Ajie Kɛjɛ Wɔnitoohe

Lɛ “Eha Mɛi Ajwɛŋmɔ Ba Minɔ”

Beni Charlotte White ni eji be fɛɛ sɔɔlɔ lɛ yashɛ Louisville, yɛ Kentucky, yɛ U.S.A. lɛ, no mli lɛ eegbala pɔtomanto ni shwiili yɛ shishi, ni eha mɛi pii ajwɛŋmɔ ba enɔ.

NAKAI afi lɛ ji afi 1908, ni Nyɛmiyoo White kɛ pɔtomanto henɔ hee ni ehiɛ ni atsɛɔ lɛ “Dawn-Mobile” lɛ gbala maŋbii lɛ fɛɛ ajwɛŋmɔ kɛba enɔ. Ewie akɛ: “Mɛi pii wie he, ni eha mɛi ajwɛŋmɔ ba minɔ.”

Biblia Kaselɔi, taakɛ atsɛɔ Yehowa Odasefoi yɛ nakai beaŋ lɛ, na akɛ ehe miihia ni amɛgba mɛi krokomɛi anɔkwalei ni nɔ bɛ ni amɛbɔ mɔdɛŋ amɛkase kɛjɛ Ŋmalɛi lɛ amli lɛ. Mɛi babaoo ná Biblia mli nilee kɛjɛ wolokpoi ni ji Millennial Dawn (ni atsɛ lɛ yɛ sɛɛ mli akɛ Studies in the Scriptures) lɛ mli. Kristofoi lɛ ateŋ mɛi ni yɔɔ he miishɛɛ akɛ amɛaafã gbɛ, ni yɔɔ nyɛmɔ hu lɛ, fã gbɛ kɛtee hei srɔtoi—maji kɛ akrowai amli—ni amɛkɛ nɛkɛ woji nɛɛ yaha mɛi krokomɛi hu ni yɔɔ he miishɛɛ akɛ amɛaakane lɛ.

Yɛ afi 1908 mli lɛ, Nyɛmiyoo White kɛ Maŋtsɛyeli jajelɔi krokomɛi ni yɔɔ ekãa lɛ hɔ̃ɔ wolo lɛ kpoi ekpaa ni akɛ mama eha sɛɛ ni afee fɛɛ ekome lɛ U.S. dɔla 1.65. Yɛ nɔ najiaŋ ni amɛkɛ Dawn woji lɛ aaaha shiatsɛmɛi lɛ nɔŋŋ lɛ, amɛhaa amɛshɛɔ koni amɛkɛyaha amɛ yɛ sɛɛ mli—bei pii lɛ yɛ gbi ni awoɔ nitsulɔi anyɔmɔ lɛ nɔ—koni amɛha shika fioo kɛha wolo lɛ kalamɔ lɛ. Nuu ko ni teɔ shi ewoɔ wɔ lɛ wie eshi shika bibioo ni mɛi kɛyeɔ too kɛ́ amɛnine shɛ wolo lɛ nɔ lɛ!

Nyɛmi yoo ko ni atsɛɔ lɛ Malinda Keefer kaiɔ akɛ yɛ otsi pɛ mli lɛ woji ni mɛi biɔ ni abaha amɛ lɛ baanyɛ ashɛ ohai enyɔ kɛmiimɔ ohai etɛ. Shi bɔ ni mɛi ná wolo lɛ he miishɛɛ waa lɛ hu kɛ naagba ko ba.  Wolo lɛ kpo ni ji ekpaa lɛ pɛ hiɛ baafai 740 sɔŋŋ! Buu-Mɔɔ lɛ po wie he akɛ, “Woji nyɔŋmai enumɔ lɛ tsiimɔ shɛɔ kilogram 18,” ni enɛ ha woji lɛ kɛhamɔ bafee “jatsu diɛŋtsɛ,” titri lɛ kɛha nyɛmimɛi yei.

