ Shi’ wolo lɛ je amɛnikasemɔ lɛ shishi. Amɛteŋ mɔ kome kɛɛ akɛ: “Wɔnáa nikasemɔ lɛ he miishɛɛ aahu akɛ wɔkɛ nɔ ni fa fe ŋmɛlɛtswaa kome kaseɔ nii lɛ. Wɔbɔɔ mɔdɛŋ akɛ wɔbaafee shihilɛi ni wɔnyɛmimɛi ni hi shi yɛ klɛŋklɛŋ afii 100 lɛ mli lɛ hi shi yɛ mli lɛ he mfoniri yɛ wɔjwɛŋmɔ mli, ni wɔsusuɔ nɔ ni wɔbaafee kɛ́ wɔyɛ shihilɛi ni tamɔ nakai mli lɛ he. No sɛɛ lɛ, wɔbɔɔ mɔdɛŋ akɛ wɔkɛ otii ni wɔmɔmɔ yɛ wɔnikasemɔ lɛ mli lɛ baatsu nii yɛ shiɛmɔ nitsumɔ lɛ mli. Enɛ eha wɔnáa miishɛɛ babaoo yɛ wɔ-Maŋtsɛyeli shiɛmɔ kɛ kaselɔfeemɔ nitsumɔ lɛ mli, ni wɔshiɛmɔ nitsumɔ lɛ mɔɔ shi jogbaŋŋ.” Gbɛjianɔtoo nɛɛ etswa nanemɛi kpakpai etɛ nɛɛ ema shi yɛ mumɔŋ, ni eha amɛnaanyobɔɔ lɛ hu mli ewa. Amɛkɛɛ akɛ: “Wɔhiɛ sɔɔ gbɛjianɔtoo nɛɛ waa.”
17. Mɛɛ nibii haa gbɛkɛ Weku Jamɔ lɛ yeɔ omanye?
17 Ni bo hu? Mɛɛ gbɛ nɔ onáa gbɛkɛ ko ni ahalaa kɛfeɔ Weku Jamɔ loo aŋkro nikasemɔ lɛ he sɛɛ? Kɛ́ afolɔɔ mli lɛ, enyɛŋ etsu yiŋtoi ahewɔ ni ato he gbɛjianɔ lɛ he nii. Dani be ni ato kɛha nikasemɔ lɛ baashɛ lɛ, esa akɛ mɔ fɛɛ mɔ ni yɔɔ weku lɛ mli lɛ efee klalo kɛha nikasemɔ lɛ. Esaaa akɛ aŋmɛɔ gbɛ ni nibii ni he ehiaaa tsɔ fiteɔ nikasemɔ ni abaafee lɛ. Kɛfata he lɛ, esa akɛ saji ni abaakase lɛ afee nɔ ni oweku lɛ baaná he sɛɛ. Mɛni obaanyɛ ofee koni nikasemɔ lɛ afee nɔ ni yɔɔ miishɛɛ? Tsɔɔmɔ nii yɛ gbɛ ni mɔɔ shi nɔ, ni oha bulɛ kɛ toiŋjɔlɛ ahi nikasemɔ lɛ shishi.—Yak. 3:18. *
Nyɛyaa nɔ ‘Nyɛshia Kpe’ ni “Nyɛsaa Nyɛhe Nyɛtoa”
18, 19. Te esa akɛ le ni ole akɛ gbɔmɔ Bi lɛ baa lɛ ebɛŋkɛ lɛ aná bo kɛ oweku lɛ nɔ hewalɛ eha tɛŋŋ?
18 Bɔ ni je lɛ mli shihilɛ yaa nɔ efiteɔ yɛ wɔgbii nɛɛ amli lɛ haa efeɔ faŋŋ akɛ kɛjɛ 1914 kɛbaa lɛ, Satan jeŋ fɔŋ lɛ ebote enaagbee gbii lɛ amli. Etsɛŋ Harmagedon baafɛ́. Eshwɛ fioo ni be ni gbɔmɔ Bi lɛ baaba ni ebatsu kojomɔ ni Yehowa ekojo efɔŋfeelɔi lɛ he nii lɛ baashɛ. (Lala 37:10; Abɛi 2:21, 22) Ani esaaa akɛ sane nɛɛ ni ole lɛ náa bo kɛ oweku lɛ nɔ hewalɛ?
19 Ani okɛ Yesu ŋaawoo akɛ oha ohiŋmɛi ‘nɔ atse’ lɛ miitsu nii? Be mli ni mɛi ni yɔɔ je lɛ mli lɛ miitiu ninamɔ, gbɛihemɔ, loo hegbɛ sɛɛ lɛ, ani oweku lɛ miitiu mumɔŋ otii asɛɛ? Ani oonyɛ oofee gbɛkɛ Weku Jamɔ loo aŋkro nikasemɔ daa otsi? Ani ooshɛ yiŋtoi ahewɔ ni ato gbɛjianɔ nɛɛ lɛ ahe? Taakɛ asusu he yɛ nikasemɔ ni tsɔ hiɛ lɛ mli lɛ, ani ootsu Ŋmalɛ naa sɔ̃ ni kã onɔ akɛ wu, ŋa, loo bi lɛ he nii koni okɛye obua weku muu lɛ fɛɛ ni amɛya nɔ ‘amɛshi kpe’? (1 Tes. 5:6) Kɛ́ nakai ni lɛ, no tsɔɔ akɛ ‘oosaa ohe ooto’ gbɔmɔ Bi lɛ baa lɛ.
[Shishigbɛ niŋmaa]
^ kk. 17 Kɛha saji ni kɔɔ nibii ni nyɛbaanyɛ nyɛkase yɛ gbɛkɛ Weku Jamɔ lɛ shishi kɛ bɔ ni nyɛbaanyɛ nyɛfee nikasemɔ lɛ ní nyɛwekui lɛ aná he sɛɛ ni efee nɔ ni miishɛɛ yɔɔ mli lɛ he lɛ, nyɛkwɛa October 15, 2009 Buu-Mɔɔ lɛ baafa 29-31.
Mɛni Okase?
• Tsɔɔmɔ bɔ ni Kristofoi awekui baanyɛ ‘asaa amɛhe amɛto’ kɛtsɔ . . .
amɛhiŋmɛi “nɔ” ni amɛaaha ‘etse’ lɛ nɔ lɛ mli.
mumɔŋ otii ni amɛkɛaamamɔ amɛhiɛ ni amɛtiu sɛɛ lɛ nɔ lɛ mli.
gbɛkɛ Weku Jamɔ ni amɛaafee daa otsi lɛ nɔ lɛ mli.
[Nikasemɔ lɛ he Sanebimɔi]
[Mfoniri ni yɔɔ baafa 13]
Kɛ́ wɔhiŋmɛi “nɔ tse” lɛ no baatsirɛ wɔ koni wɔkaha je lɛŋ nibii lɛ gbala wɔjwɛŋmɔ