Buu-Mɔɔ ni Afee yɛ Blɔfo ni Yɔɔ Mlɛo Mli​—Mɛni Hewɔ Afee?

AFII nyɔŋmai abɔ ni eho nɛ lɛ, hii kɛ yei ni yɔɔ je lɛŋ he fɛɛ he lɛ enya Biblia mli saji ni akalaa yɛ Buu-Mɔɔ lɛ mli lɛ ahe waa, ni amɛná he sɛɛ hu. Shi yɛ July 2011 lɛ, afee klɛŋklɛŋ Buu-Mɔɔ ni yɔɔ Blɔfo ni yɔɔ mlɛo mli. Awie yɛ nakai Buu-Mɔɔ lɛ mli akɛ: “Akɛ afi baaka wolo hee nɛɛ akwɛ, ni kɛ́ ana akɛ mɛi miiná he sɛɛ lɛ, abaaya nɔ akala.”

Amrɔ nɛɛ wɔkɛ miishɛɛ miiha nyɛle akɛ wɔkpɛ mli akɛ aya nɔ akala wolo nɛɛ. Kɛfata he lɛ, wɔsɛɛ ko lɛ abaafee yɛ French, Portuguese, kɛ Spanish ni yɔɔ mlɛo hu mli.

NƆ HEWƆ NI MƐI NYAA HE

Beni mɛi babaoo ni yɔɔ South Pacific lɛ anine shɛ Buu-Mɔɔ ni afee yɛ Blɔfo ni yɔɔ mlɛo mli lɛ nɔ lɛ, amɛkɛɛ akɛ: “Agbɛnɛ, nyɛmimɛi lɛ nuɔ Buu-Mɔɔ lɛ shishi jogbaŋŋ.” Atsɔɔ yɛ wolo kroko ni aŋma lɛ mli akɛ: “Amrɔ nɛɛ akɛ be ni kulɛ afiteɔ kɛtaoɔ wiemɔi amli lɛ pɛiɔ ŋmalɛi ni yɔɔ nikasemɔ lɛ mli lɛ amli, koni anu shishi, ni ana bɔ ni amɛkɔɔ nikasemɔ lɛ he.”

Yoo ko ni egbe kɔleji naa yɛ United States lɛ kɛɛ akɛ: “Mikɛ afii 18 sɔŋŋ ewie yunivɛsiti Blɔfo wujiwuji, ni nakai nɔŋŋ miŋmaa nii hu. Enɛ hewɔ lɛ, ewa kɛha mɛi akɛ amɛaanu bɔ ni miwieɔ kɛ bɔ ni misusuɔ nii ahe lɛ shishi. Mina akɛ esa akɛ matsake bɔ ni misusuɔ nii ahe kɛ bɔ ni miwieɔ mihaa lɛ kwraa.” Amrɔ nɛɛ, eji shiɛlɔ ni yɔɔ ekãa, ni eŋma akɛ: “Buu-Mɔɔ ni afee yɛ Blɔfo ni yɔɔ mlɛo mli lɛ eye  ebua mi waa. Wiemɔi ni yɔɔ mlɛo ni akɛtsuɔ nii yɛ mli lɛ haa minaa gbɛ ni matsɔ nɔ mikɛ wiemɔi ni shishinumɔ waaa atsu nii.”

Nyɛmi yoo ko ni yɔɔ England ni abaptisi lɛ afi 1972 lɛ ŋma yɛ Buu-Mɔɔ ni afee yɛ Blɔfo ni yɔɔ mlɛo mli lɛ he akɛ: “Beni mikane klɛŋklɛŋ nɔ ni afee lɛ, efee mi tamɔ nɔ ni Yehowa ta mimasɛi ni ekɛ enine efɔ̃ mikɔŋ nɔ ni ekɛmi miikane. Oookɛɛ tsɛ ko ni miitã ebi adesã kɛmiiwɔle lɛ.”

Nyɛmi yoo ko ni sɔmɔɔ yɛ United States Betel ni abaptisi lɛ nɔ ni fe afii 40 nɛ lɛ kɛɛ akɛ, bei komɛi lɛ Blɔfo ni yɔɔ mlɛo nɔ lɛ haa enuɔ nibii ashishi jogbaŋŋ. Akɛ nɔkwɛmɔnɔ lɛ, akrabatsa ni ji “Some Expressions Explained” (Wiemɔi Komɛi ni Atsɔɔ Shishi) ni je kpo yɛ September 15, 2011 nɔ lɛ mli lɛ gbála wiemɔ ni ji “odasefoi babaoo ni ebɔle wɔ tamɔ atatu” ni yɔɔ Hebribii 12:1 lɛ mli akɛ: “Amɛyi fa aahu akɛ anyɛɛɛ amɛ akane.” Ekɛɛ akɛ: “Enɛ ha minu nakai ŋmalɛ lɛ shishi jogbaŋŋ.” Ewie daa otsi asafoŋ kpee lɛ he akɛ: “Kɛ́ gbekɛ ko kane hetoo lɛ tɛ̃ɛ kɛjɛ Blɔfo ni yɔɔ mlɛo nɔ lɛ mli po lɛ, emli wiemɔi lɛ tamɔɔɔ Blɔfo Buu-Mɔɔ lɛ, ni ji nikasemɔ nɔ ni mɛi babaoo hiɛ lɛ. No hewɔ lɛ, gbekɛ lɛ hetoo lɛ feɔ ehee kwraa yɛ toibolɔi lɛ atoiiaŋ.”

