Bɔɔ Mɔdɛŋ Fɛɛ ni Ooonyɛ Kɛbaa Ogbãla lɛ Yi
Bɔɔ Mɔdɛŋ Fɛɛ ni Ooonyɛ Kɛbaa Ogbãla lɛ Yi
“Mɛi ni ebote gbalashihilɛ mli lɛ, mi, ni jeee mi tete, shi Nuŋtsɔ lɛ moŋ woɔ amɛ kitã.”—1 KOR. 7:10.
ANI OBAANYƐ OTSƆƆ MLI?
Mɛɛ shishinumɔ naa Nyɔŋmɔ ŋɔɔ gbalashihilɛ mli hefatalɔi etsaa?
Mɛɛ gbɛ nɔ asafoŋ onukpai baanyɛ aye abua Kristofoi ni kɛ gbalashihilɛ mli naagbai miikpe?
Te esa akɛ wɔna gbalashihilɛ wɔha tɛŋŋ?
1. Te Kristofoi naa gbalashihilɛ amɛhaa tɛŋŋ, ni mɛni hewɔ?
KƐ́ KRISTOFOI miibote gbalashihilɛ mli lɛ, amɛkãa Nyɔŋmɔ kitã—enɛ kɛ sɔ̃ ni yɔɔ hiɛdɔɔ bafɔ̃ɔ amɛnɔ. (Jaj. 5:4-6) Akɛni Yehowa ji gbalashihilɛ Shishitolɔ hewɔ lɛ, ‘eŋɔ nuu lɛ kɛ yoo lɛ etsa’ akɛ wu kɛ ŋa. (Mar. 10:9) Kɛ́ mla ni kudɔɔ gbãla yɛ maŋ ni amɛyɔɔ nɔ lɛ kɛɛ egu gbãla lɛ po lɛ, Nyɔŋmɔ yaa nɔ enaa amɛ akɛ wu kɛ ŋa. Kɛji Yehowa tsulɔ ko bote gbalashihilɛ mli dani ebatsɔ etsulɔ jio, ebatsɔ etsulɔ dani efee nakai jio lɛ, esa akɛ ena akɛ Yehowa eŋɔ lɛ etsa ehefatalɔ lɛ.
2. Mɛɛ sanebimɔi abaasusu he yɛ nikasemɔ nɛɛ mli?
2 Kɛ́ gbalashihilɛ ko ye omanye lɛ, anáa miishɛɛ naakpa. Shi, kɛ́ wu kɛ ŋa teŋ bɛ jogbaŋŋ lɛ, mɛni abaanyɛ afee? Ani abaanyɛ aha gbãla ni tamɔ nɛkɛ lɛ asɔ? Mɛɛ yelikɛbuamɔ yɔɔ kɛha wumɛi kɛ ŋamɛi ni toiŋjɔlɛ bɛ amɛteŋ lɛ?
ANI EBAAFEE MIISHƐƐ NƆ̃ LOO TSUIKUUMƆ NƆ̃?
3, 4. Kɛ́ mɔ ko kɛ nilee eyahalaaa egbalashihilɛ mli hefatalɔ lɛ, mɛni baanyɛ ajɛ mli kɛba?
