Okɛ Hiɛmiamɔ Ada Foi Lɛ
Okɛ Hiɛmiamɔ Ada Foi Lɛ
“Nyɛhaa . . . wɔkɛ tsuishitoo [hiɛmiamɔ, NW] ada foi ni kã wɔhiɛ lɛ.”—HEB. 12:1.
1, 2. Mɛni he bɔfo Paulo kɛ Kristofoi ashihilɛ gbɛ lɛ to?
DAA afi lɛ, mɛi daa foi kakadaŋŋ kɛjɛɔ he kome kɛyaa he kroko yɛ hei pii. Amɛteŋ mɛi ni he esa jogbaŋŋ lɛ kɛ oti kome maa amɛhiɛ—ní amɛye klɛŋklɛŋ gbɛhe. Shi foidalɔi nɛɛ ateŋ babaoo le akɛ amɛnyɛŋ amɛye klɛŋklɛŋ gbɛhe. Amɛmiitao ni amɛ hu amɛda foi lɛ kɛgbe naa kɛkɛ koni amɛkɛshi amɛtsitsi.
2 Akɛ Kristofoi ashihilɛ gbɛ lɛ to foidamɔ he yɛ Biblia lɛ mli. Bɔfo Paulo gbala enanemɛi Kristofoi ni hi blema Korinto lɛ ajwɛŋmɔ kɛtee enɛ nɔ yɛ klɛŋklɛŋ wolo ni eŋma eyaha amɛ lɛ mli. Eŋma akɛ: “Ani nyɛleee akɛ mɛi ni daa foi lɛ, amɛ fɛɛ amɛdaa moŋ, shi mɔ kome kɛkɛ náa emli juromɔnɔ lɛ? Nyɛdaa foi lɛ nakai, koni nyɛnine ashɛ nɔ.”—1 Kor. 9:24.
3. Mɛni hewɔ Paulo kɛɛ akɛ foidalɔ kome kɛkɛ náa juromɔnɔ lɛ?
3 Ani Paulo miitsɔɔ akɛ nakai Kristofoi lɛ ateŋ mɔ kome pɛ baaná juromɔnɔ lɛ, ni ákɛ mɛi ni eshwɛ lɛ fɛɛ miida foi lɛ yaka? Dabi! Foidalɔi ni shiɔ akaŋ lɛ tsɔseɔ amɛhe jogbaŋŋ, ni amɛmiaa amɛhiɛ waa koni amɛye klɛŋklɛŋ gbɛhe. Paulo miitao ni enyɛmimɛi Kristofoi lɛ amia amɛhiɛ waa yɛ gbɛ ni tamɔ nakai nɔŋŋ nɔ yɛ naanɔ wala he foi ni amɛdaa lɛ mli. No dani amɛnine baanyɛ ashɛ juromɔnɔ ni ji naanɔ wala lɛ nɔ. Hɛɛ, yɛ foi ni Kristofoi lɛ daa lɛ mli lɛ, mɛi fɛɛ ni baagbe foidamɔ lɛ naa lɛ baaná juromɔnɔ nɛɛ.
4. Mɛni he esa akɛ wɔsusu yɛ foi ni wɔdaa lɛ he?
4 Wiemɔi nɛɛ woɔ mɛi fɛɛ ni daa naanɔ wala he foi lɛ ŋmɛnɛ lɛ hewalɛ waa, ni kɛlɛ ehaa amɛsusuɔ nii ahe kɛyaa shɔŋŋ. Mɛni hewɔ? Ejaakɛ juromɔnɔ lɛ nɔ bɛ kwraa—kɛ́ eji shihilɛ yɛ ŋwɛi, loo eji shihilɛ yɛ Paradeiso yɛ shikpɔŋ lɛ nɔ. Eji anɔkwale akɛ, gbɛ lɛ jekɛ, ni foidamɔ lɛ bɛ mlɛo; gbɛtsiinii, nibii ni gbalaa mɔ jwɛŋmɔ, kɛ osharai babaoo yɛ gbɛ lɛ nɔ. (Mat. 7:13, 14) Dɔlɛ sane ji akɛ, wɔnyɛmimɛi lɛ ekomɛi amɔdɛŋbɔɔ lɛ naa eba shi, ni mɛi komɛi po ekpa foi lɛ damɔ. Mɛɛ gbɛtsiinii kɛ osharai yɔɔ wala he foidamɔ lɛ mli? Te ooofee tɛŋŋ okwa enɛɛmɛi? Mɛni obaanyɛ ofee koni onyɛ ogbe foidamɔ lɛ naa ni onine ashɛ juromɔnɔ lɛ nɔ?
