Ye Obua Mɛi ni ‘Amɛte Shi Kɛjɛ Wɔ Mli’
Ye Obua Mɛi ni ‘Amɛte Shi Kɛjɛ Wɔ Mli’
‘Nyɛle be lɛ akɛ agbɛnɛ ŋmɛlɛtswaa ni nyɛkɛaate shi kɛaajɛ wɔ mli lɛ eshɛ.’—ROM. 13:11.
ANI OBAANYƐ OTSƆƆ MLI?
Mɛni hewɔ ehe hiaa waa akɛ Kristofoi ahiɛ akã yɛ mumɔŋ lɛ?
Mɛni hewɔ esa akɛ shiɛlɔi ni hiɛ kã lɛ abo sane toi ni amɛkɛ sɛɛyoomɔ atsu nii lɛ?
Mɛɛ gbɛfaŋnɔ mlihilɛ kɛ tsuishitoo tsuɔ yɛ wɔshiɛmɔ nitsumɔ lɛ mli?
1, 2. Mɛɛ shishinumɔ naa esa akɛ mɛi ate shi kɛjɛ wɔ mli lɛ?
DAA afi lɛ, mɛi akpekpei abɔ gboiɔ akɛni amɛmiiwɔ wɔdɔ̃i loo amɛmiiwɔ beni amɛmiikudɔ tsɔne lɛ hewɔ. Mɛi krokomɛi anitsumɔ ŋmɛɔ amɛ akɛni amɛteee shi mra kɛyaaa nitsumɔ loo amɛwɔɔ beni amɛmiitsu nii lɛ hewɔ. Shi mumɔŋ wɔdɔ̃iwɔɔ baanyɛ afee oshara kwraa fe enɛɛmɛi. Enɛ hewɔ ni Biblia lɛ kɛɔ akɛ: “Ajɔɔ mɔ ni saraa” lɛ.—Kpoj. 16:14-16.
2 Beni Yehowa gbi wulu lɛ bɛŋkɛɔ nɛɛ, adesai babaoo miiwɔ yɛ mumɔŋ. Kristendom jamɔŋ hiɛnyiɛlɔi lɛ ateŋ mɛi komɛi po wie amɛwebii lɛ ahe akɛ ‘amɛmiiwɔ waa.’ Kɛ́ akɛɛ mɔ ko ewɔ yɛ mumɔŋ lɛ, te eshishi lɛ? Mɛni hewɔ ehe hiaa ni anɔkwa Kristofoi asara lɛ? Te wɔɔfee tɛŋŋ wɔye wɔbua mɛi krokomɛi ni amɛte shi kɛjɛ wɔ ni tamɔ nakai mli?
MƐNI JI MUMƆŊ WƆ?
3. Kɛ́ akɛɛ mɔ ko ewɔ yɛ mumɔŋ lɛ, te eshishi lɛ?
3 Bei pii lɛ mɛi ni ewɔ lɛ tsuuu nɔ ko. Nɔ ni tamɔɔɔ nakai lɛ, mɛi ni wɔɔ yɛ mumɔŋ lɛ bɛ dekã kwraa—shi jeee yɛ mumɔŋ nibii ahe. Ekolɛ amɛkɛ amɛbe fɛɛ tiuɔ shihilɛ mli nibii, ŋɔɔmɔyeli, gbɛihemɔ, loo ninamɔ sɛɛ. Nibii nɛɛ asɛɛtiumɔ sɔŋŋ haaa amɛná be amɛha amɛmumɔŋ hiamɔ nii. Shi kɛlɛ, mɛi ni hiɛ kã yɛ mumɔŋ lɛ le akɛ wɔyɛ “naagbee gbii lɛ” amli, no hewɔ lɛ amɛkɛ ekãa fɛɛ miifee Nyɔŋmɔ suɔmɔnaa nii.—2 Pet. 3:3, 4; Luka 21:34-36.
