Sanebimɔi ni Jɛ Kanelɔi Adɛŋ

Kɛ́ miyɛ sanebimɔ ko yɛ nɔ ko ni mikane yɛ Biblia lɛ mli lɛ he, loo miitao ŋaawoo kɛtsu mi diɛŋtsɛ minaagba ko he nii lɛ, mɛni esa akɛ mafee?

Abɛi 2:1-5 lɛ woɔ wɔteŋ mɔ fɛɛ mɔ hewalɛ ni ‘eya nɔ etao’ saneshishinumɔ kɛ sɛɛyoomɔ tamɔ nɔ ni eetao “jwetrii ní aŋɔtee.” Enɛ tsɔɔ akɛ esa akɛ wɔmia wɔhiɛ kɛtao wɔ-Biblia mli saji ni wɔnuuu shishi lɛ ahetoo, kɛ agbɛnɛ hu wɔnaagbai lɛ anaa tsabaa. Te wɔɔfee tɛŋŋ wɔfee enɛ lɛ?

Ná Teokrase Sɔɔmɔ Skul Tsɔsemɔ lɛ He Sɛɛ wolo lɛ, baafa 33 kɛyashi 38 lɛ saneyitso ni ji “Bɔ ni Afeɔ Ataoɔ Nibii Amli” lɛ tsɔɔ bɔ ni wɔɔfee wɔkɛ dɛŋdadei ni “tsulɔ anɔkwafo kɛ nilelɔ” lɛ kɛha wɔ lɛ atsu nii kɛtao nii amli. (Mat. 24:45) Baafa 36 lɛ tsɔɔ bɔ ni akɛ Watch Tower Publications Index lɛ tsuɔ nii ahaa, ni ato emli saji lɛ anaa awo saneyitsei nɛɛ ashishi: saji ataomɔhe kɛ ŋmalɛi ataomɔhe. Enɛ haa onyɛɔ otaoɔ sane loo ŋmalɛ ko mlitsɔɔmɔ oya, ejaakɛ ebaatsɔɔ bo woji srɔtoi ni obaanyɛ okwɛ mli kɛha nɔ ni otaoɔ lɛ. Esa akɛ oŋmɛ otsui shi kɛtao hetoo loo gbɛtsɔɔmɔ pɔtɛɛ ni otaoɔ lɛ. Kaimɔ akɛ ootao “jwetrii ní aŋɔtee,” ni enɛ heɔ be ni ebiɔ hiɛmiamɔ.

Anɔkwa sane ji akɛ, saji kɛ ŋmalɛi komɛi yɛ ni wɔwoji lɛ ewieko amɛhe nɔ ko pɔtɛɛ. Ni yɛ he ni wɔwoji lɛ ewie Biblia mli ŋmalɛ pɔtɛɛ ko he yɛ po lɛ, ekolɛ ahako sanebimɔ tuuntu ni otaoɔ lɛ hetoo. Kɛfata he lɛ, Biblia mli amaniɛbɔi komɛi yɛ ni teɔ sanebimɔi ashi, ejaakɛ Ŋmalɛi lɛ ewieee amɛhe saji fitsofitso. No hewɔ lɛ, wɔnyɛŋ wɔná sanebimɔ fɛɛ sanebimɔ hetoo bianɛ. Kɛ́ ebalɛ nakai lɛ, esaaa akɛ wɔkaa wɔyiŋ wɔwieɔ nɔ ko yɛ saji ni anyɛŋ aha hetoo lɛ he, ejaakɛ enɛɛmɛi kɛ ‘ŋwanejee baa fe ni eeewa wɔ ni wɔná Nyɔŋmɔ mli hemɔkɛyeli.’ (1 Tim. 1:4; 2 Tim. 2:23; Tito 3:9) Nitsumɔhe nine lɛ loo jeŋ muu fɛɛ nitsumɔhe yitso lɛ nyɛŋ aha saji fɛɛ ni tamɔ nakai ni awieko he nɔ ko yɛ wɔwoji lɛ amli lɛ hetoo. Wɔbaanyɛ wɔná nɔmimaa akɛ Biblia lɛ kɛ saji ni he hiaa ni baaye abua wɔ yɛ shihilɛ mli lɛ haa wɔ, shi yɛ nakai beaŋ nɔŋŋ lɛ, ewieee nibii komɛi ahe fitsofitso bɔni afee ni wɔná hegbɛ kɛtsɔɔ akɛ wɔyɛ hemɔkɛyeli ni mli wa yɛ Biblia lɛ Ŋmalɔ lɛ mli.—Kwɛmɔ Tsi Obɛŋkɛ Yehowa wolo lɛ baafa 185 kɛyashi 187 lɛ.

Ni kɛ́ obɔ mɔdɛŋ fɛɛ ni ooonyɛ kɛtao sane ko ni miigba onaa, shi loloolo lɛ onaaa gbɛtsɔɔmɔ ko ni kɔɔ he loo enaa tsabaa hu? Yaana nyɛmimɛi Kristofoi ni edara yɛ mumɔŋ lɛ ateŋ mɔ kome, ekolɛ osafoŋ onukpai lɛ eko. Amɛle Biblia lɛ mli jogbaŋŋ, ni amɛyɛ niiashikpamɔ babaoo hu akɛ Kristofoi. Kɛ́ ootao yelikɛbuamɔ yɛ nɔ ko ni miigba onaa lɛ he, loo ootao okpɛ oyiŋ yɛ sane ko he lɛ, amɛbaanyɛ amɛye amɛbua bo ejaakɛ amɛle bo, ni amɛle shihilɛ mli ni oyɔɔ lɛ hu jogbaŋŋ. Ni kaaha ohiɛ miikpa nɔ akɛ obaasɔle oha Yehowa yɛ nibii pɔtɛɛ ni gbaa onaa lɛ ahe, ni obi lɛ koni ekɛ emumɔ krɔŋkrɔŋ lɛ akudɔ osusumɔi, “ejaakɛ Yehowa haa . . . nilee kɛ sanesɛɛkɔmɔ.”—Abɛi 2:6; Luka 11:13.