Kasemɔ Bɔ ni Yesu Bɔfoi lɛ Sara Lɛ
Kasemɔ Bɔ ni Yesu Bɔfoi lɛ Sara Lɛ
“Nyɛkɛ mi ashia kpe!”—MAT. 26:38.
MƐNI OBAANYƐ OKASE YƐ OTII NƐƐ AMLI?:
Bɔ ni ooofee osara koni atsɔɔ bo he ni esa akɛ oyashiɛ yɛ.
Bɔ ni ooofee oha ohiɛ akã shi aha sɔlemɔi.
Bɔ ni ooofee oye odase kɛmɔ shi yɛ gbɛtsiinii ni okɛaakpe lɛ fɛɛ sɛɛ.
1-3. Mɛɛ gbɛ nɔ bɔfoi lɛ nyɛɛɛ ashi kpe yɛ gbi gbɛkɛ ni enɔ jetsɛremɔ lɛ agbe Yesu lɛ, ni mɛni tsɔɔ akɛ amɛkase nii kɛjɛ amɛtɔmɔ lɛ mli?
FEEMƆ shihilɛ ni Yesu tsɔ mli yɛ gbi gbɛkɛ ni enɔ jetsɛremɔ lɛ agbe lɛ lɛ he mfoniri yɛ ojwɛŋmɔŋ okwɛ. Yesu eba Getsemane abɔɔ ni bɛŋkɛ Yerusalem yɛ bokagbɛ kpaakpa lɛ mli, ni eji hei ni esumɔɔ yaa waa lɛ ateŋ ekome. Ekɛ ebɔfoi ni yeɔ lɛ anɔkwa lɛ eba biɛ. Akɛni no mli lɛ nibii babaoo ni he hiaa kã Yesu tsui kɛ ejwɛŋmɔ nɔ hewɔ lɛ, ehe bahia ni ená he ko ni yɔɔ dioo koni esɔle yɛ jɛi.—Mat. 26:36; Yoh. 18:1, 2.
2 Bɔfoi lɛ ateŋ mɛi etɛ—Petro, Yakobo, kɛ Yohane—fata Yesu he kɛtee abɔɔ lɛ mli he ko shɔŋŋ. Ekɛɛ amɛ akɛ: “Nyɛhia shi yɛ biɛ ni nyɛkɛ mi ashia kpe,” ni eshi amɛ etee eyasɔle. Beni eku esɛɛ eba lɛ, ebana enanemɛi lɛ ní amɛmiiwɔ. Shikome ekoŋŋ lɛ, ekɛɛ amɛ akɛ: “Nyɛshia kpe.” Kɛlɛ, ebanina amɛ shii enyɔ sɔŋŋ ni amɛmiiwɔ! Sɛɛ mli yɛ nakai gbɛkɛ lɛ nɔŋŋ mli lɛ, bɔfoi lɛ fɛɛ ahiɛ je amɛhe nɔ yɛ mumɔŋ. Amɛkwá Yesu, ni amɛjo foi po!—Mat. 26:38, 41, 56.
3 Ekã shi faŋŋ akɛ, sɛɛ mli lɛ edɔ bɔfoi lɛ waa akɛ amɛyanyɛɛɛ kpe lɛ amɛshi. Hii anɔkwafoi nɛɛ kase nii kɛjɛ amɛtɔmɔ lɛ mli oya nɔŋŋ. Biblia mli wolo ni ji Bɔfoi lɛ Asaji lɛ tsɔɔ akɛ amɛtee nɔ amɛfee bɔ ni esa akɛ aya nɔ asara lɛ he nɔkwɛmɔnɔ ni nɔ bɛ. Amɛnɔkwɛmɔnɔ kpakpa lɛ ná amɛnanemɛi Kristofoi lɛ anɔ hewalɛ ni amɛ hu amɛfee nakai. Amrɔ nɛɛ ji be ni esa akɛ wɔya nɔ wɔsara fe bei fɛɛ ni eho. (Mat. 24:42) Nyɛhaa wɔsusua nibii etɛ ni wɔbaanyɛ wɔkase kɛjɛ Bɔfoi lɛ Asaji lɛ mli ni baaye abua wɔ ni wɔya nɔ wɔsara lɛ he wɔkwɛa.
AMƐSARA KONI ATSƆƆ AMƐ HE NI ESA AKƐ AMƐYASHIƐ YƐ
4, 5. Mɛɛ gbɛ nɔ mumɔ krɔŋkrɔŋ lɛ tsɔɔ Paulo kɛ enanemɛi ni ekɛfãa gbɛ lɛ agbɛ?
