Mɛɛ Gbɛ Nɔ Otsɔɔ Owoɔ Ŋaa?

Ani abi bo pɛŋ koni owo mɛi krokomɛi ŋaa? Akɛ nɔkwɛmɔnɔ lɛ, ani mɔ ko ebi bo saji ni tamɔ nɛkɛ pɛŋ: ‘Mɛni esa akɛ mafee? Ani esa akɛ maya henaabuamɔ nɛɛ shishi? mahala nitsumɔ nɛɛ? mikɛ mɔ nɛɛ abɔ kɛ susumɔ lɛ akɛ mikɛ lɛ baabote gbalashihilɛ mli?’

Ekolɛ mɛi ni hiɛ tsui kpakpa lɛ baabi bo ni oye obua amɛ kɛkpɛ yiŋ komɛi—yiŋkpɛi ni baanyɛ asa amɛkɛ amɛnanemɛi, wekumɛi, loo Yehowa teŋ wekukpaa lɛ he. Mɛni nɔ obaadamɔ owo ŋaa? Mɛɛ gbɛ nɔ otsɔɔ owoɔ ŋaa? Kɛ́ saji ni obaawo ŋaa yɛ he lɛ ji saji bibii loo ewuji jio lɛ, Abɛi 15:28 lɛ kɛɔ akɛ: “Jalɔ tsui jwɛŋɔ hetoohamɔ he.” Susumɔ bɔ ni Biblia mli shishitoo mlai enumɔ ni nyiɛ sɛɛ nɛɛ baanyɛ aye abua kɛ́ ehe bahia ni owo ŋaa.

1 Nu Shihilɛ lɛ Shishi Jogbaŋŋ.

“Mɔ ni nuuu sane dani ehereɔ nɔ lɛ, eji buulufeemɔ kɛ hiɛgbele ha lɛ.”—ABƐI 18:13.

Bɔni afee ni wɔnyɛ wɔkɛ ŋaawoo ni sa aha lɛ, esa akɛ wɔnu shihilɛ mli ni mɔ ni biɔ yelikɛbuamɔ lɛ yɔɔ, kɛ esusumɔi ashishi jogbaŋŋ. Akɛ nɔkwɛmɔnɔ lɛ: Kɛ́ mɔ ko tswa bo ni ebi ni otsɔɔ lɛ gbɛ ni hi fe fɛɛ ni ebaatsɔ nɔ kɛba oshĩa lɛ, mɛni ebaabi ni ole bɔni afee ni onyɛ oye obua lɛ? Ani obaanyɛ otsɔɔ lɛ he ni hi fe fɛɛ ni ebaanyɛ etsɔ kɛji klɛŋklɛŋ lɛ obiko lɛ he ni eyɔɔ? Dabi kwraa! Nakai nɔŋŋ kɛ́ wɔbaanyɛ wɔkɛ ŋaawoo kpakpa aha mɔ ko ni miibi ŋaawoo lɛ, ebaabi ni wɔle “he ni mɔ lɛ yɔɔ” yɛ nakai beaŋ—shihilɛ mli ni eyɔɔ kɛ esusumɔ yɛ sane lɛ he. Ani shihilɛi komɛi yɛ ni baanyɛ asa ŋaawoo ni wɔkɛbaaha lɛ he? Kɛ́ wɔleee bɔ ni shihilɛ ko ji ha diɛŋtsɛ lɛ, ekolɛ wɔbaawo ŋaa ni baaha mɔ ko yiŋ afutu lɛ kwraa moŋ.—Luka 6:39.

Bi lɛ He ni Etao Nibii Amli Kɛyashɛ. Ebaafee nɔ ni nilee yɔɔ mli hu akɛ ooobi mɔ ni biɔ bo ŋaawoo lɛ sanebimɔi tamɔ: “Mɛɛ Biblia mli shishitoo mlai osusuɔ akɛ ekɔɔ shihilɛ lɛ he?” “Yɛ nibii ni obaahala lɛ ateŋ lɛ, te emli nɔ ni ekã shi faŋŋ akɛ ehe baaba sɛɛnamɔ kɛ nɔ ni hu he baŋ sɛɛnamɔ lɛ?” “Mɛɛ niiamlitaomɔ ofee?” “Mɛɛ yelikɛbuamɔ mɛi krokomɛi tamɔ asafoŋ onukpai, ofɔlɔi, loo mɔ ni kɛ bo kaseɔ Biblia lɛ kɛha bo?”

Hetoi ni ekɛbaaha lɛ baaye abua wɔ koni wɔna mɔdɛŋ ní mɔ lɛ ebɔ koni ená enaagba lɛ naa tsabaa. Agbɛnɛ hu, nɔ ni mɛi krokomɛi etsɔ hiɛ amɛwie lɛ baaha wɔna ŋaa ni esa akɛ wɔwo. Ekolɛ wɔbaayɔse hu kɛji mɔ lɛ miitao ŋaawolɔ ko ni ‘baata etoiŋ’ kɛkɛ.—2 Tim. 4:3, NW.

