Yaa Nɔ Okɛ Hiɛdɔɔ Ashiɛ
Yaa Nɔ Okɛ Hiɛdɔɔ Ashiɛ
“Shiɛmɔ wiemɔ lɛ, kã he.”—2 TIM. 4:2.
ANI OBAANYƐ OTSƆƆ MLI?
Mɛni hewɔ klɛŋklɛŋ afii 100 lɛ mli Kristofoi lɛ kɛ hiɛdɔɔ shiɛ lɛ?
Te wɔɔfee tɛŋŋ wɔya nɔ wɔkɛ hiɛdɔɔ ashiɛ lɛ?
Mɛni hewɔ Maŋtsɛyeli shiɛmɔ nitsumɔ lɛ he hiaa waa amrɔ nɛɛ fe bei fɛɛ ni eho lɛ?
1, 2. Fãmɔ akɛ ‘wɔkã he wɔshiɛ kɛ hiɛdɔɔ’ lɛ teɔ mɛɛ sanebimɔi ashi?
BEI pii lɛ, mɛi ni nitsumɔ ji akɛ amɛbaa wala yi lɛ kɛ hiɛdɔɔ feɔ nakai. Akɛ nɔkwɛmɔnɔ lɛ, kɛ́ lagbelɔi nu akɛ la eje yɛ he ko lɛ, amɛshaa foi kɛyaa jɛi; amɛle akɛ mɛi awala eyaje oshara mli.
2 Ákɛ Yehowa Odasefoi lɛ, wɔshwelɛ ji ni wɔye wɔbua mɛi koni ahere amɛyiwala. Enɛ hewɔ lɛ, wɔkɛ fãmɔ ákɛ wɔshiɛ Maŋtsɛyeli lɛ he sanekpakpa lɛ shwɛɛɛ kwraa. Enɛ etsɔɔɔ akɛ wɔtsuɔ nitsumɔ nɛɛ kpalakpala loo eko kɛ eko kɛkɛ. Belɛ, mɛni bɔfo Paulo tsɔɔ beni ewo ŋaa akɛ: “Shiɛmɔ wiemɔ lɛ, kã he” lɛ? (2 Tim. 4:2) Te wɔɔfee tɛŋŋ wɔkɛ hiɛdɔɔ ashiɛ lɛ? Ni mɛni hewɔ ebiɔ ni wɔkɛ hiɛdɔɔ atsu nitsumɔ nɛɛ?
MƐNI HEWƆ EBIƆ NI WƆKƐ HIƐDƆƆ ASHIƐ LƐ?
3. Mɛni baanyɛ ajɛ bɔ ni mɛi feɔ amɛnii amɛhaa yɛ Maŋtsɛyeli lɛ he sane ni wɔshiɛɔ lɛ mli aba?
3 Kɛ́ osusu nɔ ni mɛi baaná loo nɔ ni baaŋmɛɛ amɛ yɛ wɔshiɛmɔ nitsumɔ lɛ hewɔ lɛ he lɛ, ekã shi faŋŋ akɛ obaana akɛ ehe miihia waa ni oshiɛ sanekpakpa lɛ otsɔɔ mɛi krokomɛi. (Rom. 10:13, 14) Nyɔŋmɔ Wiemɔ lɛ kɛɔ akɛ: “Kɛ́ mikɛɛ efɔŋfeelɔ akɛ: Gbo ooogbo! ni ekpale kɛjɛ ehe esha lɛ mli ni eye jalɛ sane ni efee nɔ ni ja lɛ, . . . Eyi aaaná wala kɛ̃, egboŋ! Ehe eshai ní efee lɛ fɛɛ akaiŋ eko eko ahaŋ lɛ.” (Ezek. 33:14-16) Anɔkwa, Biblia lɛ kɛɔ mɛi ni tsɔɔ Maŋtsɛyeli lɛ he nii lɛ akɛ: “Ooohere bo diɛŋtsɛ kɛ mɛi ni boɔo toi lɛ fɛɛ yiwala.”—1 Tim. 4:16; Ezek. 3:17-21.