4. Mɛni ŋaawoo ni ji: “Nyɛkahaa wɔmiiwɔa tamɔ mɛi ni eshwɛ lɛ” tsɔɔ?
4 Nyɛkanea 1 Tesalonikabii 5:4-8. Bɔfo Paulo wo enanemɛi héyelilɔi lɛ ŋaa koni ‘amɛkawɔ tamɔ mɛi ni eshwɛ lɛ.’ Mɛni Paulo tsɔɔ lɛ? Nɔ kome ni baanyɛ aha ‘wɔwɔ’ yɛ mumɔŋ ji ní wɔbaakpoo Yehowa jeŋba he shishitoo mlai lɛ. Nɔ kroko hu ni baanyɛ aha ‘wɔwɔ’ ji ní wɔɔkpoo anɔkwale ni eji akɛ be ni Yehowa baakpata mɛi fɔji ahiɛ lɛ eshɛ. Esaaa akɛ wɔhaa mɛi fɔji ni tamɔ nɛkɛ lɛ anifeemɔi kɛ amɛsusumɔi náa wɔnɔ hewalɛ.
5. Mɛɛ sui akɛyoɔ mɛi ni ewɔ yɛ mumɔŋ lɛ?
5 Mɛi komɛi susuɔ akɛ Nyɔŋmɔ ko bɛ ni baaha amɛbu amɛnifeemɔi ahe akɔntaa. (Lala 53:2) Mɛi krokomɛi susuɔ akɛ Nyɔŋmɔ bɛ adesai ahe dekã, ni no hewɔ lɛ ehe ehiaaa ni wɔ hu wɔgba wɔhe naa yɛ ehe. Kɛlɛ, mɛi krokomɛi hu nuɔ he akɛ kɛ́ amɛkɛ amɛhe bɔ sɔlemɔ ko he lɛ, amɛbaatsɔmɔ Nyɔŋmɔ nanemɛi. Mɛi nɛɛ fɛɛ ewɔ yɛ mumɔŋ. Esa akɛ amɛhiɛ atsɛ̃. Te wɔɔfee tɛŋŋ wɔye wɔbua amɛ?
ESA AKƐ WƆ DIƐŊTSƐ LƐ WƆHIƐ AKÃ
6. Mɛni hewɔ esa akɛ Kristofoi abɔ mɔdɛŋ waa ni amɛhiɛ akã yɛ mumɔŋ lɛ?
6 Kɛ́ wɔbaanyɛ wɔtsĩɛ mɛi kɛjɛ wɔ mli lɛ, ja wɔ diɛŋtsɛ lɛ wɔhiɛ kã. Mɛni no biɔ ni wɔfee? Nyɔŋmɔ Wiemɔ lɛ kɛ mfonirifeemɔŋ wɔ toɔ “duŋ mli nitsumɔi” tamɔ yakayaka shwɛmɔ, dãatɔɔ, ajwamaŋbɔɔ, nyɛnyɛŋtswibɔɔ, béi, kɛ awuŋayeli he. (Nyɛkanea Romabii 13:11-14.) Ebɛ mlɛo akɛ mɔ aaakwa nifeemɔi gbohii nɛɛ. Esa akɛ wɔha wɔhiɛ ahi wɔhe nɔ waa. Kɛ́ tsɔnekudɔlɔ ko ku ehiɛ eshwie nɔ akɛ ebaanyɛ ewɔ beni ekudɔɔ tsɔne lɛ, ekɛ ewala baawo oshara mli. Ehe miihia waa ni Kristofonyo hiɛ ahi ehe nɔ akɛ kɛ́ ewɔ yɛ mumɔŋ lɛ, ebaanyɛ egbo!
