Amɛkɛ Ekãa Jaje Nyɔŋmɔ Wiemɔ Lɛ!

Ekãafeemɔ—loo nuufeemɔ—kɛ́ akɛ shiteekɛwoo miikpe. Anɔkwa Kristofoi jieɔ sui nɛɛ akpo taakɛ atsɔɔ mli yɛ woji tamɔ ‘Ye Nyɔŋmɔ Maŋtsɛyeli lɛ He Odase Kɛmɔ Shi’ kɛ Jehovah’s Witnesses—Proclaimers of God’s Kingdom lɛ mli lɛ. Taakɛ eji yɛ héyelilɔi ni hi shi yɛ klɛŋklɛŋ afii 100 lɛ mli lɛ agbɛfaŋ lɛ, wɔsɔleɔ koni Yehowa aha wɔ emumɔ lɛ, ni wɔbiɔ hu koni eye ebua wɔ ni wɔkɛ ekãa ajaje ewiemɔ lɛ.—Bɔf. 4:23-31.

Nyɛmi nuu ko ŋma yɛ bɔ ni atsu shiɛmɔ nitsumɔ lɛ yɛ klɛŋklɛŋ jeŋ ta lɛ mli lɛ he akɛ: “Nyɔŋmɔ tsuji lɛ kɛ ekãa ja Studies in the Scriptures lɛ kpo ni ji kpawo, ni yitso ji The Finished Mystery lɛ. Kɛjɛ Biblia lɛ sɛɛ lɛ, no ji wolo ni aja fe fɛɛ yɛ nakai beaŋ. Ajie Maŋtsɛyeli Sane ni Ji 1 lɛ kpo yɛ afi 1918. Maŋtsɛyeli Sane ni Ji 2 lɛ nyiɛ sɛɛ kɛba, ni etsɔɔ nɔ hewɔ ni nɔyelii lɛ gu The Finished Mystery lɛ jaa lɛ. No sɛɛ lɛ, ajie Maŋtsɛyeli Sane ni Ji 3 lɛ hu kpo. Anɔkwafoi ni afɔ amɛ mu lɛ ja woji nɛɛ waa. Ebiɔ hemɔkɛyeli kɛ ekãa dani mɔ ko baanyɛ eja Maŋtsɛyeli Sane lɛ.”

Ŋmɛnɛ lɛ, atsɔseɔ Maŋtsɛyeli shiɛlɔi hei yɛ shiɛmɔ nitsumɔ lɛ mli, shi ebɛ lɛ nakai yɛ no beaŋ. Beni nyɛmi nuu ko ni yɔɔ United States ni ejɛ Poland lɛ wieɔ eklɛŋklɛŋ niiashikpamɔ yɛ shiɛmɔ nitsumɔ lɛ mli yɛ afi 1922 lɛ he lɛ, eŋma akɛ: “Naa mi ni midamɔ datrɛfonyo ko shinaa naa ní milé bɔ ni afeɔ ajaa wɔwoji lɛ, ni mileee Blɔfo wiemɔ jogbaŋŋ hu, kɛkɛ ni mitswa shinaa lɛ. Nɛɛsifonyo ko gbele shinaa lɛ. Mihiɛ kpaŋ nakai niiashikpamɔ lɛ nɔ kɔkɔɔkɔ, ejaakɛ miná miishɛɛ, shi nakai beaŋ nɔŋŋ lɛ miishe gbeyei. Beni migbele mibaagi lɛ naa nɔŋŋ lɛ, woji lɛ fɛɛ shwie shi yɛ nɛɛsifonyo lɛ naji anaa. Mileee nɔ ni miwie, shi mishi wolo ko miha lɛ. Beni mishĩɔ jɛmɛ lɛ, miná ekãa, ni minu he akɛ Yehowa ejɔɔ mi. Mija woji bibii babaoo nakai gbi lɛ yɛ nakai gbɛjegbɛ ni nitsumɔhei yɔɔ nɔ lɛ nɔ.”