4. Mɛni hewɔ hemɔkɛyeli kwamɔ ha ehe bahia waa ni akɛ hiɛdɔɔ ashiɛ yɛ klɛŋklɛŋ afii 100 lɛ mli lɛ?
4 Bɔni afee ni onu nɔ hewɔ ni Paulo kɛɛ Timoteo akɛ ekɛ hiɛdɔɔ ashiɛ lɛ shishi lɛ, susumɔ nɔ ni ha ewie wiemɔi ni yɔɔ ŋmalɛ ni nikasemɔ nɛɛ damɔ nɔ lɛ mli lɛ he okwɛ. Wɔkaneɔ akɛ: “Shiɛmɔ wiemɔ lɛ, kã he, dekã yɛ jio, dekã bɛ jio, kã hiɛ, wo ŋaa, bɔɔ kɔkɔ yɛ tsuishitoo kɛ nitsɔɔmɔ fɛɛ mli. Ejaakɛ be ko baaba ni amɛkpɛlɛŋ tsamɔ tsɔɔmɔ lɛ dɔŋŋ, shi moŋ amɛaabua tsɔɔlɔi anaa amɛwo amɛhe yɛ amɛ diɛŋtsɛ amɛkɔnɔi lɛ anaa, ejaakɛ amɛtoiiaŋ miifɛ̃lɛ̃ amɛ; ni amɛaakpala anɔkwale lɛ yɛ amɛtoii asɛɛ.” (2 Tim. 4:2-4) Yesu egba akɛ mɛi baakwa hemɔkɛyeli lɛ. (Mat. 13:24, 25, 38) Beni nakai be lɛ bɛŋkɛɔ lɛ, ehe bahia waa ni Timoteo ‘ashiɛ wiemɔ lɛ’ yɛ asafo lɛ mli po, bɔni afee ni akɛ apasa tsɔɔmɔi ni ewaaa kwraa akɛ eeená mɔ nɔ hewalɛ lɛ akalaka Kristofoi lɛ. No mli lɛ, mɛi awala yɛ oshara mli. Ni ŋmɛnɛ hu?
5, 6. Mɛɛ susumɔi komɛi ni ehe shi wɔbaanyɛ wɔkɛkpe yɛ wɔshiɛmɔ nitsumɔ lɛ mli?
5 Ŋmɛnɛ lɛ, mɛi ni kwaa anɔkwa jamɔ lɛ ayi efa waa. (2 Tes. 2:3, 8) Mɛɛ tsɔɔmɔi haa mɛi atoiiaŋ fɛ̃lɛ̃ɔ amɛ ŋmɛnɛ? Yɛ hei babaoo lɛ, awoɔ sutsakemɔ tsɔɔmɔ lɛ he hewalɛ waa oookɛɛ eji jamɔ mli tsɔɔmɔ. Eyɛ mli akɛ bei pii lɛ akɛ jeŋ nilee wiemɔi komɛi tsɔɔ sutsakemɔ lɛ mli moŋ, shi amrɔ nɛɛ ebatsɔ tamɔ jamɔ ko, ni enáa susumɔ ni mɛi hiɛ yɛ Nyɔŋmɔ kɛ mɛi krokomɛi ahe lɛ nɔ hewalɛ. Tsɔɔmɔ kroko hu ni ehe shi ji, Nyɔŋmɔ susuuu wɔ he; ni tsɔɔ akɛ, ehe ehiaaa ni wɔkase ehe nii. Mɛni hewɔ tsɔɔmɔi nɛɛ ŋɔɔ mɛi atoii anaa aahu akɛ akɛlakaa mɛi akpekpei abɔ ni amɛwɔɔ wɔdɔ̃i yɛ mumɔŋ lɛ? Shishinumɔ kome too lɛ nɔŋŋ amɛhiɛ, no ji, ‘Obaanyɛ oye otsui naa sane ejaakɛ mɔ ko haŋ obu ohe akɔntaa.’ Anɔkwa, sane nɛɛ haa mɛi babaoo atoiiaŋ fɛ̃lɛ̃ɔ amɛ.—Nyɛkanea Lala 10:4.
