Anɔkwa Kristofoi yɛ Bulɛ Kɛha Nyɔŋmɔ Wiemɔ Lɛ
Anɔkwa Kristofoi yɛ Bulɛ Kɛha Nyɔŋmɔ Wiemɔ Lɛ
“Owiemɔ lɛ anɔkwaleŋ.”—YOH. 17:17.
TAOMƆ OTII NƐƐ:
Mɛɛ gbɛ nɔ esoro kpee ko ni afee yɛ Yerusalem yɛ afi 49 Ŋ.B. lɛ yɛ kpeei ni sɔlemɔ mli hiɛnyiɛlɔi lɛ fee yɛ sɛɛ mli lɛ he?
Mɛɛ hii komɛi ni hi shi yɛ afi 476 kɛyashi afi 1500 Ŋ.B. afii lɛ amli lɛ fã Nyɔŋmɔ Wiemɔ lɛ he?
Mɛɛ gbɛ nɔ anɔkwa Kristofoi ni hi shi yɛ afi 1800 afii lɛ naagbee gbɛ lɛ tsɔ amɛkase Biblia lɛ, ni mɛni hewɔ eji gbɛ ni sa jogbaŋŋ lɛ?
1. Yɛ bo diɛŋtsɛ oniiashikpamɔ mli lɛ, tsɔɔmɔ nɔ ko pɔtɛɛ ni haa esoroɔ Yehowa Odasefoi yɛ jamɔi krokomɛi ahe.
SUSUMƆ gbi klɛŋklɛŋ ni okɛ Yehowa Odasefonyo ko gba sane lɛ he okwɛ. Mɛni okaiɔ yɛ nakai sanegbaa lɛ he? Mɛi pii baakɛɛ akɛ, ‘Bɔ ni Odasefonyo lɛ jɛ Biblia lɛ mli eha saji ni mibi lɛ lɛ fɛɛ hetoo lɛ ha mihe jɔ̃ mihe.’ Kwɛ bɔ ni wɔmii shɛ wɔhe ha beni wɔná wɔle Nyɔŋmɔ yiŋtoo kɛha shikpɔŋ lɛ, nɔ ni baa wɔnɔ kɛ́ wɔgboi, kɛ hiɛnɔkamɔ ni yɔɔ kɛha wɔsuɔlɔi ni egboi lɛ!
2. Mɛɛ yiŋtoi komɛi ahewɔ ni oná hiɛsɔɔ oha Biblia lɛ?
2 Shi beni wɔkase nii kɛtee hiɛ lɛ, wɔbayɔse akɛ Biblia lɛ tsɔɔ wɔ nibii babaoo fe sanebimɔi ni kɔɔ wala, gbele, kɛ wɔsɛɛ shihilɛ he lɛ ahetoi ni ekɛhaa lɛ kɛkɛ. Wɔbayɔse akɛ Biblia lɛ he yɛ sɛɛnamɔ fe woji krokomɛi fɛɛ ni yɔɔ je lɛŋ. Ŋaawoo ni yɔɔ mli lɛ be hooo, ni mɛi ni kɛtsuɔ nii jogbaŋŋ lɛ náa miishɛɛ ni amɛyeɔ omanye yɛ shihilɛ mli. (Nyɛkanea Lala 1:1-3.) Anɔkwa Kristofoi ekpɛlɛ Biblia lɛ nɔ yɛ be fɛɛ mli akɛ “Nyɔŋmɔ wiemɔ, taakɛ bɔ ni eji hu lɛɛlɛŋ lɛ, shi jeee akɛ gbɔmɛi awiemɔ ko.” (1 Tes. 2:13) Yinɔsane mli amaniɛbɔi fioo komɛi ni wɔbaasusu he lɛ baaha wɔna mɛi ni yɔɔ bulɛ diɛŋtsɛ kɛha Nyɔŋmɔ Wiemɔ lɛ, kɛ mɛi ni efeee nakai.
ATSU NAAGBA WULU KO HE NII
3. Mɛɛ naagba kulɛ ebaanyɛ efite ekomefeemɔ ni yɔɔ klɛŋklɛŋ afii 100 lɛ mli Kristofoi asafo lɛ mli lɛ, ni mɛni hewɔ eji naagba ni mli wa lɛ?