Nyɛmi yoo ko kɛɛ akɛ: “Aaafee afi 1933 mli lɛ, nyɛmimɛi babaoo kɛ adafitswaa tsɔji tsuɔ nii kɛgbɛɔ Maŋtsɛyeli shɛɛ sane lɛ amɛshwãa.” Be ko lɛ, ekɛ Odasefoi komɛi ni ji gbalashihilɛ mli hefatalɔi miishiɛ yɛ California he ko ni gɔji yɔɔ jɛmɛ, yɛ U.S.A. Ewie akɛ: “Nyɛmi nuu lɛ kɛ adafitswaa tsɔne lɛ kwɔ kɛtee gɔŋ lɛ yiteŋ tɔ̃ɔ, ni wɔ lɛ wɔhi maŋ lɛ mli. Beni ebɔi shɛɛ sane lɛ tswaa lɛ, efee tamɔ nɔ ni wiemɔ lɛ miijɛ ŋwɛi. Maŋ lɛŋ bii lɛ bɔ mɔdɛŋ aahu akɛ amɛaana nyɛmi nuu lɛ, shi fɛɛ fee efolo. Beni etswa egbe naa lɛ, wɔtee mɛi lɛ aŋɔɔ ni wɔyashiɛ wɔha amɛ. Mikɛ adafitswaa tsɔji enyɔ krokomɛi hu tsu nii, ni manyɛ makɛɛ bo kɛ nɔmimaa akɛ, mɛi babaoo nyaaa shɛɛ sane lɛ he. Shi akɛni shɛɛ sane ni atswa kɛjɛ adafitswaa tsɔne lɛ mli lɛ gbɛɛ kɛtee amɛshĩai amli hewɔ lɛ, amɛnyɛɛɛ amɛjo naa foi. Wɔnaa be fɛɛ be akɛ Yehowa haa akɛ gbɛ ni sa  lɛ tsuɔ nii yɛ be ni sa mli. Gbɛ ni wɔtsɔ nɔ wɔshiɛ nɛɛ bi ni wɔná ekãa diɛŋtsɛ, shi nakai ni wɔfee lɛ wo yibii be fɛɛ be, ni enɛ ha ajie Yehowa gbɛ́i lɛ yi.”

Yɛ afi  1930 afii lɛ amli kɛmiimɔ afi 1940 afii lɛ shishijee mli lɛ, akɛ gramafoŋ kɛ Biblia mli wiemɔi ni arikɔdi tsu nii yɛ shiɛmɔ nitsumɔ lɛ mli. Nyɛmi yoo ko kɛɛ akɛ: “Nyɛmi yoo fioo ko kɛ gramafoŋ miishiɛ yɛ shinaa kɛ shinaa naa. Beni ebɔi gramafoŋ lɛ tswaa yɛ shinaa lɛ eko naa lɛ, wekuyitso lɛ tsui ba aahu akɛ ebuutu gramafoŋ lɛ kɛje ablanaa lɛ nɔ. Plɛtei ni etswaa lɛ ekome folo po ekuuu. Hii etɛ̃ komɛi ni miiye amɛshwane nii yɛ tsɔne ko ni ma jɛmɛ lɛ mli lɛ na nɔ ni tee nɔ lɛ, ni amɛtsɛ́ nyɛmi yoo lɛ koni ebatswa gramafoŋ lɛ eha amɛ, ni amɛha eha amɛ wɔwoji lɛ eko. Enɛ fee najiaŋtoo nɔ̃ kɛha nɔ ni nuu lɛ fee lɛ lɛ.” Ekãa ni nyɛmimɛi lɛ fee lɛ ji nɔ ni ha amɛnyɛ amɛdamɔ kai ni tamɔ enɛɛmɛi lɛ anaa.

