Amɛkɛ Amɛhe Ha Yɛ Amɛsuɔmɔ Naa​—Yɛ Ecuador

EHE bahia ni nyɛmi nuu ko ni atsɛɔ lɛ Bruno ni yɔɔ Italy lɛ akpɛ eyiŋ yɛ sane ko ni he hiaa waa he. Egbe sɛkɛndre skul naa etsɛko, ni ebɔ mɔdɛŋ fe mɔ fɛɛ mɔ yɛ eklas lɛ, ni amrɔ nɛɛ ewekumɛi kɛ etsɔɔlɔi miiwo lɛ hewalɛ ní eya yunivɛsiti. Shi afii komɛi ni tsɔ hiɛ lɛ, ejɔɔ ewala nɔ eha Yehowa, ni ewo shi akɛ ekɛ nɔ ni Nyɔŋmɔ sumɔɔ baaye klɛŋklɛŋ gbɛhe yɛ eshihilɛ mli. Mɛɛ yiŋ ekpɛ? Etsɔɔ mli akɛ: “Mikɛɛ Yehowa yɛ sɔlemɔ mli akɛ mahi shi yɛ mihenɔjɔɔmɔ lɛ naa, ni mikɛ lɛ baaye klɛŋklɛŋ. Shi mijɛ anɔkwayeli mli mikɛɛ lɛ yɛ sɔlemɔ lɛ mli akɛ, miisumɔ ni maná sɔɔmɔ nitsumɔ lɛ fãi srɔtoi lɛ amli gbɛfaŋnɔ, ní matsu kɛmiishɛɛ.”

 Afii fioo komɛi asɛɛ lɛ, Bruno tee Ecuador, yɛ South America. Ewie akɛ: “Yehowa ha misɔlemɔ lɛ hetoo yɛ gbɛ ni mikpaaa gbɛ kwraa nɔ.” Beni eyashɛ Ecuador lɛ, enaa kpɛ ehe akɛ oblahii kɛ oblayei saŋŋ hu eba jɛmɛ koni amɛbatsu babaoo yɛ Yehowa sɔɔmɔ lɛ mli.

OBLAHII KƐ OBLAYEI NI ‘KA YEHOWA AMƐKWƐ’

Taakɛ oblahii kɛ oblayei akpekpei abɔ ni yɔɔ je lɛŋ lɛ feɔ lɛ, Bruno kpɛlɛ ninefɔ̃ɔ ni nyiɛ sɛɛ nɛɛ nɔ akɛ: ‘Nyɛkaa mi nyɛkwɛa, akɛ migbeleŋ ŋwɛi samfɛji lɛ mihaŋ nyɛ, ni mifɔseŋ jɔɔmɔ mihaŋ nyɛ lo?’ (Mal. 3:10) Suɔmɔ ni amɛyɔɔ kɛha Nyɔŋmɔ lɛ hewɔ lɛ, amɛkpɛ amɛyiŋ akɛ amɛbaajɛ amɛsuɔmɔ mli amɛkɛ amɛbe, amɛhewalɛ, kɛ amɛheloonaa nibii asɔmɔ lɛ yɛ maŋ ko ni Maŋtsɛyeli jajelɔi ahe ehia waa yɛ lɛ mli, koni ‘amɛkɛka Yehowa amɛkwɛ.’

Beni mɛi ni kɛ amɛhe eha nɛɛ yashɛ he ni amɛyaasɔmɔ yɛ lɛ, etsɛɛɛ ni amɛna akɛ “nikpamɔ lɛ fá moŋ, shi nitsulɔi lɛ faaa.” (Mat. 9:37) Ákɛ nɔkwɛmɔnɔ lɛ, Jaqueline ni jɛ Germany lɛ kɛ miishɛɛ ŋma Ecuador nitsumɔhe nine lɛ akɛ: “Mikɛ afii enyɔ ko pɛ esɔmɔ yɛ Ecuador, shi miyɛ Biblia mli nikaselɔi 13 momo, ni amɛteŋ mɛi 4 baa kpeei daa. Enɛ eha miná miishɛɛ waa!” Chantal ni jɛ Canada lɛ wie akɛ: “Yɛ afi 2008 lɛ, mifã kɛyahi Ecuador ŋshɔnaa maŋ ko ni asafo kome pɛ yɔɔ  jɛmɛ lɛ mli. Amrɔ nɛɛ asafoi etɛ yɛ jɛmɛ, ni gbɛgbalɔi fe 30 hu yɛ jɛmɛ. Bɔ ni mɛi ni wɔkɛkaseɔ nii lɛ ateŋ mɛi babaoo yaa amɛhiɛ yɛ jɛmɛ lɛ yɛ miishɛɛ pam!” Ekɛfata he akɛ: “Nyɛsɛɛ nɛɛ mifã kɛtee maŋtiase ko ni yɔɔ Andes Gɔji lɛ anɔ, ni kɛ shikpɔŋ jɛkɛmɔ ji mitai 2,743 lɛ mli. Mɛi ni fa fe 75,000 yɛ maŋtiase nɛɛ mli, shi asafo kome pɛ yɔɔ jɛmɛ. Mɛi pii kpɛlɛɔ anɔkwale lɛ nɔ yɛ biɛ! Miinya sɔɔmɔ nitsumɔ lɛ he waa yɛ biɛ.”

