‘Okɛ Woji lɛ, Titri lɛ nɔ ni Aŋmala yɛ Kooloi Ahewolo Nɔ lɛ Aba’

BƆFO Paulo kɛ wiemɔi nɛɛ tsu nii kɛbi enaanyo maŋsɛɛ sanekpakpa shiɛlɔ ni ji Timoteo lɛ ni ekɛ woji komɛi abaha lɛ. Mɛɛ woji no mli lɛ Paulo wieɔ he lɛ? Mɛni ha ewie nɔ ni ewie lɛ? Ni mɛni wɔbaanyɛ wɔkase kɛjɛ enibimɔ lɛ mli?

Beni Paulo ŋma wiemɔi nɛɛ yɛ klɛŋklɛŋ afii 100 Ŋ.B. lɛ teŋgbɛ lɛ, no mli lɛ ajara woji 39 ni feɔ Hebri Ŋmalɛi lɛ amli awo woji 22 loo 24 amli, ni eeenyɛ efee akɛ abuako amɛteŋ babaoo naa yɛ wolo kome mli, shi moŋ lɛ aŋmala eko fɛɛ eko yɛ wolo srɔto nɔ. Tsɔɔlɔ kpanaa ko ni atsɛɔ lɛ Alan Millard lɛ ŋma akɛ, eyɛ mli akɛ woji nɛɛ ajara wa moŋ, shi ‘ejeee nɔ ni shikatsɛmɛi nyɛɛɛ ahe.’ Kɛ́ hooo kwraa lɛ, amɛteŋ mɛi komɛi yɛ woji nɛɛ ateŋ ekome. Ákɛ nɔkwɛmɔnɔ lɛ, Etiopianyo piafonyo lɛ yɛ woji nɛɛ eko yɛ eshwiili lɛ mli, ni no mli lɛ “eekane gbalɔ Yesaia wolo lɛ.” Lɛ ji “Etiopiabii amaŋnyɛ Kandake lɛ piafonyo ni abuɔ ni kwɛɔ ejwetri fɛɛ nɔ lɛ.” Ekã shi faŋŋ akɛ, eyɛ nii bɔ ni sa ni baaha enyɛ ená Ŋmalɛi lɛ amli woji lɛ ekomɛi.—Bɔf. 8:27, 28.

Beni Paulo biɔ ni Timoteo afee nɔ ko eha lɛ lɛ, Paulo ŋma akɛ: “Atade lɛ ni mishi yɛ Troia yɛ Karpo ŋɔɔ lɛ, kɛ ooba lɛ okɛba, kɛ woji lɛ hu, titri lɛ amɛteŋ nii ni aŋmala yɛ kooloi ahewolo nɔ lɛ.” (2 Tim. 4:13, Ga Biblia hee) Enɛ tsɔɔ akɛ, no mli lɛ Paulo yɛ woji komɛi. Ekã shi faŋŋ akɛ, yɛ woji nɛɛ ateŋ lɛ, Nyɔŋmɔ Wiemɔ lɛ baafee nɔ ni he hiaa lɛ waa, aloo jeee nakai? Biblia he nilelɔ ko ni atsɛɔ lɛ A. T. Robertson lɛ ŋma kɛkɔ wiemɔ ni ji “amɛteŋ nii ni aŋmala yɛ kooloi ahewolo nɔ” ni yɔɔ ŋmalɛ kuku nɛɛ mli lɛ he akɛ: “Eeenyɛ efee akɛ woji nɛɛ ji Kpaŋmɔ Momo lɛ mli woji lɛ ekomɛi, ejaakɛ woji ni yɔɔ kooloi ahewolo nɔ lɛ jara wa [ni esɛɛ tsɛɔ] kwraa fe nɔ ni yɔɔ adaa nɔ lɛ.” Beni Paulo ji oblanyo lɛ, ‘atsɔse lɛ yɛ Gamaliel,’ ni ji Mose Mla lɛ tsɔɔlɔ ni emaŋbii lɛ buɔ lɛ lɛ, “naji anaa.” No hewɔ lɛ, shishinumɔ yɛ he akɛ Paulo yɛ Nyɔŋmɔ Wiemɔ lɛ mli woji lɛ ekomɛi.—Bɔf. 5:34; 22:3.

