Okɛ Ohiɛ Afɔ̃ Yehowa, “Miishɛjemɔ Fɛɛ Nyɔŋmɔ Lɛ” Nɔ
Okɛ Ohiɛ Afɔ̃ Yehowa, “Miishɛjemɔ Fɛɛ Nyɔŋmɔ Lɛ” Nɔ
“Ajɔɔ Nyɔŋmɔ kɛ wɔ-Nuŋtsɔ Yesu Kristo tsɛ lɛ, mɔ ni ji musuŋtsɔlɛi atsɛ kɛ miishɛjemɔ fɛɛ Nyɔŋmɔ lɛ.”—2 KOR. 1:3.
1. Mɛni he hiaa adesai fɛɛ, ekɔɔɔ he eko afii abɔ ni amɛye?
KƐJƐ wɔfɔmɔ mli tɔ̃ɔ lɛ, miishɛjemɔ he hiaa wɔ. Abifao foɔ koni eha wɔna akɛ miishɛjemɔ he miihia lɛ. Ekolɛ eetao ni awó lɛ loo ekolɛ hɔmɔ miiye lɛ. Ni kɛ́ wɔdara po lɛ, bei pii lɛ miishɛjemɔ he hiaa wɔ. Ni be titri ni miishɛjemɔ he hiaa wɔ waa ji, beni wɔkɛ jaramɔ shihilɛi miikpe.
2. Mɛɛ shiwoo Yehowa kɛhaa mɛi ni kɛ amɛhiɛ fɔ̃ɔ enɔ lɛ?
2 Bei pii lɛ, wɔwekumɛi kɛ wɔnanemɛi baanyɛ ashɛje wɔmii kɛyashi he ko. Shi bei komɛi lɛ, adesai nyɛŋ afee shihilɛi ni haa wɔhaoɔ lɛ ahe nɔ ko kwraa. Nyɔŋmɔ pɛ baanyɛ ashɛje wɔmii, ekɔɔɔ he eko bɔ ni jaramɔ shihilɛ ni wɔkɛkpeɔ lɛ mli wa ha. E-Wiemɔ lɛ woɔ wɔ shi akɛ: “Yehowa [lɛ,] ebɛŋkɛɔ mɛi fɛɛ ni tsɛɔ lɛ lɛ, . . . eboɔ amɛbolɔmɔ toi.” (Lala 145:18, 19) Hɛɛ, “Yehowa hiŋmɛi kã jalɔi ahe, ni efeɔ toi ehaa amɛbolɔmɔi lɛ.” (Lala 34:16) Shi kɛ́ Yehowa baaye ebua wɔ ni eshɛje wɔmii lɛ, esa akɛ wɔkɛ wɔhiɛ afɔ̃ enɔ. Lalatsɛ David fee enɛ faŋŋ beni elá akɛ: “Yehowa aaatsɔ abobaahe aha mɔ ni awaa lɛ yi lɛ, abobaahe yɛ fimɔ bei amli. Ni mɛi ni le ogbɛi lɛ aaaŋɔ amɛhiɛ amɛaafɔ̃ onɔ; ejaakɛ bo, Yehowa, okwaaa mɛi ni taoɔ osɛɛgbɛ lɛ.”—Lala 9:10, 11.
3. Mɛɛ gbɛ nɔ Yesu tsɔɔ akɛ Yehowa sumɔɔ E-webii lɛ?
3 Yehowa jálɔi lɛ ajara wa yɛ ehiɛ. Yesu fee enɛ faŋŋ beni ekɛɛ akɛ: “Ani jeee kpãi enyɔ ahɔɔ aflimatai enumɔ aheɔ? shi Nyɔŋmɔ hiɛ kpaaa amɛteŋ ekome folo nɔ. Shi nyɛyiteŋ tsɔi tete akane fɛɛ. No hewɔ lɛ nyɛkashea gbeyei; nyɛjara wa fe aflimatai babaoo.” (Luka 12:6, 7) Yehowa tsɔ gbalɔ Yeremia nɔ ekɛɛ E-webii ni hi shi yɛ blema lɛ akɛ: “Naanɔ suɔmɔ mikɛsumɔo hewɔ lɛ mikɛ mlihilɛ miigbalao.”—Yer. 31:3.