7. Kɛ́ wɔná mɛi ahe susumɔ ni ejaaa lɛ, mɛɛ awui ebaanyɛ eye?
7 Akɛ nɔkwɛmɔnɔ lɛ, ekolɛ Kristofonyo ko baasusu akɛ mɛi fɛɛ ni yɔɔ eshikpɔŋkuku lɛ mli lɛ booo sanekpakpa lɛ toi, ni ákɛ amɛtsakeŋ kɔkɔɔkɔ. (Abɛi 6:10, 11) Ekolɛ ebaasusu akɛ, ‘Kɛ́ mɔ ko mɔ ko boŋ mi toi lɛ, mɛni hewɔ esa akɛ magba mihe naa maya mɛi aŋɔɔ loo maye mabua amɛ?’ Eji anɔkwale akɛ, ekolɛ mɛi babaoo miiwɔ yɛ mumɔŋ amrɔ nɛɛ, shi amɛshihilɛi kɛ amɛsui baanyɛ atsake. Mɛi komɛi ahiɛ tsɛ̃ɔ ni amɛboɔ toi. Ni kɛ́ wɔ diɛŋtsɛ lɛ wɔhiɛ kã lɛ, wɔbaanyɛ wɔye wɔbua amɛ kɛtsɔ gbɛi ni wɔtsɔɔ nɔ wɔkɛ Maŋtsɛyeli shɛɛ sane lɛ haa lɛ mli ni wɔɔtsake koni amɛná he miishɛɛ lɛ nɔ. Kɛ́ wɔha wɔhiɛ hi bɔ ni wɔsɔɔmɔ nitsumɔ lɛ he hiaa ha lɛ nɔ lɛ, no hu haŋ wɔwɔ yɛ mumɔŋ.
MƐNI HEWƆ WƆSHIƐMƆ NITSUMƆ LƐ HE HIAA WAA LƐ?
8. Mɛni hewɔ wɔ-Kristofoi asɔɔmɔ nitsumɔ lɛ he hiaa waa lɛ?
8 Ha ehi ojwɛŋmɔŋ akɛ ekɔɔɔ he eko bɔ ni mɛi baafee amɛnii yɛ wɔshiɛmɔ nitsumɔ lɛ he lɛ, ewoɔ Yehowa hiɛ nyam, ni etsuɔ gbɛfaŋnɔ ko yɛ eyiŋtoo mli. Etsɛŋ ni abaadamɔ bɔ ni mɛi feɔ amɛnii yɛ wɔshiɛmɔ nitsumɔ lɛ he lɛ nɔ akojo amɛ. Mɛi ni booo toi lɛ, abaakpata amɛhiɛ. (2 Tes. 1:8, 9) Kɛfata he lɛ, nilee bɛ mli akɛ Kristofonyo ko aaasusu akɛ ehe ehiaaa ni akɛ ekãa shiɛɔ, ejaakɛ “gbohiiashitee baaba ni jalɔi kɛ mɛi ni ejaaa fɛɛ baate shi.” (Bɔf. 24:15) Nyɔŋmɔ Wiemɔ lɛ haa wɔleɔ akɛ ‘abaakpata’ mɛi ni akojoɔ akɛ “abotiai” lɛ ‘ahiɛ kɛya naanɔ.’ Wɔshiɛmɔ nitsumɔ lɛ haa anaa Nyɔŋmɔ mɔbɔnalɛ lɛ, ni ehaa mɛi náa hegbɛ koni amɛkɛtsake, ní amɛná “naanɔ wala.” (Mat. 25:32, 41, 46; Rom. 10:13-15) Kɛ́ wɔshiɛɛɛ lɛ, te aaafee tɛŋŋ ni mɛi aaanu shɛɛ sane ni baanyɛ aha amɛná wala lɛ?
9. Mɛɛ gbɛ nɔ sanekpakpa lɛ ni oshiɛɔ lɛ he eba sɛɛnamɔ kɛha bo kɛ mɛi krokomɛi?
9 Kɛ́ wɔshiɛ sanekpakpa lɛ, wɔ hu wɔnáa he sɛɛ. (Nyɛkanea 1 Timoteo 4:16.) Ani oyɔseko akɛ kɛ́ okɛ mɛi gba Yehowa kɛ Maŋtsɛyeli lɛ he sane lɛ ewajeɔ ohemɔkɛyeli kɛ suɔmɔ ni oyɔɔ kɛha Nyɔŋmɔ lɛ? Ani no yeko ebuako bo koni oná Kristofoi asui? Ani shiɛmɔ nitsumɔ lɛ ní okɛ ohe woɔ mli kɛtsɔɔ akɛ otuu ohe oha Nyɔŋmɔ lɛ haaa oná miishɛɛ? Mɛi babaoo ni enyɛ eye ebua mɛi krokomɛi kɛba anɔkwale lɛ mli lɛ náa miishɛɛ akɛ amɛmiina akɛ Nyɔŋmɔ mumɔ lɛ miiye kɛmiibua mɛi nɛɛ, ni amɛmiifee tsakemɔi yɛ amɛshihilɛ mli.
