Kasemɔ Yehowa kɛ Yesu Tsuishitoo Lɛ
Kasemɔ Yehowa kɛ Yesu Tsuishitoo Lɛ
“Nyɛbua wɔ-Nuŋtsɔ lɛ tsuishitoo lɛ akɛ yiwalaheremɔ.”—2 PET. 3:15.
TE OBAAHA HETOO OHA TƐŊŊ?
Mɛɛ gbɛ nɔ Yehowa etsɔɔ akɛ etoɔ etsui shi?
Mɛni hewɔ ehe bahia ni Yesu ato etsui shi be kplaŋŋ lɛ?
Mɛni wɔbaanyɛ wɔfee kɛkase Nyɔŋmɔ tsuishitoo lɛ?
1. Mɛɛ sane anɔkwafoi komɛi biɔ?
NYƐMI yoo ko ni kɛ afii babaoo esɔmɔ Yehowa, ni emia ehiɛ yɛ jaramɔ shihilɛi amli lɛ bi akɛ, “Ani naagbee lɛ baabanina mi kɛ̃?” Mɛi komɛi ni kɛ afii babaoo esɔmɔ Yehowa lɛ hu biɔ sane ni tamɔ nɛkɛ nɔŋŋ. Wɔmiishwe be ni Nyɔŋmɔ baafee nibii fɛɛ ehee, ni ejie wɔnaagbai lɛ fɛɛ kɛya lɛ. (Kpoj. 21:5) Eyɛ mli akɛ wɔyɛ yiŋtoi babaoo ni wɔɔdamɔ nɔ wɔhe wɔye akɛ Satan nibii agbɛjianɔtoo lɛ naagbee ebɛŋkɛ kpaakpa moŋ, shi ebaanyɛ efee nɔ ni wa akɛ wɔɔto wɔtsui shi kɛmɛ nakai be lɛ.
2. Mɛɛ sanebimɔi ni kɔɔ tsuishitoo he wɔbaasusu he?
2 Kɛlɛ, Biblia lɛ tsɔɔ akɛ esa akɛ wɔto wɔtsui shi. Taakɛ Nyɔŋmɔ tsuji ni hi shi yɛ blema lɛ fee lɛ, kɛ́ wɔná hemɔkɛyeli ni mli wa, ni wɔto wɔtsui shi kɛyashi be ni Nyɔŋmɔ baatsu eshiwoi lɛ ahe nii lɛ, wɔnine baashɛ nibii ni ewo wɔ shi yɛ he lɛ anɔ. (Nyɛkanea Hebribii 6:11, 12.) Yehowa diɛŋtsɛ hu eto etsui shi. Kulɛ, ebaanyɛ efo efɔŋfeemɔ sɛɛ be fɛɛ be ni esumɔɔ, shi eemɛ ni etsu he nii yɛ be ni sa mli. (Rom. 9:20-24) Mɛni hewɔ eto etsui shi nakai lɛ? Mɛɛ gbɛ nɔ Yesu ekase e-Tsɛ tsuishitoo lɛ ni ekɛfee nɔkwɛmɔnɔ kpakpa eha wɔ? Kɛ́ wɔkase Nyɔŋmɔ tsuishitoo lɛ, mɛɛ sɛɛ wɔbaaná? Kɛ́ eefee wɔ akɛ Yehowa sɛɛ etsɛ po lɛ, sanebimɔi nɛɛ ahetoo baanyɛ aye abua wɔ koni wɔto wɔtsui shi, ni wɔná hemɔkɛyeli ni mli wa.
MƐNI HEWƆ YEHOWA TOƆ ETSUI SHI LƐ?
3, 4. (a) Mɛni hewɔ Yehowa eto etsui shi lɛ? (b) Te Yehowa fee enii yɛ atua ni atse yɛ Eden lɛ he eha tɛŋŋ?