4. Mɛni hewɔ wɔbaanyɛ wɔkɛ wɔhiɛ afɔ̃ Yehowa shiwoi anɔ lɛ?
4 Kɛ́ wɔná hekɛnɔfɔ̃ɔ yɛ Yehowa kɛ eshiwoi lɛ amli lɛ, no baanyɛ ashɛje wɔmii yɛ jaramɔ shihilɛi amli. Esa akɛ wɔkɛ wɔhiɛ afɔ̃ Nyɔŋmɔ nɔ taakɛ Yoshua fee lɛ, mɔ ni wie akɛ: “Nibii kpakpai fɛɛ ni Yehowa, nyɛ-Nyɔŋmɔ lɛ, wie yɛ nyɛhewɔ lɛ, emli ekome folo ekaaa shi, fɛɛ eba mli eha nyɛ, emli ekome folo ekaaa shi.” (Yosh. 23:14) Agbɛnɛ hu, kɛ́ bei komɛi lɛ shihilɛi ni jaraa ha wɔna nɔ̃ po lɛ, wɔbaanyɛ wɔná nɔmimaa akɛ “anɔkwafo ji Nyɔŋmɔ,” ni ekwaŋ enɔkwa tsuji kɔkɔɔkɔ.—Nyɛkanea 1 Korintobii 10:13.
5. Mɛɛ gbɛ nɔ wɔbaanyɛ wɔshɛje mɛi krokomɛi amii?
5 Bɔfo Paulo tsɛ Yehowa akɛ “miishɛjemɔ fɛɛ Nyɔŋmɔ.” Ákɛ ‘aaashɛje mɔ ko mii’ lɛ tsɔɔ akɛ, aha mɔ ko ni ehao loo eeye awerɛho lɛ tsui anyɔ emli. Afeɔ enɛ kɛtsɔ nibii ni baaha mɔ lɛ haomɔ loo ewerɛhoyeli lɛ naa aba shi ni etsui anyɔ emli hu lɛ ni aaafee aha lɛ lɛ nɔ. Ekã shi faŋŋ akɛ, Yehowa feɔ nakai. (Nyɛkanea 2 Korintobii 1:3, 4.) Nɔ ko loo mɔ ko nyɛŋ atsĩ wɔŋwɛi Tsɛ lɛ naa yɛ nɔ ko nɔ ko mli, no hewɔ lɛ ebaanyɛ efee nɔ fɛɛ nɔ ni he hiaa kɛshɛje mɛi ni sumɔɔ lɛ lɛ amii. Akɛni Nyɔŋmɔ shɛjeɔ wɔmii hewɔ lɛ, wɔ hu wɔnyɛɔ wɔshɛjeɔ wɔnanemɛi héyelilɔi lɛ amii yɛ “amanehulu fɛɛ amanehulu” mli. Wɔbaanyɛ wɔfee enɛ kɛtsɔ ‘miishɛjemɔ ni Nyɔŋmɔ ŋɔshɛjeɔ wɔ diɛŋtsɛ wɔmii lɛ ni wɔkɛaashɛje mɛi amii’ lɛ nɔ. Kwɛ bɔ ni wiemɔi nɛɛ tsɔɔ akɛ, mɔ ko mɔ ko nyɛŋ ashɛje mɛi ni ehao lɛ amii jogbaŋŋ taakɛ Yehowa feɔ lɛ!