4 Klɛŋklɛŋ nikasemɔ lɛ ji akɛ, bɔfoi lɛ ahiɛ hi gbɛtsɔɔmɔ ni tsɔɔ he ni esa akɛ amɛyashiɛ yɛ lɛ nɔ. Amaniɛbɔɔ ko haa wɔnaa bɔ ni Yesu kɛ mumɔ krɔŋkrɔŋ ni Yehowa kɛha lɛ lɛ tsu nii kɛtsɔɔ bɔfo Paulo kɛ enanemɛi ni ekɛfãa gbɛ lɛ agbɛ be ni amɛfãa gbɛ krɛdɛɛ ko lɛ. (Bɔf. 2:33) Nyɛhaa wɔkɛ wɔhe awoa gbɛfaa lɛ mli.—Nyɛkanea Bɔfoi lɛ Asaji 16:6-10.
5 No mli lɛ Paulo, Sila, kɛ Timoteo eshi Galatia wuoyigbɛ maŋtiase ni ji Listra lɛ mli. Gbii komɛi asɛɛ lɛ, amɛyashɛ Roma gbɛjegbɛ wulu ko ni kã anaigbɛ kɛyaa Asia kpokpaa ni mɛi babaoo yɔɔ jɛmɛ fe fɛɛ lɛ nɔ. Kulɛ amɛmiitao ni amɛtsɔ gbɛjegbɛ nɛɛ nɔ kɛya maji srɔtoi ni mɛi akpei abɔ yɔɔ mli ni esa akɛ amɛnu Kristo he sane lɛ amli. Shi nɔ ko tsi amɛnaa koni amɛkatsɔ nakai gbɛ lɛ nɔ. Kuku 6 lɛ kɛɔ akɛ: “Akɛni Mumɔ krɔŋkrɔŋ lɛ etsĩ amɛ gbɛ akɛ amɛkawie wiemɔ lɛ amɛtsɔɔ yɛ Asia hewɔ lɛ, amɛfo mli yɛ Frigia kɛ Galatia shikpɔŋ lɛ nɔ.” Biblia lɛ etsɔɔɔ bɔ ni ebalɛ, shi yɛ gbɛ ko nɔ lɛ mumɔ krɔŋkrɔŋ lɛ tsĩ gbɛfalɔi lɛ agbɛ koni amɛkayashiɛ yɛ Asia kpokpaa lɛ nɔ. Ekã shi faŋŋ akɛ Yesu miitao etsɔɔ Paulo kɛ enanemɛi lɛ agbɛ kɛya he kroko—kɛtsɔ Nyɔŋmɔ mumɔ lɛ nɔ.
6, 7. (a) Mɛni ba beni Paulo kɛ enanemɛi ni ekɛfãa gbɛ lɛ bɛŋkɛ Bitinia lɛ? (b) Mɛɛ yiŋ kaselɔi lɛ kpɛ, ni mɛni jɛ mli kɛba?
6 Nɛgbɛ gbɛfalɔi nɛɛ tee? Kuku 7 lɛ tsɔɔ mli akɛ: “Ni amɛba Misia niiaŋ, ni amɛka akɛ amɛaatee Bitinia, shi Yesu mumɔ lɛ eŋmɛɛɛ amɛ gbɛ.” Akɛni atsĩ Paulo kɛ enanemɛi lɛ agbɛ koni amɛkashiɛ yɛ Asia hewɔ lɛ, amɛkɛ amɛhiɛ tsɔɔ kooyigbɛ, kɛ yiŋtoo akɛ amɛaashiɛ yɛ Bitinia maŋtiasei lɛ amli. Shi beni amɛbɛŋkɛ Bitinia lɛ, Yesu tsɔ mumɔ krɔŋkrɔŋ lɛ nɔ etsĩ amɛ gbɛ ekoŋŋ. Ekolɛ hii nɛɛ ahiɛ fee amɛ yaa yɛ nɛkɛ be nɛɛ mli. Amɛle nɔ ni esa akɛ amɛshiɛ kɛ bɔ ni amɛaafee amɛshiɛ, shi amɛlé he ni esa akɛ amɛyashiɛ yɛ. Wɔbaanyɛ wɔkɛɛ akɛ: Amɛshi agbó ni kɛ mɔ yaa Asia lɛ—shi kranaa. No sɛɛ lɛ, amɛshi agbó ni kɛ mɔ yaa Bitinia lɛ—shi no hu kranaa. Ani amɛfɔ̃ɔ agbói lɛ shimɔ? Belɛ jeee shiɛlɔi ni yɔɔ ekãa nɛɛ!
