Hɛɛ, Nikasemɔ Nɔ̃ lɛ Nɛ!

Bɔ ni wɔsaa wɔto Buu-Mɔɔ ni ji nikasemɔ nɔ̃ lɛ he gbɛjianɔ ekoŋŋ lɛ yɛ fɛo, ni ebaaye ebua bo koni onyɛ okase Yehowa anɔkwa Wiemɔ ni nɔ bɛ lɛ jogbaŋŋ.—Lala 1:2; 119:97.

Afii ejwɛ nɛ ni wɔbɔi Buu-Mɔɔ lɛ srɔtoi enyɔ kalamɔ, ekome kɛha maŋ bii lɛ kɛ ekome hu kɛha wɔ—Yehowa Odasefoi kɛ wɔ-Biblia mli nikaselɔi ni miiya amɛhiɛ lɛ.

Yehowa tsulɔ ko ni kɛ be babaoo esɔmɔ lɛ ŋma yɛ nikasemɔ nɔ̃ lɛ he akɛ: “Enɔ bɛ, ni enáa mɔ nɔ hewalɛ waa—nɛkɛ ji bɔ ni mina Buu-Mɔɔ ni ji nikasemɔ nɔ̃ ni afee klɛŋklɛŋ lɛ miha. Bɔ ni agbála Biblia mli anɔkwalei ni he hiaa lɛ mli jogbaŋŋ yɛ wolo tɛtrɛɛ nɛɛ mli lɛ ta mitsuiŋ waa. Miida nyɛ shi waa yɛ gbɛjianɔtoo hee ni nɔ bɛ nɛɛ hewɔ.” Nyɛmi nuu kroko hu ŋma akɛ: “Mikpaa be babaoo ní maye kɛkase Buu-Mɔɔ nɛɛ, ni makane emli ŋmalɛi lɛ kɛjɛ mi-Biblia lɛ mli lɛ gbɛ.” Wɔheɔ wɔyeɔ akɛ nakai nɔŋŋ bo hu onuɔ he.

Taakɛ ole lɛ, abɔi Buu-Mɔɔ lɛ kalamɔ kɛjɛ afi 1879 tɔ̃ɔ, ni Yehowa jɔɔmɔ kɛ emumɔ lɛ ji nɔ ni eye ebua ni anyɛ atsu nitsumɔ kpele ni tamɔ nɛkɛ. (Zak. 4:6) Yɛ afii 133 nɛɛ amli lɛ, atsake bɔ ni wolo tɛtrɛɛ nɛɛ hiɛ yɔɔ lɛ shii abɔ. Akɛ mfoniri fɛfɛo ni atɛŋ, ni miitsɔɔ odase ni aaye baawo afi 2012 nikasemɔ nɔ̃ lɛ eko fɛɛ eko hiɛ, ni enɛ baakai wɔ nitsumɔ ni Nyɔŋmɔ kɛwo wɔdɛŋ akɛ wɔye Yehowa Maŋtsɛyeli lɛ he odase kɛmɔ shi lɛ. (Bɔf. 28:23) Yɛ baafa 2 lɛ, obaana mfoniri tuuntu ní akwɛ nɔ atɛŋ nɔ ni yɔɔ wolo lɛ hiɛ lɛ, kɛ wiemɔ kuku ko ni akɛgbála nɔ ni mfoniri lɛ tsɔɔ, kɛ he ni asha yɛ lɛ mli. Yɛ afi lɛ mli fɛɛ lɛ, enɛ baakai wɔ fɛɛ akɛ Yehowa webii miishiɛ sane kpakpa lɛ yɛ “je nɛŋ fɛɛ.”—Mat. 24:14.

Mɛɛ tsakemɔi krokomɛi afee yɛ wolo tɛtrɛɛ nɛɛ mli? Ajie akrabatsa ni akɛtĩɔ nikasemɔ lɛ mli lɛ kɛtee sane ni abaakase lɛ eko fɛɛ eko shishijee gbɛ. Enɛ baaha ona saji otii ni esa akɛ otao beni okaneɔ, ni okaseɔ nɔ ni abaakase lɛ. Yɛ anɔkwale mli lɛ, Buu-Mɔɔ Nikasemɔ nɔkwɛlɔi baanyɛ aya nɔ amɛkɛ sanebimɔi nɛɛ atĩ nikasemɔ lɛ mli, kɛ́ agbe naa. Obaana akɛ aha gbɛi ni yɔɔ baafai lɛ anaabui lɛ elɛɛ sharao fe tsutsu lɛ, ni yibɔ okadii kɛha baafai kɛ kukuji lɛ eje shi waa agbɛnɛ.

Taakɛ atsɔɔ mli yɛ nyɔɔŋ nɛɛ nɔ̃ lɛ mli lɛ, akɛ saneyitso hee ni ji “Ajie Kɛjɛ Wɔnitoohe Lɛ” baabɔi nikasemɔ nɔ̃ lɛ mli woo koni akɛtsɔɔ wɔ tsakemɔi ni sa kadimɔ ni afee yɛ Yehowa Odasefoi ayinɔsane mli yɛ ŋmɛnɛŋmɛnɛ beaŋ. Agbɛnɛ hu, akɛ mɛi aniiashikpamɔi baawo mli yɛ be kɛ beaŋ, yɛ saneyitso ni ji, “Amɛkɛ Amɛhe Ha yɛ Amɛsuɔmɔ Naa” lɛ shishi. Enɛɛmɛi baaha wɔna bɔ ni nyɛmimɛi hii kɛ yei ná miishɛɛ, ni amɛtsui nyɔ amɛmli ha, akɛni amɛyasɔmɔ yɛ hei ni Maŋtsɛyeli shiɛlɔi ahe hiaa waa yɛ lɛ.

Eba akɛ wolo tɛtrɛɛ nɛɛ baaye abua bo koni oná be ni oyeɔ kɛkaseɔ Nyɔŋmɔ Wiemɔ lɛ he sɛɛ kɛmɔ shi.

Mɛi ni Fee Wolo Tɛtrɛɛ Nɛɛ

[Mfoniri ni yɔɔ baafa 3]

1879

[Mfoniri ni yɔɔ baafa 3]

1895

[Mfoniri ni yɔɔ baafa 3]

1931

[Mfoniri ni yɔɔ baafa 3]

1950

[Mfoniri ni yɔɔ baafa 3]

1974

[Mfoniri ni yɔɔ baafa 3]

2008