6 Shi mɛi atoiiaŋ fɛ̃lɛ̃ɔ amɛ yɛ gbɛi krokomɛi hu anɔ. Sɔlemɔyalɔi komɛi nyaa tsɔɔlɔi ni kɛɔ akɛ, ‘Ekɔɔɔ he eko nɔ ni ofeɔ lɛ, Nyɔŋmɔ sumɔɔ bo’ lɛ ahe waa. Jamɔŋ hiɛnyiɛlɔi kɛ osɔfoi kɛɔ mɛi akɛ, jamɔŋ henaabuamɔi, hiɛtserɛjiemɔi, Mass ni ayaa, kɛ amagai kɛ ehenɔi ni akɛtsuɔ nii yɛ jamɔ mli lɛ baaha Nyɔŋmɔ ajɔɔ amɛ. Sɔlemɔyalɔi nɛɛ leee akɛ oshara yɛ nifeemɔi nɛɛ ahe. (Lala 115:4-8) Kɛlɛ, kɛ́ wɔnyɛ wɔye wɔbua amɛ ni amɛná amɛle Biblia mli anɔkwalei lɛ, amɛbaaná Nyɔŋmɔ Maŋtsɛyeli lɛ he sɛɛ.
MƐNI HIƐDƆƆ NI AKƐAASHIƐ LƐ TSƆƆ?
7. Mɛni wɔbaanyɛ wɔfee kɛtsɔɔ akɛ wɔkɛ hiɛdɔɔ miishiɛ?
7 Esaaa akɛ datrɛfonyo kpakpa ni miifee opireshɛŋ lɛ haa nɔ ko gbalaa ejwɛŋmɔ, ejaakɛ mɛi awala yɛ oshara mli. Kɛ́ wɔjwɛŋ saji, sanebimɔi, kɛ nibii krokomɛi ni mɛi baanya he lɛ anɔ beni wɔshiɛɔ lɛ, no tsɔɔ akɛ wɔkɛ hiɛdɔɔ miishiɛ. Hiɛdɔɔ ni wɔkɛaashiɛ lɛ hu biɔ ni wɔto wɔbe he gbɛjianɔ bɔ ni baaha wɔnyɛ wɔya mɛi aŋɔɔ be mli ni amɛyɔɔ dekã.—Rom. 1:15, 16; 1 Tim. 4:16.
8. Mɛni hiɛdɔɔ ni akɛaafee nɔ ko lɛ tsɔɔ?
8 Hiɛdɔɔ ni wɔkɛaashiɛ lɛ hu biɔ ni wɔkwɛ nibii ni wɔkɛyeɔ klɛŋklɛŋ gbɛhe yɛ wɔshihilɛ mli. (Nyɛkanea 1 Mose 19:15.) Akɛ nɔkwɛmɔnɔ lɛ, ŋɔɔ lɛ akɛ be ni ayatao hela ko ni yeɔ bo lɛ mli sɛɛ lɛ, odatrɛfonyo lɛ tsɛ́ bo kɛtee e-ɔfis lɛ ni ekɛɛ bo anɔkwale lɛ akɛ: “Kwɛmɔ! Osane lɛ yɛ hiɛdɔɔ waa. Oyɛ aaafee nyɔɔŋ kome pɛ ni esa akɛ okɛfee ohela lɛ he nɔ ko.” Ekã shi faŋŋ akɛ, okɛ oyaiyeli shiŋ ɔfis lɛ tamɔ lagbelɔ ko ni he miitswa shi kɛyagbe la. Moŋ lɛ, obaamɛ ni obo gbɛtsɔɔmɔi ni eyɔɔ kɛha bo lɛ toi, no sɛɛ lɛ obaaya shĩa ni okɛ hiɛdɔɔ ayasusu nibii ni esa akɛ ofee lɛ ahe.