3 Yehowa yɛ yiŋtoo kpakpa hewɔ ni etoɔ etsui shi lɛ. Eyɛ mli akɛ Yehowa yɛ hewalɛ fe mɔ fɛɛ mɔ yɛ je lɛŋ fɛɛ moŋ, shi atua ni atse yɛ Eden lɛ tee sanebimɔi komɛi ni he hiaa ni saa gbɔmɛi kɛ ŋwɛi bɔfoi fɛɛ ahe lɛ shi. Yehowa eto etsui shi, ejaakɛ ele akɛ be baashwie mli dani abaanyɛ aha sanebimɔi nɛɛ ahetoo jogbaŋŋ. Akɛni ele mɛi ni yɔɔ ŋwɛi kɛ shikpɔŋ lɛ nɔ lɛ anifeemɔi kɛ amɛsusumɔi hewɔ lɛ, ekã shi faŋŋ akɛ nɔ ni efeɔ amrɔ nɛɛ he baaba sɛɛnamɔ jogbaŋŋ kɛha wɔ.—Heb. 4:13.
4 Yehowa yiŋtoo ji akɛ, Adam kɛ Hawa shwiei lɛ ayi shikpɔŋ lɛ nɔ obɔ. Beni Satan laka Hawa, ni Adam hu gbo Nyɔŋmɔ nɔ toi lɛ, Nyɔŋmɔ ejieee ejwɛŋmɔ kɛjɛɛɛ eyiŋtoo lɛ nɔ. Etsui efãaa, ekɛ oyaiyeli ekpɛɛɛ eyiŋ, ni ejieee ejwɛŋmɔ yɛ yiŋ ni eto yɛ adesa weku lɛ he lɛ nɔ. Moŋ lɛ, eto gbɛjianɔ ni baaha yiŋ ni eto yɛ adesai kɛ jeŋ muu lɛ fɛɛ he lɛ aba mli. (Yes. 55:11) Bɔni afee ni etsu eyiŋtoo lɛ he nii, ni etsɔɔ akɛ enɔyeli lɛ he yɛ sɛɛnamɔ kɛha mɛi fɛɛ lɛ, eye ehe nɔ waa ni eto etsui shi, ni ekɛ afii akpei abɔ emɛ bɔni afee ni eyiŋtoo lɛ aba mli yɛ gbɛ ni sa jogbaŋŋ nɔ.
5. Mɛɛ jɔɔmɔi Yehowa tsuishitoo lɛ kɛbaaba?
5 Yiŋtoo kroko hewɔ ni Yehowa eto etsui shi lɛ ji, koni mɛi babaoo anyɛ aná naanɔ wala. Amrɔ nɛɛ, eeto gbɛjianɔ koni ehere “asafo babaoo” ko yiwala. (Kpoj. 7:9, 14; 14:6) Yehowa tsɔɔ wɔshiɛmɔ nitsumɔ lɛ nɔ efɔ̃ɔ mɛi nine koni amɛbakase e-Maŋtsɛyeli lɛ kɛ ejalɛ shishitoo mlai lɛ ahe nii. Maŋtsɛyeli sane lɛ ji sane ni he hiaa fe fɛɛ kɛha adesai—hɛɛ, eji “sanekpakpa.” (Mat. 24:14) Mɔ fɛɛ mɔ ni Yehowa fɔ̃ɔ lɛ nine lɛ bafataa jeŋ muu fɛɛ asafo ni mli bii lɛ sumɔɔ amɛhe waa, ni amɛfeɔ nɔ ni ja lɛ ahe. (Yoh. 6:44-47) Wɔ-Nyɔŋmɔ ni yɔɔ suɔmɔ lɛ yeɔ ebuaa mɛi nɛɛ koni amɛná ehiɛ duromɔ. Agbɛnɛ hu, eehala adesai komɛi koni amɛtsɔmɔ enɔyeli ni yɔɔ ŋwɛi lɛ mli bii. Kɛ́ mɛi nɛɛ tee ŋwɛi lɛ, amɛbaaye amɛbua adesai ni boɔ Nyɔŋmɔ toi lɛ koni amɛye emuu, ní amɛná naanɔ wala. No hewɔ lɛ, yɛ be ni Yehowa kɛtoɔ etsui shi nɛɛ mli po lɛ, eetsu nii koni eshiwoi lɛ aba mli—ni wɔná he sɛɛ jogbaŋŋ.
