Ani Oojie Yehowa Anunyam lɛ Kpo?
Ani Oojie Yehowa Anunyam lɛ Kpo?
‘Wɔjieɔ Yehowa anunyam lɛ kpo tamɔ ashwishwɛ.’—2 KOR. 3:18, NW.
TE OBAAHA HETOO OHA TƐŊŊ?
Eyɛ mli akɛ esha su yɛ wɔmli moŋ, shi te wɔɔfee tɛŋŋ wɔwo Yehowa hiɛ nyam?
Mɛɛ gbɛ nɔ wɔsɔlemɔi kɛ Kristofoi akpeei ni wɔyaa lɛ yeɔ ebuaa wɔ koni wɔjie Nyɔŋmɔ anunyam lɛ kpo?
Mɛni baanyɛ aye abua wɔ koni wɔya nɔ wɔwo Yehowa hiɛ nyam?
1, 2. Mɛni hewɔ adesai baanyɛ akase Yehowa sui lɛ?
WƆ FƐƐ lɛ, wɔje wɔfɔlɔi yɛ gbɛ kome ko loo gbɛ kroko ko nɔ. Belɛ, ebɛ naakpɛɛ mɔ akɛ wɔnuɔ ni akɛɔ gbekɛ nuu ko akɛ, ‘Oje Otsɛ ei.’ Akɛɔ gbekɛ yoo ko hu akɛ, ‘Kɛ́ mina bo nɔŋŋ lɛ belɛ mikai onyɛ Awo.’ Kɛfata he lɛ, gbekɛbii sumɔɔ ni amɛkase amɛfɔlɔi. Shi wɔ hu? Ani wɔbaanyɛ wɔkase Yehowa, wɔŋwɛi Tsɛ lɛ? Eyɛ mli akɛ wɔnako lɛ pɛŋ, shi wɔbaanyɛ wɔyoo esui ni nɔ bɛ lɛ kɛtsɔ e-Wiemɔ lɛ kasemɔ, edebɔɔ nibii ni wɔnaa lɛ, kɛ Ŋmalɛi lɛ anɔjwɛŋmɔ, titri lɛ Yesu Kristo ni ji Nyɔŋmɔ Bi lɛ wiemɔi kɛ nifeemɔi anɔjwɛŋmɔ, nɔ. (Yoh. 1:18; Rom. 1:20) Wɔbaanyɛ wɔkase Yehowa ni wɔjie enunyam lɛ kpo.
2 Dani Nyɔŋmɔ baabɔ Adam kɛ Hawa lɛ, no mli lɛ, eyɛ nɔmimaa akɛ adesai baanyɛ afee esuɔmɔnaa nii, amɛkase esui lɛ, ni amɛwo ehiɛ nyam. (Nyɛkanea 1 Mose 1:26, 27.) Esa akɛ wɔjie wɔ-Bɔlɔ lɛ sui akpo yɛ nibii ni wɔfeɔ kɛjáa lɛ lɛ amli. Kɛ́ wɔfee nakai lɛ, ekɔɔɔ he eko wɔkusum, wolokasemɔ ni wɔná, loo maŋ nɔ ni wɔjɛ lɛ, wɔbaaná hegbɛ kpele akɛ wɔjie Nyɔŋmɔ anunyam lɛ kpo. Mɛni hewɔ? Ejaakɛ “Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.”—Bɔf. 10:34, 35.