7 Kɛbashi biɛ lɛ, hii nɛɛ fee yiŋkpɛɛ ko ni jwɛŋmɔ shɛɛɛ he. Kuku 8 lɛ kɛɔ wɔ akɛ: “Amɛho Misia he ni amɛba Troia.” No hewɔ lɛ, gbɛfalɔi lɛ dɔ amɛyi kɛtsɔ anaigbɛ, ni amɛnyiɛ amɛnane nɔ kilomitai 563 kɛho maŋtiasei srɔtoi ahe aahu kɛyashi amɛshɛ Troia lɛjiadaamɔhe lɛ, he ni awoɔ lɛlɛ kɛyaa Makedonia yɛ lɛ. Biɛ Paulo kɛ enanemɛi lɛ shi agbó nɔ ni ji shii etɛ nɔ, shi amrɔ nɛɛ enaa gbele hatoo kɛha amɛ! Kuku 9 lɛ tsɔɔ nɔ ni nyiɛ sɛɛ kɛba lɛ mli akɛ: “Nyɔɔŋ lɛ Paulo na nii, akɛ nuu Makedonianyo ko damɔ shi miikpa lɛ fai akɛ: Ba Makedonia ni obaye obua wɔ!” Agbɛnɛ, Paulo ná ele he ni amɛbaashiɛ yɛ. Hii nɛɛ fiteee be kwraa kɛkɛ ni amɛtsɔ lɛlɛ mli kɛtee Makedonia.
8, 9. Mɛni wɔbaanyɛ wɔkase kɛjɛ Paulo gbɛfãa lɛ mli?
8 Mɛni wɔbaanyɛ wɔkase kɛjɛ amaniɛbɔɔ nɛɛ mli? Kadimɔ akɛ beni Paulo yiŋ akɛ eeya Asia lɛ sɛɛ dani Nyɔŋmɔ mumɔ lɛ tsĩ lɛ gbɛ. Agbɛnɛ hu, beni Paulo ebɛŋkɛ Bitinia lɛ sɛɛ dani Yesu tsĩ lɛ gbɛ. Yɛ naagbee lɛ, beni Paulo shɛ Troia lɛ sɛɛ dani Yesu kudɔ lɛ kɛtee Makedonia. Ákɛ asafo lɛ Yitso lɛ, Yesu baanyɛ ekɛ gbɛtsɔɔmɔ ni tamɔ nakai nɔŋŋ aha wɔ ŋmɛnɛ. (Kol. 1:18) Ákɛ nɔkwɛmɔnɔ lɛ, ekolɛ oosusu gbɛgbamɔ nitsumɔ lɛ, loo bɔ ni oofee ofã kɛya he ko ni hiamɔ lɛ da waa yɛ lɛ he. Shi ekolɛ ja ofee nibii pɔtɛ̃ɛ komɛi ni baaha onyɛ oshɛ oti ni okɛma ohiɛ lɛ he lɛ dani Yesu baatsɔ Nyɔŋmɔ mumɔ lɛ nɔ etsɔɔ bo gbɛ. Naa nɔkwɛmɔnɔ ko: Dani tsɔnekudɔlɔ ko baanyɛ akudɔ etsɔne kɛya abɛku loo ejurɔgbɛ lɛ, ja tsɔne lɛ miinyiɛ dã. Nakai nɔŋŋ ja wɔmiifamɔ wɔnaji—ni tsɔɔ akɛ wɔmiibɔ mɔdɛŋ waa ni wɔshɛ oti ni wɔkɛma wɔhiɛ lɛ he—dani Yesu baanyɛ atsɔɔ wɔ gbɛ koni wɔlɛɛ wɔsɔɔmɔ lɛ mli.
9 Shi kɛ́ omɔdɛŋbɔi lɛ wooo yibii amrɔ nɔŋŋ hu? Ani esa akɛ onijiaŋ aje wui ni omu sane naa akɛ Nyɔŋmɔ mumɔ lɛ etsɔɔɔ bo gbɛ? Kaimɔ akɛ Paulo hu kɛ gbɛtsiinii kpe. Kɛlɛ, etee nɔ etao, ni eshi agbói aahu kɛyashi ená agbó ko ni naa gbele ha lɛ. Nakai nɔŋŋ kɛ́ otee nɔ ofĩ shi kɛtao ‘shinaa kpeteŋkpele ni nitsumɔ pii yɔɔ mli’ lɛ, ekolɛ bo hu obaaye omanye.—1 Kor. 16:9.
