“Ofainɛ Ani Obaanyɛ Osha Wɔ Mfoniri?”

Beni akpa kpokpaa wulu nɔ kpee ko gbi ni ji enyɔ lɛ, Mexico Betel weku lɛ mlinyo ko ni atsɛɔ lɛ Josué tee shisharamɔ yɛ Querétaro maŋtiase lɛ mli. Javier kɛ eŋa Maru ni amɛji shisharalɔi ni jɛ Colombia lɛ bi Josué ni esha amɛ mfoniri. Akɛni ekɛ enanemɛi Odasefoi lɛ esaa amɛhe jogbaŋŋ, ni amɛtsɛ kpee lɛ tsitsinaa-tsɛɛ nii hu hewɔ lɛ, gbalashihilɛ mli hefatalɔi nɛɛ bi kɛji amɛjɛ skul naagbee nifeemɔ loo henaabuamɔ krɛdɛɛ ko shishi. Josué tsɔɔ mli akɛ amɛjɛ Yehowa Odasefoi akpokpaa wulu nɔ kpee, kɛkɛ ni efɔ̃ gbalashihilɛ mli hefatalɔi lɛ nine kɛha Hɔgbaa kpee lɛ.

Nuu lɛ kɛ eŋa lɛ nu he akɛ eyɛ hiɛgbele akɛ amɛaaya kpee lɛ akɛni amɛbɛ atadei ni sa kɛha henaabuamɔ ni tamɔ nɛkɛ lɛ hewɔ. Fɛɛ sɛɛ lɛ, Josué kɛ egbɛ́i kɛ nitsumɔhe nine lɛ, he ni etsuɔ nii yɛ lɛ tɛlifoŋ nɔmba ha amɛ.

Efee Josué naakpɛɛ akɛ nyɔji ejwɛ sɛɛ lɛ enu Javier he. Ekɛ eŋa lɛ tee kpee lɛ, ni amɛmiitao ni Yehowa Odasefoi abasara amɛ yɛ Mexico City, he ni amɛyɔɔ yɛ nakai beaŋ lɛ. Etsɛɛɛ ni akɛ Javier kɛ Maru bɔi Biblia lɛ kasemɔ, nɔŋŋ kɛkɛ ni amɛbɔi asafoŋ kpeei yaa. Nyɔji nyɔŋma sɛɛ lɛ amɛbatsɔmɔ shiɛlɔi. Eyɛ mli akɛ gbalashihilɛ mli hefatalɔi lɛ fã kɛtee Toronto yɛ Canada moŋ, kɛlɛ amɛtee amɛhiɛ yɛ mumɔŋ ni abaptisi amɛ.

Sɛɛ mli lɛ, Javier ŋma Josué wolo ni etsɔɔ lɛ nɔ ni tsirɛ lɛ ni emɔ anɔkwale lɛ mli lɛ. Ewie akɛ: “Dani wɔbaaya kpokpaa wulu nɔ kpee lɛ, no mli lɛ mikɛ miŋa etsɔ hiɛ wɔsusu bɔ ni ehe hiaa ni wɔná gbɛtsɔɔmɔ yɛ nɔ ni he hiaa titri yɛ shihilɛ mli lɛ he. Beni wɔna bɔ ni nyɛsaa nyɛhe jogbaŋŋ lɛ, wɔmu sane naa akɛ nyɛjɛ kpee krɛdɛɛ ko shishi. Bɔ ni ajɛ mlihilɛ mli aha wɔ he ko wɔtara yɛ kpee lɛ shishi, aye abua wɔ kɛja Biblia mli ŋmalɛi ni atsɛɔ lɛ asɛɛ mo, kɛ bɔ ni mɛi ni eba kpee lɛ ba amɛjeŋ jogbaŋŋ amɛha lɛ ta wɔmli waa. Ni bɔ ni wɔsaa wɔhe tamɔ shisharalɔi lɛ po gbaaa mɔ ko mɔ ko naa.”

Kwɛ bɔ ni nilelɔ Maŋtsɛ Salomo wiemɔi lɛ ba mli anɔkwale yɛ Josué gbɛfaŋ! Salomo ŋma akɛ: “Leebi lɛ dũ odũmɔnii lɛ, ni gbɛkɛ hu kaajie onine yɛ he; ejaakɛ oleee emli nɔ ni baahi, enɛ jio, enɛ jio, aloo ekolɛ enyɔ lɛ fɛɛ baahi pɛpɛɛpɛ jio.” (Jaj. 11:6) Ani obaanyɛ odũ odũmɔnii lɛ kɛtsɔ hegbɛi ni oooŋɔ kɛfɔ̃ mɛi anine kɛya kpokpaa wulu nɔ kpee ko loo maŋshiɛmɔ ko ni abaaha lɛ shishi? Ekolɛ Yehowa kɛ bo baatsu nii kɛtsɔɔ mɛi ni mumɔŋ hɔmɔ kɛ kumai yeɔ amɛ lɛ agbɛ, taakɛ ebalɛ yɛ Javier kɛ Maru gbɛfaŋ lɛ.—Yes. 55:1.

[Mfoniri ni yɔɔ baafa 32]

Kɛjɛ abɛku kɛmiiya ninejurɔgbɛ: Alejandro Voeguelin, Maru Pineda, Alejandro Pineda, Javier Pineda, kɛ Josué Ramírez yɛ Mexico nitsumɔhe nine lɛ