Ani Okaiɔ?

Ani oná Buu-Mɔɔ srɔtoi ni ba nyɛsɛɛ nɛɛ akanemɔ he miishɛɛ? Kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Mɛɛ nibii titrii etɛ baanyɛ aye abua wɔ ni wɔye henumɔi ni tsirɛɔ wɔ koni wɔkaye anɔkwa lɛ nɔ?

Nomɛi ji: (1) Ná Yehowa gbeyeishemɔ kpakpa. (1 Pet. 3:12) (2) Okɛ Biblia lɛ atsɔse ohenilee. (3) Bɔɔ mɔdɛŋ ni omii ashɛ onii ahe.—4/15, baafa 6-7.

• Te wɔfeɔ tɛŋŋ wɔleɔ akɛ hiɛdɔɔ ni wɔkɛaasɔmɔ Yehowa lɛ etsɔɔɔ akɛ wɔkpe mli be fɛɛ be loo wɔkajie wɔhiɛtserɛ lɛ?

Wɔbaanyɛ wɔsusu Yesu nɔkwɛmɔnɔ lɛ he. Ekɛ mɛi krokomɛi ye nii kutuu kɛ miishɛɛ. Wɔle akɛ Yesu tuuu ehiɛ loo ekpeee mli. Mɛi krokomɛi, ni gbekɛbii po fata he, nyɛ amɛbɛŋkɛ lɛ, ni amɛná miishɛɛ yɛ emasɛi.—4/15, baafa 10.

• Mɛni ji “kpatamɔnii” ni atsĩ tã yɛ Hiob 33:24 lɛ, ni mɛɛ gbɛ nɔ Hiob ná he sɛɛ?

Hela wiemɔ ni atsɔɔ shishi akɛ “kpatamɔnii” yɛ ŋmalɛ nɛɛ mli lɛ shishi ji “aŋɔtsĩ nɔ.” Ekã shi faŋŋ akɛ kooloo ni akɛbaashã afɔle yɛ Hiob sane lɛ mli lɛ ji kpatamɔnii ni akɛbaaha yɛ ehewɔ lɛ, ni Nyɔŋmɔ baaha akɛjie loo akɛtsĩ Hiob esha lɛ nɔ. Ekã shi faŋŋ akɛ Yehowa kpɛlɛ kpatamɔnii ni aŋɔha yɛ Hiob hewɔ lɛ nɔ, ni eha no tsĩ etɔmɔ lɛ nɔ, ni no ha Nyɔŋmɔ kɛ lɛ kpãta ni ejwere lɛ. (Hiob 1:5; 42:12-17)—7/1, baafa 11.

• Mɛni mu tso ni yɔɔ Romabii yitso 11 lɛ feɔ he mfoniri?

Mu tso lɛ feɔ Abraham seshi lɛ fã kroko, ni ji mumɔŋ Israel lɛ he mfoniri. Mfonirifeemɔŋ mu tso lɛ shishifã lɛ damɔ shi kɛha Yehowa, ni etsoku lɛ damɔ shi kɛha Yesu. Beni heloonaa Yudafoi lɛ kpoo Yesu lɛ, atɛo Jeŋmajiaŋbii ni batsɔ héyelilɔi lɛ awo mu tso lɛ he, ni no ha Abraham seshi lɛ fã kroko lɛ ayibɔ lɛ fɛɛ shɛ.—5/15, baafa 22-25.

• Te wɔfeɔ tɛŋŋ wɔleɔ akɛ Gehena jeee he ko ni apiŋɔ mɛi yɛ la mli yɛ lɛ?