OKƐ OHIƐ AFƆ̃ SHI
10, 11. (a) Mɛɛ gbɛ nɔ Yesu kɛ Paulo tsɔɔ akɛ amɛkɛ amɛhiɛ fɔ̃ɔ shi ni amɛyoɔ nii asɛɛ? (b) Tsɔɔmɔ bɔ ni kɛ́ wɔkɛ wɔhiɛ fɔ̃ shi ni wɔyoo nii asɛɛ lɛ, ebaaha wɔshiɛmɔ nitsumɔ lɛ amɔ shi lɛ mli.
10 Wɔbaanyɛ wɔtsɔ gbɛi srɔtoi anɔ wɔha mɛi aná sanekpakpa lɛ he miishɛɛ. No hewɔ lɛ, esa akɛ Kristofoi ni shiɛɔ lɛ kɛ amɛhiɛ afɔ̃ shi. Yesu ji wɔnɔkwɛmɔnɔ. Akɛni eye emuu hewɔ lɛ, enyɛ ena mlifu ni yɔɔ Farisifonyo ko tsuiŋ, bɔ ni yoo eshafeelɔ ko tsake etsui lɛɛlɛŋ, kɛ hekɛafɔleshaa su ni yoo okulafo ko yɔɔ. (Luka 7:37-50; 21:1-4) Yesu baanyɛ atsu mɔ fɛɛ mɔ mumɔŋ hiamɔ nii ahe nii. Kɛlɛ, ehe ehiaaa ni Nyɔŋmɔ tsulɔ ko aye emuu dani enyɛ ekɛ sɛɛyoomɔ atsu nii. Bɔfo Paulo fee enɛ he nɔkwɛmɔnɔ. Etsake gbɛii anɔ ni etsɔɔ eshiɛɔ lɛ mli bɔni afee ni enyɛ eshiɛ eha mɛi srɔtoi ni hiɛ sui srɔtoi.—Bɔf. 17:22, 23, 34; 1 Kor. 9:19-23.
11 Taakɛ Yesu kɛ Paulo fee lɛ, kɛ́ wɔ hu wɔkɛ wɔhiɛ fɔ̃ shi ni wɔyoo nii asɛɛ lɛ, wɔbaanyɛ wɔtée mɛi ni wɔkɛkpeɔ lɛ amiishɛɛ shi. Ákɛ nɔkwɛmɔnɔ lɛ, kɛ́ okɛ mɔ ko yaawie lɛ, kwɛmɔ akɛ obaanyɛ oyɔse mɔ lɛ kusumii, nibii ni enyaa he, kɛ eweku shihilɛ lo. Ekolɛ obaanyɛ oyɔse nibii ni efeɔ yɛ nakai beaŋ, ní ojie eyi kɛje sanegbaa lɛ shishi.