Esa akɛ Wɔmia Wɔhiɛ Koni Wɔnine Ashɛ Nɔ
5. Mɛni Paulo wie kɛkɔ foidamɔ he yɛ Hebribii 12:1 lɛ?
5 Paulo saa etsĩ nibii komɛi ni kɔɔ foidamɔ he lɛ atã yɛ wolo ni eŋma eyaha Hebri Kristofoi ni yɔɔ Yerusalem kɛ Yudea lɛ mli. (Nyɛkanea Hebribii 12:1.) Etsɔɔ nɔ hewɔ ni esa akɛ ada foi lɛ, kɛ nibii hu ni esa akɛ mɔ afee koni enine ashɛ juromɔnɔ lɛ nɔ. Wɔbaasusu ŋaa ni akɛ mumɔ tsirɛ Paulo ni ewo Hebri Kristofoi lɛ he, ní wɔkwɛ nibii ni wɔbaanyɛ wɔkase kɛjɛ mli. Shi klɛŋklɛŋ kwraa lɛ, nyɛhaa wɔsusua yiŋtoo hewɔ ni Paulo ŋma nakai wolo lɛ, kɛ nɔ ni ewoɔ enyɛmimɛi lɛ hewalɛ ni amɛfee lɛ he wɔkwɛa.
6. Mɛni jamɔŋ hiɛnyiɛlɔi lɛ fee Kristofoi lɛ?
6 No mli lɛ, klɛŋklɛŋ afii 100 lɛ mli Kristofoi lɛ, titri lɛ mɛi ni hi Yerusalem kɛ Yudea lɛ kɛ kai kɛ naagbai babaoo miikpe. Yudafoi ajamɔŋ hiɛnyiɛlɔi ní yɔɔ maŋbii lɛ anɔ hewalɛ waa lɛ miigba nakai Kristofoi lɛ anaa waa. Mra mli lɛ jamɔŋ hiɛnyiɛlɔi nɛɛ ha abu Yesu Kristo fɔ akɛ eewo mɛi ayiŋ koni amɛtse atua, ni agbe lɛ oookɛɛ ojotswalɔ. Ni amɛsa amɛnaa lamlu akɛ amɛbaate shi amɛwo Yesu sɛɛnyiɛlɔi fɛɛ. Bɔfoi lɛ Asaji lɛ haa wɔleɔ akɛ, kɛjɛ beni afɔse mumɔ krɔŋkrɔŋ lɛ ashwie kaselɔi lɛ anɔ yɛ afi 33 Ŋ.B. Pentekoste gbi lɛ nɔ lɛ, jamɔŋ hiɛnyiɛlɔi lɛ tee nɔ amɛwo Kristofoi lɛ ahe gbeyei, ni amɛtutua amɛ shii abɔ. Ekã shi faŋŋ akɛ enɛ ha Kristofoi anɔkwafoi lɛ na nɔ̃ waa.—Bɔf. 4:1-3; 5:17, 18; 6:8-12; 7:59; 8:1, 3.
7. Mɛɛ shihilɛi ni jaraa Kristofoi ni Paulo ŋma amɛ wolo lɛ kɛkpe?
7 Nɔ kroko ni ha nakai Kristofoi lɛ na nɔ̃ waa ji akɛ, no mli lɛ eshwɛ fioo ni abaakpata Yerusalem maŋ lɛ hiɛ. Yesu tsɔ hiɛ ebɔ amɛ enɛ he kɔkɔ. Kɛfata he lɛ, eha esɛɛnyiɛlɔi lɛ le okadii ni baatsɔɔ akɛ Yerusalem hiɛkpatamɔ lɛ eshɛ etã, ni etsɔɔ amɛ nibii pɔtɛi ni esa akɛ amɛfee koni amɛyi aná wala. (Nyɛkanea Luka 21:20-22.) Belɛ, mɛni amɛbaafee? Yesu bɔ amɛ kɔkɔ akɛ: “Nyɛhiɛ ahia nyɛhe nɔ, koni fufeemɔ kɛ dãatɔɔ kɛ daaŋ-ŋmaa he haomɔi akahe nyɛtsuii, ni nakai gbi lɛ miibati nyɛ shi trukaa.”—Luka 21:34.
