Afee Buu-Mɔɔ yɛ Blɔfo ni Yɔɔ Mlɛo Mli

EŊƆƆ wɔnaa akɛ wɔɔha nyɛle akɛ kɛjɛ Buu-Mɔɔ nɛɛ, ni ji nikasemɔ nɔ̃ lɛ nɔ kɛyaa lɛ, wɔbaafee nikasemɔ nɔ̃ lɛ eko yɛ Blɔfo ni yɔɔ mlɛo mli wɔfata nɔ ni baa daa nyɔɔŋ lɛ he, ni wɔbaaka enɛ wɔkwɛ afi kome. Akɛ saji ni abaakase lɛ fɛɛ baawo Buu-Mɔɔ hee nɛɛ mli, ni kɛ́ gbɛ yɛ lɛ akɛ saji krokomɛi baafata he. Wɔheɔ wɔyeɔ akɛ enɛ baaye abua Yehowa Odasefoi lɛ ateŋ mɛi babaoo ni amɛná mumɔŋ niyenii lɛ he sɛɛ jogbaŋŋ. Mɛni hewɔ?

Blɔfo ji wiemɔ titri ni wɔnyɛmimɛi ni yɔɔ maji tamɔ Fiji, Ghana, Kenya, Liberia, Nigeria, Papua New Guinea, kɛ Solomon Islands lɛ wieɔ. Eyɛ mli akɛ ekolɛ wɔnyɛmimɛi ni yɔɔ maji nɛɛ anɔ lɛ wieɔ wiemɔi krokomɛi moŋ, shi Blɔfo titri ji wiemɔ ni amɛwieɔ daa gbi yɛ amɛsafoŋ kpeei ashishi kɛ agbɛnɛ yɛ shiɛmɔ nitsumɔ lɛ mli. Shi Blɔfo ni amɛwieɔ lɛ yɛ mlɛo fe nɔ ni aŋmaa yɛ wɔwoji lɛ amli lɛ. Agbɛnɛ hu lɛ, Yehowa webii lɛ ekomɛi efã kɛtee maji krokomɛi anɔ ní ebaabi ni amɛwie Blɔfo, eyɛ mli akɛ ekolɛ amɛnuuu Blɔfo tsɔ moŋ. Kɛfata he lɛ, amɛnyɛŋ amɛya asafoŋ kpeei ni afeɔ yɛ amɛmaŋ wiemɔ mli lɛ.

Saji ni wɔkaseɔ daa otsi yɛ Buu-Mɔɔ Nikasemɔ lɛ shishi lɛ ji gbɛ titri ni atsɔɔ nɔ alɛɔ wɔ yɛ mumɔŋ yɛ be naa. No hewɔ lɛ, bɔni afee ni mɛi fɛɛ ni baa kpee lɛ aná nibii ni akaseɔ lɛ he sɛɛ jogbaŋŋ lɛ, afee Buu-Mɔɔ yɛ Blɔfo ni yɔɔ mlɛo mli aha amɛ, ni akɛ wiemɔi ni shishinumɔ waaa etsu nii yɛ mli. Ebaasoro Buu-Mɔɔ hee nɛɛ sɛɛ. Saneyitsei bibii, kukuji, saji ni akɛtĩɔ mli, kɛ mfonirii ni yɔɔ saji ni abaakase lɛ mli lɛ kɛ nɔ ni yɔɔ nikasemɔ nɔ̃ momo lɛ mli lɛ baakpã gbee. No hewɔ lɛ, mɔ fɛɛ mɔ baanyɛ akwɛ eko fɛɛ eko ni ehiɛ lɛ mli yɛ Buu-Mɔɔ Nikasemɔ lɛ shishi, ni ekɛ ehe awo nikasemɔ lɛ mli. Bɔni afee ni ona srɔtofeemɔ ni yɔɔ Blɔfo Buu-Mɔɔ srɔtoi enyɔ nɛɛ ateŋ lɛ, kwɛmɔ nɔkwɛmɔnɔ ni yɔɔ shishigbɛ nɛɛ, ni ajie enɛ kɛjɛ klɛŋklɛŋ nikasemɔ ni yɔɔ Blɔfo Buu-Mɔɔ lɛ mli lɛ kuku 2 lɛ mli.

Wɔheɔ wɔyeɔ akɛ Buu-Mɔɔ hee nɛɛ baaha mɛi babaoo ni sɔleɔ amɛhaa Yehowa akɛ, “ha mi sɛɛyoomɔ, koni makase okitai lɛ,” asɔlemɔi lɛ ahetoo. (Lala 119:73) Wɔyɛ nɔmimaa akɛ, enɛ baaye abua mɛi ni nuuu Blɔfo tsɔ lɛ kɛ agbɛnɛ hu gbekɛbii ni miikase Blɔfo wiemɔ lɛ koni amɛsaa amɛhe jogbaŋŋ kɛha Buu-Mɔɔ Nikasemɔ lɛ daa otsi. Wɔmiida Yehowa shi waa akɛ etsɔɔ “tsulɔ anɔkwafo kɛ nilelɔ” lɛ nɔ ehaa wɔ mumɔŋ niyenii babaoo yɛ bɔ ni esumɔɔ ‘nyɛmimɛi’ lɛ hewɔ.—1 Pet. 2:17; Mat. 24:45.

Yehowa Odasefoi a-Nɔyeli Kuu lɛ