12. Mɛni hewɔ esa akɛ wɔkwɛ wɔsanegbaa jogbaŋŋ kɛ́ wɔnyiɛ shiɛmɔ nɔ lɛ?
12 Kɛ́ wɔhiɛ yɛ wɔhe nɔ lɛ, wɔhaŋ nɔ ko agbala wɔjwɛŋmɔ. Sane ni wɔkɛ mɛi ni wɔkɛnyiɛ shiɛmɔ nɔ lɛ gbaa lɛ baanyɛ atswa mɛi lɛ ama shi waa. Kɛlɛ, esa akɛ wɔkai akɛ yiŋtoo hewɔ ni wɔnyiɛ lɛ ji ni wɔshiɛ wɔha mɛi krokomɛi. (Jaj. 3:1, 7) No hewɔ lɛ, esa akɛ wɔkwɛ koni sane ni wɔgbaa kɛ́ wɔjɛ shinaa ko naa kɛmiiya ekroko naa lɛ akagbala wɔjwɛŋmɔ kɛmiijɛ shiɛmɔ nitsumɔ lɛ nɔ. Nɔ ni baaye abua wɔ koni wɔjwɛŋmɔ ahi wɔshiɛmɔ nitsumɔ lɛ nɔ ji, ní wɔsusu saji ni wɔkɛ mɛi ni yɔɔ wiemɔ lɛ he miishɛɛ lɛ baagba lɛ he. Kɛfata he lɛ, eyɛ mli akɛ bei komɛi lɛ mobail foŋ baanyɛ aye abua wɔ yɛ shiɛmɔ nitsumɔ lɛ mli moŋ, shi esa akɛ wɔkwɛ koni kɛ́ mɔ ko tswa wɔ lɛ, ekafite sane ni wɔkɛ shĩatsɛ lɛ gbaa lɛ.
NÁ MƐI AHE MIISHƐƐ
13, 14. (a) Te wɔɔfee tɛŋŋ wɔyɔse nɔ ni mɔ ko nyaa he lɛ? (b) Mɛni baanyɛ atee mɛi amiishɛɛ shi kɛha mumɔŋ nibii?
13 Shiɛlɔi ni hiɛ yɔɔ amɛhe nɔ lɛ boɔ mɛi ni amɛkɛkpeɔ lɛ toi. Mɛɛ saji obaanyɛ obi mɔ ko yɛ oshikpɔŋkuku lɛ mli bɔni afee ni etsɔɔ ejwɛŋmɔ? Ani jamɔi ni yaa nɔ efaa, awui ni ayeɔ yɛ akutso lɛ mli, loo nibii ahe nii ni nɔyelii lɛ nyɛɛɛ atsu lɛ haoɔ lɛ? Ani obaanyɛ owie bɔ ni adebɔɔ nibii yɔɔ naakpɛɛ ha, loo bɔ ni Biblia mli ŋaawoo he yɔɔ sɛɛnamɔ lɛ he ni okɛtee emiishɛɛ shi? Mɛi ni jɛ shihilɛi srɔtoi amli lɛ ateŋ tsiimɔ nyaa sɔlemɔ he, ni mɛi ni kɛɛ Nyɔŋmɔ bɛ lɛ po fata he. Mɛi pii ayiŋ feɔ amɛ kɔshikɔshi kɛ́ mɔ ko yɛ ni boɔ sɔlemɔi atoi. Mɛi krokomɛi hu baanya sanebimɔi nɛɛ ahe: Ani Nyɔŋmɔ boɔ sɔlemɔi fɛɛ toi? Kɛ́ jeee nakai lɛ, mɛni esa akɛ wɔfee koni Nyɔŋmɔ abo wɔ toi?
14 Wɔbaanyɛ wɔkase bɔ ni ajeɔ sanegbaa shishi kɛjɛ mɛi ni yɔɔ niiashikpamɔ yɛ shiɛmɔ nitsumɔ lɛ mli lɛ adɛŋ. Kadimɔ bɔ ni amɛtaaa mɛi adaaŋ pii loo amɛkoliii mɛi ateemɔŋ saji amli lɛ. Mɛɛ gbɛ nɔ gbee ni amɛkɛwieɔ, kɛ amɛhiɛ su haa anaa akɛ amɛmiitao ni amɛnu nɔ ni shĩatsɛ lɛ wieɔ lɛ shishi?—Abɛi 15:13.