3. Beni Kristofoi sɔmɔɔ Yehowa lɛ, te amɛbaanyɛ amɛnu he amɛha tɛŋŋ?
3 Kristofoi ni afɔ amɛ mu lɛ jieɔ Yehowa anunyam lɛ kpo. No hewɔ lɛ, bɔfo Paulo ni ji amɛteŋ mɔ kome lɛ ŋma akɛ: “Wɔ fɛɛ, beni wɔkɛ hiɛ ni ahàko nɔ jieɔ Yehowa anunyam lɛ kpo tamɔ ashwishwɛ lɛ, atsakeɔ wɔ kɛyaa nakai subaŋ lɛ nɔŋŋ mli kɛjɛɔ anunyam mli kɛyaa anunyam mli.” (2 Kor. 3:18, NW) Beni gbalɔ Mose hiɛ tɛi ni akpɛ́ Kitai Nyɔŋma lɛ yɛ nɔ ni ekpelekeɔ Sinai Gɔŋ lɛ, akɛni Yehowa kɛ lɛ ewie hewɔ lɛ, ehiɛ kpɛ́. (2 Mose 34:29, 30) Eyɛ mli akɛ Kristofoi nako niiashikpamɔ ni tamɔ nakai, ni amɛhiɛ kpɛ́ɛɛ moŋ, shi kɛ́ amɛmiishiɛ Yehowa, esui lɛ, kɛ eyiŋtoo kɛha adesai ni nɔ bɛ lɛ amɛmiitsɔɔ mɛi lɛ, amɛhiɛ feɔ ŋmɔlɔŋmɔlɔ. No hewɔ lɛ, mɛi ni afɔ amɛ mu lɛ, kɛ amɛnanemɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ jieɔ Yehowa anunyam lɛ kpo yɛ amɛshihilɛ kɛ amɛsɔɔmɔ nitsumɔ lɛ mli tamɔ blema ashwishwɛi ni ji dadei shwɛtɛi ni asha amɛnɔ kaŋkaŋ lɛ. (2 Kor. 4:1) Ani okɛ ojeŋba kpakpa kɛ Maŋtsɛyeli shiɛmɔ nitsumɔ lɛ ni otsuɔ lɛ daa lɛ miijie Yehowa anunyam lɛ kpo?
WƆMIISUMƆ NI WƆJIE YEHOWA ANUNYAM LƐ KPO
4, 5. (a) Taakɛ eba lɛ yɛ Paulo gbɛfaŋ lɛ, mɛɛ mpleshii yaa nɔ yɛ wɔmli? (b) Te esha ená wɔnɔ hewalɛ eha tɛŋŋ?
4 Akɛ Yehowa tsuji lɛ, ŋwanejee ko bɛ he akɛ, wɔmiisumɔ ni wɔwo wɔ-Bɔlɔ lɛ hiɛ nyam yɛ nɔ fɛɛ nɔ ni wɔfeɔ lɛ mli. Shi bei pii lɛ, jeee nɔ ni wɔshweɔ lɛ ji nɔ ni wɔfeɔ. Paulo hu ná enɛ mli niiashikpamɔ. (Nyɛkanea Romabii 7:21-25.) Beni Paulo tsɔɔ nɔ hewɔ ni ebaa lɛ nakai lɛ mli lɛ, eŋma akɛ: “Mɛi fɛɛ efee esha, ni Nyɔŋmɔ anunyam lɛ ebɔ amɛ.” (Rom. 3:23) Hɛɛ, akɛni adesai ji eshafeelɔ Adam shwiei hewɔ lɛ, amɛtsɔmɔ ‘Maŋtsɛ Esha’ nyɔji.—Rom. 5:12; 6:12.
5 Mɛni ji esha? Eji nɔ fɛɛ nɔ ni kɛ Yehowa sui lɛ, egbɛi lɛ, etaomɔ nii lɛ, kɛ esuɔmɔnaa nii kpãaa gbee. Esha fiteɔ mɔ kɛ Nyɔŋmɔ teŋ wekukpaa. Esha haaa wɔshɛ oti lɛ he, taakɛ gaitsɛlɔ ko baanyɛ atsɛ̃ gaimlibi ko shi eyamaŋ oti ni ma ehiɛ lɛ nɔ lɛ. Wɔbaanyɛ wɔfee esha ni wɔje gbɛ loo wɔjeee gbɛ. (4 Mose 15:27-31) Esha náa adesai anɔ hewalɛ waa, ni egbalaa amɛ kɛ amɛ-Bɔlɔ lɛ teŋ. (Lala 51:7; Yes. 59:2; Kol. 1:21) No hewɔ lɛ, adesai ateŋ kpotoo kɛ Yehowa teŋ egbala, ni amɛnáaa hegbɛ ni nɔ bɛ akɛ amɛjie Nyɔŋmɔ anunyam lɛ kpo. Ekã shi faŋŋ akɛ, adesai afatɔɔ ni ehiii kwraa lɛ ji esha.