9. Mɛni hewɔ wɔbaanyɛ wɔkɛɛ akɛ Paulo kɛ hiɛdɔɔ shiɛ beni eyɔɔ Efeso lɛ?
9 Kɛ́ wɔná wɔle nɔ ni Paulo kɛɛ Efeso asafoŋ onukpai lɛ yɛ bɔ ni eshiɛ sanekpakpa lɛ eha yɛ Asia kpokpaa lɛ nɔ lɛ he lɛ, no baaha wɔna hiɛdɔɔ ni ekɛshiɛ lɛ jogbaŋŋ. (Nyɛkanea Bɔfoi lɛ Asaji 20:18-21.) Eeenyɛ efee akɛ gbi klɛŋklɛŋ ni eyashɛ jɛmɛ lɛ, ekɛ ebe fɛɛ shiɛ sanekpakpa lɛ yɛ shĩa kɛ shĩa. Kɛfata he lɛ, “daa nɛɛ eyawieɔ etsɔɔ mɛi yɛ mɔ ko ni atsɛɔ lɛ Tirano lɛ nikasemɔhe lɛ,” ni efee nakai kɛtsara nɔ afii enyɔ sɔŋŋ. (Bɔf. 19:1, 8-10) Eyɛ faŋŋ akɛ, Paulo ha bɔ ni ehe hiaa ni akɛ hiɛdɔɔ ashiɛ lɛ ná eshihilɛ nɔ hewalɛ. Yiŋtoo hewɔ ni awoɔ wɔ ŋaa akɛ ‘wɔkã he wɔkɛ hiɛdɔɔ ashiɛ’ lɛ jeee ni wɔshiɛmɔ nitsumɔ lɛ afee tamɔ jatsu. Kɛlɛ, esa akɛ wɔha shiɛmɔ nitsumɔ lɛ afee nɔ ni he hiaa wɔ fe fɛɛ yɛ wɔshihilɛ mli.
10. Mɛni hewɔ esa akɛ wɔmii ashɛ wɔhe akɛ Kristofoi komɛi kɛ hiɛdɔɔ shiɛ aaafee afii 100 ni eho nɛ lɛ?
10 Biblia Kaselɔi akuu fioo ko ni shiɛ sanekpakpa lɛ dani afi 1914 lɛ shɛ lɛ anɔkwɛmɔnɔ lɛ haa wɔnaa nɔ ni hiɛdɔɔ ni akɛaashiɛ lɛ tsɔɔ. No mli lɛ amɛyi akpei fioo ko moŋ, shi amɛna bɔ ni ehe hiaa ni amɛkɛ hiɛdɔɔ atsu Maŋtsɛyeli shiɛmɔ nitsumɔ lɛ, ni amɛkɛ miishɛɛ fee nakai. Amɛha akala shiɛmɔ wiemɔi awo adafitswaa woji ohai abɔ mli, ni amɛkɛ mfonirii ni akɛ kɔla etɛŋ fee sini ko ni atsɛɔ lɛ “Photo-Drama of Creation.” Enɛ ha amɛnyɛ amɛshiɛ sanekpakpa lɛ amɛtsɔɔ mɛi akpekpei abɔ. Eji amɛnaaa bɔ ni ehe hiaa ni amɛkɛ hiɛdɔɔ ashiɛ kulɛ, wɔteŋ mɛi enyiɛ baanu Maŋtsɛyeli shɛɛ sane lɛ he?—Nyɛkanea Lala 119:60.