6. (a) Mɛɛ gbɛ nɔ Yehowa to etsui shi yɛ Noa gbii lɛ amli? (b) Mɛɛ gbɛ nɔ Yehowa toɔ etsui shi yɛ wɔgbii nɛɛ amli?
6 Bɔ ni Yehowa tsu efɔŋfeemɔ ni tee nɔ yɛ gbii ni tsɔ Nu Afua lɛ hiɛ lɛ he nii lɛ haa wɔnaa akɛ etoɔ etsui shi kɛ́ awo emli la po. No mli lɛ, bɔlɛnamɔ jeŋba sha kɛ yiwalɛ eyi shikpɔŋ lɛ nɔ obɔ, ni bɔ ni adesai anɔfɔŋfeemɔ fa lɛ ‘dɔ Yehowa yɛ etsui mli.’ (1 Mose 6:2-8) Akɛni esumɔɔɔ ni nakai shihilɛ lɛ aya nɔ daa hewɔ lɛ, eto eyiŋ akɛ ekɛ nu afua baakpata adesai toigbolɔi lɛ ahiɛ. ‘Beni Nyɔŋmɔ ŋmɛɔ etsui shi ni emɛɔ yɛ Noa gbii lɛ amli’ lɛ, nakai beaŋ nɔŋŋ lɛ eeto gbɛjianɔ koni ehere Noa kɛ eweku lɛ yiwala. (1 Pet. 3:20) Yɛ be ni sa mli lɛ, Yehowa ha Noa le yiŋ ni eto lɛ, ni ekɛɛ lɛ akɛ ekpɛ adeka. (1 Mose 6:14-22) Kɛfata he lɛ, Noa ji “jalɛ shiɛlɔ,” ni ebɔ ebeaŋ bii lɛ kɔkɔ yɛ hiɛkpatamɔ ni baa lɛ he. (2 Pet. 2:5) Yesu kɛɛ nibii ni yaa nɔ yɛ wɔgbii nɛɛ amli lɛ tamɔ nibii ni tee nɔ yɛ Noa gbii lɛ amli lɛ nɔŋŋ. Yehowa eto be ni ekɛ nibii agbɛjianɔtoo fɔŋ nɛɛ baaba naagbee. Shi adesa ko leee ‘gbi kɛ ŋmɛlɛtswaa’ nɔ ni enɛ baaba. (Mat. 24:36) Ŋmɛnɛ lɛ, Nyɔŋmɔ eha wɔ nitsumɔ akɛ wɔbɔ mɛi kɔkɔ, ni wɔtsɔɔ amɛ nɔ ni esa akɛ amɛfee koni ahere amɛyiwala.