AMƐHIƐ KÃ SHI HA SƆLEMƆI
10. Mɛni tsɔɔ akɛ wɔhiɛ ni wɔɔha ehi sɔlemɔ nɔ lɛ baaye abua wɔ ni wɔya nɔ wɔshi kpe?
10 Agbɛnɛ susumɔ oti ni ji enyɔ ni kɔɔ saramɔ he ni wɔbaanyɛ wɔkase kɛjɛ klɛŋklɛŋ afii 100 lɛ mli Kristofoi lɛ adɛŋ lɛ he okwɛ: Amɛhiɛ kã shi ha sɔlemɔi. (1 Pet. 4:7) Kɛ́ wɔɔya nɔ wɔsara lɛ, ehe miihia ni wɔhiɛ sɔlemɔ mli daa. Kaimɔ akɛ beni Yesu kɛ ebɔfoi etɛ lɛ yɔɔ Getsemane abɔɔ lɛ mli, ní eshwɛ fioo ni abaamɔ lɛ lɛ, ekɛɛ amɛ akɛ: ‘Nyɛshia kpe ni nyɛyaa nɔ nyɛsɔlea.’—Mat. 26:41.
11, 12. Mɛni hewɔ Herode wa Kristofoi lɛ, ni Petro fata he lɛ ayi lɛ, ni mɛɛ gbɛ nɔ etsɔ efee nakai?
11 Sɛɛ mli lɛ, Petro ni no mli lɛ eyɛ jɛmɛ lɛ ná niiashikpamɔ ni tsɔɔ akɛ hewalɛ yɛ sɔlemɔ ni asɔleɔ kɛ hiɛdɔɔ lɛ mli. (Nyɛkanea Bɔfoi lɛ Asaji 12:1-6.) Klɛŋklɛŋ kukuji ni yɔɔ amaniɛbɔɔ nɛɛ mli lɛ tsɔɔ akɛ Herode fee Kristofoi lɛ niseniianii bɔni afee ni ehiɛ aba nyam yɛ Yudafoi lɛ ahiɛ. Ŋwanejee ko bɛ he akɛ, Herode le akɛ Yakobo ji bɔfo ní kɛ Yesu bɔ gbagbalii. No hewɔ lɛ, Herode ha ‘akɛ klante’ gbe Yakobo. (Kuku 2) Enɛ ha asafo lɛ ŋmɛɛ bɔfo ni asumɔɔ esane nɛɛ. Ni enɛ bafee kaa kpele kɛha nyɛmimɛi lɛ!
12 Enɛ sɛɛ lɛ, mɛni Herode fee? Kuku 3 lɛ kɛɔ akɛ: “Beni ena akɛ eŋɔɔ Yudafoi lɛ anaa lɛ, etee nɔ ní emɔ Petro hu.” Shi no mli lɛ, átsɔ naakpɛɛ gbɛ nɔ ajie bɔfoi lɛ ateŋ mɛi komɛi ni Petro hu fata he lɛ kɛjɛ tsuŋwoo mli pɛŋ. (Bɔf. 5:17-20) Ekã shi faŋŋ akɛ Herode le sane nɛɛ. Maŋkwralɔ ni hiɛ tɛ̃ nɛɛ bɔ mɔdɛŋ fɛɛ ni eeenyɛ koni etsĩ Petro naa. Etuu Petro ewo “asraafoi ejwɛjwɛ kui ejwɛ dɛŋ, ní amɛbu ehe; ni esusu akɛ hehoo lɛ sɛɛ lɛ eeejie lɛ etsɔ̃ɔ maŋ lɛ.” (Kuku 4) Bo lɛ kwɛ sane! Herode ha awo Petro kɔsɔŋkɔsɔi, ni asraafoi enyɔ wo lɛ teŋ, ni asraafoi 16 to naa kɛbu ehe shwane kɛ nyɔɔŋ bɔni afee ni bɔfo nɛɛ akajo foi. Herode to eyiŋ akɛ Hehoo lɛ sɛɛ lɛ ebaajie Petro etsɔɔ maŋ lɛ, ni ebaagbe lɛ koni no aha maŋbii lɛ amii ashɛ amɛhe. Yɛ shihilɛ ni naa wa waa tamɔ nɛkɛ mli lɛ, mɛni Petro nanemɛi Kristofoi lɛ baanyɛ afee?