Bɔ ni Wɔɔfee Wɔdamɔ Nibii ni Haa Mɔ Haoɔ lɛ Anaa
6. Tsɔɔmɔ nibii komɛi ni baanyɛ aha mɔ ahao.
6 Miishɛjemɔ he miihia wɔ yɛ shihilɛi babaoo amli. Nibii ni haa mɔ yeɔ awerɛho waa lɛ ateŋ ekome ji suɔlɔ ko gbele, titri lɛ kɛ́ mɔ ni gbo lɛ ji mɔ lɛ hefatalɔ ni esumɔɔ lɛ waa loo ebi. Ekolɛ miishɛjemɔ hu he baahia mɔ ko ni aye lɛ sane fɔŋ yɛ hiɛaŋkwɛmɔ loo hetsɛ̃ hewɔ. Agbɛnɛ hu, miishɛjemɔ he baanyɛ ahia mɔ ko yɛ hela, gbɔlɛ, ohia, gbalashihilɛ mli naagbai, loo je lɛŋ naagbai krokomɛi ahewɔ.
7. (a) Mɛɛ miishɛjemɔ he hiaa wɔ yɛ awerɛhoyeli beaŋ? (b) Mɛni Yehowa baanyɛ afee kɛtsá tsui ní “werɛ eho ehe ní tswiaa shi kɛ dɔlɛ lɛ”?
7 Yɛ haomɔ beaŋ lɛ, miishɛjemɔ ni baanyɛ aha wɔtsuii, wɔjwɛŋmɔi, kɛ wɔhenumɔi aŋmɛ dɛmm, ni wɔná gbɔmɔtsoŋ hewalɛ kpakpa, ni wekukpãa kpakpa ahi wɔkɛ Yehowa teŋ lɛ he baahia wɔ. Ákɛ nɔkwɛmɔnɔ lɛ, susumɔ tsui lɛ he okwɛ. Nyɔŋmɔ Wiemɔ lɛ kɛɔ akɛ wɔtsui lɛ ‘werɛ baanyɛ aho ehe ní etswia shi kɛ dɔlɛ.’ (Lala 51:19) Ekã shi faŋŋ akɛ, Yehowa baanyɛ aye abua wɔ yɛ shihilɛ nɛɛ mli, ejaakɛ “etsáa mɛi ni amɛtsuii ekumɔ lɛ, ni efimɔɔ amɛpilamɔi lɛ anɔ.” (Lala 147:3) Yɛ shihilɛi ni mli wawai amli po lɛ, kɛ́ wɔkɛ hemɔkɛyeli sɔle wɔha Nyɔŋmɔ, ni wɔye ekitai lɛ anɔ lɛ, ebaanyɛ eha wɔtsui ni ekumɔ lɛ he ajɔ lɛ.—Nyɛkanea 1 Yohane 3:19-22; 5:14, 15.
8. Kɛ́ wɔhao yɛ jwɛŋmɔŋ lɛ, mɛɛ gbɛ nɔ Yehowa baanyɛ aye abua wɔ?
8 Bei pii lɛ, miishɛjemɔ he hiaa wɔjwɛŋmɔ lɛ ejaakɛ jaramɔ shihilɛi baanyɛ aha wɔhao waa yɛ jwɛŋmɔŋ. Wɔnyɛŋ wɔkpee nɛkɛ jaramɔ shihilɛi ni kaa wɔhemɔkɛyeli lɛ naa kɛ wɔ diɛŋtsɛ wɔnyɛmɔ. Shi lalatsɛ lɛ lá akɛ: “Kɛ́ ŋkɔmɔyeli fa babaoo yɛ mimli lɛ, omiishɛjemɔi lɛ haa misusuma mii shɛɔ ehe.” (Lala 94:19) Kɛfata he lɛ, Paulo ŋma akɛ: “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsia nyɛtutɔmɔi lɛ atã yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli!” (Fil. 4:6, 7) Kɛ́ wɔhao yɛ jwɛŋmɔŋ lɛ, Ŋmalɛi lɛ ni wɔɔkane kɛ enɔ ni wɔɔjwɛŋ lɛ baanyɛ aye abua wɔ jogbaŋŋ ni wɔnyɛ wɔdamɔ naa.—2 Tim. 3:15-17.