Nakai nyɛmi yoo lɛ nɔŋŋ kɛfata he akɛ: “Mikaiɔ be ni abɔi woji tɛtrɛbii lɛ ajaa yɛ gbɛjegbɛi lɛ ahe yɛ afi 1940 lɛ. Mra mli lɛ wɔfãa adafitswaa nyiɛmɔ he ta. Nyɛmimɛi hii kɛ yei toɔ srɛnɛɛ kɛnyiɛɔ gbɛjegbɛ lɛ toi, ni amɛhiɛɔ taoi ni aŋmala nɔ akɛ ‘Nyɔŋmɔjamɔ Tsɔɔ Mɔ Tsɔne ni Eji Shishiulɔ’ kɛ ‘Sɔɔmɔ Nyɔŋmɔ kɛ Kristo ni ji Maŋtsɛ lɛ.’ Nakai beaŋ nɔŋŋ lɛ, ajara dɛhiɛmɔ woji aha maŋbii lɛ. Ekãa ni nyɛmimɛi lɛ jie lɛ kpo lɛ ha amɛkɛ amɛhe wo shiɛmɔ nitsumɔ lɛ fãi nɛɛ amli, ni no ha maŋbii lɛ le Yehowa gbɛ́i lɛ kɛ ewebii lɛ.”

Nyɛmi yoo kroko hu kɛɛ akɛ: “Woji tɛtrɛbii lɛ ajaa yɛ gbɛjegbɛi anɔ yɛ maji bibii amli lɛ bɛ mlɛo kwraa. No beaŋ lɛ, Odasefoi lɛ kɛ shiteekɛwoo ni naa wa waa miikpe. . . . Ebi ni nyɛmimɛi lɛ aná ekãa diɛŋtsɛ dani amɛkɛ woji tɛtrɛbii lɛ ayadamɔ gbɛjegbɛi lɛ anɔ ní amɛkɛ gbee ni wa akɛɛ shiɛmɔ wiemɔi kukuji ni ato he gbɛjianɔ aha amɛ lɛ. Kɛlɛ, wɔbɔɔ mɔdɛŋ akɛ Hɔɔ ko Hɔɔ ko akaho wɔhe. Bei komɛi lɛ mɛi tseɔ amɛhiɛ amɛhaa wɔ. Bei krokomɛi hu lɛ, mɛi komɛi ni sumɔɔɔ wɔwiemɔ lɛ kɛ mlifu kuɔ kɛbɔleɔ wɔ, ni bei komɛi lɛ ehe bahiaa ni wɔshi jɛmɛ koni amɛkafee wɔ basabasa.”

Yɛ yiwaa ni Yehowa Odasefoi kɛkpe yɛ Jeŋ Ta II lɛ mli lɛ fɛɛ sɛɛ lɛ, amɛtee nɔ amɛkɛ ekãa shiɛ. Yɛ tafãa ko ni he gbii 43, ni je shishi kɛjɛ December 1, 1940 kɛyashi January 12, 1941 lɛ, shiɛlɔi aaafee 50,000 ni yɔɔ United States lɛ jara woji bibii ni miihe ashɛ akpekpei kpaanyɔ.

Mɛi ni edara ni yɔɔ Nyɔŋmɔ asafo lɛ mli lɛ ateŋ mɛi saŋŋ kaiɔ naagbai ni amɛkɛkpe ní ehe bahia ni amɛfee ekãa lɛ waa. Mɛi komɛi kaiɔ akɛ wiemɔ ko ni amɛfɔɔ wiemɔ akɛ, Nyɛkɛ ekãa ashiɛa kɛyashi naagbee! lɛ ha ana ekãa mumɔ ni amɛkɛshiɛ afii abɔ lɛ. Wɔlé gbɛ kroko ni abaatsɔ nɔ ashiɛ shɛɛ sane ni Nyɔŋmɔ kɛha wɔ lɛ dani nibii agbɛjianɔtoo fɔŋ nɛɛ aba enaagbee. Shi kɛtsɔ Nyɔŋmɔ yelikɛbuamɔ nɔ lɛ, wɔbaaya nɔ wɔkɛ hemɔkɛyeli kɛ ekãa ashiɛ Yehowa wiemɔ lɛ.

[Wiemɔ ni akɔ ni akɛmiitsu nii ni yɔɔ baafa 9]

Ehe miihia ni aná ekãa be fɛɛ be koni anyɛ atsu Maŋtsɛyeli shiɛmɔ nitsumɔ lɛ