KAAHA HIƐDƆƆ NI OKƐSHIƆ LƐ NAA BA SHI
11. Mɛni hewɔ mɛi komɛi eha hiɛdɔɔ ni amɛkɛshiɛɔ lɛ naa eba shi lɛ?
11 Nibii komɛi baanyɛ aha wɔjie wɔjwɛŋmɔ yɛ bɔ ni shiɛmɔ nitsumɔ lɛ he hiaa ha lɛ nɔ. Ato Satan je lɛ he gbɛjianɔ bɔ ni baaha wɔtiu wɔ diɛŋtsɛ wɔnibii kɛ nibii ni he ehiaaa lɛ asɛɛ. (1 Pet. 5:8; 1 Yoh. 2:15-17) Mɛi komɛi ha hiɛdɔɔ ni tsutsu ko lɛ amɛkɛsɔmɔɔ Yehowa lɛ naa ba shi. Akɛ nɔkwɛmɔnɔ lɛ, klɛŋklɛŋ afii 100 lɛ mli Kristofonyo ko ni atsɛɔ lɛ Dema, ni no mli lɛ eji Paulo ‘naanyo nitsulɔ’ lɛ ha nibii agbɛjianɔtoo fɔŋ lɛ wo enajiaŋ. Nɔ najiaŋ ni Dema baaya nɔ ewo enaanyo Paulo ni eyaje haomɔ mli lɛ hewalɛ lɛ, eshi lɛ etee.—File. 23, 24; 2 Tim. 4:10.
12. Mɛɛ hegbɛ wɔyɔɔ amrɔ nɛɛ, ni mɛɛ hegbɛi wɔbaana kɛya naanɔ?
12 Kɛ́ wɔɔya nɔ wɔkɛ hiɛdɔɔ ashiɛ lɛ, ehe miihia ni wɔwu wɔshi shwelɛ ni wɔɔná akɛ wɔtiu heloonaa nibii babaoo sɛɛ lɛ. Esa akɛ wɔbɔ mɔdɛŋ waa ni ‘wɔmɔ anɔkwa wala lɛ mli kpɛŋŋ.’ (1 Tim. 6:18, 19) Ŋwanejee ko bɛ he akɛ ole akɛ naanɔ wala mli ni wɔbaahi yɛ Nyɔŋmɔ Maŋtsɛyeli lɛ shishi lɛ baaha wɔná hegbɛi babaoo kɛfee nibii ni baaha wɔná miishɛɛ diɛŋtsɛ. Shi amrɔ nɛɛ, wɔná hegbɛ ni nɔ bɛ kwraa akɛ wɔɔye wɔbua mɛi ni amɛfo Harmagedon.
13. Amrɔ nɛɛ ni wɔbatsɔmɔ Kristofoi lɛ, te wɔɔfee tɛŋŋ wɔya nɔ wɔha wɔhiɛ ahi wɔhe nɔ yɛ mumɔŋ lɛ?
13 Akɛni wɔle akɛ mɛi babaoo ni yɔɔ je lɛŋ lɛ miiwɔ yɛ mumɔŋ hewɔ lɛ, mɛni baaye abua wɔ koni hiɛdɔɔ ni wɔkɛshiɛɔ lɛ naa akaba shi? Esa akɛ wɔkai akɛ wɔ hu be ko ni eho lɛ, wɔwɔ yɛ mumɔŋ. Shi atsĩɛ wɔ, ni taakɛ Paulo tsɔɔ mli lɛ, Kristo etso eha wɔ. Amrɔ nɛɛ, wɔná hegbɛ akɛ wɔ hu wɔɔtso wɔha mɛi krokomɛi. (Nyɛkanea Efesobii 5:14.) Enɛ sɛɛ lɛ Paulo wie akɛ: “Nyɛkwɛa jogbaŋŋ bɔ ni nyɛaanyiɛ nyɛha, jeee tamɔ mɛi ni leee nii, shi moŋ tamɔ nilelɔi, mɛi ni tsuɔ amɛbe he nii, ejaakɛ gbii nɛɛ gbii fɔji ni.” (Efe. 5:15, 16, Ga Biblia hee) Nyɛhaa wɔkɛ ‘wɔbe atsua nibii’ ni haŋ wɔwɔ yɛ mumɔŋ yɛ jeŋ fɔŋ nɛɛ mli.