9. Te wɔɔfee tɛŋŋ wɔdamɔ nibii ni haa mɔ haoɔ yɛ henumɔŋ lɛ anaa?
9 Bei komɛi lɛ, wɔnijiaŋ baanyɛ aje wui aahu akɛ nibii gbohii ni baanyɛ aye wɔ awui yɛ henumɔŋ lɛ baanyɛ aná wɔnɔ hewalɛ. Ekolɛ wɔnuɔ he akɛ wɔnyɛɛɛ wɔtsu Ŋmalɛ naa sɔ̃ loo sɔɔmɔ hegbɛ ko he nii. Biɛ hu lɛ, Yehowa baanyɛ ashɛje wɔmii ni eye ebua wɔ. Ákɛ nɔkwɛmɔnɔ lɛ: Beni akɛ nitsumɔ wo Yoshua dɛŋ akɛ enyiɛ Israelbii lɛ ahiɛ kɛwu amɛshi maji ni he wa ni ji amɛhenyɛlɔi lɛ, Mose kɛɛ Israelbii lɛ akɛ: “Nyɛhe awaa ni nyɛfea ekãa, nyɛkashea gbeyei ni nyɛtsui akafãa amɛnɔ; ejaakɛ Yehowa, o-Nyɔŋmɔ lɛ, ji mɔ ni kɛo nyiɛ, eshiŋo ni esaa ekwaŋo!” (5 Mose 31:6) Yɛ Yehowa yelikɛbuamɔ naa lɛ, Yoshua nyɛ enyiɛ Nyɔŋmɔ webii lɛ ahiɛ kɛtee Shiwoo Shikpɔŋ lɛ nɔ, ni eye amɛhenyɛlɔi lɛ fɛɛ anɔ kunim. Mose hu ná yelikɛbuamɔ ni tamɔ nakai nɔŋŋ kɛjɛ Nyɔŋmɔ ŋɔɔ yɛ Ŋshɔ Tsuru lɛ naa.—2 Mose 14:13, 14, 29-31.
10. Kɛ́ shihilɛ gbohii haaa wɔná gbɔmɔtsoŋ hewalɛ kpakpa lɛ, mɛni baanyɛ aye abua wɔ?
10 Shihilɛi gbohii ni wɔkɛkpeɔ lɛ baanyɛ asa wɔgbɔmɔtsoŋ hewalɛnamɔ he. Ekã shi faŋŋ akɛ, kɛ́ wɔye niyenii kpakpa, wɔnyɛ wɔwɔ jogbaŋŋ, wɔgbɔle wɔkpɔiaŋ bɔ ni sa, ni wɔhiɛ wɔhe kɛ wɔshĩai amli falefale lɛ, ebaanyɛ eha wɔná gbɔmɔtsoŋ hewalɛ kpakpa. Kɛ́ wɔjwɛŋ nɔ ni Biblia lɛ wieɔ yɛ wɔsɛɛ be ni kã wɔhiɛ lɛ he lɛ nɔ lɛ, no hu baanyɛ eha wɔná gbɔmɔtsoŋ hewalɛ kpakpa. No hewɔ lɛ, kɛ́ wɔkɛ jaramɔ shihilɛi komɛi miikpe lɛ, ehi jogbaŋŋ akɛ wɔɔha Paulo niiashikpamɔ kɛ ewiemɔi ni woɔ mɔ hewalɛ nɛɛ ahi wɔjwɛŋmɔŋ. Ekɛɛ akɛ: “Afĩfĩaa wɔ yɛ he fɛɛ he, shi kɛlɛ wɔtsui esuuu; wɔfeɔ yeyeeye, shi kɛlɛ wɔnijiaŋ ejeko wui; awaa wɔ yi, shi kɛlɛ akwako wɔ; atswiaa wɔ shi, shi kɛlɛ wɔpleneeko.”—2 Kor. 4:8, 9.
