Kasemɔ Nii Kɛjɛ “Anɔkwale ni Yɔɔ Mla lɛ Mli lɛ” Mli
Kasemɔ Nii Kɛjɛ “Anɔkwale ni Yɔɔ Mla lɛ Mli lɛ” Mli
“[Ohiɛ] nilee kɛ anɔkwale ni yɔɔ mla lɛ mli lɛ su lɛ.” —ROM. 2:20.
TAOMƆ SANEBIMƆI NƐƐ AHETOI:
Mɛni afɔlei ni Mose Mla lɛ bi ni ashã lɛ fee he mfoniri?
Mɛɛ gbɛi anɔ afɔlei ni Kristofoi ni yɔɔ ŋmɛnɛ lɛ shãa lɛ tamɔ Israelbii lɛ anɔ lɛ?
Mɛɛ afɔlei Yehowa kpɛlɛɔ nɔ, ni te nɔ ni ekpɛlɛɛɛ nɔ?
1. Mɛni hewɔ ehe hiaa ni wɔnu sɛɛnamɔ ni yɔɔ Mose Mla lɛ he lɛ shishi lɛ?
EJI jeee woji ni akɛ mumɔ tsirɛ bɔfo Paulo ni eŋmala lɛ kulɛ, ebaawa kɛha wɔ akɛ wɔɔnu Mose Mla lɛ fãi babaoo ni he hiaa waa lɛ ashishi. Ákɛ nɔkwɛmɔ nɔ lɛ, yɛ wolo ni eŋma eyaha Hebribii lɛ mli lɛ, etsɔɔ bɔ ni Yesu, ni ji “anɔkwa osɔfonukpa” lɛ baanyɛ “ekpata eha maŋ lɛ yɛ amɛhe eshai lɛ ahewɔ” shikome nyɔŋlo, bɔni afee ni mɛi ni baaná mli hemɔkɛyeli lɛ anyɛ aná “naanɔ kpɔ̃mɔ” lɛ mli. (Heb. 2:17, Ga Biblia hee; 9:11, 12) Paulo tsɔɔ mli akɛ, kpee buu lɛ ji ‘ŋwɛi nii lɛ susuma kɛkɛ,’ ni ákɛ, Yesu batsɔ Mlidamɔlɔ kɛha ‘kpaŋmɔ ni hi fe’ nɔ ni Mose damɔ mli lɛ. (Heb. 7:22; 8:1-5) Kristofoi ni hi shi yɛ Paulo beaŋ lɛ ná Mla lɛ mlitsɔɔmɔ ni tamɔ nɛkɛ lɛ he sɛɛ waa, ni nakai nɔŋŋ eji ŋmɛnɛ. Eyeɔ ebuaa ni wɔnuɔ sɛɛnamɔ ni yɔɔ gbɛjianɔ ni Nyɔŋmɔ eto kɛha wɔ lɛ he lɛ shishi jogbaŋŋ.
2. Mɛɛ hegbɛ Yudafoi ni ebatsɔmɔ Kristofoi lɛ ná fe Jeŋmajiaŋbii lɛ?
2 Beni Paulo ŋma Kristofoi ni yɔɔ Roma lɛ, egbala ejwɛŋmɔ kɛtee asafo lɛ mli bii ni ji Yudafoi ni atsɔse amɛ yɛ Mose Mla lɛ naa lɛ nɔ. Ekpɛlɛ nɔ akɛ akɛni amɛyɛ ŋwɛi Mla lɛ he nilee hewɔ lɛ, nɛkɛ mɛi nɛɛ yɛ hegbɛ akɛ amɛhiɛɔ “nilee kɛ anɔkwale ni yɔɔ mla lɛ mli” ni kɔɔ Yehowa kɛ ejalɛ shishitoo mlai lɛ ahe lɛ mli. “Anɔkwale ni yɔɔ mla lɛ mli” lɛ shishi ni Yudafoi ni ebatsɔmɔ Kristofoi lɛ nu, kɛ bulɛ kpo ni amɛjie lɛ ha nakai anɔkwale lɛ tsɔɔ amɛ gbɛ, etsɔɔ amɛ nii, ni ekpɛ́ kɛha mɛi ni leee Mla ni Yehowa kɛha ewebii lɛ he nɔ ko lɛ, taakɛ eye ebua Yudafoi anɔkwafoi ni hi shi kɛtsɔ amɛhiɛ lɛ.—Nyɛkanea Romabii 2:17-20.