7. Ani Yehowa sɛɛ miitsɛ kɛ eshiwoi lɛ ahe nitsumɔ? Tsɔɔmɔ mli.
7 Ekã shi faŋŋ akɛ, Yehowa tsuishitoo lɛ etsɔɔɔ akɛ eemɛ ni be aho kɛkɛ. Ni esaaa ni wɔsusuɔ akɛ ejie ejwɛŋmɔ yɛ wɔnɔ, loo esusuuu wɔhe! Shi beni wɔdaa loo wɔkɛ jaramɔ shihilɛi kpeɔ yɛ nibii agbɛjianɔtoo fɔŋ nɛɛ mli lɛ, ewaaa akɛ wɔɔsusu nakai. Wɔnijiaŋ baanyɛ aje wui loo wɔbaanyɛ wɔnu he akɛ Nyɔŋmɔ shiwoi lɛ asɛɛ etsɛ tsɔ. (Heb. 10:36) Shi ohiɛ akakpa nɔ kɔkɔɔkɔ akɛ yiŋtoi kpakpai komɛi ahewɔ ni eto etsui shi lɛ, ni ekɛ be nɛɛ miitsu nii yɛ enɔkwa tsuji lɛ ahilɛkɛhamɔ hewɔ. (2 Pet. 2:3; 3:9) Agbɛnɛ nyɛhaa wɔsusua bɔ ni Yesu kase e-Tsɛ lɛ tsuishitoo lɛ he wɔkwɛa.
MƐƐ GBƐ NƆ YESU FEE TSUISHITOO HE NƆKWƐMƆNƆ KPAKPA EHA WƆ?
8. Mɛɛ shihilɛi amli Yesu to etsui shi yɛ?
8 Yesu miifee Nyɔŋmɔ suɔmɔnaa nii amrɔ nɛɛ, ni ekɛ miishɛɛ efee enɛ afii akpei abɔ. Beni Satan tse atua lɛ, Yehowa kpɛ eyiŋ akɛ ebaaha e-Bi koome lɛ aba shikpɔŋ lɛ nɔ akɛ Mesia lɛ. Bo lɛ susumɔ nɔ ni enɛ babi ni Yesu afee lɛ he okwɛ—ebabi ni eto etsui shi afii akpei abɔ kɛmɛ kɛyashi nakai be lɛ. (Nyɛkanea Galatabii 4:4.) Jeee ni Yesu miimɛ kɛkɛ ni etsuuu nɔ ko; moŋ lɛ, eetsu nitsumɔ ni e-Tsɛ kɛwo edɛŋ lɛ. Beni eba shikpɔŋ lɛ nɔ lɛ, no mli lɛ ele akɛ Satan baagbe lɛ taakɛ agba afɔ̃ shi lɛ. (1 Mose 3:15; Mat. 16:21) Shi eto etsui shi yɛ amanehulu babaoo mli, ejaakɛ ele akɛ Nyɔŋmɔ miisumɔ ni egbo yɛ nakai gbɛ nɔ. Enɔkwayeli lɛ nɔ bɛ. Egbalaaa ejwɛŋmɔ kɛyaaa lɛ diɛŋtsɛ loo hegbɛ ni eyɔɔ akɛ Nyɔŋmɔ Bi lɛ nɔ, ni ekɛ enɛ fee nɔkwɛmɔnɔ kpakpa eha wɔ.—Heb. 5:8, 9.
9, 10. (a) Mɛni Yesu feɔ beni ekɛ tsuishitoo mɛɔ ni Yehowa atsu E-yiŋtoi ahe nii lɛ? (b) Te esa akɛ wɔbu be ni Yehowa eto lɛ wɔha tɛŋŋ?
9 Yɛ Yesu shitee lɛ sɛɛ lɛ, aŋɔ hegbɛ aha lɛ yɛ ŋwɛi kɛ shikpɔŋ lɛ nɔ. (Mat. 28:18) Ekɛ nakai hegbɛ lɛ tsuɔ Yehowa yiŋtoi ahe nii be fɛɛ be, ni efeɔ nakai yɛ be ni Yehowa eto lɛ naa. Yesu kɛ tsuishitoo mɛ yɛ Nyɔŋmɔ ninejurɔ nɔ aahu kɛyashi afi 1914, beni aŋɔ ehenyɛlɔi lɛ afee enajiashi maaŋoo lɛ. (Lala 110:1, 2; Heb. 10:12, 13) Etsɛŋ, ebaakpata Satan nibii agbɛjianɔtoo lɛ hiɛ. Yɛ be ni Yesu kɛmɛɔ nɛɛ mli lɛ, ekɛ tsuishitoo miiye miibua mɛi koni amɛfee nɔ ni Nyɔŋmɔ sumɔɔ, ni eetsɔɔ amɛ gbɛ kɛmiiya “wala nubui ahe.”—Kpoj. 7:17.