  2 Okɛ Oyaiyeli Akaha Saji Ahetoo.

“Mɔ fɛɛ mɔ he afee oya kɛ ninumɔ, ehumi shi kɛ wiemɔ.”—YAK. 1:19.

Ekolɛ jwɛŋmɔ kpakpa ni wɔhiɛ lɛ hewɔ lɛ, wɔbaaha sane hetoo oya. Shi ani ebaafee nɔ ni nilee yɔɔ mli akɛ wɔɔfee nakai, titri lɛ kɛ́ wɔmiisusu sane ko ni wɔtaoko mli jogbaŋŋ lɛ he? Abɛi 29:20 lɛ kɛɔ akɛ: “Kɛ́ ona nuu ní he yɔɔ oyá kɛ wiemɔ lɛ, hiɛnɔkamɔ yɛ ha kwashia fe lɛ.”

Too otsui shi ni oná nɔmimaa akɛ ŋaawoo ni okɛhaa lɛ kɛ Nyɔŋmɔ nilee kpãa gbee. Bi ohe akɛ, ‘Ani mɛi ni ebɔle mi lɛ asusumɔi kɛ “je nɛŋ mumɔ lɛ” ená misusumɔ nɔ hewalɛ?’ (1 Kor. 2:12, 13) Kaimɔ akɛ jwɛŋmɔ ni ja pɛ kɛkɛ faaa yɛ sane nɛɛ mli. Beni bɔfo Petro na akɛ nitsumɔ ni kã Yesu hiɛ lɛ wa waa lɛ, ewo Yesu ŋaa akɛ: “Naa ohe mɔbɔ, Nuŋtsɔ, enɛ akagbaleo fɔ̃ɔŋfɔ̃!” Mɛni wɔbaanyɛ wɔkase kɛjɛ Petro nifeemɔ lɛ mli? No ji akɛ, kɛ́ akwɛɛɛ jogbaŋŋ lɛ, mɔ ko ni hiɛ tsui kpakpa lɛ po baanyɛ ekɛ ‘susumɔi ni jeee Nyɔŋmɔ nɔ̃, shi moŋ gbɔmɛi anɔ’ aha. (Mat. 16:21-23) Kwɛ bɔ ni ehi akɛ wɔɔsusu nii ahe dani wɔwie! Fɛɛ sɛɛ lɛ, ani Nyɔŋmɔ nilee lɛ nɔ kwɔɔɔ kwraa fe niiashikpamɔi ni wɔyɔɔ lɛ?—Hiob 38:1-4; Abɛi 11:2.

3 Jɛɛ Heshibaa Mli Okɛ Nyɔŋmɔ Wiemɔ lɛ Atsu Nii.

“Mitooo miyiŋ mifeee nɔ ko, shi moŋ bɔ ni mitsɛ tsɔɔ mi lɛ, nakai mifeɔ daa.”—YOH. 8:28.

Ani obaakɛɛ akɛ, “Kɛ́ mi ji bo lɛ, kulɛ ma . . . ”? Kɛ́ etamɔ nɔ ni sane ni abi bo lɛ hetoo lɛ yɛ faŋŋ po lɛ, ebaahi akɛ oookase nii kɛjɛ heshibaa he nɔkwɛmɔnɔ ni Yesu fee efɔ shi lɛ mli. Eyɛ nilee kɛ niiashikpamɔ fe adesa fɛɛ adesa; kɛlɛ, ekɛɛ akɛ: “Mitooo mi diɛŋtsɛ miyi miwieee; shi tsɛ . . . lɛ moŋ ewo mi kita, nɔ ni mikɛɛ kɛ nɔ ni miwie.” (Yoh. 12:49, 50) Nibii ni Yesu tsɔɔ kɛ ŋaawoi fɛɛ ni ekɛha lɛ damɔ e-Tsɛ suɔmɔnaa nifeemɔ nɔ.

Akɛ nɔkwɛmɔnɔ lɛ, wɔkaneɔ yɛ Luka 22:49 lɛ akɛ, Yesu kaselɔi lɛ bi lɛ kɛji esa akɛ amɛnɔ beni aaba ni abamɔ lɛ lɛ. Kaselɔi lɛ ateŋ mɔ kome kɛ klante tsu nii. Kadimɔ yɛ amaniɛbɔɔ ni tamɔ nakai nɔŋŋ ni yɔɔ Mateo 26:52-54 lɛ mli akɛ, yɛ shihilɛ ni tamɔ nakai po mli lɛ Yesu ŋɔ be ni ekɛ ekaselɔi lɛ susu Yehowa suɔmɔnaa nii ahe. Akɛni Yesu le shishitoo mlai ni yɔɔ 1 Mose 9:6 kɛ gbalɛi ni yɔɔ Lala 22 kɛ Yesaia 53 lɛ hewɔ lɛ, enyɛ ekɛ gbɛtsɔɔmɔ ni nilee yɔɔ mli ha, ni ŋwanejee ko bɛ he akɛ no ha mɛi ayi ná wala, ni Yehowa mii shɛ ehe.

