Bo Nyɔŋmɔ Toi Koni Oná Eshiwoi lɛ Ahe Sɛɛ
Bo Nyɔŋmɔ Toi Koni Oná Eshiwoi lɛ Ahe Sɛɛ
“Akɛni [Nyɔŋmɔ bɛ] mɔ ko ni fe lɛ diɛŋtsɛ ni eeekã lɛ kita hewɔ lɛ, ekã lɛ diɛŋtsɛ ehe kita.”—HEB. 6:13.
KWƐMƆ AKƐ OBAANYƐ OHA HETOO LO:
Mɛni hewɔ wɔbaanyɛ wɔná nɔmimaa akɛ Nyɔŋmɔ yiŋtoi lɛ baaba mli lɛ?
Beni Adam kɛ Hawa fee esha lɛ sɛɛ lɛ, mɛɛ shi Nyɔŋmɔ wo?
Mɛɛ gbɛ nɔ wɔnáa shi ni Nyɔŋmɔ wo Abraham ni ekã he kita lɛ he sɛɛ?
1. Mɛɛ gbɛ nɔ Yehowa naawiemɔ yɔɔ srɔto yɛ adesai ni yeee emuu lɛ anɔ he?
YEHOWA ji “Nyɔŋmɔ anɔkwafo” lɛ. (Lala 31:6) Jeee be fɛɛ be adesai ni yeee emuu lɛ wieɔ anɔkwale, shi “Nyɔŋmɔ nyɛŋ emale.” (Heb. 6:18; nyɛkanea 4 Mose 23:19.) Nɔ fɛɛ nɔ ni etoɔ eyiŋ akɛ ebaafee eha adesai lɛ baa mli be fɛɛ be. Ákɛ nɔkwɛmɔnɔ lɛ, nɔ fɛɛ nɔ ni Nyɔŋmɔ kɛɛ ebaafee yɛ adebɔɔ gbii ni eko fɛɛ eko he be kplaŋŋ lɛ nɔ lɛ, “efee nakai.” No hewɔ lɛ, yɛ adebɔɔ gbi ni ji ekpaa lɛ naagbee lɛ, “Nyɔŋmɔ kwɛ nibii fɛɛ ni efee lɛ, ni naa, ehi naakpa.”—1 Mose 1:6, 7, 30, 31.
2. Mɛɛ gbi ji Nyɔŋmɔ hejɔɔmɔ gbi lɛ, ni mɛni hewɔ “efee lɛ krɔŋkrɔŋ” lɛ?
2 Beni Yehowa kwɛ nibii ni ebɔ lɛ fɛɛ lɛ, ejaje akɛ gbi ni ji kpawo lɛ eje shishi—jeee gbi ni ŋmɛlɛtswai 24 yɔɔ mli, shi moŋ be kplaŋŋ ni ekɛmiijɔɔ ehe kɛjɛ eshikpɔŋ lɛ nɔ nibɔɔ lɛ he. (1 Mose 2:2) Nyɔŋmɔ miijɔɔ ehe lolo. (Heb. 4:9, 10) Biblia lɛ etsɔɔɔ be pɔtɛɛ ni eje shishi. Shi wɔle akɛ eje shishi beni abɔ Adam ŋa Hawa lɛ sɛɛ, aaafee afii 6,000 ni eho nɛ lɛ. Etsɛŋ ni Yesu Kristo Afii Akpe Nɔyeli lɛ baaje shishi, ni enɛ baaha Nyɔŋmɔ yiŋtoo ni ekɛbɔ shikpɔŋ lɛ, ákɛ efee shikpɔŋ lɛ paradeiso koni adesai ni eye emuu ahi nɔ kɛya naanɔ lɛ aba mli. (1 Mose 1:27, 28; Kpoj. 20:6) Ani obaanyɛ oná wɔsɛɛ shihilɛ ni yɔɔ miishɛɛ nɛɛ mli gbɛfaŋnɔ? Obaanyɛ oná aahu! Ejaakɛ “Nyɔŋmɔ jɔɔ gbi ni ji gbi kpawo lɛ, ni efee lɛ krɔŋkrɔŋ.” Enɛ tsɔɔ akɛ, ekɔɔɔ he eko nɔ ni baaba lɛ, Nyɔŋmɔ yiŋtoo lɛ baaba mli yɛ ehejɔɔmɔ lɛ naagbee.—1 Mose 2:3.