NAAGBAI NI AMƐKƐKPEƆ

Anɔkwa, ebɛ mlɛo akɛ mɔ aaasɔmɔ yɛ maŋsɛɛ. Yɛ anɔkwale mli lɛ, oblahii kɛ oblayei komɛi kɛ naagbai kpeɔ po dani amɛyaa. Kayla ni jɛ United States lɛ kɛɛ akɛ: “Bɔ ni nyɛmimɛi komɛi ni yɔɔ he ni mijɛ lɛ fee amɛnii lɛ yɛ nijiaŋwujee waa. Amɛnuuu nɔ hewɔ ni mitaoɔ ni miyasɔmɔ akɛ gbɛgbalɔ yɛ maŋsɛɛ lɛ shishi. Ehaa bei komɛi lɛ mibiɔ mihe akɛ, ‘Ani yiŋ ni mikpɛɔ lɛ ja?’” Fɛɛ sɛɛ lɛ, Kayla kpɛ mli akɛ ebaaya. Etsɔɔ mli akɛ: “Sɔlemɔ ni misɔle miha Yehowa kɛ saji ni mikɛ nyɛmimɛi ni edara yɛ mumɔŋ lɛ gba be babaoo lɛ ye ebua mi ni mina akɛ Yehowa jɔɔ mɛi ni jɛɔ amɛsuɔmɔ mli amɛsɔmɔɔ lɛ lɛ.”

Yɛ mɛi pii agbɛfaŋ lɛ, wiemɔ kroko kasemɔ ji naagba wulu kɛha amɛ. Siobhan ni jɛ Ireland lɛ kɛɛ akɛ: “Minyɛɛɛ mawie wiemɔ lɛ jogbaŋŋ. Ehe bahia ni mato mitsui shi, ní mikɛ hiɛdɔɔ akase wiemɔ lɛ, ni kɛji mitɔ̃ lɛ miŋmɔɔ mihe.” Anna ni jɛ Estonia lɛ kɛfata he akɛ: “Maŋ lɛ mli dɔɔ waa, mulu babaoo yɛ jɛmɛ, ni abɛ shawa ni nula jɛɔ mli yɛ jɛmɛ, shi nɔ ni wa fe fɛɛ kɛha mi ji Spanish kasemɔ. Bei komɛi lɛ minijiaŋ jeɔ wui. Mina akɛ esa akɛ mikɛ mijwɛŋmɔ ama mimɔdɛŋbɔi lɛ anɔ moŋ fe mitɔ̃mɔi lɛ.”

Naagba kroko hu ji hiɛ ni tseɔ shĩa. Jonathan ni jɛ United States lɛ wie akɛ: “Miyashɛ jɛmɛ etsɛɛɛ nɔŋŋ ni minijiaŋ je wui, ejaakɛ mina akɛ mikɛ minanemɛi kɛ miweku lɛ teŋ ejekɛ. Shi akɛni mikɛ mijwɛŋmɔ ma mi-aŋkro Biblia kasemɔ kɛ sɔɔmɔ nitsumɔ lɛ nɔ hewɔ lɛ, minyɛ miye henumɔi nɛɛ anɔ. Eyeee be ko ni niiashikpamɔi ni ŋɔɔŋɔi ni miná yɛ shiɛmɔ nitsumɔ lɛ mli, kɛ nanemɛi hei ni miná yɛ asafo lɛ mli lɛ ha miná miishɛɛ ekoŋŋ.”