8. Mɛni ekolɛ nomɛi ha Kristofoi komɛi amɔdɛŋbɔɔ lɛ naa ba shi loo amɛkpa foi lɛ damɔ?
8 Beni Yesu bɔ nakai kɔkɔ lɛ sɛɛ aaashɛ afii 30 dani Paulo ŋma ewolo lɛ eyaha Hebribii lɛ. Yɛ nakai afii 30 lɛ amli lɛ, mɛni ba nakai Kristofoi lɛ anɔ? Amɛteŋ mɛi komɛi ha daa gbi shihilɛ mli naagbai kɛ yeyeeyefeemɔi ná amɛnɔ hewalɛ gbonyo, ni amɛyaaa hiɛ yɛ mumɔŋ koni amɛhemɔkɛyeli lɛ mli awa. (Heb. 5:11-14) Eeenyɛ efee akɛ amɛteŋ mɛi krokomɛi hu susu akɛ kɛ́ amɛfee nibii ni Yudafoi ni jeee Kristofoi lɛ feɔ lɛ eko lɛ, amɛbaaná nibii mlɛo. Ekolɛ amɛsusu akɛ nakai Yudafoi lɛ kwako Nyɔŋmɔ kwraa; amɛkã he amɛmiiye Mose Mla lɛ babaoo nɔ. Kristofoi komɛi hu ŋmɛ gbɛ ni aŋkroaŋkroi ni yɔɔ asafo lɛ mli ní maa nɔ mi doo akɛ esa akɛ aya nɔ aye Mose Mla lɛ kɛ blema saji lɛ anɔ lɛ ná amɛnɔ hewalɛ. Mɛni Paulo kɛɛ kɛwo enyɛmimɛi Kristofoi lɛ hewalɛ koni amɛya nɔ amɛha amɛhiɛ ahi amɛhe nɔ yɛ mumɔŋ ní amɛmia amɛhiɛ kɛda wala he foi lɛ?
9, 10. (a) Mɛɛ hewalɛ Paulo wo yɛ Hebribii yitso 10 lɛ naagbee gbɛ? (b) Mɛni hewɔ Paulo wie odasefoi ni hi shi yɛ blema lɛ ahemɔkɛyeli nitsumɔi lɛ ahe lɛ?
9 Akɛ mumɔ tsirɛ Paulo ni eŋma wolo koni ekɛwaje Hebri Kristofoi lɛ, ni enɛ sa kadimɔ waa. Paulo ha efee faŋŋ yɛ wolo ni eŋma lɛ yitso 10 lɛ mli akɛ, Mla lɛ ji “nii kpakpai ni baaba lɛ asusuma,” ni eha efee faŋŋ akɛ Kristo kpɔ̃mɔ afɔleshãa lɛ nɔ pɛ abaanyɛ adamɔ akɛ eshai afa. Paulo wo enyɛmimɛi lɛ hewalɛ yɛ nakai yitso lɛ naagbee gbɛ akɛ: “Tsuishitoo [hiɛmiamɔ, NW] ehia nyɛ, koni, beni nyɛfee Nyɔŋmɔ suɔmɔnaa nii lɛ, nyɛnine ashɛ shiwoo lɛ nɔ. Ejaakɛ ‘fioo kɛkɛ eshwɛ ni mɔ ni baa lɛ aaaba, ni etsɛŋ kwraa.’”—Heb. 10:1, 36, 37.