WƆYƐ BEI NI SA KADIMƆ WAA MLI
14-16. Mɛni hewɔ Maŋtsɛyeli shiɛmɔ nitsumɔ lɛ he hiaa waa amrɔ nɛɛ fe bei fɛɛ ni eho lɛ?
14 Kɛjɛ jeeŋmɔ beebe lɛ, Kristofoi asɔɔmɔ nitsumɔ lɛ ji nitsumɔ ko ni he hiaa waa, shi amrɔ nɛɛ ehe miihia kwraa fe bei fɛɛ ni eho. Kɛjɛ afi 1914 kɛbaa nɛɛ, okadi ni awie he yɛ Nyɔŋmɔ Wiemɔ lɛ mli lɛ ebafee faŋŋ. (Mat. 24:3-51) Adesai awala yɛ oshara mli fe bei fɛɛ ni eho. Toiŋjɔlɛ he kpaŋmɔi srɔtoi ni afee nyɛsɛɛ nɛɛ fɛɛ sɛɛ lɛ, maji ni yɔɔ hewalɛ waa lɛ kã he amɛyɛ okplɛmii aaafee 2,000 ni amɛbaanyɛ amɛŋmɛɛ he be fɛɛ be. Nɔyelii bɔɔ amaniɛ daa akɛ okplɛmii ni amɛyɔɔ lɛ ekomɛi “miilaaje.” Ani okplɛmii nɛɛ ekomɛi yɛ awuiyelɔi adɛŋ? Mɛi komɛi kɛɔ akɛ awuiyelɔi nɛɛ baanyɛ afã ta ko ni baakpata adesai fɛɛ hiɛ yɛ gbɛ ni waaa nɔ. Kɛlɛ, jeee ta pɛ kɛ adesai awala ewo oshara mli.
15 Adafitswaa wolo ko (The Lancet kɛ University College London) lɛ bɔ amaniɛ ko yɛ afi 2009 mli akɛ, “Kɔɔyɔŋ tsakemɔ ji nɔ ni kɛ adesai awala ewo oshara mli fe fɛɛ kɛjɛ afi 2000 kɛbaa nɛɛ.” Wolo lɛ kɛɛ akɛ: “Kɔɔyɔŋ tsakemɔ lɛ baasa mɛi babaoo agbɔmɔtsoŋ hewalɛnamɔ he afii nyɔŋmai abɔ, ni ekɛ mɛi akpekpe toi akpei abɔ awala baawo oshara mli.” Nibii ni baanyɛ ajɛ mli aba lɛ ekomɛi ji ŋshɔ ni baayi ní ekpata nibii ahiɛ, nugbɔ ni enɛɛɛ, nu afuai, tsɛŋemɔ helai, lasuogbelei, kɛ tai ni awuɔ yɛ nibii amli ni ewa lɛ hewɔ. Hɛɛ, tai kɛ osharai haaa adesai aya nɔ.
16 Ekolɛ mɛi komɛi baasusu akɛ tai ni akɛ nuklea okplɛmii baawu lɛ baanyɛ aha gbalɛi ni kɔɔ “okadi lɛ” he lɛ aba mli. Kɛlɛ, mɛi babaoo leee nɔ tuuntu ni okadi lɛ tsɔɔ. Afii nyɔŋmai abɔ nɛ ni okadi lɛ fee faŋŋ, ni no tsɔɔ akɛ Kristo eba lɛɛlɛŋ, ni ákɛ nibii agbɛjianɔtoo nɛɛ naagbee kwraa lɛ miibɛŋkɛ oyayaayai. (Mat. 24:3) Okadi lɛ he nibii lɛ babaoo efee faŋŋ fe bei fɛɛ ni eho. Be ni esa akɛ mɛi akpa wɔdɔ̃iwɔɔ yɛ mumɔŋ lɛ nɛ. Wɔshiɛmɔ nitsumɔ lɛ baatsĩɛ amɛ kɛjɛ wɔ lɛ mli.