13, 14. (a) Beni awo Petro tsuŋ lɛ, mɛni asafo lɛ fee? (b) Mɛni wɔbaanyɛ wɔkase kɛjɛ bɔ ni Petro nanemɛi Kristofoi lɛ fee amɛnii amɛha yɛ sɔlemɔ he lɛ mli?
13 Asafo lɛ le nɔ tuuntu ni esa akɛ amɛfee. Wɔkaneɔ yɛ kuku 5 lɛ akɛ: “Agbɛnɛ atsĩ Petro naa yɛ tsu lɛŋ moŋ; shi asafo lɛ hiɛ sɔlemɔ mli yɛ Nyɔŋmɔ hiɛ kɛ lɛ hamɔ waa diɛŋtsɛ.” Hɛɛ, amɛjɛ amɛtsuiŋ amɛsɔle waa amɛha amɛnyɛmi ni amɛsumɔɔ esane lɛ. Yakobo gbele lɛ haaa amɛnijiaŋ aje wui; asaŋ ehaaa amɛbu sɔlemɔ akɛ nɔ ko ni wooo yibii. Yɛ no najiaŋ lɛ, amɛle akɛ anɔkwa jálɔi asɔlemɔi ajara wa waa yɛ Yehowa hiɛ. Kɛ́ sɔlemɔi ni tamɔ nɛkɛ lɛ kɛ Yehowa suɔmɔnaa nii kpãa gbee lɛ, eboɔ toi.—Heb. 13:18, 19; Yak. 5:16.
14 Mɛni wɔbaanyɛ wɔkase kɛjɛ bɔ ni Petro nanemɛi Kristofoi lɛ fee amɛnii amɛha lɛ mli? Kɛ́ wɔɔya nɔ wɔsara lɛ, jeee wɔ pɛ wɔhe esa akɛ wɔsɔle wɔha, shi moŋ esa akɛ wɔsɔle wɔha wɔnyɛmimɛi hii kɛ yei lɛ hu. (Efe. 6:18) Ani ole nyɛmimɛi Kristofoi lɛ ateŋ mɔ ko ni kɛ jaramɔ shihilɛi miikpe? Ekolɛ aawa amɛteŋ mɛi komɛi ayi, amɛteŋ mɛi komɛi yɛ hei ni nɔyelii lɛ egu shiɛmɔ nitsumɔ lɛ, ni adebɔɔ naa osharai enina mɛi krokomɛi hu. Mɛni hewɔ otsĩii amɛtã yɛ sɔlemɔi ni ojɛɔ otsuiŋ osɔleɔ lɛ amli? Ekolɛ ole mɛi krokomɛi ni kɛ shihilɛi ni mli wawai ni mɛi yɔseee miikpe. Ekolɛ amɛmiimia amɛhiɛ ni amɛdamɔ weku mli naagbai, nijiaŋwujei, loo helai anaa. Mɛni hewɔ osusuuu mɛi pɔtɛ̃ɛ komɛi ni obaanyɛ otsĩ amɛgbɛi atã be mli ni okɛ Yehowa, ni ji ‘sɔlemɔ Toibolɔ’ lɛ wieɔ lɛ ahe?—Lala 65:3.
15, 16. (a) Tsɔɔmɔ bɔ ni Yehowa bɔfo lɛ jie Petro kɛjɛ tsuŋwoohe lɛ mli. (Kwɛmɔ mfoniri ni yɔɔ shishigbɛ lɛ.) (b) Mɛni hewɔ kɛ́ wɔsusu gbɛ nɔ ni Yehowa tsɔ ejie Petro kɛjɛ tsuŋwoohe lɛ he lɛ ewajeɔ wɔhemɔkɛyeli lɛ?