Susumɔ ni mɛi hiɛ akɛ ashãa hiɛkalɔi yɛ la mli lɛ ji nihiinii yɛ Yehowa hiɛ. (Yer. 7:31) Kɛfata he lɛ, susumɔ ni mɛi hiɛ akɛ abaapiŋ gbohii lɛ kɛ Nyɔŋmɔ su ni ji suɔmɔ lɛ kpãaa gbee, ni ekɛ Biblia mli tsɔɔmɔ ni yɔɔ faŋŋ akɛ gbohii lɛ ‘leee nɔ ko nɔ ko’ lɛ hu kpãaa gbee. (Jaj. 9:5, 10)—7/1, baafa 15.

• Te Yehowa kɛ mɛi ni “tsuii ekumɔ” kɛ mɛi ni “mumɔ tswiaa shi kɛ dɔlɛ lɛ” yeɔ ehaa tɛŋŋ? (Lala 34:19)

Taakɛ bɔ ni fɔlɔ ko ni yɔɔ suɔmɔ mɔɔ ebi ko ni ehao waa lɛ mli ní eshɛjeɔ emii lɛ, nakai nɔŋŋ Yehowa hu tsiɔ ebɛŋkɛɔ ejálɔi ni boɔ amɛtsɛɔ lɛ kɛha yelikɛbuamɔ lɛ. Eyɛ he miishɛɛ akɛ eeeshɛje mɛi ni tsui ekumɔ, ni mumɔ tswiaa shi kɛ dɔlɛ lɛ amii. Ebaanyɛ eha amɛ nilee kɛ hewalɛ ni he hiaa amɛ lɛ koni amɛnyɛ amɛdamɔ kaa fɛɛ kaa ni amɛkɛkpeɔ lɛ naa. (2 Kor. 4:7; Yak. 1:5)—7/1, baafa 23.

• Ani shwiei ni kulɛ Yesu, ni ji nuu ni eye emuu lɛ baawo lɛ baanyɛ abatsɔ kpɔ̃mɔnɔ lɛ fã ko?

Dabi. Eyɛ mli akɛ kulɛ Yesu baanyɛ awo shwiei akpekpe toi akpei abɔ ni amɛye emuu moŋ, shi nakai shwiei lɛ efeŋ kpɔ̃mɔnɔ lɛ fã. Yesu wala ni eye emuu lɛ pɛ kɛ Adam nɔ̃ lɛ yeɔ egbɔ. (1 Tim. 2:6)—6/15, baafa 13.

• Te Kristofoi aaafee tɛŋŋ amɛtsɔɔ akɛ amɛboɔ kɔkɔbɔɔ ni yɔɔ Bɔfoi lɛ Asaji 20:29, 30 ni kɔɔ amale tsɔɔlɔi ahe lɛ toi?

Kristofoi hereee amale tsɔɔlɔi kɛbaaa amɛshĩa, loo amɛŋaaa amɛ. (Rom. 16:17; 2 Yoh. 9-11) Kristofoi kaneee hemɔkɛyeli kwalɔi awoji, amɛkwɛɛɛ amɛ yɛ TV nɔ, amɛkaneee nibii ni amɛŋmalaa amɛwoɔ Intanɛt lɛ nɔ lɛ.—7/15, baafa 15-16.

• Taakɛ wɔnaa yɛ Luka 10:40-42 lɛ, mɛni ji yiŋtoo titri hewɔ ni wɔkɛ wɔnyɛmimɛi Kristofoi lɛ bɔɔ lɛ?

Jeee niyenii ni ŋɔɔ hoomɔ kɛ eyeli titri hewɔ wɔkɛ wɔnanemɛi Kristofoi lɛ bɔɔ lɛ, shi moŋ wɔkɛ amɛ bɔɔ koni wɔwowoo wɔhe hewalɛ ní wɔkɛ mumɔŋ duromɔ keenii ahahaa wɔhe. (Rom. 1:11, 12) Kɛ́ wɔŋmɛ okpɔlɔ fioo ko pɛ po lɛ, ebaanyɛ eha wɔnaanyobɔɔ lɛ afee nɔ ni tswaa mɔ emaa shi.—7/1, baafa 29, 30.