6. Eyɛ mli akɛ afɔ wɔ yɛ esha mli moŋ, shi mɛni hewɔ wɔbaanyɛ wɔwo Nyɔŋmɔ hiɛ nyam lɛ?
6 Eyɛ mli akɛ afɔ wɔ yɛ esha mli moŋ, shi Yehowa etsɔɔ akɛ eji “Nyɔŋmɔ ni haa anáa hiɛnɔkamɔ.” (Rom. 15:13, NW) Ekɛ nɔ ni abaadamɔ nɔ ajie esha kɛya lɛ eha—Yesu Kristo kpɔmɔ afɔle lɛ. Kɛ́ wɔkɛ wɔnifeemɔi tsɔɔ akɛ wɔyɛ afɔle nɛɛ mli hemɔkɛyeli lɛ, no tsɔɔ akɛ ‘wɔsɔmɔɔɔ esha dɔŋŋ,’ shi moŋ wɔbaanyɛ wɔjie Yehowa anunyam lɛ kpo. (Rom. 5:19; 6:6; Yoh. 3:16) Kɛ́ wɔtee nɔ wɔha wekukpaa kpakpa hi wɔ kɛ Nyɔŋmɔ teŋ lɛ, bɔ fɛɛ bɔ ni fee lɛ, Yehowa baajɔɔ wɔ amrɔ nɛɛ, ni kɛfata he lɛ, ebaaha wɔye emuu ni wɔhi shi kɛya naanɔ wɔsɛɛ. Eyɛ mli akɛ esha yɛ wɔhe lolo moŋ, shi kwɛ hegbɛ kpele ni eji akɛ Nyɔŋmɔ naa wɔ akɛ aŋkroaŋkroi ni baanyɛ ajie enunyam lɛ kpo!
BƆ NI WƆƆFEE WƆJIE NYƆŊMƆ ANUNYAM LƐ KPO
7. Mɛni esa akɛ wɔkpɛlɛ nɔ bɔni afee ni wɔnyɛ wɔjie Nyɔŋmɔ anunyam lɛ kpo?
7 Ja wɔyɔse wɔgbɔjɔmɔi jogbaŋŋ dani wɔbaanyɛ wɔjie Nyɔŋmɔ anunyam lɛ kpo. (2 Kron. 6:36) Esa akɛ wɔkpɛlɛ nɔ akɛ wɔyɛ gbɔjɔmɔi nɛɛ ni wɔbɔ mɔdɛŋ wɔye amɛnɔ bɔni afee ni wɔnyɛ wɔwo Nyɔŋmɔ hiɛ nyam. Akɛ nɔkwɛmɔnɔ lɛ, kɛ́ wɔkwɛɔ, wɔkaneɔ loo wɔboɔ nibii ni teɔ bɔlɛnamɔ henumɔi ashi lɛ toi lɛ, belɛ wɔmiifee nɔ ko ni wooo Nyɔŋmɔ hiɛ nyam, ni eji esha, no hewɔ lɛ esa akɛ wɔkpɛlɛ nɔ akɛ mumɔŋ yelikɛbuamɔ he miihia wɔ—ni wɔbi ni aye abua wɔ. (Yak. 5:14, 15) Kɛ́ wɔmiisumɔ lɛɛlɛŋ akɛ wɔwo Nyɔŋmɔ hiɛ nyam lɛ, belɛ enɛ ji nɔ klɛŋklɛŋ ni esa akɛ wɔfee. Akɛ Yehowa jálɔi lɛ, esa akɛ wɔpɛi wɔmli daa wɔkwɛ akɛ wɔshɛɔ ejalɛ taomɔ nii lɛ ahe lo. (Abɛi 28:18; 1 Kor. 10:12) Ekɔɔɔ he eko nɔ gbɔjɔmɔi ni wɔyɔɔ lɛ, esa akɛ wɔya nɔ wɔye nɔ koni wɔnyɛ wɔjie Nyɔŋmɔ anunyam lɛ kpo.