MLIHILƐ KƐ HESAA
15. Mɛni hewɔ esa akɛ wɔjie mlihilɛ kpo kɛ́ wɔmiishiɛ lɛ?
15 Ani obaasumɔ ni atsĩɛ bo beni owɔ vii? Mɛi babaoo amli fuɔ kɛ́ atsĩɛ amɛ kpalakpala. Bei pii lɛ, mɛi sumɔɔ ni atsĩɛ amɛ blɛoo. Nakai nɔŋŋ eji kɛ́ wɔmiibɔ mɔdɛŋ wɔtsĩɛ mɔ ko kɛjɛ mumɔŋ wɔ mli. Akɛ nɔkwɛmɔnɔ lɛ, kɛ́ otee oyaashiɛ oha mɔ ko ni emli fu lɛ, bei pii lɛ mɛni ji nɔ ni hi fe fɛɛ ni esa akɛ ofee? Jɛɛ mlihilɛ mli okpɛlɛ bɔ ni enuɔ he ehaa lɛ nɔ, daa lɛ shi akɛ eha ole bɔ ni enuɔ he ehaa, ní oshi jɛmɛ kpoo. (Abɛi 15:1; 17:14; 2 Tim. 2:24) Kɛji ojie mlihilɛ kpo otsɔɔ lɛ lɛ, no baaha be kroko kɛ́ Odasefonyo ko ba eŋɔɔ lɛ, etse ehiɛ eha lɛ.
16, 17. Te wɔɔfee tɛŋŋ wɔkɛ sɛɛyoomɔ atsu nii yɛ wɔshiɛmɔ nitsumɔ lɛ mli lɛ?
16 Yɛ shihilɛi krokomɛi amli lɛ, ekolɛ obaanyɛ oshiɛ otsɔɔ mɔ ko ni sumɔɔɔ ni eboɔ wiemɔ lɛ toi. Ekolɛ mɔ ko baakɛɛ akɛ, “Miyɛ mi diɛŋtsɛ mijamɔ” loo “Mibɛ he miishɛɛ,” akɛni eetao ni efo sanegbaa lɛ sɛɛ lɛ hewɔ. Kɛlɛ, kɛ́ otee nɔ okɛ hesaa kɛ mlihilɛ tsu nii lɛ, ekolɛ obaanyɛ otee sanebimɔ ko ni yɔɔ miishɛɛ shi, ní baaha shĩatsɛ lɛ abo shɛɛ sane ni ohiɛ lɛ toi.—Nyɛkanea Kolosebii 4:6.
17 Bei komɛi lɛ, kɛ́ wɔkɛ mɛi ni nuɔ he akɛ amɛbɛ dekã ni amɛkɛaabo wɔ toi lɛ kpe lɛ, ehi jogbaŋŋ akɛ wɔbaanu amɛ shishi, ni wɔshi. Kɛlɛ, yɛ shihilɛi komɛi amli lɛ, obaana akɛ obaanyɛ owie nɔ ko kuku ni shishinumɔ yɔɔ he. Nyɛmimɛi komɛi nyɛɔ amɛkɛ shɛɛ sane lɛ haa yɛ nɔ ni shɛɛɛ miniti kome mli, kɛtsɔ Biblia lɛ mli wiemɔ ko ni haa mɔ susuɔ nii ahe ni amɛkaneɔ, kɛkɛ lɛ no sɛɛ lɛ amɛshi sanebimɔ ko amɛha shĩatsɛ lɛ nɔ. Bei komɛi lɛ, gbɛ kuku ni tamɔ nɛkɛ ni amɛtsɔɔ nɔ nɛɛ teɔ shĩatsɛ lɛ miishɛɛ shi aahu akɛ, enaa akɛ ejeee mɔ ni bɛ dekã ni ekɛaabo sanegbaa kuku toi. Mɛni hewɔ okaaa enɛ okwɛɛɛ be kroko kɛ́ oná hegbɛ lɛ?
18. Mɛni wɔbaanyɛ wɔfee koni wɔnyɛ wɔye odase kɛmɔ shi beni wɔnyiɛɛɛ shiɛmɔ nɔ?
18 Kɛ́ wɔsaa wɔhe kɛha odase ni ayeɔ beni anyiɛɛɛ shiɛmɔ nɔ lɛ, wɔbaanyɛ wɔtee mɛi ni wɔkɛkpeɔ daa lɛ amiishɛɛ shi kɛha sanekpakpa lɛ. Nyɛmimɛi hii kɛ yei babaoo hiɛɔ woji yɛ amɛhe loo amɛbaagii amli. Amɛkɛ Biblia mli ŋmalɛ ko hu saa amɛhe koni kɛ́ hegbɛ lɛ ba lɛ amɛkɛ mɛi asusu he. Obaanyɛ obi sɔɔmɔ nitsumɔ nɔkwɛlɔ lɛ loo gbɛgbalɔi ni yɔɔ osafo lɛ mli lɛ ni amɛye amɛbua bo koni onyɛ ofee nakai.