3 Kɛ́ Kristofoi agbãla ye omanye lɛ, anáa miishɛɛ ni ewoɔ Yehowa hiɛ nyam. Shi, kɛ́ eyayeee omanye lɛ efiteɔ nii babaoo fe mɛi atsui ni aaakumɔ kɛkɛ. Kɛ́ Kristofonyo ni boteko gbalashihilɛ mli lɛ kɛ Nyɔŋmɔ gbɛtsɔɔmɔ tsu nii lɛ, ebaanyɛ eje gbalashihilɛ shishi yɛ gbɛ kpakpa nɔ. Shi, kɛ́ mɔ ko kɛ nilee eyahalaaa ewu loo eŋa lɛ, no baanyɛ aha ehao ni ewerɛ aho ehe. Akɛ nɔkwɛmɔnɔ lɛ, oblahii loo oblayei komɛi jeɔ nyiɛmɔ ni tsɔɔ gbalashihilɛ hiɛ lɛ shishi beni amɛfeko klalo kɛhako gbãla mli sɔ̃i ahe nitsumɔ. Mɛi komɛi yataoɔ gbalashihilɛ mli hefatalɔi yɛ Intanɛt lɛ nɔ, ni amɛyeɔ amɛhe oyai kɛboteɔ gbalashihilɛ mli, shi etsɛɛɛ ni amɛwerɛ hoɔ amɛhe. Mɛi komɛi hu feɔ esha ni yɔɔ hiɛdɔɔ beni amɛnyiɛɔ kɛtsɔɔ gbalashihilɛ hiɛ lɛ, kɛ́ eba lɛ nakai lɛ, amɛnáaa bulɛ kɛhaaa amɛhe. Kɛfata he lɛ, kɛ́ amɛbote gbalashihilɛ mli lɛ, amɛjeee gbãla lɛ shishi kɛ shishitoo kpakpa.
4 Kristofoi komɛi boteee gbalashihilɛ mli “yɛ Nuŋtsɔ lɛ mli,” ni no haa amɛnaa nɔ̃ naakpa akɛni amɛhefatalɔi lɛ jeee Yehowa tsuji lɛ hewɔ. (1 Kor. 7:39) Kɛ́ oyɛ shihilɛ ni tamɔ nɛkɛ mli lɛ, sɔlemɔ ni Nyɔŋmɔ kɛ ohe afa bo ni eye ebua bo. Ejieee nɔ ni jɛɔ esha ni mɔ ko efee tsutsu ko lɛ mli kɛbaa lɛ kɛyaaa, shi eyeɔ ebua mɛi ni amɛtsake amɛtsui lɛ koni amɛnyɛ amɛdamɔ shihilɛ ni mli wawai lɛ anaa. (Lala 130:1-4) Jɛɛ otsuiŋ fɛɛ osa Nyɔŋmɔ hiɛ amrɔ nɛɛ, kɛ agbɛnɛ hu kɛya naanɔ, ni ‘Yehowa he nyamɔ lɛ baawo bo hewalɛ.’—Neh. 8:10, Ga Biblia hee.
KƐ́ GBÃLA LƐ MIIHE AFITE
5. Kɛ́ miishɛɛ bɛ mɔ ko gbãla mli lɛ, mɛni esaaa akɛ esusuɔ?
5 Ekolɛ, mɛi ni bɛ miishɛɛ yɛ amɛgbãla mli lɛ baabi akɛ: ‘Ani ehe miihia ni mabaa gbãla ni miishɛɛ bɛ mli nɛɛ yi? Eji manyɛ maku sɛɛ kɛya tsutsu be lɛŋ kulɛ, mikɛ mɔ kroko baabote gbalashihilɛ mli!’ Ekolɛ, amɛbaashwie amɛyiŋ akɛ amɛbaashi amɛhefatalɔ lɛ—‘Miisumɔ koni mihe ajɔ mi ekoŋŋ! Mɛni hewɔ mibiii ni wɔtse gbãla? Kɛ́ minyɛɛɛ matse gbãla bɔ ni Ŋmalɛ lɛ kpɛlɛɔ nɔ po lɛ, mɛni hewɔ wɔgbalaaa mli koni maná miishɛɛ ekoŋŋ?’ Nɔ najiaŋ ni Kristofonyo ko ni yɔɔ shihilɛ ni tamɔ nɛkɛ mli lɛ aaashwie eyiŋ nɛkɛ loo eeesusu bɔ ni kulɛ shihilɛ lɛ baaji lɛ he lɛ, esa akɛ ebɔ mɔdɛŋ etao Nyɔŋmɔ gbɛtsɔɔmɔ ni ekɛtsu shihilɛ lɛ he nii.