3 Yɛ Kornelio, ni ji Jeŋmajiaŋbii foolɔi lɛ ateŋ mɔ klɛŋklɛŋ ni afɔ lɛ mu lɛ mufɔɔ lɛ sɛɛ afii 13 lɛ, sane ko te shi ni kulɛ ebaanyɛ efite ekomefeemɔ ni yɔɔ Kristofoi asafo lɛ mli lɛ. No mli lɛ, Jeŋmajiaŋbii babaoo miitsɔmɔ Kristofoi. Sanebimɔ lɛ ji akɛ, Ani esa akɛ afolɔ hii lɛ ketia yɛ Yudafoi lɛ akusum lɛ naa dani abaptisi amɛ? Ebɛ mlɛo kɛha Yudanyo akɛ eeeha sanebimɔ nɛɛ hetoo. Yudafoi ni yeɔ Mla lɛ nɔ lɛ eyaŋ Jeŋmajiaŋnyo ko shĩa, aahu ni amɛkɛ amɛteŋ mɔ ko aaafee ekome kɛjá Nyɔŋmɔ po. Yudafoi ni ebatsɔmɔ Kristofoi lɛ kɛ yiwaa ni naa wa waa miikpe yɛ amɛtsutsu jamɔ ni amɛshi lɛ hewɔ. Kɛ́ amɛtee nɔ amɛkɛ Jeŋmajiaŋbii foolɔi lɛ bɔ lɛ, ebaaha naagba ni kã amɛ kɛ Yudafoi lɛ ateŋ lɛ mli awo wu, ni ebaaha aya nɔ agbe Kristofoi lɛ ahe guɔ babaoo.—Gal. 2:11-14.
4. Namɛi kpe kɛsusu sane lɛ he, ni mɛɛ saji kulɛ mɛi baanyɛ abi yɛ kpee nɛɛ he?
4 Yɛ afi 49 Ŋ.B. lɛ, bɔfoi lɛ kɛ onukpai ni yɔɔ Yerusalem lɛ, ni amɛ hu amɛji Yudafoi ni afolɔ amɛ ketia lɛ “babua amɛhe naa, koni amɛtao nɛkɛ sane nɛɛ mli.” (Bɔf. 15:6) Kpee nɛɛ eyafeee ŋwanejee yɛ jamɔ mli tsɔɔmɔi ni he ehiaaa he, shi moŋ ekɔ Biblia mli saji ni he yɔɔ sɛɛnamɔ lɛ ahe. Mɔ fɛɛ mɔ ni yɔɔ kpee lɛ shishi lɛ tsɔɔ ejwɛŋmɔ yɛ sane lɛ he. Ani amɛbaaŋmɛ gbɛ ni mɔ ko kɛ esusumɔ loo bɔ ni enuɔ he ehaa lɛ afĩ mɛi krokomɛi lɛ anɔ? Ani hii onukpai nɛɛ baatsi yiŋ ni esa akɛ amɛkpɛ lɛ amɛto kɛyashi jamɔŋ naagba ni yɔɔ Israel nɛɛ naa aaaba shi? Aloo amɛbaaŋmɛɛ saji ahe kɛsaa, ni tsɔɔ akɛ afãi enyɔ lɛ fɛɛ baatsake amɛsusumɔ lɛ mli fioo bɔni afee ni amɛba gbeekpamɔ ko kɛkɛ?
5. Mɛɛ gbɛi anɔ esoro kpee ni afee yɛ Yerusalem yɛ afi 49 Ŋ.B. lɛ kwraa yɛ kpeei ni sɔlemɔ mli hiɛnyiɛlɔi feɔ ŋmɛnɛ lɛ he?
5 Ákɛ aaaŋmɛɛ saji ahe kɛsaa loo aaawo mɛi ayiŋ ni amɛkpɛlɛ susumɔ ko nɔ lɛ ebahe shi waa yɛ kpeei ni sɔlemɔ mli hiɛnyiɛlɔi feɔ ŋmɛnɛ lɛ ashishi. Shi mɔ ko mɔ ko eŋmɛɛɛ saji ahe kɛsaaa yɛ kpee ni afee yɛ Yerusalem lɛ shishi; asaŋ awooo mɔ ko yiŋ hu ni efĩ afã ko sɛɛ. Kɛfata he lɛ, amɛ fɛɛ amɛgbee tee bɛlɛ kome mli. Te fee tɛŋŋ eba lɛ nakai? Yɛ susumɔi srɔtoi ni mɛi ni yɔɔ kpee lɛ shishi lɛ fɛɛ hiɛ lɛ sɛɛ lɛ, amɛ fɛɛ amɛná bulɛ amɛha Nyɔŋmɔ Wiemɔ lɛ, ni amɛdamɔ ŋmalɛi lɛ anɔ amɛtsu sane lɛ he nii.—Nyɛkanea Lala 119:97-101.