15 Shi te Petro shihilɛ lɛ naa yakpa ha tɛŋŋ? Yɛ naagbee gbɛkɛ ni Petro ye yɛ tsuŋwoohe lɛ, ekã asraafoi enyɔ ni buɔ ehe lɛ ateŋ ewɔ, ni nɔ ko ni yɔɔ naakpɛɛ tee nɔ. (Nyɛkanea Bɔfoi lɛ Asaji 12:7-11.) Feemɔ nɔ ni ba lɛ he mfoniri okwɛ: Trukaa lɛ, la kpɛ́ yɛ tsuŋwoohe lɛŋ. Bɔfo ko badamɔ emasɛi, ni ekã shi faŋŋ akɛ asraafoi lɛ enaaa lɛ, ni ekɛ oyaiyeli tsĩɛ Petro. Ni kɔsɔŋkɔsɔi lɛ kpɔlɔ yɛ eniji ahe eshwie shi! No sɛɛ lɛ, bɔfo lɛ nyiɛ Petro hiɛ kɛje kpo kɛjɛ tsuŋwoohe lɛ, ni amɛtsɔ asraafoi ni damɔ agbó lɛ naa lɛ ahe kɛho, ni dade agbó ni da waa lɛ “diɛŋtsɛ” gbele “ehe” ni amɛtsɔ mli. Beni amɛje kpo kɛjɛ tsuŋwoohe lɛ, bɔfo lɛ laaje. Petro eye ehe!
16 Kɛ́ wɔjwɛŋ hewalɛ ni Yehowa yɔɔ ni ekɛkpɔ̃ɔ etsuji lɛ he lɛ, ani enɛ ewajeee wɔhemɔkɛyeli lɛ? Wɔkpaaa gbɛ akɛ Yehowa baatsɔ naakpɛɛ gbɛ nɔ ekpɔ̃ wɔ ŋmɛnɛ. Shi kɛlɛ, wɔyɛ nɔmimaa diɛŋtsɛ akɛ ekɛ ehewalɛ lɛ tsuɔ nii kɛyeɔ ebuaa ewebii lɛ ŋmɛnɛ. (2 Kron. 16:9) Ebaanyɛ etsɔ emumɔ krɔŋkrɔŋ ni yɔɔ hewalɛ waa lɛ nɔ eye ebua wɔ kɛkpee jaramɔ shihilɛi fɛɛ ni wɔkɛkpeɔ lɛ anaa. (2 Kor. 4:7; 2 Pet. 2:9) Etsɛŋ, Yehowa baatsɔ e-Bi lɛ nɔ ejie mɛi akpekpei abɔ kɛjɛ gbele ni tamɔ tsuŋwoohe ni anyɛŋ ajo foi kɛjɛ mli lɛ dɛŋ. (Yoh. 5:28, 29) Hemɔkɛyeli ni wɔyɔɔ yɛ Nyɔŋmɔ shiwoi amli lɛ baanyɛ aha wɔná ekãa babaoo kɛdamɔ jaramɔ shihilɛi ni wɔkɛkpeɔ ŋmɛnɛ lɛ anaa.
AMƐYE ODASE KƐMƆ SHI YƐ GBƐTSII NII NI AMƐKƐKPE LƐ FƐƐ SƐƐ
17. Mɛɛ gbɛ nɔ Paulo fee nɔkwɛmɔnɔ ni sa kadimɔ waa yɛ ekãa kɛ hiɛdɔɔ ni esa akɛ wɔkɛshiɛ lɛ gbɛfaŋ?
17 Naa oti ni ji etɛ ni kɔɔ bɔ ni ayaa nɔ asaraa lɛ he ni wɔbaanyɛ wɔkase kɛjɛ bɔfoi lɛ adɛŋ: Yɛ gbɛtsii nii ni amɛkɛkpe lɛ fɛɛ sɛɛ lɛ, amɛtee nɔ amɛye odase kɛmɔ shi. Kɛ́ wɔbaaya nɔ wɔsara lɛ, no lɛ ehe miihia ni wɔkɛ ekãa kɛ hiɛdɔɔ ashiɛ. Bɔfo Paulo fee enɛ he nɔkwɛmɔnɔ ni sa kadimɔ waa. Ekɛ ekãa babaoo shiɛ, efã gbɛ kɛtee hei srɔtoi, ni eyatotoo asafoi babaoo. Ekɛ shihilɛi ni mli wawai pii kpe, shi etee nɔ ekɛ ekãa kɛ hiɛdɔɔ shiɛ.—2 Kor. 11:23-29.