FƐƐ FEE YESU AFƆLESHÃA LƐ HE MFONIRI
3. Kɛ́ wɔkase afɔlei ni blema Yudafoi lɛ shã lɛ he nii lɛ, mɛɛ sɛɛ wɔbaaná?
3 Anɔkwale ni yɔɔ mla lɛ mli ni Paulo wie he lɛ baaye abua wɔ koni wɔnu Yehowa yiŋtoi lɛ ashishi. Shishitoo mlai ni yɔɔ Mose Mla lɛ mli lɛ ahe yɛ sɛɛnamɔ lolo. Nyɛhaa wɔsusua Mla lɛ fã kome ko he—bɔ ni afɔlei srɔtoi ni ashã lɛ tsɔɔ Yudafoi humii lɛ agbɛ kɛtee Kristo ŋɔɔ, kɛ bɔ ni eye ebua amɛ ni amɛnu nɔ ni Nyɔŋmɔ taoɔ yɛ amɛdɛŋ lɛ shishi. Ni akɛni nibii ni Yehowa taoɔ yɛ etsuji adɛŋ lɛ tsakeee kɔkɔɔkɔ hewɔ lɛ, wɔbaana hu akɛ afɔleshãa he mlai ni Nyɔŋmɔ kɛha Israelbii lɛ baanyɛ aye abua wɔ ni wɔpɛi sɔɔmɔ ni wɔkɛhaa lɛ lɛ mli.—Mal. 3:6.
4, 5. (a) Mɛni Mose Mla lɛ ha Nyɔŋmɔ webii lɛ kai? (b) Mɛni afɔlei ni Nyɔŋmɔ mla lɛ bi ni ashã lɛ fɛɛ tsɔɔ?
4 Nibii babaoo yɛ Mose Mla lɛ mli ni kai Yudafoi lɛ akɛ amɛji eshafeelɔi. Ákɛ nɔkwɛmɔnɔ lɛ, esa akɛ mɔ fɛɛ mɔ ni taa gbɔmɔ ko gbonyo he lɛ atsuu ehe. Agbeɔ tsina yoo tsuru ni kpa ko kpa ko bɛ ehe, ni ashãa kɛha enɛ feemɔ. Akɛ elamulu lɛ toɔ ni akɛfeɔ “hetsuumɔ nu,” ni akɛ nu nɛɛ shwãa mɔ ni atsuɔ ehe lɛ nɔ yɛ gbi ni ji etɛ lɛ kɛ gbi ni ji kpawo lɛ nɔ kɛjɛ be ni ebule ehe lɛ. (4 Mose 19:1-13) Bɔni afee ni Yudafoi lɛ akai akɛ afɔ́ɔ mɔ fɛɛ mɔ awoɔ emuu ni ayeee kɛ esha mli lɛ, ahaa yoo fɛɛ yoo ni efɔ́ lɛ tsuɔ ehe gbii komɛi akɛni ehe tseee lɛ hewɔ, ni no sɛɛ lɛ eshãa eshaifaa he afɔle yɛ ehetsuumɔ gbii lɛ asɛɛ.—3 Mose 12:1-8.
5 Abi ni amɛkɛ kooloi ashã afɔle kɛha eshaifaa yɛ daa gbi shihilɛi krokomɛi amli. Kɛ́ mɔ ni shãa afɔle lɛ le jio, eleee jio lɛ, afɔlei nɛɛ—kɛ nɔ ni ashã sɛɛ mli yɛ Yehowa sɔlemɔtsu lɛ mli lɛ—ji afɔle ni eye emuu ni Yesu shã lɛ ‘susuma’ kɛkɛ.—Heb. 10:1-10.
MUMƆ NI ESA AKƐ AKƐSHÃ AFƆLE
6, 7. (a) Kɛ́ Israelbii lɛ baashã afɔle lɛ, mɛni yeɔ kɛbuaa amɛ ni amɛnaa nɔ ni sa kɛha afɔleshãa lɛ, ni mɛni he okadi enɛ fee? (b) Mɛɛ saji wɔbaanyɛ wɔbi wɔhe?