6, 7. Mɛɛ gbɛ nɔ akɛ Ŋmalɛi lɛ tsu nii kɛha ketiafoo sane lɛ hetoo?
6 Ŋmalɛ ni ha anyɛ atsu naagba lɛ he nii ji Amos 9:11, 12 lɛ. Taakɛ atsɛ́ yisɛɛ yɛ Bɔfoi lɛ Asaji 15:16, 17 lɛ, jɛmɛ kaneɔ akɛ: ‘Maku misɛɛ maba, ni masaa David buu ni ekumɔ lɛ mamã, ni etsukoi lɛ hu matswa ekoŋŋ, ni matee lɛ shi mamã shi; beni afee ni gbɔmɛi ni eshwɛ lɛ kɛ jeŋmaji lɛ fɛɛ hu ni atsĩ migbɛi atã atsɔɔ amɛ lɛ atao Nuŋtsɔ Yehowa sɛɛgbɛ. Nuŋtsɔ Yehowa kɛɛ.’
7 Shi ekolɛ mɔ ko baakɛɛ akɛ, ‘Bɛ nakai ŋmalɛ lɛ ekɛɛɛ akɛ ketia ni abaafolɔ Jeŋmajiaŋbii ni ebatsɔmɔ héyelilɔi lɛ he ehiaaa?’ Hɛɛ, eji anɔkwale; shi Yudafoi ni ebatsɔmɔ Kristofoi lɛ baanu shishi nakai. Amɛbuuu Jeŋmajiaŋbii ni afolɔ amɛ ketia lɛ akɛ ‘jeŋbii’, shi moŋ amɛbuɔ amɛ akɛ nyɛmimɛi. (2 Mose 12:48, 49) Ákɛ nɔkwɛmɔnɔ lɛ, Biblia shishitsɔɔmɔ ko (Bagster Septuagint lɛ) tsɔɔ Ester 8:17 lɛ shishi akɛ: “Afolɔ Jeŋmajiaŋbii lɛ babaoo ketia, ni amɛbatsɔmɔ Yudafoi.” No hewɔ lɛ, nɔ ni Ŋmalɛi lɛ gba akɛ Israel we lɛ ateŋ mɛi ni eshwɛ lɛ (Yudafoi kɛ mɛi ni batsɔmɔ Yudafoi ni afolɔ amɛ ketia) kɛ agbɛnɛ “jeŋmaji lɛ fɛɛ hu” (Jeŋmajiaŋbii foolɔi) baafee ekome akɛ Nyɔŋmɔ webii lɛ yɛ faŋŋ. Ehe ehiaaa ni afolɔ Jeŋmajiaŋbii ni miisumɔ ni amɛbatsɔmɔ Kristofoi lɛ ketia.
8. Mɛni hewɔ ehe bahia ni amɛná ekãa kɛkpɛ nakai yiŋ lɛ?
8 Nyɔŋmɔ Wiemɔ lɛ kɛ emumɔ lɛ kudɔ nakai Kristofoi ni yeɔ anɔkwa lɛ ni amɛ fɛɛ ‘amɛnaa fee ekome.’ (Bɔf. 15:25) Eyɛ mli akɛ yiŋkpɛɛ nɛɛ baaha aya nɔ awa Yudafoi ni ebatsɔmɔ Kristofoi lɛ ayi moŋ, shi anɔkwafoi nɛɛ fĩ yiŋkpɛɛ ni damɔ Biblia lɛ nɔ lɛ sɛɛ kpɛŋŋ.—Bɔf. 16:4, 5.