10 Ani oona bɔ ni ooofee okase Yesu nɔkwɛmɔnɔ lɛ? Ele akɛ Yehowa eto be pɔtɛɛ ko ni ekɛbaatsu eyiŋtoi ahe nii. Eji anɔkwale akɛ, Yesu miishwe waa ni efee nɔ fɛɛ nɔ ni e-Tsɛ lɛ baabi ni efee lɛ moŋ, shi fɛɛ sɛɛ lɛ, eesumɔ ni emɛ kɛyashi be ni Nyɔŋmɔ eto lɛ aaashɛ. Beni wɔmɛɔ Satan nibii agbɛjianɔtoo fɔŋ nɛɛ naagbee lɛ, esa akɛ wɔto wɔtsui shi tamɔ Nyɔŋmɔ, ni wɔmɛ ni Nyɔŋmɔ atsɔɔ wɔ gbɛ, ni wɔnijiaŋ akaje wui hu. Mɛni wɔbaafee koni wɔnyɛ wɔkase Nyɔŋmɔ tsuishitoo lɛ?
TE MAFEE TƐŊŊ MAKASE NYƆŊMƆ TSUISHITOO LƐ?
11. (a) Mɛɛ tsakpaa yɔɔ hemɔkɛyeli kɛ tsuishitoo teŋ? (b) Mɛni hewɔ wɔyɔɔ yiŋtoo kpakpa ni wɔɔdamɔ nɔ wɔná hemɔkɛyeli ni mli wa lɛ?
11 Dani Yesu baaba shikpɔŋ lɛ nɔ lɛ, gbalɔi lɛ kɛ anɔkwafoi krokomɛi ni hi shi lɛ kɛ amɛnifeemɔi tsɔɔ akɛ adesai ni yeee emuu lɛ baanyɛ amia amɛhiɛ ni amɛto amɛtsui shi. Amɛtsuishitoo lɛ kɛ amɛhemɔkɛyeli lɛ yɛ tsakpaa. (Nyɛkanea Yakobo 5:10, 11.) Eji amɛheee nɔ ni Yehowa kɛɛ amɛ lɛ amɛyeee—ni tsɔɔ akɛ amɛbɛ hemɔkɛyeli—kulɛ, ani amɛbaanyɛ amɛto amɛtsui shi kɛmɛ eshiwoi lɛ amlibaa? Amɛmia amɛhiɛ kɛdamɔ shihilɛi ni mli wawai anaa shii abɔ, ejaakɛ amɛheɔ amɛyeɔ akɛ bɔ fɛɛ bɔ ni fee lɛ, Nyɔŋmɔ baaha eshiwoi lɛ aba mli. (Heb. 11:13, 35-40) Wɔyɛ yiŋtoo kpakpa ni wɔɔdamɔ nɔ wɔná hemɔkɛyeli ni mli wa, ejaakɛ amrɔ nɛɛ Yesu etsɔ ‘wɔhemɔkɛyeli lɛ naagbelɔ.’ (Heb. 12:2) Ehá gbalɛi babaoo ba mli, ni eye ebua wɔ ni wɔnu Nyɔŋmɔ yiŋtoi lɛ ashishi jogbaŋŋ.
