“Nɔkwɛlɔ Kpakpa kɛ Naanyo ni Asumɔɔ”

JOHN (JACK) BARR, ni sɔmɔ akɛ Yehowa Odasefoi lɛ a-Nɔyeli Kuu lɛ mlinyo lɛ gbe eshikpɔŋ lɛ nɔ sɔɔmɔ lɛ naa Hɔɔ leebi, December 4, 2010. Eye afii 97. Awie ehe akɛ eji “nɔkwɛlɔ kpakpa kɛ naanyo ni asumɔɔ.”

Afɔ Nyɛminuu Jack Barr yɛ Aberdeen, yɛ Scotland. Afɔ amɛyi etɛ, ni lɛ ji naagbee mɔ. Emami kɛ epapa fɛɛ fata mɛi ni afɔ amɛ mu lɛ ahe. Nyɛminuu Barr wie egbekɛbiiashi he kɛ miishɛɛ; ehiɛ sɔ nɔkwɛmɔnɔ kpakpa ni etsɛ kɛ enyɛ ni esumɔ amɛ lɛ fee lɛ.

Beni eye kɛjɛ afii 13 kɛyaa lɛ, ebawa waa kɛha oblanyo Jack akɛ ekɛ mɛi ni eleee baagba sane. Shi emia ehiɛ waa ni eye nakai su lɛ nɔ, ni be ko Hɔgbaa shwane yɛ afi 1927 beni eye afii 14 lɛ, ekɛɛ epapa akɛ efee klalo akɛ ebaafata ehe kɛtsu shĩa kɛ shĩa shiɛmɔ nitsumɔ lɛ. No ekɛje shishi. Nyɛminuu Barr kɛ hiɛdɔɔ shiɛ sanekpakpa lɛ kɛjɛ nakai gbi lɛ nɔ kɛyashi egbo.

Oshara ko ni nina emami ni esumɔɔ lɛ waa, ni shwɛ fioo kulɛ egbo lɛ ha Jack kɛ hiɛdɔɔ susu yiŋtoo ni yɔɔ wala sɛɛ lɛ he, ni yɛ afi 1929 lɛ ejɔɔ ewala nɔ eha Yehowa ni yɛ afi 1934 beni ená hegbɛ lɛ nɔŋŋ lɛ eha abaptisi lɛ ni ekɛfee ehenɔjɔɔmɔ lɛ he okadi. Kɛkɛ ni yɛ afi 1939 lɛ, etsɔ Betel weku ni yɔɔ London, yɛ England lɛ mlinyo. No ekɛje afii 71 ni ekɛsɔmɔ akɛ be fɛɛ sɔɔlɔ lɛ shishi.

Yɛ October 29, 1960 lɛ, Nyɛminuu Barr kɛ Mildred Willett ni kɛ afii pii sɔmɔ akɛ gbɛgbalɔ kɛ maŋsɛɛ sanekpakpa shiɛlɔ ni yɔɔ ekãa lɛ bote gbalashihilɛ mli, ni ekɛɛ akɛ amɛgbalashihilɛ lɛ ji “wekukpãa ko ni nɔ bɛ kwraa.” Abale Nyɛminuu kɛ Nyɛmiyoo Barr akɛ gbalashihilɛ mli hefatalɔi ni sumɔɔ amɛhe waa ni feɔ nɔkwɛmɔnɔ kpakpa, ni amɛtee nɔ amɛhi shi nakai kɛyashi Mildred gbe eshikpɔŋ lɛ nɔ sɔɔmɔ lɛ naa yɛ October 2004. Nyɛminuu kɛ Nyɛmiyoo Barr feɔ ekome kɛkaneɔ Biblia lɛ fã ko daa gbi yɛ afii ni amɛkɛhi shi akɛ gbalashihilɛ mli hefatalɔi lɛ fɛɛ mli.

Yɛ mɛi ni le Jack Barr lɛ agbɛfaŋ lɛ, kɛ́ amɛnu egbɛ́i lɛ, nɔ ni baa amɛjwɛŋmɔŋ ji, nuu ni be fɛɛ be lɛ ejɛɔ Ŋmalɛ mli ewoɔ ŋaa ni sa, ni mlihilɛ yɔɔ mli. Eji nitsulɔ ni bɔɔ ehe mɔdɛŋ, esusuɔ mɔ he, ni eji nɔkwɛlɔ ni yɔɔ suɔmɔ kɛ naanyo ni kpaaa yɛ mɔ sɛɛ hu. Hetoi ni ehaa, wiemɔi ni ehaa, kɛ esɔlemɔi feɔ lɛ faŋŋ akɛ anɔkwale lɛ ná enɔ hewalɛ waa, ni akɛ wekukpãa ni yɔɔ ekɛ Yehowa teŋ lɛ hu mli wa.

Eyɛ mli akɛ wɔhiɛ miitse wɔsuɔlɔ Nyɛminuu Barr waa moŋ, shi wɔ kɛ lɛ fɛɛ náa miishɛɛ yɛ nikeenii ni enine eshɛ nɔ ni ji akɛ egboŋ dɔŋŋ lɛ hewɔ—eji hegbɛ ko ni ekɛ miishɛɛ kpa gbɛ ni efɔɔ he wiemɔ. Eji nɔ ko ni kã etsui nɔ waa.—1 Kor. 15:53, 54. *

[Shishigbɛ niŋmaa]