ANA SRƆTOFEEMƆ LƐ FAŊŊ
9. Mɛɛ yiŋtoo titri kome hewɔ akɛ apasa tsɔɔmɔi futu anɔkwa jamɔ mli lɛ, ni mɛɛ tsɔɔmɔ ko ni he hiaa afutu mli?
9 Bɔfo Paulo gba akɛ, yɛ bɔfoi lɛ agbele sɛɛ lɛ akɛ apasa tsɔɔmɔi baafutu Kristofoi ahemɔkɛyeli lɛ. (Nyɛkanea 2 Tesalonikabii 2:3, 7.) Mɛi ni hiɛ sɔɔmɔ hegbɛi lɛ ateŋ mɛi komɛi po ‘ekpɛlɛŋ tsamɔ tsɔɔmɔ’ lɛ. (2 Tim. 4:3) Paulo bɔ asafoŋ onukpai ni hi shi yɛ ebeaŋ lɛ kɔkɔ akɛ: ‘Nyɛ diɛŋtsɛ nyɛteŋ hu lɛ, hii ni wieɔ nii ni ejaaa aaate shi, ni amɛaakpala kaselɔi lɛ amɛshwie amɛsɛɛ.’ (Bɔf. 20:30) The New Encyclopædia Britannica lɛ tsɔɔ yiŋtoo titri kome hewɔ ni aŋmɛ apasa tsɔɔmɔi agbɛ lɛ mli akɛ: “Kristofoi ni atsɔse amɛ yɛ Hela nilee mli lɛ nu he akɛ esa akɛ amɛtsɔɔ amɛhemɔkɛyeli lɛ mli yɛ nibii ni amɛkase lɛ naa kɛha amɛ diɛŋtsɛ amɛsɛɛnamɔ, agbɛnɛ hu ni amɛkɛtsake woloŋlelɔi ni ji wɔŋjalɔi lɛ kɛba Nyɔŋmɔjamɔ mli.” Tsɔɔmɔ ko ni he hiaa waa ni akɛ wɔŋjamɔ tsɔɔmɔ futu mli lɛ kɔɔ mɔ tuuntu ni Yesu Kristo ji lɛ he. Biblia lɛ tsɛɔ lɛ akɛ Nyɔŋmɔ Bi; shi mɛi ni sumɔɔ Hela nilee lɛ kɛɛ doo akɛ lɛ ji Nyɔŋmɔ.
10. Mɛɛ gbɛ nɔ kulɛ sɔlemɔ mli hiɛnyiɛlɔi baanyɛ atsɔ ana mɔ tuuntu ni Kristo ji?
10 Ataa sane nɛɛ naa yɛ kpeei srɔtoi ni sɔlemɔ mli hiɛnyiɛlɔi fee lɛ ashishi. Eji hiɛnyiɛlɔi nɛɛ susu Ŋmalɛi lɛ ahe jogbaŋŋ kulɛ amɛbaanyɛ amɛna sane nɛɛ naa yɛ gbɛ ni waaa kwraa nɔ, shi amɛteaŋ mɛi babaoo efeee nakai. Anɔkwa sane ji akɛ, amɛteŋ tsiimɔ kpɛɔ amɛyiŋ yɛ sane lɛ he kɛtsɔɔ hiɛ dani amɛyashɛɔ kpeei lɛ ashishi, ni beni amɛbaashi kpeei nɛɛ ashishi lɛ, amɛkpiliŋ amɛtsui fe tsutsu lɛ po. Ni bei pii lɛ, yiŋ ni amɛkpɛɔ yɛ kpeei nɛɛ ashishi lɛ damɔɔɔ Ŋmalɛi lɛ anɔ kwraa.
11. Mɛɛ bulɛ ni mli kwɔ jamɔŋ hiɛnyiɛlɔi lɛ ná amɛha amɛmra be mli Osɔfonukpai ni abuɔ amɛ waa lɛ awiemɔi lɛ, ni mɛni hewɔ?
11 Mɛni hewɔ amɛsusuuu Ŋmalɛi lɛ ahe kɛmɔɔɔ shi lɛ? Woloŋlelɔ Charles Freeman haa sanebimɔ nɛɛ hetoo akɛ, ewa kɛha mɛi ni heɔ amɛyeɔ akɛ Yesu ji Nyɔŋmɔ lɛ akɛ “amɛaakpɛlɛ Yesu wiemɔi babaoo ni tsɔɔ akɛ Nyɔŋmɔ, ni ji Tsɛ lɛ nɔ kwɔ fe lɛ lɛ nɔ.” Enɛ hewɔ lɛ, akɛ sɔlemɔ kusumii kɛ gbɔmɛi asusumɔi ye Sanekpakpai lɛ najiaŋ yɛ sɛɛ mli. Kɛbashi ŋmɛnɛ lɛ, jamɔŋ hiɛnyiɛlɔi babaoo kɛ bulɛ haa amɛmra be mli Osɔfonukpai ni abuɔ amɛ waa lɛ awiemɔi kwraa fe nɔ ni Nyɔŋmɔ Wiemɔ lɛ kɛɔ lɛ! Kɛ́ okɛ mɔ ko ni etee osɔfoi askul esusu Triniti tsɔɔmɔ lɛ he pɛŋ lɛ, ekolɛ ona nɔ ni atsɔɔ lɛ.