6 Taomɔnii kɛha kooloi fɛɛ ni akɛbaashã afɔle lɛ ji akɛ, kooloo lɛ ‘aye emuu’ kɛwula shi—jeee nɔ ni eshwila, epila, eje kpa, loo ebɛ hewalɛ. (3 Mose 22:20-22) Kɛ́ Israelbii lɛ kɛ aduawai loo niyenii baaha Yehowa lɛ, esa akɛ efee amɛnikpamɔnii lɛ amli “klɛŋklɛŋ yibii,” emli “nɔ ni hi fe fɛɛ” lɛ. (4 Mose 18:12, 29) Yehowa ekpɛlɛŋ afɔle lɛ nɔ, kɛ́ ejeee nɔ ni hi fe fɛɛ. Taomɔnii ni he hiaa ni kɔɔ kooloi ni akɛshãa afɔlei ahe lɛ feɔ Yesu afɔleshãa ni muji loo kpa ko bɛ he lɛ he mfoniri, ni no tsɔɔ akɛ Yehowa kɛ nɔ ko ni kã etsui nɔ, ni hi fe fɛɛ baashã afɔle ni ekɛkpɔ̃ adesai.—1 Pet. 1:18, 19.
7 Kɛ́ mɔ ni shãa afɔle lɛ hiɛ sɔɔ Yehowa lɛɛlɛŋ yɛ ejuji ni Efee eha lɛ lɛ hewɔ lɛ, ani enaŋ he miishɛɛ akɛ ekɛ enibii lɛ ateŋ nɔ ni hi fe fɛɛ lɛ baaha? Mɔ ni baashã afɔle lɛ ji mɔ ni kpɛɔ eyiŋ yɛ afɔle ni ekɛbaaha lɛ he, kɛ́ ekɛ nɔ ni hi loo nɔ ni ehiii baaha. Kɛlɛ, ele akɛ Nyɔŋmɔ naŋ afɔle ni kpa ko yɔɔ he lɛ he miishɛɛ, ejaakɛ no baatsɔɔ akɛ mɔ lɛ naa afɔleshãa akɛ eji nɔ ko kɛkɛ ni afeɔ, loo eji jatsu po. (Nyɛkanea Maleaki 1:6-8, 13.) Esa akɛ enɛ aha wɔsusu sɔɔmɔ ni wɔkɛhaa Nyɔŋmɔ lɛ he kɛ sanebimɔ tamɔ: ‘Mɛɛ mumɔ mikɛsɔmɔɔ Yehowa? Ani ebaahi akɛ mapɛi sɔɔmɔ ni mikɛhaa lɛ, kɛ yiŋtoo hewɔ ni mijáa lɛ lɛ mli ekoŋŋ?’
8, 9. Mɛni hewɔ esa akɛ wɔsusu mumɔ ni Israelbii lɛ kɛshã afɔlei lɛ he lɛ?
8 Kɛ́ hiɛsɔɔ ni Israelnyo ko yɔɔ kɛha Yehowa lɛ ha ebashã tsuijurɔnaa afɔle, aloo eshã shãa afɔle kɛtao Yehowa nɔkpɛlɛmɔ lɛ, no lɛ ewaŋ kɛhaŋ lɛ akɛ ekɛ kooloo ni sa jogbaŋŋ aaaba. Yehowa jálɔ nɛɛ baaná he miishɛɛ akɛ ekɛ enii ni hi fe fɛɛ lɛ aaaha Lɛ. Ŋmɛnɛ lɛ, Kristofoi eshãaa afɔlei ni Mose Mla lɛ bi ni ashã lɛ; kɛlɛ, amɛkɛ nibii komɛi shãa afɔle, kɛ shishinumɔ akɛ, amɛkɛ amɛbe, amɛhewalɛ, kɛ nibii ni amɛyɔɔ sɔmɔɔ Yehowa. Bɔfo Paulo wie Kristofoi ahiɛnɔkamɔ lɛ ‘jajemɔ’ kɛ “ejurɔfeemɔ kɛ nikee” he akɛ afɔlei ni saa Nyɔŋmɔ hiɛ. (Heb. 13:15, 16) Mumɔ ni Yehowa webii lɛ kɛtsuɔ nitsumɔi nɛɛ haa anaa hiɛsɔɔ ni amɛyɔɔ kɛha nibii fɛɛ ni Nyɔŋmɔ efee eha amɛ lɛ. No hewɔ lɛ, nibii ni haa mɛi kɛ amɛhe woɔ Kristofoi asɔɔmɔ mli, kɛ sui ni amɛjieɔ lɛ kpo ŋmɛnɛ lɛ tamɔ mɛi ni hi shi yɛ blema ni shã tsuijurɔnaa afɔlei lɛ anɔ lɛ pɛpɛɛpɛ.