6. Mɛni Yesu wiemɔi ni yɔɔ Mateo 19:9 lɛ tsɔɔ?
6 Kɛ́ Kristofonyo ko tse gbãla lɛ, ja gbalatsemɔ lɛ damɔ Ŋmalɛ nɔ dani ebaanyɛ ebote gbalashihilɛ mli ekoŋŋ. Yesu kɛɛ akɛ: “Mɔ fɛɛ mɔ ni jeee ajwamaŋbɔɔ hewɔ jɛ ni eeeshwie eŋa ni eyawɛ yoo kroko lɛ, efite gbala.” (Mat. 19:9) “Ajwamaŋbɔɔ” ni atsĩ tã yɛ ŋmalɛ nɛɛ mli lɛ kɔɔ gbalafitemɔ kɛ bɔlɛnamɔ eshai krokomɛi ni yɔɔ hiɛdɔɔ lɛ ahe. Belɛ, kɛ́ gbalashihilɛ mli hefatalɔi lɛ ateŋ mɔ ko ebɔko ajwamaŋ, shi wu lɛ loo ŋa lɛ miishwie eyiŋ akɛ ebaatse gbãla lɛ, ehe miihia waa ni ekɛ sɔlemɔ asusu he.
7. Kɛ́ Kristofoi agbãla ko eyayeee omanye lɛ, mɛni mɛi baasusu?
7 Kɛ́ gbalashihilɛ ko eyayeee omanye lɛ, no baanyɛ atsɔɔ akɛ wu lɛ loo ŋa lɛ loo mɛi enyɔ lɛ fɛɛ kɛ Yehowa teŋ bɛ jogbaŋŋ. Bɔfo Paulo bi sane ni yɔɔ hiɛdɔɔ nɛɛ akɛ: “Kɛ́ mɔ ko leee lɛ diɛŋtsɛ ewe nɔ yeli lɛ, té eeefee tɛŋŋ ekwɛ Nyɔŋmɔ asafo lɛ huŋ?” (1 Tim. 3:5) Anɔkwa, kɛ́ wu kɛ ŋa lɛ fɛɛ tsɛɔ amɛhe Kristofoi, ni kɛlɛ amɛgbãla lɛ eyayeee omanye lɛ, mɛi baasusu akɛ amɛkɛ nɔ ni amɛshiɛɔ lɛ tsuuu nii.—Rom. 2:21-24.
8. Kɛ́ wu kɛ ŋa ni ji Yehowa Odasefoi kpɛ mli akɛ amɛbaagbala mli loo amɛbaatse gbãla lɛ, mɛni ekolɛ etɔ̃tɔ̃?
8 Kɛ́ wu kɛ ŋa ni ji Yehowa Odasefoi lɛ miisusu he akɛ amɛgbala mli loo amɛtse gbãla ni damɔɔɔ Ŋmalɛ nɔ lɛ, belɛ nɔ ko kɛ̃ etɔ̃tɔ̃ yɛ amɛ kɛ Yehowa teŋ wekukpaa lɛ mli. Eeenyɛ efee akɛ amɛteŋ mɔ kome loo mɛi enyɔ lɛ fɛɛ kɛ Ŋmalɛ mli shishitoo mlai tsuuu nii. Kɛ́ amɛkɛ ‘amɛhiɛ fɔ̃ɔ Yehowa nɔ kɛ amɛtsui fɛɛ’ lɛɛlɛŋ lɛ, nɔ ko bɛ ni baaha wɔhe wɔye akɛ amɛnyɛŋ amɛbaa gbãla lɛ yi.—Nyɛkanea Abɛi 3:5, 6.