Bɔ ni Kristofoi kɛ Woji Tsu Nii Amɛha

Fɛɛ sɛɛ lɛ, no mli lɛ mɛi babaoo bɛ Ŋmalɛ Krɔŋkrɔŋ lɛ mli woji lɛ eko. Belɛ, te fee tɛŋŋ Kristofoi ni hi shi yɛ nakai beaŋ lɛ ateŋ mɛi babaoo nu Nyɔŋmɔ Wiemɔ lɛ? Wɔbaanyɛ wɔna hetoo lɛ yɛ klɛŋklɛŋ wolo ni Paulo ŋma Timoteo lɛ mli. Eŋma akɛ: “Okɛ ojwɛŋmɔ afɔ̃ ŋmalɛi lɛ akanemɔ kɛ asafo lɛ hamɔ . . . nɔ kɛyashi beyinɔ ni maba.” (1 Tim. 4:13, Ga Biblia hee) Asafo hiɛ nikanemɔ fata nifeemɔi ni tee nɔ yɛ mra be mli Kristofoi asafoŋ kpeei ashishi lɛ ahe, ni eji nifeemɔ ko ni kɛjɛ Mose beaŋ kɛbaa lɛ, afɔɔ feemɔ yɛ Nyɔŋmɔ webii ateŋ.—Bɔf. 13:15; 15:21; 2 Kor. 3:15.

Ákɛ asafoŋ onukpa lɛ, esa akɛ Timoteo ‘kɛ ejwɛŋmɔ afɔ̃’ nii ni akaneɔ waa koni mɛi anu lɛ “nɔ” koni mɛi ni bɛ Ŋmalɛi lɛ amli woji lɛ eko lɛ aná he sɛɛ. Ŋwanejee ko bɛ he akɛ, kɛ́ aakane Nyɔŋmɔ Wiemɔ lɛ yɛ asafo lɛ hiɛ lɛ, mɔ fɛɛ mɔ  boɔ toi jogbaŋŋ koni wiemɔ ko akaho ehe, ni fɔlɔi kɛ amɛbii susuɔ nɔ ni akaneɔ yɛ kpeei lɛ ashishi lɛ hu he yɛ shĩa.

Yesaia wolo lɛ he wolokpoi ni ale waa ni ana yɛ tɛkploi komɛi ni yɔɔ Ŋshɔ ni Egbo lɛ masɛi gbɛ lɛ amli lɛ kɛlɛ aaashɛ mitai 7.3. Akɛni akɛ tsei woɔ wolokpo lɛ naabui enyɔ lɛ fɛɛ, ni bei pii lɛ akɛ nɔ ko hàa he koni ekafite hewɔ lɛ, emli baatsii. Eeenyɛ efee akɛ, Kristofoi lɛ fã kpotoo nyɛɛɛ ahiɛ babaoo kɛya shiɛmɔ. Kɛ́ Paulo diɛŋtsɛ yɛ Ŋmalɛi lɛ amli woji lɛ ekomɛi po lɛ, eeenyɛ efee akɛ enyɛŋ ekɛ fɛɛ afã gbɛ srɔtoi ni efã lɛ. Ekã shi faŋŋ akɛ, eshi ekomɛi yɛ enaanyo Karpo ni yɔɔ Troia lɛ ŋɔɔ.

Mɛni Wɔbaanyɛ Wɔkase Kɛjɛ Paulo Nɔkwɛmɔnɔ lɛ Mli?

Dani Paulo, ni no mli lɛ awo lɛ tsuŋ yɛ Roma nɔ ni ji shii enyɔ nɔ lɛ, baabi Timoteo ni ekɛ woji lɛ abaha lɛ lɛ, eŋma akɛ: “Ta kpakpa lɛ, miwuu; foidamɔ lɛ, mida migbe naa; . . . Nɔ ni eshwɛ ni kã shi ha mi ji jalɛ akekre lɛ.” (2 Tim. 4:7, 8) Eeenyɛ efee akɛ Paulo ŋma wiemɔi nɛɛ aaafee afi 65 Ŋ.B. beni Nero waa Kristofoi lɛ ayi lɛ. Ena nɔ̃ yɛ etsuŋwoo nɛɛ mli waa. Anɔkwa sane ji akɛ, enu he akɛ etsɛŋ ni abaagbe lɛ. (2 Tim. 1:16; 4:6) Shishinumɔ yɛ he akɛ, ebi ni afee nɔ ni etsui shweɔ lɛ aha lɛ, no ji ákɛ akɛ ewoji lɛ abaha lɛ. Eyɛ mli akɛ ená nɔmimaa akɛ ewuu ta kpakpa lɛ egbe naa moŋ, shi ená shwelɛ akɛ ebaaya nɔ ewaje ehe kɛtsɔ Nyɔŋmɔ Wiemɔ lɛ ni eeekase lɛ nɔ.