3. (a) Mɛɛ naagba ba beni Nyɔŋmɔ hejɔɔmɔ gbi lɛ je shishi lɛ sɛɛ? (b) Te Yehowa tsɔɔ akɛ ebaatsu naagba lɛ he nii eha tɛŋŋ?
3 Shi beni Nyɔŋmɔ hejɔɔmɔ gbi lɛ je shishi lɛ sɛɛ lɛ, naagba ko ba. Satan, ni ji Nyɔŋmɔ bɔfoi lɛ ateŋ mɔ kome lɛ, bɔ mɔdɛŋ akɛ eha ajá lɛ moŋ. Satan ji klɛŋklɛŋ mɔ ni male; elaka Hawa ni eha egbo Yehowa nɔ toi. (1 Tim. 2:14) No sɛɛ lɛ, Hawa ha ewu lɛ hu gbo Yehowa nɔ toi. (1 Mose 3:1-6) Atuatsemɔ nɛɛ ji nifeemɔ ni ehiii fe fɛɛ ni eba yɛ shihilɛ mli. Eyɛ mli akɛ Satan folɔ Yehowa naa akɛ eji amalelɔ moŋ, shi Yehowa eyanuuu he akɛ ehe miihia ni ekã kita kɛtsɔɔ akɛ eyiŋtoo kɛha shikpɔŋ lɛ baaba mli. Yɛ no najiaŋ lɛ, Nyɔŋmɔ kɛ shiwoo ko ni abaanu shishi yɛ sɛɛ mli lɛ ha, ni ekɛtsɔɔ bɔ ni ebaatsu nakai atuatsemɔ lɛ he nii eha. Yehowa kɛɛ ekɛ “nyɛɛ” baaŋmɛ Satan kɛ yoo lɛ teŋ, kɛ Satan seshi kɛ yoo lɛ seshi teŋ; shiwoo Seshi lɛ baatswa Satan ‘yitso’ nɔ̃, ni lɛ hu ‘eeetswa enanetsitsi nɔ̃.’—1 Mose 3:15; Kpoj. 12:9.
KITAKAMƆ—NIFEEMƆ KO NI AKƐMAA SANE NƆ MI
4, 5. Mɛni Abraham fee kɛma sane nɔ mi?
4 Kɛyashi nakai be lɛ mli yɛ adesai ayinɔsane mli lɛ, eeenyɛ efee akɛ ehe ehiaaa ni mɔ ko akã kita kɛma sane ko nɔ mi akɛ eji anɔkwale. Ehe ehiaaa ni bɔɔ nii ni eye emuu ni sumɔɔ Nyɔŋmɔ lɛ akã kita; amɛwieɔ anɔkwale be fɛɛ be, ni amɛheɔ amɛhe amɛyeɔ. Shi nibii tsake kwraa kɛjɛ beni adesai fee esha ni no ha amɛfee mɛi ni yeee emuu dɔŋŋ lɛ. Sɛɛ mli beni amale kɛ lakamɔ bahe shi yɛ adesai ateŋ lɛ, ehe bahia ni akã kita kɛtsɔɔ akɛ sane ko ni he hiaa lɛ ji anɔkwale.