  4 Okɛ Teokrase Woji ni Oyɔɔ lɛ Atsu Nii.

“Belɛ namɔ ji tsulɔ anɔkwafo kɛ nilelɔ mɔ ni enuŋtsɔ ŋɔ lɛ eto ewebii lɛ anɔ, koni eha amɛ amɛŋmaa yɛ be ni sa nɔ lɛ?”—MAT. 24:45.

Yesu ehala tsulɔ kuu ko ni anyɛɔ akɛ he fɔ̃ɔ enɔ, ní kɛ mumɔŋ niyenii ni he hiaa haa. Kɛ́ okɛ ŋaawoo kɛ gbɛtsɔɔmɔ miiha yɛ saji ni he hiaa waa he lɛ, ani oŋɔɔ be kɛtaoɔ nibii amli jogbaŋŋ kɛjɛɔ Biblia kasemɔ woji lɛ amli?

Watch Tower Publications Index kɛ Watchtower Library * lɛ haa wɔnáa saji babaoo ni yɔɔ faŋŋ amrɔ nɔŋŋ. Kwɛ bɔ ni ebaafee nɔ ni ejaaa akɛ wɔɔku wɔhiɛ wɔshwie saji babaoo nɛɛ anɔ! Atsɛ́ saji akpei abɔ yisɛɛ yɛ woji nɛɛ amli, ni amɛhiɛ saneyitsei babaoo ni baanyɛ aye abua mɔ ko ni miitao ŋaawoo. Ani ohe esa jogbaŋŋ bɔ ni onyɛɔ oyeɔ obuaa mɛi krokomɛi koni amɛpɛi Biblia mli shishitoo mlai amli, ní amɛjwɛŋ Nyɔŋmɔ Wiemɔ lɛ nɔ? Taakɛ bɔ ni GPS, ni ji tsɔne ko ni baanyɛ aye abua mɔ ko ní ena he tuuntu ni eyɔɔ, ni etsɔɔ lɛ gbɛ hu kɛya he ni eyaa lɛ ji lɛ, nakai nɔŋŋ dɛŋdadei ni akɛtaoɔ nibii amli lɛ baanyɛ aye abua mɔ lɛ ni eyoo gbɛ ni enyiɛ nɔ lɛ, koni ena bɔ ni eeefee eya nɔ enyiɛ gbɛ ni kɛ mɔ yaa wala mli lɛ nɔ.

Asafoŋ onukpai babaoo etsɔɔ shiɛlɔi koni amɛkɛ Index lɛ loo Watchtower Library lɛ atsu nii kɛtao saji amli, ni enɛ haa amɛnyɛmimɛi hii kɛ yei lɛ nyɛɔ amɛjwɛŋɔ Ŋmalɛi lɛ anɔ. Yelikɛbuamɔ nɛɛ haa shiɛlɔi nyɛɔ amɛtsuɔ nibii ni gbaa amɛnaa amrɔ nɛɛ ahe nii, ni ehaa amɛnáa su ni haa ataoɔ nii amli kɛ bɔ ni akɛ he fɔ̃ɔ mumɔŋ niyenii ni Yehowa kɛduroɔ wɔ lɛ nɔ. Amɛtsɔɔ gbɛ ni tamɔ nɛkɛ nɔ ‘amɛhaa amɛhenumɔ nii lɛ leɔ ekpakpa kɛ efɔŋ mlikpamɔ.’—Heb. 5:14.

5 Kaakpɛ Yiŋ Oha Mɛi.

“Mɔ fɛɛ mɔ aaatere lɛ diɛŋtsɛ ejatsu.”—GAL. 6:5.