18. Beni atsĩ Paulo naa awo tsuŋ yɛ Roma lɛ, mɛɛ gbɛ nɔ etee nɔ eye odase?
18 Nyɛhaa wɔsusua Bɔfoi lɛ Asaji lɛ mli naagbee amaniɛbɔɔ ni kɔɔ Paulo he ni yɔɔ Bɔfoi lɛ Asaji yitso 28 lɛ he. Akɛ Paulo tee Roma koni eyadamɔ Nero hiɛ ni aye esane. Atsĩ enaa awo tsuŋ, ni eeenyɛ efee akɛ awo lɛ kɔsɔŋkɔsɔ kɛmɔ asraafonyo ni buɔ ehe lɛ. Shi kɔsɔŋkɔsɔ ko nyɛŋ aha bɔfo ni yɔɔ ekãa nɛɛ amua enaa! Paulo tee nɔ etao gbɛi ní eeetsɔ nɔ eye odase. (Nyɛkanea Bɔfoi lɛ Asaji 28:17, 23, 24.) Gbii etɛ sɛɛ lɛ, Paulo tsɛ́ Yudafoi onukpai lɛ kɛba eŋɔɔ koni eye amɛ odase. Amɛto gbi ko, ni beni nakai gbi lɛ shɛ lɛ, Paulo ye amɛ odase babaoo. Kuku 23 lɛ kɛɔ akɛ: “Ni beni [Yudafoi ni yɔɔ jɛi lɛ to] lɛ gbi lɛ, amɛteŋ mɛi pii ba eŋɔɔ yɛ etoohe lɛ, ni ejaje Nyɔŋmɔ maŋtsɛyeli lɛ he sane etsɔɔ amɛ, ni eye he odase faŋŋ, ni ejɛ Mose mla lɛ kɛ gbalɔi lɛ amli etao ní amɛyiŋ atsɔ kɛba Yesu gbɛfaŋ kɛjɛ leebi kɛbashi gbɛkɛ.”
19, 20. (a) Mɛni hewɔ Paulo nyɛ eye odase ni mɔɔ shi lɛ? (b) Te Paulo fee enii eha tɛŋŋ beni etoibolɔi lɛ ateŋ mɛi komɛi ekpɛlɛɛɛ sanekpakpa lɛ nɔ lɛ?
19 Mɛni hewɔ Paulo nyɛ eye odase ni mɔɔ shi jogbaŋŋ lɛ? Kadimɔ akɛ kuku 23 lɛ tsɔɔ yiŋtoi komɛi ahewɔ ni enyɛ efee nakai lɛ. (1) Ewie Nyɔŋmɔ Maŋtsɛyeli lɛ kɛ Yesu Kristo he titri. (2) Ekɛ saji ni baanyɛ aha etoibolɔi lɛ ‘ayiŋ atsɔ’ tsu nii. (3) Ekɛ amɛ susu nii ahe kɛjɛ Ŋmalɛi lɛ amli. (4) Eye odase “kɛjɛ leebi kɛbashi gbɛkɛ,” ni ekɛtsɔɔ akɛ esusuɔ mɛi krokomɛi ahe waa fe lɛ diɛŋtsɛ ehe. Paulo ye odase ni náa mɔ nɔ hewalɛ waa, shi jeee mɛi fɛɛ kpɛlɛ eshɛɛ sane lɛ nɔ. Kuku 24 lɛ kɛɔ akɛ: “Mɛi komɛi hé wiemɔ ní ewie lɛ amɛye, shi mɛi komɛi hu heee yeee.” Ŋwanejee te shi yɛ etoibolɔi lɛ ateŋ, ni amɛyiŋ amɛtee.
20 Ani Paulo nijiaŋ je wui akɛni jeee mɛi lɛ fɛɛ kpɛlɛ sanekpakpa lɛ nɔ lɛ hewɔ? Dabi kwraa! Bɔfoi lɛ Asaji 28:30, 31 lɛ kɛɔ wɔ akɛ: “Paulo hi shĩa ní aŋɔma lɛ lɛ mli afi na-akplɔi enyɔ, ni ehereɔ mɛi fɛɛ ní baa eŋɔɔ lɛ, ni eshiɛɔ Nyɔŋmɔ maŋtsɛyeli lɛ he sane lɛ, ni ekɛ ekãa fɛɛ jajeɔ Nuŋtsɔ Yesu Kristo he saji lɛ etsɔɔ amɛ, ni mɔ ko mɔ ko etsĩii lɛ gbɛ.” Akɛ wiemɔi ni woɔ mɔ hewalɛ waa nɛɛ mu Bɔfoi lɛ Asaji ni ajɛ mumɔŋ aŋma lɛ naa.