5 Abraham kã kita, kɛ́ hooo lɛ, yɛ shihilɛi srɔtoi etɛ amli. (1 Mose 21:22-24; 24:2-4, 9) Ákɛ nɔkwɛmɔnɔ lɛ, ekã kita beni eyaye Elam maŋtsɛ lɛ kɛ emɛi lɛ anɔ kunim ni eku esɛɛ ebaa lɛ. Salem kɛ Sodom maŋtsɛmɛi lɛ kɛ Abraham yakpe. No mli lɛ, Melkizedek, ni ji Salem maŋtsɛ lɛ ji “ŋwɛi flooflo Nyɔŋmɔ lɛ osɔfo.” Enɛ hewɔ lɛ, ejɔɔ Abraham, ni ejie Nyɔŋmɔ yi akɛ eha Abraham eye ehenyɛlɔi lɛ anɔ kunim. (1 Mose 14:17-20) No sɛɛ lɛ, beni Sodom maŋtsɛ lɛ miitao ejuro Abraham yɛ maŋtsɛ lɛ webii lɛ ni eyakpɔ̃ amɛ kɛjɛ mɛi ni tutua amɛ lɛ adɛŋ lɛ hewɔ lɛ, Abraham kã kita akɛ: “Miwó minine nɔ mitsɔɔ Yehowa ŋwɛi flooflo Nyɔŋmɔ ni ji ŋwɛi kɛ shikpɔŋ tsɛ lɛ, akɛ kɛjɛ kpãa nɔ aahu kɛyashi tokotafii kpãa nɔ loo nii fɛɛ ni ji onɔ lɛ, kɛji mikɔ eko, fĩi! koni okakɛɛ akɛ: Mi, mifee Abram niiatsɛ.”—1 Mose 14:21-23.
YEHOWA WO ABRAHAM SHI, NI EKÃ HE KITA
6. (a) Mɛɛ nɔkwɛmɔnɔ Abraham fee eha wɔ? (b) Te wɔbaaná Abraham toiboo lɛ he sɛɛ wɔha tɛŋŋ?
6 Yehowa Nyɔŋmɔ kɛ wiemɔ tamɔ, “Gbii abɔ ni mihiɛ kã nɛɛ, Nuŋtsɔ [Ofe] Yehowa kɛɛ,” kã kita koni adesai ni yeee emuu lɛ ahe lɛ amɛye. (Ezek. 17:16) Yehowa ekã kita nɔ ni fe shii 40 yɛ Biblia lɛ mli. Nɔkwɛmɔnɔ ni ale waa ji kita ni Nyɔŋmɔ kã Abraham lɛ. Yehowa kɛ Abraham fee kpaŋmɔi srɔtoi yɛ ewala shihilɛ mli, ni kpaŋmɔi nɛɛ fɛɛ ha ana akɛ shiwoo Seshi lɛ baajɛ Abraham mli, ni ebaatsɔ ebi Isak nɔ kɛba. (1 Mose 12:1-3, 7; 13:14-17; 15:5, 18; 21:12) No sɛɛ lɛ, Yehowa fã Abraham ni ekɛ ebi ni esumɔɔ lɛ ayashã afɔle, ni enɛ ji kaa ko ni naa wa waa. Oya nɔŋŋ ni Abraham tee akɛ ekɛ Isak yaashã afɔle lɛ, shi beni eka akɛ ebaagbe lɛ nɔŋŋ ni Nyɔŋmɔ bɔfo ko tsĩ enaa. Kɛkɛ ni Nyɔŋmɔ kã kita nɛɛ akɛ: “Mikã mi diɛŋtsɛ mihe kita, akɛni ofee enɛ ní okãmãaa mi obi lɛ ni ji obi kome too lɛ, hewɔ lɛ jɔɔmɔ majɔɔo, ni fá maha oseshi afá tamɔ ŋwɛi ŋulamii kɛ ŋshɔ naa shia, ni oseshi lɛ aaaye ehenyɛlɔi agbói lɛ anɔ; ni [oseshi lɛ nɔ shikpɔŋ lɛ nɔ jeŋmaji lɛ fɛɛ aaatsɔ aná jɔɔmɔi], ejaakɛ obo migbee toi.”—1 Mose 22:1-3, 9-12, 15-18.
7, 8. (a) Mɛni hewɔ Nyɔŋmɔ kã Abraham kita lɛ? (b) Te Yesu “tooi krokomɛi” lɛ baaná kita ni Nyɔŋmɔ kã lɛ he sɛɛ amɛha tɛŋŋ?