17, 18. (a) Mɛɛ gbɛ nɔ naagbee “be lɛ” saa wɔhe? (b) Mɛni baanyɛ aha mɛi atsake bɔ ni amɛbuɔ Maŋtsɛyeli shɛɛ sane lɛ amɛhaa lɛ?
17 Be fioo ko pɛ eshwɛ ni wɔkɛaatsɔɔ akɛ wɔsumɔɔ Yehowa lɛɛlɛŋ, ní agbɛnɛ hu wɔkɛgbe shiɛmɔ nitsumɔ ni atu awo wɔdɛŋ yɛ naagbee gbii nɛɛ amli lɛ naa. Nɔ ni Paulo kɛɛ klɛŋklɛŋ afii 100 lɛ mli Kristofoi ni hi Roma lɛ kɔɔ wɔhe waa ŋmɛnɛ akɛ: “Wɔle be lɛ akɛ agbɛnɛ ŋmɛlɛtswaa ni wɔkɛaate shi kɛaajɛ wɔ mli lɛ eshɛ; ejaakɛ agbɛnɛ wɔyiwalaheremɔ lɛ ebɛŋkɛ fe tsutsu beni wɔhe wɔye lɛ.”—Rom. 13:11.
18 Naagbee gbii lɛ ahe nibii ni agba lɛ baanyɛ aha mɛi ahiɛ ahi amɛmumɔŋ hiamɔ nii anɔ. Bɔ ni adesai anɔyelii nyɛɛɛ atsu shika he naagbai, nuklea okplɛmii ni afeɔ, awui ni ayeɔ mɛi, loo nibii ni ebɔle wɔ lɛ ahiɛ ni akpataa lɛ he nii lɛ haa mɛi komɛi hu naa akɛ yelikɛbuamɔ he miihia adesai. Kɛlɛ, nibii ni yaa nɔ yɛ wekui amli, tamɔ hela ni mɔmɔɔ mɛi, gbalatsemɔ, loo suɔlɔ ko gbele lɛ haa mɛi komɛi ahiɛ baa amɛmumɔŋ hiamɔ nii anɔ. Kɛ́ wɔkɛ wɔhe wo shiɛmɔ nitsumɔ lɛ mli lɛ, wɔnáa hegbɛ kɛyeɔ wɔbuaa mɛi nɛɛ.
HIƐDƆƆ TSIRƐƆ WƆ
19, 20. Mɛɛ gbɛ nɔ bɔ ni Kristofoi pii naa bɔ ni ehe hiaa ni akɛ hiɛdɔɔ ashiɛ lɛ eha amɛfee tsakemɔi yɛ amɛshihilɛ mli?
19 Bɔ ni Kristofoi pii naa bɔ ni ehe hiaa ni akɛ hiɛdɔɔ ashiɛ lɛ eha amɛkɛ be babaoo miishiɛ agbɛnɛ. Akɛ nɔkwɛmɔnɔ lɛ, beni nuu ko kɛ eŋa ni jɛ Ecuador ni bote gbalashihilɛ mli etsɛko lɛ tee afi 2006 gbi kome kpee krɛdɛɛ ni yitso ji “Ha Ohiŋmɛi Nɔ Atse” lɛ sɛɛ lɛ, amɛha amɛshihilɛ fee mlɛo. Amɛŋmala nibii ni he ehiaaa amɛ lɛ amɛshwie shi, ni nyɔji etɛ pɛ mli lɛ, amɛshi amɛshĩa ni tsũi etɛ yɔɔ mli lɛ kɛtee shĩa ko ni tsũ kome pɛ yɔɔ mli lɛ mli, amɛhɔɔ amɛnibii komɛi, ni amɛwowoo amɛnyɔji fɛɛ. Etsɛɛɛ ni amɛkɛ amɛhe wo gbɛgbalɔi awamɔ nitsumɔ lɛ mli, ni amɛkɛ ŋaa ni kpokpaa nɔkwɛlɔ lɛ wo amɛ akɛ amɛyasɔmɔ yɛ asafo ko ni hiamɔ yɔɔ mli lɛ mli lɛ tsu nii.