10 Paulo kɛ ŋaalee ha ana nɔ ni hemɔkɛyeli diɛŋtsɛ ni aaaná yɛ Nyɔŋmɔ mli lɛ tsɔɔ yɛ Hebribii yitso 11 lɛ. Ewie hii kɛ yei ni hi shi yɛ blema ni ná hemɔkɛyeli ni mli wa lɛ ateŋ mɛi komɛi ahe kɛfee enɛ he nɔkwɛmɔnɔ. Ani enɛ ni ekɛbafo mli lɛ he ehiaaa? Dabi kwraa. Bɔfo Paulo miitao ni enyɛmimɛi Kristofoi lɛ ale akɛ esa akɛ amɛfee ekãa ní amɛmia amɛhiɛ koni amɛkɛtsɔɔ akɛ amɛyɛ hemɔkɛyeli. Nakai anɔkwafoi ni hi shi yɛ blema lɛ anɔkwɛmɔnɔ ni sa jogbaŋŋ lɛ baawo Hebribii lɛ hewalɛ koni amɛnyɛ amɛdamɔ kai kɛ naagbai ni amɛkɛkpeɔ lɛ anaa. No hewɔ lɛ, beni Paulo wie anɔkwafoi ni hi shi yɛ blema lɛ ahemɔkɛyeli nitsumɔi lɛ ahe egbe naa lɛ, ekɛɛ akɛ: “Gbii abɔ ni wɔyɔɔ odasefoi babaoo ni ebɔle wɔ tamɔ atatu nɛɛ, nyɛhaa wɔkɛ jatsu fɛɛ jatsu aŋmɛa shi, kɛ esha ni ebɔle wɔhe kpula lɛ, ní wɔkɛ tsuishitoo [hiɛmiamɔ, NW] ada foi ni kã wɔhiɛ lɛ.”—Heb. 12:1.
‘Odasefoi ni Tamɔ Atatu’
11. Kɛ́ wɔjwɛŋ nɔkwɛmɔnɔ ni ‘odasefoi babaoo ni tamɔ atatu’ lɛ fee lɛ nɔ lɛ, mɛɛ hewalɛ ebaanyɛ ená yɛ wɔnɔ?
11 ‘Odasefoi babaoo ni ebɔle wɔ tamɔ atatu’ ni awie amɛhe nɛɛ jeee mɛi ni damɔ sɛɛ flɛŋŋ, loo mɛi ni eba koni amɛbakwɛ foidamɔ lɛ, loo ní amɛbakwɛ bɔ ni foidalɔ ko ni amɛsumɔɔ esane lɛ bɔɔ mɔdɛŋ ehaa. Yɛ no najiaŋ lɛ, amɛ hu amɛda foi lɛ eko. Amɛda foi lɛ kɛyagbe naa. Eyɛ mli akɛ amɛgboi moŋ, shi abaanyɛ awie akɛ amɛhe ekpɔ yɛ foidamɔ lɛ mli waa, ni no hewɔ lɛ, amɛnɔkwɛmɔnɔ lɛ baanyɛ awo foidalɔi heei ni yɔɔ ŋmɛnɛ lɛ hewalɛ. Ŋɔɔ lɛ akɛ mɔ ko miida foi lɛ eko, ni ele akɛ foidalɔi ni he ekpɔ waa fe fɛɛ lɛ ateŋ mɛi komɛi ebɔle lɛ, loo amɛmiiwo lɛ hewalɛ, te ebaanu he eha tɛŋŋ? Ani no tsirɛŋ lɛ koni emia ehiɛ waa loo egbe ehe po kɛda foi lɛ? Nakai odasefoi ni hi shi yɛ blema lɛ anɔkwɛmɔnɔ lɛ tsɔɔ akɛ bɔ fɛɛ bɔ ni foidamɔ lɛ wa ha lɛ, abaanyɛ agbe naa owula kosɛɛ. No hewɔ lɛ, kɛ́ Hebri Kristofoi ni hi shi yɛ klɛŋklɛŋ afii 100 lɛ mli lɛ tee nɔ amɛha ‘odasefoi ni tamɔ atatu’ lɛ anɔkwɛmɔnɔ lɛ hi amɛjwɛŋmɔŋ lɛ, no baanyɛ awo amɛ hewalɛ koni ‘amɛkɛ hiɛmiamɔ ada foi’ lɛ—ni wɔ hu wɔbaanyɛ wɔfee nakai nɔŋŋ ŋmɛnɛ.