 Naagba kroko hu ji shihilɛ ni yɔɔ jɛmɛ lɛ. Ekã shi faŋŋ akɛ, etamɔŋ shihilɛ ni yɔɔ he ni ojɛ lɛ. Beau ni jɛ Canada lɛ wie akɛ: “Yɛ he ni ojɛ lɛ, srawa hewalɛ kɛ paipi mli nu jeee naagba. Shi yɛ biɛ lɛ, ewa dani anáa nibii nɛɛ.” Ohia, tsɔne he naagbai, kɛ woloŋ ni mɛi pii leee lɛ ji shihilɛ ko ni yaa nɔ yɛ maji ni kpaako amɛnáa hiɛyaa lɛ pii amli. Ines ni jɛ Austria lɛ kɛ ejwɛŋmɔ maa maŋbii lɛ asui kpakpai lɛ anɔ, ni no haa enyɛɔ ekpeɔ shihilɛi nɛɛ anaa. Nyɛmi yoo nɛɛ wie akɛ: “Amɛfeɔ mɛi gbɔ waa, amɛhe jɔ, amɛmli jɔ, ni amɛbaa amɛhe shi. Nɔ ni fe fɛɛ lɛ, amɛyɛ shwelɛ ni mli wa waa akɛ amɛbaakase Nyɔŋmɔ he nii babaoo.”

‘JƆƆMƆI NI ETEKE NƆ’

Eyɛ mli akɛ oblahii kɛ oblayei nɛɛ fɛɛ ni sɔmɔɔ yɛ Ecuador lɛ kɛ amɛhe eshã afɔle moŋ, shi amɛna akɛ Yehowa ‘nyɛɔ efeɔ kɛtekeɔ nɔ babaoo fe nii fɛɛ’ ni amɛkpaa gbɛ. (Efe. 3:20) Yɛ anɔkwale mli lɛ, amɛnuɔ he akɛ ‘ajɔɔ amɛ, ni eteke nɔ’. (Mal. 3:10) Naa bɔ ni amɛnuɔ amɛsɔɔmɔ lɛ he amɛhaa:

Bruno: “Mibɔi sɔɔmɔ yɛ Amazon kpokpaa ni jɛmɔ yɔɔ miishɛɛ ni yɔɔ Ecuador lɛ nɔ. Sɛɛ mli lɛ, miyaye mibua beni agbeleɔ Ecuador nitsumɔhe nine lɛ mli lɛ. Amrɔ nɛɛ miisɔmɔ yɛ Betel. Beni miyɔɔ Italy lɛ, mikpɛ miyiŋ akɛ mikɛ Yehowa baaye klɛŋklɛŋ gbɛhe, ni Yehowa eha mishwelɛ akɛ maná sɔɔmɔ nitsumɔ lɛ fãi srɔtoi lɛ amli gbɛfaŋnɔ, ni matsu kɛmiishɛɛ lɛ eba mli.”

Beau: “Mikɛ Yehowa teŋ wekukpaa lɛ mli ebawa waa, ejaakɛ mikɛ mibe fɛɛ tiu mumɔŋ nibii asɛɛ beni miyɔɔ Ecuador lɛ. Nakai beaŋ nɔŋŋ lɛ, miná hegbɛ miyashara shi yɛ hei ni yɔɔ miishɛɛ—nɔ ko ni mishwe aahu akɛ mafee.”

Anna: “Ákɛ oshija lɛ, misusuko he dã akɛ manyɛ mahi shi tamɔ maŋsɛɛ sɔɔlɔ. Shi amrɔ nɛɛ mile akɛ manyɛ mafee nakai. Yɛ Yehowa jɔɔmɔ naa lɛ, miifee kaselɔi, miiye miibua kɛmiimamɔ Maŋtsɛyeli Asai, ni mikɛ mɛi srɔtoi miibɔnaanyo, ni enɛ haa mináa miishɛɛ waa.”

Elke: “Beni miyɔɔ mimaŋ, ni ji Austria lɛ, bei pii lɛ misɔleɔ mihaa Yehowa koni kɛ hooo lɛ, eha maná Biblia mli nikaselɔ kome. Shi biɛ lɛ, miyɛ Biblia mli nikaselɔi 15 sɔŋŋ! Kɛ́ mikwɛ bɔ ni Biblia mli nikaselɔi ni miiya amɛhiɛ lɛ yɔɔ miishɛɛ lɛ, eŋɔɔ minaa waa.”