TSĨƐMƆ OWEKUMƐI LƐ BLƐOO
19. Mɛni hewɔ esaaa akɛ wɔnijiaŋ jeɔ wui akɛ wɔɔya nɔ wɔye wɔbua wɔwekumɛi lɛ?
19 Wɔ fɛɛ wɔshwelɛ ji akɛ wɔye wɔbua wɔwekumɛi lɛ koni amɛbo sanekpakpa lɛ toi. (Yosh. 2:13; Bɔf. 10:24, 48; 16:31, 32) Kɛ́ amɛkpoo wiemɔ lɛ klɛŋklɛŋ beni wɔkɛha amɛ lɛ, no baanyɛ aha wɔnijiaŋ aje wui akɛ wɔɔka ekoŋŋ. Ekolɛ wɔbaasusu akɛ nɔ ko tsɔ bɛ ni wɔbaafee loo wɔbaawie ni baaha amɛtsake amɛsubaŋ. Kɛlɛ, nibii komɛi baanyɛ aha owekumɛi lɛ ashihilɛi loo amɛsusumɔi atsake. Aloo ekolɛ gbɛ ni otsɔɔ nɔ ogbalaa anɔkwale lɛ mli lɛ etee hiɛ, ni no hewɔ lɛ amɛbaabo bo toi amrɔ nɛɛ.
20. Mɛni hewɔ hiɛshikamɔ he hiaa kɛ́ wɔkɛ wɔwekumɛi miiwie lɛ?
20 Esaaa akɛ wɔkuɔ wɔhiɛ wɔshwieɔ wɔwekumɛi lɛ ahenumɔi anɔ. (Rom. 2:4) Ani esaaa akɛ wɔkɛ amɛ wieɔ yɛ mlihilɛ mli taakɛ wɔfeɔ kɛ́ wɔkɛ mɛi kpe yɛ shiɛmɔ nitsumɔ lɛ mli lɛ? Wiemɔ yɛ mlihilɛ mli ni ojie bulɛ kpo. Yɛ nɔ najiaŋ ni ooowie anɔkwale lɛ he be fɛɛ be lɛ, okɛ onifeemɔ atsɔɔ bɔ ni anɔkwale lɛ eye ebua bo waa. (Efe. 4:23, 24) Ha amɛna faŋŋ akɛ Yehowa eha oshihilɛ ehi jogbaŋŋ, ni ‘etsɔɔ bo nii ni hi hao.’ (Yes. 48:17) Tsɔ bɔ ni ohiɔ shi ohaa lɛ nɔ oha owekumɛi lɛ ana bɔ ni esa akɛ Kristofonyo ahi shi aha.
21, 22. Gbaa niiashikpamɔ ko ni tsɔɔ nɔ hewɔ ni ehe hiaa ni wɔya nɔ wɔbɔ mɔdɛŋ wɔye wɔbua wɔwekumɛi lɛ.
21 Nyɛsɛɛ nɛɛ nyɛmi yoo ko ŋma akɛ: “Mibɔɔ mɔdɛŋ be fɛɛ be akɛ matsɔ miwiemɔ kɛ minifeemɔ nɔ maye minyɛmimɛi hii kɛ yei 13 lɛ odase. Afi ko hooo ni miŋmaaa amɛteŋ mɔ fɛɛ mɔ wolo. Kɛlɛ, afii 30 ho, fɛɛ ni mi pɛ ji Odasefonyo yɛ weku lɛ mli.”