Yɛ naagbee lɛ, ebaabi ni mɔ fɛɛ mɔ ahala ŋaawoo ni ebaasumɔ ni ekɛtsu nii. Yehowa eha wɔteŋ mɔ fɛɛ mɔ hegbɛ koni ekpɛ eyiŋ kɛji ebaaha E-shishitoo mlai lɛ akudɔ lɛ loo efeŋ nakai. (5 Mose 30:19, 20) Shihilɛi komɛi biɔ ni akɛ Biblia mli shishitoo mlai srɔtoi babaoo atsu nii, shi yɛ naagbee lɛ, ebaabi ni mɔ ni biɔ ŋaawoo lɛ diɛŋtsɛ akpɛ eyiŋ. Ekolɛ, yɛ sane ni mɔ lɛ biɔ he ŋaawoo lɛ kɛ afii abɔ ni eye lɛ naa lɛ, ehe baahia ni wɔbi wɔhe akɛ, ‘Ani mi esa akɛ matsu sanebimɔ nɛɛ he nii?’ Saji lɛ ekomɛi yɛ ni esa akɛ akɛha asafoŋ onukpai lɛ ni amɛtsu he nii, loo kɛ́ nibilɔ lɛ edako lɛ akɛha efɔlɔi ni amɛtsu he nii.

[Shishigbɛ niŋmaa]

[Akrabatsa/Mfoniri ni yɔɔ baafa 8]

Gbɛjianɔtoo Kɛha Weku Jamɔ

Kɛ́ ooto weku jamɔ he gbɛjianɔ lɛ, mɛni hewɔ otaooo nibii amli koni oná hetoo oha saji ni mɛi ebi bo nyɛsɛɛ nɛɛ? Mɛɛ saji kɛ Biblia mli shishitoo mlai obaanyɛ otao ní baanyɛ aye abua mɔ ko ni biɔ saji ni tamɔ nakai lɛ? Akɛ nɔkwɛmɔnɔ lɛ, ŋɔɔ lɛ akɛ nyɛmi nuu loo nyɛmi yoo ko bi bo sane ni kɔɔ mɔ ko ni akɛaanyiɛ kɛjwɛŋmɔ ákɛ akɛ lɛ aaabote gbalashihilɛ mli lɛ he. Kɛ́ okɛ Index loo Watchtower Library lɛ miitsu nii lɛ, taomɔ sane ni kɔɔ enɛ he tɛ̃ɛ lɛ klɛŋklɛŋ. Akɛ nɔkwɛmɔnɔ lɛ, obaanyɛ otao “Dating” loo “Marriage” yɛ Index lɛ mli. No sɛɛ lɛ, kwɛmɔ saneyitsei bibii lɛ amli nɔ ni kɔɔ enɛ he. Kɛ́ ookwɛ saneyitso lɛ diɛŋtsɛ mli lɛ, kwɛmɔ akɛ obaana sane ni ji “See also,” ní baanyɛ ekɛbo aya saneyitso ko ni kɔɔ nɔ ni otaoɔ lɛ he tɛ̃ɛ lo.

[Akrabatsa ni yɔɔ baafa 9]

Wɔdaa Yehowa shi akɛ kɛtsɔ egbɛjianɔtoo lɛ nɔ lɛ, wɔbaanyɛ wɔná ŋaawoo ni hi fe fɛɛ, ni wɔbaanyɛ wɔkɛ ŋaawoo ni hi fe fɛɛ hu aha. Jajelɔ 12:11 lɛ kɛɔ akɛ: “Nilelɔi awiemɔi tamɔ tsina kpalamɔ akpɔlɔi, ni amɛtamɔ plɛkoobii ni akala, tookwɛlɔ kome bua enɛɛmɛi fɛɛ naa.” Taakɛ bɔ ni akɛ “tsina kpalamɔ akpɔlɔi” ni ji tsei kɛ amɛnaa pĩɔpĩɔ ni akɛkudɔɔ nitsumɔ kooloi lɛ, nakai nɔŋŋ ŋaawoo kpakpa ni jɛ suɔmɔ mli lɛ yeɔ ebuaa mɛi ni hiɛ tsui kpakpa lɛ kɛyaa gbɛ ni ja nɔ. Kɛ́ ‘akala plɛkoobii awo’ nibii amli lɛ, ehaa amɛmli waa. Nakai nɔŋŋ yibii kpakpai jɛɔ ŋaawoo ni sa mli kɛbaa. Nilelɔi ‘taoɔ wiemɔi,’ loo amɛmii shɛɔ amɛhe kɛ́ amɛmiisusu ‘wiemɔi ni abua naa’ nɛɛ ni haa anaa nilee ni Yehowa ni ji ‘amɛtookwɛlɔ kome’ lɛ yɔɔ lɛ he lɛ.

Kasemɔ Tookwɛlɔ lɛ kɛ́ oowo ŋaa. Kwɛ hegbɛ ni wɔná akɛ wɔɔbo mɛi atoi ní wɔkɛ ŋaawoo ni sa aha be fɛɛ be! Kɛ́ ŋaa ni wɔwoɔ lɛ damɔ Biblia mli shishitoo mlai anɔ lɛɛlɛŋ lɛ, no lɛ ebaafee nɔ ni sa, ni ebaaye ebua mɔ ni boɔ toi lɛ kɛya naanɔ.