11. Kɛ́ wɔmiinu he akɛ wɔkɛ Yehowa teŋ wekukpãa lɛ mli miigbɔjɔ lɛ, mɛni wɔbaanyɛ wɔfee?
11 Jaramɔ shihilɛi komɛi ni wɔkɛkpeɔ lɛ baanyɛ asa wɔkɛ Yehowa teŋ wekukpãa lɛ he. Yɛ enɛ mli hu lɛ, Yehowa baanyɛ aye abua wɔ. E-Wiemɔ lɛ maa nɔ mi ehaa wɔ akɛ: “Yehowa sɔoɔ mɛi fɛɛ ni gbeɔ shi lɛ, ni eholeɔ mɛi fɛɛ ni edɔrɔ kɔmɔɔ lɛ anɔ.” (Lala 145:14) Kɛ́ wɔmiinu he akɛ wɔkɛ Yehowa teŋ wekukpãa lɛ miigbɔjɔ lɛ, esa akɛ wɔbi asafoŋ onukpai lɛ ni amɛye amɛbua wɔ. (Yak. 5:14, 15) Ni kɛ́ wɔha naanɔ wala he hiɛnɔkamɔ ni Ŋmalɛi lɛ kɛhaa lɛ hi wɔjwɛŋmɔŋ be fɛɛ be lɛ, no baanyɛ aye abua wɔ beni wɔkɛ wɔhemɔkɛyeli lɛ he kai kpeɔ lɛ.—Yoh. 17:3.
Miishɛjemɔ ni Nyɔŋmɔ Kɛhaa lɛ He Nɔkwɛmɔnii
12. Tsɔɔmɔ bɔ ni Yehowa shɛje Abraham mii eha.
12 Lalatsɛ ko ni akɛ mumɔ tsirɛ lɛ lɛ ŋma akɛ: “Kaimɔ wiemɔ ni okɛ otsulɔ wie lɛ, ejaakɛ [Yehowa] oha mikɛ mihiɛ efɔ̃ nɔ. Enɛ ji mimiishɛjemɔ yɛ mimanehulu lɛ mli, akɛ owiemɔ lɛ eha miyi ená wala.” (Lala 119:49, 50) Ŋmɛnɛ lɛ, wɔyɛ Yehowa Wiemɔ lɛ, ni miishɛjemɔ ni Nyɔŋmɔ kɛhaa lɛ he nɔkwɛmɔnii babaoo yɛ mli. Ákɛ nɔkwɛmɔnɔ lɛ, ekolɛ Abraham hao waa beni ená ele akɛ Yehowa baafite Sodom kɛ Gomora lɛ. Blematsɛ anɔkwafo nɛɛ bi Nyɔŋmɔ akɛ: “Ani oookpata jalɔ kɛ gbɔmɔ fɔŋ fɛɛ hiɛ shikome lo?” Yehowa shɛje Abraham mii kɛtsɔ shi ni ewo lɛ akɛ kɛ́ E-ná jalɔi 50 po lɛ, ekpataŋ Sodom hiɛ lɛ nɔ. Shi Abraham ku sɛɛ ebi Yehowa shii enumɔ sɔŋŋ akɛ: Ni kɛji oná jalɔi 45 pɛ? loo 40? loo 30? loo 20? loo 10 hu? Yɛ eko fɛɛ eko mli lɛ, Yehowa to etsui shi eha Abraham, ni ejɛ mlihilɛ mli ewo lɛ shi akɛ kɛ́ E-ná mɛi ayifalɛ ni etsɔɔ lɛ, ekpataŋ Sodom hiɛ. Eyɛ mli akɛ anáaa jalɔi nyɔŋma po yɛ maji nɛɛ amli moŋ, shi Yehowa baa Lot kɛ ebiyei lɛ ayi.—1 Mose 18:22-32; 19:15, 16, 26.