12. Mɛɛ hewalɛ gbonyo nɔyelɔ lɛ ná yɛ sɔlemɔ lɛ nɔ?
12 Nɔ ko ni sa kadimɔ waa yɛ kpeei nɛɛ ahe ji bɔ ni Roma nɔyelɔi lɛ ná kpeei lɛ anɔ hewalɛ ha lɛ. Ákɛ nɔkwɛmɔnɔ lɛ, Nilelɔ Kpanaa Richard E. Rubenstein wie kpee ko ni sɔlemɔ mli hiɛnyiɛlɔi lɛ fee yɛ Nicaea lɛ he akɛ: “Konstantino wo [osɔfoi lɛ] ahiɛ nyam, ni eha amɛná nii babaoo fe bɔ ni amɛkpaa gbɛ. Eshɛɛɛ afi kɛkɛ ni nɔyelɔ hee lɛ ku sɛɛ ekɛ amɛsɔlemɔtsui ni ahe yɛ amɛdɛŋ lɛ ha amɛ, loo esaa emamɔ ehei eha amɛ, enɛ ha amɛnine shɛ amɛnitsumɔi kɛ hiɛnyam ni amɛyɔɔ lɛ nɔ ekoŋŋ . . . Ekɛ woo krɛdɛɛ ni kulɛ akɛhaa wulɔmɛi lɛ ha Kristofoi ajamɔŋ hiɛnyiɛlɔi lɛ.” Enɛ hewɔ lɛ, “Konstantino ná kpee ni afee yɛ Nicaea lɛ nɔ hewalɛ waa—ekolɛ lɛ etsɔɔ yiŋ ni sa akɛ akpɛ po.” Charles Freeman ma nɔ mi akɛ: “Amrɔ nɛɛ, gbɛ egbele kɛha nɔyelɔ lɛ akɛ ekɛ ehe aaawo Sɔlemɔ lɛ saji amli, jeee ni ekɛwo amɛ hewalɛ pɛ kɛkɛ, shi moŋ ni ená amɛtsɔɔmɔi lɛ hu anɔ hewalɛ.”—Nyɛkanea Yakobo 4:4.
13. Mɛni osusuɔ akɛ no ji nɔ ni ha sɔlemɔ mli hiɛnyiɛlɔi ni ba yɛ sɛɛ mli lɛ kpoo Biblia mli tsɔɔmɔi ni yɔɔ faŋŋ lɛ?
13 Be mli ni sɔlemɔ lɛ mli hiɛnaanɔbii lɛ nyɛɛɛ atsɔɔ mɔ tuuntu ni Yesu Kristo ji lɛ, mɛi foji lɛ ateŋ mɛi babaoo bɛ nakai naagba lɛ. Akɛni mɛi foji lɛ ahiɛ ekɔ̃ɔɔ nɔyelɔ lɛ shika loo hegbɛi ni amɛaaná yɛ sɔlemɔ lɛ mli lɛ nɔ hewɔ lɛ, amɛnu nɔ ni Ŋmalɛi lɛ kɛɔ lɛ shishi jogbaŋŋ. Hɛɛ, amɛkpɛlɛ nɔ, ni amɛkɛtsu nii. Nyɔŋmɔjamɔ he nilelɔ ko ni atsɛɔ lɛ Gregory ni jɛ Nyssa lɛ ye mɛi foji lɛ ahe fɛo akɛ: “Mamahɔ̃ɔlɔi, shikatsakelɔi, kɛ shwaponaatálɔi fɛɛ etsɔmɔ amɛhe Nyɔŋmɔjamɔ he nilelɔi. Kɛ́ ootao ole oshika lɛ jara lɛ, nilelɔ ko baatsɔɔ bo nɔ hewɔ ni esoro Bi lɛ yɛ Tsɛ lɛ he lɛ. Kɛ́ obi bodobodo naa lɛ, hetoo ni ahaa bo ji Tsɛ lɛ da fe Bi lɛ. Kɛ́ obi akɛ obaanyɛ oyaju ohe lo lɛ, nɔ ni obaanu nɔŋŋ ji, abɔ Bi lɛ.” Hɛɛ, ákɛ mɛi ni tamɔɔɔ jamɔŋ hiɛnaanɔbii lɛ, mɛi foji lɛ ateŋ mɛi babaoo damɔ Nyɔŋmɔ Wiemɔ lɛ nɔ amɛtsɔɔ anɔkwalei nɛɛ amli. Eji Gregory kɛ ehefatalɔi lɛ bo mɛi foji lɛ atoi kulɛ, amɛbaaná he sɛɛ waa!