7 Mɛni hewɔ Nyɔŋmɔ kã Abraham kita akɛ E-shiwoi lɛ baaba mli lɛ? Efee nakai koni ekɛwo mɛi ni kɛ Kristo baaye nɔ sɛɛ mli, ni ji shiwoo ‘seshi’ lɛ fã kroko lɛ hewalɛ, ní ekɛwaje amɛhemɔkɛyeli lɛ hu. (Nyɛkanea Hebribii 6:13-18; Gal. 3:29) Taakɛ bɔfo Paulo tsɔɔ mli lɛ, Yehowa kɛ ‘kita damɔ mli; koni wɔtsɔ̃ saji enyɔ ni tsakeee, ni ji shi ni ewo kɛ kita ni ekã, ni Nyɔŋmɔ nyɛŋ emale yɛ mli lɛ anɔ wɔná miishɛjemɔ ni wa, ni wɔkɛmɔ nɔhiɛkamɔ ni kã wɔhiɛ lɛ mli.’
8 Jeee Kristofoi ni afɔ amɛ mu lɛ pɛ náa kita ni Nyɔŋmɔ kã Abraham lɛ he sɛɛ. Yehowa kã kita akɛ, ‘shikpɔŋ lɛ nɔ jeŋmaji lɛ fɛɛ aaatsɔ Abraham seshi lɛ nɔ aná jɔɔmɔi.’ (1 Mose 22:18) Kristo “tooi krokomɛi” ni boɔ lɛ toi ni yɔɔ hiɛnɔkamɔ akɛ amɛbaahi paradeiso yɛ shikpɔŋ lɛ nɔ kɛya naanɔ lɛ fata mɛi ni baaná jɔɔmɔi nɛɛ ahe. (Yoh. 10:16) Kɛ́ oyɛ ŋwɛi hiɛnɔkamɔ jio, shikpɔŋ lɛ nɔ nɔ jio lɛ, ‘mɔ mli’ kpɛŋŋ kɛtsɔ Nyɔŋmɔ toi ni ooobo owala gbii abɔ fɛɛ lɛ nɔ.—Nyɛkanea Hebribii 6:11, 12.
KITAI KROKOMƐI NI NYƆŊMƆ KÃ NI KƆƆ SHI NI EWO ABRAHAM LƐ HE
9. Mɛɛ kita Nyɔŋmɔ kã beni Abraham seshibii lɛ yɔɔ nyɔŋyeli mli yɛ Mizraim lɛ?
9 Afii ohai abɔ yɛ Abraham gbele sɛɛ lɛ, Yehowa kã shi ni ewo Abraham lɛ he kita ekoŋŋ beni etsu Mose koni ekɛ Abraham seshibii ni yɔɔ nyɔŋyeli mli yɛ Mizraim lɛ ayawie lɛ. (2 Mose 6:6-8) Beni Nyɔŋmɔ wieɔ nakai kita ni ekã lɛ he lɛ, ewie akɛ: “Gbi ní miŋɔ Israel lɛ . . . Mikã amɛ kita akɛ majie amɛ kɛjɛ Egipt shikpɔŋ lɛ nɔ kɛya shikpɔŋ ko ní mito miha amɛ lɛ nɔ; shikpɔŋ ni hi ni ebaa nii, ni eji shikpɔji lɛ ateŋ nɔ ni hi fe fɛɛ lɛ.”—Ezek. 20:5, 6, Ga Biblia hee.
10. Mɛɛ shi Nyɔŋmɔ wo Israel maŋ lɛ beni ekpɔ̃ amɛ kɛjɛ Mizraim lɛ sɛɛ?
10 Agbɛnɛ, beni akpɔ̃ Israelbii lɛ kɛjɛ Mizraim sɛɛ lɛ, Yehowa wo amɛ shi ekoŋŋ akɛ: “Kɛji nyɛaabo migbee toi ní nyɛye mikpaŋmɔ lɛ nɔ lɛ, no lɛ nyɛaatsɔ mi diɛŋtsɛ minɔ̃ yɛ maji fɛɛ ateŋ; ejaakɛ shikpɔŋ lɛ fɛɛ lɛ minɔ̃ŋ. Shi nyɛ lɛ, nyɛaatsɔ osɔfoi amaŋtsɛyeli kɛ maŋ krɔŋkrɔŋ nyɛha mi.” (2 Mose 19:5, 6) Kwɛ hegbɛ kpele ni Nyɔŋmɔ ha Israelbii lɛ ná! Enɛ tsɔɔ akɛ kɛji amɛbo Nyɔŋmɔ toi lɛ, ebaaha amɛsɔmɔ akɛ osɔfoi amaŋtsɛyeli ni abaatsɔ nɔ ajɔɔ adesai krokomɛi fɛɛ. Sɛɛ mli beni Yehowa wieɔ nɔ ni efee eha Israel maŋ lɛ he lɛ, ekɛɛ akɛ: ‘Mikã kita mitsɔɔo, ni mikɛo kpaŋ.’—Ezek. 16:8.