8. Eyɛ mli akɛ wɔyeee emuu moŋ, shi mɛni esa akɛ wɔfee?
8 Yesu pɛ ji adesa ni ehi shi pɛŋ ni fee nibii ni saa Nyɔŋmɔ hiɛ be fɛɛ be ni jie Nyɔŋmɔ anunyam lɛ kpo kɛmɔ shi. Akɛ mɛi ni tamɔɔɔ Yesu lɛ, wɔyeee emuu, shi wɔbaanyɛ wɔkase lɛ, ni esa akɛ wɔbɔ mɔdɛŋ wɔnyiɛ enanemaahei lɛ asɛɛ. (1 Pet. 2:21) Yehowa ŋmɛɔ mɔdɛŋ ni wɔbɔɔ kɛ tsakemɔi kpakpai ni wɔfeɔ lɛ ekwɛɔ, ni ejɔɔ mɔdɛŋ ni wɔbɔɔ koni wɔwo ehiɛ nyam lɛ nɔ.
9. Mɛɛ gbɛ nɔ Biblia lɛ yeɔ ebua Kristofoi ni miisumɔ ni amɛshɛ Nyɔŋmɔ taomɔ nii ahe lɛ?
9 Yehowa Wiemɔ lɛ baanyɛ akpɛ́ gbɛ ni wɔnyiɛ nɔ lɛ nɔ koni wɔfee tsakemɔi kpakpai. Esa akɛ wɔkase Ŋmalɛi lɛ jogbaŋŋ, ni wɔjwɛŋ nibii ni wɔkaneɔ yɛ Biblia lɛ mli lɛ anɔ. (Lala 1:1-3) Ŋmalɛi lɛ ni wɔɔkane daa gbi lɛ baaye abua wɔ koni wɔfee tsakemɔi kpakpai. (Nyɛkanea Yakobo 1:22-25.) Biblia mli nilee wajeɔ wɔhemɔkɛyeli, ni ehaa wɔfaishitswaa akɛ wɔbaatsi wɔhe kɛjɛ esha ni yɔɔ hiɛdɔɔ he koni wɔsa Yehowa hiɛ lɛ mli waa.—Lala 119:11, 47, 48.