9 Kɛlɛ, mɛni abaanyɛ akɛɛ yɛ shihilɛ mli ni Mose Mla lɛ bi ni mɔ aŋkro ko ashã esha afɔle loo sɔ̃ afɔle yɛ etɔmɔ ko hewɔ lɛ he? Ani osusuɔ akɛ akɛni afɔleshãi nɛɛ ji fãmɔ hewɔ lɛ ebaawa kɛha mɔ ko akɛ eeejɛ esuɔmɔ mli ekɛba? Ani eeenyɛ efee akɛ amɛshã afɔlei nɛɛ kɛ mligbigblimɔ? (3 Mose 4:27, 28) Ja mɔ ni yaashã afɔle lɛ sumɔɔɔ ni ehiɛɔ wekukpaa kpakpa ni kã ekɛ Yehowa teŋ lɛ mli.
10. Mɛɛ “afɔlei” ekolɛ ebaabi ni Kristofoi ashã kɛ́ amɛtɔ̃ mɔ ko nɔ?
10 Nakai nɔŋŋ ŋmɛnɛ lɛ, obaanyɛ owie nɔ ko ni baadɔ nyɛmi ko akɛni ekolɛ oleee akɛ ebaagba enaa, loo osusuuu he jogbaŋŋ dani owie lɛ hewɔ. Ekolɛ ohenilee baakɛɛ bo akɛ ofeee ni ahi. Mɔ fɛɛ mɔ ni miisumɔ akɛ esɔmɔ Yehowa lɛɛlɛŋ lɛ baafee nɔ fɛɛ nɔ ni eeenyɛ kɛjaje nɔ ni etɔtɔ lɛ, aloo jeee nakai? Ekolɛ enɛ baabi ni wɔjɛ wɔtsuiŋ wɔkpa mɔ ni wɔtɔ̃ enɔ lɛ fai, ni kɛ́ eji efɔŋ ni yɔɔ hiɛdɔɔ lɛ, ebaahi akɛ wɔɔtao yelikɛbuamɔ kɛjɛ asafoŋ onukpai ní yɔɔ suɔmɔ lɛ adɛŋ. (Mat. 5:23, 24; Yak. 5:14, 15) No hewɔ lɛ, kɛ́ wɔbaanyɛ wɔfɛne kpɔ ko ni wɔha ebakã wɔ kɛ wɔnyɛmi ko loo Nyɔŋmɔ diɛŋtsɛ teŋ lɛ, ebiɔ ni wɔkɛ nɔ ko ashã afɔle. Ni kɛlɛ, kɛ́ wɔshã nakai “afɔlei” lɛ, ehaa wɔsaa wekukpaa ni kã wɔ kɛ Yehowa kɛ wɔkɛ wɔnyɛmi lɛ teŋ lɛ ekoŋŋ, ni wɔnáa henilee kpakpa. Enɛ haa wɔnáa nɔmimaa akɛ Yehowa le nɔ ni hi fe fɛɛ kɛha wɔ.
11, 12. (a) Te ato shidaa afɔlei ashãa he gbɛjianɔ aha tɛŋŋ? (b) Mɛni ŋmɛnɛŋmɛnɛ beaŋ anɔkwa jamɔ mli bii baanyɛ akase kɛjɛ shidaa afɔlei ni ashã lɛ mli?