11. Te Israelbii lɛ here ninefɔɔ ni Nyɔŋmɔ kɛha amɛ akɛ amɛbatsɔmɔ maŋ krɛdɛɛ ko mli bii lɛ nɔ amɛha tɛŋŋ?
11 Yɛ nakai be lɛ mli lɛ, Yehowa enyɛɛɛ Israelbii lɛ anɔ ni amɛkã lɛ kita akɛ amɛbaabo lɛ toi; ni enyɛɛɛ amɛnɔ hu akɛ amɛkpɛlɛ hegbɛ ni ekɛha amɛ lɛ nɔ. Yɛ no najiaŋ lɛ, amɛjɛ amɛsuɔmɔ mli amɛkɛɛ akɛ: “Nibii fɛɛ ni Yehowa ewie lɛ wɔɔfee.” (2 Mose 19:8) Gbii etɛ sɛɛ lɛ, Yehowa Nyɔŋmɔ ha Israelbii lɛ le nɔ ni etaoɔ ni amɛfee. Klɛŋklɛŋ lɛ, Mose kane Kitai Nyɔŋma lɛ eha amɛ, ni no sɛɛ lɛ eha amɛle kitai krokomɛi ni aŋmala yɛ 2 Mose 20:22 kɛyashi 2 Mose 23:33 lɛ. Mɛni Israelbii lɛ kɛɛ? “Maŋ lɛ fɛɛ here nɔ kɛ gbee kome amɛkɛɛ: Wiemɔi fɛɛ ni Yehowa wie lɛ wɔɔfee.” (2 Mose 24:3) Kɛkɛ ni Mose ŋmala mlai nɛɛ fɛɛ ewo “kpaŋmɔ lɛ wolo lɛ” mli, ni ekane lɛ waa ewo maŋ muu lɛ fɛɛ toiiaŋ ekoŋŋ. No sɛɛ lɛ, maŋbii lɛ wo shi nɔ ni ji shii etɛ nɔ akɛ: “Nii fiaa ni Yehowa ewie lɛ, wɔɔfee ni wɔɔbo toi.”—2 Mose 24:4, 7, 8.
12. Beni Yehowa wo Israelbii lɛ shi akɛ amɛaatsɔ emaŋ lɛ sɛɛ lɛ, mɛni efee, ni mɛni Israelbii lɛ hu fee beni amɛwo Nyɔŋmɔ shi lɛ?
12 Etsɛɛɛ ni Yehowa bɔi Mla kpaŋmɔ lɛ fã ni kɔɔ ehe lɛ he nitsumɔ kɛtsɔ kpee buu he gbɛjianɔ ni eto kɛha ejamɔ kɛ osɔfoyeli he gbɛjianɔ ni eto, bɔni afee ni adesai eshafeelɔi anyɛ abɛŋkɛ lɛ lɛ nɔ. Shi eyeee be ko ni Israelbii lɛ ahiɛ kpa nɔ akɛ amɛjɔɔ amɛhe nɔ amɛha Nyɔŋmɔ, ni “amɛwo Israel Mɔ krɔŋkrɔŋ lɛ mli la.” (Lala 78:41) Ákɛ nɔkwɛmɔnɔ lɛ, beni Mose yɔɔ Sinai Gɔŋ lɛ nɔ ní Yehowa kɛ gbɛtsɔɔmɔi krokomɛi haa lɛ lɛ, Israelbii lɛ eyanáaa tsui, ni hemɔkɛyeli ni amɛyɔɔ yɛ Nyɔŋmɔ mli lɛ he bɔi jɔɔ, ejaakɛ amɛsusu akɛ Mose ekwa amɛ. No hewɔ lɛ, amɛfee shika tsinabi, ni amɛkɛɛ maŋbii lɛ akɛ: “Israel, enɛɛmɛi ji onyɔŋmɔi ni jieo kɛjɛ Mizraim shikpɔŋ lɛ nɔ lɛ!” (2 Mose 32:1, 4) Kɛkɛ ni amɛbua amɛhe naa ni amɛkɛɛ amɛmiiye ‘gbi jurɔ kɛmiiha Yehowa,’ ni amɛjá amaga lɛ, ni amɛshã afɔle amɛha lɛ. Beni Yehowa na enɛ lɛ, ekɛɛ Mose akɛ: “Amɛje gbɛ ní mitsɔɔ amɛ lɛ nɔ amɛtsɔ afã oyá.” (2 Mose 32:5, 6, 8) Dɔlɛ sane ji akɛ, kɛjɛ no nɔ kɛbaa lɛ, Israelbii lɛ wo Yehowa shi shii abɔ, shi amɛyeee eko eko nɔ.—4 Mose 30:2.