10. Mɛɛ gbɛ nɔ sɔlemɔ baanyɛ aye abua wɔ koni wɔsɔmɔ Yehowa jogbaŋŋ kɛmɔ shi?
10 Kɛ́ wɔmiisumɔ ni wɔjie Nyɔŋmɔ anunyam lɛ kpo lɛ, esa akɛ ‘wɔhiɛ sɔlemɔ’ hu “mli daa.” (Rom. 12:12) Wɔbaanyɛ wɔsɔle koni Yehowa aye abua wɔ ni wɔsɔmɔ lɛ yɛ gbɛ ni ekpɛlɛɔ nɔ lɛ nɔ, ni esa akɛ wɔfee nakai. Belɛ, wɔbaanyɛ wɔbi ni eha wɔ mumɔ krɔŋkrɔŋ, ewaje wɔhemɔkɛyeli lɛ, eha wɔ nyɛmɔ ni wɔkɛye shwelɛ ni wɔnáa akɛ wɔfee efɔŋ lɛ nɔ, koni agbɛnɛ hu wɔnyɛ ‘wɔja anɔkwale wiemɔ lɛ mli pɛpɛɛpɛ.’ (2 Tim. 2:15; Mat. 6:13; Luka 11:13; 17:5) Taakɛ gbekɛbii kɛ amɛhiɛ fɔ̃ɔ amɛtsɛmɛi anɔ lɛ, esa akɛ wɔ hu wɔkɛ wɔhiɛ afɔ̃ Yehowa, wɔŋwɛi Tsɛ lɛ nɔ. Kɛ́ wɔbi lɛ koni eye ebua wɔ koni wɔsɔmɔ lɛ jogbaŋŋ lɛ, wɔbaanyɛ wɔná nɔmimaa akɛ ebaafee nakai. Wɔkanu he kɔkɔɔkɔ akɛ wɔsɔlemɔi baaha wɔhe afee lɛ ahuntoo! Moŋ lɛ, kɛ́ wɔmiisɔle lɛ, nyɛhaa wɔjiea eyi, wɔdaa lɛ shi, wɔtaoa gbɛtsɔɔmɔ kɛjɛa edɛŋ, titri lɛ kɛ́ wɔkɛ shihilɛ ni mli wa miikpe, ni wɔbi ni eye ebua wɔ koni wɔsɔmɔ lɛ yɛ gbɛi ni baawo egbɛ́i krɔŋkrɔŋ lɛ hiɛ nyam lɛ anɔ.—Lala 86:12; Yak. 1:5-7.
11. Mɛɛ gbɛ nɔ asafoŋ kpeei yeɔ ebuaa wɔ koni wɔnyɛ wɔjie Nyɔŋmɔ anunyam lɛ kpo?
11 Nyɔŋmɔ kɛ sɔ̃ efɔ̃ “tsulɔ anɔkwafo kɛ nilelɔ” lɛ nɔ koni ekwɛ etooi ni jara wa lɛ anɔ. (Mat. 24:45-47; Lala 100:3) Ekã tsulɔ kuu lɛ tsui nɔ waa akɛ eye ebua enyɛmimɛi Kristofoi lɛ koni amɛjie Yehowa anunyam lɛ kpo. Taakɛ wɔkɛ wɔtade ko haa nikpɛlɔ koni esaa he ni esa wɔ jogbaŋŋ lɛ, nakai nɔŋŋ ákɛ Nyɔŋmɔ sɔɔlɔi ni ji Kristofoi lɛ, asaa wɔ yɛ wɔkpeei lɛ ashishi. (Heb. 10:24, 25) Belɛ, nyɛhaa wɔyashɛa jɛmɛ yɛ be naa, ejaakɛ kɛ́ wɔha sɛɛkpee fee wɔsu lɛ, nibii ni akɛsaa wɔ yɛ mumɔŋ koni wɔnyɛ wɔfee tsakemɔi kpakpai akɛ Yehowa tsuji lɛ ekomɛi baaŋmɛɛ wɔ.
NYƐHAA WƆKASEA NYƆŊMƆ
12. Te wɔɔfeee tɛŋŋ wɔkase Nyɔŋmɔ?
12 Ja ‘wɔkaseɔ Nyɔŋmɔ’ dani wɔbaanyɛ wɔjie Yehowa anunyam lɛ kpo. (Efe. 5:1, Ga Biblia hee) Gbɛi ni wɔtsɔɔ nɔ wɔkaseɔ Yehowa lɛ ateŋ ekome ji, ni wɔná susumɔi ni ehiɛ yɛ saji ahe lɛ eko. Kɛ́ wɔkɔ gbɛ kroko lɛ, no baatsɔɔ akɛ wɔwooo ehiɛ nyam, ni no ehiii haaa wɔ. Akɛni jeŋ ni wɔyɔɔ mli lɛ yɛ mɔ fɔŋ lɛ, Satan Abonsam, kudɔmɔ shishi hewɔ lɛ, esa akɛ wɔbɔ mɔdɛŋ fɛɛ ni wɔɔnyɛ koni wɔná nyɛɛ wɔha nibii ni Yehowa nyɛɔ lɛ, ni wɔná suɔmɔ ni mli wa wɔha nibii ni esumɔɔ lɛ. (Lala 97:10; 1 Yoh. 5:19) Esa akɛ wɔná nɔmimaa kwraa akɛ, ja wɔfeɔ wɔnii fɛɛ kɛwoɔ Nyɔŋmɔ hiɛ nyam dani wɔbaanyɛ wɔkɛɛ akɛ wɔmiisɔmɔ lɛ yɛ gbɛ ni sa nɔ.—Nyɛkanea 1 Korintobii 10:31.