12. Mɛni wɔbaanyɛ wɔfee kɛwaje wɔhemɔkɛyeli lɛ?
12 Mɛni wɔbaanyɛ wɔfee kɛwaje wɔhemɔkɛyeli lɛ, koni wɔnyɛ wɔto wɔtsui shi? Nɔ ni he hiaa klɛŋklɛŋ ji, ni wɔkɛ Nyɔŋmɔ gbɛtsɔɔmɔ atsu nii. Ákɛ nɔkwɛmɔnɔ lɛ, susumɔ nɔ hewɔ ni esa akɛ okɛ Maŋtsɛyeli lɛ aye klɛŋklɛŋ gbɛhe yɛ oshihilɛ mli lɛ he okwɛ. Ani obaanyɛ omia ohiɛ ni oye famɔ ni yɔɔ Mateo 6:33 lɛ nɔ? Ekolɛ no baabi ni okɛ be babaoo atsu nii yɛ shiɛmɔ nitsumɔ lɛ mli, loo ofee tsakemɔi komɛi yɛ oshihilɛ mli koni oshihilɛ afee mlɛo. Kaimɔ akɛ Yehowa ejɔɔ mɔdɛŋ ni obɔɔ akɛ obaaye efamɔi lɛ anɔ lɛ nɔ momo. Ekolɛ eha oná Biblia mli nikaselɔ hee loo eye ebua bo ni oná “Nyɔŋmɔ hejɔlɛ ni fe jwɛŋmɔi fɛɛ lɛ.” (Nyɛkanea Filipibii 4:7.) Kɛ́ ojwɛŋ jɔɔmɔi ni Yehowa gbɛtsɔɔmɔi asɛɛ ni onyiɛ lɛ eha oná lɛ ahe lɛ, obaana akɛ ehi jogbaŋŋ akɛ oooto otsui shi.—Lala 34:9.
13. Mɛɛ nɔkwɛmɔnɔ wɔbaanyɛ wɔkɛtsɔɔ bɔ ni wɔhemɔkɛyeli lɛ baanyɛ aha wɔto wɔtsui shi waa lɛ mli?
13 Nɔkwɛmɔnɔ ko baanyɛ aye abua wɔ ni wɔnu bɔ ni wɔhemɔkɛyeli lɛ baanyɛ aha wɔto wɔtsui shi waa lɛ shishi. Okwaafonyo duɔ nii, eshwieɔ nɔ nu, ni ekpaa. Be fɛɛ be ni okwaafonyo baakpa nii waa lɛ, no haa enáa nɔmimaa akɛ esa akɛ edu nii ekoŋŋ. Eyɛ mli akɛ kɛ́ edu nii lɛ, esa akɛ eto etsui shi kɛmɛ nikpamɔ be lɛ moŋ, shi no etsĩii enaa akɛ ekadu nii dɔŋŋ, ni ekolɛ ebaadu babaoo po fe tsutsu lɛ. Eheɔ eyeɔ akɛ ebaakpa nɔ ni edu lɛ. Nakai nɔŋŋ hu kɛ́ wɔkase Yehowa mlai lɛ, wɔkɛtsu nii, ni wɔkpa emli jɔɔmɔi lɛ, hekɛnɔfɔɔ kɛ hemɔkɛyeli ni wɔyɔɔ yɛ Yehowa mli lɛ daa. No haa efeɔ mlɛo kɛhaa wɔ akɛ wɔɔto wɔtsui shi kɛmɛ jɔɔmɔi ni wɔle akɛ wɔnine baashɛ nɔ lɛ.—Nyɛkanea Yakobo 5:7, 8.
14, 15. Mɛɛ susumɔ esa akɛ wɔná yɛ adesai apiŋmɔ he?