12. Te wɔbaanyɛ wɔná mɛi ni Paulo tsĩ amɛtã lɛ anɔkwɛmɔnii lɛ ahe sɛɛ wɔha tɛŋŋ?
12 Anɔkwafoi ni Paulo tsĩ amɛtã lɛ ateŋ mɛi babaoo ashihilɛ tamɔ wɔnɔ̃ lɛ nɔŋŋ. Ákɛ nɔkwɛmɔnɔ lɛ, Noa hi shi beni eshwɛ fioo ni Yehowa kɛ Nu Afua lɛ baakpãta je lɛ hiɛ. Wɔ hu etsɛŋ ni Yehowa baakpãta nibii agbɛjianɔtoo nɛɛ hiɛ. Yehowa kɛɛ Abraham kɛ Sara akɛ amɛshi amɛmaŋ ní amɛkɛ anɔkwa jamɔ aye klɛŋklɛŋ gbɛhe yɛ amɛshihilɛ mli, ni ehe bahia ni amɛmɛ kɛyashi Yehowa shiwoo lɛ baaba mli. Yehowa miibi koni wɔ hu wɔkwa wɔhe bɔni afee ni ekpɛlɛ wɔnɔ, ní wɔnine ashɛ jɔɔmɔi ni ewo he shi lɛ anɔ. Mose tsomlo kɛtsɔ ŋa ko ni nɔ yɔɔ gbeyei nɔ kɛmiiya Shiwoo Shikpɔŋ lɛ nɔ. Wɔ hu wɔmiitsɔ jeŋ ni eshwɛ fioo ni abaakpãta hiɛ nɛɛ mli kɛmiiya jeŋ hee ni awo he shi lɛ mli. Esa jogbaŋŋ akɛ wɔɔsusu shihilɛi amli ni hii nɛɛ tsɔmɔ, nibii kpakpai ni amɛfee, amɛshigbeemɔi, amɛnyɛmɔi, kɛ amɛfatɔi ahe.—Rom. 15:4; 1 Kor. 10:11.
Mɛni Ha Amɛye Kunim?
13. Mɛɛ shihilɛ ni wa Noa kɛkpe, ni mɛni ye ebua lɛ ni enyɛ etsu he nii?
13 Mɛni ye ebua Yehowa tsuji nɛɛ ni amɛmia amɛhiɛ kɛda foi lɛ amɛgbe naa? Kadimɔ nɔ ni Paulo ŋma yɛ Noa he lɛ. (Nyɛkanea Hebribii 11:7.) No mli lɛ Noa ‘enako ní nu afua eba shikpɔŋ lɛ nɔ ní ekpãta heloo fɛɛ hiɛ’ dã. (1 Mose 6:17) Nɔ ko ni tamɔ nakai bako pɛŋ. Ni kɛlɛ, Noa ejeee he ŋwane, ni asaŋ esusuuu akɛ enyɛŋ eba mli. Mɛni hewɔ? Ejaakɛ eyɛ hemɔkɛyeli akɛ nɔ fɛɛ nɔ ni Yehowa ewie lɛ baaba mli. Noa ebuuu nitsumɔ ni akɛwo edɛŋ lɛ akɛ ewa tsɔ. Yɛ no najiaŋ lɛ, bɔ ni Nyɔŋmɔ fã lɛ lɛ, “nakai pɛpɛɛpɛ efee.” (1 Mose 6:22) Kɛ́ wɔsusu nitsumɔ ni akɛwo Noa dɛŋ lɛ he—ekpɛ adeka, ebua kooloi anaa, ebua niyenii babaoo naa ewo adeka lɛ mli kɛha gbɔmɛi kɛ kooloi lɛ, eshiɛ kɛbɔ mɛi kɔkɔ, ni ewaje eweku lɛ mlibii amumɔŋ shidaamɔ lɛ—wɔnaa akɛ “nakai pɛpɛɛpɛ” ni efee lɛ biɔ mɔdɛŋbɔɔ waa. Ni kɛlɛ, hemɔkɛyeli ni Noa ná kɛ ehiɛ ni emia lɛ ha abaa ekɛ eweku lɛ yi, ni ajɔɔ amɛ waa.