Eeenyɛ efee akɛ, no mli lɛ, Timoteo yɛ Efeso lolo beni enine shɛ Paulo nibimɔ lɛ nɔ lɛ. (1 Tim. 1:3) Kɛ́ mɔ ko jɛ Efeso ni eyatsɔ Troia kɛtee Roma lɛ, ebaafã gbɛ kilomitai aaafee 1,600. Yɛ nakai wolo lɛ nɔŋŋ mli lɛ, Paulo wo Timoteo hewalɛ akɛ: “Bɔɔ mɔdɛŋ ni oba dani fɛibe lɛ ashɛ.” (2 Tim. 4:21) Biblia lɛ etsɔɔɔ kɛji Timoteo ná lɛlɛ ko ekwɔ kɛtee Roma ni enyɛ eyashɛ yɛ be ni Paulo tsɔɔ lɛ naa.

Mɛni wɔbaanyɛ wɔkase kɛjɛ bi ni Paulo bi ni akɛ ‘woji lɛ, titri lɛ amɛteŋ nii ni aŋmala yɛ kooloi ahewolo nɔ lɛ’ abaha lɛ lɛ mli? Etee nɔ ená shwelɛ kɛha Nyɔŋmɔ Wiemɔ lɛ yɛ be ni ehe jara lɛ fe fɛɛ yɛ eshihilɛ mli nɛɛ po mli. Ani ooyɔse akɛ, esu nɛɛ ji nɔ ni ha wekukpãa ni mli wa bakã ekɛ Nyɔŋmɔ teŋ, ehiɛ dɔ yɛ mumɔŋ nibii ahe be fɛɛ be, ni agbɛnɛ hu enyɛ ewo mɛi babaoo hewalɛ lɛ?

Ŋmɛnɛ lɛ, kwɛ bɔ ni ajɔɔ wɔ kɛ́ wɔ diɛŋtsɛ wɔyɛ Biblia tso muu lɛ fɛɛ eko! Wɔteŋ mɛi komɛi po yɛ Biblia babaoo kɛ agbɛnɛ Biblia shishitsɔɔmɔi srɔtoi. Taakɛ Paulo fee lɛ, esa akɛ wɔná shwelɛ ni baaha wɔsumɔ akɛ wɔnu Ŋmalɛi lɛ ashishi jogbaŋŋ. Wolo ni ji enyɔ ni Paulo ŋma kɛha Timoteo lɛ ji, woji 14 ni jɛ mumɔŋ ni Paulo ná hegbɛ eŋma lɛ ateŋ naagbee nɔ. Eŋma enibimɔ lɛ yɛ wolo nɛɛ naagbee gbɛ. Anɔkwa sane ji akɛ, fai ni Paulo kpa Timoteo ni ekɛ ‘woji lɛ, titri lɛ nɔ ni aŋmala yɛ kooloi ahewolo nɔ lɛ’ abaha lɛ lɛ ji, shwelɛi ni ená beni eshwɛ fioo ni ebaagbo lɛ ateŋ nɔ ni aŋmala lɛ ekome.

Ani oyɛ shwelɛ ni mli wa akɛ obaawuu hemɔkɛyeli lɛ he ta kpakpa lɛ kɛyashi naagbee taakɛ Paulo fee lɛ? Ani oosumɔ ni ofee mɔ ni kɛ hiɛdɔɔ baaya nɔ asɔmɔ Yehowa ni esaa ehe eto akɛ ebaatsu odaseyeli nitsumɔ lɛ kɛyashi beni Yehowa baakɛɛ wɔ akɛ ehi? Belɛ, mɛni hewɔ ofeee onii taakɛ Paulo wo Kristofoi hewalɛ ni amɛfee lɛ? “Ohiɛ ahi ohe nɔ kɛ tsɔɔmɔ lɛ nɔ” kɛtsɔ Biblia lɛ ni okɛ hiɛdɔɔ baakase daa lɛ nɔ, ejaakɛ amrɔ nɛɛ afee Biblia lɛ yɛ gbɛi srɔtoi babaoo ni mɛi babaoo nine baanyɛ ashɛ nɔ lɛ nɔ fe bei fɛɛ ni eho, ni amɛkɛ nitsumɔ waaa kwraa kɛ́ akɛto be mli ni akɛ wolokpoi tsuɔ nii lɛ he.—1 Tim. 4:16.

[Shikpɔŋ he mfoniri/Mfonirii ni yɔɔ baafa 18, 19]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Efeso

Troia

Roma