Joel: “Eji niiashikpamɔ ko ni nɔ bɛ akɛ mɔ ko aaasɔmɔ Yehowa yɛ maŋ kroko nɔ. Okaseɔ bɔ ni akɛ he fɔ̃ɔ enɔ kwraa, ni kɛ́ ona bɔ ni ejɔɔ omɔdɛŋbɔi lɛ anɔ lɛ, omii shɛɔ ohe waa! Yɛ klɛŋklɛŋ afi ni miye yɛ biɛ beni mijɛ United States miba lɛ mli lɛ, shiɛlɔi 6 ní yɔɔ kuu ni mikɛsɔmɔɔ lɛ mli lɛ tee hiɛ kɛyashɛ 21. Mɛi 110 ba Kaimɔ lɛ.”

NI BO HU?

Nyɛmimɛi oblahii kɛ oblayei, ani nyɛshihilɛ ŋmɛɔ nyɛ gbɛ ni nyɛyasɔmɔ yɛ he ko ni Maŋtsɛyeli jajelɔi ahe miihia waa yɛ? Eji anɔkwale akɛ yiŋkpɛɛ ni tamɔ nɛkɛ lɛ biɔ ni mɔ ato gbɛjianɔ jogbaŋŋ. Nɔ ni fe fɛɛ lɛ, ja mɔ ko yɛ suɔmɔ ni mli wa kɛha Yehowa kɛ adesai dani ebaanyɛ efee nakai. Kɛ́ oyɛ suɔmɔ ni tamɔ nɛkɛ, ni oshihilɛ hu baaŋmɛ bo gbɛ ni oyasɔmɔ yɛ maŋsɛɛ lɛ, no lɛ okɛ hiɛdɔɔ asɔle oha Yehowa yɛ sane nɛɛ he. Agbɛnɛ hu lɛ, okɛ ofɔlɔi ni ji Kristofoi lɛ kɛ asafoŋ onukpai lɛ agba oshwelɛ lɛ he sane. Ekolɛ bo hu obaakpɛ mli akɛ obaasumɔ ni oná gbɛfaŋnɔ yɛ sɔɔmɔ krɔŋŋ lɛ fã ni yɔɔ miishɛɛ, ni haa mɔ tsui nyɔɔ emli nɛɛ mli.

[Wiemɔ ni akɔ ni akɛmiitsu nii ni yɔɔ baafa 3]

“Sɔlemɔ ni misɔle miha Yehowa kɛ saji ni mikɛ nyɛmimɛi ni edara yɛ mumɔŋ lɛ gba be babaoo lɛ ye ebua mi ni mina akɛ Yehowa jɔɔ mɛi ni jɛɔ amɛsuɔmɔ mli amɛsɔmɔɔ lɛ lɛ.”—Kayla ni jɛ United States lɛ

[Adaka/​Mfoniri ni yɔɔ baafa 6]

Bɔ ni ooofee osaa ohe koni onyɛ oyasɔmɔ yɛ maŋsɛɛ

• Too gbɛjianɔ ni ofee aŋkro nikasemɔ ni mɔɔ shi be fɛɛ be

• Kanemɔ August 2011 Wɔ Maŋtsɛyeli Sɔɔmɔ lɛ, baafa 4-6 lɛ

• Okɛ mɛi ni esɔmɔ yɛ maŋsɛɛ pɛŋ lɛ agba sane

• Kasemɔ maŋ ni otaoɔ oya jɛmɛ lɛ kusumii kɛ eyinɔsaji ahe nii

• Kasemɔ maŋ lɛ mli wiemɔi lɛ eko he nɔ ko fioo

[Adaka/​Mfoniri ni yɔɔ baafa 6]

Mɛi ni sɔmɔɔ yɛ maŋsɛɛ lɛ ateŋ mɛi komɛi kwɛɔ amɛ diɛŋtsɛ amɛhe kɛtsɔ gbɛi nɛɛ anɔ:

• Amɛtsuɔ nii nyɔji fioo yɛ amɛ diɛŋtsɛ amɛmaŋ daa afi

• Amɛkɛ amɛshĩa haiɔ, loo amɛhaa mɛi komɛi kwɛɔ amɛnitsumɔ nɔ amɛhaa amɛ

• Amɛtsuɔ nii kɛtsɔɔ Intanɛt lɛ nɔ

[Mfonirii ni yɔɔ baafa 4, 5]

1 Jaqueline, ejɛ Germany

2 Bruno, ejɛ Italy

3 Beau, ejɛ Canada

4 Siobhan, ejɛ Ireland

5 Joel, ejɛ United States

6 Jonathan, ejɛ United States

7 Anna, ejɛ Estonia

8 Elke, ejɛ Austria

9 Chantal, ejɛ Canada

10 Ines, ejɛ Austria