“ŊMAA” KƐ “JWƐI” LƐ KWƐ̃ SHIKOME
14. Mɛni hewɔ wɔbaanyɛ wɔkɛɛ akɛ anɔkwa Kristofoi ni afɔ amɛ mu ehi shikpɔŋ lɛ nɔ be fɛɛ be kɛjɛ klɛŋklɛŋ afii 100 lɛ mli kɛbaa lɛ?
14 Nɔ ni Yesu wie yɛ abɛbua ko mli lɛ tsɔɔ akɛ, kɛjɛ klɛŋklɛŋ afii 100 lɛ nɔ kɛbaa lɛ, anɔkwa Kristofoi ni afɔ amɛ mu baahi shikpɔŋ lɛ nɔ be fɛɛ be. Ekɛ amɛ to “ŋmaa” ni kwɛ̃ yɛ “jwɛi” ateŋ lɛ he. (Mat. 13:30) Anɔkwa, wɔnyɛŋ wɔkɛ nɔmimaa atsɔɔ aŋkroaŋkroi loo kui ni ji ŋmaa kuu ni afɔ amɛ mu lɛ mli bii moŋ, shi wɔbaanyɛ wɔma nɔ mi akɛ amɛteŋ mɛi komɛi ehi shi yɛ bei fɛɛ mli ni amɛkɛ ekãa efã Nyɔŋmɔ Wiemɔ lɛ he, ni amɛkpa jamɔŋ tsɔɔmɔi ni damɔɔɔ ŋmalɛi lɛ anɔ lɛ ahe mama. Nyɛhaa wɔkwɛa nɔkwɛmɔnii fioo komɛi.
15, 16. Tsĩi mɛi komɛi ni ná bulɛ amɛha Nyɔŋmɔ Wiemɔ lɛ atã.
15 Osɔfonukpa Agobard ni jɛ Lyons, yɛ France (afi 779-840 Ŋ.B.) lɛ wie eshi amagajamɔ, sɔlemɔi ni akɛ hetselɔi agbɛi efɔ̃ nɔ, kɛ sɔlemɔ lɛ kusumii kɛ nifeemɔi ni damɔɔɔ ŋmalɛ lɛ nɔ lɛ. Osɔfo Claudius ni hi shi yɛ Agobard beaŋ lɛ hu kpoo sɔlemɔ lɛ kusum nifeemɔi lɛ, ni ewie eshi sɔlemɔ ni asɔleɔ kɛbiɔ hetselɔi anii, kɛ jamɔ ni ajáa okadii kɛ nibii ni wala bɛ amɛmli lɛ. Yɛ afi 1000 afii lɛ amli lɛ, ashwie Osɔfo Sɛɛmɔ Berengarius ni jɛ Tours, yɛ France lɛ kɛjɛ sɔlemɔ lɛ mli akɛni ekpoo Katolik tsɔɔmɔ ni ji akɛ Nuŋtsɔ lɛ niyenii lɛ tsɔɔ eheloo kɛ elá diɛŋtsɛ lɛ hewɔ. Kɛfata he lɛ, esusuɔ akɛ Biblia lɛ nɔ kwɔ kwraa fe sɔlemɔ lɛ kusumii lɛ.