11 Abu afɔlei komɛi ni awie he yɛ Mose Mla lɛ mli lɛ akɛ shidaa afɔlei. Amɛtsɔɔ toiŋjɔlɛ ni yɔɔ mɔ kɛ Yehowa teŋ. Mɔ ni shãa afɔle ni tamɔ nɛkɛ lɛ kɛ eweku lɛ baaye kooloo ni akɛshã afɔle lɛ loo, ekolɛ yɛ sɔlemɔwe lɛ piai ni ayeɔ nii yɛ mli lɛ eko mli. Ahaa osɔfo ni kwɛɔ afɔleshãa lɛ nɔ lɛ, kɛ osɔfoi krokomɛi hu ni sɔmɔɔ yɛ sɔlemɔwe lɛ loo lɛ eko. (3 Mose 3:1, Ga Biblia hee; 7:31-33) Shwelɛ ni mɔ lɛ yɔɔ akɛ ená ekɛ Nyɔŋmɔ teŋ wekukpaa kpakpa lɛ ji nɔ ni tsirɛ lɛ ni ekɛ afɔle lɛ ba lɛ. Ebafeɔ tamɔ nɔ ni mɔ lɛ, eweku lɛ, osɔfoi lɛ, kɛ Yehowa efee ekome kɛmiiye nii kɛmiishɛɛ, yɛ toiŋjɔlɛ mli.
12 Ani hegbɛ ko yɛ ni da fe enɛ akɛ mɔ ko aaafɔ̃ Yehowa nine kɛha niyeli yɛ mfonirifeemɔŋ, ní ekpɛlɛ nɔ? Ekã shi faŋŋ akɛ, mɔ lɛ baasumɔ ni ekɛ enii ni hi fe fɛɛ lɛ afee mɔ krɛdɛɛ nɛɛ gbɔ. Gbɛjianɔ ni ato kɛha shidaa afɔlei, ni no hu fata anɔkwale ni yɔɔ Mla lɛ mli lɛ he lɛ ha ana akɛ kɛtsɔ Yesu afɔle ni hi fe no lɛ nɔ lɛ, adesai fɛɛ ni miisumɔ ni amɛná amɛkɛ amɛ-Bɔlɔ lɛ teŋ naanyobɔɔ ni toiŋjɔlɛ yɔɔ mli lɛ baanyɛ afee nakai. Ŋmɛnɛ lɛ, wɔbaanyɛ wɔná wɔkɛ Yehowa teŋ naanyobɔɔ mli ŋɔɔmɔ, kɛ́ wɔjɛ wɔtsuiŋ fɛɛ wɔkɛ wɔnibii kɛ wɔhewalɛ fɛɛ shã afɔle yɛ esɔɔmɔ lɛ mli.
AFƆLEI NI NYƆŊMƆ EKPƐLƐƐƐ NƆ
13, 14. Mɛni hewɔ Yehowa ekpɛlɛɛɛ afɔle ni Maŋtsɛ Saul to eyiŋ akɛ ebaashã lɛ nɔ lɛ?
13 Ekã shi faŋŋ akɛ, kɛ́ Yehowa aaakpɛlɛ afɔlei ni atsɔɔ yɛ Mose Mla lɛ mli nɔ lɛ, esa akɛ mɔ lɛ kɛ su kpakpa kɛ tsui krɔŋŋ ashã. Kɛlɛ, nɔkwɛmɔnii komɛi yɛ Biblia lɛ mli ni tsɔɔ afɔlei ni Nyɔŋmɔ ekpɛlɛɛɛ nɔ. Mɛni ha ekpoo afɔlei nɛɛ? Nyɛhaa wɔsusua shihilɛi enyɔ komɛi ahe wɔkwɛa.