9. Mɛɛ gbɛ nɔ Kristofoi komɛi ni to amɛtsui shi yɛ amɛgbãla mli lɛ eye omanye?
9 Gbalashihilɛi babaoo ni fee tamɔ eyeŋ omanye lɛ sɔ jogbaŋŋ sɛɛ mli. Bei pii lɛ, Kristofoi ni miiná naagbai yɛ amɛgbãla mli, shi amɛyeee oyai kɛgbala mli loo kɛtse gbãla lɛ yeɔ omanye. Akɛ nɔkwɛmɔnɔ lɛ, susumɔ nɔ ni baanyɛ aba kɛ́ wu lɛ jeee Odasefonyo lɛ he okwɛ. Bɔfo Petro ŋma akɛ: ‘Nyɛ yeigbayei lɛ, nyɛbaa nyɛhe shi nyɛhaa nyɛ diɛŋtsɛ nyɛwumɛi lɛ, koni, kɛ́ mɛi komɛi booo wiemɔ lɛ toi tete lɛ, ashi wiemɔ lɛ sɛɛ ni atsɔ yei lɛ ajeŋba nɔ ni nine ashɛ amɛnɔ, ejaakɛ amɛnaa nyɛjeŋba ni hetsemɔ kɛ gbeyeishemɔ yɔɔ mli lɛ.’ (1 Pet. 3:1, 2) Hɛɛ, wu ni jeee Odasefonyo lɛ baanyɛ amɔ anɔkwale lɛ mli kɛ́ eŋa ba ejeŋ jogbaŋŋ! Kɛ́ abaa gbãla ni tamɔ nɛkɛ yi lɛ, ewoɔ Nyɔŋmɔ hiɛ nyam ni efeɔ jɔɔmɔ kpele kɛhaa wu lɛ, ŋa lɛ, kɛ bii ni ekolɛ amɛyɔɔ lɛ.
10, 11. Mɛɛ naagbai ni akpaaa gbɛ baanyɛ ate shi yɛ gbalashihilɛ mli, shi mɛni Kristofonyo baanyɛ aná nɔmimaa yɛ he?
10 Kristofoi ni boteko gbalashihilɛ mli lɛ ateŋ babaoo halaa Kristofoi ni abaptisi amɛ lɛ akɛ amɛgbalashihilɛ mli hefatalɔi ejaakɛ amɛmiisumɔ ni amɛsa Yehowa hiɛ. Kɛlɛ, amɛbaanyɛ amɛkɛ shihilɛi ni amɛkpaaa gbɛ akpe. Akɛ nɔkwɛmɔnɔ lɛ, eyɛ mli akɛ efɔɔɔ kaa moŋ, shi wu lɛ loo ŋa lɛ baanyɛ aye sɛkɛ. Aloo be ko yɛ yookpeemɔ lɛ sɛɛ lɛ, wu lɛ loo ŋa lɛ baanyɛ akpa shiɛmɔyaa. Naa sane ko ni kɔɔ shihilɛ nɛɛ he: Linda * ni eji Odasefonyo ko ni yɔɔ ekãa ni dɔɔ ebii ahe waa lɛ fee shwɛm beni ewu ni abaptisi lɛ lɛ bɔi efɔŋfeemɔ lɛ. Ewu lɛ tsakeee etsui ni no hewɔ lɛ ashwie lɛ kɛjɛ asafo lɛ mli. Kɛ́ Kristofonyo ko gbalashihilɛ fee tamɔ Linda nɔ̃ nɛɛ, mɛni esa akɛ efee?
11 Ekolɛ obaabi akɛ: ‘Ani esa akɛ mabɔ mɔdɛŋ mabaa migbãla lɛ yi, ekɔɔɔ he eko shihilɛ ni mikɛkpeɔ lɛ?’ Mɔ ko nyɛŋ akpɛ nɛkɛ yiŋ eha bo, ni esaaa akɛ mɔ ko feɔ nakai hu. Fɛɛ sɛɛ lɛ, yiŋtoi kpakpai komɛi ahewɔ ni kɛ́ okɛ ohefatalɔ lɛ teŋ bɛ jogbaŋŋ po lɛ, esaaa akɛ nyɛgbalaa mli loo nyɛtseɔ gbãla lɛ. Nuu loo yoo ni sheɔ Nyɔŋmɔ gbeyei ni bɔɔ mɔdɛŋ edamɔɔ gbãla ni naagbai yɔɔ mli lɛ naa yɛ ehenilee hewɔ lɛ jara wa yɛ Nyɔŋmɔ hiɛ. (Nyɛkanea 1 Petro 2:19, 20.) Yehowa baatsɔ e-Wiemɔ lɛ kɛ emumɔ lɛ nɔ eye ebua Kristofonyo ni feɔ bɔ fɛɛ bɔ ni eeenyɛ koni ewaje egbãla lɛ.
