Ani Okaiɔ?

Ani oná Buu-Mɔɔ srɔtoi ni ba nyɛsɛɛ nɛɛ akanemɔ he miishɛɛ? Kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Namɔ esa akɛ etsɔɔ gbekɛbii Nyɔŋmɔ he nii?

Eyɛ mli akɛ mɛi krokomɛi baanyɛ aye abua tsɛ lɛ kɛ nyɛ lɛ moŋ, shi eji fɔlɔi lɛ titri asɔ̃ akɛ amɛtsɔɔ amɛbii lɛ Nyɔŋmɔ he nii kɛ bɔ ni Nyɔŋmɔ taoɔ ni weku mli bii lɛ ahi shi aha.—10/1, baafa 7.

• Te Nyɔŋmɔ tsɔɔ tɛŋŋ lɛ, beni ekɛɛ Levibii lɛ akɛ: “Miji ogbɛfaŋnɔ” lɛ?

Israel akutsei lɛ eko fɛɛ eko ná amɛgbɛfaŋnɔ yɛ shikpɔji ni ajara lɛ mli, shi Yehowa ji Levibii lɛ ‘agbɛfaŋnɔ.’ (4 Mose 18:20) Yɛ nɔ najiaŋ ni aaaha amɛ shikpɔŋ akɛ amɛgboshinii lɛ, atu sɔɔmɔ nitsumɔ ni nɔ bɛ awo amɛdɛŋ. Shi Yehowa tee nɔ ekɛ nibii ni he hiaa amɛ lɛ ha amɛ. Ŋmɛnɛ hu lɛ, mɛi ni ená hegbɛ akɛ amɛaaha Maŋtsɛyeli lɛ he nibii aya hiɛ lɛ baanyɛ aná hekɛnɔfɔɔ akɛ Yehowa baaha amɛ nibii ni he hiaa amɛ lɛ.—9/15, baafa 7-8, 13.

• Mɛni hewɔ esa akɛ ojie bulɛ kpo otsɔɔ ohefatalɔ lɛ?

Bulɛ ji nibii ni haa miishɛɛ hiɔ gbãla mli ni haa gbãla lɛ hiɔ shi daa lɛ ateŋ ekome. Kɛ́ nuu kɛ eŋa jie bulɛ kpo amɛtsɔɔ amɛhe lɛ, ehaa amɛtsui nyɔɔ amɛmli, ni amɛnuɔ he akɛ amɛyɛ shweshweeshwe. Ehi jogbaŋŋ akɛ wɔɔjie bulɛ kpo.—10/1, baafa 12.

• Mɛni baanyɛ aye abua Kristofonyo ko ní enyɛ ena hiɛtserɛjiemɔ ni hi kɛ nɔ ni ehiii?

Kɛ́ hiɛtserɛjiemɔ ko baafee nɔ ni saa Nyɔŋmɔ hiɛ ni wɔná he sɛɛ hu lɛ, esa akɛ wɔbi wɔhe saji ni he hiaa nɛɛ: Mɛni he ekɔɔ? Mɛɛ be mikɛ mihe baawo mli? Namɛi mikɛbaashãra?—10/15, baafa 9-12.

• Ani esa akɛ wɔwo too?

Beni abi Yesu kɛji eja gbɛ akɛ awo too aha Roma nɔyelɔ lɛ, eto he akɛ: “Nyɛŋɔa Kaisare nii nyɛhaa Kaisare, ni nyɛŋɔa Nyɔŋmɔ nii nyɛhaa Nyɔŋmɔ.” (Mar. 12:13-17) Nɔyelii lɛ—ni akɛ “Kaisare” damɔ shi kɛha amɛ lɛ—foɔ shika ni amɛkwɛɔ koni shika lɛ jara akagbee shi. Amɛtsuɔ nitsumɔi babaoo amɛhaa maŋbii lɛ hu. Enɛ hewɔ lɛ, Nyɔŋmɔ buɔ amɛ akɛ amɛyɛ hegbɛ ni amɛbiɔ ni awo too.—10/1, baafa 14, 15.

• Mɛɛ gbɛ nɔ sane ni yɔɔ Abɛi 7:6-23 lɛ baanyɛ aye abua wɔ koni wɔtsi wɔhe kɛjɛ mfonirii ni teɔ bɔlɛnamɔ akɔnɔ shi lɛ akwɛmɔ he?

Nakai sane lɛ kɔɔ oblanyo ko ni yashara shi yɛ akutso ko ni ale akɛ yoo ko ni jeŋba ekpɔtɔ yɔɔ jɛmɛ lɛ mli lɛ he. Yoo lɛ laka lɛ. Ŋmɛnɛ lɛ, ehi jogbaŋŋ akɛ wɔɔkpoo Intanɛt lɛ nɔ hei ni mfonirii ni bɛ hiŋmɛi nɔ yɔɔ lɛ, ni ehi akɛ wɔɔsɔle koni Nyɔŋmɔ aye abua wɔ dani wɔkɛ mfonirii ni tamɔ nakai po akpe yɛ Intanɛt lɛ nɔ.—11/15, baafa 9-10.

• Te ooofee tɛŋŋ ona anɔkwa jamɔ lɛ?

Anɔkwa jalɔi buɔ Biblia lɛ akɛ eji Nyɔŋmɔ Wiemɔ. Amɛkɛ woo haa Nyɔŋmɔ gbɛ́i ni ji Yehowa lɛ, ni amɛshiɛɔ Nyɔŋmɔ Maŋtsɛyeli lɛ. Amɛjɛɛɛ jeŋ fɔŋ nɛɛ mli, ni amɛsumɔɔ amɛhe waa.—10/1, baafa 16, 17.

• Ani Nyɔŋmɔ buɔ maŋ ko nɔ bii akɛ amɛhi fe ekroko nɔ bii?

Dabi, efeee nakai. Biblia lɛ feɔ lɛ faŋŋ akɛ: “Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔf. 10:34, 35)—10/1, baafa 26.