22 Nyɛmi yoo lɛ tsa nɔ akɛ: “Gbi ko lɛ, mitswa minyɛmimɛi yei lɛ ateŋ mɔ kome ni kɛ mi teŋ jɛkɛ shitoi ohai abɔ lɛ tɛlifoŋ. Ekɛɛ mi akɛ ebi ni amɛsɔfo lɛ kɛ lɛ akase Biblia lɛ, shi efooo edaaŋ. Beni miha ele akɛ masumɔ ni mikɛ lɛ akase nii lɛ, ewie akɛ: ‘Yoo minu, shi ná ole akɛ: mitsɔŋ Yehowa Odasefonyo kɔkɔɔkɔ.’ Mikɛ Mɛni Biblia lɛ Tsɔɔ Diɛŋtsɛ? wolo lɛ maje lɛ, ni no sɛɛ lɛ mitswaa lɛ tɛlifoŋ kpitiokpitio. Shi fɛɛ sɛɛ lɛ, no mli lɛ egbeleko wolo lɛ naa. Naagbee lɛ, miha eyakɔ ewolo lɛ ni wɔkɛ aaafee minitii 15 kane wolo lɛ ni wɔsusu ŋmalɛi ni aŋmala amɛmli wiemɔi lɛ ekomɛi ahe. Beni mitswa lɛ shii enyɔoo ko sɛɛ lɛ, ekɛɛ eesumɔ ni wɔkɛ nɔ ni fa fe minitii 15 akase nii lɛ. Agbɛnɛ, lɛ ebɔi mi tswaa kɛha nikasemɔ lɛ, ni bei komɛi lɛ etswaa beni miteko shi kɛjɛko saa mli, ni ekomɛi lɛ etswaa shii enyɔ yɛ gbi lɛ mli. Enɔ afi lɛ abaptisi lɛ, ni no sɛɛ afi lɛ, ebɔi gbɛgbamɔ nitsumɔ lɛ.”
23. Mɛni hewɔ esaaa ni wɔnijiaŋ jeɔ wui akɛ wɔɔtsĩɛ mɛi kɛjɛ mumɔŋ wɔ mli lɛ?
23 Kɛ́ wɔbaanyɛ wɔye wɔbua mɛi ni amɛhiɛ atsɛ̃ yɛ mumɔŋ lɛ, ebiɔ ŋaa kɛ hiɛmiamɔ. Kɛlɛ, mɛi ni he jɔ lɛ ateŋ mɛi pii miibo sanekpakpa lɛ toi. Kɛ́ aja mli lɛ, daa nyɔɔŋ nɔ lɛ, abaptisiɔ mɛi 20,000 akɛ Yehowa Odasefoi. No hewɔ lɛ, nyɛhaa wɔkɛ ŋaa ni Paulo wo wɔnyɛmi nuu Arkipo ni hi shi yɛ klɛŋklɛŋ afi 100 lɛ mli lɛ atsua nii, akɛ: “Baamɔ sɔɔmɔ ni atuu awo odɛŋ yɛ Nuŋtsɔ lɛ mli lɛ yi, koni ogbe naa kwraa!” (Kol. 4:17) Nikasemɔ ni nyiɛ sɛɛ lɛ baaye abua wɔteŋ mɔ fɛɛ mɔ koni enu nɔ ni atsɔɔ kɛ́ akɛɛ wɔkɛ hiɛdɔɔ ashiɛ lɛ shishi.
[Nikasemɔ lɛ he Sanebimɔi]
[Akrabatsa ni yɔɔ baafa 13]
BƆ NI OOOFEE OHA OHIƐ AKÃ
▪ Feemɔ Nyɔŋmɔ suɔmɔnaanii be fɛɛ be
▪ Kwa duŋ nitsumɔi
▪ Ha ohiɛ ahi oshara ni yɔɔ mumɔŋ wɔdɔ̃iwɔɔ he
▪ Ná oshikpɔŋkuku lɛ mli bii lɛ ahe jwɛŋmɔ ni ja
▪ Kaa gbɛi srɔtoi ni atsɔɔ nɔ ashiɛɔ lɛ okwɛ
▪ Kaimɔ bɔ ni osɔɔmɔ nitsumɔ lɛ he hiaa ha
