Ani Okaiɔ?

Ani okane Buu-Mɔɔ srɔtoi ni ba nyɛsɛɛ nɛɛ jogbaŋŋ? Kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

Te wɔɔfee tɛŋŋ wɔkudɔ wɔlilɛi jogbaŋŋ koni ekawo la lɛ?

Esa akɛ wɔpɛi wɔtsui mli wɔkwɛ. Yɛ nɔ najiaŋ ni wɔɔná nyɛmi ko he jwɛŋmɔ gbonyo lɛ, esa akɛ wɔbi wɔhe akɛ, mɛni hewɔ kwraa ni mifeɔ nakai? Ani wɔwieɔ mɔ lɛ he nyanyaanya koni mɛi ana akɛ wɔbɔɔ mɔdɛŋ fe mɔ fɛɛ mɔ? Kɛfata he lɛ, nakai ni wɔɔfee lɛ moŋ baaha wɔtsi la lɛ mli.—8/15, baafa 21.

Mɛɛ gbɛ nɔ kɛ́ Nyɔŋmɔ kɛ eshai fa lɛ, ehiɛ kpaa nɔ?

Yehowa kɛɔ mɛi ni etsui kã amɛnɔ lɛ akɛ: “Maŋɔ amɛnishaianii lɛ mafa, ni amɛhe eshai lɛ mikaiŋ dɔŋŋ!” (Yer. 31:34) Ebaanyɛ edamɔ kpɔmɔ afɔleshaa lɛ nɔ ekɛ eshai afa. Kɛ́ Nyɔŋmɔ fee nakai lɛ, ehiɛ kpaa nɔ kɛ shishinumɔ lɛ akɛ, edamɔŋ nakai eshai lɛ anɔ ni ekɛ wɔ aye wɔsɛɛ.—10/1, baafa 32.

Mɛɛ nifeemɔi eshwɛ ni baaba dani Yehowa gbi lɛ baaba?

Mɛi baakɛɛ, “Hejɔlɛ yɛ ni wɔyɛ shweshweeshwe!” Jeŋmaji lɛ baatutua Babilon Kpeteŋkpele lɛ, ni amɛbaakpata ehiɛ. Abaatutua Nyɔŋmɔ webii lɛ. Harmagedon ta lɛ baafɛ, no sɛɛ lɛ, akɛ Satan kɛ edaimonioi lɛ baawo bu kwɔŋkwɔŋ lɛ mli.—9/15, baafa 4.

Mɛɛ gbɛ nɔ lé ni wɔleee be ni naagbee lɛ baaba lɛ yeɔ ebuaa wɔ?

Lé ni wɔleee gbi lɛ kɛ ŋmɛlɛtswaa lɛ haa anaa nɔ ni yɔɔ wɔtsui mli diɛŋtsɛ. Ehaa wɔnáa hegbɛ ni wɔkɛaaha Nyɔŋmɔ tsui anyɔ emli. Ehaaa wɔfó wɔ pɛ wɔnɔ mli, shi moŋ ehaa wɔsɔmɔɔ Nyɔŋmɔ, ni wɔyeɔ wɔbuaa mɛi, ni eyeɔ ebuaa wɔ ni wɔkɛ wɔhe fɔ̃ɔ Nyɔŋmɔ kɛ e-Wiemɔ lɛ nɔ kwraa. Kɛfata he lɛ, ehaa wɔkaseɔ nii kɛjɛɔ shihilɛi ni mli wawai ni wɔkɛkpeɔ lɛ amli, ni ewajeɔ wɔhemɔkɛyeli lɛ.—9/15, baafa 24-25.

Mɛɛ gbɛ nɔ Nyɔŋmɔ aaatsɔ ejaje nibii ni etɔtɔ lɛ?

Etsɛŋ Nyɔŋmɔ kɛ jalɛ jeŋ hee ko baaba, ni mɛi pɛ ni baahi jɛi ji mɛi ni jieɔ suɔmɔ kpo amɛtsɔɔ mɛi krokomɛi kɛ Nyɔŋmɔ. (2 Pet. 3:13) Yesu, ni ji Maŋtsɛ ni Nyɔŋmɔ ehala ni yeɔ nɔ yɛ ŋwɛi lɛ baajie naagbai fɛɛ kɛya. (Yes. 33:24; Kpoj. 21:4)—10/1, baafa 7.

Namɛi “ŋulamii kpawo” ni yɔɔ Yesu ninejurɔ nɔ ni awie he yɛ Kpojiemɔ 1:16, 20 lɛ damɔ shi kɛha?

Amɛdamɔ shi kɛha asafoŋ onukpai ni afɔ amɛ mu lɛ, shi ekɔɔ asafoŋ onukpai fɛɛ hu he yɛ gbɛ ko nɔ.—10/15, baafa 14.

Mɛɛ Biblia mli shishitoo mlai haa wɔnaa Nyɔŋmɔ susumɔ yɛ tawa shɛremɔ he?

Nyɔŋmɔ miisumɔ ni wɔná bulɛ wɔha wala. (5 Mose 5:17) Eekpa gbɛ akɛ wɔbaasumɔ lɛ, ni wɔbaasumɔ wɔnanemɛi hu. (Mar. 12:28-31) Nyɔŋmɔ kpaa gbɛ akɛ wɔkwa sui gbohii. (2 Kor. 7:1)—10/1, baafa 15.

Mɛɛ gbɛ nɔ Yesu ba ehe shi taakɛ awie yɛ Yesaia 50:4, 5 lɛ?

Nakai ŋmalɛ lɛ kɛɔ akɛ, lɛ mɔ ni aha lɛ “nikaselɔi alilɛi” lɛ, ‘ekuŋ esɛɛ.’ Yesu ba ehe shi, ni ebo nibii ni e-Tsɛ lɛ tsɔɔ lɛ lɛ toi jogbaŋŋ. Yesu miisumɔ ni ekase nii kɛjɛ Yehowa dɛŋ, ni ekwɛ bɔ ni Nyɔŋmɔ jɛɔ heshibaa mli enaa adesai eshafeelɔi mɔbɔ lɛ.—11/15, baafa 11.

Kɛ́ wɔjie mlihilɛ kpo lɛ, mɛɛ gbɛ nɔ wɔnáa he sɛɛ?

Kɛ́ wɔjie mlihilɛ kpo wɔtsɔɔ mɛi krokomɛi lɛ, wɔbaleɔ Nyɔŋmɔ jogbaŋŋ, ni no haa wɔmii shɛɔ wɔhe waa. (1 Yoh. 4:7; Mat. 5:7, 8) Kɛfata he lɛ, kɛ́ wɔfee nakai lɛ, eji nɔ ko kple yɛ Yehowa hiɛ. (Abɛi 19:17)—10/1, baafa 20.