16 Peter ni jɛ Bruys, kɛ Henry ni jɛ Lausanne lɛ hu ji mɛi komɛi ni nyá Biblia mli anɔkwalei ahe yɛ afi 1100 afii lɛ amli. Peter kpá osɔfoyeli ejaakɛ ena akɛ Katolik tsɔɔmɔi tamɔ abifabii abaptisimɔ, Nuŋtsɔ lɛ niyenii ni akɛɛ etsɔɔ eheloo kɛ elá diɛŋtsɛ, sɔlemɔ ni asɔleɔ ahaa gbohii, kɛ krɔɔs lɛ jamɔ lɛ kɛ Ŋmalɛi lɛ kpãaa gbee. Yɛ afi 1140 mli lɛ, agbe Peter yɛ ehemɔkɛyeli lɛ hewɔ. Henry, ni no mli efata hii ni yɛ jamɔ hewɔ lɛ amɛ pɛ amɛyɔɔ he kome lɛ ahe lɛ wie eshi nifeemɔi gbohii kɛ sɔlemɔ lɛ mli kusumii komɛi ni kɛ ŋmalɛ lɛ kpãaa gbee lɛ. Amɔ lɛ yɛ afi 1148 mli, ni eye ewala be ni eshwɛ lɛ yɛ kpabuŋ.
17. Mɛni Waldo kɛ esɛɛnyiɛlɔi lɛ fee ni sa kadimɔ waa?
17 Yɛ be mli ni ashã Peter ni jɛ Bruys lɛ hiɛkãlɔ yɛ sɔlemɔ lɛ ni ewie eshi lɛ hewɔ lɛ, afɔ́ mɔ ko ni sɛɛ mli lɛ ebaaye ebua waa kɛha Biblia mli anɔkwalei lɛ gbɛɛ kɛshwãmɔ. Gbɛi ni akɛle lɛ ji Valdès, loo Waldo. * Waldo ji mɔ ko ni lé Biblia lɛ he nɔ ko tsɔ kɛ́ akɛ lɛ to Peter ni jɛ Bruys, kɛ Henry ni jɛ Lausanne lɛ he, shi ená suɔmɔ kɛha Nyɔŋmɔ Wiemɔ lɛ aahu akɛ ekɛ eheloonaa nibii ni eyɔɔ lɛ fɛɛ shã afɔle, ni eto gbɛjianɔ ni atsɔɔ Biblia lɛ fãi komɛi ashishi kɛtee wiemɔ ko ni mɛi babaoo wieɔ yɛ France wuoyi-bokagbɛ lɛ mli. Mɛi komɛi ná miishɛɛ waa akɛ amɛná Biblia lɛ yɛ amɛ diɛŋtsɛ amɛwiemɔ mli, ni amɛhu amɛkɛ amɛheloonaa nibii shã afɔle ni amɛtuu amɛhe kɛha Biblia mli anɔkwale lɛ gbɛɛ kɛshwãmɔ. Enɛ gba sɔlemɔ mli hiɛnyiɛlɔi lɛ anaa waa. Yɛ afi 1184 lɛ, paapa lɛ shwie hii kɛ yei ni yɔɔ ekãa nɛɛ ní abale amɛ yɛ sɛɛ mli akɛ Waldensbii lɛ kɛjɛ sɔlemɔ lɛ mli, ni osɔfo lɛ hu eŋmɛɛɛ amɛ gbɛ ni amɛku amɛsɛɛ kɛya amɛ diɛŋtsɛ amɛshĩai amli. Nifeemɔ nɛɛ moŋ ye ebua ni agbɛ Biblia mli shɛɛ sane lɛ kɛtee hei krokomɛi. Naagbee lɛ, ana akɛ Waldo, Peter ni jɛ Bruys, kɛ Henry ni jɛ Lausanne lɛ asɛɛnyiɛlɔi lɛ, kɛ mɛi krokomɛi hu ni tse amɛhe kɛjɛ sɔlemɔ lɛ he lɛ egbɛ eshwã Yuropa hei babaoo. Mɛi ni nyiɛ sɛɛ nɛɛ hu ji mɛi krokomɛi ni fã Biblia mli anɔkwale lɛ he yɛ afii ohai ni nyiɛ sɛɛ kɛba lɛ amli: John Wycliffe (aaafee afi 1330-1384), William Tyndale (aaafee afi 1494-1536), Henry Grew (afi 1781-1862), kɛ George Storrs (afi 1796-1879).