13. Mɛni hewɔ esa akɛ wɔnyɛ esha, ni kɛ́ wɔfee nakai lɛ, mɛni no baatsirɛ wɔ ni wɔfee?
13 Yehowa nyɛɔ esha, ni wɔ hu esa akɛ wɔfee nakai. Anɔkwa, esa akɛ wɔtsi wɔhe kwraa kɛjɛ nibii ni baanyɛ aha wɔfee esha lɛ ahe, ni wɔkaka wɔkwɛ akɛ nɛgbɛ wɔbaanyɛ wɔye wɔhe nɔ kɛyashɛ ni wɔfeŋ esha. Akɛ nɔkwɛmɔnɔ lɛ, esa akɛ wɔkwɛ wɔhe nɔ jogbaŋŋ koni wɔkatsɔmɔ hemɔkɛyeli kwalɔi, ejaakɛ nakai feemɔ baatsɔɔ akɛ wɔwooo Nyɔŋmɔ hiɛ nyam dɔŋŋ. (5 Mose 13:6-9) No hewɔ lɛ, esaaa akɛ wɔkɛ hemɔkɛyeli kwalɔi loo mɔ ko ni kɛɔ akɛ nyɛmi ji lɛ, shi ewooo Nyɔŋmɔ hiɛ nyam lɛ náa nɔ ko feemɔ kwraa. Esaaa akɛ wɔkɛ amɛ náa nɔ ko feemɔ kɛ́ amɛji wɔweku mli bii po. (1 Kor. 5:11) Kɛ́ wɔbɔ mɔdɛŋ akɛ wɔɔku hemɔkɛyeli kwalɔi loo mɛi ni wieɔ amɛshiɔ Yehowa asafo lɛ naa lɛ, no yeŋ ebuaŋ wɔ. Anɔkwa, esaaa akɛ wɔpɛiɔ amɛsaji amli, kɛ́ aŋmala yɛ woji amli jio, amɛyɛ Intanɛt lɛ nɔ jio, ejaakɛ nakai feemɔ kɛwɔ baawo mumɔŋ oshara mli.—Nyɛkanea Yesaia 5:20; Mateo 7:6.
14. Mɛɛ su ko esa akɛ akɛkadi wɔ waa beni wɔbɔɔ mɔdɛŋ koni wɔjie Nyɔŋmɔ anunyam lɛ kpo lɛ, ni mɛni hewɔ?
14 Gbɛi ni he hiaa fe fɛɛ ni wɔtsɔɔ nɔ wɔkaseɔ wɔŋwɛi Tsɛ lɛ ateŋ ekome ji, suɔmɔ kpojiemɔ. Hɛɛ, esa akɛ wɔjie suɔmɔ kpo taakɛ Yehowa feɔ lɛ. (1 Yoh. 4:16-19) Anɔkwa, suɔmɔ ni wɔyɔɔ kɛha wɔhe lɛ kadiɔ wɔ akɛ wɔji Yesu kaselɔi kɛ Yehowa tsuji. (Yoh. 13:34, 35) Eyɛ mli akɛ, bei komɛi lɛ, emuu ni wɔyeee lɛ baanyɛ aha nakai feemɔ awa kɛha wɔ moŋ, shi esa akɛ wɔbɔ mɔdɛŋ wɔjie suɔmɔ kpo be fɛɛ be. Kɛ́ wɔná suɔmɔ kɛ Kristofoi asui krokomɛi lɛ, ebaaye ebua wɔ koni wɔmli akajoo ni wɔkafee esha hu.—2 Pet. 1:5-7.