14. Mɛɛ shihilɛi ni mli wawai Abraham kɛ Sara mia amɛhiɛ kɛdamɔ naa, ni mɛni wɔkaseɔ kɛjɛɔ mli?
14 Beni Paulo wie Noa he egbe naa lɛ, etsĩ Abraham kɛ Sara tã efata “odasefoi babaoo ni ebɔle wɔ tamɔ atatu” lɛ ahe. Nyɔŋmɔ kɛɛ Abraham kɛ Sara akɛ amɛshi shihilɛ ni yɔɔ Ur lɛ kɛya he kroko, ni amɛleee shihilɛi ni amɛkɛbaayakpe. Beni amɛkɛ shihilɛi ni mli wawai yakpe lɛ, amɛbo Nyɔŋmɔ toi kɛwula shi ni amɛhemɔkɛyeli lɛ gbugbaaa, ni enɛ ji nɔkwɛmɔnɔ ni sa jogbaŋŋ. Abraham kɛ ehe shã afɔle kwraa yɛ anɔkwa jamɔ hewɔ, ni no ha atsɛ́ lɛ yɛ gbɛ ni ja nɔ akɛ ‘mɛi fɛɛ ní heɔ yeɔ lɛ atsɛ.’ (Rom. 4:11) Akɛni mɛi ni Paulo ŋma ewolo lɛ eyaha amɛ lɛ le Abraham shihilɛ jogbaŋŋ hewɔ lɛ, ewie nibii ni sa kadimɔ titri lɛ pɛ ahe. Ni kɛlɛ, Paulo tsɔɔ akɛ wɔbaanyɛ wɔkase nɔ ko wulu kɛjɛ mli: “Hemɔkɛyeli mli mɛnɛɛmɛi fɛɛ [ní Abraham kɛ eweku lɛ fata he lɛ] gboi yɛ, tsɛ amɛnine shɛko nii ni awo shi lɛ anɔ, shi moŋ shɔŋŋ kɛkɛ amɛna yɛ, ni amɛkɛshɛje amɛmii, ni amɛnyã he, ni amɛjaje akɛ gbɔi kɛ mɛikpɔji ji amɛ yɛ shikpɔŋ lɛ nɔ.” (Heb. 11:13) Eyɛ faŋŋ akɛ hemɔkɛyeli ni blemabii nɛɛ ná yɛ Nyɔŋmɔ mli kɛ wekukpãa ni kã amɛkɛ lɛ teŋ lɛ ye ebua amɛ ni amɛkɛ hiɛmiamɔ da foi lɛ.
15. Mɛni ha Mose kɔ gbɛ ni ekɔ lɛ?
15 Yehowa tsulɔ kroko ni esa akɛ wɔkase lɛ ní fata ‘odasefoi ni tamɔ atatu’ lɛ ahe ji Mose. Mose shi shihilɛ kpakpa kɛ gbɛhe wulu ni eyɔɔ lɛ, ni “eesumɔ moŋ akɛ ekɛ Nyɔŋmɔ maŋ lɛ ana amanehulu.” Mɛni ha efee nakai? Paulo tsɔɔ mli akɛ: “Nyɔmɔwoo lɛ ekwɛɔ. . . . Emɔ mɔ ni anaaa lɛ lɛ mli tamɔ nɔ ni eena lɛ.” (Nyɛkanea Hebribii 11:24-27.) Mose haaa ‘esha mli ŋɔɔmɔ ni eeeye be fioo ko lɛ’ agbala lɛ. Mose le akɛ Nyɔŋmɔ yɛ diɛŋtsɛ ni ákɛ eshiwoi lɛ baaba mli, ni no hewɔ efee ekãa waa ni emia ehiɛ nakai lɛ. Egbe ehe waa kɛnyiɛ Israelbi lɛ ahiɛ kɛjɛ Mizraim kɛtee Shiwoo Shikpɔŋ lɛ nɔ.