14 Nɔ kroko ni wɔbaanyɛ wɔfee koni wɔnyɛ wɔto wɔtsui shi waa ji, ni wɔsusu bɔ ni esa akɛ wɔna nibii ni yaa nɔ yɛ je lɛ kɛ wɔshihilɛ mli lɛ he. Bɔɔ mɔdɛŋ ni okwɛ nii tamɔ Yehowa kwɛɔ nii lɛ. Ákɛ nɔkwɛmɔnɔ lɛ, susumɔ bɔ ni Yehowa nuɔ adesai apiŋmɔi ahe ehaa lɛ he okwɛ. Kɛjɛ blema beebe lɛ, kɛ́ adesai miipiŋ lɛ, enuɔ he; kɛlɛ ehako no atsĩ enaa koni ekafee ekpakpa. Etsu e-Bi koome lɛ kɛba ‘koni ebafite abonsam nitsumɔi lɛ,’ ní ejie piŋmɔi fɛɛ ni Satan kɛba adesai anɔ lɛ kɛya. (1 Yoh. 3:8) Anɔkwa sane ji akɛ, etsɛŋ, Nyɔŋmɔ baajie piŋmɔi fɛɛ kɛya kwraa. No hewɔ lɛ, esaaa akɛ wɔhaa efɔŋfeemɔ ni yaa nɔ yɛ Satan je lɛ mli lɛ gbɔjɔɔ wɔhemɔkɛyeli lɛ, ni esaaa akɛ wɔyeɔ wɔtsui yɛ be ni Yehowa baatsu he nii lɛ he, moŋ lɛ, esa akɛ wɔná Nyɔŋmɔ shiwoi lɛ amli hemɔkɛyeli. Yehowa eto be ni ekɛbaafo efɔŋfeemɔ sɛɛ, ni kɛ́ nakai be lɛ shɛ lɛ, ebaatsu he nii oya.—Yes. 46:13; Nah. 1:9.
15 Yɛ naagbee be ni jaraa nɛɛ mli lɛ, ekolɛ wɔkɛ shihilɛi ni mli wawai ni baaka wɔhemɔkɛyeli lɛ baakpe. Kɛ́ basabasafeemɔ loo nɔ kroko ha wɔ loo wɔsuɔlɔi piŋ lɛ, yɛ nɔ najiaŋ ni wɔmli aaawo la lɛ, esa akɛ wɔkɛ wɔhe afɔ̃ Yehowa nɔ kwraa. Akɛni wɔyeee emuu hewɔ lɛ, ewa akɛ wɔɔfee nakai. Shi kaimɔ nɔ ni Yesu fee ni aŋma yɛ Mateo 26:39 lɛ.—Nyɛkanea.
16. Beni wɔmɛɔ naagbee lɛ, mɛni esaaa akɛ wɔfeɔ?
16 Mɔ ko ni heee yeee akɛ naagbee lɛ ebɛŋkɛ lɛ baasusu nii ahe yɛ gbɛ ni ejaaa nɔ. Ekolɛ ebaasusu akɛ esa akɛ eto esɛɛ nane koni kɛ́ Yehowa shiwoi lɛ baaa mli lɛ, ekatɔ lɛ. Ekolɛ eyiŋ baafee lɛ kɔshikɔshi ni ebaakɛɛ akɛ, ‘Makwɛ akɛ Yehowa baaye eshiwoi lɛ anɔ lo.’ Jwɛŋmɔ ni ejaaa nɛɛ baanyɛ aha ewa kɛha mɔ lɛ akɛ eeeto etsui shi. Enɛ hewɔ lɛ, ekolɛ ebaabɔ mɔdɛŋ akɛ ehé gbɛ́i yɛ je nɛɛ mli loo etiu shika sɛɛ fe ni ekɛ Nyɔŋmɔ Maŋtsɛyeli lɛ baaye klɛŋklɛŋ gbɛhe. Aloo ekolɛ ebaakpɛ eyiŋ akɛ ebaaya yunivɛsiti koni ená ogbɔjɔ shihilɛ amrɔ nɛɛ. Shi no baatsɔɔ faŋŋ akɛ mɔ lɛ bɛ hemɔkɛyeli. Kaimɔ akɛ Paulo wo wɔ hewalɛ ni wɔkase mɛi ni yɔɔ “hemɔkɛyeli kɛ tsuishitoo,” ní no ha amɛnine shɛ Yehowa shiwoi lɛ anɔ lɛ. (Heb. 6:12) Yehowa ekpɛ eyiŋ momo akɛ ebaakpata jeŋ fɔŋ nɛɛ hiɛ, ni ekpeŋ sɛɛ. (Hab. 2:3) Kɛyashi nakai be lɛ baaba lɛ, esaaa akɛ wɔfeɔ anyagba yɛ Yehowa sɔɔmɔ lɛ mli. Yɛ no najiaŋ lɛ, esa akɛ wɔkai akɛ wɔyɛ naagbee gbii lɛ amli, ní wɔtsu babaoo yɛ shiɛmɔ nitsumɔ lɛ mli. Nitsumɔ nɛɛ baaha wɔná miishɛɛ waa amrɔ nɛɛ.—Luka 21:36.