KITAKAMƆI ENYƆ KROKOMƐI
13. Mɛɛ kita Nyɔŋmɔ kã Maŋtsɛ David, ni te enɛ kɔɔ shiwoo Seshi lɛ he ehaa tɛŋŋ?
13 Beni Maŋtsɛ David yeɔ Israel nɔ lɛ, Yehowa kã kitai srɔtoi enyɔ komɛi ní mɛi fɛɛ ni baabo Lɛ toi lɛ baaná he sɛɛ. Klɛŋklɛŋ lɛ, ekã David kita akɛ emaŋtsɛsɛi lɛ baahi shi kɛya naanɔ. (Lala 89:36, 37; 132:11, 12) Enɛ tsɔɔ akɛ abaatsɛ shiwoo Seshi lɛ akɛ “David bi.” (Mat. 1:1; 21:9) David jɛ heshibaa mli etsɛ shiwoo Seshi nɛɛ akɛ ‘e-Nuŋtsɔ,’ ejaakɛ Kristo baaná hegbɛ ni nɔ kwɔ fe enɔ lɛ.—Mat. 22:42-44.
14. Mɛɛ kita Yehowa kã yɛ shiwoo Seshi lɛ he, ni te wɔnáa he sɛɛ wɔhaa tɛŋŋ?
14 Nɔ ni ji enyɔ lɛ, Yehowa kɛ emumɔ lɛ tsirɛ David ni egba akɛ Maŋtsɛ ni nɔ bɛ nɛɛ baasɔmɔ hu akɛ Osɔfonukpa kɛha adesai. No mli lɛ esoro mɛi ni yeɔ maŋtsɛ, ni esoro mɛi ni yeɔ osɔfo yɛ Israel. Osɔfoi lɛ jɛ Levi akutso lɛ mli, ni maŋtsɛmɛi lɛ hu jɛ Yuda akutso lɛ mli. Shi David gba yɛ Maŋtsɛ ni baaba yɛ sɛɛ mli nɛɛ he akɛ: “Yehowa kɛɛ minuŋtsɔ lɛ akɛ: ‘Tá mininejurɔ nɔ kɛyashi beyinɔ ní maŋɔ ohenyɛlɔi lɛ mafee onajiashi maaŋoo.’ Yehowa ekã kitã ni eshwaŋ ehe: ‘Bo ji osɔfo kɛyashi naanɔ yɛ Melkizedek gbɛjianɔ lɛ naa.’” (Lala 110:1, 4) Amrɔ nɛɛ, Yesu Kristo, ni ji shiwoo Seshi lɛ miiye nɔ yɛ ŋwɛi, ni enɛ ji nakai gbalɛ lɛ mlibaa. Agbɛnɛ hu, eesɔmɔ akɛ Osɔfonukpa kɛha adesai kɛtsɔ mɛi ni etsake amɛtsui lɛ ni eyeɔ ebuaa amɛ koni amɛná amɛ kɛ Nyɔŋmɔ teŋ wekukpaa kpakpa lɛ nɔ.—Nyɛkanea Hebribii 7:21, 25, 26.