Nyɛmi yoo kroko ni sɔmɔɔ yɛ Betel lɛ wie akɛ: “Daa nɛɛ miishwe ni manu gbekɛbii lɛ agbee yɛ asafo lɛ mli. Buu-Mɔɔ ni afee yɛ Blɔfo ni yɔɔ mlɛo mli lɛ yeɔ ebuaa amɛ ni amɛnyɛɔ amɛkɛ nɔmimaa wieɔ. Hetoi ni amɛhaa lɛ woɔ mi hewalɛ waa.”

 Nyɛmi yoo ko ni abaptisi lɛ afi 1984 lɛ wie Blɔfo ni yɔɔ mlɛo nɔ lɛ he akɛ: “Oookɛɛ mi aŋma aha. Ehaa minuɔ nɔ ni mikaneɔ lɛ shishi yɛ gbɛ ni waaa nɔ. Agbɛnɛ miyɛ nɔmimaa akɛ manyɛ maha saji ahetoo yɛ Buu-Mɔɔ Nikasemɔ lɛ shishi.”

WOLO KO NI FƆLƆI SHWƐƐƐ HE KWRAA

Yoo ko ni yɔɔ binuu ni eye afii kpawo lɛ kɛɛ akɛ: “Tsutsu lɛ mikɛ be babaoo gbálaa wiemɔi pii amli mihaa lɛ beni wɔmiisaa wɔhe kɛha Buu-Mɔɔ Nikasemɔ lɛ, ni enɛ haa etɔɔ mi waa.” Mɛɛ gbɛ nɔ Blɔfo ni yɔɔ mlɛo nɔ lɛ eye ebua lɛ? Eŋma akɛ: “Bɔ ni enyɛɔ ekaneɔ kukuji lɛ amli, ni enuɔ shishi lɛ feɔ mi naakpɛɛ waa. Akɛni wiemɔi lɛ ashishinumɔ waaa, ni amɛsɛɛ kɛlɛɛɛ hewɔ lɛ, ekasemɔ waaa kɛhaaa lɛ. Amrɔ nɛɛ, lɛ diɛŋtsɛ etaoɔ saji lɛ ahetoo, ni ekɛ ejwɛŋmɔ maa nikasemɔ lɛ nɔ aahu kɛyashiɔ agbeɔ naa.”

Yoo ko ni ebiyoo eye afii nɛɛhu lɛ hu ŋma akɛ: “Tsutsu lɛ, ja wɔye wɔbua lɛ dani enyɛɔ ehaa saji ahetoo. Amrɔ nɛɛ, lɛ diɛŋtsɛ esaa ehe kɛha saji ahetoohamɔ. Jeee be fɛɛ be wɔgbálaa saji lɛ amli wɔhaa lɛ. Akɛni enuɔ shishi hewɔ lɛ, amrɔ nɛɛ enuɔ he akɛ lɛ hu efata Buu-Mɔɔ Nikasemɔ lɛ he.”

TE GBEKƐBII NAA LƐ AMƐHAA TƐŊŊ?

Gbekɛbii babaoo nuɔ he akɛ, amɛhewɔ afee Buu-Mɔɔ ni yɔɔ Blɔfo ni yɔɔ mlɛo mli lɛ. Gbekɛ yoo ko ni atsɛɔ lɛ Rebecca ni eye afii 12 lɛ kɛɛ akɛ: “Nyɛfainɛ, nyɛyaa nɔ nyɛkalaa!” Ekɛfata he akɛ: “Minyaa akrabatsa ni ji ‘Some Expressions Explained’ lɛ he waa. Eyɛ mlɛo kɛha gbekɛbii.”

Gbekɛ yoo ko ni atsɛɔ lɛ Nicolette ni eye afii kpawo lɛ hu wie nɔ ko ni tamɔ nakai nɔŋŋ akɛ: “Tsutsu ko lɛ minuuu Buu-Mɔɔ lɛ shishi. Amrɔ nɛɛ, mi diɛŋtsɛ manyɛ maha saji babaoo ahetoo.” Gbekɛ yoo ko ni atsɛɔ lɛ Emma ni eye afii nɛɛhu lɛ ŋma akɛ: “Eye ebua mi kɛ minyɛmi nuu ni eye afii ekpaa lɛ waa. Wɔnyɛɔ wɔnuɔ nibii babaoo shishi! Nyɛyiwaladɔŋŋ!”

Eyɛ faŋŋ akɛ, mɛi babaoo miiná Buu-Mɔɔ ni afee yɛ Blɔfo ni yɔɔ mlɛo mli, ni wiemɔi ni shishinumɔ waaa yɔɔ mli lɛ he sɛɛ waa. Eeye eebua mɛi waa, ni abaaya nɔ akala no kɛ nɔ ni abɔi kalamɔ kɛjɛ afi 1879 ní mɛi ená he sɛɛ waa lɛ fɛɛ.

[Wiemɔ ni akɔ ni akɛmiitsu nii ni yɔɔ baafa 30]

“Amrɔ nɛɛ akɛ be ni kulɛ afiteɔ kɛtaoɔ wiemɔi amli lɛ pɛiɔ ŋmalɛi ni yɔɔ nikasemɔ lɛ mli lɛ amli, koni anu shishi, ni ana bɔ ni amɛkɔɔ nikasemɔ lɛ he”

[Wiemɔ ni akɔ ni akɛmiitsu nii ni yɔɔ baafa 31]

“Bɔ ni enyɛɔ ekaneɔ kukuji lɛ amli, ni enuɔ shishi lɛ feɔ mi naakpɛɛ waa”