MƐƐ JƆƆMƆI JƐƆ TSUISHITOO MLI KƐBAA?
17, 18. (a) Mɛɛ hegbɛ wɔtsui shi ni wɔtoɔ amrɔ nɛɛ eha wɔná? (b) Kɛ́ wɔto wɔtsui shi lɛ, mɛɛ jɔɔmɔi wɔnáa?
17 Kɛ́ wɔkɛ nyɔji fioo esɔmɔ Nyɔŋmɔ jio, wɔkɛ afii babaoo efee nakai jio lɛ, wɔmiisumɔ ni wɔsɔmɔ lɛ kɛya naanɔ. Tsuishitoo baaye abua wɔ koni wɔmia wɔhiɛ kɛyashi nibii agbɛjianɔtoo fɔŋ nɛɛ naagbee lɛ baaba, ekɔɔɔ he eko bei abɔ ni eshwɛ. Amrɔ nɛɛ, Yehowa eha wɔ hegbɛ ni wɔkɛtsɔɔ akɛ wɔyɛ hekɛnɔfɔɔ yɛ yiŋ ni ekpɛɔ lɛ mli, ni akɛ wɔbaaya nɔ wɔye lɛ anɔkwa kɛ́ no baaha wɔpiŋ po. (1 Pet. 4:13, 14) Agbɛnɛ hu, Nyɔŋmɔ miisaa wɔ bɔni afee ni wɔkɛ tsuishitoo amɛ kɛyashi naagbee lɛ, koni ehere wɔyiwala.—1 Pet. 5:10.
18 Aŋɔ hegbɛ fɛɛ aha Yesu yɛ ŋwɛi kɛ shikpɔŋ lɛ nɔ, ni kɛ́ otee nɔ oye anɔkwa lɛ, nɔ ko nɔ ko bɛ ni baanyɛ ashɔ̃ bo yɛ edɛŋ. (Yoh. 10:28, 29) Ehe ehiaaa ni oshe nɔ ni baaba wɔsɛɛ loo gbele po gbeyei. Abaahere mɛi ni baamia amɛhiɛ amɛto amɛtsui shi kɛyashi naagbee lɛ ayiwala. No hewɔ lɛ, esa akɛ wɔkwɛ jogbaŋŋ koni bɔ ni je lɛ susuɔ nii ahe ehaa lɛ akaná wɔnɔ hewalɛ, ni no fite hekɛnɔfɔɔ ni wɔyɔɔ yɛ Yehowa mli lɛ. Moŋ lɛ, esa akɛ wɔtswa wɔfai shi akɛ wɔbaawaje wɔhemɔkɛyeli lɛ, ní wɔkɛ be ni Nyɔŋmɔ kɛto etsui shi lɛ atsu nii jogbaŋŋ.—Mat. 24:13; nyɛkanea 2 Petro 3:17, 18.
[Nikasemɔ lɛ he Sanebimɔi]
[Mfonirii ni yɔɔ baafa 21]
Kɛ́ wɔkase Nyɔŋmɔ tsuishitoo lɛ, no baaha wɔkɛ Maŋtsɛyeli lɛ aye klɛŋklɛŋ gbɛhe, ni wɔbaaná jɔɔmɔi!