MAŊ HEE NI JI NYƆŊMƆ ISRAEL LƐ
15, 16. (a) Israel srɔtoi enyiɛ awie he yɛ Biblia lɛ mli, ni te emli nɔ ni Nyɔŋmɔ jɔɔmɔ yɔɔ nɔ ŋmɛnɛ? (b) Mɛɛ famɔ Yesu kɛha esɛɛnyiɛlɔi lɛ yɛ kitakamɔ he?
15 Akɛni Israel maŋ lɛ kpoo Yesu Kristo hewɔ lɛ, Nyɔŋmɔ kpoo amɛ, ni hegbɛ kpele ni amɛná akɛ amɛaatsɔmɔ “osɔfoi amaŋtsɛyeli” lɛ hu bɔ amɛ. Yesu kɛɛ Yudafoi ahiɛnyiɛlɔi lɛ akɛ: “Abaashɔ̃ Nyɔŋmɔ maŋtsɛyeli lɛ yɛ nyɛdɛŋ, ni aaaŋɔha jeŋmaŋ ko ní woɔ yibii.” (Mat. 21:43) Afɔ́ maŋ hee nɛɛ yɛ afi 33 Ŋ.B. Pentekoste gbi lɛ nɔ, beni afɔse Nyɔŋmɔ mumɔ lɛ ashwie Yesu kaselɔi aaafee 120 ni ebua amɛhe naa yɛ Yerusalem lɛ anɔ lɛ. Sɛɛ mli lɛ, abale mɛi nɛɛ akɛ “Nyɔŋmɔ Israel,” ni etsɛɛɛ ni aná mɛi akpei abɔ ni jɛ maji srɔtoi ni yɔɔ nakai beaŋ je lɛ mli lɛ anɔ lɛ afata amɛhe.—Gal. 6:16.
16 Ákɛ mɛi ni tamɔɔɔ heloonaa Israel lɛ, Nyɔŋmɔ maŋ hee nɛɛ etee nɔ ewo yibii kpakpai kɛtsɔ Nyɔŋmɔ toi ni eboɔ lɛ nɔ. Mlai ni emli bii lɛ yeɔ nɔ lɛ ateŋ ekome kɔɔ kitakamɔ he. Beni Yesu yɔɔ shikpɔŋ lɛ nɔ lɛ, mɛi kɛ kitakamɔ tsuuu nii jogbaŋŋ, amɛkamɔɔ amale kitai, ni amɛkamɔɔ kita yɛ nibii ni he ehiaaa po ahe. (Mat. 23:16-22) Yesu kɛɛ esɛɛnyiɛlɔi lɛ akɛ: ‘Nyɛkakãa kitã kwraa! Shi nyɛhaa nyɛwiemɔ afea: Hɛɛ, hɛɛ! dabi, dabi! shi nɔ fɛɛ nɔ ni fe enɛɛmɛi lɛ ejɛ mɔ fɔŋ lɛŋ.’—Mat. 5:34, 37.
17. Mɛɛ sanebimɔi wɔbaasusu he yɛ nikasemɔ ni nyiɛ sɛɛ lɛ mli?
17 Ani enɛ tsɔɔ akɛ be fɛɛ be ni mɔ ko baakã kita lɛ, etɔ̃? Nɔ ni he hiaa fe fɛɛ lɛ, mɛni wɔwiemɔ ni wɔɔha efee hɛɛ, hɛɛ lɛ tsɔɔ? Wɔbaasusu sanebimɔi nɛɛ ahe yɛ nikasemɔ ni nyiɛ sɛɛ lɛ mli. Beni wɔyaa nɔ wɔjwɛŋɔ Nyɔŋmɔ Wiemɔ lɛ nɔ lɛ, no baatsirɛ wɔ koni wɔya nɔ wɔbo Yehowa toi. Ni lɛ hu ebaajɔɔ wɔ kɛya naanɔ, taakɛ ewo shi ni ekã he kita lɛ.
[Nikasemɔ lɛ he Sanebimɔi]
[Mfoniri ni yɔɔ baafa 24]
Etsɛŋ ni Abraham baana Yehowa shiwoi lɛ amlibaa
[Wiemɔ ni akɔ ni akɛmiitsu nii ni yɔɔ baafa 26]
Yehowa shiwoi lɛ baa mli be fɛɛ be