13. Mɛɛ gbɛ nɔ Hana tsɔɔ akɛ eyɛ hekɛnɔfɔ̃ɔ yɛ Yehowa mli?
13 Elkana ŋa Hana shwe waa ni ená bi. Shi no mli lɛ, kene ji lɛ ni enɛ ha ehao waa. Esɔle eha Yehowa yɛ sane lɛ he, ni Osɔfonukpa Eli kɛɛ lɛ akɛ: “Israel Nyɔŋmɔ lɛ aaahao onibimɔnii ni obi lɛ lɛ!” Enɛ shɛje Hana mii, “ni ehiɛ efeee tɔtɔɔtɔ dɔŋŋ.” (1 Sam. 1:8, 17, 18) Hana ná hekɛnɔfɔ̃ɔ yɛ Yehowa mli, ni eshi sane lɛ fɛɛ ewo edɛŋ. Eyɛ mli akɛ Hana leee bɔ ni nibii anaa baayakpa moŋ, shi etsui nyɔ emli. Sɛɛ mli lɛ, Yehowa ha esɔlemɔ lɛ hetoo. Ebaná musu ni efɔ binuu, ni ewo lɛ gbɛ́i akɛ Samuel.—1 Sam. 1:20.
14. Mɛni hewɔ miishɛjemɔ he bahia David lɛ, ni namɔ ŋɔɔ etee kɛha miishɛjemɔ?
14 Mɔ kroko hu ni Nyɔŋmɔ shɛje emii ji Maŋtsɛ David ni hi shi yɛ blema Israel lɛ. Akɛni Yehowa lɛ “tsui ekwɛɔ” hewɔ lɛ, beni ehala David akɛ mɔ ni sɛɛ mli lɛ ebaaye Israel nɔ maŋtsɛ lɛ, no mli lɛ ele akɛ David yeɔ anɔkwa ni efiɔ anɔkwa jamɔ sɛɛ. (1 Sam. 16:7; 2 Sam. 5:10) Shi sɛɛ mli lɛ, David kɛ Batsheba fite gbala ni ebɔ mɔdɛŋ akɛ ebaagbe Batsheba wu lɛ koni ekɛtsimɔ esha ni efee lɛ nɔ. Beni David yɔse akɛ efee esha kpele lɛ, esɔle eha Yehowa akɛ: “Yɛ omusuŋtsɔlɛ falɛ naa lɛ, gbee minɔtɔmɔi lɛ! Ju mihe kwraa kɛjɛ minɔ̃sha lɛ mli, ní otsuu mihe kɛjɛ mihe esha lɛ mli! Ejaakɛ minɔtɔmɔi lɛ, mi diɛŋtsɛ mile, ni mihe esha lɛ yɛ mihiɛ daa.” (Lala 51:3-5) David jɛ anɔkwayeli mli etsake etsui, ni Yehowa kɛ ehe eshai lɛ fa lɛ. Shi kɛlɛ, ebabi ni David kɛ nibii ni jɛ esha ni efee lɛ mli kɛba lɛ akpe. (2 Sam. 12:9-12) Fɛɛ sɛɛ lɛ, Yehowa jie mɔbɔnalɛ kpo etsɔɔ etsulɔ heshibalɔ lɛ, ni no shɛje emii.
15. Beni eshwɛ fioo ni Yesu baagbo lɛ, mɛɛ yelikɛbuamɔ Yehowa kɛha lɛ?
15 Beni Yesu yɔɔ shikpɔŋ lɛ nɔ lɛ, ekɛ jaramɔ shihilɛi babaoo kpe. Nyɔŋmɔ ŋmɛ gbɛ ni Yesu kɛ hemɔkɛyeli he kai nɛɛ kpe, kɛlɛ Yesu tee nɔ eye anɔkwa akɛ gbɔmɔ ni eye emuu ni kɛ ehiɛ fɔ̃ Yehowa nɔ be fɛɛ be, ni efĩ Nyɔŋmɔ nɔyeli lɛ sɛɛ. Beni eshwɛ fioo ni abaatsɔɔ Yesu sɛɛ gbɛ ni agbe lɛ lɛ, esɔle eha Yehowa akɛ: “Jeee bɔ ni mi misumɔɔ lɛ, shi moŋ bɔ ni bo osumɔɔ.” No sɛɛ lɛ, bɔfo ko bajie ehe kpo etsɔɔ Yesu, ni ewo lɛ hewalɛ. (Luka 22:42, 43) Nyɔŋmɔ shɛje Yesu mii, ewo lɛ hewalɛ, ni ekɛ yelikɛbuamɔ ni he hiaa lɛ yɛ nakai beaŋ lɛ ha lɛ.