AMƐFEE KLALO AKƐ AMƐAAYE AMƐBUA
12. Kɛ́ wɔbi ni asafoŋ onukpai lɛ aye abua wɔ lɛ, te amɛbaana wɔ amɛha tɛŋŋ?
12 Kɛ́ okɛ naagbai miikpe yɛ ogbalashihilɛ lɛ mli lɛ, kaashashao shi akɛ oootao yelikɛbuamɔ kɛjɛ Kristofoi ni edara yɛ mumɔŋ lɛ adɛŋ. Asafoŋ onukpai lɛ sɔmɔɔ akɛ Nyɔŋmɔ tooku lɛ nɔkwɛlɔi, ni amɛyɛ he miishɛɛ akɛ amɛaagbala ojwɛŋmɔ kɛya Ŋmalɛŋ ŋaawoo nɔ. (Bɔf. 20:28; Yak. 5:14, 15) Kaamu sane naa akɛ, kɛ́ oyabi mumɔŋ yelikɛbuamɔ kɛjɛ asafoŋ onukpai lɛ aŋɔɔ, ni okɛ amɛ susu nyɛgbalashihilɛ mli naagbai ni yɔɔ hiɛdɔɔ lɛ ahe lɛ, bulɛ ni amɛyɔɔ kɛha bo kɛ ohefatalɔ lɛ baatã. Bulɛ kɛ suɔmɔ ni amɛyɔɔ kɛha bo lɛ baaya hiɛ waa ejaakɛ amɛbaana akɛ oosumɔ ni osa Nyɔŋmɔ hiɛ lɛɛlɛŋ.
13. Mɛɛ ŋaawoo akɛha yɛ 1 Korintobii 7:10-16?
13 Kɛ́ Kristofoi ni hefatalɔi jeee Odasefoi lɛ bi asafoŋ onukpai lɛ koni amɛye amɛbua amɛ lɛ, amɛkɛ ŋaawoi tamɔ nɔ ni Paulo kɛha nɛɛ tsuɔ nii akɛ: “Shi mɛi ni ebote gbalashihilɛ mli lɛ, mi, ni jeee mi tete, shi Nuŋtsɔ lɛ moŋ woɔ amɛ kita akɛ, ŋa akatse ewu gbãla; ni kɛji etse gbãla [loo ekɛ lɛ gbala mli] tete lɛ, ehi shi nakai, ni ekagbã, aloo ekɛ ewu lɛ ayakpata; ni wu lɛ hu akaŋmɛɛ eŋa he. . . . Shi, yoo, bo obaahere owu lɛ yiwala jiŋŋ, ole? Aloo nuu, bo hu obaahere oŋa lɛ yiwala jiŋŋ, ole?” (1 Kor. 7:10-16) Kwɛ jɔɔmɔ ni ebaaji kɛ́ wu loo ŋa ni jeee Odasefonyo lɛ batsɔ Yehowa tsulɔ!
14, 15. Mɛɛ shihilɛi komɛi amli ekolɛ wu loo ŋa ni abaptisi lɛ lɛ baasusu mligbalamɔ he, shi mɛni hewɔ esa akɛ ekɛ sɔlemɔ apɛi yiŋtoi ahewɔ ni eetao ekpɛ eyiŋ nakai lɛ amli jogbaŋŋ lɛ?