15. Mɛɛ gbɛ nɔ suɔmɔ náa bɔ ni wɔkɛ mɛi yeɔ haa lɛ nɔ hewalɛ?
15 Suɔmɔ haa wɔsumɔɔ akɛ wɔfee mɛi ejurɔ. (Rom. 13:8-10) Akɛ nɔkwɛmɔnɔ lɛ, suɔmɔ ni wɔyɔɔ kɛha wɔhefatalɔ lɛ haŋ wɔbule wɔgbãla saa lɛ. Suɔmɔ ni wɔyɔɔ kɛha asafoŋ onukpai lɛ, kɛ bulɛ ni wɔyɔɔ kɛha nɔ ni amɛtsuɔ lɛ baaye abua wɔ koni wɔbo amɛ toi, ni wɔkɛ amɛgbɛtsɔɔmɔi atsu nii. Bii ni sumɔɔ amɛfɔlɔi, ni amɛbuɔ amɛ lɛ egbeee amɛfɔlɔi lɛ ahe guɔ. Kɛ́ wɔsumɔɔ wɔnanemɛi adesai lɛ, wɔnaŋ wɔhe akɛ wɔnɔ kwɔlɔ fe amɛ loo wɔkɛ amɛ ewieŋ yɛ gbɛ ni bulɛ bɛ mli lɛ nɔ. (Yak. 3:9) Kɛfata he lɛ, asafoŋ onukpai ni yɔɔ suɔmɔ kɛha Nyɔŋmɔ tooi lɛ baahiɛ amɛ dɔdɔɔdɔ.—Bɔf. 20:28, 29.
16. Mɛɛ gbɛ nɔ suɔmɔ yeɔ ebuaa wɔ yɛ wɔsɔɔmɔ nitsumɔ lɛ mli?
16 Esa akɛ aná akɛ wɔkɛ suɔmɔ tsuɔ wɔsɔɔmɔ nitsumɔ lɛ hu. Suɔmɔ kpele ni wɔyɔɔ kɛha Yehowa lɛ hewɔ lɛ, kɛ́ mɛi booo wɔshiɛmɔ lɛ toi loo amɛnáaa he miishɛɛ lɛ wɔnijiaŋ ejeee wui. Moŋ lɛ, wɔyaa nɔ wɔshiɛɔ sanekpakpa lɛ. Suɔmɔ baatsirɛ wɔ koni wɔsaa wɔhe jogbaŋŋ dani wɔyashiɛ, ni wɔbɔ mɔdɛŋ wɔtsɔɔ nii jogbaŋŋ hu. Kɛ́ wɔsumɔɔ Nyɔŋmɔ kɛ wɔnaanyo gbɔmɔ lɛɛlɛŋ lɛ, wɔnaŋ Maŋtsɛyeli shiɛmɔ nitsumɔ lɛ akɛ nitsumɔ ko kɛkɛ loo akɛ eji jatsu. Moŋ lɛ, wɔbaabu lɛ akɛ hegbɛ kpele, ni wɔkɛ miishɛɛ baatsu.—Mat. 10:7.
YAA NƆ OWO YEHOWA HIƐ NYAM
17. Mɛni hewɔ kɛ́ wɔkpɛlɛ nɔ akɛ Nyɔŋmɔ anunyam lɛ ebɔ wɔ lɛ, wɔbaaná he sɛɛ lɛ?
17 Mɛi ni yɔɔ je lɛŋ lɛ ateŋ kpotoo yɔseee bɔ ni esha yɔɔ hiɛdɔɔ ha, shi wɔ lɛ wɔyɔseɔ. No hewɔ lɛ, wɔle akɛ esa akɛ wɔye esha su ni yɔɔ wɔmli lɛ nɔ. Kɛ́ wɔkpɛlɛ nɔ akɛ esha su yɛ wɔmli lɛ, no baaha wɔtsɔse wɔhenilee koni kɛ́ wɔná shwelɛ yɛ wɔjwɛŋmɔŋ kɛ wɔtsuiŋ akɛ wɔfee esha lɛ, etsirɛ wɔ ni wɔfee nɔ ni ja. (Rom. 7:22, 23) Eji anɔkwale akɛ gbedelɔi ji wɔ moŋ, shi Nyɔŋmɔ baanyɛ awaje wɔ koni wɔfee nɔ ni ja yɛ shihilɛ fɛɛ shihilɛ mli.—2 Kor. 12:10.