Bɔni afee ni nyɛmimɛi lɛ anyɛ amɛkɛ Dawn woji lɛ aha lɛ, Nyɛminuu James Cole fee shwiili ko kɛ etai enyɔ ni anyɛɔ akotaa, ní abaanyɛ akɛ pɔtomanto ama nɔ. Agbɛnɛ ehe ehiaaa ni ahiɛ woji kɛ adekai dɔŋŋ, no hewɔ lɛ mɔ ni fee shwiili lɛ diɛŋtsɛ wie akɛ: “Mikɔji tseee dɔŋŋ.” Ejie shwiili hee nɛɛ kpo yɛ afi 1908 Biblia Kaselɔi akpokpaa wulu nɔ kpee ni afee yɛ Cincinnati, yɛ Ohio lɛ shishi, ni toibolɔi lɛ nya he waa. Aŋma “Dawn-Mobile” yɛ dade ni akɛbele shwiili lɛ teŋ lɛ naabui enyɔ lɛ nɔ, akɛni Millennial Dawn wolokpoi lɛ ji jatsu titri ni akɛwoɔ lɛ hewɔ. Nyɛmimɛi kɛ be fioo pɛ kase bɔ ni akɛ nine kome tsiɔ shwiili lɛ, ni no ha amɛnyɛ amɛkɛ woji babaoo yaha mɛi yɛ be kome mli. Abaanyɛ awo baagi lɛ nɔ loo aha eba shi, ni abaanyɛ atsi kɛnyiɛ gbɛjegbɛi ni kootaa bɛ nɔ lɛ po anɔ. Kɛ́ ashiɛ agbe naa lɛ, abaanyɛ adɔrɔ shwiili lɛ akpɛtɛ pɔtomanto lɛ koŋ beni mɔ lɛ miinyiɛ kɛmiiya shĩa, loo eyaawo tsɔne kɛya.

Nyɛmimɛi yei fɛɛ ni yɔɔ be fɛɛ sɔɔmɔ lɛ mli lɛ nine baanyɛ ashɛ “Dawn-Mobile” lɛ eko nɔ yaka. Shi bɔ ni ahɔɔ lɛ ji U.S. dɔlai 2.50. Nyɛmiyoo Keefer ni ehe mfoniri yɔɔ biɛ lɛ he basa yɛ “Dawn-Mobile” lɛ kɛnitsumɔ mli aahu akɛ, enyɛɔ ekɛ enine kome tsiɔ pɔtomanto ni eyi obɔ kɛ woji, ni ekɛ enine kroko lɛ tsotsoroɔ baagi kroko ni woji yɛ mli. Ená mɛi babaoo ni yɔɔ wiemɔ lɛ he miishɛɛ yɛ maŋ ko ni atsaa kootaa yɛ mli yɛ Pennsylvania, yɛ U.S.A., ni etsɔɔ briji ko ni yɔɔ jɛmɛ lɛ nɔ kɛyaa kɛbaa shii etɛ loo shii ejwɛ yɛ woji ajaramɔ gbi lɛ nɔ.

Yɛ afi 1980 afii lɛ naagbee gbɛ lɛ, kɔɔyɔŋ lɛlɛ kudɔlɔ ko fee baagi ni tai yɔɔ shishi ni ebu waa ŋmɛnɛ yɛ kɔɔyɔŋ lɛjiadaamɔhei kɛ maŋtiasei amli hei krokomɛi lɛ. Shi aaafee afii 100 ni eho nɛ lɛ, eeenyɛ efee akɛ Biblia Kaselɔi ni yɔɔ ekãa lɛ nya bɔ ni “Dawn-Mobile” lɛ ni amɛtsi kɛtee kɛba beni amɛgbɛɔ Biblia mli anɔkwalei lɛ amɛshwãa lɛ gbala mɛi ajwɛŋmɔ kɛba amɛnɔ lɛ he waa.

[Wiemɔ ni akɔ ni akɛmiitsu nii ni yɔɔ baafa 32]

Nyɛmiyoo Keefer tsɔɔ briji ko nɔ kɛyaa kɛbaa shii etɛ loo shii ejwɛ yɛ woji ajaramɔ gbi lɛ nɔ

[Wiemɔ ni akɔ ni akɛmiitsu nii ni yɔɔ baafa 32]

Etsu naagba ni yɔɔ “Dawn” woji lɛ jaa lɛ he lɛ he nii