16. Kɛ́ wɔwala yaje oshara mli yɛ wɔhemɔkɛyeli lɛ hewɔ lɛ, mɛɛ gbɛ nɔ Nyɔŋmɔ baanyɛ aye abua wɔ?
16 Kɛ́ wɔwala yaje oshara mli yɛ wɔ-Kristofoi ahemɔkɛyeli lɛ hewɔ po lɛ, Yehowa baanyɛ aye abua wɔ ni wɔya nɔ wɔye lɛ anɔkwa, ni ebaafee nakai hu. Kɛfata he lɛ, gbohiiashitee he hiɛnɔkamɔ lɛ shɛjeɔ wɔmii. Ni kwɛ bɔ ni wɔkpaa be ni “abaafo” naagbee henyɛlɔ, ni ji gbele lɛ ‘sɛɛ’ lɛ gbɛ! (1 Kor. 15:26) Nyɔŋmɔ anɔkwa tsuji ni egboi lɛ, kɛ mɛi krokomɛi hu yɛ Yehowa ni hiɛ nyɛŋ akpa nii anɔ lɛ kaimɔ mli, ni ebaatee amɛ shi. (Yoh. 5:28, 29; Bɔf. 24:15) Hekɛnɔfɔ̃ɔ ni wɔyɔɔ yɛ gbohiiashitee he shiwoo ni Yehowa kɛha lɛ mli lɛ shɛjeɔ wɔmii, ni ehaa wɔnáa hiɛnɔkamɔ ni mli wa yɛ yiwaa beaŋ.
17. Mɛɛ gbɛ nɔ Yehowa baanyɛ ashɛje wɔmii kɛ́ wɔsuɔlɔ ko gbo?
17 Le ni wɔle akɛ wɔsuɔlɔi ni amrɔ nɛɛ amɛwɔ yɛ adesai akwamaŋ gbonyobu mli lɛ baaba wala mli ekoŋŋ yɛ jeŋ hee ni miishɛɛ yɔɔ mli ni naagbai ni haa wɔhaoɔ ŋmɛnɛ lɛ eko kwraa bɛ mli lɛ shɛjeɔ wɔmii waa! Ni mɛɛ hegbɛ kpele po Yehowa tsuji lɛ ateŋ mɛi ni ji “asafo babaoo” ni baafo nibii agbɛjianɔtoo fɔŋ nɛɛ baaná nɛkɛ akɛ amɛaahere mɛi ni abaatee amɛ shi kɛba wala mli yɛ shikpɔŋ lɛ nɔ lɛ atuu, ni amɛtsɔɔ amɛ nii!—Kpoj. 7:9, 10.
Nyɔŋmɔ Naanɔ Niji lɛ Hiɛ Omli
18, 19. Mɛɛ gbɛ nɔ Nyɔŋmɔ shɛjeɔ ewebii lɛ amii beni awaa amɛ yi lɛ?
18 Mose fo lala ko ni haa mɔ tsui nyɔɔ emli waa ni ekɛwo Israelbii lɛ hewalɛ akɛ: “Naanɔ Nyɔŋmɔ lɛ ji obobaahe, ni enaanɔ niji lɛ hiɛ omli.” (5 Mose 33:27, Ga Biblia hee) Sɛɛ mli lɛ, gbalɔ Samuel kɛɛ Israelbii lɛ akɛ: “Nyɛkakpalea kɛjɛa Yehowa sɛɛ, shi nyɛsɔmɔa Yehowa kɛ nyɛtsui fɛɛ! . . . Yehowa gbɛi kpeteŋkpele lɛ hewɔ lɛ ekwaŋ emaŋ lɛ.” (1 Sam. 12:20-22) Kɛ́ wɔtee nɔ wɔkpɛtɛ Yehowa yɛ anɔkwa jamɔ mli lɛ, ekwaŋ wɔ kɔkɔɔkɔ. Ekɛ yelikɛbuamɔ ni he hiaa wɔ lɛ baaha wɔ be fɛɛ be.