18, 19. (a) Mɛni yeɔ ebuaa wɔ koni wɔye kunim yɛ ta ni wɔkɛ mumɔi fɔji asafo lɛ wuɔ lɛ mli? (b) Mɛni esa akɛ efee wɔfaishitswaa?
18 Akɛni wɔmiisumɔ ni wɔwo Yehowa hiɛ nyam hewɔ lɛ, esa akɛ wɔwuu wɔshi mumɔi fɔji asafo lɛ hu. Mumɔŋ tawuu nii ni Nyɔŋmɔ kɛha wɔ lɛ baaye abua wɔ koni wɔye kunim. (Efe. 6:11-13) Satan bɔɔ mɔdɛŋ fɛɛ ni eeenyɛ bɔni afee ni eshɔ̃ anunyam ni esa akɛ akɛha Yehowa kome too lɛ kɛjɛ Yehowa dɛŋ. Abonsam bɔɔ mɔdɛŋ hu koni efite wɔ kɛ Yehowa teŋ wekukpaa lɛ. Kwɛ bɔ ni Satan nine nyɛɔ shi ehaa kɛ́ wɔ kɛ adesai akpekpei abɔ krokomɛi, hii, yei, kɛ gbekɛbii, tee nɔ wɔye Nyɔŋmɔ anɔkwa ni wɔwo ehiɛ nyam lɛ! Belɛ, nyɛhaa wɔyaa nɔ wɔjiea Yehowa yi taakɛ onukpai 24 ni yɔɔ ŋwɛi lɛ feɔ lɛ; amɛjajeɔ akɛ: “Nuŋtsɔ [Yehowa], bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔ naa amɛyɔɔ ni abɔ amɛ.”—Kpoj. 4:11.
19 Nyɛhaa wɔtswaa wɔfai shi akɛ bɔ fɛɛ bɔ ni fee lɛ, wɔbaaya nɔ wɔwo Yehowa hiɛ nyam. Ekã shi faŋŋ akɛ, kɛ́ ena bɔ ni aŋkroaŋkroi anɔkwafoi babaoo jɛɔ amɛtsuiŋ fɛɛ amɛkaseɔ lɛ ni amɛjieɔ enunyam lɛ kpo lɛ, no haa etsui nyɔɔ emli. (Abɛi 27:11) Esa akɛ wɔnu he tamɔ bɔ ni David nu he lɛ, elá akɛ: ‘Nuŋtsɔ Yehowa, mi-Nyɔŋmɔ, majie oyi kɛ mitsui fɛɛ, ni mawo ogbɛ́i lɛ hiɛ nyam kɛaatee naanɔ.’ (Lala 86:12) Kwɛ bɔ ni wɔshweɔ be ni wɔkɛaajie Yehowa anunyam lɛ kpo kɛwula shi, ni wɔjie eyi kɛya naanɔ lɛ waa! Adesai ni feɔ toi lɛ baaná hegbɛ ni yɔɔ miishɛɛ nɛɛ. Ani oojie Yehowa Nyɔŋmɔ anunyam lɛ kpo amrɔ nɛɛ kɛgbɛkpamɔ akɛ obaafee nakai kɛya naanɔi anaanɔ?
[Nikasemɔ lɛ he Sanebimɔi]
[Mfonirii ni yɔɔ baafa 27]
Oojie Yehowa anunyam lɛ kpo yɛ gbɛi nɛɛ anɔ?