14 Gbalɔ Samuel kɛɛ Maŋtsɛ Saul akɛ be eshɛ ni Yehowa kɛbaakojo Amalekbii lɛ. No hewɔ lɛ ehe bahia ni Saul akpata henyɛlɔi amaŋ nɛɛ, kɛ emli kooloi lɛ fɛɛ hiɛ. Kɛlɛ, yɛ Saul kunimyeli lɛ sɛɛ lɛ, eha esraafoi lɛ baa Amalekbii lɛ amaŋtsɛ Agag yi. Ebaa amɛkooloi ni hi fe fɛɛ lɛ hu ayi, koni akɛshã afɔle aha Yehowa. (1 Sam. 15:2, 3, 21) Te Yehowa fee enii yɛ he eha tɛŋŋ? Ekwa Saul yɛ etoigbele lɛ hewɔ. (Nyɛkanea 1 Samuel 15:22, 23.) Mɛni wɔkaseɔ kɛjɛɔ enɛ mli? No ji akɛ, kɛ́ Nyɔŋmɔ baakpɛlɛ afɔle ko nɔ lɛ, esa akɛ mɔ ni shãa lɛ aye ekitãi lɛ anɔ.
15. Mɛni sui gbohii ní Israelbii komɛi ni shã afɔle yɛ Yesaia gbii lɛ amli lɛ jie kpo lɛ tsɔɔ?
15 Nɔkwɛmɔnɔ ni tamɔ nakai nɔŋŋ yɛ Yesaia wolo lɛ mli. Yɛ Yesaia beaŋ lɛ, Israelbii lɛ miishã eshaifaa he afɔle kɛmiiha Yehowa. Shi kɛlɛ sui gbohii ni amɛtee nɔ amɛjie kpo lɛ haaa akpɛlɛ amɛfɔlei lɛ anɔ. Yehowa bi amɛ akɛ: “Mɛni nyɛfɔlei babaoo lɛ feɔ haa mi? Shãa afɔlei ni akɛ too agboi shãa lɛ kɛ lɛ̀ɛ kooloi afɔ lɛ eje mitsine, ni tsinai kɛ too gwantɛŋi kɛ too kpakpoi alá lɛ esaaa mihiɛ! . . . Nyɛkɛ yakayaka niyenii afɔlei akabaa dɔŋŋ: eji tsofa-kɛ-ŋma ni mihiɔ!” Mɛni ji naagba lɛ? Nyɔŋmɔ kɛɛ amɛ akɛ: “Ni kɛ́ nyɛsɔle babaoo tete lɛ, miboŋ nyɛ toi: nyɛniji ahe eyimɔ kɛ lá! Nyɛjua nyɛhe, nyɛtsumɔa nyɛhe! Nyɛjiea nyɛnifeemɔ nii fɔji lɛ kɛjɛa mihiɛ! Nyɛfɔ̃ɔa efɔŋfeemɔ!”—Yes. 1:11-16.
16. Mɛni haa Nyɔŋmɔ kpɛlɛɔ afɔle ko nɔ?
16 Yehowa naaa efɔŋfeelɔi ni tsakeee amɛtsui lɛ afɔlei lɛ ahe miishɛɛ. Shi kɛlɛ, Nyɔŋmɔ kpɛlɛɔ mɛi ni bɔɔ mɔdɛŋ akɛ amɛaahi shi yɛ ekitai lɛ anaa lɛ asɔlemɔi kɛ amɛfɔlei lɛ anɔ. Anɔkwalei ni yɔɔ Mla lɛ mli lɛ haa mɛi nɛɛ naa akɛ amɛji eshafeelɔi, ni ákɛ, eshaifaa he miihia amɛ. (Gal. 3:19) Kɛ́ amɛnu enɛ shishi lɛ ebaaye abua amɛ ni amɛshwa amɛhe yɛ eshai ni amɛfee lɛ ahe. Ŋmɛnɛ lɛ, nakai nɔŋŋ ehe miihia ni wɔyɔse bɔ ni Kristo afɔleshãa lɛ he hiaa kɛha wɔhe eshaifaa. Kɛ́ wɔnu enɛ shishi ni wɔjie hiɛsɔɔ kpo yɛ he lɛ, no lɛ Yehowa ‘baaná’ nibii fɛɛ ni wɔkɛshãa afɔle yɛ ejamɔ mli lɛ ‘he tsui.’—Nyɛkanea Lala 51:19, 21.
NÁ HEMƆKƐYELI YƐ YESU AFƆLESHÃA LƐ MLI!
17-19. (a) Mɛɛ gbɛ nɔ wɔɔtsɔ wɔha Yehowa ana akɛ wɔhiɛ sɔɔ Yesu kpɔ̃mɔ afɔleshãa lɛ jogbaŋŋ? (b) Mɛni he abaasusu yɛ nikasemɔ ni nyiɛ sɛɛ lɛ mli?