16. Mɛni hewɔ Mose nijiaŋ ejeee wui beni ahaaa eya Shiwoo Shikpɔŋ lɛ nɔ lɛ?
16 Taakɛ ebalɛ yɛ Abraham gbɛfaŋ lɛ, Mose hu gbo dani Nyɔŋmɔ shiwoo lɛ ba mli. Beni eshwɛ fioo ni Israelbii lɛ baaya Shiwoo Shikpɔŋ lɛ nɔ lɛ, akɛɛ Mose akɛ: “Ooona shikpɔŋ lɛ kã ohiɛ moŋ, shi yaa ni oyaŋ shikpɔŋ lɛ ní miŋɔhaa Israelbii lɛ nɔ.” Nɔ hewɔ ni ebalɛ nakai ji akɛ, mra mli lɛ ekɛ Aaron ha atua ni maŋbii lɛ tse lɛ wo amɛmli la ni ‘amɛtɔ̃ Nyɔŋmɔ nɔ yɛ Israelbii lɛ ateŋ yɛ Meriba nu lɛ he.’ (5 Mose 32:51, 52) Ani enɛ ha Mose nijiaŋ je wui ni emli fu? Dabi. Ejɔɔ maŋbii lɛ, ni emu ewiemɔ lɛ naa akɛ: “Ajɔo, Israel! Namɔ tamɔ bo? Maŋ ní Yehowa ehere oyiwala! Mɔ ni ji oyelikɛbuamɔ tsɛŋ, kɛ ogbojee klante lɛ!”—5 Mose 33:29.
Nibii ni Wɔkaseɔ Kɛjɛɔ Mli
17, 18. (a) Mɛni wɔbaanyɛ wɔkase yɛ ‘odasefoi ni tamɔ atatu’ lɛ ahe yɛ wala he foi ni wɔdaa lɛ mli? (b) Mɛni he wɔbaasusu yɛ nikasemɔ ni nyiɛ sɛɛ lɛ mli?
17 “Odasefoi babaoo ni ebɔle wɔ tamɔ atatu” lɛ ateŋ mɛi komɛi ahe ni wɔsusu lɛ haa wɔnaa faŋŋ akɛ ja wɔhe Nyɔŋmɔ kɛ eshiwoi lɛ anɔ wɔye kwraa dani wɔbaanyɛ wɔda foi lɛ kɛyagbe naa. (Heb. 11:6) Esa akɛ wɔjie hemɔkɛyeli kpo yɛ wɔshihilɛ mli nifeemɔi fɛɛ amli, jeee yɛ bei komɛi amli pɛ kɛkɛ. Yehowa tsuji le akɛ shihilɛ kpakpa ko kã amɛhiɛ, ni amɛtamɔɔɔ mɛi ni bɛ hemɔkɛyeli lɛ. Akɛni wɔnaa “mɔ ni anaaa lɛ lɛ” hewɔ lɛ, wɔkɛ hiɛmiamɔ daa foi ni kã wɔhiɛ lɛ.—2 Kor. 5:7.
18 Foi ni wɔdaa akɛ Kristofoi lɛ kãaa shi akɔɔɔ. Kɛlɛ, wɔbaanyɛ wɔda foi lɛ kɛgbe naa owula kosɛɛ. Wɔbaasusu nɔ kroko ni baanyɛ aye abua wɔ koni wɔfee nakai lɛ he yɛ nikasemɔ ni nyiɛ sɛɛ lɛ mli.
Ani Obaanyɛ Otsɔɔ Mli?
• Mɛni hewɔ Paulo wie odasefoi anɔkwafoi ni hi shi yɛ blema lɛ ahe waa lɛ?
• Mɛɛ gbɛ nɔ kɛ́ wɔjwɛŋ “odasefoi babaoo ni ebɔle wɔ tamɔ atatu” lɛ ahe lɛ ebaawo wɔ hewalɛ koni wɔkɛ hiɛmiamɔ ada foi lɛ?
• Mɛni okase kɛjɛ odasefoi anɔkwafoi tamɔ Noa, Abraham, Sara, kɛ Mose he ni wɔsusu lɛ mli?
[Nikasemɔ lɛ he Sanebimɔi]
[Mfoniri ni yɔɔ baafa 19]
Abraham kɛ Sara shi shihilɛ kpakpa ni yɔɔ Ur lɛ