14 Mɛɛ shihilɛi komɛi amli ekolɛ ŋa Kristofonyo baasusu akɛ ‘ekɛ ewu agbala mli’? Akɛ nɔkwɛmɔnɔ lɛ, ŋamɛi komɛi kɛ amɛwumɛi gbalaa mli akɛni wumɛi lɛ jeɔ gbɛ amɛkwɛɛɛ amɛtsiabo lɛ hewɔ. Mɛi krokomɛi feɔ nakai akɛni wumɛi lɛ feɔ amɛ niseniianii aahu akɛ amɛwala he baa oshara, loo wumɛi lɛ haaa amɛná gbɛ kwraa kɛsɔmɔ Nyɔŋmɔ lɛ hewɔ.
15 Wu loo ŋa lɛ ji mɔ ni baakpɛ eyiŋ kɛji ekɛ ehefatalɔ lɛ baagbala mli loo efeŋ nakai. Kɛlɛ, esa akɛ hefatalɔ ni abaptisi lɛ lɛ kɛ sɔlemɔ ajwɛŋ sane lɛ nɔ jogbaŋŋ, ni epɛi yiŋtoi ahewɔ ni eetao ekpɛ eyiŋ nakai lɛ amli jogbaŋŋ. Akɛ nɔkwɛmɔnɔ lɛ, ani hefatalɔ ni jeee Odasefonyo lɛ ji mɔ pɛ ni abaanyɛ ashwa akɛ mɔ ni haaa nyɛmi lɛ anyɛ asɔmɔ Yehowa, loo nyɛmi lɛ diɛŋtsɛ hu ekaseee Biblia lɛ, efolɔɔ kpeei amli, ni efɔɔɔ shiɛmɔyaa?
16. Mɛni hewɔ esaaa akɛ Kristofoi yeɔ amɛhe oyai kɛkpɛɔ amɛyiŋ yɛ gbalatsemɔ he lɛ?
16 Wɔhiɛ ni sɔɔ wekukpaa ni kã wɔ kɛ Nyɔŋmɔ teŋ lɛ, kɛ enikeenii ni ji gbalashihilɛ lɛ jogbaŋŋ hewɔ lɛ, esaaa akɛ wɔyeɔ wɔhe oyai kɛkpɛɔ wɔyiŋ yɛ gbalatsemɔ he. Akɛ Yehowa tsuji lɛ, nɔ ni kã wɔtsui nɔ waa ji egbɛ́i krɔŋkrɔŋ lɛ hetsemɔ. Belɛ, wɔsumɔŋ akɛ wɔɔkpaŋ kɛfite gbãla bɔni afee ni wɔnyɛ wɔkɛ mɔ kroko abote gbalashihilɛ mli.—Yer. 17:9; Mal. 2:13-16.
17. Mɛɛ be abaanyɛ akɛɛ akɛ hejɔlɛ mli Nyɔŋmɔ etsɛ́ Kristofoi ni ebote gbalashihilɛ mli lɛ?
17 Esa akɛ Kristofoi ni hefatalɔi jeee Odasefoi lɛ afee bɔ fɛɛ bɔ ni amɛaanyɛ kɛwaje amɛgbãla lɛ. Shi, kɛ́ Kristofonyo ko fee bɔ fɛɛ bɔ ni eeenyɛ koni ebaa egbãla lɛ yi, shi ehefatalɔ ni jeee Odasefonyo lɛ kpoo akɛ ekɛ lɛ aaahi shi lɛ, esaaa akɛ eshwaa ehe. Paulo ŋma akɛ: “Kɛ́ mɔ ni heee yeee lɛ miigbala ehe shi kɛmiiya lɛ, ha ni eya; ayeee nyɛmi nuu loo nyɛmi yoo nyɔŋ yɛ nɛkɛ saji nɛɛ amli. Shi hejɔlɛ mli Nyɔŋmɔ tsɛ́ wɔ yɛ.”—1 Kor. 7:15. *