19 Nyɔŋmɔ yeɔ ebuaa ewebii lɛ daa ni eshɛjeɔ amɛmii yɛ naagbee gbii ni jaraa nɛɛ mli. Nɔ ni fe afii 100 ni eho nɛ lɛ, awa wɔnyɛmimɛi Odasefoi akpei abɔ yi ni awo amɛ tsuŋ yɛ jeŋ fɛɛ yɛ Yehowa ni amɛsɔmɔɔ lɛ hewɔ. Amɛniiashikpamɔi lɛ tsɔɔ akɛ, Yehowa shɛjeɔ etsuji lɛ amii yɛ jaramɔ shihilɛi amli lɛɛlɛŋ. Ákɛ nɔkwɛmɔnɔ lɛ, abua akɛ abaawo wɔnyɛmi nuu ko ni yɔɔ tsutsu Soviet Union lɛ tsuŋ afii 23 yɛ ehemɔkɛyeli lɛ hewɔ. Beni eyɔɔ tsuŋwoohe lɛ po lɛ, atsɔ gbɛ ko nɔ aha enine shɛ mumɔŋ niyenii nɔ, ni no wo lɛ hewalɛ ni eshɛje emii. Nyɛmi nuu lɛ kɛɛ akɛ: “Yɛ nakai afii lɛ amli fɛɛ lɛ, mikase bɔ ni akɛ he fɔ̃ɔ Yehowa nɔ, ni ewo mi hewalɛ.”—Nyɛkanea 1 Petro 5:6, 7.
20. Mɛni hewɔ wɔbaanyɛ wɔná nɔmimaa akɛ Yehowa kwaŋ wɔ lɛ?
20 Ekɔɔɔ he eko shihilɛ ni ekolɛ wɔkɛbaakpe lɛ, ehi jogbaŋŋ akɛ wɔɔha lalatsɛ lɛ wiemɔi ni shɛjeɔ mɔ mii nɛɛ ahi wɔjwɛŋmɔŋ, akɛ: “Yehowa shɛŋ emaŋ lɛ efɔŋ.” (Lala 94:14) Eyɛ mli akɛ wɔ diɛŋtsɛ lɛ, miishɛjemɔ he miihia wɔ moŋ, shi wɔná hegbɛ kpele akɛ wɔ hu wɔɔshɛje mɛi krokomɛi amii. Taakɛ wɔbaana yɛ nikasemɔ ni nyiɛ sɛɛ lɛ mli lɛ, wɔbaanyɛ wɔshɛje mɛi ni yeɔ ŋkɔmɔ yɛ jeŋ ni haomɔ eyi mli obɔ nɛɛ mli lɛ amii.
Te Obaaha Hetoo Oha Tɛŋŋ?
• Mɛɛ nibii komɛi baanyɛ aha wɔhao?
• Mɛɛ gbɛ nɔ Yehowa shɛjeɔ etsuji lɛ amii?
• Kɛ́ wɔwala yaje oshara mli lɛ, mɛni baanyɛ ashɛje wɔmii?
[Nikasemɔ lɛ he Sanebimɔi]
[Akrabatsa/Mfonirii ni yɔɔ baafa 25]
BƆ NI WƆƆFEE WƆKPEE NIBII NI BAANYƐ ANÁ NƆ HEWALƐ LƐ ANAA . . .
▪ wɔtsui Lala 147:3; 1 Yoh. 3:19-22; 5:14, 15
▪ wɔjwɛŋmɔ Lala 94:19; Fil. 4:6, 7
▪ wɔhenumɔi 2 Mose 14:13, 14; 5 Mose 31:6
▪ wɔgbɔmɔtsoŋ hewalɛnamɔ 2 Kor. 4:8, 9
▪ wɔmumɔŋ hewalɛnamɔ Lala 145:14; Yak. 5:14, 15