“NYƆŊMƆ WIEMƆ LƐ AWOOO LƐ KPÃA”
18. Mɛɛ gbɛ nɔ Biblia kaselɔi ni hiɛ tsui ni ja ni hi shi yɛ afi 1800 afii lɛ amli lɛ tsɔ amɛkase Biblia lɛ, ni mɛni hewɔ eji gbɛ ni sa jogbaŋŋ lɛ?
18 Yɛ mɔdɛŋ ni Biblia lɛ he shiteekɛwolɔi lɛ ebɔ lɛ fɛɛ sɛɛ lɛ, amɛnyɛko amɛtsĩ Biblia mli anɔkwalei lɛ gbɛɛ kɛshwãmɔ naa. Wɔkaneɔ yɛ 2 Timoteo 2:9 lɛ akɛ: “Nyɔŋmɔ wiemɔ lɛ awooo lɛ kpãa.” Yɛ afi 1870 lɛ, Biblia kaselɔi akuu ko ni hiɛ tsui ni ja lɛ bɔi anɔkwale lɛ taomɔ. Mɛɛ gbɛ nɔ amɛtsɔ amɛkase Biblia lɛ? Klɛŋklɛŋ lɛ, mɔ ko baabi sane. Kɛkɛ lɛ amɛsusu he. Amɛtaoɔ ŋmalɛi fɛɛ ni kɔɔ sane ni abi lɛ he, ni kɛ́ amɛna nɔ ni ŋmalɛ lɛ kɛɔ yɛ sane lɛ he lɛ, amɛmuɔ naa kɛkɛ lɛ amɛŋma amɛfɔ̃ shi. Ani enɛ haaa oná nɔmimaa akɛ, taakɛ eji yɛ bɔfoi lɛ kɛ asafoŋ onukpai ni hi shi yɛ klɛŋklɛŋ afii 100 lɛ mli lɛ agbɛfaŋ lɛ, nakai hii anɔkwafoi lɛ, ni ji “wɔmumɔŋ blematsɛmɛi” ni hi shi yɛ afi 1800 afii lɛ naagbee gbɛ lɛ, tswa amɛfai shi akɛ amɛbaaha amɛhemɔkɛyeli lɛ kɛ nɔ ni Nyɔŋmɔ Wiemɔ lɛ kɛɔ lɛ akpã gbee pɛpɛɛpɛ?
19. Mɛni ji afi 2012 afi ŋmalɛ lɛ, ni mɛni hewɔ enɛ sa jogbaŋŋ lɛ?
19 Biblia lɛ kã he eji nɔ ni nɔ ni wɔhemɔkɛyeli lɛ damɔ. No hewɔ lɛ, afi ŋmalɛ ni Yehowa Odasefoi a-Nɔyeli Kuu lɛ ehala kɛha afi 2012 lɛ ji wiemɔ ni Yesu kɛ ekãa wie akɛ: “Owiemɔ lɛ anɔkwaleŋ” lɛ. (Yoh. 17:17) Akɛni esa akɛ mɔ fɛɛ mɔ ni miisumɔ ni ená Nyɔŋmɔ nɔkpɛlɛmɔ lɛ anyiɛ yɛ anɔkwale lɛ mli hewɔ lɛ, eba akɛ wɔteŋ mɔ fɛɛ mɔ baaya nɔ amia ehiɛ ni eha Nyɔŋmɔ Wiemɔ lɛ atsɔɔ lɛ gbɛ.
[Shishigbɛ niŋmaa]
^ kk. 17 Bei komɛi lɛ atsɛɔ Valdès akɛ Pierre Valdès loo Peter Waldo, shi abɛ nɔmimaa yɛ gbɛi tuuntu ni fata Waldo he lɛ he.
[Nikasemɔ lɛ he Sanebimɔi]
[Wiemɔ ni akɔ ni akɛmiitsu nii ni yɔɔ baafa 8]
Afi 2012 afi ŋmalɛ lɛ ji: “Owiemɔ lɛ anɔkwaleŋ.”—Yoh. 17:17
[Mfoniri ni yɔɔ baafa 7]
Waldo
[Mfoniri ni yɔɔ baafa 7]
Wycliffe
[Mfoniri ni yɔɔ baafa 7]
Tyndale
[Mfoniri ni yɔɔ baafa 7]
Grew
[Mfoniri ni yɔɔ baafa 7]
Storrs