17 Ŋmɛnɛ lɛ, nɔ ni wɔkɛfe mɛi ni hi shi dani Kristofoi abe lɛ shɛ lɛ ji akɛ, jeee Nyɔŋmɔ yiŋtoi lɛ ahe ‘susuma’ loo mfoniri pɛ kɛkɛ wɔnaa. (Heb. 10:1) Mlai ni kɔɔ afɔleshãi ahe lɛ wo Yudafoi lɛ hewalɛ ní amɛná sui ni baaha amɛná amɛkɛ Nyɔŋmɔ teŋ wekukpaa kpakpa—amɛjie hiɛsɔɔ ni osato bɛ mli kpo, amɛná shwelɛ akɛ amɛkɛ amɛnii ni hi fe fɛɛ lɛ aaaha lɛ, ní amɛyɔse akɛ kpɔ̃mɔ he miihia amɛ. Ŋmɛnɛ lɛ, eŋɔɔ wɔnaa akɛ mlitsɔɔmɔ ni tamɔ nɛkɛ yɛ Kristofoi a-Hela Ŋmalɛi lɛ amli ni haa wɔnuɔ shishi akɛ kɛtsɔ kpɔ̃mɔnɔ lɛ nɔ lɛ Yehowa baajie nɔ fɛɛ nɔ ni esha kɛba lɛ kɛya, ni ákɛ amrɔ nɛɛ po lɛ ehaa wɔnáa henilee kpakpa yɛ ehiɛ. Yesu kpɔ̃mɔ afɔleshãa lɛ ji gbɛjianɔtoo ko ni nɔ bɛ kwraa!—Gal. 3:13; Heb. 9:9, 14.
18 Kɛ́ wɔbaaná kpɔ̃mɔ afɔleshãa lɛ he sɛɛ lɛ, ehe miihia ni wɔfee babaoo fe nɔ ni etsɔɔ lɛ shishi ni wɔɔnu lɛ pɛ kɛkɛ. Bɔfo Paulo ŋma akɛ: ‘Mla lɛ etsɔ wɔtsɔselɔ kɛmiiya Kristo ŋɔɔ, koni hemɔkɛyeli mli abu wɔ bem yɛ.’ (Gal. 3:24) Ni hemɔkɛyeli ni tamɔ nɛkɛ lɛ biɔ nitsumɔ. (Yak. 2:26) Enɛ hewɔ lɛ, Paulo wo Kristofoi ni hi shi yɛ klɛŋklɛŋ afii 100 lɛ mli, ni yɔɔ anɔkwale ni yɔɔ Mose Mla lɛ mli lɛ he nilee lɛ hewalɛ ni amɛkɛ nakai nilee lɛ atsu nii. Kɛ́ amɛfee nakai lɛ, ebaaha amɛshihilɛ kɛ Nyɔŋmɔ shishitoo mlai ni amɛtsɔɔ lɛ akpã gbee.—Nyɛkanea Romabii 2:21-23.
19 Eyɛ mli akɛ ŋmɛnɛ lɛ akpaaa Kristofoi agbɛ ni amɛye Mose Mla lɛ nɔ moŋ, shi esa akɛ amɛshã afɔlei ni Yehowa kpɛlɛɔ nɔ. Abaasusu gbɛ ni wɔɔtsɔ nɔ wɔfee enɛ lɛ he yɛ nikasemɔ ni nyiɛ sɛɛ lɛ mli.
[Nikasemɔ lɛ he Sanebimɔi]
[Wiemɔ ni akɔ ni akɛmiitsu nii ni yɔɔ baafa 17]
Nibii ni Yehowa taoɔ yɛ etsuji adɛŋ lɛ tsakeee kɔkɔɔkɔ
[Mfoniri ni yɔɔ baafa 18]
Te kooloi nɛɛ ateŋ nɔ ni kulɛ okɛbaaha Yehowa lɛ?
[Mfoniri ni yɔɔ baafa 19]
Mɛi ni shãa afɔlei ni sa lɛ náa Yehowa nɔkpɛlɛmɔ