KWƐMƆ YEHOWA GBƐ
18. Kɛ́ mɔ ko bɔ mɔdɛŋ akɛ eeebaa egbãla yi, shi eyayeee omanye po lɛ, mɛɛ nibii kpakpai baanyɛ ajɛ mli kɛba?
18 Kɛ́ okɛ naagbai miikpe yɛ gbalashihilɛ mli lɛ, esa akɛ osɔle obi Yehowa ni ewaje bo, ni okwɛ lɛ gbɛ be fɛɛ be. (Nyɛkanea Lala 27:14.) Susumɔ Linda ni awie ehe kɛtsɔ hiɛ lɛ he ekoŋŋ okwɛ. Eyɛ mli akɛ ekɛ afii babaoo bɔ mɔdɛŋ koni ebaa egbãla lɛ yi moŋ, shi yɛ naagbee lɛ gbãla lɛ tse. Ani enuɔ he akɛ emɔdɛŋbɔɔ lɛ efee efolo? Ekɛɛ akɛ: “Kɔkɔɔkɔ. Mimɔdɛŋbɔi lɛ ye mɛi ni le sane lɛ he nɔ ko lɛ odase jogbaŋŋ. Mihenilee gbaaa minaa. Nɔ ni fe fɛɛ lɛ, no ye ebua wɔbi yoo lɛ yɛ nakai afii lɛ amli ni enyɛ efi shi shiŋŋ yɛ anɔkwale lɛ mli. Ebatsɔ Yehowa Odasefonyo ni ejɔɔ ehe nɔ ni yɔɔ ekãa.”
19. Kɛ́ mɔ ko bɔ mɔdɛŋ koni ebaa egbãla yi lɛ, mɛni baanyɛ ajɛ mli kɛba?
19 Nyɛmi yoo ko ni atsɛɔ lɛ Marilyn lɛ mii shɛɔ ehe waa akɛ ekɛ ehe fɔ̃ Nyɔŋmɔ nɔ ni ebɔ mɔdɛŋ waa koni ebaa egbãla lɛ yi. Ekɛɛ akɛ: “Akɛni miwu kwɛɛɛ mitsiabo, ni agbɛnɛ hu ehaaa manyɛ masɔmɔ Nyɔŋmɔ hewɔ lɛ, mika akɛ mikɛ lɛ baagbala mli. Shi no mli lɛ, miwu sɔmɔɔ akɛ asafoŋ onukpa dani ekɛ ehe yawo nitsumɔ mli nifeemɔi komɛi ni esaaa amli. Ebɔi asafoŋ kpeei amli folɔmɔ, ni sanegbaa ni yaa nɔ yɛ wɔteŋ lɛ sɛɛ bafo kwraa. Awuiyeli nifeemɔ ko (terrorism) ni tee nɔ yɛ maŋtiase mli ni wɔyɔɔ lɛ fã mitsui aahu akɛ ebawa kɛha mi akɛ mikɛ mɛi baabɔ. No sɛɛ lɛ, mihɛle shi akɛ mi hu mifata he ni nibii eyaaa lɛ jogbaŋŋ yɛ gbãla lɛ mli lɛ. Wɔkɛ wɔhe bɔi sanegbaa, wɔje wɔweku nikasemɔ lɛ shishi ekoŋŋ, ni wɔkpa kpeei amli folɔmɔ. Asafoŋ onukpai lɛ jie mlihilɛ kpo amɛtsɔɔ wɔ ni amɛye amɛbua wɔ waa. Wɔgbãla lɛ basɔ jogbaŋŋ oookɛɛ kpaako kwraa wɔbote mli. Sɛɛ mli lɛ, miwu basa ekoŋŋ kɛha asafoŋ sɔɔmɔ hegbɛi. Ejeee niiashikpamɔ ni yɔɔ miishɛɛ, shi ewo yibii kpakpai.”
20, 21. Mɛɛ fai shi esa akɛ wɔtswa yɛ gbalashihilɛ he?