21. Mɛni wɔbaanyɛ wɔkase kɛjɛ nɔkwɛmɔnɔ ni Paulo fee beni atsĩ enaa awo eshĩa lɛ?
21 Mɛni wɔbaanyɛ wɔkase kɛjɛ Paulo nɔkwɛmɔnɔ lɛ mli? Beni atsĩ Paulo naa awo eshĩa lɛ, enyɛɛɛ eye odase yɛ shĩa kɛ shĩa. Kɛlɛ, ehaaa enɛ aje enijiaŋ wui, moŋ lɛ eyeɔ mɛi fɛɛ ni baa eŋɔɔ lɛ odase. Nakai nɔŋŋ hu Nyɔŋmɔ webii ni yɔɔ ŋmɛnɛ lɛ yaa nɔ amɛkɛ miishɛɛ shiɛɔ, ekɔɔɔ he eko tsuŋ ni awoɔ amɛ yɛ gbɛ ni ejaaa nɔ yɛ amɛhemɔkɛyeli lɛ hewɔ. Wɔsuɔmɔ nyɛmimɛi hii kɛ yei lɛ ateŋ mɛi komɛi eka tsuŋ, ni yɛ gbɔlɛ loo hela hewɔ lɛ, amɛteaŋ mɛi komɛi po yɛ hei ni akwɛɔ mɛi ni egbɔlɔ yɛ. Amɛteŋ mɛi ni yɔɔ nyɛmɔ lɛ shiɛɔ amɛhaa datrɛfoi, mɛi ni basaraa amɛ, kɛ mɛi krokomɛi. Nɔ ni kã amɛtsui nɔ ji, ní amɛye Nyɔŋmɔ Maŋtsɛyeli lɛ he odase kɛmɔ shi. Kwɛ bɔ ni wɔhiɛ sɔɔ amɛnɔkwɛmɔnɔ lɛ!
22. (a) Mɛɛ wolo yeɔ ebuaa wɔ ni wɔnáa Biblia mli wolo ni ji Bɔfoi lɛ Asaji lɛ he sɛɛ? (Kwɛmɔ akrabatsa ni yɔɔ yiteŋgbɛ lɛ.) (b) Mɛni otswa ofai shi akɛ obaafee beni omɛɔ nibii agbɛjianɔtoo momo nɛɛ naagbee lɛ?
22 Eyɛ faŋŋ akɛ, nibii pii yɛ ni wɔbaanyɛ wɔkase kɛjɛ gbɛ ni bɔfoi lɛ kɛ klɛŋklɛŋ afii 100 lɛ mli Kristofoi krokomɛi ni atsĩ amɛtã yɛ Bɔfoi lɛ Asaji lɛ mli lɛ tsɔ nɔ amɛsara lɛ mli. Beni wɔmɛɔ nibii agbɛjianɔtoo momo nɛɛ naagbee lɛ, nyɛhaa wɔtswaa wɔfai shi akɛ wɔkɛ ekãa kɛ hiɛdɔɔ fɛɛ baaye odase taakɛ klɛŋklɛŋ afii 100 lɛ mli Kristofoi lɛ fee lɛ. Nyɔŋmɔ Maŋtsɛyeli lɛ he odase ni ‘wɔɔye kɛmɔ shi’ lɛ ji hegbɛ ni fe fɛɛ ni wɔbaanyɛ wɔná amrɔ nɛɛ!—Bɔf. 28:23.
[Nikasemɔ lɛ he Sanebimɔi]
[Akrabatsa ni yɔɔ baafa 13]
‘MINU BƆFOI LƐ ASAJI LƐ SHISHI JOGBAŊŊ AGBƐNƐ’
Beni nɔkwɛlɔ gbɛfalɔ ko kane ‘Ye Nyɔŋmɔ Maŋtsɛyeli lɛ He Odase Kɛmɔ Shi’ wolo lɛ egbe naa lɛ, etsɔɔ bɔ ni enu he eha lɛ mli akɛ: “Minu Bɔfoi lɛ Asaji lɛ shishi jogbaŋŋ agbɛnɛ. Mikane Bɔfoi lɛ Asaji lɛ shii abɔ, shi nakai beaŋ fɛɛ lɛ etamɔ nɔ ni mihiɛ osɔnɔ, ni mibu hiŋmɛi glase ni mli ewo muji kɛnyiɛ. Duromɔ naa lɛ, amrɔ nɛɛ etamɔ nɔ ni miina wolo lɛ anunyam lɛ diɛŋtsɛ shwane fintii.”
[Mfoniri ni yɔɔ baafa 12]
Bɔfo ko nyiɛ Petro hiɛ kɛtsɔ dade agbó wulu lɛ mli