20 Nyɛmi nuu ko ni jɛ Amerika Kooyigbɛ lɛ ŋma akɛ: “Mikɛ miŋa tee afi 2006 kpokpaa nɔ kpee lɛ, no mli lɛ afii 30 eho kɛjɛ be ni abaptisi wɔ. Beni wɔta tsɔne mli kɛmiiya shĩa lɛ, wɔsusu bɔ ni wɔɔfee wɔkɛ ŋaa ni awo akɛ wɔha wɔshihilɛ afee mlɛo lɛ baatsu nii lɛ he. (Mat. 6:19-22) No mli lɛ wɔyɛ shĩai etɛ, shikpɔŋ, kar srɔtoi ni jara wala, lɛlɛ, kɛ lɔle ni awɔɔ mli. Akɛni wɔnu he akɛ wɔkɛ nilee eyatsuuu nii yɛ be ni eho lɛ mli hewɔ lɛ, wɔkpɛ mli akɛ wɔkɛ wɔhe baawo be fɛɛ sɔɔmɔ nitsumɔ lɛ mli. Afi 2008 mli lɛ, wɔtsɔmɔ daa gbɛgbalɔi tamɔ wɔbi yoo lɛ ji lɛ. Wɔmii eshɛ wɔhe waa akɛ wɔkɛ nyɛmimɛi lɛ efee ekome kɛmiisɔmɔ fe tsutsu lɛ! Wɔnyɛ wɔyasɔmɔ yɛ he ni hiamɔ lɛ da yɛ. Kɛfata he lɛ, wɔhe ni wɔkɛwo Yehowa sɔɔmɔ lɛ mli kɛmɔ shi lɛ eha wɔbɛŋkɛ lɛ kpaakpa. Kɛ́ wɔna akɛ mɛi enu Nyɔŋmɔ Wiemɔ lɛ mli anɔkwale lɛ shishi jogbaŋŋ lɛ, ehaa wɔtsui nyɔɔ wɔmli naakpa.”
21. Mɛɛ nilee tsirɛɔ wɔ koni wɔkɛ hiɛdɔɔ ashiɛ?
21 Wɔle nɔ ni baaba nibii agbɛjianɔtoo fɔŋ nɛɛ nɔ yɛ be kukuoo ni kã wɔhiɛ lɛ mli, no ji “kojomɔ kɛ gbɔmɛi ní kwá Nyɔŋmɔ lɛ ahiɛkpatamɔ gbi lɛ.” (2 Pet. 3:7) Nyɔŋmɔ Wiemɔ lɛ he nilee ni wɔyɔɔ lɛ tsirɛɔ wɔ ni wɔkɛ ekãa shiɛɔ amanehulu kpeteŋkpele ni kã wɔhiɛ lɛ, kɛ jeŋ hee ni baanyiɛ no sɛɛ lɛ. Wɔkã he wɔmiina akɛ esa akɛ wɔkɛ hiɛdɔɔ ashiɛ ní wɔha mɛi aná anɔkwa hiɛnɔkamɔ. Kɛ́ wɔkɛ wɔhe wo nitsumɔ ni he hiaa waa nɛɛ mli kɛmɔ shi lɛ, no tsɔɔ lɛɛlɛŋ akɛ wɔsumɔɔ Nyɔŋmɔ kɛ wɔnaanyo gbɔmɔ.
[Nikasemɔ lɛ he Sanebimɔi]