20 Kɛ́ wɔji oshijafoi loo gbalashihilɛ mli hefatalɔi lɛ, nyɛhaa wɔfea ekãa ni wɔkwɛ Yehowa gbɛ be fɛɛ be. Kɛ́ wɔkɛ naagbai miikpe yɛ wɔgbãla mli lɛ, esa akɛ wɔbɔ mɔdɛŋ fɛɛ ni wɔɔnyɛ kɛtsu naagbai lɛ ahe nii, ni wɔha ehi wɔjwɛŋmɔ mli akɛ, mɛi ni ebote gbãla mli lɛ jeee “mɛi enyɔ dɔŋŋ, shi moŋ heloo kome.” (Mat. 19:6) Kɛfata he lɛ, kɛ́ wɔhefatalɔ lɛ jeee Odasefonyo, shi wɔfi shi yɛ naagbai ni wɔkɛkpeɔ lɛ fɛɛ sɛɛ lɛ, ekolɛ ebaamɔ anɔkwale lɛ mli, ni wɔbaaná miishɛɛ.
21 Ekɔɔɔ he eko shihilɛ mli ni wɔyɔɔ lɛ, esa akɛ wɔtswa wɔfai shi akɛ wɔbaaba wɔjeŋ jogbaŋŋ daa koni no afee odaseyeli kpakpa kɛha mɛi ni yɔɔ asafo lɛ sɛɛ lɛ. Kɛ́ wɔgbãla miihe afite lɛ, nyɛhaa wɔfɔsea wɔtsuiŋ wɔshwiea Nyɔŋmɔ hiɛ yɛ sɔlemɔ mli, wɔpɛia wɔyiŋtoi amli jogbaŋŋ, wɔsusua Ŋmalɛ mli shishitoo mlai lɛ ahe kɛ hiɛdɔɔ, ni wɔtaoa yelikɛbuamɔ kɛjɛa asafoŋ onukpai lɛ aŋɔɔ. Nɔ ni fe fɛɛ lɛ, nyɛhaa wɔtswaa wɔfai shi akɛ wɔbaasa Yehowa Nyɔŋmɔ hiɛ yɛ nɔ fɛɛ nɔ mli, ni wɔkɛ wɔnifeemɔi atsɔa akɛ wɔhiɛ sɔɔ enikeenii ni yɔɔ nyam ni ji gbalashihilɛ lɛ lɛɛlɛŋ.
[Shishigbɛ niŋmai]
^ kk. 10 Atsake mɛi lɛ agbɛ́i.
^ kk. 17 Kwɛmɔ ‘Nyɛhia Nyɔŋmɔ Suɔmɔ lɛ Mli’ wolo lɛ baafa 219-221; November 1, 1988 The Watchtower lɛ baafa 26-27; September 15, 1975 The Watchtower lɛ baafa 575.
[Nikasemɔ lɛ he Sanebimɔi]
[Wiemɔ ni akɔ ni akɛmiitsu nii ni yɔɔ baafa 10]
Bei pii lɛ, Kristofoi ni miiná naagbai yɛ amɛgbãla mli, shi amɛyeee oyai kɛgbala mli loo kɛtse gbãla lɛ yeɔ omanye
[Wiemɔ ni akɔ ni akɛmiitsu nii ni yɔɔ baafa 12]
Kwɛmɔ Yehowa gbɛ ni osɔle obi ni ewaje bo be fɛɛ be
[Mfoniri ni yɔɔ baafa 9]
Yehowa jɔɔ wumɛi kɛ ŋamɛi ni ji Kristofoi ni bɔɔ mɔdɛŋ koni amɛwaje amɛgbalashihilɛi lɛ
[Mfoniri ni yɔɔ baafa 11]
Wɔbaanyɛ wɔná miishɛjemɔ kɛ mumɔŋ yelikɛbuamɔ yɛ Kristofoi asafo lɛ mli
